Chapter 26

śrīkṛṣṇa uvāca |
ākarṇaya vṛṣabhānusute camatkṛtiṃ hareḥ |
anyāṃ tṛtīyavarṣotthāṃ kathayāmi sukhapradām || 1 ||
[Analyze grammar]

śrāvaṇyāṃ brāhmaṇāḥ sarve kuṃkumavāpikāśrayāḥ |
aśvapaṭṭasarastīre brahmasūtrakratūtsave || 2 ||
[Analyze grammar]

militā brahmasūtrasya nava saṃskāraśuddhaye |
sahasraśaste ṛṣayo lomaśādyāḥ sadarbhakāḥ || 3 ||
[Analyze grammar]

sapātrā havyakavyādisahitā dehaśodhanam |
saṃcakruḥ pañcagavyādyaiḥ snānaiḥ pitṛpratarpaṇam || 4 ||
[Analyze grammar]

devānāṃ pūjanaṃ cāpi cakruśca havanādikam |
navaṃ yajñopavītaṃ ca dhārayāmāsurujjvalam || 5 ||
[Analyze grammar]

tannimittaṃ mahārudraṃ viṣṇuyajñaṃ ca naityakam |
cakrurmahotsavaṃ tīre gītavādyapranartanaiḥ || 6 ||
[Analyze grammar]

lakṣmīnārāyaṇasaṃhitāyāḥ kathopadeśanaiḥ |
āndhasikāḥ sarastīre vaṭā'dhastānmahānase || 7 ||
[Analyze grammar]

cūrṇamauktikalaḍḍukān pūrikā'pūpapāyasān |
śrīkhaṇḍakvathikāphullavaṭīvyañjanabhājikāḥ || 8 ||
[Analyze grammar]

sūpodanāni ca tathā miṣṭatiktadravāṇi ca |
rājikārāddhacaṭanīścāranālāni polikāḥ || 9 ||
[Analyze grammar]

pācayāmāsuratyarthaṃ koṭyarbudadvijārthakam |
pakvānnānāṃ parvatāśca ghṛtānāṃ payasāṃ hradā || 10 ||
[Analyze grammar]

takrāṇāṃ saritaścāpi pāyasānāṃ sarāṃsi ca |
kṛtāni karitānyeva kalpavṛkṣairmaharṣibhiḥ || 11 ||
[Analyze grammar]

madhyāhne havane tatra pravartite makhānale |
tāvad vyomnaḥ samāyātaṃ sainyaṃ daityajanātmakam || 12 ||
[Analyze grammar]

krośamātraṃ tu tad dūramabhavad yajñabhūmitaḥ |
tāvadākrośanaṃ teṣāṃ śrutvā vai lomaśo muniḥ || 13 ||
[Analyze grammar]

śīghraṃ cālokayāmāsa divyadṛṣṭyā tu dānavān |
dānavībhiḥ sahitāṃśca dhṛtaśastrā'strabandhanān || 14 ||
[Analyze grammar]

sālemālasya tu vairaniryātanārthameva tān |
samāgatān mahākrūrān yoddhukāmānavasthitān || 15 ||
[Analyze grammar]

eṣaḥ pradeśaḥ śatrornaḥ kṛṣṇasaudho'yameva ca |
dvijāgryo lomaśaścāyaṃ ghnantu tānmārayantu ca || 16 ||
[Analyze grammar]

anena bālakṛṣṇena mārito'smatpitā prabhuḥ |
mardayantu bālakṛṣṇaṃ tatpitarau ca lomaśam || 17 ||
[Analyze grammar]

eṣa āśramagrāmaśca brāhmaṇānāṃ drumeṣvapi |
bhidyatāṃ chidyatāṃ prajvālyatāṃ vināśyatāṃ kṣaṇāt || 18 ||
[Analyze grammar]

sālaputrāḥ sahasraṃ ca bhṛtyā nāryaśca dāsikāḥ |
bāndhavāḥ sālamālasya nipetuḥ sarasastaṭe || 19 ||
[Analyze grammar]

anye cākāśamārgeṇa samāpatanti vegataḥ |
kanyakā daityapatnyaśca bālā vṛddhāḥ suyauvanāḥ || 20 ||
[Analyze grammar]

yāvadyajñakṣitiṃ naite cāyātāstāvadeva ca |
lomaśaḥ staṃbhayāmāsa tvātharvaṇairvihāyasi || 21 ||
[Analyze grammar]

taṭasthān taṭapārśve ca stambhayāmāsa tatkṣaṇāt |
pakvānnāni tathā yajño yathā gacchenna bhraṣṭatām || 22 ||
[Analyze grammar]

tathā vai lomaśaḥ kṛtvā sasmāra śrīpatiṃ prabhum |
bālakṛṣṇaḥ kiśoraḥ sannupāyayau kṣaṇāt kratum || 23 ||
[Analyze grammar]

vipraiḥ sammānitaḥ kṛṣṇo'rcitaḥ sudarśanānvitaḥ |
prārthitaḥ sagaruḍaśca daityā'nīkanivāraṇe || 24 ||
[Analyze grammar]

śīghraṃ natvā ṛṣibhyaśca śaṃkhacakragadādharaḥ |
āruhya garuḍaṃ śīghraṃ vyomamārgaṃ jagāma ha || 25 ||
[Analyze grammar]

sainyasya sannidhau gatvā dadhmau śaṃkhaṃ hariḥ svayam |
lomaśaścātharvamantrān vārayāmāsa tāvatā || 26 ||
[Analyze grammar]

sainyaṃ sacetanaṃ yoddhuṃ nyapatat śrīhariṃ prati |
gadayā śrīhariḥ sainyaṃ pothayāmāsa sarvataḥ || 27 ||
[Analyze grammar]

pakṣābhyāṃ ca nakhābhyāṃ ca cañcvā ca garuḍastadā |
tāḍayāmāsa bahudhā pātayāmāsa bhūtale || 28 ||
[Analyze grammar]

drāvayāmāsa śeṣāṃśca rakṣayāmāsa yoṣitaḥ |
atha vidrāvitā daityā dhṛtvā śilā drumāṃstathā || 29 ||
[Analyze grammar]

pratyāvṛttya nijaghnuśca śrīkṛṣṇaṃ puruṣottamam |
tataḥ sudarśanaṃ cakraṃ mumoca bhagavān svayam || 30 ||
[Analyze grammar]

kartayāmāsa tān sarvānasurān sālavaṃśajān |
teṣāṃ tejāṃsi ca harau samāgatya viśaśramuḥ || 31 ||
[Analyze grammar]

nāryasteṣāṃ kanyakāśca tuṣṭuvuḥ parameśvaram |
vaṃśavaṭe sthitāḥ sarvā vavuśca varadānakam || 32 ||
[Analyze grammar]

eteṣāṃ kṛṣṇa daityānāṃ mokṣaṃ kuru tathā ca naḥ |
rakṣa rakṣa kṛpāsindho śaraṇaṃ te pradehi naḥ || 33 ||
[Analyze grammar]

anādiśrīkṛṣṇanārāyaṇaḥ śrīgaruḍasthitaḥ |
cakrasya tejasā tāsāṃ pāpānyadāhayattadā || 34 ||
[Analyze grammar]

kāyākalpān vidhāyaiva divyarūpadharāśca tāḥ |
śaraṇyo bhagavāṃstābhyaḥ śaraṇaṃ svaṃ dadau mudā || 35 ||
[Analyze grammar]

lomaśasyā''śrame sthātuṃ niyuyoja pareśvaraḥ |
lomaśastā jalenāpi saṃprokṣyā''plāvya vāribhiḥ || 36 ||
[Analyze grammar]

pañcagavyena ca śuddhiṃ kārayitvā tataḥ param |
oṃ namaḥ śrīkṛṣṇanārāyaṇāya pataye svāhā || 37 ||
[Analyze grammar]

datvā mantraṃ ca tulasīsrajaṃ ca tilakādikam |
tāḥ sarvā dīkṣayāmāsa vaiṣṇavīḥ pracakāra ha || 38 ||
[Analyze grammar]

tatastā bhojayāmāsa śataṃ pañcaśatāni ca |
mātṝśca kanyakāścāpi preṣayāmāsa cāśramam || 39 ||
[Analyze grammar]

lomaśādyā ṛṣayaśca kṛtvā kratuvidhiṃ tataḥ |
yajñasūtrāṇi sandhṛtvā'ntimaṃ homaṃ vidhāya ca || 40 ||
[Analyze grammar]

bhojayāmāsuratyarthaṃ kanyakāḥ koṭisaṃkhyakāḥ |
kuṭumbinastathā'tithīn bhojayāmāsuraiśvarāḥ || 41 ||
[Analyze grammar]

dadurdānāni ca tathottamāni vividhāni ca |
gokṣetrāraṇyaratnāni vastrabhūṣāgṛhāṇi ca || 42 ||
[Analyze grammar]

sopaskarāṇi yānāni vāhanā'nnajalānyapi |
evaṃ dānāni datvaiva yajñakāryaṃ samāpya ca || 43 ||
[Analyze grammar]

vadantaḥ paramāścaryaṃ svasvagṛhaṃ yayurmudā |
gopālakṛṣṇakaścāpi bālakṛṣṇayutastataḥ || 44 ||
[Analyze grammar]

nijālayaṃ yayau pakṣī vaikuṇṭhaṃ prayayau tataḥ |
lomaśādyā yayurnaijāśramān sukhānvitāstadā || 45 ||
[Analyze grammar]

evaṃ vai rādhike sālemālīyā daityapuṃgavāḥ |
hatāḥ śrīhariṇā sarve yayurvaikuṇṭhameva te || 46 ||
[Analyze grammar]

tatkanyakā hariṃ vavrurlomaśasyāśramasthitāḥ |
tanmātaro daityapatno yāśca vaidhavyamāśritāḥ || 47 ||
[Analyze grammar]

ātmaśreyaḥ papracchustā lomaśaṃ munipuṃgavam |
kenā'tra karmaṇā vidvan śreyaḥ syādubhayatra naḥ || 48 ||
[Analyze grammar]

tadvadā'tra daityapatnīḥ kṛpayā munipuṅgava |
lomaśaśca tadā tābhyastatsutābhyaśca sarvathā || 49 ||
[Analyze grammar]

sadāśreyaskarān dharmānuvācā'bhyudayapradān |
ahiṃsā satyamasteyaṃ dānaṃ kṣamā damo dayā || 50 ||
[Analyze grammar]

amānitvaṃ ca śaucaṃ ca tapaśca brahmacāritā |
śubhā vāk sādhusevā ca paraśreyaḥpradāyakāḥ || 51 ||
[Analyze grammar]

trayodaśāṃ'śo dharmo'yaṃ naranārīprapālitaḥ |
aihikaṃ sukhadaṃ śreyo dadāti śāśvataṃ hyapi || 52 ||
[Analyze grammar]

śrīkṛṣṇabhajanaṃ cāgnisevanaṃ snānamityapi |
bhikṣādanaṃ guroḥ sevā guroḥ prītyupapādanam || 53 ||
[Analyze grammar]

aihikaṃ sukhadaṃ śreyo dadāti hyapi śāśvatam |
gurorgehe vasennityaṃ tatpatnīṃ tatsutādikam || 54 ||
[Analyze grammar]

devānmatvā tathā devīrmatvā saṃpūjayet sadā |
śuśrūṣayecca nirmānā sā mṛtyuṃ jayati dhruvam || 55 ||
[Analyze grammar]

ātmabhāvanayā sādhvī pitṛdevā'tithīnapi |
samyaka samprīṇayed bhaktyā sā mṛtyuṃ jayati dhruvam || 56 ||
[Analyze grammar]

sadācāraḥ sadā rakṣyo daityairdevaiśca mānavaiḥ |
na cā''cāravihīnāyā bhadramatra paratra ca || 57 ||
[Analyze grammar]

yajñadānatapāṃsīha sadā bhavanti bhūtaye |
sadācāravihīnāyā niṣphalānyeva tānyapi || 58 ||
[Analyze grammar]

durācārā hi vāmāṅgī neha nāmutra nandati |
kāryāṃ yatnaḥ sadācāre sa tvabhadrasya nāśakaḥ || 59 ||
[Analyze grammar]

sadācārastaruścāsti nārīdehe hi vartate |
sa cāpatyaśarīre'pi hyavātarati saukhyakṛt || 60 ||
[Analyze grammar]

dharmo mūlaṃ tarostasya hyarthaḥ śākhāḥ susampadaḥ |
kāmaḥ puṣpāṇi ramyāṇi mokṣaḥ phalaṃ rasānvitam || 61 ||
[Analyze grammar]

so'yaṃ prasevito nāryā bhadrado'tra paratra ca |
brāhme muhūrte prathamaṃ budhyedanusmareddharim || 62 ||
[Analyze grammar]

devānṛṣīn satīścāpi vadet prabhātamaṃgalam |
śaṃkaro vaiṣṇavaśreṣṭhaścoktavān maṃgalaṃ param || 63 ||
[Analyze grammar]

prabhāte yat paṭhanmartyo mucyate pāpabandhanāt |
prābhātikaṃ maṃgalaṃ tatkathayāmi nibodhata || 64 ||
[Analyze grammar]

śrutvā smṛtvā paṭhitvā ca sarvapāpaiḥ pramucyate |
etanmaṃgalaraṭanād bahavo mokṣaṇaṃ gatāḥ || 65 ||
[Analyze grammar]

sarvāvatārajanako'kṣarataḥ paraścā |
'nādiścakṛṣṇabhagavān parameśvaraśca |
muktāstathā'gaṇitasṛṣṭiṣu vartamānāḥ |
kurvantu mokṣaphalakaṃ mama suprabhātam || 66 ||
[Analyze grammar]

rādhāyuto'gaṇitagopasugopikābhiḥ |
saṃsevito hṛdayapadmagataśca kṛṣṇaḥ |
lakṣmīramāpatirathā'sya ca pārṣadādyāḥ |
kurvantu mokṣaphalakaṃ mama suprabhātam || 67 ||
[Analyze grammar]

śrīvāsudevasahitāḥ parameśvarāśca |
nārāyaṇā vividhadhāmagatāśca muktāḥ |
māṇikyapāravatikākamalāprabhāśca |
kurvantu mokṣaphalakaṃ mama suprabhātam || 68 ||
[Analyze grammar]

hairaṇyagarbhahariśaṃkarasūryacandrāḥ pṛthvīsutaḥ śaśisuto guruśukradharmāḥ |
ārṣāḥ śaniḥ pitara aiśagaṇeśvarāśca kurvantu mokṣaphalakaṃ mama suprabhātam || 69 ||
[Analyze grammar]

raibhyaśca gautamapulastyamarīcayaśca |
bhṛgvaṅgiraḥpulahalomaśagālavādyāḥ |
vāsiṣṭhabhārgavaribhucyavanādikāśca |
kurvantu mokṣaphalakaṃ mama suprabhātam || 70 ||
[Analyze grammar]

śrīpārṣadāḥ sanakanandanasatkumārāḥ |
saujātapiṅgalasanātananāradādyāḥ |
indrādayo digadhipāḥ surakoṭayaśca |
kurvantu mokṣaphalakaṃ mama suprabhātam || 71 ||
[Analyze grammar]

saptasvarāḥ kṣititalāśca susūkṣmabhūtāḥ |
sthūlāśca tattvanikarā girivārdhayaśca |
tīrthāni cāpagavarāśca pativratāśca |
kurvantu mokṣaphalakaṃ mama suprabhātam || 72 ||
[Analyze grammar]

rukmāgado dhruvasuyajñakapuṇḍarīka |
prahlādasūtaśatasuvratakā'mbarīṣāḥ |
śrīkṛṣṇavallabhadivodaśukādikāśca |
kurvantu mokṣaphalakaṃ mama suprabhātam || 73 ||
[Analyze grammar]

itthaṃ prabhāte paramaṃ pavitraṃ śṛṇuyātpaṭhet |
smared bhaktyā suprabhātaṃ bhavedeva na saṃśayaḥ || 74 ||
[Analyze grammar]

hariṃ smṛtvā dehaśuddhiṃ kṛtvā snātvā vidhānataḥ |
tarpaṇaṃ ca tathā sandhyāṃ kuryācchrīharipūjanam || 75 ||
[Analyze grammar]

tilakaṃ candrakaṃ kuryād devapūjanamityapi |
sūryāya namanaṃ kuryāt praṇamet pitarau patim || 76 ||
[Analyze grammar]

guruṃ natvā satīṃ natvā gāṃ natvā homamācaret |
paśyet prātardadhi dūrvāṃ sarpirdhenuṃ savatsikām || 77 ||
[Analyze grammar]

udakuṃbhaṃ ca vṛṣabhaṃ suvarṇaṃ svastikaṃ madhu |
gomayaṃ cā'kṣatān lājā mṛdaṃ brāhmaṇakanyakāḥ || 78 ||
[Analyze grammar]

śvetapuṣpāṇi sasyāni vahniṃ candanamarkakam |
aśvatthaṃ sādhupuruṣaṃ darpaṇaṃ pratimāṃ hareḥ || 79 ||
[Analyze grammar]

atithiṃ pūjayedbhāvāt sādhusaṅgaṃ samācaret |
arke'bhyaṅgaṃ na vai kuryānmaṃgale kṣīrameva na || 80 ||
[Analyze grammar]

budhe na yoṣitaṃ gacchen patiṃ gacchenna parvaṇi |
udakchirāḥ svapennaiva pratīcīmastako na ca || 81 ||
[Analyze grammar]

devālayaṃ caityataruṃ vidvāṃsaṃ ca catuṣpatham |
guruṃ vṛddhaṃ prakuryāttu pradakṣiṇaṃ vṛṣapradam || 82 ||
[Analyze grammar]

anyadhṛtaṃ ca malinaṃ vastraṃ naiva hi dhārayet |
snāyānnityaṃ grahādau ca devadānādikaṃ caret || 83 ||
[Analyze grammar]

satsu vasenna tvasatsu puṇyadeśeṣu saṃvaset |
baddhavaire vasennaiva dharmahīne jane'pi ca || 84 ||
[Analyze grammar]

abhojyāḥ sūtikāḥ ṣaṇḍo mārjārākhū ca kukkuṭāḥ |
patitā'paviddhanagnāścāṇḍālā adhamāśca ye || 85 ||
[Analyze grammar]

brāhmaṇī brāhmaṇaścāpi bhikṣukau vyabhicāriṇau |
tāvubhau sūtiketyuktau tayorannaṃ vigarhitam || 86 ||
[Analyze grammar]

na juhotyucite kāle na snāti na dadāti ca |
pitṛdevārcanāddhīnaḥ sa ṣaṇḍaḥ parigīyate || 87 ||
[Analyze grammar]

daṃbhārthaṃ japati yaśca tapati paṭhatītyapi |
na paratrārthamudyukto mārjāraḥ parikīrtitaḥ || 88 ||
[Analyze grammar]

vibhave sati naivā'tti na dadāti na juhoti na |
tamāhurākhu tasyānnaṃ bhoktavyaṃ naiva dharmiṇā || 89 ||
[Analyze grammar]

sabhāgatānāṃ yaḥ sabhyaḥ pakṣapātaṃ samāśrayet |
tamāhuḥ kukkuṭaṃ tasya jalānnaṃ bahu garhitam || 90 ||
[Analyze grammar]

svadharmahāḥ paradharmagrāhakaḥ patitaḥ smṛtaḥ |
devapitṛgurutyāgī goviprastrīvighātakaḥ || 91 ||
[Analyze grammar]

apaviddhastadannaṃ na bhoktavyaṃ pāpadūṣitam |
yeṣāṃ kule na vedo'sti na kathā naiva ca vratam || 92 ||
[Analyze grammar]

te nagnāḥ kīrtitāsteṣāmannaṃ saṃskāradūṣitam |
āśārttānāmadātā ca dātuśca pratiṣedhakaḥ || 93 ||
[Analyze grammar]

śaraṇāgatasantyaktā sa cāṇḍālo'dhamo janaḥ |
teṣāmannaṃ na bhoktavyaṃ doṣabhāganyathā bhavet || 94 ||
[Analyze grammar]

yaccāpi kurvato nātmā jugupsāmeti sarvathā |
tatkartavyamaśaṃkena yat syāt kalyāṇadaṃ param || 95 ||
[Analyze grammar]

evamācāravatyāśca satyā gṛhe vane'pi vā |
dharmārthakāmamokṣā vai bhavantyeva na saṃśayaḥ || 96 ||
[Analyze grammar]

bhūmau śayyā brahmacaryaṃ tapobhiścātmadarśanam |
sarvasaṃgaparityāgaḥ śrīkṛṣṇasmaraṇaṃ sadā || 97 ||
[Analyze grammar]

sarvārpaṇaṃ harau kṛṣṇe gurau sarvāntarātmani |
yayā kṛtaṃ na lipyeta dehajaiḥ karmabhiḥ kvacit || 98 ||
[Analyze grammar]

bhavatyaḥ sarvathā'nādikṛṣṇanārāyaṇaṃ harim |
bālarūpaṃ prasevantām paro mokṣo bhaviṣyati || 99 ||
[Analyze grammar]

atra cātmaniveditvaṃ kṛtaṃ yayā tu yoṣitā |
tasyā dhāmni parā muktirbhavatyeva na saṃśayaḥ || 100 ||
[Analyze grammar]

nidrāyāṃ jāgrati svapne sthūle sūkṣme hṛdantare |
rājase tāmase satvabhāve smarantu mādhavam || 101 ||
[Analyze grammar]

ātmanā cendriyairvāpi dehena sevayā harim |
antaḥkaraṇaiḥ karmabhiḥ prasādayantu taṃ patim || 102 ||
[Analyze grammar]

ityuktāstāśca jagṛhurnāmamantraṃ hi lomaśāt |
oṃ namaḥ śrīkṛṣṇanārāyaṇāya pataye svāhā || 103 ||
[Analyze grammar]

ityasya raṭaṇaṃ cakrurdivārātramatandritāḥ |
śataṃ tā divyatāṃ prāptāḥ satataṃ japakāraṇāt || 104 ||
[Analyze grammar]

anādiśrīkṛṣṇanārāyaṇo bālo vimānagaḥ |
śatena tu vimānānāṃ sahitaḥ samupāyayau || 105 ||
[Analyze grammar]

tāḥ samārohayāmāsa vimānāgryeṣu mādhavaḥ |
nināya tāḥ paraṃdhāmā'kṣarādapyuttaraṃ hi yat || 106 ||
[Analyze grammar]

atha yāḥ kanyakāstāstu gṛhītvā lomaśād guroḥ |
upadeśaṃ ca taṃ kṛṣṇaṃ bālaṃ matvā patiṃ nijam || 107 ||
[Analyze grammar]

bhejustatraiva kanyāsu sthitvā sahasraśastadā |
paṭhanācchravaṇāccāpi bālakṛṣṇaṃ labhet satī || 108 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrāvaṇyāṃ sarasastaṭe yajñasūtrotsave sālamālavaṃśīyadaityānāmāgamanaṃ yuddhaṃ prabhuṇā teṣāṃ nāśo mokṣadharmā lomaśopadiṣṭāścetyādinirūpaṇanāmā ṣaḍviṃśatitamo'dhyāyaḥ || 26 ||
[Analyze grammar]