Chapter 49

śrīrādhikovāca |
kathaṃ kānta suṣumṇādyāḥ kṛṣṇanārāyaṇena vai |
lomaśasyā''śrame sthātuṃ nājñaptāḥ svīkṛtā api || 1 ||
[Analyze grammar]

śrīkṛṣṇa uvāca |
dvāsaptatisahasrāṇi kanyāścānyāstu vedhasaḥ |
tā mānasyaḥ samicchanti kṛṣṇaṃ kāntaṃ pareśvaram || 2 ||
[Analyze grammar]

satyaloke vasanti sma pratīkṣante sma bhāvataḥ |
tisro'grajāḥ sameṣyanti dṛṣṭvā kṛṣṇanarāyaṇam || 3 ||
[Analyze grammar]

vayaṃ tābhiḥ samaṃ tatra gamiṣyāmo vilokitum |
kṛṣṇanārāyaṇaṃ seviṣyāmahe'nādimādhavam || 4 ||
[Analyze grammar]

itipratīkṣamāṇānāmānayanārthameva tāḥ |
na niruddhā idānīṃ vai sthātuṃ śrīlomaśāśrame || 5 ||
[Analyze grammar]

brahmaṇā preṣitāḥ kṛṣṇo rakṣayiṣyati tāḥ punaḥ |
atha tāḥ svavimānena paścimāṃ dakṣiṇāṃ diśam || 6 ||
[Analyze grammar]

samudraṃ ca tathā dvīpānabriktān supradeśakān |
paśyantyo vyomamārgeṇa pradakṣiṇecchayottaram || 7 ||
[Analyze grammar]

yāntyaḥ pradadṛśurdeśaṃ cābriktaṃ sumahattaram |
punaḥ punaḥ parāvṛtya vyomnā yānena nirbhayāḥ || 8 ||
[Analyze grammar]

ārabījaṃ mahādvīpaṃ raṇaṃ dṛṣṭvā tato'grataḥ |
raktaṃ ca vāridhiṃ dṛṣṭvā bhūmau nārāyaṇīṃ nadīm || 9 ||
[Analyze grammar]

vīkṣya dakṣiṇabhāge ca rudrabāṣpaṃ sarovaram |
tathā vijñaturīyākhyaṃ dṛṣṭvā śreṣṭhaṃ sarovaram || 10 ||
[Analyze grammar]

tuṅgānīkasaraścāpi tathā nyāsasaro'pi ca |
dṛṣṭvā liṃgarasādriṃ ca drākṣābījaṃ ca parvatam || 11 ||
[Analyze grammar]

kālahariṃ raṇaṃ dṛṣṭvā umāśaṃbhugiriṃ tathā |
karmāṅgīṃ ca nadīṃ dṛṣṭvā karmaghnaṃ parvataṃ tathā || 12 ||
[Analyze grammar]

caṇḍasarastato dṛṣṭvā vīkṣya naṣṭajarāṃ nadīm |
sahariharasaṃjñaṃ ca raṇaṃ vilokya vai tataḥ || 13 ||
[Analyze grammar]

ataleṣṭaṃ parvataṃ ca tanmukhaṃ parvataṃ tathā |
trirāśiparvataṃ dṛṣṭvā līlābījaraṇaṃ tathā || 14 ||
[Analyze grammar]

śrīramāyā raṇaṃ dṛṣṭvā tururājyaṃ vilokya ca |
kaśyapāyanavārdhi ca dṛṣṭvā coralaparvatam || 15 ||
[Analyze grammar]

paścime ca kukeśādriṃ nīlābdhiṃ pravilokya ca |
nīparāṃ ca nadīṃ kārpanthāyanaṃ cāpi parvatam || 16 ||
[Analyze grammar]

dīnayūpāṃ nadīṃ dṛṣṭvā dṛṣṭvā ca ailaparvatam |
īpīnāsanaśailaṃ ca śāradīdvīpamityapi || 17 ||
[Analyze grammar]

madhyavādhiṃ vilokyaiva pitṛnijaṃ ca parvatam |
tegirāṃ ca nadīṃ vīkṣya deśān samudramadhyagān || 18 ||
[Analyze grammar]

lukvārāṃ ca nadīṃ senānadīṃ vīkṣya ca khāḍikām |
jarāmaunapradeśaṃ ca bālayamapradeśakam || 19 ||
[Analyze grammar]

īṅgadvīpaṃ tathā cāyadvīpaṃ vilokya khāḍikām |
koṭadvīpaṃ svedadvīpaṃ phenadvīpaṃ tataḥ param || 20 ||
[Analyze grammar]

piṣṭavargān vilokyā'tha girīnapṛthivīṃ tathā |
ālīśāmṛtapṛthivīṃ divonadvīpakādikān || 21 ||
[Analyze grammar]

vilokya khāḍikādvīpān vikturīyabhuvaṃ yayuḥ |
khāḍīmuttīrya ca tato viviśuścottarān kurūn || 22 ||
[Analyze grammar]

teṣu mahābṛhatsaro mahatsulvabhidhaṃ saraḥ |
ayābāṣkaṃ saro dṛṣṭvā vinipāgacchakaṃ saraḥ || 23 ||
[Analyze grammar]

haṭṭāsanaṃ samudraṃ ca dviphenadvīpamityapi |
lambodarādipṛthivīṃ sūparyuparikaṃ saraḥ || 24 ||
[Analyze grammar]

santaluyīpradeśa ca atalāntapradeśakam |
mākṣikā'khātamullaṃghya kyubādvīpaṃ vilokya ca || 25 ||
[Analyze grammar]

vargidvīpān vilokyā'tha grīyānāmapyalokayan |
āmārjunāṃ nadīṃ vīkṣya śāntārāmapradeśakam || 26 ||
[Analyze grammar]

brāhmīlāṃ pṛthivīṃ vīkṣya samaikṣanta parainasām |
ārjayantīpradeśāṃśca kokadvīpau vyalokayan || 27 ||
[Analyze grammar]

grāhāmaṃ cārakoṭaṃ ca vīkṣya cāntārkivartulam |
jalaprastaradeśāṃśca vīkṣya bhūguhyabindukam || 28 ||
[Analyze grammar]

parāvṛtya tirodevaṃ paṭṭogānāṃ vyalokayan |
cīllikāṃ perukāṃ pṛthvīṃ pannāmnīṃ nirjharāṃ tathā || 29 ||
[Analyze grammar]

mākṣikaṃ bhūtalaṃ vīkṣya nimnaphornāṃ vilokya ca |
kvīṭanādriṃ rokiśailam ilāsanaṃ ca parvatam || 30 ||
[Analyze grammar]

raṅgilaṃ parvataṃ vīkṣya alāṃśukāṃ ca bhūmikām |
dviriṅgaṃ cābdhimuttīryā'lokayan kāmacāṭakam || 31 ||
[Analyze grammar]

kālimāṃ saritaṃ yāmāṃ bīnāṃ tandrāpradeśakān |
yāneśīṃ ca nadīm obīṃ nadīṃ vīkṣya tataḥ param || 32 ||
[Analyze grammar]

uralaṃ parvataṃ vīkṣya nāvadvīpaṃ vilokya ca |
phiyojānāsanadvīpān sphītavargān vilokya ca || 33 ||
[Analyze grammar]

skandanābhamahāśailaṃ śvetavārdhiṃ vilokya ca |
devīnāṃ saritaṃ valgāṃ nadīṃ valgākhyaparvatān || 34 ||
[Analyze grammar]

uralaṃ ca saro dṛṣṭvā bālakṛṣṇasarastathā |
śvetaraktapradeśāṃśca dṛṣṭvā sāvariyāraṇam || 35 ||
[Analyze grammar]

dṛṣṭvā kimpuruṣaṃ deśaṃ dvikalaṃ ca sarovaram |
vīkṣya prabhālunādriṃ ca stenāvāsaṃ ca bhūbhṛtam || 36 ||
[Analyze grammar]

akṣoḍhāvārdhimālokya jalapānādibhūmikāḥ |
piśaṅgavārdhimālokya akṣigaṃ parvataṃ tathā || 37 ||
[Analyze grammar]

gopīraṇaṃ vilokyā'tha āpatāyikaparvatam |
triyānāsanaśailaṃ ca kunalīnaṃ ca parvatam || 38 ||
[Analyze grammar]

kārukoraṃ parvataṃ ca cipiṃgadeśamujjvalam |
aṃgaśikṣāṃgasaritaṃ vīkṣya śikṣāṃgikāṃ nadīm || 39 ||
[Analyze grammar]

phullipānadvīpān dṛṣṭvā dvīpāṃśca vāraṇīyakān |
vīkṣya dvīpaṃ navagītiṃ vīkṣya dvīpān samudrajān || 40 ||
[Analyze grammar]

uṣṇālayā'bhidhāṃ pṛthvīṃ vyalokayan vihāyasā |
cāṭadeśaṃ divādikparvatān vīkṣya tataśca tāḥ || 41 ||
[Analyze grammar]

okadvīpaṃ navajīvadvīpaṃ vīkṣya samudragau |
vīkṣya dvīpaṃ trāsamānam uṣṭrālaye murānadīm || 42 ||
[Analyze grammar]

turunadīm aitanadīṃ mekadāneyaparvatam |
maśakagrīvaśailaṃ ca mahāraṇaṃ vanaṃ tathā || 43 ||
[Analyze grammar]

pañcasarāṃsi ca dṛṣṭvā dārāliṅgaṃ ca parvatam |
bālādriṃ hemaśālā'drim ārnahemapradeśakān || 44 ||
[Analyze grammar]

dṛṣṭvā yāvān sumātrāṃśca malāyāṃ pṛthivīṃ tataḥ |
annadāmadvīpān śyāmadeśān mikāṃganāṃ nadīm || 45 ||
[Analyze grammar]

īrāvatīṃ nadīṃ cārākarṇādriṃ brahmadeśakān |
sundarākhyavanaṃ dṛṣṭvā hutalīnāṃ mahānadīm || 46 ||
[Analyze grammar]

gaṃgāṃ ca brahmaputrāṃ ca khāsīnāparvatāṃstathā |
patatkāryamahāśailaṃ himālayapradeśakān || 47 ||
[Analyze grammar]

dṛṣṭvā mānasaraścāpi śrīdeśaṃ ca trivartanam |
sindhum indukuśaṃ dṛṣṭvā dṛṣṭvā kṛpāluparvatam || 48 ||
[Analyze grammar]

thararaṇaṃ ca kacchaṃ ca dṛṣṭvā sābharakaṃ saraḥ |
āravallībhūbhṛtaṃ ca dṛṣṭvā mahīṃ ca narmadām || 49 ||
[Analyze grammar]

saptapuṭākhyaśailaṃ ca tapatīṃ ca mahānadīm |
mahābaleśvaraṃ dṛṣṭvā tathā ca malayaṃ girim || 50 ||
[Analyze grammar]

sahyādriṃ saṃvilokyaiva dakṣiṇāṃśca pradeśakān |
samudrasthaṃ siṃhalākhyaṃ dvīpaṃ vīkṣya parāvṛtāḥ || 51 ||
[Analyze grammar]

kāverīṃ saritaṃ kṛṣṇāṃ godāvarīṃ mahānadīm |
jagannāthapuraṃ kṣetraṃ kapilāśramamityapi || 52 ||
[Analyze grammar]

vaṃgaṃ cāṃgaṃ vihāraṃ ca bhūtānaṃ nipalaṃ tathā |
gaṇḍakīṃ ca kurukṣetraṃ gaṅgādvāraṃ vilokya tāḥ || 53 ||
[Analyze grammar]

rādhike badarīṃ gatvā nyūṣustatra niśāṃ sukham |
nārāyaṇaparāsevāṃ kṛtvā sampūjya taṃ prabhum || 54 ||
[Analyze grammar]

gaurīśṛṃgaṃ śivaśṛṃgaṃ vilokya svardhunīṃ tathā |
vyomagaṅgānumārgeṇa svarlokāt satyalokakam || 55 ||
[Analyze grammar]

yayuḥ śrībrahmaṇaḥ pārśve mahānandapariplutāḥ |
vavanduḥ pitaraṃ ceḍā suṣumṇā piṃgalā tathā || 56 ||
[Analyze grammar]

mahāharṣaplutāstīrthavidhiṃ prāhuryathākṛtam |
anādiśrīkṛṣṇanārāyaṇasya caraṇāmṛtam || 57 ||
[Analyze grammar]

puṣpahārān daduścāpi mantraṃ jaguḥ punaḥ punaḥ |
nāradasyopakāraṃ ca samūcuśca parasparam || 58 ||
[Analyze grammar]

āgatāḥ kanyakāścāpi tisraḥ śrutvā'nyakanyakāḥ |
dvāsaptatisahasrāṇi vṛttāntaṃ vedituṃ tathā || 59 ||
[Analyze grammar]

svāgatārthaṃ cāyayuśca brahmaṇaḥ sannidhau tadā |
yaśasvinī hastijihvā pūṣā viśvodarā kuhūḥ || 60 ||
[Analyze grammar]

alambuṣā ca gāndhārī śaṃkhinī ca payasvinī |
sarasvatī vāruṇī ca tejasvinī ca raktinī || 61 ||
[Analyze grammar]

purītat vīryavāhā ca prāṇavāhā tathā''rdrikā |
ityādyāśca dvāsaptatisahasrāṇi hyupasthitāḥ || 62 ||
[Analyze grammar]

kanyakāḥ ṣoḍaśavarṣanyūnā divyāḥ kumārikāḥ |
svāgataṃ snehataścakrustisṛṇāṃ vai muhurmuhuḥ || 63 ||
[Analyze grammar]

anādiśrīkṛṣṇanārāyaṇapādajalaṃ papuḥ |
prasādamālāpuṣpāṇi jagṛhuścādarānvitāḥ || 64 ||
[Analyze grammar]

śuśruvuḥ śrīharervārtāṃ rūpasaundaryamāśritām |
camatkāramayīṃ sarvāṃ tathā vai pattanasya ca || 65 ||
[Analyze grammar]

lomaśasyāśramasyāpi bālakṛṣṇālayasya ca |
koṭyarbudānāṃ kanyānāṃ sevābhāvaṃ ca śuśruvuḥ || 66 ||
[Analyze grammar]

yaśasvinyādikā nāḍīsaraso brahmaṇaḥ sutāḥ |
dadṛśustisṛsvasṝṇāṃ rūpaṃ saubhāgyamuttamam || 67 ||
[Analyze grammar]

divyatāṃ kṛṣṇakāntena dattāṃ tathā ca laukikīm |
cintayāmāsuratyarthaṃ kṛṣṇasaubhāgyamuttamam || 68 ||
[Analyze grammar]

amanyanta nijā'bhāgyaṃ darśanaṃ na vyajāyata |
darśanārthaṃ gatā naiva kuto vai darśanaṃ bhavet || 69 ||
[Analyze grammar]

pitrājñayā hyavaśyaṃ vai gantavyaṃ draṣṭumacyutam |
anādiśrīkṛṣṇanārāyaṇaṃ kāntaṃ pareśvaram || 70 ||
[Analyze grammar]

ityevaṃ cintayāmāsuḥ pitaraṃ prāhurutsukāḥ |
pitaścāsmān darśanaṃ tvaṃ kārayā''bhiryathā kṛtam || 71 ||
[Analyze grammar]

variṣyāmastameveśeśvareśvaraṃ pumuttamam |
ityuktaṃ brahmaṇe tābhirbrahmā tutoṣa mānase || 72 ||
[Analyze grammar]

ko'nyo lābhaḥ paraścāsmād yajjāmātā harirbhavet |
dhanyāstāḥ kanyakā loke kaumāryaṃ saphalaṃ tathā || 73 ||
[Analyze grammar]

pitā dhanyo jananī ca dhanyā dhanyaṃ kuṭumbakam |
dhanyo bhṛguḥ samudraśca kedāraścānaraṇyakaḥ || 74 ||
[Analyze grammar]

sūryo nārāyaṇo nānyo yatputryaḥ kṛṣṇayoṣitaḥ |
dhanyā loke bhaviṣyanti te janā yatsutāḥ śubhāḥ || 75 ||
[Analyze grammar]

kṛṣṇapatnyo bhaviṣyanti rādhālakṣmīprabhādivat |
bhaktyā jñānena tapasā vairāgyeṇa makhādibhiḥ || 76 ||
[Analyze grammar]

yaḥ prāptavyaśca kṛcchrairvā yogairdānādibhistathā |
sevayā vā satāṃ cet sa snehena yadi labhyate || 77 ||
[Analyze grammar]

mohena yauvanenāpi vāsanayecchayā'tha vā |
rūpeṇendriyavegena mileccetpuruṣottamaḥ || 78 ||
[Analyze grammar]

sa moho yauvanaṃ cecchā vāsanā rūpamindriyam |
sarvaṃ dharmātmakaṃ bodhyaṃ kāmaḥ krodho'pi tanmayaḥ || 79 ||
[Analyze grammar]

kṛṣṇe kāmastathā lobho moho mokṣakaraḥ sadā |
mokṣastu śāśvatānandaḥ sa ca kṛṣṇanarāyaṇe || 80 ||
[Analyze grammar]

garhyaṃ stutyaṃ ca vā kiñcit kṛtaṃ cet kṛṣṇatuṣṭaye |
sarvaṃ vandyaṃ hi tad bodhyaṃ pāvanaṃ tārakaṃ hi tat || 81 ||
[Analyze grammar]

aho putryaḥ sadā dhanyo bhāgyavān vai bhavāmyaham |
yat kṛṣṇāya pradāsyāmi dānaṃ pātrāya śārṅgiṇe || 82 ||
[Analyze grammar]

kṛṣṇecchā kīdṛśī cāste jñātvā dāsye śubhaṃ bhavet |
ityuktvā ca svayaṃ brahmā sasmāra nāradaṃ munim || 83 ||
[Analyze grammar]

upatasthau kṣaṇāttatra praṇamya cāsane sthitaḥ |
brahmā prāha bhaginyaste tisro yatra narāyaṇam || 84 ||
[Analyze grammar]

suṣumṇādyāḥ pūjayitvā punaratra samāgatāḥ |
tatraitāścaparāḥ kanyā draṣṭuṃ gantuṃ samutsukāḥ || 85 ||
[Analyze grammar]

vidyante'tastvayā tatra netavyā vai vimānakaiḥ |
samāyāte'vasare'haṃ dāsye kṛṣṇāya kanyakāḥ || 86 ||
[Analyze grammar]

dvāsaptatisahasrāṇi draṣṭumicchanti keśavam |
yaśasvinyādikāḥ sarvā nāḍikāsarasaḥ śubhāḥ || 87 ||
[Analyze grammar]

daśabhaumaṃ sahasraikaśikharaṃ kāmacāri ca |
gṛhāṇaitanmahāyānaṃ yojanāyatavartulam || 88 ||
[Analyze grammar]

kāmavallīḥ kāmavṛkṣān cintāmaṇīn dhanapradān |
amṛtamiṣṭabhojyādipradānatra niveśaya || 89 ||
[Analyze grammar]

śastraśālāḥ sainyaśālā bhojyaśālāstathā'tra vai |
mantraśālāścauṣadhādisamūhāḥ santi cātra vai || 90 ||
[Analyze grammar]

rasaśālā vastraśālā rakṣāśālāstathā'tra ca |
siddhayaḥ śaktayo dāsyaḥ kiṃkaryaḥ santi lakṣaśaḥ || 91 ||
[Analyze grammar]

astrāṇi cāpyanekāni vedāścatvāra ityamī |
maraṇādiprayogāśca samūrtāḥ santi cātra vai || 92 ||
[Analyze grammar]

indrajālavināśārthaṃ māyānāśārthamityapi |
daityadānavanāśārthaṃ santyatra mantramūrtayaḥ || 93 ||
[Analyze grammar]

antato'haṃ svayaṃ brahmā śaṃkaro'pi narāyaṇaḥ |
mūrtyātmakā yathā sākṣānnivasāmo'tra cetanāḥ || 94 ||
[Analyze grammar]

acchedyaṃ cāpyabhedyaṃ cā'vilepyaṃ cā'pyanāśyakam |
adāhyaṃ śāśvataṃ caitadvimānaṃ tvaṃ gṛhāṇa ca || 95 ||
[Analyze grammar]

suṣumṇeḍāpiṃgalābhiḥ sahitābhiḥ svayam ṛṣe |
dvāsaptatisahasrābhiḥ kanyābhiḥ saha putraka || 96 ||
[Analyze grammar]

anādiśrīkṛṣṇanārāyaṇaṃ bhūsthaṃ prayāhi vai |
upadā vividhā nītvā kanyeṣṭān divyavaibhavān || 97 ||
[Analyze grammar]

śṛṃgārahārabhūṣādyānupakārakarān śubhān |
nayasva saha yāne'tra sukhaṃ cārpaya śārṅgiṇe || 98 ||
[Analyze grammar]

ityukto nāradastatra sanatkumāramārthayat |
sādhurūpaṃ brahmarūpaṃ rakṣakaṃ brahmavarcasam || 99 ||
[Analyze grammar]

tathā rudraṃ dharmarājaṃ cārthayad rakṣaṇāya vai |
brahmā sanatkumāraṃ ca rudraṃ dharmaṃ dadau tadā || 100 ||
[Analyze grammar]

divyavastubhṛtaṃ yānaṃ cāruruhuśca kanyakāḥ |
sarvaśṛṃgāraśobhāḍhyā jayaśabdān pracakrire || 101 ||
[Analyze grammar]

maṅgalānyabhavaṃstatra yātrārambhe punaḥ punaḥ |
sāvitrī cāhvayāmāsa gamane pṛṣṭhatastadā || 102 ||
[Analyze grammar]

yāta putryaḥ sāvadhānāḥ pātheyāni srajastadā |
gṛhṇateti dadau tābhyaścaitanmaṃgalamuttamam || 103 ||
[Analyze grammar]

devaśivā tadā vāme susvareṇā''vahajjayam |
devahārītamevāpi parāṅmukhaṃ puro'bhavat || 104 ||
[Analyze grammar]

yānasya gamane vīṇā nāradasyā'patat karāt |
amaṅgalaṃ tu tajjātaṃ dvedhā bhinnā'bhavaddhi sā || 105 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
ityevaṃ nāradaḥ prāhā'maṃgalasya praśāntaye || 106 ||
[Analyze grammar]

vimānaṃ satyalokāt tat lokālokācalaṃ hyanu |
avātarat paścimāyāṃ diśi bhuvaṃ prati kṣaṇāt || 107 ||
[Analyze grammar]

kāñcanyāṃ bhūmikāyāṃ ca kṣaṇaṃ viśrāntimāpya ca |
pūrvābhimukhamābaddhya digbhāgaṃ vyomamārgataḥ || 108 ||
[Analyze grammar]

śanaiḥ śanai samāyāti kanyāḥ paśyanti bhūstarān |
abdhin deśān vicitrāṃśca modante'nyonyamityapi || 109 ||
[Analyze grammar]

ityevaṃ rādhike yānaṃ cābriktopari cāgatam |
paśyanti sūryatulyaṃ tad rākṣasāḥ krūramānasāḥ || 110 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne suṣumṇādikā vimānena pṛthvīkhaṇḍān vilokya satyalokaṃ yayuḥ punardvāsaptatisahasrakanyakā vimānena vyomnā śrīharyarthaṃ prasthitāścetyādinirūpaṇanāmā navādhikacatvāriṃśo'dhyāyaḥ || 49 ||
[Analyze grammar]