Chapter 7

śrīkṛṣṇa uvāca |
śrūyatāṃ ca tvayā rādhe kṛṣṇakāntasya cādbhutam |
camatkāraṃ dvādaśe'hni preṃkhāyāṃ yo vyajāyata || 1 ||
[Analyze grammar]

gopālakṛṣṇako devo nāmakaraṇake dine |
putrasyārthe śubhāṃ dolāṃ kārayāmāsa candanaiḥ || 2 ||
[Analyze grammar]

mṛdulāṃ śāyanīṃ śayyāṃ klṛptayāmāsa tatra ca |
sadratnasāramauktikahīrakādisamañcitām || 3 ||
[Analyze grammar]

svarṇadarpaṇaśobhāḍhyāṃ dhāmacitrāpyalaṃkṛtām |
svarṇamayūrakīrādyaiḥ śobhitāṃ sucatuṣpadām || 4 ||
[Analyze grammar]

caturgāruḍamūrtisthāṃ caturhaṃsamukheṣu ca |
hīrasūtrālambitāṃ ca mauktikadaṇḍikāśritām || 5 ||
[Analyze grammar]

sukhasparśakusumānāṃ divyavallīcatuṣṭayām |
pīyūṣakiraṇasrāvimadhyavitānachatritām || 6 ||
[Analyze grammar]

naisargā'nilayogena veṇugītimanoharām |
vinaivākarṣaṇaṃ bālecchayā rakṣitasañcarām || 7 ||
[Analyze grammar]

kvacidvyomni kvacidbhūmau kvacinnimnāṃ kṣitispṛśām |
kvacidūrdhvāṃ ca dhavalāṃ kvacitsuvarṇarūpiṇīm || 8 ||
[Analyze grammar]

kvacidāndolanaṃ yāti kvacit svabhāvataḥ sthirā |
kāmāvasāyitāyuktāṃ prāptisiddhisamanvitām || 9 ||
[Analyze grammar]

evaṃvidhāṃ śubhāṃ dolāmupaskaravilāsitām |
viśvakarmāṇamāhūya kārayāmāsa vai pitā || 10 ||
[Analyze grammar]

nāmavidhānadivase kṣaṇe śreṣṭhe hariṃ sutam |
preṃkhāmārohayanyātā putraṃ prākśirasaṃ prabhum || 11 ||
[Analyze grammar]

śobhitāyāṃ tu dolāyāmasvāpayatpumuttamam |
atha dolā nūtanāśca devā nītvā samāyayuḥ || 12 ||
[Analyze grammar]

anādiśrīkṛṣṇanārāyaṇasya śayanāya vai |
rādhe yayitha tatra tvaṃ preṃkhāṃ golokajāṃ parām || 13 ||
[Analyze grammar]

divyāṃ nītvā mahāmūlyāṃ vimānavaraśobhitām |
lakṣmīstatrā''jagāmā'pi preṃkhāṃ vaikuṇṭhajāṃ śubhām || 14 ||
[Analyze grammar]

divyāṃ vibhūtitattvāḍhyāṃ vyomamārgasthirāṃ parām |
akṣarasya tathā patnyaḥ preṃkhāṃ paramaśobhanām || 15 ||
[Analyze grammar]

divyasiṃhāsanākārāṃ samādāya dadustadā |
īśvaryaśca mahāviṣṇuvairājapatnikāstathā || 16 ||
[Analyze grammar]

brahmaviṣṇumaheśānāṃ patnyo vai divyaśobhanāḥ |
preṃkhā dadurhi vividhā bālakṛṣṇāya tāḥ striyaḥ || 17 ||
[Analyze grammar]

catuṣkoṇā vartulāśca kamalākāranirmitāḥ |
matsyākārāḥ kūrmākārāḥ śaṃkhākārāstathā śubhāḥ || 18 ||
[Analyze grammar]

hastyākārā ghoṭikāśca paryaṃkikāśca khaṭvikāḥ |
dolākārāścaikastambhā dvistambhā bahupādikāḥ || 19 ||
[Analyze grammar]

cakrādhārāḥ padādhārā dāravīḥ svarṇanimitāḥ |
rājatīstaijasīścāpi cāndrīrmāṇikyamauktikīḥ || 20 ||
[Analyze grammar]

śacī tatra samāyātā caikaśṛṃkhalayā'nvitām |
dhruvākarṣaṇakādhārā'ntarīkṣasthāyinīṃ śubhām || 21 ||
[Analyze grammar]

āndolanikāṃ nītvaiva vajrasāramayīṃ parām |
dadau ca kambharādevyai pārijātasugandhinīm || 22 ||
[Analyze grammar]

amṛtasrāviṇīṃ bhadrāṃ vimānavad vihāriṇīm |
tārā ca rohiṇī menā siddhirvasundharā satī || 23 ||
[Analyze grammar]

vividhāścānayāmāsuḥ preṃkhāḥ kṛṣṇamanoharāḥ |
divyadravyasamopetā divyasaṃkalpajāstathā || 24 ||
[Analyze grammar]

yatraikaike pradeśe vai svargaṃ vaikuṇṭhamityapi |
golokaṃ cākṣaraṃ dhāma dṛśyate bhūmimaṇḍalam || 25 ||
[Analyze grammar]

yatraikaikamaṇau tatra sasāgaravanānvitā |
kṣitiḥ sandṛśyate tatra mervādyāḥ parvatāstathā || 26 ||
[Analyze grammar]

kvacinmaṇau tadā sūryaḥ kvacinmaṇau sudhākaraḥ |
kvacid vibhāvasurbhāti kvacid vilokyate divam || 27 ||
[Analyze grammar]

kvacid vilokyate satyaloko brahmasabhā tathā |
kutracittu maṇau tatrā''lokyate gopikāgaṇaḥ || 28 ||
[Analyze grammar]

kutracid dṛśyate tatra viśālaṃ rāsamaṇḍalam |
kutracicca maṇau vilokyate sāgarasaptakam || 29 ||
[Analyze grammar]

araṇyāni vilokyante maṇyantare tathā pare |
maṇau cālokyate śubhraṃ nandanaṃ ca vanaṃ mahat || 30 ||
[Analyze grammar]

pātālāni vilokyante cānyeṣu maṇiṣu priye |
kutracit kṣīravārdhiśca kutracinnāgamaṇḍalam || 31 ||
[Analyze grammar]

vimānāni vilokyante sarvaṃ devagṛhādikam |
kutracid dṛśyate dvādaśādhikaṃ śatamuttamam || 22 ||
[Analyze grammar]

paradhāmasthapatnīnāṃ nijasevāparāyaṇam |
saptarṣimaṇḍalaṃ dhruvamaṇḍalaṃ ca grahādikam || 33 ||
[Analyze grammar]

āścaryāṇi vilokyante hīrakeṣu tu keṣucit |
udyānāni vilokyante keṣucid vimalāni vai || 34 ||
[Analyze grammar]

ityevaṃ divyatāyuktapreṃkhāścādāya yoṣitaḥ |
samāyātā dadustāśca bālakṛṣṇārthameva tāḥ || 35 ||
[Analyze grammar]

cāraṇyaścāpi gāndharvyaḥ kinnaryaścāpi kanyakāḥ |
nṛtyagītiparāḥ kṛṣṇapreṅkhādānārthamāyayuḥ || 36 ||
[Analyze grammar]

kambharāyai dadustāśca gopyo daduśca khaṭvikāḥ |
mānavyo'pi dadustasyai samāndolanaghoṭikāḥ || 37 ||
[Analyze grammar]

hīraraśmisamāyuktāḥ kiṃkiṇījālarāvitāḥ |
vādyamiṣṭasvaraśrāvāḥ vastragranthanakāritāḥ || 38 ||
[Analyze grammar]

evamāsādya sā mātā prasannā'ti babhūva ha |
kṛṣṇastāsu ca sarvāsu yugapatkṛtaketanaḥ || 39 ||
[Analyze grammar]

yāvatsaṃkhyāśca tā dolāstāvadrūpadharo hariḥ |
bālarūpaḥ svayamāndolanaṃ cakre hasan muhuḥ || 40 ||
[Analyze grammar]

dṛṣṭvā cainaṃ camatkāraṃ mahāścaryaplutāḥ striyaḥ |
kṛṣṇaṃ kāntaṃ hṛdi kṛtvā dadhyū rūpaṃ patiṃ prabhum || 41 ||
[Analyze grammar]

akṣarādhipatiḥ śrīmānanādirbhagavānayam |
sarvāsāṃ kāmanāpūrṇakaraḥ kā citratā'tra vai || 42 ||
[Analyze grammar]

tadā taṃ paramabrahma dṛṣṭvā tejasvinaṃ harim |
premapūrṇahṛdayāstāḥ svasvapālanagaṃ prabhum || 43 ||
[Analyze grammar]

āndelayitvā gṛhṇanti yāvad rāmayituṃ harim |
tāvad dolānaddhamaṇiṣvanekarūpatāṃ gataḥ || 44 ||
[Analyze grammar]

pratyekāyāṃ ca dolāyāṃ bahurūpamayaṃ prabhum |
vilokya yāvad gṛhṇāti pratibimbaṃ ca tad bhavet || 45 ||
[Analyze grammar]

naiva hastagataḥ kṛṣṇo bhavatyāścaryakārakaḥ |
tadā nivṛttimāpannā jaḍeva tiṣṭhati priyā || 46 ||
[Analyze grammar]

evaṃ sarvāsu dolāsu bahurūpaṃ hariṃ ca tāḥ |
agṛhṇantyo'bhavanmugdhāḥ kathaṃ kṛṣṇo na labhyate || 47 ||
[Analyze grammar]

tadā tu lalitā lakṣmīḥ prabhā pāravatī jayā |
māṇikyā nityayoginyastāsāṃ pratyayahetave || 48 ||
[Analyze grammar]

sarvābhyaḥ prāha śṛṇuta bhaginyaḥ satyamādhavam |
grahītuṃ cecchatha yadi vadāma pratyayaṃ hareḥ || 49 ||
[Analyze grammar]

tasya dakṣe kare santi mīnaśūladhanurdhvajāḥ |
bimbe dakṣakare te syuḥ pratibimbe tu vāmake || 50 ||
[Analyze grammar]

sacihnaṃ vāmahastaṃ mā spṛśata pratibimbakam |
sacihnadakṣahastaṃ taṃ gṛhṇata śrīharim ṛtam || 51 ||
[Analyze grammar]

ityuktāstāstathā dhṛtvā samuttolya pareśvaram |
hasanti hāsayanti śrīkāntaṃ kaṭyāṃ niṣādya ca || 52 ||
[Analyze grammar]

cūmbayitvā prabhuṃ kṛṣṇaṃ bālaṃ kāntaṃ punaḥ punaḥ |
karatalayordolāvat kṛtvā tvāndolanaṃ muhuḥ || 53 ||
[Analyze grammar]

utkṣepayitvā gṛhṇanti rāmayanti sma tatparāḥ |
evamānandamāsādya cakrurdolāgataṃ harim || 54 ||
[Analyze grammar]

tāvadrūpāṇi saṃhṛtya tvekarūpo'bhavatprabhuḥ |
riktā dolāśca yā jātāstāśca tābhyaḥ prasādajāḥ || 55 ||
[Analyze grammar]

kambharāśrīrdadau sarvāḥ pratyarpaṇavidhānataḥ |
ekā preṃkhā'kṣararūpā gopālakṛṣṇakāritā || 56 ||
[Analyze grammar]

bālayuktā śiṣyate sma cāndanī dāravī śubhā |
tāstu prasādarūpāśca divyāḥ preṃkhāḥ supāvanīḥ || 57 ||
[Analyze grammar]

gṛhītvā kanyakā devya īśānyo harṣamāgatāḥ |
athaikā taladaityasya siṃhāraṇyanivāsinaḥ || 58 ||
[Analyze grammar]

putrī kanyā talājākhyā talaparvatavāsinī |
āgatā cotsavaṃ śrutvā kṛtvā rūpadvayaṃ tadā || 59 ||
[Analyze grammar]

ekā sā kanyakārūpā yathendrasya kumārikā |
sarvāvayavaśobhāḍhyā divyarūpavilāsinī || 60 ||
[Analyze grammar]

sarvabhūṣaṇasaṃśobhatsvarṇavastrādidhāriṇī |
divyahastisamārūḍhā divyāmbālikasaṃsthitā || 61 ||
[Analyze grammar]

dvitīyaṃ cākarod rūpaṃ dolākhyaṃ bahuhīrakam |
bahucitrasamāyuktaṃ bahuratnasumauktikam || 62 ||
[Analyze grammar]

asaṃkhyamālikāhāraśakuntavrātaśobhitam |
antarīkṣagatau dīpau vidyete cordhvayāyinau || 63 ||
[Analyze grammar]

tadādhārā ca sā preṃkhā nirādhārā'ntarīkṣagā |
dīpoṣmakṛtasañcārā divyakauśeyagendukā || 64 ||
[Analyze grammar]

evaṃvidhā ca kamalapuṣpākārā suvartulā |
madhyaklṛptasuśayanā komalā kṣīravarṇagā || 65 ||
[Analyze grammar]

talājayā'vatīryaiva hastito bhūtalaṃ prati |
vyomacārā tu sā dolā śanaiśca karaceṣṭayā || 66 ||
[Analyze grammar]

apyavatāritā bhūmau tathāpi sā tadā'mbare |
hastamātraṃ bhuvastūrdhvaṃ sthirā'bhavanna bhūgatā || 67 ||
[Analyze grammar]

evaṃvidhāṃ śubhāṃ dolāṃ dṛṣṭvā devastriyastadā |
mumuhuśca jahṛṣuśca praśaśaṃsuḥ punaḥ punaḥ || 68 ||
[Analyze grammar]

talājā tu hariṃ kṛtvā kuṃkumā'kṣatapūjitam |
arpayāmāsa dolāyāṃ kambharāsannidhau sthitā || 69 ||
[Analyze grammar]

hariṃ ca cāndanīdolāsuptaṃ dhṛtvā śanaiḥ śanaiḥ |
svadolāyāṃ dhṛtavatī manomālinyasaṃbhṛtā || 70 ||
[Analyze grammar]

talena preṣitā śatruṃ kṛṣṇaṃ mārayituṃ tathā |
tādṛgrūpadharā duṣṭā preṃkhāsthaṃ bālakaṃ śanaiḥ || 71 ||
[Analyze grammar]

uttolya vyomamārgeṇa śīghraṃ dudrāva cāmbare |
aṣṭayojanadūraṃ sā gatā'raṇyaṃ nijāśramam || 72 ||
[Analyze grammar]

hariṇaiṣā ca viditā hantumicchāvatī tadā |
talājāyā gahvare sa prabhuścaturbhujo'bhavat || 73 ||
[Analyze grammar]

dvitīyaṃ bālarūpaṃ ca kuṃkumavāpikāgatām |
āśritya cāndanīṃ dolāṃ vartate cetyadarśayat || 74 ||
[Analyze grammar]

tatra devyo rāmayanti dolāyāṃ parameśvaram |
yato nā'sāṃ bhavecchokaḥ preṃkhotsave tathā'karot || 75 ||
[Analyze grammar]

śaṃkhacakragadāpadmadharo'pi bālarūpavān |
atyujjvalaḥ sa bhagavān hāsayāmāsa rākṣasīm || 76 ||
[Analyze grammar]

hāsyairvividhaiśceṣṭābhirbālakampanakaistadā |
candratulyaṃ hariṃ dṛṣṭvā sā tu mumoha rākṣasīm || 77 ||
[Analyze grammar]

mārayituṃ mayā''nīto bālo'yaṃ komalāṃgakaḥ |
kathamenaṃ mārayāmi rāmayituṃ suyogyakam || 78 ||
[Analyze grammar]

na cāyaṃ mārayitavyo rāmayitavya eva ha |
vṛddhiṃ gato mama svāmī bhaviṣyati yuvā dṛḍhaḥ || 79 ||
[Analyze grammar]

iti sā cintayitvaiva gahvare śayane śubhe |
phalaiḥ sumadhubhiścainaṃ rasairdugdhādibhiḥ sadā || 80 ||
[Analyze grammar]

poṣayati sma tatraiva rakṣati smāti nityadā |
bālo'pi ceṣṭate nityaṃ yathā sā rañjitā bhavet || 81 ||
[Analyze grammar]

kṛṣṇapatitvasaṃkalpaḥ puṇyaṃ tasyāstadā'bhavat |
tena śuddhāṃ nijabhaktāṃ matvā kṛṣṇanarāyaṇaḥ || 82 ||
[Analyze grammar]

pāpinyāḥ sevayā pāpadhvaṃsaṃ cakāra mādhavaḥ |
sevāṃ jagrāha satataṃ premadugdhaṃ papau muhuḥ || 83 ||
[Analyze grammar]

evaṃ dināṣṭakaṃ yātaṃ talaḥ pratīkṣate sutām |
anāyātāṃ tadā'raṇye talasyā''śramamityataḥ || 84 ||
[Analyze grammar]

jñātavān sa mṛtā seti yadvā kṛṣṇagṛhe sthitā |
yadvā'nyena valiṣṭhena dharṣitā ca hṛtā ca vā || 85 ||
[Analyze grammar]

mārgayāmīti kṛtvaivā''śramaṃ tyaktvā vanaṃ vanam |
vṛkṣaṃ śṛṃgaṃ talaṃ cādriṃ paśyan yāti yadā tadā || 86 ||
[Analyze grammar]

dṛṣṭavān pādavinyāsān gahvarasya mukhe striyāḥ |
āhvayāmāsa tāṃ nāmnā sā śratvā bhayamāgatā || 87 ||
[Analyze grammar]

māraṇārthaṃ mayā''nīto rakṣyate ceti kāraṇāt |
pitā māṃ krodhamāpanno sabālāṃ mārayiṣyati || 88 ||
[Analyze grammar]

iti sā bhayamāpannā tuṣṭāva maunamāsthitā |
kṛṣṇaṃ caturbhujaṃ kāntaṃ sarvayā śaraṇāgatā || 89 ||
[Analyze grammar]

rakṣa rakṣa hare kānta parameśvara keśava |
tvayi me mānasaṃ lagnaṃ pitā māṃ ghātayiṣyati || 90 ||
[Analyze grammar]

iti stutvā ca taṃ bālaṃ kṛtvā vakṣasi bhāminī |
aśrupātaṃ cakārā'tha kṛṣṇo yuvā dṛḍho'bhavat || 91 ||
[Analyze grammar]

puṣṭo dānavanāśārthaṃ dhṛtacakro babhūva ha |
talājā taṃ vilokyaiva kṣaṇaṃ cucumba taṃ patim || 92 ||
[Analyze grammar]

bhagavāṃstu kṣaṇānandaṃ dattvā divyāṃ vidhāya ca |
kṛtvā līnāṃ nijadehe śyāmarūpo babhūva ha || 93 ||
[Analyze grammar]

ājagāma guhāyāstu bahiryatra talaḥ sthitaḥ |
talo gadāyutaścāpi jīvane śaṃkito'bhavat || 94 ||
[Analyze grammar]

śaṃkhaṃ dadhmau haristatra talo dudrāva bhītitaḥ |
pṛthivyantastale līno'bhavat tatra haristadā || 95 ||
[Analyze grammar]

tyaktvā taṃ ca svayaṃ kanyāyutaḥ kuṃkumavāpikām |
samājagāma satataṃ lomaśasyā''śrame hariḥ || 96 ||
[Analyze grammar]

vidhāya kanyakārūpadvayaṃ caikāṃ tadaiva saḥ |
haṃsayānena ca naijaṃ dhāma cāpreṣayat priyām || 97 ||
[Analyze grammar]

dvitīyaṃ kanyakārūḥpa lājākhyaṃ samarakṣayat |
lomaśasyā''śrame cānyakanyābhiḥ samameva saḥ || 98 ||
[Analyze grammar]

kṛṣṇārpaṇaṃ gatā sā ca talājā divyarūpiṇī |
lājārūpābhavat sarvapūjāyāṃ maṃgalātmikā || 99 ||
[Analyze grammar]

śrīhariṃ lājayā nityaṃ vardhayanti surastriyaḥ |
evaṃ talājā preṃkhā sā lājārūpā'bhavattathā || 100 ||
[Analyze grammar]

preṃkhārūpā tathā cāste kṛṣṇasyā'nugrahāt sadā |
kanyārūpā kṛṣṇapatnī kumārikādiṣu sthitā || 101 ||
[Analyze grammar]

tathā divyasvarūpā ca pare dhāmni virājate |
kṛṣṇanārāyaṇayogāccaturdhārūpadhāriṇī || 102 ||
[Analyze grammar]

anādiśrīkṛṣṇanārāyaṇasevāsthitā'bhavat |
lājā preṃkhā kanyakā ca muktarūpetibhāminī || 103 ||
[Analyze grammar]

yathā gaṃgāmbuno yogād rathyāmbu yāti gāṃgatām |
tathā'nādikṛṣṇayogād rākṣasī yāti muktatām || 104 ||
[Analyze grammar]

kimatra tu mahāścaryaṃ rādhe vadāmi vai hareḥ |
tvādṛśī sā hareḥ patnī vivāhena bhaviṣyati || 105 ||
[Analyze grammar]

atha śrībhagavān mātṛsannidhau bālake punaḥ |
bālarūpaḥ samāgatya cāntarlīno'bhavattadā || 106 ||
[Analyze grammar]

talājayedaṃ kathitaṃ lomaśāya maharṣaye |
lomaśena ca kathitaṃ pitṛbhyāṃ daivataṃ ca tat || 107 ||
[Analyze grammar]

sarvairjñātaścamatkāro yāte dināṣṭake tadā |
menire te mahāścaryaṃ śāntipāṭhān pracakrire || 108 ||
[Analyze grammar]

athotsave samāyātā devā devyaśca bhojitāḥ |
vanditāścā'rpitā dānairgamitāḥ śaṃ nijagṛhān || 109 ||
[Analyze grammar]

trayodaśe dine gatvā gṛhānaṣṭadinottaram |
jñātvā kṛṣṇapratāpaṃ ca camatkārabharaṃ param || 110 ||
[Analyze grammar]

paramparayā te devā devyo mumudurāntare |
nemuḥ prasasmaruḥ svāmikṛṣṇanārāyaṇaṃ hṛdi || 111 ||
[Analyze grammar]

ityevaṃ kathito rādhe preṃkhotsavo mahān śubhaḥ |
camatkāraśca kathitaḥ śrotṛvaktroḥ pramuktidaḥ || 112 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne śrīkṛṣṇanārāyaṇaprabhoḥ preṃkhā''rohaṇotsave talaputryāstalājārākṣasyāḥ kāpaṭyenā''gatāyā api harau mohitāyā muktyādicamatkāravarṇananāmā saptamo'dhyāyaḥ || 7 ||
[Analyze grammar]