Chapter 23

śrīkṛṣṇa uvāca |
atha te dānavāḥ kṛṣṇaṃ draṣṭumicchanti satvaram |
anādiśrīkṛṣṇanārāyaṇaṃ bālaṃ hi rādhike || 1 ||
[Analyze grammar]

yatpratāpādayaṃ daityeśvaro jigye hariṃ prabhum |
tāṃ bhaktiṃ kartumicchanti prahlādenopabodhitāḥ || 2 ||
[Analyze grammar]

śṛṇu rādhe kathāṃ tāṃ ca yathā te dānaveśvarāḥ |
samāgatā harerbhaktā jātāścārādhanānvitāḥ || 3 ||
[Analyze grammar]

andhakasya ca vaṃśīyāḥ prahlādasya ca vaṃśajāḥ |
kujambhasya ca jambhasya śaṃkukarṇasya vaṃśajāḥ || 4 ||
[Analyze grammar]

mayasya vaṃśajāścāpi dundubheḥ śambarasya ca |
ayaḥśaṃkośca vṛtrasya vaṃśajā dānavādayaḥ || 5 ||
[Analyze grammar]

sasmaruścyavanaṃ vipraṃ prahlādamārgadarśakam |
cyavanaḥ śīghramevaiṣāṃ purataḥ samupasthitaḥ || 6 ||
[Analyze grammar]

vanditaḥ pūjitaścāpi pṛṣṭaśca śreyasaṃ prati |
vidyutkeśisuto jyeṣṭhaḥ sukeśiḥ samuvāca tam || 7 ||
[Analyze grammar]

praṣṭumicchāmi bhavataḥ saṃśayo'yaṃ hṛdi sthitaḥ |
kiṃsvicchreyaḥ pare loke kimu ceha dvijottama || 8 ||
[Analyze grammar]

kena pūjyo bhavet satsu kenā'sau sukhamedhate |
iti pṛṣṭaścyavanastān daityasantānajāṃstadā || 9 ||
[Analyze grammar]

vimṛśyovāca śreyo'rthamiha loke paratra ca |
śreyaḥ puṇyaṃ tathā dharmaḥ paratreha ca sarvathā || 10 ||
[Analyze grammar]

dharme samāśrite satsu pūjyaḥ sukhī sadā bhavet |
dharmaḥ svasya sadācāraḥ parātmaśāntidaḥ sukhaḥ || 11 ||
[Analyze grammar]

svātmaśāntipradaścāpi puṇyaṃ tatsukhadaṃ sadā |
mānavānāṃ paro dharmaḥ sadā yajñādikāḥ kriyāḥ || 12 ||
[Analyze grammar]

svādhyāyastattvaveditvaṃ viṣṇupūjanamityapi |
kenā'rjitena manujāḥ sukhino'mutra ceha ca || 13 ||
[Analyze grammar]

devānāṃ bhaktarakṣā ca pūjāgrahaṇamityapi |
prajāpālanamityādi tenā'rjitena te sukhāḥ || 14 ||
[Analyze grammar]

daityānāṃ bāhuśālitvaṃ yuddhaṃ vandanamityapi |
nītirbhaktiḥ prapattiśca tenā'rjitena te sukhāḥ || 15 ||
[Analyze grammar]

siddhānāṃ yogasiddhiśca svādhyāyo brahmacintanam |
bhaktiścopāsanā śāntistenā'rjitena te sukhāḥ || 16 ||
[Analyze grammar]

gāndharvāṇāṃ gītanṛtye vādyaṃ vāṇī madhusravā |
upāsanaṃ ca mahatāṃ tenā'rjitena te sukhāḥ || 17 ||
[Analyze grammar]

vidyādhrāṇāṃ śubhā vidyā vijñānaṃ pauruṣaṃ matiḥ |
nārāyaṇyāṃ sadā bhaktistenārjitena te sukhāḥ || 18 ||
[Analyze grammar]

kinnarāṇāṃ sūryabhaktīrgāndharvaṃ gāyanādikam |
kauśalyaṃ hāsyabhāvādau tenārjitena te sukhāḥ || 19 ||
[Analyze grammar]

śilpināṃ śilpakauśalyaṃ nārāyaṇā'bhicintanam |
paropakāraśālitvaṃ tenā'rjitena te sukhāḥ || 20 ||
[Analyze grammar]

pitṝṇāṃ cendriyavṛttinigraho mānahīnatā |
parameśe sadā bhaktistenā'rjitena te sukhāḥ || 21 ||
[Analyze grammar]

ṛṣīṇāṃ śīlatā satyaṃ japyaṃ jñānaṃ kṣamā dayā |
nirmalā'ntaḥkaraṇaṃ ca tenā'rjitena te sukhāḥ || 22 ||
[Analyze grammar]

tyāgināṃ ca satīnāṃ ca sādhvīnāṃ svāmisevanam |
anādiśrīkṛṣṇanārāyaṇārpaṇamarāgitā || 23 ||
[Analyze grammar]

harerbhaktiḥ sadā kāryā tenā'rjitena te sukhāḥ |
dhanarakṣā bhogadānaṃ sevakatvaṃ parārthakam || 24 ||
[Analyze grammar]

harau bhaktirguhyakānāṃ tenā'rjitena tai sukhāḥ |
parāvamarṣitā pārakyārthe laulyaṃ hi rakṣasām || 25 ||
[Analyze grammar]

harau bhakte ca vā bhaktistenā'rjitena te sukhāḥ |
avivekaḥ piśācānāṃ śaucahānirasatyatā || 26 ||
[Analyze grammar]

bhaktaprasādibhakṣyaṃ ca tenā'rjitena te sukhāḥ |
tiraścāṃ parasevitvaṃ tenā'rjitena te sukhāḥ || 27 ||
[Analyze grammar]

ityevaṃ kathitāḥ puṇyā dharmāḥ ṣoḍaśa mokṣadāḥ |
svasvajātyanusāreṇa dharmasthāḥ sukhinaḥ sadā || 28 ||
[Analyze grammar]

sarvadharmeṣu cotkṛṣṭāḥ sarvasādhāraṇā vṛṣāḥ |
tīrthayānaṃ prabhoḥ pūjā paropakaraṇaṃ tapaḥ || 29 ||
[Analyze grammar]

ahiṃsanaṃ ca santoṣo nītilabhye japo hareḥ |
etān dharmān samāśritya ye ke'pi syuśca dehinaḥ || 30 ||
[Analyze grammar]

avaśyaṃ brahmaśaraṇā muktimāyānti śāśvatīm |
nyāyyacaraṇāḥ sukhino duḥkhinasvapanītayaḥ || 31 ||
[Analyze grammar]

śrutvaivaṃ cyavanasyā''rthī vācaṃ daityāḥ sukhārthinaḥ |
prahlādapādasaraṇāstīrthaṃ śreyo hi menire || 32 ||
[Analyze grammar]

cyavanaṃ te papracchuśca sarvatīrthottamottamam |
cyavanastāṃstadā prāha tīrthaṃ śrīhāṭakeśvaram || 33 ||
[Analyze grammar]

tīrthottamaṃ ca badarīvanaṃ śrīpuruṣottamam |
kṣetraṃ śrīgaṇḍakītīrthaṃ māthuraṃ puṣkaraṃ tathā || 34 ||
[Analyze grammar]

tīrthottamottamaṃ tvāste cāśvapaṭṭasarovaram |
kuṃkumavāpikākṣetraṃ lomaśasyā''śramastathā || 35 ||
[Analyze grammar]

saurāṣṭraṃ sarvataḥ śreṣṭhaṃ parameśvaraśobhitam |
anādiśrīkṛṣṇanārāyaṇo bālasvarūpavān || 36 ||
[Analyze grammar]

vartate bhagavān yatra parameśaḥ pumuttamaḥ |
sarvadhāmā'dhipasvāmī sarvakāraṇakāraṇam || 37 ||
[Analyze grammar]

sarvā'vatāranāthaśca sarvalakṣmyādisatpatiḥ |
sarvamokṣarddhidātā ca sarvatulyadayālayaḥ || 38 ||
[Analyze grammar]

tattīrthaṃ sarvatīrthānāṃ tīrthāttamottamottamam |
yatkṛtvā sveṣṭamāsādya modate sarvaśāntiṣu || 39 ||
[Analyze grammar]

etacchrutvā cyavanasya daityāstīrthecchavastadā |
cyavanaṃ saha nītvaiva cāśvapaṭṭasaro yayuḥ || 40 ||
[Analyze grammar]

daityāśca dānavāścāpi teṣāṃ nāryaḥ sutādayaḥ |
kuṃkumavāpikākṣetre tīrthārthaṃ prayayurmudā || 41 ||
[Analyze grammar]

cyavanasya prasaṃgena prahlādādyupadeśataḥ |
anādiśrīkṛṣṇanārāyaṇaṃ draṣṭumupāgatāḥ || 42 ||
[Analyze grammar]

lomaśasyā''śramaṃ vyomnaścāvatīrya ca dānavāḥ |
cyavanena samaṃ nemurlomaśaṃ te kuṭumbinaḥ || 43 ||
[Analyze grammar]

dānavānāṃ parāṃ bhaktiṃ saṃvīkṣya lomaśo muniḥ |
cyavanena saha teṣāṃ svāgataṃ kṛtavān param || 44 ||
[Analyze grammar]

madhuparkaṃ cāsanādi jalapānādikaṃ dadau |
āvāsān pradadau ramyān kalpitān kalpavṛkṣajān || 45 ||
[Analyze grammar]

aśmakākhyanagaryāśca śatottarān suśobhanān |
susmṛddhān sarvavastvāḍhyān prāsādān candramonibhān || 46 ||
[Analyze grammar]

snānabhojanaśayyāḍhyān sabhāśālāvirājitān |
udyānakuṃjasaṃvyāptān śītaramyasukhānilān || 47 ||
[Analyze grammar]

candanāgurukastūrīgandhāmodapramoditān |
sarvopakaraṇādyuktān sevābhaktān dadau muniḥ || 48 ||
[Analyze grammar]

cyavanaḥ suprasanno'bhūllomaśasyā'rtibhāvataḥ |
daityāṃśca dānavānāha ṛṣayastvaparigrahāḥ || 49 ||
[Analyze grammar]

pakṣapātādiśūnyāśca rāgadveṣavivarjitāḥ |
sarvajīvahitāḥ śāntā mocayanti hyaghājjanān || 50 ||
[Analyze grammar]

yasya śatrau ca mitre ca samabhāvo vilokyate |
sa eva mokṣado bodhyaḥ pāvanaṃ tīrthamuttamam || 51 ||
[Analyze grammar]

lomaśasya prasādena vāriṇā pūrvajanmajāḥ |
ghorapātakapuñjā vai layameṣyanti vo'khilāḥ || 52 ||
[Analyze grammar]

tasmācchrīlomaśaṃ vipraṃ prasevadhvaṃ mudānvitāḥ |
kaṃcitkālaṃ vasatā'tra samarjayata deśanām || 53 ||
[Analyze grammar]

sthāvarebhyastu tīrthebhyo jaṃgamaṃ drāg viśodhakam |
sādhavaḥ paramaṃ tīrthaॆ sparśanāt pāpanāśakam || 54 ||
[Analyze grammar]

vandanāt sevanāt pādasaṃmmardanāt pratoṣaṇāt |
yayeṣṭavastudānācca tārayantyapi pāpinaḥ || 55 ||
[Analyze grammar]

mahāpāpātipāpānāṃ dāhakaṃ sādhusevanam |
bhojanīyā vandanīyā darśanīyā hi sādhavaḥ || 56 ||
[Analyze grammar]

sparśanīyā namanīyāstoṣaṇīyā hi sādhavaḥ |
sarvārpaṇena ca paricaraṇīyā hi sādhavaḥ || 57 ||
[Analyze grammar]

saṃgatiḥ sulabhā sarvā durlabhā sādhusaṃgatiḥ |
kāyena manasā vaicā toṣaṇīyā hi sādhavaḥ || 58 ||
[Analyze grammar]

dhyānaniṣṭhāparāḥ puṇyaśevadhayastapaḥprabhāḥ |
parabrahmaparāḥ śiṣyaśreyaḥparāyaṇāḥ priyāḥ || 59 ||
[Analyze grammar]

sarvakalyāṇadāḥ santaḥ sevanīyāḥ svamuktaye |
dānavatvaṃ ca daityatvaṃ mānavatvaṃ sureśatā || 60 ||
[Analyze grammar]

na naityikī cātmanāṃ vai dehajanmādijaṃ hi tat |
dehasya vigame sarvaṃ cāgantukaṃ vinaśyati || 61 ||
[Analyze grammar]

mamedaṃ ca kuṭumbādi rājyaṃ me mama bāndhavāḥ |
sutāḥ patnī patiśceti cāhaṃkārakṛtaṃ mṛṣā || 62 ||
[Analyze grammar]

ahaṃkārātmake bīje yāte yāsyati vāsanā |
karmāśayavināśe ca kva daityatvaṃ kva śiṣyatā || 63 ||
[Analyze grammar]

ātmā tu māyikavarṣmayogānnāmaniruktimān |
diterjāto yato daityo danorjātastu dānavaḥ || 64 ||
[Analyze grammar]

ajāto yaścetanaḥ sa jātena jāta ucyate |
jātaṃ dehaṃ na vai cātmā tataścātmā na nāmabhāka || 65 ||
[Analyze grammar]

yatra sthāne tu yo jātastatraivā'sya prajāyate |
mūṣā tvabhiniveśo'tra māyāyāṃ mamatāvaśāt || 66 ||
[Analyze grammar]

tasmād yūyaṃ na pātālarasātalādivāsinaḥ |
na ca daityā na vai śūrāstatsarvaṃ dehabhāg yataḥ || 67 ||
[Analyze grammar]

satāṃ yogena ca santo jātāścātra sarovare |
snātvā pītvā jalaṃ cātra lomaśasya rajodharāḥ || 68 ||
[Analyze grammar]

pūtāḥ stha tīrthayogena manuṃ gṛhṇata cottamam |
pūjayata guruṃ cainaṃ paścāt kṛṣṇanarāyaṇam || 69 ||
[Analyze grammar]

yāsyāmo darśanārthaṃ vai śreyaḥ prāpsyatha niścitam |
ityuktā dānavā daityā daśasāhasrasaṃkhyakāḥ || 70 ||
[Analyze grammar]

aśvapaṭṭasarastīrthe snātvā prāhlādikaṃ sthalam |
natvā ca lomaśaṃ vipraṃ pūjayāmāsurādarāt || 71 ||
[Analyze grammar]

pādapūjājalaṃ pītvā nemustaṃ lomaśaṃ munim |
candanādyaiḥ puṣpahārairarcayāmāsurādarāt || 72 ||
[Analyze grammar]

jagṛhuśca mahāmantraṃ pāvanaṃ sarvasaukhyadam |
oṃ namaḥ śrīkṛṣṇanārāyaṇāya svāmine svāhā || 73 ||
[Analyze grammar]

enaṃ gṛhītvā mantraṃ ca gṛṇanto vaiṣṇavāśca te |
mālāṃ ca taulasīṃ bhāle sabinduṃ tilakaṃ tathā || 74 ||
[Analyze grammar]

gṛhītvā paṃktiśo bhūtvā lomaśā'rpitamuttamam |
bhakṣyaṃ bhojyaṃ ca lehyaṃ ca coṣyaṃ bhojanamuttamam || 75 ||
[Analyze grammar]

pānaṃ miṣṭaṃ tāmbūlakaṃ jagṛhurlomaśāśrame |
cyavano'pi kṛtasandhyāvandano bubhuje mudā || 76 ||
[Analyze grammar]

tataḥ sarve nijāvāsān yayurviśrāntilabdhaye |
atha sāyaṃ tu te sarve gṛhītvopāyanāni vai || 77 ||
[Analyze grammar]

anādiśrīkṛṣṇanārāyaṇadarśanakāṃkṣiṇaḥ |
yayuḥ śrīkambharālakṣmīprāsādaṃ saptabhūmikam || 78 ||
[Analyze grammar]

yatra śrībālakṛṣṇo'sau dolāyāṃ rājate prabhuḥ |
śrīmadgopālakṛṣṇaśca pitā putraṃ kare svake || 79 ||
[Analyze grammar]

dhṛtvā siṃhāsane cāyāt niṣasāda tadocitaḥ |
lomaśaścyavanaścobhau śiṣyadaityagaṇānvitau || 80 ||
[Analyze grammar]

āyayatuśca tābhyāṃ vai dattāsanaḥ pitā svayam |
daityānāmapi satkāraṃ svāgataṃ kṛtavāṃstadā || 81 ||
[Analyze grammar]

dattāsanāstu te daityāḥ prahvībhāvapariplutāḥ |
ātmano menire dṛṣṭvā kṛtakṛtyān prabhuṃ harim || 82 ||
[Analyze grammar]

kṣaṇaṃ sthairyaṃ prajagmuste sthiranetrāḥ sthavṛttayaḥ |
āścaryaṃ paramaṃ te ca lokayāmāsuraiśvaram || 83 ||
[Analyze grammar]

kṣaṇaṃ dṛṣṭvā bālakṛṣṇaṃ tataḥ kiśorarūpiṇam |
divyarūpānurūpābhirūpamujjvalamuttamam || 84 ||
[Analyze grammar]

tatra mūrtau ca prahlādaṃ śukrācāryaṃ tataḥ param |
tataśca kaśyapaṃ ditiṃ dānu dakṣaṃ prajāpatim || 85 ||
[Analyze grammar]

hiraṇyākṣaṃ ca hiraṇyakaśipuṃ ca pitāmahān |
brahmāṇaṃ ca tathā rudraṃ viṣṇuṃ tataścaturbhujam || 86 ||
[Analyze grammar]

tato vairājarūpaṃ ca caturdaśa ca bhūmikāḥ |
tatra rasātalaṃ tatrā'śmakapattanamuttamam || 87 ||
[Analyze grammar]

tatra naijanivāsāṃśca tatra naijakuṭumbinaḥ |
naijarūpāṇi ca sarve lokayāmāsuraḍutam || 88 ||
[Analyze grammar]

tatra pañcasahasrāṇi kanyānāṃ bhāvitātmanām |
varaṃ śrībālakṛṣṇaṃ ca kiśoraṃ vavrire patim || 89 ||
[Analyze grammar]

evaṃ vilokayāmāsustataśca bālarūpadhṛk |
harirjātaḥ punaścātra kaiśoraṃ rūpamāptavān || 90 ||
[Analyze grammar]

ityevaṃ te vilokyaiva paramāścaryasaṃplutāḥ |
pupūjuḥ śrīhariṃ kṛṣṇanārāyaṇaṃ jagatpatim || 91 ||
[Analyze grammar]

upadāḥ sannyadhustvagre pādaprakṣālanāmbu ca |
papuḥ sarve tadā daityadānavāstatstriyo'pi ca || 92 ||
[Analyze grammar]

teṣāṃ kanyā divyarūpāḥ pañcasāhasrasaṃkhyakāḥ |
mumuhuḥ śrīharau lagnā dhyānamagnāstadā sthirāḥ || 93 ||
[Analyze grammar]

babhūvuśca tataḥ kṛṣṇaṃ varayāmāsuricchayā |
tava pādāmbuje dehi bhaktiṃ dehi jagatprabho || 94 ||
[Analyze grammar]

muktiṃ dehi śāśvataṃ ca sukhaṃ dehi jagatprabho |
anādiśrīkṛṣṇanārāyaṇaḥ prāha tathā'stu vaḥ || 95 ||
[Analyze grammar]

dattaṃ padaṃ pradattā ca bhaktirmuktiḥ sukhaṃ tathā |
ityuktastā divyarūpāstadā jātā hi tatkṣaṇam || 96 ||
[Analyze grammar]

pañcasāhasrasaṃkhyāstā patnyo jātā drutaṃ hareḥ |
pādau dhṛtvā tatra tasthuḥ patiṃ prāpya prabhuṃ harim || 97 ||
[Analyze grammar]

lomaśasyā''śrame tasthuḥ śrīkāntarakṣitā hi tāḥ |
lomaśaścyavanaścobhau sampūjya śrīhariṃ tataḥ || 98 ||
[Analyze grammar]

kanyāḥ saṃrakṣayāmāsaturvai naijāśrame mudā |
śrīharerājñayā tāścā'rbudakanyāsu saṃsthitāḥ || 99 ||
[Analyze grammar]

daityā daśādhisāhasrāḥ śrīhareḥ kṛpayā drutam |
vaikuṇṭhaṃ gantumicchanto vavrire dhāma tatra ca || 100 ||
[Analyze grammar]

hariṇā prāpitāste tu vaikuṇṭhaṃ divyarūpiṇaḥ |
athopadāḥ samastā yāḥ kanyābhyaḥ pradadau prabhuḥ || 101 ||
[Analyze grammar]

ṛṣibhyāṃ ca dadau yogyavastūni śrīhariḥ svayam |
tato bālasvarūpaḥ sa bhūtvā datelāgato'bhavat || 102 ||
[Analyze grammar]

cyavano lomaśaṃ natvā kanyābhyaśca śubhāśiṣaḥ |
datvā yayau tīrthayātrāṃ puṣkarāraṇyamuttamam || 103 ||
[Analyze grammar]

prahlādaścirajīvī vai rasātalamupāyayau |
ityevaṃ rādhike tasya pareśasya jagatkṛtaḥ || 104 ||
[Analyze grammar]

atīva divyamāvedyaṃ caritaṃ śrāvaṇe'bhavat |
varṣe dvitīyake pāṭhācchravaṇānmokṣadaṃ param || 105 ||
[Analyze grammar]

smṛddhidaṃ cāyuṣyadaṃ ca putrapautradhanapradam |
akhaṇḍasaubhāgyakaraṃ kṛpāsādhyo yato hariḥ || 106 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne rasātalādisthitadaśasāhasradaityadānavānāṃ mokṣaṇaṃ pañcasāhasrakanyakānāṃ bālakṛṣṇavaraṇaṃ cetyādinirūpaṇanāmā trayoviṃśatitamo'dhyāyaḥ || 23 ||
[Analyze grammar]