Chapter 43

śrīkṛṣṇa uvāca |
śṛṇu tvaṃ rādhike bhaktakathāṃ paramapāvanīm |
tato'yaṃ nṛpatiḥ raṇaṃgamastīrthe'tra nityaśaḥ || 1 ||
[Analyze grammar]

cakāra vidhivattūrdhvadaihikaṃ śrāddhatarpaṇam |
bhojayāmāsa viprāṃśca sādhūn sādhvīśca kanyakāḥ || 2 ||
[Analyze grammar]

bālān ṛṣīṃśca devāṃśca bhikṣukān kiṃkarāṃstathā |
dadau dānāni bahudhā svarṇarūpyāṇi bhāvataḥ || 3 ||
[Analyze grammar]

jagrāha lomaśānmantraṃ vaiṣṇavaṃ paramaṃ drutam |
oṃ namaḥ śrīkṛṣṇanārāyaṇāya svāmine svāhā || 4 ||
[Analyze grammar]

vrataṃ cakāra vidhivat tīrthavidhiṃ cakāra ha |
jagrāha tulasīmālāṃ pratimāṃ pārameśvarīm || 5 ||
[Analyze grammar]

bheje kṛṣṇaṃ bālakṛṣṇaṃ lomaśasyā''śrame tataḥ |
uvāsa paramaprītyā viprabhṛtyādibhiḥ saha || 6 ||
[Analyze grammar]

samāgamaṃ ca sādhūnāṃ karotyeva divāniśam |
saṃsmṛtya pūrvajāṃstatra yajñaṃ kartumiyeṣa ca || 7 ||
[Analyze grammar]

śrīrādhikovāca |
ko'yaṃ rājā kasya vaṃśe'bhavat ke tasya pūrvajāḥ |
kathaṃ yajñaṃ cakārā'sau kadā kutra vadātra me || 8 ||
[Analyze grammar]

śrīkṛṣṇa uvāca |
candraputro'bhavadṛkṣo'rbudāyurdharmayogavit |
tasya putraḥ saṃvaraṇo babhūva sārvabhaumapaḥ || 9 ||
[Analyze grammar]

sūryaputrīṃ sa tapatīṃ samudvāha sukanyakām |
tābhyāṃ kālāntare jātaḥ kururājā virāgavān || 10 ||
[Analyze grammar]

pitṛrājyaṃ tvagrajebhyo pitrā dattamato hyayam |
svabhāgaṃ prāpya ca dvaitavane gatvā kṛṣiṃ śubhām || 11 ||
[Analyze grammar]

cakāra paramāṃ śreṣṭhāṃ brahmadṛṣṭyā halena vai |
viṣṇuṃ sākṣāt kratau kṛtvā mokṣalokaṃ jagāma ha || 12 ||
[Analyze grammar]

kuroḥ kaniṣṭho bhrātā yaḥ kanthādharā'bhidhaḥ śubhaḥ |
saṃvaraṇasutaḥ so'pi dāyabhāgaṃ surāṣṭrakam || 13 ||
[Analyze grammar]

āptavān khaṇḍarājyaṃ vai jīvanārthakamātram |
siṃhāraṇye koṭinārapattane samuvāsa saḥ || 14 ||
[Analyze grammar]

evaṃ so'pi candravaṃśastasya putro raṇaṃgamaḥ |
sasmāra pūrvajānaśvapaṭṭasarasi tairthikaḥ || 15 ||
[Analyze grammar]

brahmāṇaṃ ca marīciṃ kaśyapaṃ candraṃ ca ṛkṣakam |
saṃvaraṇaṃ ca kanthādhraṃ tilavārbhiratarpayat || 16 ||
[Analyze grammar]

sāvitrīṃ ca kalāṃ cāpyaditiṃ tathā ca rohiṇīm |
ghaṭikāṃ tapatīṃ hikkāṃ tilādbhiḥ samatarpayat || 17 ||
[Analyze grammar]

aśvapaṭṭasaraḥpārśve paścime bhūstare kratum |
kartuṃ ceyeṣa nṛpatiḥ raṇaṃgamo'tidhārmikaḥ || 18 ||
[Analyze grammar]

anādiśrīkṛṣṇanārāyaṇasya ṣaṣṭhavarṣake |
cāturmāsye vaiṣṇavaṃ sa mahāyāgaṃ cikīrṣati || 19 ||
[Analyze grammar]

nijarājyāttu sāmagrīrānayāmāsa satvaram |
kuśān sampādyāmāsa samidhaśca pṛthagvidhān || 20 ||
[Analyze grammar]

maṇḍapāgryaṃ maṇḍapāṃśca racayāmāsa śobhanān |
parṇaśālā vāsayogyāḥ kārayāmāsa śilpibhiḥ || 21 ||
[Analyze grammar]

kuṇḍaṃ kuṇḍān vedikāśca paṭṭikā āsanāni ca |
yajñapātrāṇyuttamānyaudumbaraṃ pātramuttamam || 22 ||
[Analyze grammar]

kauśeyāni suvastrāṇi kārayāmāsa satvaram |
rasaśālāḥ pākaśālā bhojyaśālā drumādiṣu || 23 ||
[Analyze grammar]

klṛptayāmāsa subhagāḥ peyaśālāḥ prapādikāḥ |
gauśālā hayaśālāśca patnīśālā vratasthalīḥ || 24 ||
[Analyze grammar]

kārayāmāsa vidhinā tvānayāmāsa cākṣatān |
godhūmakān yavān vrīhīn tilān phalāni śarkarāḥ || 25 ||
[Analyze grammar]

havyadravyāṇi sarvāṇi raṅgadravyāṇi yāni ca |
pūjādravyāṇyuttamāni dakṣiṇā bhūyasīstathā || 26 ||
[Analyze grammar]

japajāpyopakaraṇānyakhilānyambarāṇi ca |
kalaśān raṅgapaṭakān patrāṇi pañcadhā tathā || 27 ||
[Analyze grammar]

ghṛtapātrāṇi ca caruṃ devānāṃ sthāpanāni ca |
kārayāmāsa vidhinā svastivācyāni maṃgalam || 28 ||
[Analyze grammar]

nāndīśrāddhaṃ ca saṃskārān śuddhiṃ prokṣaṇakādikam |
śatamaṣṭottaraṃ cātha sahasraṃ brāhmaṇāstathā || 29 ||
[Analyze grammar]

yājñeyāḥ samatiṣṭhanta brahmādyāścāpare tathā |
hotodgātā pratyudgātā sāmajñā yantravedinaḥ || 30 ||
[Analyze grammar]

āhartā pratihartā ca yajamānāśca jāpakāḥ |
pāṭhakā brahmacintāśca guṇakāryakarāstathā || 31 ||
[Analyze grammar]

mṛgaśṛṃgādiyuktāśca nyadīṣan maṇḍapeṣu ca |
prāvartata kratukāryaṃ vahnirnyadhāyi havyabhuk || 32 ||
[Analyze grammar]

viṣṇurnārāyaṇaḥ kṛṣṇanārāyaṇaḥ pareśvaraḥ |
caturviṃśatyavatāraiḥ sahitaḥ pūjitaḥ puraḥ || 33 ||
[Analyze grammar]

brahma muktā rādhikādyā muktānyo viṣṇuyoṣitaḥ |
pārvatī ca prabhā lakṣmīḥ śrīḥ satī kamalādikāḥ || 34 ||
[Analyze grammar]

haṃsā paramahaṃsā ca saguṇā mañjulā priyāḥ |
pūjitāḥ mātaraścāpi śaṃbhurdevā gaṇādhipaḥ || 35 ||
[Analyze grammar]

brahmacarāḥ ṛṣayo'nye pārṣadāḥ śaktayastathā |
paṭṭakanyāśca durgādyā grahā devāśca kṣetrapāḥ || 36 ||
[Analyze grammar]

dikpālā lokapālāśca siddhayo yoginīgaṇaḥ |
sāttvikāḥ pitṛvargāśca sthāpitā devamaṇḍale || 37 ||
[Analyze grammar]

brahmasṛṣṭirīśasṛṣṭirjīvasṛṣṭirvarīyasī |
maṇḍape pūjitā tatra yajñabhāgārthinī ca yā || 38 ||
[Analyze grammar]

rājasāstāmasāścāpi devakiṃkaravādinaḥ |
pūjitā lomaśenā'tra viṣṇuyajñe mahotsave || 39 ||
[Analyze grammar]

raṇaṃgamo yajamāno gururvai lomaśo muniḥ |
anādiśrīkṛṣṇanārāyaṇo yajñāgryadevatā || 40 ||
[Analyze grammar]

sarvaṃ tatra susampannaṃ cāturmāsye'nvahaṃ kratau |
vidhivannityamevaitadādyantaṃ karma puṣkalam || 41 ||
[Analyze grammar]

āṣāḍhe tu samāraṃbhaḥ kārtike'sya samāpanam |
nityaṃ ca havanaṃ tatrā'yutavipraprabhojanam || 42 ||
[Analyze grammar]

anyeṣāṃ naiva pāro'sti koṭikanyādibhojanam |
koṭibālādibhojyāni vastradānāni nityaśaḥ || 43 ||
[Analyze grammar]

ghṛtakulyā dadhikulyāḥ payaḥkulyāḥ sahasraśaḥ |
rasakulyā madhukulyā madhuparkādivaibhavāḥ || 44 ||
[Analyze grammar]

miṣṭapānāni miṣṭānnottamānyagaṇitānyapi |
dīyante bhojane tatra tṛptā bhavanti dehinaḥ || 45 ||
[Analyze grammar]

vahnirnityaṃ mūrtimān svakarābhyāṃ grasate haviḥ |
svayaṃprakāśo bhagavān juhoti ghṛtadhārayā || 46 ||
[Analyze grammar]

kṛṣṇanārāyaṇo vahnirgṛhṇāti mukhapaṃkaje |
yajñātmānaḥ parāṃ tṛptiṃ prāpnuvanti kratūttame || 47 ||
[Analyze grammar]

koṭidānāni dīyante raṇaṃgamena nityaśaḥ |
evaṃ nityaṃ jāyamāne yajñe trailokyavāsinaḥ || 48 ||
[Analyze grammar]

darśanārthaṃ havanārthaṃ samāyānti viyanti ca |
nityaṃ sahasrakamalaiḥ pūjayanti surā harim || 49 ||
[Analyze grammar]

yatra sā kambharā lakṣmīstathā gopālakṛṣṇakaḥ |
virājete ca janakau pūjopakaraṇapradau || 50 ||
[Analyze grammar]

yajñadravyapradau cāpi tatra kā nyūnatā khalu |
patnīvrato maharṣiśca sarvādhyakṣo'tra vartate || 51 ||
[Analyze grammar]

tatra kā nyūnatā sarvasatkāre pānabhojanaiḥ |
ityevaṃ rādhike yajñaḥ prāvartata dine dine || 52 ||
[Analyze grammar]

vṛṣṭiḥ prajāyate nityaṃ modante sasyajātayaḥ |
kanthādharanimittena kṛto yajñaḥ sutena vai || 53 ||
[Analyze grammar]

kanthāṃ vinā sarvamadād dāne raṇaṃgamaḥ sutaḥ |
kṛṣṇastuṣyatu pratyakṣaścetyuktvā'dāt supātrake || 54 ||
[Analyze grammar]

devāḥ svargāt samāgatya ghrātvā dhūmān ghṛtasya vai |
śukarūpāścābruvaṃśca divyavāṇyā parasparam || 55 ||
[Analyze grammar]

dhanyo raṇaṃgamo loke dhanyaḥ kanthādharo'pi ca |
dhanyaścandrādayo vṛddhā yadvaṃśe yajñavistaraḥ || 56 ||
[Analyze grammar]

yatkratau viṃśatitamo'kṣaro lupto'nunāsikaḥ |
sarvaṃ pradīyate yatra kanthāṃ kaupīnamantarā || 57 ||
[Analyze grammar]

kṣudhā devī yatra yajñe parājayaṃ gatā'sti vai |
tṛptirvijayate cātra dhanyo vai lomaśo muniḥ || 58 ||
[Analyze grammar]

dhanyaḥ patnīvrato vipro dhanyaḥ svayaṃprakāśakaḥ |
anādiśrīkṛṣṇanārāyaṇo yeṣāṃ sahāyakṛt || 59 ||
[Analyze grammar]

cāturmāsye sadā devā vastavyaṃ tvatra sarvathā |
gamanāgamane nityaṃ vṛthā yatno na ceṣyate || 60 ||
[Analyze grammar]

durlabhaṃ puṇyatīrthaṃ durlabhā satsaṃgatistathā |
durlabhaṃ cā'rhaṇaṃ nityaṃ durlabhaṃ śaraṇaṃ hareḥ || 61 ||
[Analyze grammar]

durlabhā puṇyakīrtiśca durlabhaśca kathāśravaḥ |
durlabhaṃ priyamitrāṇāṃ nityamevā'nudarśanam || 62 ||
[Analyze grammar]

durlabhā śrīharerbhaktirdurlabhaṃ caraṇāmṛtam |
durlabhaṃ tatprasādasya nityamevā'śanaṃ tathā || 63 ||
[Analyze grammar]

durlabhaṃ sulabhaṃ sarvaṃ dhanyā kuṃkumavāpikā |
dhanyaṃ tvaśvasarastīrthaṃ yatra yajñaḥ pravartate || 64 ||
[Analyze grammar]

trailokyatṛptido devāḥ sākṣācchrīpatisannidhau |
nedṛg brahmasaraścāpi nedṛgvai puṣkaraṃ saraḥ || 65 ||
[Analyze grammar]

saraśca mānasaṃ nedṛṅ nedṛṅ nārāyaṇaṃ saraḥ |
nedṛṅa pampāsaraścāpi na yatra parameśvaraḥ || 66 ||
[Analyze grammar]

atra vṛkṣāśca vallyaśca muktāḥ sarve vasanti hi |
stambā gulmāstṛṇātmānaḥ sarve muktā vasanti hi || 67 ||
[Analyze grammar]

paśavaḥ pakṣiṇo vāricarāḥ pataṃgajātayaḥ |
pārthivāḥ kīṭamaśakāḥ sarve muktā vasanti vai || 68 ||
[Analyze grammar]

dhanyaṃ rajo'sya deśasya yatsparśaḥ pāpanāśanaḥ |
dhanyaṃ jalaṃ ca saraso yadbindurmokṣadāyakaḥ || 69 ||
[Analyze grammar]

vayaṃ yajñabhujo dhanyā yeṣāṃ lābho'yamuttamaḥ |
raṇaṃgamo'yaṃ dhanyaśca devadeho bhavatvayam || 70 ||
[Analyze grammar]

devasiddhiyutaścāstu devasmṛddhibharo'stu ca |
devo devagatimāṃśca bhavatvayaṃ raṇaṃgamaḥ || 71 ||
[Analyze grammar]

ityāśīrbhiryojito'yaṃ raṇaṃgamo hi bhaktarāṭ |
tāvat smṛddhaṃ divyayānaṃ smṛddhaṃ tadarthamāgatam || 72 ||
[Analyze grammar]

kāmadaṃ kalpalatikāyuktamānandasaṃbhṛtam |
saṃsthitaṃ nityasevāyāmindrārpitaṃ sasārathi || 73 ||
[Analyze grammar]

dāsadāsībhṛtyayuktaṃ bhojyā'mṛtahradā'nvitam |
saprakāśaṃ sarvaśayyābhogyavastusamanvitam || 74 ||
[Analyze grammar]

evaṃ raṇaṃgamo rājā devānāṃ suprasādataḥ |
prāpyā'kṣayaṃ vimānaṃ tvakṣayavastupradaṃ sadā || 75 ||
[Analyze grammar]

dadau dānāni saṃkalpya nityaṃ koṭyarbudāni ca |
āhūya viśvakarmāṇaṃ śambaraṃ ca mayaṃ tathā || 76 ||
[Analyze grammar]

kārayāmāsa tattīrthe tvaśvapaṭṭasarontike |
parito devavāsanāmayutaṃ sāptabhaumakam || 77 ||
[Analyze grammar]

svargavacchobhayāmāsa devānasthāpayattathā |
pūjanārthaṃ ca viprebhyo gṛhadānāni vai dadau || 78 ||
[Analyze grammar]

kalpavallīṃ ca pratyekabrāhmaṇāya dadau tadā |
sarvaṃ phalati vallyāṃ ca bhogyamiṣṭaṃ ca nityaśaḥ || 79 ||
[Analyze grammar]

na kṣetrasya na sasyānāṃ gavāṃ nāpi prayojanam |
dhānyārthaṃ ca kaṇārthaṃ ca vasārthaṃ ca tadā'tra vai || 80 ||
[Analyze grammar]

alparājyo'pi rājā'sau cāndrīṃ kāntiṃ sunirmalām |
kīrtiṃ cāpyabhajalloke sārvabhaumādikāṃ tadā || 81 ||
[Analyze grammar]

rādhike mama bhaktasya nā'pūrṇaṃ vidyate kvacit |
mahyaṃ dadāti sarvasvaṃ tasmai sarvaṃ dadāmyaham || 82 ||
[Analyze grammar]

evaṃ yajñe jāyamāne devālayā'yuteṣu ca |
jāyamāneṣu ca tato raṇaṃgamo divaṃgamaḥ || 83 ||
[Analyze grammar]

anādiśrīkṛṣṇanārāyaṇasya saptame śubhe |
āgate vatsare'ṣṭamyāṃ harerjanmotsavaṃ vyadhāt || 84 ||
[Analyze grammar]

tatra ratnāsane'nādikṛṣṇanārāyaṇaṃ prabhum |
upāveśayā'rcayat tu naikadivyopadādibhiḥ || 85 ||
[Analyze grammar]

brāhmaṇān bhojayāmāsa lakṣaśo bālakānapi |
surān saṃpūjayāmāsa gāpayāmāsa gītikāḥ || 86 ||
[Analyze grammar]

maṃgalāni vividhāni kārayāmāsa bhāvataḥ |
sādhūnṛṣīn satīḥ sādhvīḥ pūjayāmāsa vai nṛpaḥ || 87 ||
[Analyze grammar]

dānāni dāpayāmāsa svarṇarūpyakahīrakān |
vastrabhūṣāgomahiṣīrgajāśvarathakiṃkarān || 88 ||
[Analyze grammar]

atha rātrau kathāṃ ramyāṃ vācayāmāsa lomaśaḥ |
lakṣmīnārāyaṇasaṃhitāyā dvitīyakhaṇḍagām || 89 ||
[Analyze grammar]

kathānte koṭikanyābhiḥ kṛtaṃ kāntasya pūjanam |
niśāyāṃ rāsaramaṇaṃ koṭirūpairhariḥ svayam || 90 ||
[Analyze grammar]

kāntābhiḥ koṭibhiḥ sākaṃ cakāra parameśvaraḥ |
sthalapadmavāṭikāyāṃ vistṛtāyāṃ hariḥ svayam || 91 ||
[Analyze grammar]

parihāraṃ cakārā'tha sukhayitvā sakhīgaṇān |
prātaryajñe havanaṃ ca rājā cakāra nityavat || 92 ||
[Analyze grammar]

āgatānāṃ ca devānāṃ janmotsavajuṣāṃ nṛpaḥ |
sevāṃ cakāra bahudhā visarjanaṃ cakāra ca || 93 ||
[Analyze grammar]

kārtikyāṃ pūrṇimāyāṃ ca yajñahomottaraṃ nṛpaḥ |
parihāraṃ cakārā'sya kratordadau ca dakṣiṇāḥ || 94 ||
[Analyze grammar]

ratnahīrakamāṇikyasvarṇaraupyavibhūṣaṇam |
vastrānnayānavāhādīn dadau dānānyanekaśaḥ || 95 ||
[Analyze grammar]

avabhṛthaṃ cakārā'sau saharṣibhiḥ sarovare |
avatārāstathā muktā muktānya īśvarāstathā || 96 ||
[Analyze grammar]

devāśca pitaro martyāḥ sarve sthāvarajaṅgamāḥ |
yajñānte prayayurnaijaṃ naijamālayamutsukāḥ || 97 ||
[Analyze grammar]

rājā'nādikṛṣṇanārāyaṇaṃ bhajan sanātanam |
viprairbhṛtyaiśca sahito divyayānasthito'bhavat || 98 ||
[Analyze grammar]

ṛṣīn kṛṣṇaṃ pitaraṃ mātaraṃ devān surālayān |
tīrthāni vṛkṣavallīśca praṇamya prayayau gṛham || 99 ||
[Analyze grammar]

koṭīnārākhyanagaraṃ prajābhirabhivanditaḥ |
viveśa nagaraṃ naijaṃ viśaśrāma nijālaye || 100 ||
[Analyze grammar]

atha yakṣaścitramālābhidhaḥ śuśrāva taṃ nṛpam |
pratāpinaṃ mahābhaktaṃ kīrtimantaṃ suyauvanam || 101 ||
[Analyze grammar]

ājagāma ca saurāṣṭraṃ cāśvapaṭṭasarovaram |
dadarśa bhūpatiyajñabhūmiṃ prāsādavaibhavān || 102 ||
[Analyze grammar]

nṛpeṇa kāritān jñātvā jñātvā māhātmyamuttamam |
kṛtamālāṃ nijakanyāṃ dātuṃ yayau raṇaṃgamam || 103 ||
[Analyze grammar]

raṇaṃgamena ca kalpavallyā navīkṛtaṃ puram |
nagaraṃ devanagaraṃ dadarśa yakṣapuṅgavaḥ || 104 ||
[Analyze grammar]

avātarad vimānācca rājño nivāsamambarāt |
kanyāṃ dāsīstathā dāsān dadau raṇaṃgamāya saḥ || 105 ||
[Analyze grammar]

rājā vivāhavidhinā pāṇigrahaṃ cakāra ha |
jāmātā yakṣavaryasya devavad rājate bhuvi || 106 ||
[Analyze grammar]

yakṣaḥ putrīṃ pradāyaiva yayau kauberapattanam |
rādhike jāyate śrotā vaktā'sya bhuktimuktibhāk || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne raṇaṃgamakṛtayaśaḥ prabhoḥ saptamo janmotsavaḥ yakṣakanyayā raṇaṃgamavivāho vimānādilābhaścetyādinirūpaṇanāmā tricatvāriṃśo'dhyāyaḥ || 43 ||
[Analyze grammar]