Chapter 42

śrīkṛṣṇa uvāca |
śṛṇu tvaṃ rādhike rājā kanthādharo hi nityaśaḥ |
nārīyogādabhavacca nāstikaḥ svārthatatparaḥ || 1 ||
[Analyze grammar]

ghoṣayāmāsa nagare durātmā vedanindakaḥ |
na dātavyaṃ na yaṣṭavyaṃ na hotavyaṃ kadācana || 2 ||
[Analyze grammar]

ahameko'tra vai vandyaḥ pūjyo'haṃ bhavatāṃ sadā |
mayā vai pālitā yūyaṃ nivasadhvaṃ prajāḥ sukhe || 3 ||
[Analyze grammar]

tanmatto'nyo na devo'sti yuṣmākaṃ yapparāyaṇam |
mahyaṃ deyaṃ ca havanaṃ havyaṃ dānaṃ ca dakṣiṇā || 4 ||
[Analyze grammar]

rājā'haṃ lokapālo'haṃ prajāpālo'hameva ca |
dātā dhātā vidhātā ca prajānāmahameva ca || 5 ||
[Analyze grammar]

prāṇadātā sasyadātā dhanyadātā'hameva ca |
sukhado daṇḍadaścāpi rakṣāprado'hameva ca || 6 ||
[Analyze grammar]

manmukhaṃ vahnirevā'sti deyaṃ tatraiva nā'natṭhe |
matkara1 pātramūrdhanyau dānaṃ tatraiva yujyate || 7 ||
[Analyze grammar]

karo dānaṃ na tu bhikṣā karo deyo hi nītijaḥ |
vastrāṇi paśavo gāvo mahiṣyo'jā'vikādikam || 8 ||
[Analyze grammar]

dhanaṃ sarvaṃ pradeyaṃ me yatpunaśca prajākṛte |
durbhikṣādau prayujyeta prajānāṃ sukhahetave || 9 ||
[Analyze grammar]

etacchrutvā tu vacanaṃ brāhmaṇā brahmadarśinaḥ |
prajāvṛddhāśca vidvāṃso vedanetrā viduttamāḥ || 10 ||
[Analyze grammar]

parasparaṃ susambhūya rājaśikṣārthamāyayuḥ |
praṇipatya ca rājānaṃ satkṛtā vākyamabruvan || 11 ||
[Analyze grammar]

śrutiḥ pramāṇaṃ dharmasya tato yajñaḥ pratiṣṭhitaḥ |
yajñairvinā priyante na devāḥ sasyapradā divi || 12 ||
[Analyze grammar]

aprīteṣu ca deveṣu durbhikṣaṃ samprajāyate |
prajānāśo bhaved rājan deśaviplava ityapi || 13 ||
[Analyze grammar]

tasmād rājan bhūtaśāntirgrahaśāntistathā sadā |
devatṛptiḥ pitṛtṛptirvidhātavyā mahādhvaraiḥ || 14 ||
[Analyze grammar]

yajño naiva niroddhavyaḥ śrutimūlo yato makhaḥ |
vahnimukhāḥ sadā devāstarpaṇīyāḥ sukhapradāḥ || 15 ||
[Analyze grammar]

ityukto'pi nṛpaḥ kanthādharo'manyata naiva ca |
vedān vininda bahudhā pratāraṇaparā iti || 16 ||
[Analyze grammar]

viprāḥ svārthaparā dhūrtakalpitā vedarāśayaḥ |
dvijā miṣṭānnalubdhāśca vahimuddiśya devatāḥ || 17 ||
[Analyze grammar]

kiṃcitprakṣipya vahnau ca svayaṃ miṣṭāni bhuṃjate |
dakṣiṇādhanapātrāṇi govājikariṇaḥ svayam || 18 ||
[Analyze grammar]

gṛhṇanti tannimittena tasmātsvārthaparā hi te |
mūrtistho naiva devo'sti na bhuṃkte nā'sya rocate || 19 ||
[Analyze grammar]

vipro devastu pratyakṣaḥ sarvaṃ yadasya rocate |
devaṃ nimittamudbhāvya miṣṭānnaṃ miṣṭavāri ca || 20 ||
[Analyze grammar]

ābhūṣaṇaṃ puṣpāmālāṃ bhuṃkte gandhaṃ ca bhūsuraḥ |
godānaṃ dugdhapānaṃ ca śayyādānaṃ gṛhārpaṇam || 21 ||
[Analyze grammar]

vāṭikā devatārthaṃ yā bhuṃkte sarvaṃ ca bhūsuraḥ |
yānaṃ pātrāṇi ramyāṇi chatraṃ cāmaravāhanam || 22 ||
[Analyze grammar]

mṛdvāstaraṇaṃ bhogyāni bhuṃkte sarvaṃ tu bhūsuraḥ |
rasān phalāni pakvānnānyuttamāni ca || 23 ||
[Analyze grammar]

dāsān dāsīśca bhṛtyāṃścopabhuṃkte pūjako dvijaḥ |
tasmāt svārthaparā viprā makhamuddiśya bhuñjate || 24 ||
[Analyze grammar]

ato naiva hi yaṣṭavyaṃ dātavyaṃ naiva naiva ca |
ityājñā hṛḍḍakāyinyā rājñyā me vartate dṛḍhā || 25 ||
[Analyze grammar]

ullaṅghyaitā kāmakāro maddaṇḍabhāgbhaviṣyati |
ityevaṃ ḍiṇḍimā rājñā rāṣṭre sarvatra kāritā || 26 ||
[Analyze grammar]

tata ārabhya devānāṃ pūjā makhā na cā'bhavan |
durbhikṣaṃ cā'bhavattena prajāśca duḥkhapīḍitāḥ || 27 ||
[Analyze grammar]

prasahya prabalā dravyaṃ nirbalānāṃ haranti ca |
rājā ca viṣayāsakto rakṣākāryaṃ karoti na || 28 ||
[Analyze grammar]

kālavegāt tadā rāṣṭraṃ viparītamabhūt khalu |
daṇḍaḥ siddhipradaḥ śaṃbhostyaktvā bhūpaṃ tiro'bhavat || 29 ||
[Analyze grammar]

tadā rājā śuśocā'ti mama naṣṭaṃ hi jīvanam |
aiśvaryaṃ vigataṃ cāpi devānāmavamānanāt || 30 ||
[Analyze grammar]

prajā ruṣṭāśca dhānyārthaṃ rurudhurbhūbhṛdaṅgaṇam |
dhānyaṃ gṛhītvā prayayustato dravyaṃ gavādikam || 31 ||
[Analyze grammar]

rājyasmṛddhiṃ prajahruśca prajāścātīva nirdhanāḥ |
atha kanthādharastasya patnī ca hṛḍḍakāyinī || 32 ||
[Analyze grammar]

ubhau bhayāt prayayaturaraṇyaṃ cātiduḥkhitau |
tayoścāsīt kumārastu varṣamātro'tikomalaḥ || 33 ||
[Analyze grammar]

brāhmaṇāstaṃ prajahruśca rakṣaṇārthaṃ nijālayam |
vimānaṃ divyadaṇḍaśca divyopakaraṇāni ca || 34 ||
[Analyze grammar]

vigatāni nijaṃ sthānaṃ rājyaṃ śūnyamabhūttadā |
puṇyapuñje vardhite tu vardhante vai vibhūtayaḥ || 35 ||
[Analyze grammar]

puṇyanāśe vinaśyanti devānāmasya kā kathā |
rādhike sa nṛpo'raṇye kāladharmamupāgataḥ || 36 ||
[Analyze grammar]

annaṃ jalaṃ parityajya mṛtā'pi hṛḍḍakāyinī |
vārdhestīre mlecchajanmā'vāpatustau ca nāstikau || 37 ||
[Analyze grammar]

nikaṭe tau bhāgyayogādutpannau duḥkhabhāginau |
kumāro dvādaśavarṣo'bhavad raṇaṃgamā'bhidhaḥ || 38 ||
[Analyze grammar]

sopavīto vipravākyairjñātvā pitṛviceṣṭitam |
asadgatiṃ vane cāpi cintayāmāsa vai muhuḥ || 39 ||
[Analyze grammar]

vidyābhyāsaṃ vidhāyaiva rājyabhāravaho'bhavat |
taṃ yogyaṃ ca paraṃ matvā dharmakāryaparāyaṇam || 40 ||
[Analyze grammar]

abhyaṣiñcan brāhmaṇāstaṃ rājānaṃ bhūmipālakam |
tataḥ sa rañjayāmāsa prajā dharmeṇa pālayan || 41 ||
[Analyze grammar]

yajñaṃ cakāra dharmātmā devapūjāmavartayat |
tato brāhmaṇamadhyastho jagāda praṇipatya tān || 42 ||
[Analyze grammar]

pitā mama tathā mātā yajñavicchedakārakau |
mṛtau vane kriyā tayoḥ kathaṃ kāryā mayā dvijāḥ || 43 ||
[Analyze grammar]

āvedayata ityevaṃ brāhmaṇānāṃ ca sannidhau |
tejasā bhāsamānaśca svayaṃprakāśanāmakaḥ || 44 ||
[Analyze grammar]

anādiśrīkṛṣṇanārāyaṇaśiṣyo vihāyasā |
somakṣetraṃ prayāsyan vai koṭīnāramavātarat || 45 ||
[Analyze grammar]

viprān vilokya sahasā tānpratyabhyājagāma ha |
tasmai te tvāsanaṃ datvā papracchuḥ praṇipatya ca || 46 ||
[Analyze grammar]

dhanyā vayaṃ samaye ca prāptā maharṣidarśanam |
lokānāṃ duḥkhanāśārthaṃ śreyo'rthaṃ caraṇaṃ tava || 47 ||
[Analyze grammar]

bhagavan sarvalokasya jānāsi tvaṃ śubhāśubham |
sākṣādanādikṛṣṇasya śiṣyo'si hṛdayaṃgamaḥ || 48 ||
[Analyze grammar]

pitā'sya rājño duṣṭātmā devabrāhmaṇanindakaḥ |
svadharmarahitaḥ patnisahito'raṇyamāśritaḥ || 49 ||
[Analyze grammar]

vane mṛtyuṃ gato bhāti kvāste vā pāpakarmaṇā |
kathaṃ tasya bhavenmuktirvada bālo'sya pṛcchati || 50 ||
[Analyze grammar]

svayaṃ prakāśo divyātmā jñātvā divyena cakṣuṣā |
kuṃkumavāpikāsthaṃ śrīkṛṣṇaṃ smṛtvā'bravīdidam || 51 ||
[Analyze grammar]

paścimā'bdhitaṭe cāste rājā rājñīyutaḥ khalu |
mlecchamadhye samutpannaḥ kṣayakuṣṭhasamanvitaḥ || 52 ||
[Analyze grammar]

tasyoddhāraśca kartavyaḥ putreṇā'nena sarvathā |
putraḥ sa kathyate loke yaḥ pitṛṃstrāyate bhayāt || 53 ||
[Analyze grammar]

gacchatu tatra putro'yaṃ mlecchaṃ nītvā sabhāryakam |
aśvapaṭṭasarastīrthe kṛṣṇanārāyaṇāśrite || 54 ||
[Analyze grammar]

tasya dehaṃ tīrthajale karotu nirmalaṃ tataḥ |
niṣpāpaḥ sapriyo muktiṃ prayāsyati na saṃśayaḥ || 55 ||
[Analyze grammar]

svayaṃprakāśavacanaṃ śrutvā viprā prajājanāḥ |
raṇaṃgamaṃ kumāraṃ taṃ prāhuryāhīti taṃ prati || 56 ||
[Analyze grammar]

kumāraḥ sa ca vipraiśca parimeyapuraḥsaraiḥ |
sahitaḥ prayayau cābdhitaṭaṃ yatra pitā sthitaḥ || 57 ||
[Analyze grammar]

sa gatvā paścimaṃ sthānaṃ mlecchāśrayaṃ drumānvitam |
makarālayanāmāḍhya mārgayāmāsa kiṃkaraiḥ || 58 ||
[Analyze grammar]

dadṛśuḥ kiṃkarāstaṃ ca kuṣṭhinaṃ kṣayarogiṇam |
dadṛśustāṃ hṛḍḍakinīṃ sakuṣṭhāṃ kṣayarogiṇīm || 59 ||
[Analyze grammar]

ubhau jātismarau cāstāṃ pratīkṣamāṇau putrakam |
uddhārakaṃ cāgataṃ saṃśrutvā'timuditau tadā || 60 ||
[Analyze grammar]

mleccho mlecchī sotsukau ca kiṃkaraiḥ saha satvaram |
āyayaturyatra cāste kumārastu raṇaṃgamaḥ || 61 ||
[Analyze grammar]

rurudatuśca taṃ vīkṣyoddhāraṃ prati punaḥ punaḥ |
prārthayāmāsatustatra tasthatustasya sannidhau || 62 ||
[Analyze grammar]

putrastau kuṣṭhinau vīkṣya tathā kṣayasamanvitau |
svayaṃ śokena mahatā santapto vākyamabravīt || 63 ||
[Analyze grammar]

ājñāṃ pitrostu yuvayoḥ samādāya nayāmyaham |
aśvapaṭṭasarastīrthaṃ kariṣyāmi nirāmayau || 64 ||
[Analyze grammar]

athā'nayoḥ pitṛvarge gatvā rājā'bravīdidam |
hā mlecchā naumi vaścātra kuṣṭhinau dvāvimau janau || 65 ||
[Analyze grammar]

cikitsārthaṃ kṣayasyāpi svagṛhaṃ ca nayāmyaham |
tatrā'hametau nirujau kariṣye ced bhavanmatam || 66 ||
[Analyze grammar]

tatheti sarvato mlecchāḥ kumāraṃ taṃ dayāparam |
ūcuḥ praṇatasarvāṃgā yathā jānāsi tat kuru || 67 ||
[Analyze grammar]

tata ānīya puruṣān śibikāvāhanānvitān |
dvau pūrvapitarau rājā śivikāyāṃ nyaṣādayat || 68 ||
[Analyze grammar]

rājā cānucarāścāpi viprāśca prātareva ha |
prayayuḥ satvaraṃ sāyaṃ cāśvapaṭṭasaro yayuḥ || 69 ||
[Analyze grammar]

ṛṣiḥ svayaṃprakāśo'pi cāśvapaṭṭāśramaṃ yayau |
nṛpādyāstu nijaṃ sthānaṃ vidadhurvaṭasannidhau || 70 ||
[Analyze grammar]

paścime tu taṭe cāsya saraso vāyudigbhuvi |
rātrau sarve tīrthabhūmau cakrurviśrāntimuttamām || 71 ||
[Analyze grammar]

rājā viprāśca tau prātaḥ snāpayituṃ sarovare |
samudyatāstadā vāyurantarīkṣe'bravīdidam || 72 ||
[Analyze grammar]

mā rājan sāhasaṃ kārṣīstīrthaṃ rakṣa prayatnataḥ |
imau pāpena ghoreṇa sarvavidhena veṣṭitau || 73 ||
[Analyze grammar]

vedanindākarau devadrohiṇau yajñanāśakau |
dharmanāśakarau pāpau pāpānto naiva vidyate || 74 ||
[Analyze grammar]

pāte sarasyanayostu saraḥ śuṣkaṃ bhaviṣyati |
imau snātau mahattīrthaṃ nāśayiṣyata ulbaṇau || 75 ||
[Analyze grammar]

tasmānnaitau sarastīre jale samavagāhaya |
etad vyomavacaḥ śrutvā duḥkhena mahatā'nvitaḥ || 76 ||
[Analyze grammar]

uvāca śokasantapto vyomavāṇīṃ prati prabho |
yadyetau ghorapāpiṣṭhau snānārhau naiva naiva ca || 77 ||
[Analyze grammar]

prāyaścittaṃ kariṣye'haṃ tayorarthe vada prabho |
tato vāyuśca devāśca tīrthānyapi samantataḥ || 78 ||
[Analyze grammar]

abhilakṣya ca rājānaṃ sarve vacanamabruvan |
snātvā snātvā ca tīrtheṣu aśvasaraḥsthiteṣu ca || 79 ||
[Analyze grammar]

muhustvamabhiṣiñcasva tīrthakalaśavāribhiḥ |
āgasāṃ lumpanaṃ yāvat tayoḥ syāt tāvadeva ha || 80 ||
[Analyze grammar]

svārthapoṣayiturdevadūṣayiturjanasya vai |
sakṛt snānena śuddhirna jāyate kutracitkvacit || 81 ||
[Analyze grammar]

tasmādetau samuddiśya snātvā tīrtheṣu bhaktitaḥ |
abhiṣiñcasva toyena muhuḥ pūtau bhaviṣyataḥ || 82 ||
[Analyze grammar]

ityevaṃ vacanaṃ śrutvā kṛtvā tatrāśramaṃ tataḥ |
tīrthe tīrthe muhuḥ snātvā samānīya ghaṭe jalam || 83 ||
[Analyze grammar]

dine dine ca tīrtheṣu kṛtvā cāplavanaṃ nṛpaḥ |
abhyaṣiñcat svapitarau tīrthatoyena nityaśaḥ || 84 ||
[Analyze grammar]

evaṃ tīrthajalaiḥ sarvairabhiṣiktau punaḥ punaḥ |
aśvatīrthasya māhātmyāt tau putreṇa ca pāvitau || 85 ||
[Analyze grammar]

niṣpāpau tu yadā jātau tīrthānyāhustadā nṛpam |
etau pavitrau paramau sarasi cāvagāhaya || 86 ||
[Analyze grammar]

ityukto raṇago rājā vaiśākhe tāvagāhayat |
niyatau tatkṣaṇājjātau divyadehasamanvitau || 87 ||
[Analyze grammar]

mlecchatā layamāpannā divyaprabhā pravardhitā |
kanthādharo vimānastho sastrīko devatā'bhavat || 88 ||
[Analyze grammar]

anādiśrīkṛṣṇanārāyaṇaṃ śrīpuruṣottamam |
tuṣṭāva parayā prītyā vimānastho'tiharṣitaḥ || 89 ||
[Analyze grammar]

parabrahma paroddhārakṛpānugrahavigraha |
tava śiṣyeṇa ṛṣiṇā tāritau pāpinau prabho || 90 ||
[Analyze grammar]

putreṇa tāritau cāpi tvayā'pi tāritau hare |
toyaiśca tāritau duṣṭau paropakṛtiśālibhiḥ || 91 ||
[Analyze grammar]

vipraiśca tāritau ghorāttamaso'jñānavaibhavāt |
nārakī tāritau kṛṣṇanārāyaṇa tavā''śrayāt || 92 ||
[Analyze grammar]

pareśvarāya hṛtsthāya viprasthāya ca te namaḥ |
svayaṃprakāśarūpāya tīrthātmakāya te namaḥ || 93 ||
[Analyze grammar]

namaḥ śaraṇyadevāya pāpiprāṇahitāya ca |
śritamokṣāya bālāya bālakṛṣṇāya te namaḥ || 94 ||
[Analyze grammar]

tvappratāpāt tarantyeva yakṣarākṣasapannagāḥ |
daityāśca dānavā duṣṭā āsurāstāmasāstathā || 95 ||
[Analyze grammar]

māyikā vāsanāyuktā garviṣṭhāścābhimāninaḥ |
vyavāyinaḥ piśitādāḥ stenā āsavapāyinaḥ || 96 ||
[Analyze grammar]

varṇasaṃkarakārāśca gostrīhatyākarāstathā |
tvatpratāpāttarantyeva kṛpānugrahaśevadheḥ || 97 ||
[Analyze grammar]

āvāṃ ca tāritau yāmastava dhāmā'mṛtaṃ prabho |
ityuktvā praṇipatyaitau putra svasti tavā'stu ca || 98 ||
[Analyze grammar]

datvā''śiṣo yayatuśca lomaśasyā''śramaṃ prati |
oṃ namaḥ śrīkṛṣṇanārāyaṇāya pataye svāhā || 99 ||
[Analyze grammar]

itimantraṃ lomaśācca gṛhītvā tulasīsrajam |
paramau vaiṣṇavau bhūtvā yayaturvaiṣṇavaṃ padam || 100 ||
[Analyze grammar]

āścaryaṃ paramaṃ prāptāstairthikāśca kuṭumbinaḥ |
yadatra snānamātreṇa muktirjātā hi śāśvatī || 101 ||
[Analyze grammar]

anādiśrīkṛṣṇanārāyaṇasyeyaṃ dayā parā |
rādhike prabalecchā ca karuṇā prabalā hareḥ || 102 ||
[Analyze grammar]

yatra muktāvabhavatāṃ kanthādhro hṛḍḍakāyinī |
kanthādhraṃ tatparaṃ tīrthaṃ khyātimāpaddharātale || 103 ||
[Analyze grammar]

rūpadvayaṃ dadhārā'tha devī sā hṛṅḍakāyinī |
chāyārūpā yayau naijaṃ pitaraṃ yamarājakam || 104 ||
[Analyze grammar]

yamarājā''jñayā sā cā'bhavat hikkāsvarūpiṇī |
sarvaprajāsu niyatāvāsaṃ cakāra yoginī || 105 ||
[Analyze grammar]

dvitīyena svarūpeṇa divyā hṛcchāyinī satī |
muktimārgaṃ gatā divyapatinā sākameva sā || 106 ||
[Analyze grammar]

muktibhāvaṃ gatā sā'pi pitṛmārgānugāminī |
hikkārūpā vāsanayā chāyārūpā babhūva ha || 107 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne |
kanthādharasya hṛḍḍakāyinīpatnīyogena nāstikyaṃ vedakarmādinirodhenaiśvaryanāśe vane maraṇaṃ mlecchajanma putreṇa raṇaṃgamenā'śvapaṭṭasarastīrthe kṛtoddhāraścetinirūpaṇanāmā dvācatvāriṃśo'dhyāyaḥ || 42 ||
[Analyze grammar]