Chapter 54

śrīkṛṣṇa uvāca |
śṛṇu tvaṃ rādhike tatrā'vasare daityayoṣitaḥ |
lakṣaśo yuddhavettryaśca vyomamārgānumārgagāḥ || 1 ||
[Analyze grammar]

uḍḍīyoḍḍīya vai krūrāḥ saśastrāśca samantataḥ |
saptamyāṃ bhūmikāyāṃ tā viviśuryatra kanyakāḥ || 2 ||
[Analyze grammar]

dvāsaptatisahasrāṇi vartante kṛṣṇamānasāḥ |
cukruśuḥ kanyakā vīkṣya rākṣasīścāṃjanojjvalāḥ || 3 ||
[Analyze grammar]

sakhaḍgāḥ sā'sayaḥ kāścit karāgrakṛtachūrikāḥ |
saśūlāḥ sakṛpāṇāśca satomarāḥ samudgarāḥ || 4 ||
[Analyze grammar]

sasītāḥ sopalāścānyāḥ samusalāḥ śilānvitāḥ |
sphāranetrā raktajihvā dṛśyadaṃṣṭrā bhayapradāḥ || 5 ||
[Analyze grammar]

chindhi bhindhīti vādinyaḥ khādacarvayaśabditāḥ |
dāhaya jvālaya sarvāḥ pramāraya pracūrṇaya || 6 ||
[Analyze grammar]

pramardaya jahāhīti vadantyo yuddhadurmadāḥ |
kīrṇakeśā hetiyuktā dudruvuḥ paritastu tāḥ || 7 ||
[Analyze grammar]

yāvadvimānamāruhya mārayituṃ prayānti tāḥ |
tāvattatra suṣumṇādyāḥ spṛṣṭvā kalpalatādrumān || 8 ||
[Analyze grammar]

kṛtyāsainyāni daityānāṃ yoṣitāṃ nāśahetave |
samudbhavantu paritaścetyasaṃkalpayanmuhuḥ || 9 ||
[Analyze grammar]

kṛtyāstatra latābhyaśca sahasrāyutasaṃkhyakāḥ |
samudbhūtā mahāraudryaḥ kālānalasamākṣikāḥ || 10 ||
[Analyze grammar]

vyomānugāḥ sūkṣmahṛsvāḥ sthūlāḥ śailanibhā api |
ekaikāṃ parisaṃmṛgya keśākeśi ca hetubhiḥ || 11 ||
[Analyze grammar]

daṇḍādaṇḍi ca vividhaṃ yuddhaṃ tāsāmabhūttadā |
kṛtyābhidaityanārīḥ saṃgṛhyagṛhya pramarditāḥ || 12 ||
[Analyze grammar]

bhagnāśca cūrṇitāścāpi bheditā nāśitā api |
mūtritāścānane tāsāṃ hṛdayeṣu vidāritāḥ || 13 ||
[Analyze grammar]

staneṣu bheditāstāśca marmasvapyarditāḥ śaraiḥ |
karcaritā bhasmitā vahnijvālābhiśca māritāḥ || 14 ||
[Analyze grammar]

daśalakṣāṇi nārīṇāṃ kṛtyābhirnāśitāni hi |
sasmaruḥ kanyakāḥ kṛṣṇanārāyaṇaṃ prabhuṃ priyam || 15 ||
[Analyze grammar]

sadyaḥ samājagāmā'sau garuḍastho mahāprabhuḥ |
sākṣād babhūva tāsāṃ vai yuddhāraṃbhe samāgataḥ || 16 ||
[Analyze grammar]

vimāne tiṣṭhate nātho hṛdayeṣu ca tiṣṭhati |
yuddhāraṃbhe sthito'dṛśyo vilokayati saṅgaram || 17 ||
[Analyze grammar]

pratyakṣaṃ tvāgataṃ nāthaṃ dṛṣṭvā kanyāḥ susaṃbhramāḥ |
pupūjuścanipetuścā'ślikṣan premabharotsukāḥ || 18 ||
[Analyze grammar]

hariḥ siṃhāsane cāste kanyakāmaṇḍalāntare |
tathā śrīśaṃkarādīnāṃ maṇḍaleṣvapi bhāsate || 19 ||
[Analyze grammar]

śaṃkarādyairgaṇādyaiśca ṛṣibhiḥ pūjitaḥ prabhuḥ |
niṣasādā''sane ramye śreṣṭhe yogye prabhāsure || 20 ||
[Analyze grammar]

nāradaḥ kathayāmāsa vṛttāntaṃ yuddhajaṃ tathā |
rājñaḥ paricayaṃ cāpi dadau mānuṣalīlayā || 21 ||
[Analyze grammar]

rājā ruroda bahudhā prārthayacca kṣamāṃ tadā |
tathā tatsainyapā ye ca dūraṃ gatāḥ sahā'bhavan || 22 ||
[Analyze grammar]

abhayaṃ pradadau tebhyaḥ kṛṣṇanārāyaṇo hariḥ |
rājādyāḥ dadṛśuḥ śrīmatkṛṣṇanārāyaṇodare || 23 ||
[Analyze grammar]

bhuvanārṇavapātālān sthitān sthāvarajaṅgamān |
ādityavasurudrāṃśca viśvedevagaṇāṃstathā || 24 ||
[Analyze grammar]

yakṣān kiṃpuruṣāṃścāpi gandharvā'psarasāṃ gaṇān |
munīnmanujasādhyāṃśca paśukīṭapipīlikāḥ || 5 ||
[Analyze grammar]

sarīsṛpān vṛkṣagulmaphalamūlauṣadhāni ca |
jalasthāṃśca sthalasthāṃścā'nimeṣān nimiṣānapi || 26 ||
[Analyze grammar]

avyaktāṃścaiva vyaktāṃśca dvipado'tha catuṣpadaḥ |
daiteyān dānavāṃścaiva rākṣasānuragāṃstathā || 27 ||
[Analyze grammar]

brahmāṇḍā''varaṇāṃścāpīśvarāṃśca parameśvarān |
muktān muktanivāsāṃśca lakṣmyādikāśca patnikāḥ || 28 ||
[Analyze grammar]

pārṣadān śrīhareścāpi tvanyarūpāṇi vai hareḥ |
rājā deśaṃ nijaṃ rājyaṃ svaṃ vimānaṃ ca yodhanam || 29 ||
[Analyze grammar]

sarvaṃ dadarśa ca tadā bhaktinamro babhūva ha |
uvācāpi nijān bhāvān smṛtvā karmāṇi tāni ca || 30 ||
[Analyze grammar]

aho nārāyaṇaḥ sākṣātparamātmā parātparaḥ |
tadbhaktāśca mayā naiva jñātāḥ saṃsāralobhinā || 31 ||
[Analyze grammar]

sadā'karavaṃ pāpāni mahāpāpāni yāni ca |
teṣāṃ yatra bhavennāśastatrāpi kṛtravānagham || 32 ||
[Analyze grammar]

vajrīlepena pāpena kathaṃ kadā vimocanam |
naiva syāditi devejya pāpāduddhara mādhava || 33 ||
[Analyze grammar]

daityānāṃ tu svabhāvo'yaṃ sampadyoṣitpralubdhatā |
madyamāṃsāśanaṃ cāpi tasmāduddhara mādhava || 34 ||
[Analyze grammar]

koṭipuṇyārjitenā'tra mānuṣeṇa tu varṣmaṇā |
labhyate muktirevā'tra yatprapattipratāpataḥ || 35 ||
[Analyze grammar]

tatprapattirmayā labdhā yuddhādeśena mādhava |
pāpaṃ ca kṛtavān yuddhaṃ phalaṃ puṇyasya me'bhavat || 36 ||
[Analyze grammar]

yaduddhārakṛtāṃ yogo bhagavatāṃ ca darśanam |
adya māṃ mama deśeṣu yuddhe prahatadehinām || 37 ||
[Analyze grammar]

uddhāraṃ prakarotveva vihṛtya bhagavān svayam |
uddhāraṃ ca bhavatsevāṃ vṛṇe nānyad vṛṇomyaham || 38 ||
[Analyze grammar]

ityuktvā virarāmā'sau jumāsemlānareśvaraḥ |
sanatkumāro bhagavānupādideśa taṃ tataḥ || 39 ||
[Analyze grammar]

śārīraṃ mānasaṃ vāpi duṣkṛtaṃ durvicintitam |
tathā te dānavo bhāvo vyapayātu narādhipa || 40 ||
[Analyze grammar]

susthirā tava sadbhaktiḥ parameśe'stu nityadā |
mūkto'si daityabhāvāttvaṃ bhaja kṛṣṇanarāyaṇam || 41 ||
[Analyze grammar]

śṛṇu rājān dhruvaṃ sādhyaṃ nā'dhruvaṃ tu kadācana |
calāḥ śriyaḥ sadā bodhyāstābhiḥ sādhyaṃ tu śāśvatam || 42 ||
[Analyze grammar]

purā prasanno bhagavān lakṣmyā rūpacatuṣṭayam |
dhartuṃ dideśa tāṃ sā'pi catūrūpā babhūva ha || 43 ||
[Analyze grammar]

śvetāmbaradharā caikā śvetasraganulepanā |
śvetagajasamārūḍhā sattvāḍhyā śvetavigrahā || 44 ||
[Analyze grammar]

raktāmbaradharā cānyā raktasraganulepanā |
raktavājisamārūḍhā raktāṃgī rājasī hi sā || 45 ||
[Analyze grammar]

pītāmbarā pītavarṇā pītasraganulepanā |
sauvarṇasyandanārūḍhā tāmasaṃ guṇamāśritā || 46 ||
[Analyze grammar]

nīlāmbarā nīlamālyā nīlagandhā'lisaprabhā |
nīlavṛṣasamārūḍhā miśrā sā triguṇātmikā || 47 ||
[Analyze grammar]

śvetā candraṃ vedhasa ca sāttvikān pratyabhisthitā |
raktā cendraṃ ca rājānaṃ manūn nṛpānupasthitā || 48 ||
[Analyze grammar]

pītā prajāpatīn yātā vaiśyavarṇān sudhārmikān |
nīlā tu dānavān daityān śūdrāṃśca rākṣasādikān || 49 ||
[Analyze grammar]

viprādyāḥ śvetavarṇāṃ tu sarasvatīṃ ca jagṛhuḥ |
yajñaṃ mantrān pūjanādi daivakāryaṃ śubhapradam || 50 ||
[Analyze grammar]

kṣatriyā rājasīṃ raktāṃ jayaśriyaṃ subhejire |
vaiśyā vṛttisvarūpāṃ tāmaṅgīcakruḥ samantata || 51 ||
[Analyze grammar]

śūdrā nīlāṃ dāsyarūpāṃ sevādevīṃ prajagṛhuḥ |
evaṃ vibhaktā sā lakṣmīryāvadbhāgyaṃ hi vartate || 52 ||
[Analyze grammar]

etāsāṃ tu svarūpāṇi bhavanti nidhayo'vyayāḥ |
vedāḥ kathānakādyāśca saṃhitāḥ śāstrasatkriyāḥ || 53 ||
[Analyze grammar]

catuḥṣaṣṭikalāḥ śvetā mahāpadmo nidhiḥ sthitaḥ |
ratnāni svarṇarajate gajāśvarathabhūṣaṇam || 54 ||
[Analyze grammar]

śastrā'strādikavastūni raktā padmo nidhiḥ smṛtaḥ |
gomahiṣyaḥ kharoṣṭrāśca suvarṇāmbarabhūmayaḥ || 55 ||
[Analyze grammar]

oṣadhyaḥ paśavaḥ pītā mahānīlo nidhiḥ smṛtaḥ |
sarvāsāmapi jātīnāṃ sevā nityā pratiṣṭhitā || 56 ||
[Analyze grammar]

sukhaduḥkhātisaṃvyāptā nīlā śaṃkho nidhiḥ smṛtaḥ |
etābhiḥ svīkṛtā ye ye mānavādyā nijāśritāḥ || 57 ||
[Analyze grammar]

teṣāṃ bhavanti rūpāṇi bodhārthaṃ saṃbravīmi te |
sattvalakṣmīyutāḥ saumyāḥ satyaśaucādipālakāḥ || 58 ||
[Analyze grammar]

surūpā dharmakartāro darśanāhlādadāyakāḥ |
dīrghanetrā dīrghabhujā hāsyatṛptyādiśālinaḥ || 59 ||
[Analyze grammar]

avikhaṇḍitadehāśca avikhaṇḍakuṭumbinaḥ |
avikhaṇḍānnapānādyā avikhaṇḍayaśo'malāḥ || 60 ||
[Analyze grammar]

satyaśocābhisaṃyuktā baladānotsave ratāḥ |
āstikyadānanairmalyaparopakṛtiśālinaḥ || 61 ||
[Analyze grammar]

bhavanti rājan subhagā mahāpadmāśritā janāḥ |
yajvinaḥ subhagā dṛptā mālino bahudakṣiṇāḥ || 62 ||
[Analyze grammar]

bahubhogā bahurūpā bahurājasavartinaḥ |
sarvopaskaratejobhiḥ prabhāsino'tikīrtayaḥ || 63 ||
[Analyze grammar]

yāvadvastubhiḥ sukhino rājyakṣetrādibhoginaḥ |
mānyā mānapradā hṛṣṭāḥ puṣṭā dīrghaśarīriṇaḥ || 64 ||
[Analyze grammar]

madanetrā garvabhālāḥ śmaśrulā varṣmakeśinaḥ |
raktanakhā raktavarṇā janāḥ padmāśritāḥ sthitāḥ || 65 ||
[Analyze grammar]

satyā'nṛtasamāyuktā dānā'śaraṇayajvinaḥ |
nyāyā'nyāyavyopetāḥ sarvasantoṣakārakāḥ || 66 ||
[Analyze grammar]

dānadharmā nātirūpā nātivastrā naśobhanāḥ |
rūkṣadehā madhyapuṣṭā mahānīlāśritā janāḥ || 67 ||
[Analyze grammar]

nāstikāḥ śaucarahitāḥ kṛpaṇā bhogavarjitāḥ |
steyā'nṛtakathāvādāḥ paraduḥkhakarāḥ śaṭhāḥ || 68 ||
[Analyze grammar]

svārthamātraparāḥ kṛṣṇāḥ kadrūpā bhāvihīnakāḥ |
agandhāḥ kusvabhāvāśca makṣikākṛtamitratāḥ || 69 ||
[Analyze grammar]

mālinyavāsasahanā janāḥ śaṃkhāśritā nṛpa |
tasyāṃ vai vartamānāyāṃ nare nāryāṃ napuṃsake || 70 ||
[Analyze grammar]

samāśrayanti taṃ cānyā hriḥ kīrtirdyutirityapi |
prabhā gatiḥ kṣamā bhūtirvidyā nītirdayā matiḥ || 71 ||
[Analyze grammar]

śrutiḥ smṛtirbalaṃ kīrtirdhṛtiḥ śāntiḥ kriyā kṛtiḥ |
puṣṭistuṣṭistathā cānyā mukhyaśriyā'nujīvitāḥ || 72 ||
[Analyze grammar]

sā śrīrlekhāvaśā rājan yāvad rekhā hi vartate |
rekhāyā vigame śrīśca sarvaśrībhirnivartate || 73 ||
[Analyze grammar]

śriyaḥ sarvāḥ samāyānti pūrvakarmavidhānataḥ |
sukhaduḥkhāni daityendra sahanīyāni tāni vai || 74 ||
[Analyze grammar]

putramitrakalatrārthe rājyabhogadhanāya ca |
āgame nirgame prājñe viṣādo nāviśet kvacit || 75 ||
[Analyze grammar]

āpadāmāgamaṃ dṛṣṭvā na viṣaṇṇo bhaved vaśī |
sampadaṃ ca suvistīrṇāṃ prāpya no phulito bhavet || 76 ||
[Analyze grammar]

dhanakṣaye na muhyanti na duṣyanti dhanāgame |
dhīrā ta eva tu proktā jñāninaḥ puruṣottamāḥ || 77 ||
[Analyze grammar]

tathā'nyacca mahābāho hitaṃ śṛṇu mahārthakam |
śaraṇyaṃ śaraṇaṃ yāhi tamenaṃ puruṣottamam || 78 ||
[Analyze grammar]

ye śrayanti hariṃ kṛṣṇaṃ nārāyaṇaṃ pumuttamam |
te taranti bhavābdhervai śataikakulavanditāḥ || 79 ||
[Analyze grammar]

tanmanā dānavaśreṣṭha tadbhakto bhava sarvaśaḥ |
sa eva bhavatāṃ śreyo vidhāsyati narāyaṇaḥ || 80 ||
[Analyze grammar]

sarvakarmāṇi tatraiva śubhānyapyaśubhāni ca |
rāgadveṣaprajātāni samarpayā'tra mādhave || 81 ||
[Analyze grammar]

nā'bhuktaṃ śrīyate karma kalpakoṭigame'pi hi |
nārāyaṇe'rpitaṃ cet tad bhoktavyaṃ na hi śiṣyate || 82 ||
[Analyze grammar]

cauraścauryādidoṣeṇa daṇḍaṃ yāti yathā kṛtam |
yadi rājā prasannaḥ syād daṇḍaṃ dadāti naiva ca || 83 ||
[Analyze grammar]

kṣamate tatkṛtaṃ sarvaṃ punaḥ kartuṃ niṣedhati |
evaṃ śrībhagavānatra pāpināṃ prāṇadhāriṇām || 84 ||
[Analyze grammar]

kṛtapāpāni vijñāya daṇḍaṃ dadāti sarvathā |
yadi kṛṣṇaḥ prasannaḥ syād daṇḍaṃ naiva dadāti hi || 85 ||
[Analyze grammar]

kṣamate tatkṛtaṃ sarvaṃ punaḥ kartuṃ niṣedhati |
prasannatā'sya cāptavyā sādhanairvividhairapi || 86 ||
[Analyze grammar]

pratyakṣe vartamāne tu yad vadet tat samācaret |
atrāyaṃ vidyate śrīmān pratyakṣaḥ puruṣottamaḥ || 87 ||
[Analyze grammar]

ehi taccharaṇaṃ yāhi yadvadet tatsamācara |
ityuktvā nṛpatiṃ mlecchaṃ muniḥ sanatkumārakaḥ || 88 ||
[Analyze grammar]

anādiśrīkṛṣṇanārāyaṇapāde nināya tam |
rājā prāha dayāsindho samuddhara yatheṣṭakam || 89 ||
[Analyze grammar]

pāpo'haṃ pāpakarmā'haṃ pāpātmā pāpasaṃbhavaḥ |
pāpiprasaṃgakartāraṃ samuddhara kṛpālaya || 90 ||
[Analyze grammar]

vihasya śrīhariḥ prāha śuddho jāto'si sarvathā |
sākṣāt satāṃ prasaṃgena daityabhāvena mocitaḥ || 91 ||
[Analyze grammar]

yūyaṃ bhṛtyāstathā senāpatayo narayoṣitaḥ |
sarve matsādhuyogena pāvanāḥ stho na saṃśayaḥ || 92 ||
[Analyze grammar]

tava deśo nagarāṇi taḍāgāni tathā''pagāḥ |
girayo raṇabhūbhāgāḥ pāvanāḥ satprasaṃgataḥ || 93 ||
[Analyze grammar]

ityuktvā virarāmā'sau śrīmatkṛṣṇanarāyaṇaḥ |
nāradaśca hariṃ natvā dhṛtvā kalpalatāṃ kare || 94 ||
[Analyze grammar]

vimāne saptabhaumeṣu vicacāra muhurmuhuḥ |
yuddhayogena vai yatra kvāpi kaccaravat tathā || 95 ||
[Analyze grammar]

bhagnaṃ truṭitamābhagnaṃ viparītaṃ parāvṛtam |
sarvaṃ saṃkalpya tūrṇaṃ hi yathāvat samakārayat || 96 ||
[Analyze grammar]

jalena prokṣya ca śuddhiṃ cakāra sarvabhūmiṣu |
samāyayau hareragre tasthau namro mudā yutaḥ || 97 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne vimāne saptamabhūmikāyāṃ daityanārīkṛtayuddhaṃ kalpavallyutpāditakṛtyābhidaiṃtyādīnāṃ nāśaḥ śrīkṛṣṇanārāyaṇadarśanaṃ rājñaḥ prārthanā upadeśaścetyādinirūpaṇanāmā catuḥpañcāśattamo'dhyāyaḥ || 54 ||
[Analyze grammar]