Chapter 50

śrīkṛṣṇa uvāca |
śṛṇu tvaṃ rādhike divyaṃ camatkāraṃ harestathā |
vīṇābhaṃgasya ca phalaṃ yānasthāsvabhavattadā || 1 ||
[Analyze grammar]

abriktadeśavāsā ye mlecchā rākṣasayonayaḥ |
āraṇyakāśca grāmasthā vanaparvatavāsinaḥ || 2 ||
[Analyze grammar]

sahasrayojanasthāste vyalokayan tadāmbare |
śatasūryasamaṃ tattu vimānaṃ bhāsvarāmbaram || 3 ||
[Analyze grammar]

sūryatejo'titejobhirdaśaguṇān prabhāvataḥ |
kiraṇān vyasṛjad vyomni anuṣṇāśītasaṃsahān || 4 ||
[Analyze grammar]

sudṛśyān suspṛśaścāpi maṣṭāmodabharāṃstathā |
ānandotpādakān śāntipradān vicitrabhāsurān || 5 ||
[Analyze grammar]

brahmaṇā śrīkṛṣṇanārāyaṇārthaṃ cārpitaṃ tu yat |
ki nyūnaṃ tatra vai rādhe vimāne mānavad bhavet || 6 ||
[Analyze grammar]

ghṛtadugdhadadhikulyā amṛtavārisaddhradāḥ |
gandhasāradravasāracūrṇasārādigūṭikāḥ || 7 ||
[Analyze grammar]

rasasārā''modasāracarvaṇottamavīṭikāḥ |
vidyante yatra satataṃ kalpastambeṣu śāśvatāḥ || 8 ||
[Analyze grammar]

ratnadvīpā darśanārhā naikaraṅgādibhāsurāḥ |
svarṇacampakavarṇābhakanyakāhṛdayaṃgamāḥ || 9 ||
[Analyze grammar]

hāratoraṇakuñjādiharidvarṇanikuñjakāḥ |
ramyastheyodyānamadhyāsanaśādvalarājitāḥ || 10 ||
[Analyze grammar]

sthalyo yatra prabhāsante candrabhūmisamāḥ śubhāḥ |
vimānarūpaṃ kanyānāṃ rūpaṃ rūpaṃ ca cāndrikam || 11 ||
[Analyze grammar]

prabhārūpaṃ ca sarvaṃ vai rūpapradīpajaṃ tathā |
maṇiratnādirūpaṃ ca bhinnaṃ cāpi paramparam || 12 ||
[Analyze grammar]

anyonyotkṛṣṭatāṃ prāptaṃ śreṣṭhaṃ śreṣṭhaṃ vyabhāsata |
keṣāṃ manāṃsi lokānāṃ sasparddhacaṃcalāni vai || 13 ||
[Analyze grammar]

nākṛṣṭāni bhaveyurvai divyaitādṛśaraśmibhiḥ |
divyābhiḥ kanyakābhiśca divyasmṛddhibhireva ca || 14 ||
[Analyze grammar]

tābhiruttejitā mlecchā daityā cābriktavāsinaḥ |
māyāmantrakarā vyomni rurudhustadvimānakam || 15 ||
[Analyze grammar]

āśāvahālābhavahā iṣṭaṃmanyāśca veginaḥ |
avicārya patantyugrā prāṇāntaduḥkhade'pi ca || 16 ||
[Analyze grammar]

dṛṣṭvā'nalaṃ pataṃgāśca gṛhṇīma iti vāñcchayā |
patanti rūpabhogārthaṃ prajvalante'titejasā || 17 ||
[Analyze grammar]

apātrāṇyapi kurvanti prayāsaṃ bahule phale |
aśaktigamye nikṣipyātmānaṃ mṛtiṃ prayānti ca || 18 ||
[Analyze grammar]

asurāste kālasīdā mlecchā matvā balaṃ nijam |
adhikaṃ tvaritaṃ ruṣṭāḥ sannahya raṇamāgaman || 19 ||
[Analyze grammar]

raktavārdhiḥ raudrabāṣpo vijñaturīyakastathā |
tuṃgānīko nyāsasāro liṅgaraso'tidāruṇaḥ || 20 ||
[Analyze grammar]

dhvākṣabījo mūśalāmbaḥ karmāṃgaḥ karmahāstathā |
caṇḍasāro naṣṭajaraḥ sahāraścātaleṣṭakaḥ || 21 ||
[Analyze grammar]

tuṅgamukhastrirāśaśca līlābījo bhayaṃkaraḥ |
phalgubījo gambikāyaḥ senāgolaḥ sphuṭārdanaḥ || 22 ||
[Analyze grammar]

jīvalaśca kedaṇḍaśca kumeruḥ sthānalistathā |
tumbāsuro'tha līnāpaścāliviṣṭaḥ kimūṣakaḥ || 23 ||
[Analyze grammar]

tūnāyaśca tathā''bālo rukvāsanaśca māvuraḥ |
bāṃgivalirdinolūkaḥ kuvaṃśajaḥ kurenṛkaḥ || 24 ||
[Analyze grammar]

dhodhasādā bahavaśca ambikāsaśca śirvamaḥ |
deṣalaśca kakralaśca ījyāpāto nabījakaḥ || 25 ||
[Analyze grammar]

sudānaśca sumāliśca kāṇimaśca trigoṇikaḥ |
rudraśirāśca triṣvālaḥ pilipaśca namākuvaḥ || 26 ||
[Analyze grammar]

dinameraścāṅgulādaḥ phenagaḥ kāmanāruṇiḥ |
nimnajharo lālavāro hrīyoḍho mārakarkaśaḥ || 27 ||
[Analyze grammar]

alijīraśca roṇḍegaḥ śāhudaḥ phakarāṇakaḥ |
pārṣṇiḥ kṛkāṭakaḥ piṇḍanalo randhrapramoṣakaḥ || 28 ||
[Analyze grammar]

bhujahā jatruśamano lāmako mūrddhabhāmakaḥ |
prakoṣṭhakaḥ pṛṣṭhavaṃśo nitambaveṇukastathā || 29 ||
[Analyze grammar]

āsavāpaścāmīṣapaḥ kukkuṭāśaḥ kṛkāśakaḥ |
ityete balavantaśca māyayā vyomacāriṇaḥ || 30 ||
[Analyze grammar]

vidyudvegena vai sarve sannahyopasthitā raṇe |
tatra rājā jumāsemlā dūtaṃ vai raktavārdhikam || 31 ||
[Analyze grammar]

preṣayāmāsa ca vimānāgre vaktuṃ nijeṣṭakam |
rājā prāha vimānāgre gatvā''vedaya raktaka || 32 ||
[Analyze grammar]

vimānaṃ tvastu naścātra kanyā bhavantu naḥ striyaḥ |
vimānasthā narāḥ svargaṃ yāntu cānyatra vai sukham || 33 ||
[Analyze grammar]

anyathā tu prasahyaiva hariṣyāmastu kanyakāḥ |
haniṣyāmaśca vastasmād yatheṣṭaṃ kurutā'tra yat || 34 ||
[Analyze grammar]

dūto natvā vimānāgre gatvā prāha tathaiva tat |
nāradaḥ prāhaḥ taṃ dūtaṃ vadā'suranṛpaṃ mama || 35 ||
[Analyze grammar]

yāścātra santi kanyāstā brahmaṇaḥ putrya eva tāḥ |
yūyaṃ ca brahmapautrasya kaśyapasya hi vaṃśajāḥ || 36 ||
[Analyze grammar]

daityo hiraṇyacakṣuryastasya putrāḥ sukālikaḥ |
añjanaḥ kālameghaśca jāsuśeṣo malīnasaḥ || 37 ||
[Analyze grammar]

hāvuko bhāvukaścāpi dāuko dhāvukastathā |
kvāśmakaścājamālaśca saireyādyāḥ śatādhikāḥ || 38 ||
[Analyze grammar]

hiraṇyākṣe hate daitye viṣṇunā sūkareṇa ha |
tadbhayād dravamānāste cābriktaṃ raṇaparvataiḥ || 39 ||
[Analyze grammar]

vyāptaṃ deśaṃ samāgatyā'kurvan nivāsamatra te |
tadvaṃśyā vai bhavantaśca bhavantyeva gatavṛṣāḥ || 40 ||
[Analyze grammar]

asaṃskṛtā mlecchavṛttā mama bhrātrādivaṃśajāḥ |
ahaṃ ca nāradaścāsmi tathā'trāste sanatṛṣiḥ || 41 ||
[Analyze grammar]

dharmarājastathā cātra virājate hi daṇḍadhṛk |
rudro'tra rājate lokasaṃhārakṛtparaḥ prabhuḥ || 42 ||
[Analyze grammar]

aputreṇa purā rudro hiraṇyākṣeṇa vai vane |
ārādhito haro devaḥ putrārthāya purā kila || 43 ||
[Analyze grammar]

tatpratāpena sāpatyo'bhavad bhavatpitāmahaḥ |
taṃ rudraṃ mā'tra rundhantu mā rundhantu yamādhipam || 44 ||
[Analyze grammar]

kanyakā mātaraḥ sarvā bhavatāṃ tā bhavanti vai |
ajitvā tu yamaṃ rudraṃ bhavatkāmo hi durlabhaḥ || 45 ||
[Analyze grammar]

yastaret sāgaraṃ dorbhyāṃ pātayed bhuvi bhāskaram |
merumutpāṭayedvāpi sa jayed yamaśaṃkarau || 46 ||
[Analyze grammar]

kiṃ na śrutaṃ tvayā rājan pūrve vai cā'ndhakāsuraḥ |
pārvatīkāmanāmūḍhaḥ sadaityo nāśamāptavān || 47 ||
[Analyze grammar]

mahīṣaśca tathā jambhaḥ kujambho nāśamāgatāḥ |
śaṃkhacūḍastathā jālaṃdharo'pi nāśamāgatau || 48 ||
[Analyze grammar]

bhasmo murastathā cānye vinaṣṭā mohamāritāḥ |
parastrīkāmanāmūḍhaḥ purā daṇḍo mahīpatiḥ || 49 ||
[Analyze grammar]

śukraputryāṃ ratiṃ kṛtvā sarāṣṭro nāśamāptavān |
śṛṇu dūta tataḥ śrutvā śrāvaya tvaṃ narādhipam || 50 ||
[Analyze grammar]

daṇḍo rājā mahānāsīt prabhūtabalavāhanaḥ |
īje sa vividhairyajñairnṛpatiḥ śukrapālitaḥ || 51 ||
[Analyze grammar]

śukraścā'syā'bhavad yajñe purohitaḥ punaḥ punaḥ |
śukraḥ kadācidagamat pātālaṃ daityamantritaḥ || 52 ||
[Analyze grammar]

śukrasyāsīttu duhitā arajā nāmato gṛhe |
ekākinī parṇakuṭyāṃ śuśrūṣantī makhā'nalam || 53 ||
[Analyze grammar]

rājā tu darśanaṃ kartuṃ cāyāto parṇaje gṛhe |
agniṃ praṇamya ca kanyāmekākinīṃ surūpiṇīm || 54 ||
[Analyze grammar]

sandṛṣṭvā kāmasantaptastatkṣaṇādeva pārthivaḥ |
neme tāṃ tu guroḥ putrīṃ pūrṇayauvanaśālinīm || 55 ||
[Analyze grammar]

sāpi tamāgataṃ kanyā pratyutthāya tapodhanā |
bhrātṛbhāvena satkṛtya mālāṃ prāsādikīṃ dadau || 56 ||
[Analyze grammar]

tatastāmāha nṛpatirbāle kāmāgnitāpitam |
māṃ samāhlādayasvā'tra svapariṣvaṃgavāriṇā || 57 ||
[Analyze grammar]

sā taṃ prāha tadā me tu pitā tvāṃ nirdahecca mām |
yaḥ samartho jīvayituṃ devān mārayituṃ hyapi || 58 ||
[Analyze grammar]

bhavān bhrātā dharmato'sti śiṣyo yataḥ piturmama |
tvaṃ maivaṃ mānasaṃ rājan ekānte kartumarhasi || 59 ||
[Analyze grammar]

so'bravīd bhīru māṃ śukraḥ kālena paridhakṣyati |
kāmāgnistvadya māmatra dahatyeva praśāmaya || 60 ||
[Analyze grammar]

sā prāha daṇḍaṃ nṛpatiṃ muhūrtaṃ paripālaya |
guruṃ tameva yācasva sa te dāsyatyasaṃśayam || 61 ||
[Analyze grammar]

daṇḍo'bravīt arajo me kālakṣepo na vai kṣamaḥ |
kṣaṇe kṣaṇe nu vighnānāṃ paṃktiḥ sarvatra vidyate || 62 ||
[Analyze grammar]

virajā prāha nātmānaṃ dātuṃ śaktā narādhipa |
kāmabhoge tu sutarāmasvatantrā hi yoṣitaḥ || 63 ||
[Analyze grammar]

kiṃ vadāmi tava rājannevamutpathavartinaḥ |
rāṣṭraṃ rājyaṃ kuṭumbaṃ ca svayaṃ cānyacca yat tava || 64 ||
[Analyze grammar]

sarvaṃ tvayā yutaṃ nāśaṃ śukraśāpena yāsyati |
maivaṃ vahnau pata rājannaitad dharmyaṃ hi vidyate || 65 ||
[Analyze grammar]

rājā prāha balāttvāṃ vai bhokṣye cennaiva manyase |
arajā yajñavahniṃ svahaste kṛtvā nṛpopari || 66 ||
[Analyze grammar]

cikṣepa gaccha duṣṭātmannito vibhraṣṭamānasa |
ityuktvā parṇaśālāṃ ca tyaktvā gantuṃ bahirhi sā || 67 ||
[Analyze grammar]

yāvaddhāvati tāvattāṃ dhṛtvā kṛtvā svavakṣasi |
kāmopahatacittātmā vyadhvaṃsayata mandadhīḥ || 68 ||
[Analyze grammar]

tāṃ kṛtvā cyutacāritrāṃ niścakrāma yayau gṛham |
sāpi śukraplutā bālā arajā rajasā plutā || 69 ||
[Analyze grammar]

āśramādatha nirgatya bahistasthāvadhomukhī |
cintayantī svapitaraṃ rudatī ca muhurmuhuḥ || 70 ||
[Analyze grammar]

asnānā cā'bhojanā ca tasthau vṛkṣaṃ samāśritā |
praharānte pitā tasyāḥ śukraḥ prāgamadāśramam || 71 ||
[Analyze grammar]

dadṛśe kanyakāṃ naijāṃ sandhyātulyāṃ rajasvalām |
papraccha putri kenā'si dharṣitā vā kathaṃ nvidam || 72 ||
[Analyze grammar]

kva sa duṣṭo yayau pāpī vidhvaṃsayati kanyakām |
rudatī sā vrīḍayā svapitaraṃ prāha cārajāḥ || 73 ||
[Analyze grammar]

rājñā daṇḍena cāgatya vāryamāṇena cā'sakṛt |
balādanāthā rudatī nītā'hamīdṛśīṃ daśām || 74 ||
[Analyze grammar]

etacchrutvā hyupaspṛśya śuciḥ śukraḥ śaśāpa tam |
yasmāttenā'vinātena mamā''jñāṃ mama gauravam || 75 ||
[Analyze grammar]

tiraskṛtya śubhācārā cyutadharmā'rajāḥ kṛtā |
tasmāt sarāṣṭraḥ sabalaḥ sabhṛtyo vāhanaiḥ saha || 76 ||
[Analyze grammar]

saptarātrāntarād bhasma daṇḍo bhavatu sānugaḥ |
śukraḥ putrīṃ tataḥ prāha śuddhācārāṃ tapasvinīm || 77 ||
[Analyze grammar]

māsānte tvāgate rājasvalye śuddhā bhaviṣyasi |
tāvat tapaḥ kuru putri yatheṣṭaṃ cocitaṃ tava || 78 ||
[Analyze grammar]

na te doṣo'sti vai putri garbhaste na bhaviṣyati |
piba coṣṇaṃ pañcagavyaṃ mā bhayaṃ kuru putrike || 79 ||
[Analyze grammar]

atha daṇḍo'pi nṛpatiḥ sarāṣṭrabalavāhanaḥ |
bhasmībhūto'bhavat śāpātsaptarātrāntare'sura || 80 ||
[Analyze grammar]

evaṃ bhasmasthalaṃ jātaṃ daṇḍakāraṇyamulbaṇam |
evaṃ parakalatrāṇi dharṣayanti tu ye janāḥ || 81 ||
[Analyze grammar]

bhasmībhavanti te sarve sarāṣṭrabalavāhanāḥ |
dharmaśīlā vinītāśca nyāyamārgā hi nirbhayāḥ || 82 ||
[Analyze grammar]

prasahya paradārasthāścehā'mutra na nirbhayāḥ |
dharmānvito ravirdharmaḥ patnīvrataśca bhūsuraḥ || 83 ||
[Analyze grammar]

agastyaśca manuḥ svayaṃprakāśo'nye munīśvarāḥ |
tejasvinaḥ śāpamokṣavarakṣamāḥ surā'rcitāḥ || 84 ||
[Analyze grammar]

adharmasthāścandradevendrāndhakā duḥkhino'bhavan |
tasmāddharmo na santyājyo dharmo hi paramā gatiḥ || 85 ||
[Analyze grammar]

tāraṇaṃ paramo dharmaḥ patanaṃ tvanayād bhavet |
tasmāt tyājyaṃ balānnityaṃ paradāropasevanam || 86 ||
[Analyze grammar]

nayanti paradārāstu mahāpattīrhi dāruṇāḥ |
parārthaparadārasthā narakārhā sadā matāḥ || 87 ||
[Analyze grammar]

tasmādvai dūratastyājyāḥ paradārā vicakṣaṇaiḥ |
paradārahataprajñā na bhavanti vibhūtaye || 88 ||
[Analyze grammar]

śṛṇu dūta kathāṃ cānyāṃ kathayāmi samāsataḥ |
ityuktvā nāradaḥ prāha kathāṃ divyāṃ purātanīm || 89 ||
[Analyze grammar]

viśvakarmasutā sādhvī nāmnā citrāṃgadā'bhavat |
rūpayauvanasampannā kamalā padminī yathā || 90 ||
[Analyze grammar]

sā snātuṃ naimiṣe kṣetre sakhīyuktā jagāma ha |
snāntī dadarśa surathaḥ sudevatanayo nṛpaḥ || 91 ||
[Analyze grammar]

sā'pi tvabhūt sakāmā'ti svapradānamiyeṣa ca |
sakhyastāmabruvan bāle naitad yogyaṃ hi jāyate || 92 ||
[Analyze grammar]

asvātantryaṃ tavā'styatra pradāne svātmanaḥ pare |
pitā kuryāt sutādānaṃ sutā pitṛvaśe yataḥ || 93 ||
[Analyze grammar]

na te yuktamihātmānaṃ dātuṃ narapateḥ svayam |
etasminnantare rājā surathaḥ kāmapīḍitaḥ || 94 ||
[Analyze grammar]

uvācenāṃ madirākṣi mugdhe mohayasīva mām |
tanmāṃ kucatale talpe'bhiśāyayitumarhasi || 95 ||
[Analyze grammar]

tataḥ sā kāmasantaptā prārthitā bhūbhṛtā muhuḥ |
vāryamāṇā sakhībhistu prādādātmānamātmanā || 96 ||
[Analyze grammar]

ātmā pradattaḥ svātantryāt tatastā tādṛśīṃ sutām |
pitaraṃ cāvamanyaiva kāmagāmaśapat pitā || 97 ||
[Analyze grammar]

yato dharmaṃ parityajya śrībhāvāt mūrkhabhūbhṛte |
ātmā pradattastasmātte vivāho na bhaviṣyati || 98 ||
[Analyze grammar]

vivāharahitā naiva sukhaṃ lapsyasi bhartṛtaḥ |
na ca putraphalaṃ naiva patinā yogameṣyasi || 99 ||
[Analyze grammar]

utsṛṣṭamātre śāpe tu hyapovāha sarasvatī |
akṛtārthaṃ narapatiṃ yojanāni trayodaśa || 100 ||
[Analyze grammar]

apakṛṣṭe narapatau sā'pyanirvṛttakāmanā |
mūrchāyāṃ patitā tatra tadā sakhyo jalena tām || 101 ||
[Analyze grammar]

siṣicuḥ śaityamāpannā kṣaṇāntare'tiduḥkhitā |
mṛtakalpā hatotsāhā saṃjñāṃ lebhe śanaiḥ śanaiḥ || 102 ||
[Analyze grammar]

apaśyantīṃ narapatiṃ dudrāva vegatastadā |
nipapāta sarasvatyā muhyamānā taraṃgakaiḥ || 103 ||
[Analyze grammar]

nirgatā sā mahāraṇye siṃhavyāghrasamākule |
tāmapaśyad guhyakaśca ninye śrīyamunātaṭe || 104 ||
[Analyze grammar]

tatra cikṣepa ca bhuktvā jale śrīkṛṣṇasannidhau |
sā nirgatya śironamrā madhyāhne saṃsthitā'bhavat || 105 ||
[Analyze grammar]

dadarśaināṃ tāpasastu ṛtudhvajābhidhānakaḥ |
tāṃ prāha putri kasyā'si sutā kathaṃ samāgatā || 106 ||
[Analyze grammar]

tataḥ sā sarvavṛttāntaṃ yāthātathyamuvāca vai |
śrutvā ṛṣi krudhā tasyāḥ pitaraṃ śilpināṃ varam || 107 ||
[Analyze grammar]

aśapad yattvayā tvaṣṭardānayogyā'pi pāpinā |
yojitā naiva patinā tasmācchākhāmṛgo bhava || 108 ||
[Analyze grammar]

iti śāpād viśvakarmā drāgeva vā naro'bhavat |
nyapatanmeruśikharād bhūpṛṣṭhaṃ śāpakāraṇāt || 109 ||
[Analyze grammar]

aṭan pṛthvīṃ samāyātaḥ śrīkaṇṭhaṃ vai ṛtudhvajam |
prārthayanme mahāghoro dattaḥ śāpo nivartyatām || 110 ||
[Analyze grammar]

citrāṃgadāyāḥ pitaraṃ māṃ tvaṣṭāraṃ vibhāvaya |
mayā vānararūpeṇa pāpānyapi kṛtāni hi || 111 ||
[Analyze grammar]

tāni me saṃkṣayaṃ yāntu kṛpāṃ kuru ṛtudhvaja |
ṛtudhvajastataḥ prāha śāpasyā'nto bhaviṣyati || 112 ||
[Analyze grammar]

samutpādya ghṛtācyāṃ vai tanayaṃ sumahābalam |
tāvat saumyāṃ ghṛtācīṃ so'paśyat tatkāmito'bhavat || 113 ||
[Analyze grammar]

dadau garbhaṃ kāmayānāṃ sāpi godāvarītaṭe |
prāpte kāle balavantaṃ prāsūta tanayaṃ nalam || 114 ||
[Analyze grammar]

vānaraḥ kapitāṃ tyaktvā viśvakarmā'bhavat kṣaṇāt |
citrāṃgadā saptagodāvaraṃ tīrthaṃ gatā'bhavat || 115 ||
[Analyze grammar]

hāṭakeśvarapūjāyāṃ sadā magnā'bhavad yataḥ |
tatrā'yaṃ vānaro viśvakarmarūpo'bhavat tadā || 116 ||
[Analyze grammar]

sarvaṃ jñātavatī putrī svātantryaduḥkhamīdṛśam |
viśvakarmā tatastatra rājānaṃ surathaṃ punaḥ || 117 ||
[Analyze grammar]

samāhūya dadau tasmai citrāṃgadāṃ sutāṃ nijām |
tataḥ sā sukhinī jātā bhuktvā kaṣṭaṃ śataṃ samāḥ || 118 ||
[Analyze grammar]

tasmād dūta mahādūta raktavārdhe subuddhiman |
jumāsemlākhyanṛpatiṃ nivedaya mayoditam || 119 ||
[Analyze grammar]

sarvaṃ yathārthaṃ vidhivad yāhi gṛhaṃ sukhaṃ vasa |
ajitvā tu vimānaṃ vā kanyakā nahi lapsyase || 120 ||
[Analyze grammar]

itiśrīlakṣmīnārāyaṇīyasaṃhitāyāṃ dvitīye tretāsantāne abriktadeśīyanṛpatinā svasenādhipaiḥ sarvakāmavimānaṃ ruddhaṃ dūtoktiḥ nāradasya pratyuktiśca tatra śukrā'rajādaṇḍānāṃ viśvakarmacitrāṃgadāsurathānāṃ kathā cetyādinirūpaṇanāmā pañcāśattamo'dhyāyaḥ || 50 ||
[Analyze grammar]