Chapter 56

śrīrādhikovāca |
kaḥ sa rājā jumāsemlāhvayastvāsītpurā prabho |
ke tatsenāpatayaśca yeṣāṃ kṛṣṇāśrayo'bhavat || 1 ||
[Analyze grammar]

śrīkṛṣṇa uvāca |
śṛṇu tāṃ rādhike pūrvāṃ kathāṃ daivasuyoginīm |
avadhānaṃ paraṃ datvā mayoktā pāpanāśinīm || 2 ||
[Analyze grammar]

svāyaṃbhuvasya putro'bhūnmanurnāma priyavrataḥ |
tasyā''sīt savano nāma putrastrailokyaviśrutaḥ || 3 ||
[Analyze grammar]

sa cā'napatyo nidhane sati pretagatiṃ gataḥ |
tasya bhāryā'rudat tatra suvedā śokavihvalā || 4 ||
[Analyze grammar]

na dadāti śavaṃ dagdhuṃ samādhṛtya sthitā patim |
nāthanātheti bahuśaḥ savilāpā tvanāthavat || 5 ||
[Analyze grammar]

tāmāha vyomavāṇī mā rudihi tvaṃ śucaṃ tyaja |
yadi cāste tava snehaḥ satyaṃ cāpi vrataṃ mahat || 6 ||
[Analyze grammar]

tadā satīvṛṣaṃ dhṛtvā vrajā'gnau patinā saha |
suvedā''śrutya tāṃ vāṇīṃ satī pratyuttaraṃ dadau || 7 ||
[Analyze grammar]

nā'haṃ śocāmi māṃ deva mandabhāgyāṃ nijārthikā |
kintvenaṃ putrahīnaṃ vai śocāmi gativarjitam || 8 ||
[Analyze grammar]

aputrasya gatirnāsti noddhāro narakādapi |
na ca śrāddhā'bhilāṣā'pi tena vai rauravaṃ dhruvam || 9 ||
[Analyze grammar]

aputrasya tu kāntasya kāminyapi tathāvidhā |
gatihīnā rauravārhā tasmātputrasamicchayā || 10 ||
[Analyze grammar]

śocāmi śreyaicchārthaṃ deva śreyaḥ kuru prabho |
vyomavāṇī tataḥ prāha rājñi rudihi mā śucā || 11 ||
[Analyze grammar]

svāminaste saptaputrā bhaviṣyanti na saṃśayaḥ |
vahnimāroha śīghraṃ tvaṃ śraddadhasva satī bhava || 12 ||
[Analyze grammar]

rājñī prāha vinā dehaṃ mama me svāminastathā |
mānavā vai kathaṃ putrā bhaviṣyanti vadā'dhunā || 13 ||
[Analyze grammar]

vyomavāṇī tadā prāha tava satyena sundari |
dāhe satyeva ca dvayoratra dehau punarnavau || 14 ||
[Analyze grammar]

mānasau divyatattvau ca kṣaṇāntare bhaviṣyataḥ |
rājñā datto'tra garbhaste dhāturūpo bhaviṣyati || 15 ||
[Analyze grammar]

dhātordvārā tava patyurbhaviṣyanti suputrakāḥ |
ityuktā sā satyadharmaṃ tvālambya pativarṣma tat || 16 ||
[Analyze grammar]

dadau kāṣṭhe sthāpayituṃ tataḥ svayaṃ citāṃ prati |
yayau hutāśamāsādya citte dhyātvā patiṃ sutān || 17 ||
[Analyze grammar]

prapannā jvalanaṃ sādhvī divyadehā babhūva ha |
rājā divyaśriyā yuktaścotthitaḥ saha bhāryayā || 18 ||
[Analyze grammar]

yutaḥ sunābhaputryā sa utpapāta tadā tu kham |
vimānaṃ tvambare sarvaidivyaṃ dṛṣṭaṃ suvarculam || 19 ||
[Analyze grammar]

tatra sā mahiṣī tūrṇaṃ rajasvalā hyajāyata |
itijātaṃ mahāścaryaṃ yathā matistathā gatiḥ || 20 ||
[Analyze grammar]

yadyapi divyadehe ca devīṣu vahnijāsu ca |
tātkāliko rajodharmo nocitastatra vai kṣaṇāt || 21 ||
[Analyze grammar]

tathāpi vāsanāyogād bhāvanāvaśatastathā |
āśīrvādena ca vyomavāṇyā rajasvalā'bhavat || 22 ||
[Analyze grammar]

vimānaṃ cāmbare tatra pañcarātraṃ sthiraṃ hyabhūt |
iṣyamāṇamapi gantuṃ divaṃ yātuṃ śaśāka na || 23 ||
[Analyze grammar]

sarvairvilokitaṃ vyomni dṛśyate candrasūjjvalam |
tarkyate kathametadvai svargaṃ yāti na tiṣṭhati || 24 ||
[Analyze grammar]

meghacchannamabhūdūrdhvaṃ cāntarīkṣagataṃ punaḥ |
meghopari bhramannāste tadūrdhvaṃ naiva gacchati || 25 ||
[Analyze grammar]

rājā bhāryāsahāyaśca pañcadināni khe sthitaḥ |
ṣaṣṭhe'hani ṛtau dānaṃ dadau patnyai sutecchukaḥ || 26 ||
[Analyze grammar]

kintu daivānmahiṣyāstu bhāgye nā''san sutāḥ khalu |
śukraṃ garbhe sthiraṃ nā'bhūt tena prācyavatā'mbarāt || 27 ||
[Analyze grammar]

śukrapātottaraṃ rājā mahiṣyā bhāryayā saha |
jagāma ca vimānena brahmalokaṃ hi rādhike || 28 ||
[Analyze grammar]

śukraṃ yatrā'patad bhūmau ṛjyāvasathamaṇḍale |
saptadhā bhedamāpannaṃ cojjvalaṃ jalabudbudam || 29 ||
[Analyze grammar]

ekaḥ kaṇo mahānebhyaḥ śīghraṃ bhūmau papāta ha |
anye kaṇāstu ṣaṭ vāyuhatāḥ pratyekasaptadhā || 30 ||
[Analyze grammar]

punaḥ pratyekaṃ ca sapta te ṣaṭnyūnaṃ śatatrayam |
kaṇāste vahnivarṇā vai rājataṃ varṣaṇaṃ yathā || 31 ||
[Analyze grammar]

sūryakaraiścākacakyamāpannāstārakā iva |
maṇayo vā kimete ca kiṃ vā cāmṛtabindavaḥ || 32 ||
[Analyze grammar]

iti matvā ṛṣipatnyaḥ kaṇān dhartuṃ karairnijaiḥ |
dadruvuḥ patanāgre ca tāvatte vahnisadṛśāḥ || 33 ||
[Analyze grammar]

ākṛṣṭā daivagatyā ca deheṣvadṛśyatāṃ gatāḥ |
yathā śvāsena sākaṃ tu vārikaṇāstathā ca te || 34 ||
[Analyze grammar]

mahān kaṇo'pi ca maṇerbhrāntimudbhāvayaṃstadā |
saṃgrahītuṃ drutaṃ yāntīṃ sumādāṃ samapadyata || 35 ||
[Analyze grammar]

nalinī puṣyatī citrā viśālā haritā'nilā |
evamādyāstu tā garbhayuktāḥ samabhavaṃstataḥ || 36 ||
[Analyze grammar]

brahmatejovihīnāstā jātāḥ patnyastapasvinām |
ṛṣayo vṛttamājñāya brahmatejovihīnatām || 37 ||
[Analyze grammar]

dṛṣṭvā jñātvā'nyagarbhāḍhyāstatyajurvarṣamātrakam |
anyagarbhā hi tāḥ sarvā himaśailaṃ vihāya ca || 38 ||
[Analyze grammar]

vyomnā paścimavārdhiṃ saṃyayuḥ putraprasūtaye |
nārāyaṇīṃ nadīṃ prāpya abriktaṃ sthalamuttamam || 39 ||
[Analyze grammar]

nyūṣuryathāvakāśaṃ ca phalamūlā'nilā'śanāḥ |
suṣuvire sutāṃstatra samakālān hi yoṣitaḥ || 40 ||
[Analyze grammar]

rudanti sma ca te sarve bhairavaṃ daivayogataḥ |
teṣāṃ ruditaśabdena sarvaṃ cāpūritaṃ jagat || 41 ||
[Analyze grammar]

atrā''jagāma bhagavān brahmā lokapitāmahaḥ |
samabhyetyā'bravīd bālān mā rudata mahābalāḥ || 42 ||
[Analyze grammar]

maruddeśe'mbare garbhadānāt kṣatriyaputrakāḥ |
kṣatriyāyāṃ praviśyaiva nirgatā vāyuvegataḥ || 43 ||
[Analyze grammar]

marutāṃ sparśayogena brāhmaṇīṣu praveśitāḥ |
brāhmaṇaiḥ samparityaktāḥ prāptāḥ stha janma cātra vai || 44 ||
[Analyze grammar]

evaṃ pitṛparityaktāḥ pitṛvairakarāḥ sadā |
viprakṣatriyavairāḍhyā bhūtale'tra bhaviṣyathaḥ || 45 ||
[Analyze grammar]

evaṃ vai vairabhāvena yadyapi brahmakṣatriyāḥ |
mālinyaṃ vairamāsādya mlecchā daityā bhaviṣyatha || 46 ||
[Analyze grammar]

asaṃskārāstathā viprakriyāśūnyā bhaviṣyatha |
marutāṃ cāmbare śukrotsargeṇa marutāṃ gaṇāḥ || 47 ||
[Analyze grammar]

kadācid ditijā yūyaṃ punardaityā bhaviṣyatha |
daityā api sajīvāśca mahendreṇa punaḥ punaḥ || 48 ||
[Analyze grammar]

garbhe vajreṇa nikṛttā devā api bhaviṣyatha |
devatve kāraṇaṃ tatra śṛṇutā'tra vadāmi vaḥ || 49 ||
[Analyze grammar]

anādiśrīkṛṣṇanārāyaṇaḥ śrībhagavān svayam |
mahāyuddhanimittena deśe'trā'pyāgamiṣyati || 50 ||
[Analyze grammar]

taddhastajalalābhena caraṇāmṛtapānataḥ |
pāvitryaṃ bhavatāṃ śīghraṃ tadā tvatra bhaviṣyati || 51 ||
[Analyze grammar]

tena puṇyena ca yūyaṃ devatvaṃ samavāpsyatha |
maruto nāma devā vai yūyaṃ khyātā bhaviṣyatha || 52 ||
[Analyze grammar]

evamuktvā tu tān bālān brahmā lokapitāmahaḥ |
rakṣituṃ ca poṣayituṃ triśataṃ yoṣitāṃ tadā || 53 ||
[Analyze grammar]

svapṛṣṭhotpāditaṃ dugdhapradaṃ mlecchasvabhāvajam |
dadau tatra tathā dāsān śatāni trīṇi sandadau || 54 ||
[Analyze grammar]

pṛṣṭhān kṛṣṇavarṇāṃśca krūrasvabhāvavartinaḥ |
dharmakarmavihīnāṃśca saṃskārakṛtivarjitān || 55 ||
[Analyze grammar]

kalpanāmātrakāryasthān datvā tebhyaḥ śiśūṃstataḥ |
amātṛjā narāste cā'mātṛjābhiḥ sahā'vasan || 56 ||
[Analyze grammar]

dampatītvaṃ sadā prāptā nyavasaṃśca sukhena te |
tebhya ārabhya evā'tra dugdhabhinnā prabhujyate || 57 ||
[Analyze grammar]

asahodaravaivāhyaṃ tadārabhya pravartate |
evaṃ brahmā tu sarvebhyo datvā śiśūn tataḥ param || 58 ||
[Analyze grammar]

viprapatnīḥ samagrāśca sūtakā'nte'tinirmalāḥ |
śuddhāḥ kṛtvā saha nītvā yayau hemādrimuttamam || 59 ||
[Analyze grammar]

yatra te ṛṣayaḥ santi brahmacaryavratasthitāḥ |
vyomamārgeṇa ca brahmā vimānāgryādavātarat || 60 ||
[Analyze grammar]

haste kamaṇḍaluṃ kṛtvā vedāśīrvādamuccaran |
ṛṣayo brāhmaṇā dṛṣṭvottasthurmagnāḥ pitāmaham || 61 ||
[Analyze grammar]

nemuśca daṇḍavat pṛthvyāṃ sambhūyā'pyāsanaṃ dadau |
pūjāṃ cakruryathārhā ca brahmā tata uvāca tān || 62 ||
[Analyze grammar]

viprāḥ sarvaṃ bhavatyeva parameśasamicchayā |
utpattiḥ pralayaśceti poṣaṇaṃ ca harīcchayā || 63 ||
[Analyze grammar]

īśastajjñānayatnecchāḥ kālo'dṛṣṭaṃ svakarma ca |
yatraikatāṃ samāyānti tatra kāryaṃ bhavet tadā || 64 ||
[Analyze grammar]

manoḥ putrasya viprā vai savanasya tu dhātutaḥ |
bhavatāṃ vai priyāsveva jātāḥ triśataputrakāḥ || 65 ||
[Analyze grammar]

pañcanyūnā hi te sarve mayā saṃrakṣitāḥ sadā |
paścimāyāṃ bhuvi dṛptā yuṣmaddharmavivarjitāḥ || 66 ||
[Analyze grammar]

tā etā yoṣito vaśca śuddhāḥ saṃskārakarmabhiḥ |
samānītā mayā yuṣmatsevāyāṃ śuddhabhāvanāḥ || 67 ||
[Analyze grammar]

vimāne tāstu vartante gṛhṇataitāḥ punaḥ svakāḥ |
ityuktā brāhmaṇāḥ patnīnāmānyāśrutya harṣataḥ || 68 ||
[Analyze grammar]

bāḍhaṃ bāḍhaṃ tathā kurmo gṛhṇīmo vaidhasīṃ śrutim |
ājñāṃ bhavanmukhotpannāṃ samānaya pitāmaha || 69 ||
[Analyze grammar]

brahmā śrutvā vimānaṃ taccāmbarāt pṛthivīṃ prati |
āhvayattvāgataṃ śīghraṃ patnyastasmādavātaran || 70 ||
[Analyze grammar]

tāḥ sarvā brahmavākyena nipetuḥ svāmipādayoḥ |
svāmino jagṛhustāśca premṇā kuśalapūrvakam || 71 ||
[Analyze grammar]

mahotsavaṃ tadā cakrurhavanaṃ janabhojanam |
devānāṃ pūjanaṃ cāpi tato'jaṃ te vyasarjayan || 72 ||
[Analyze grammar]

brahmā vimānago naijaṃ dhāma jagāma satvaram |
ṛṣipatnyo brahmatejomayyaḥ śuśubhire hyati || 73 ||
[Analyze grammar]

evaṃ te daityarūpā vai jātā āsan hi rādhike |
tatra kaṇo mahān yastu jumāsemlābhidhānakaḥ || 74 ||
[Analyze grammar]

rājā'bhūdabriktānāṃ tu deśānāṃ sarvato balī |
janmato yuddhavettā'straśastrabodhabharo'suraḥ || 75 ||
[Analyze grammar]

ākāśe śukrayoge ca marutāṃ sparśasaṃbhavāt |
vyomagaḥ so'bhavad vāyutulyaścātipratāpavān || 76 ||
[Analyze grammar]

anye te'pi kaṇāḥ sarve sarve marutsamāśrayāt |
vyomagāścā'bhavan daityāste nṛpasya hi sainyapāḥ || 77 ||
[Analyze grammar]

astraśastravidaḥ sarve balino'suravartanāḥ |
tataḥ prajāḥ samabhavan koṭiśaḥ kālavegataḥ || 78 ||
[Analyze grammar]

bhrātaraśca bhaginyaśca asahodarajā yadi |
parasparaṃ hi yujyante vivāhavidhinā tataḥ || 79 ||
[Analyze grammar]

teṣāṃ tāsāṃ paścimaṃ vai yānaṃ prathamato'bhavat |
mātṛṇāṃ paścimaṃ yānaṃ tena paścimanamrakāḥ || 80 ||
[Analyze grammar]

paścimaṃ sarvameveme vṛṣaṃ gṛhṇanti sarvadā |
sumādāyāṃ samutpanno jumāsemlā'bhavannṛpaḥ || 81 ||
[Analyze grammar]

anye tu sainyapā jātā bahuśastradharā hi te |
atha mṛtā vimānena saha yuddhe tu te tadā || 82 ||
[Analyze grammar]

svargaṃ gatvā punastatra mahāmaroḥ kṣitau punaḥ |
ṛtadhvajasya putrāṇāṃ putrāste masataḥ surāḥ || 83 ||
[Analyze grammar]

bhaviṣyanti jale grāhījaṭhare dhātupānataḥ |
ṛtadhvajasutāḥ merau kariṣyanti tapaḥ param || 84 ||
[Analyze grammar]

tapovighnārthamindraśca preṣayiṣyati pūtanām |
apsarasaṃ ca tāṃ dṛṣṭvā snāntīṃ surūpayauvanām || 85 ||
[Analyze grammar]

mandodavāhinīnadyāṃ kṣariṣyanti ca tāpasāḥ |
taddhātuṃ pāsyati grāhī tatputrā jalajāśca te || 86 ||
[Analyze grammar]

marutākhyā bhaviṣyanti vyomamārgānugāḥ surāḥ |
atha punaḥ pṛthivyāṃ te vapuṣmanto nṛpasya tu || 87 ||
[Analyze grammar]

jyotiṣmānnāmakaḥ putrastatpatnyāṃ dharmayoṣiti |
devācāryasutāyāṃ vai suśroṇyāṃ marutastu te || 88 ||
[Analyze grammar]

bhaviṣyanti putrarūpā devā vyomavihāriṇaḥ |
tataḥ punardantadhvajānmānuṣāttapato bhuvi || 89 ||
[Analyze grammar]

homaṃ prakurvato vahnau svaśarīrasya sarvathā |
vīryabhāgāttato vahneḥ samudbhūtāḥ sutāstadā || 90 ||
[Analyze grammar]

bhaviṣyanti marutaste devā vyomavihāriṇaḥ |
tataḥ punaḥ pṛthivyāṃ ca ripujinnṛpatergṛhe || 91 ||
[Analyze grammar]

sūryaputryāṃ suratyāṃ ca bhāryāyāṃ maruto hi te |
mṛtāyāṃ ca citāvahnau bhaviṣyanti surāḥ sutāḥ || 92 ||
[Analyze grammar]

sarve vyomavihārāśca devā daivatayoginaḥ |
tataḥ punarmaṃkaṇakaṛṣerdhātoḥ prapātanāt || 93 ||
[Analyze grammar]

tuṣitāṃ pitṛkanyāṃ ca dṛṣṭvā snāntīṃ suyauvanām |
saptasārasvate tīrthe bhaviṣyanti marudgaṇāḥ || 94 ||
[Analyze grammar]

sarasvatījalebhyaste maruto devatāstadā |
vyomavihāriṇaḥ sarve bhaviṣyanti ca rādhike || 95 ||
[Analyze grammar]

tataḥ punaḥ kaśyapasya patnyāṃ dityāṃ ca te surāḥ |
bhaviṣyanti cendravajrahatāste marutaḥ surāḥ || 96 ||
[Analyze grammar]

daityā api hareryogādevaṃ daityasamudbhavāḥ |
devavāsā devakāryā devabhāvāḥ punaḥ punaḥ || 97 ||
[Analyze grammar]

bhaviṣyanti tathā sṛṣṭyantare'pyevaṃ punaḥ punaḥ |
ityevaṃ kathito rādhe te'tra marutsamudbhavaḥ || 98 ||
[Analyze grammar]

yathā cāsurabhāvāśca yathā devasvabhāvinaḥ |
ta ete maruto devā uddhṛtāḥ kṛpayā tadā || 99 ||
[Analyze grammar]

anādiśrīkṛṣṇanārāyaṇena paramātmanā |
abrikte tu pradeśe vai miṣeṇa saṃgarasya ha || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne maruddevānāṃ daityarūpeṇotpattiḥ punardevatvaprāptiḥ janmāntarādikathanam abriktīyamukhyadaityajanmavṛttānta ityādinirūpaṇanāmā ṣaṭpañcāśattamo'dhyāyaḥ || 56 ||
[Analyze grammar]