Chapter 8

śrīkṛṣṇa uvāca |
śrūyatāṃ subhage rādhe kathāṃ pumuttamāśritām |
preṃkhotsavottaraṃ kṛṣṇanārāyaṇaḥ paraḥ prabhuḥ || 1 ||
[Analyze grammar]

duhitṛhārakaścetimatvā talākhyarakṣasā |
pradviṣṭo bahudhā bālakṛṣṇo vai kambharāgṛhe || 2 ||
[Analyze grammar]

nā'sya kleśaḥ pareśasya phalaṃ kleśastu rakṣasaḥ |
talena gatvā cārjantāṃ guphāṃ tatra sthitāstu ye || 3 ||
[Analyze grammar]

rākṣasā nijajātīyā bodhitāste ca mantritāḥ |
saurāṣṭre kuṃkumavāpyāṃ kṛṣṇaṃ nāśayituṃ mudā || 4 ||
[Analyze grammar]

sarve cākarṇya vṛttāntaṃ talājā''haraṇādikam |
talena saha cāgatya siṃhāraṇye sthitā hi te || 5 ||
[Analyze grammar]

bhramanto niśithe grāmān randhrānveṣaṇatatparāḥ |
ghātayituṃ hariṃ te vai prayatante sma nityadā || 6 ||
[Analyze grammar]

pracchannāste samāyānti cā'nāsādya kṣaṇaṃ tataḥ |
viyanti ca nirāśāste prabhoścakrād bhayaṃ gatāḥ || 7 ||
[Analyze grammar]

evaṃ māsaḥ prathamastu bālakṛṣṇasya cā'bhavat |
janerdvitīyamāsasya prathame vai dine tataḥ || 8 ||
[Analyze grammar]

mātā pitā lomaśaśca prabhuṃ śrīpuruṣottamam |
icchanti sma divyadugdhaṃ pāyayituṃ tadā hariḥ || 9 ||
[Analyze grammar]

mārgakṛṣṇanavamyāṃ ca prātarutthāya caiva saḥ |
ramate sma hasati sma preṃkhāyāṃ jñāpayan kṛpām || 10 ||
[Analyze grammar]

mātā cātiprasannā'sti dugdhaṃ pāyayituṃ harim |
dudoha maṃgalāgaurīnāmnīṃ kāmadughāṃ tu gām || 11 ||
[Analyze grammar]

uṣṇaṃ kṛtvā śarkarāktaṃ kavoṣṇaṃ kambusandhṛtam |
vastrapūtaṃ ca gokṣīraṃ kambunā'pāyayaddharim || 12 ||
[Analyze grammar]

jñātvā dugdhotsavaṃ gāvaḥ kāmarūpadharāḥ śubhāḥ |
divyalakṣaṇasampannā mānavīvāgvivecikāḥ || 13 ||
[Analyze grammar]

jagadurmātaraṃ cāsmaddugdhaṃ pāyaya gopatim |
gosahasrasyā'rthanāṃ saṃśrutvā mātā''ha gāstadā || 14 ||
[Analyze grammar]

bālo'yaṃ syātkathaṃ nvarhaḥ sarvadugdhātipānakṛt |
apathyaṃ tad bhavet sarvaṃ kiṃ karomi hi śaṃsata || 15 ||
[Analyze grammar]

gāvaḥ prāhuḥ kimabhāgyamasmākaṃ tādṛśaṃ bhavet |
vayaṃ gāvo bhavatyāḥ sma hareḥ sevāṃ na cāpnumaḥ || 16 ||
[Analyze grammar]

gavāmabhyarthanāṃ mātā yāvacchṛṇoti tāvatā |
vyomamārgād gavāṃ lakṣaṃ golokādāgataṃ tadā || 17 ||
[Analyze grammar]

akṣarāccāpi vaikuṇṭhādavyākṛtād divastathā |
bhūmeścāpi vṛṣāraṇyāt koṭayastvāyayurgavām || 18 ||
[Analyze grammar]

anādiśrīkṛṣṇanārāyaṇecchayā samāyayuḥ |
vyomni vimānagāḥ kācidantarīkṣagatāḥ parāḥ || 19 ||
[Analyze grammar]

jalasthāḥ kṣitigāścānyāstasthurnemurhariṃ mudā |
dugdhasrāvān pracakruśca dugdhasarit tato'bhavat || 20 ||
[Analyze grammar]

aśvapaṭṭasarasyeva dugdhaṃ jale ca miśritam |
dugdhatīrthaṃ tu tajjātaṃ pāpatāpapraṇāśanam || 21 ||
[Analyze grammar]

harirjñātvā gavāmicchāḥ mātaraṃ prāha tatkṣaṇam |
mātaḥ kathaya sarvāstāḥ kṣīraṃ pāsyati me sutaḥ || 22 ||
[Analyze grammar]

gāvaścakruḥ stutiṃ taṃ ca piba naḥ kṣīramacyuta |
brahmāṇḍodara viśvātman sāphalyaṃ no vidhehi ca || 23 ||
[Analyze grammar]

anādiśrīkṛṣṇanārāyaṇastatprārthanāṃ tadā |
svīkṛtyā'nugraheṇaiva koṭirūpo babhūva ha || 24 ||
[Analyze grammar]

pratidhenuṃ tu bālo'sau dugdhadohakavat sthitaḥ |
pratidhenustanaṃ prāpya dugdhadhārāṃ nisargajām || 25 ||
[Analyze grammar]

snehajāṃ cātimiṣṭāṃ ca hariḥ svasya mukhe'grahīt |
papau payāṃsi cā''tṛptiṃ gobhyaḥ stanyamapāyayat || 26 ||
[Analyze grammar]

prāsādikaṃ ca devebhyaḥ kanyābhyaḥ pitṛbhyastathā |
dadau paścādekarūpo'bhavat kṛṣṇanarāyaṇaḥ || 27 ||
[Analyze grammar]

dhenavastāstadā kṛṣṇaṃ prārthayāmāsa satpatim |
sadā rakṣaya no nātha tavā'gre sevanāya vai || 28 ||
[Analyze grammar]

kṛṣṇanārāyaṇaḥ prāha tathā'stviti hasan prabhuḥ |
dhenūnāṃ ca tadā devo rūpadvayaṃ cakāra ha || 29 ||
[Analyze grammar]

ekaṃ dhenusvarūpaṃ ca dvitīyaṃ kanyakātmakam |
kanyāstā lomaśā'gre ca rarakṣa bhagavān hariḥ || 30 ||
[Analyze grammar]

gāvaḥ sarvā divyadehā yayuḥ svasvasthalāni vai |
enaṃ mahotsavaṃ vīkṣya devā devyaḥ smayaṃ yayuḥ || 31 ||
[Analyze grammar]

athā'surāste samayaṃ dugdhotsavaṃ vilokya ca |
dhenurūpāstadā bhūtvā stanyadānārthamāyayuḥ || 22 ||
[Analyze grammar]

arjantādyāstathā teṣāṃ nāryo gorūpadhārikāḥ |
kapilāḥ piṃgalā raktāḥ śyāmāḥ śabalikāḥ parāḥ || 33 ||
[Analyze grammar]

bhūtvā śrībālakṛṣṇasya sannidhāvāyayustadā |
odhaḥsu saṃbhṛtaṃ kṣveḍaṃ śvetadugdhanibhaṃ tadā || 34 ||
[Analyze grammar]

jñātvā vasundharā devī kṛtyaṃ tad rakṣasāṃ tathā |
gauśca bhūtvā svayaṃ cāyāt prathamaṃ śrīhariṃ prati || 35 ||
[Analyze grammar]

prāha gosvāminaṃ bālaṃ nātha piba payo mama |
yathā tṛptiryatheṣṭaṃ ca piba sarvaṃ payo mama || 36 ||
[Analyze grammar]

imā gāvo'raṇyavāsā āgatā mokṣakāṃkṣayā |
tāsāmākaṇṭhamāpīya stanyaṃ mokṣaṃ pradehi tāḥ || 37 ||
[Analyze grammar]

śrutvaitad bhagavāṃstasyā vasumatyāstu bhāvabhṛt |
omityuktvā śatarūpo babhūva līlayā punaḥ || 38 ||
[Analyze grammar]

tāsāmodhāṃsi bhagavān karābhyāṃ dṛḍhamādadhe |
stanāni cānane kṛtvā papau kṣveḍapayo'tigam || 39 ||
[Analyze grammar]

kṣveḍaṃ tvamṛtatāpannaṃ bhagavanmukhamāgatam |
saprāṇaṃ sarvathā stanyamapibat tāḥ prasahya saḥ || 40 ||
[Analyze grammar]

evaṃ kṛte tu te daityā daityanāryaśca vai tadā |
trāhi trāhi kṛpāsindho muñca muñceti pāhi ca || 41 ||
[Analyze grammar]

kṣamāṃ tadā'rthayāmāsurāsan daipyasvarūpagāḥ |
mātā pitā kumāryaśca bhayamudvegamāgatāḥ || 42 ||
[Analyze grammar]

tresurdaityakukṛtyena kṛṣṇaghātakakarmaṇā |
daityān vilokya rurudurlomaśastā asāntvayat || 43 ||
[Analyze grammar]

arjantādyā rākṣasāste tuṣṭuvuḥ parameśvaram |
namaste devadeveśa parameśa namo'stu te || 44 ||
[Analyze grammar]

kṛpālo tava putrāḥ sma dāsikāste imāḥ striyaḥ |
vṛścikānāmavinaye roṣaṃ yāti na sajjanaḥ || 45 ||
[Analyze grammar]

āsurāṇāṃ nisarge tvaṃ mā yāhi roṣamacyuta |
prāṇān rakṣaya mukteśa kṣveḍaṃ tvayā'mṛtaṃ kṛtam || 46 ||
[Analyze grammar]

kṣveḍāśrayāṃstathā cāsmānamṛtān saṃvidhehi ca |
avatārāstathā muktā īśvarā munayaḥ surāḥ || 47 ||
[Analyze grammar]

ṛṣayaḥ pitaro martyāḥ piśācā yakṣarākṣasāḥ |
kinnarāścāraṇāḥ sūtāḥ kiṃpūruṣā yamānugāḥ || 48 ||
[Analyze grammar]

tiryañcaḥ paśavo vṛkṣā vallyaḥ sarīsṛpā mṛgāḥ |
gulmāstṛṇāni pakṣyādyāḥ kīṭā maśakajātayaḥ || 49 ||
[Analyze grammar]

daityāśca dānavā varṇasaṃkarā asurāḥ śaṭhāḥ |
nāgāḥ sarpā jaḍāścaityā narā nāryastvadātmajāḥ || 50 ||
[Analyze grammar]

tava putrāḥ prabho sarve sattvarajastamoyutāḥ |
sarveṣveva samā prītistava kṛṣṇa bhavediti || 51 ||
[Analyze grammar]

piturmātuḥ samā prītirbāleṣu viṣameṣvapi |
rakṣa rakṣa mahārāja mā prāṇebhyo viyojaya || 52 ||
[Analyze grammar]

vayaṃ pitṛhano jātā garadāḥ pāpacetasaḥ |
mā gaṇayā'parādhān no hyajñānāṃ krūrakarmiṇām || 53 ||
[Analyze grammar]

vāraṃ vāraṃ praṇamāmastṛṇānyādāya vai mukhe |
rakṣa jīvaya no nātha mā prāṇebhyo viyojaya || 54 ||
[Analyze grammar]

ityabhyartha hariṃ daityā nipetuḥ pādayorhareḥ |
mokṣayiṣye haristāṃścā'vat pṛthvīsamīpataḥ || 55 ||
[Analyze grammar]

śrīkṛṣṇasya suyogena teṣāṃ pāpāni jajvaluḥ |
arjanto daityavaryastu rākṣasīyonikāraṇam || 56 ||
[Analyze grammar]

varṇayāmāsa śuddhena jñātvā vai hṛdyena ha |
vayaṃ pūrve marusthāne gālavasyā''śramasthitāḥ || 57 ||
[Analyze grammar]

viprā vedādhyāyavantaḥ śuddhayajñaparāstathā |
aparigrahadharmāṇaḥ kandamūlaphalāśinaḥ || 58 ||
[Analyze grammar]

kalpavṛkṣakalpavallīkalpamaṇiprajīvinaḥ |
kāmarūpadharā vyomnā yāyinaḥ sūryavarcasaḥ || 59 ||
[Analyze grammar]

tīrthayātrākarāścāpi parigrahavivarjitāḥ |
āsma tathāpi śūdrasya tapasā marubhūtale || 60 ||
[Analyze grammar]

anāvṛṣṭirabhūttena dhvastāḥ kandaphalādayaḥ |
bhūtvā ca bhikṣukāḥ sarve hyabhūma saparigrahāḥ || 61 ||
[Analyze grammar]

dānagrāhāścānnalubdhāḥ prasahya dhanahāriṇaḥ |
abhakṣyabhakṣakā jātā bubhukṣitā hi pāpinaḥ || 62 ||
[Analyze grammar]

vṛkṣā naṣṭastathā naṣṭā vallayaḥ kāmadāstu yāḥ |
tato vane vicarāmo yathākāmaṃ vidharmiṇaḥ || 63 ||
[Analyze grammar]

yaḥ kaścin milati mārge taddhanaṃ cāmbarādikam |
tadannaṃ ca tatsalilaṃ harāmastasya tattadā || 64 ||
[Analyze grammar]

evaṃ vai vartamānānāṃ pañcadaśakuṭumbinām |
sannidhāvekadā viprayugalaṃ samupāgatam || 65 ||
[Analyze grammar]

dharmayuktaṃ dayāyuktaṃ brahmamārgaparaṃ tathā |
vedadhyāyanasampannaṃ ṣaṭkarmasaṃparāyaṇam || 66 ||
[Analyze grammar]

patnī pativratā cāsīt svāmimātraparāyaṇā |
patisevākarī sādhvī snānapūjādikāriṇī || 67 ||
[Analyze grammar]

ekabhuktavrataṃ dvayorvrateṣu jāgarastathā |
brāhmaṇānāṃ pūjane tau prasannau sarvasampradau || 68 ||
[Analyze grammar]

śraddhābhāvasamāyuktau gurupitṛparāyaṇau |
tāvāgatyāśrameṣveva viśrāntau naḥ samīpataḥ || 69 ||
[Analyze grammar]

tayoragre pakvasaktūnyāsan yavāstathā'kṣatāḥ |
asmābhiste tvapahṛtā bhojyaṃ cāpahṛtaṃ tayoḥ || 70 ||
[Analyze grammar]

vastrāṇyavaskanditāni dhanaṃ cāpahṛtaṃ tathā |
dvayoḥ kaupīnayogyaṃ ca vastraṃ tadā'vaśeṣitam || 71 ||
[Analyze grammar]

patirhariṃ smaratyeva hriyamāṇe'pi taddhane |
sādhvī sāpi na ca vakti japatyeva hariṃ muhuḥ || 72 ||
[Analyze grammar]

evaṃ tau luṇṭatau tatrā'smābhirdayāvivarjitaiḥ |
prasahya caurarūpairvai brāhmaṇairbrāhmaṇau tadā || 73 ||
[Analyze grammar]

dharmiṣṭhau pīḍitau vīkṣya bhūkampaḥ samajāyata |
aśmavṛṣṭirabhūtpāṃsuvarṣaṇaṃ cābhavattadā || 74 ||
[Analyze grammar]

dvāvetau vṛkṣamāśritya tiṣṭhataśca harismṛtī |
pativratā sā manvānā sarva harīcchayeti ca || 79 ||
[Analyze grammar]

patiṃ saṃvāhayāmāsa mardayāmāsa varṣma ca |
satyāṃ pāṣāṇavṛṣṭau ca pāṃsūnāṃ varṣaṇe'pi ca || 76 ||
[Analyze grammar]

cakraturna ca śokaṃ tau rakṣecchāṃ cakraturna ca |
oṃ namaḥ śrīkṛṣṇanārāyaṇāya svāmine svāhā || 77 ||
[Analyze grammar]

iti jāpaṃ prakurvantau sasmaraturhariṃ gurum |
tāvattatra samāyātaḥ sachatravastrabhojanaḥ || 78 ||
[Analyze grammar]

brāhmaṇo'nyaḥ satilako hṛdi śrīvatsaśobhitaḥ |
ujjvalaścandrasadṛśo dadau pṛṣṭvā subhojanam || 79 ||
[Analyze grammar]

vastrāṇi ca tathā chatraṃ dadau tadyugalāya saḥ |
asmābhistadvīkṣitaṃ ca vartamāne tu varṣaṇe || 80 ||
[Analyze grammar]

tatra gatvā ca tadapi punarhṛtaṃ samastakam |
tadā dātā tiro'bhūcca divyadevo'thavā ṛṣiḥ || 81 ||
[Analyze grammar]

śaśāpā'smān brahmaputrā bhavantaḥ krūranirdayāḥ |
svajñātikhādakā yasmāt tasmād bhavantu rākṣasāḥ || 82 ||
[Analyze grammar]

yeṣāṃ nāsti dayāleśo nāryāṃ nare'pi vai dvije |
prāptaṃ pūrvaṃ tu tatprāptaṃ yavavastrādikaṃ tu tat || 83 ||
[Analyze grammar]

deśakālapravaiṣamyāt kṣāntaṃ pāpāpavartanam |
punaḥ prāptau punarhṛtaṃ nirdayaiśca durātmabhiḥ || 84 ||
[Analyze grammar]

tasmāt pāṣāṇavarṣaiśca mṛtiṃ gatvā hi rākṣasāḥ |
bhavantu marudharmāṇo vasantu śūṣkaparvate || 85 ||
[Analyze grammar]

paśvāhārāśca māṃsādā bhavantu sukhavarjitāḥ |
iti śaptā hi tenaiva vyomavāṇyā tadā vayam || 86 ||
[Analyze grammar]

śapantaṃ prārthayāmāsuḥ kṣamāṃ mokṣaṃ sukhaṃ punaḥ |
tadā vyaktasvarūpaḥ sa ṛṣirvai gālavaḥ svayam || 87 ||
[Analyze grammar]

āsītpūrvagururnaśca jagāda dayayā punaḥ |
saurāṣṭre śrīkṛṣṇanārāyaṇasya ca parātmanaḥ || 88 ||
[Analyze grammar]

yogena bhavatāṃ muktirbhaviṣyati vrajantu tam |
tato'smābhirvanditaśca munistadyugalaṃ tathā || 89 ||
[Analyze grammar]

kṣamārthaṃ yācitaṃ dravyaṃ cārpitaṃ pratipūjitam |
pratyarpitaṃ ca vastrānnaṃ tato vayaṃ tu vṛṣṭibhiḥ || 90 ||
[Analyze grammar]

śāpena vai mṛtāstatra rākṣasīṃ yonimāgatāḥ |
arjantādyā vayaṃ sarve rākṣasā vai kuṭumbinaḥ || 91 ||
[Analyze grammar]

parvatādau nivāsaśca kṛtvā nārāyaṇaṃ prabhum |
cintayāmaḥ kadā muktipradaḥ śrībhagavān bhavet || 92 ||
[Analyze grammar]

jātismarā vayaṃ sarve talasya kathanāt khalu |
jñānavanto parabrahma mokṣadaṃ cātra rājate || 93 ||
[Analyze grammar]

tad vayaṃ kṛtakṛtyāḥ sma daityabhāvād vimocitāḥ |
tava yogena deveśa pāpaṃ prajvalitaṃ tu naḥ || 94 ||
[Analyze grammar]

pāpātmāno vayaṃ nātha tāritā brahmarākṣasāḥ |
kṣveḍaṃ tvasmatkṛte jātaṃ hyamṛtaṃ tvaparādhinām || 95 ||
[Analyze grammar]

pāraḥ kṛpāyāste nāsti nāsti pāraḥ kṣateśca naḥ |
pārakṛt prakarotveva pāradhīn bhavapāragān || 96 ||
[Analyze grammar]

ityuktvā rurudurdaityā jātismarā muhurmuhuḥ |
praṇemurdaṇḍavat kṛṣṇanārāyaṇaṃ jagurjayam || 97 ||
[Analyze grammar]

bhagavāṃstān karuṇayā lokayāmāsa satvaram |
tyājayāmāsa dehāṃstān kārayāmāsa devatāḥ || 98 ||
[Analyze grammar]

rūpadvayayutāstāśca kanyakāstāstadā'bhavan |
kumāryaḥ śatasaṃkhyākā rakṣitā lomaśāśrame || 99 ||
[Analyze grammar]

divyā devyo divyayānaiḥ preṣitā brahmadhāmani |
evaṃ teṣāṃ brāhmaṇānāṃ talayogāt prayoginām || 100 ||
[Analyze grammar]

kṛpayā vai kṛtā muktiḥ pṛthvīgaustu tiro'bhavat |
anādiśrīkṛṣṇanārāyaṇo bālo babhūva ha || 101 ||
[Analyze grammar]

reme rañjanadolāyāṃ kanyakābhiḥ sulālitaḥ |
āveditaṃ gosvarūpapṛthivyā tatra cotsave || 102 ||
[Analyze grammar]

mātre pitre kanyakābhyo jñātaṃ kṛṣṇasya ceṣṭitam |
mayā te kathitaṃ rādhe pāṭhe śrave'pi muktidam || 103 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne bālakṛṣṇasya dvitīyamāsārambhe kṣīrapānotsave naikarūpairdivyagavāṃ dugdhapānaṃ gorūpadhāriṇāṃ kapaṭināṃ rākṣasānāṃ patnīnāṃ gorūpāṇāṃ saprāṇadugdhadhāvane nāśo muktiśca bhagavatā kṛtetyādinirūpaṇanāmā'ṣṭamodhyāyaḥ || 8 ||
[Analyze grammar]