Chapter 6

śrīkṛṣṇa uvāca |
śṛṇu tvaṃ rādhike'nādikṛṣṇanārāyaṇasya vai |
prāpte tvekādaśe cāhni lomaśādyā maharṣayaḥ || 1 ||
[Analyze grammar]

śīlavratāḥ sādhavaśca brahmavidyāparā janāḥ |
pitrā''hūtā āyayuste kṛṣṇanārāyaṇagṛham || 2 ||
[Analyze grammar]

nāmakaraṇasaṃskāraṃ cakruste tu vidhānataḥ |
ādyaṃ grahārcanaṃ cakrurdevatāpūjanādikam || 3 ||
[Analyze grammar]

gāṇeśārcanamīśādipūjanaṃ cakrurādarāt |
mātṛkāpūjanaṃ cārṣaṃ pūjanaṃ cakrurīśvarāḥ || 4 ||
[Analyze grammar]

ūrjā'ṣṭamyāṃ kṛṣṇapakṣe mithune candrake sthitau |
janmā'sya tena nāmā'sya kṛṣṇanārāyaṇeti hi || 5 ||
[Analyze grammar]

yasya nā''dirnacaivā'nto'nādinārāyaṇastataḥ |
avatārapatiḥ so'yamavatārī nigadyate || 6 ||
[Analyze grammar]

sarvaduḥkhaharaścā'yaṃ harirityabhidhīyate |
duḥkhānāṃ karṣaṇāt kṛṣṇo narasthatvānnarāyaṇaḥ || 7 ||
[Analyze grammar]

nārastho'sti yataścā'yaṃ nārāyaṇo'pi gadyate |
akṣarādhipatiścā'yamakṣarātīta ucyate || 8 ||
[Analyze grammar]

puruṣeṣūttamaścāyaṃ puruṣottama ucyate |
puṃsāmuttama evā'yaṃ pumuttamaḥ sadocyate || 9 ||
[Analyze grammar]

bṛhatvād vyāpakatvācca paratvāt sarvatastathā |
parabrahmetyabhidhānaṃ kṛṣṇavallabhate yataḥ || 10 ||
[Analyze grammar]

śriyā juṣṭaḥ sadā tasmācchrīkṛṣṇavallabhaḥ svayam |
īśvarāṇāmīśvaro'sti parameśvara ucyate || 11 ||
[Analyze grammar]

māyānāmīśvaraścāyaṃ dhavo mādhava ucyate |
sarvātmanāmataṃ svāmī svāminārāyaṇo yataḥ || 12 ||
[Analyze grammar]

ghanaśyāmastathā chatraśālyācāryo'sti sarvadā |
jayāramālalitāmāṇikyālakṣmīpatiḥ prabhuḥ |
prabhāpāravatīmaṃjūhaṃsāsaguṇikāpatiḥ || 13 ||
[Analyze grammar]

dvādaśottaraśatasurājñīnāṃ parameśitā |
anyāsāṃ koṭyarbudānāṃ patiścāyaṃ bhaviṣyati || 14 ||
[Analyze grammar]

asya haste dhanurmatsyo dhvajaḥ svastirvirājate |
vajraṃ śarastriśūlaṃ ca pādayoḥ śikharādikam || 15 ||
[Analyze grammar]

ṣoḍaśānāṃ ca cihnānāṃ rekhāḥ santi śubhāḥ sphuṭāḥ |
lalāṭe kānakī rekhā tilakasya virājate || 16 ||
[Analyze grammar]

netrakoṇeṣu ca raktā rekhāḥ santi vimohikāḥ |
ākarṇānte tathā netre candrakoṭyānanojjvalaḥ || 17 ||
[Analyze grammar]

oṣṭhau svabhāvato raktau kaṇṭhe tilaśca vartate |
vakṣasi cāsya romṇāṃ ca dakṣāvarto'pi vartate || 18 ||
[Analyze grammar]

kānakī ca śubhā lakṣmīrekhā maṇipralekhikā |
asūtrahāraḥ sauvarṇo vartate hṛdaye'sya ca || 19 ||
[Analyze grammar]

nakhāścandrasamāḥ santi karapādatalāni tu |
padmagarbhanibhānyeva catuścakrāṇi santi ca || 20 ||
[Analyze grammar]

śaṃkhacihnaṃ svakaṃ cāsya vartate śobhanaṃ hareḥ |
sakthimūle kṣatacihaṃ vartate vāmasaṃjñite || 21 ||
[Analyze grammar]

vāmajānvopari sakthni pāṇḍuraścandramā api |
vartate koṭipatnīnāṃ svāmitvabodhako hi saḥ || 22 ||
[Analyze grammar]

jaghane nābhyadhobhāge strīcihnaṃ cāsya vartate |
ardhanārīśvaraścāyaṃ patipatnīsvarūpavān || 23 ||
[Analyze grammar]

ājānulambabhūjau ca vartate'sya prabhostathā |
ghūṭikātrayamastasya pratyeke caraṇe'sti vai || 24 ||
[Analyze grammar]

dakṣiṇe sakthini madhye rathacihnaṃ hi vartate |
garuḍastiṣṭhati tatra rekhayā'to narāyaṇaḥ || 25 ||
[Analyze grammar]

sahasrabhujavānnā'yaṃ bhavatyeva pareśvaraḥ |
liṃge cāsyopari cāste tilaḥ kṛṣṇo hi pārśvake || 26 ||
[Analyze grammar]

vāme sakthimūlake ca tato'sau vīryavān bahu |
catvāraścāsya vṛṣaṇā dvau pārśve dvāvadhaḥsthitau || 27 ||
[Analyze grammar]

tato'sau koṭinārīṇāṃ tṛptido'skhalito balī |
asyodare tu nābhervai hyupari kuṃbhalekhikā || 28 ||
[Analyze grammar]

vidyate kuṃbhavad rekhā prāṇāyāmanirodhikā |
tato'sau yogirāṭ naikarūpadhārī bhavedapi || 29 ||
[Analyze grammar]

netre'sya cāndhakāre'pi sūryavattu prakāśate |
tato'sau divyadarśī ca vartate parameśvaraḥ || 30 ||
[Analyze grammar]

jihvāgraṃ raktamasyā'sti liṃgāgraṃ raktamityapi |
aṃgulyagrāṇi raktāni vidyante'sya svabhāvataḥ || 31 ||
[Analyze grammar]

tataścāyaṃ bhaved rājādhirājaḥ parameśvaraḥ |
romāgrāṇi svarṇavarṇasamānāni laghūni ca || 32 ||
[Analyze grammar]

prakāśante cāndhakāre vidyullatā yathā sthitāḥ |
tato'sau paradhāmastho bhagavān puruṣottamaḥ || 33 ||
[Analyze grammar]

danteṣvasya ca dhāvalyaṃ camatkṛtikaraṃ tathā |
kāntipradaṃ ca hāsyādau dṛśyate'to narāyaṇaḥ || 34 ||
[Analyze grammar]

paśya gopālakṛṣṇa'sya bāhvormūle karāvubhau |
svarṇarekhāmayau divyau rājete'to narāyaṇaḥ || 35 ||
[Analyze grammar]

ujjvalā trivalī cāsya madhyanābhau pravartate |
lalāṭaṃ connataṃ netre dīrghe nāsāgravakratā || 36 ||
[Analyze grammar]

vidyate dantakalikāḥ samānāḥ pūrṇasaṃkhyayā |
sugandhaścāsya ca pārijātakusumavat sadā || 37 ||
[Analyze grammar]

mūrtau saṃvartate śvāse kaisaro vāsa ityapi |
svede śaityaṃ ca dhāvalyaṃ nairmalyaṃ ca sugandhitā || 38 ||
[Analyze grammar]

mehanādāvapi cāsya daurgandhyaṃ na manāgapi |
aujjvalyaṃ cāntare bhāge kukṣau kukṣau ca raktatā || 39 ||
[Analyze grammar]

śyāmatā romamadhyeṣu kṛṣṇatā mūlakeṣu ca |
vakratā nāḍikāḥ śyāmā raktāḥ piśaṃgikāstathā || 40 ||
[Analyze grammar]

marmāṇi dhavalānyasya ramyatā ca manoharā |
sthalapadmasamaṃ cāsya saukumāryaṃ pravidyate || 41 ||
[Analyze grammar]

vāṇī vedamayī gītiḥ svarā ghoṣāśca śāradāḥ |
sarvajñānanidhiścāyaṃ paramātmā pareśvaraḥ || 42 ||
[Analyze grammar]

nāmānyasya tvanantāni guṇāścā'saṃkhyakāstathā |
aiśvaryāṇyapyanantāni gaṇanārahitāni vai || 43 ||
[Analyze grammar]

anādiśrīkṛṣṇanārāyaṇo'yaṃ sarvadā bhuvi |
khyātimāpsyati ṛṣibhiḥ saṃhitābhiśca sarvathā || 44 ||
[Analyze grammar]

kathābhirbahubhiścāpi patnīnāṃ cārbudaistathā |
avatārairanekaiśca kāryaiścamatkaraistathā || 45 ||
[Analyze grammar]

evamuktvā virarāma lomaśo munisattamaḥ |
ṛṣayo'pi tadā cānye śubhāśīrvādamādaduḥ || 46 ||
[Analyze grammar]

kumārikā api kāntaṃ sevayāmāsurutsukāḥ |
atha nāmāni ca pitā śrāvayāmāsa cā'cyutam || 47 ||
[Analyze grammar]

vādyāni vādayāmāsurgāpayāmāsuruttamāḥ |
gītikā nartayāmāsurnṛtyavetryaḥ satālikāḥ || 48 ||
[Analyze grammar]

vardhayāmāsurāśīrbhirdevyaḥ sarvabhuvāṃ tadā |
ramayāmāsuratyarthaṃ kṛṣṇanāmamahotsave || 49 ||
[Analyze grammar]

prajā janāśca bhojyāni bhojayāmāsuratyati |
dadau dānāni ca tadā śrīmān gopālakṛṣṇakaḥ || 50 ||
[Analyze grammar]

pūjayāmāsurīśāścā'nādikṛṣṇanarāyaṇam |
upāyanāni ca daduḥ svargadhāmā'bhijāni ca || 51 ||
[Analyze grammar]

evaṃ nāmavidhaṃ kṛtvā lomaśādyā yayurgṛhān |
devāḥ sarve yathāsthānaṃ yayuḥ prajājanā yayuḥ || 52 ||
[Analyze grammar]

śṛṇvatra rādhike nāmamahotsave'suro mahān |
draṣṭuṃ devaṃ samāyāto vyāghrāraṇyanivāsakṛt || 53 ||
[Analyze grammar]

sāṇanāmā'suro girergahvare kṛtaketanaḥ |
yatra sāṇo vasatyeva girayo'pi tadā ca te || 54 ||
[Analyze grammar]

sāṇasya girayaścaivaṃ khyātimāptāstadā'bhavan |
sāṇo'yaṃ tu purotpanno hiraṇyāṇḍasya mehataḥ || 55 ||
[Analyze grammar]

asurasya mṛteḥ kāle saṃkarṣaṇasamīpataḥ |
sa ca vilokya saṃhārakāraṇaṃ karṣaṇaṃ balam || 56 ||
[Analyze grammar]

tuṣṭāva bhayasampannaḥ śaraṇaṃ samiyeṣa ca |
tadā saṃkarṣaṇastaṃ tu jīvanaṃ dānamādadau || 57 ||
[Analyze grammar]

sāṇaḥ pṛthvīṃ khaṇḍabhūtāṃ viyuktāṃ ca vilokya vai |
tatra vāsaṃ tadā kartuṃ cāyayau samaraṇyakam || 58 ||
[Analyze grammar]

araṇyaṃ cāyataṃ vṛkṣān nibiḍān śatayojanam |
vīkṣya tatra śatakrośakṣitau parvatakocchrayān || 59 ||
[Analyze grammar]

sāṇaścakāra vasatiṃ cāsurastatra nirbhayaḥ |
sa ca tatra samāyāto nāmasaṃskārake dine || 60 ||
[Analyze grammar]

yatrā'nādiḥ prabhuḥ kṛṣṇanārāyaṇo gṛhe'sti vai |
sāṇo viprasvarūpeṇa cāgatya prāpya bhojanam || 61 ||
[Analyze grammar]

dakṣiṇāṃ vividhāṃ nītvā yayau sāṇādrigahvaram |
dvādaśe divase tasya matirjātā'titāmasī || 62 ||
[Analyze grammar]

sasmāra pitṛvairaṃ ca mārakaṃ bālakaṃ ca tam |
saṃkarṣaṇātmakaṃ nārāyaṇaṃ niścitya mādhavam || 63 ||
[Analyze grammar]

astraśastrāṇi nītvaiva sannaddhaścāgato'suraḥ |
kṛṣṇaṃ nāśayituṃ rādhe vairiṇaṃ bālarūpiṇam || 64 ||
[Analyze grammar]

divā vipro hi sa bhūtvā'tithirūpeṇa vartate |
mārgayan hartumevainaṃ chidraṃ dine na labdhavān || 65 ||
[Analyze grammar]

ṣaṣṭhīkanyāḥ kumāryastāḥ saṃbhūya kāntamacyutam |
rāmayanti ramayanti ramante smā'virāmataḥ || 66 ||
[Analyze grammar]

rātrau tāstaṃ vihāyaiva lomaśasyā''śramaṃ yayuḥ |
tadā chidraṃ paraṃ prāpya vyāghrarūpadharo'suraḥ || 67 ||
[Analyze grammar]

rātryardhe vigate bālaṃ bhakṣituṃ krūrarūpavān |
krūrakarmā krūranetraḥ krūrarāvo'bhavatkṣaṇam || 68 ||
[Analyze grammar]

sūtikāgṛhamāgatya garjanāṃ pracakāra ha |
cakārā'nyā garjanāśca vanaṃ kampayutaṃ tadā || 69 ||
[Analyze grammar]

bhūḥ sarvā kampitā lokāstrāsaṃ yayuśca vihvalāḥ |
mātā ca vihvalā trastā pitā bhītiṃ jagāma ha || 70 ||
[Analyze grammar]

janā vyāghrabhayāttatra nililyuśca gṛheṣvapi |
hāhāvyākrośa evā''sīt kṛṣṇaśayyāsthale tadā || 71 ||
[Analyze grammar]

aho vyāghro vanād yāto mṛtyurūpo'rbhakasya vai |
rakṣantu devatā devaṃ devyaśceti jagurjanāḥ || 72 ||
[Analyze grammar]

anādiśrīkṛṣṇanārāyaṇaṃ rakṣantu rakṣakāḥ |
iti mātā'vadattatra sākrośaṃ vai muhurmuhuḥ || 73 ||
[Analyze grammar]

vyāghrastāvatsamutplutya sūtikāśayanaṃ dadau |
bālaṃ kareṇa jighṛkṣuryāvad yatate śvāpadaḥ || 74 ||
[Analyze grammar]

tāvat kṛṣṇo'bhavattatra kiśoraḥ sasudarśanaḥ |
mātā mūrchāṃ gatā vīkṣya matvā vyāghrahṛtaṃ sutam || 75 ||
[Analyze grammar]

sudarśanaṃ paraṃ cakraṃ kṛṣṇanārāyaṇena vai |
aṅgulimadhyato muktaṃ vahnivyāptaṃ mahojjvalam || 76 ||
[Analyze grammar]

bhramatsahasrārayukta śatasūryātiśāyi tat |
tadā cogramabhūd vyagraṃ yāvad vyāghraṃ jighāṃsati || 77 ||
[Analyze grammar]

tāvanmṛtyubhayād vyāghraḥ samutplutya gṛhād bahiḥ |
vinipatya pradudrāvā'raṇyaṃ jīvitumutsukaḥ || 78 ||
[Analyze grammar]

cakraṃ pṛṣṭhe tasya lagnaṃ taṃ dadāha punaḥ punaḥ |
kvacitkvacit pṛṣṭhadeśaṃ spṛṣṭvā cakarta bhāgataḥ || 79 ||
[Analyze grammar]

vyāghro nihanyamāno'sau plavate smāti vegataḥ |
ākrośati sma dīnārto vācā bhībhṛtayā tadā || 80 ||
[Analyze grammar]

krośamātraṃ gato yāvad dakṣiṇāṃ diśameva saḥ |
sudarśanena nihataḥ sāṇaḥ savyāghradehabhṛt || 81 ||
[Analyze grammar]

vyāghrahaṇaṃ ca tattīrthaṃ sudarśanakṛtaṃ sthalam |
prakhyātaṃ kuṃkumavāpyā dakṣiṇe'śvasarovarāt || 82 ||
[Analyze grammar]

sāṇo naṣṭo yojanocchraṃ śarīraṃ prājvalattadā |
sudarśanāgninā bhasma jātaṃ puṇyena tena vai || 83 ||
[Analyze grammar]

sāṇātmā tadvinirgatya bhūtvā caturbhujastadā |
divyo vai pārṣado bhakto dhautātmā pāpavarjitaḥ || 84 ||
[Analyze grammar]

anādiśrīkṛṣṇanārāyaṇetimukhato vadan |
sudarśanasya vaśago'nādikṛṣṇaṃ prati drutam || 85 ||
[Analyze grammar]

vyomnā samājagāmātha prabhau vilīnatāṃ gataḥ |
athā'kṣarasya muktāstaṃ netuṃ vimānasaṃsthitāḥ || 86 ||
[Analyze grammar]

āyayuḥ śrīhareḥ kṣetre tadā'yaṃ kṛṣṇamūrtitaḥ |
vinirgatya yayau dhāmā'kṣaraṃ sāṇastu śāśvatam || 87 ||
[Analyze grammar]

sudarśanaṃ tadā śāntaṃ kṛṣṇāṅgulau layaṃ gatam |
anādiśrīkṛṣṇanārāyaṇo'pi nidritaḥ sukham || 88 ||
[Analyze grammar]

anye mātrādayo yoganidrāṃ kṛtvā prage tadā |
vighnaśāntikriyāṃ cakrurlomaśādyā apīśvarāḥ || 89 ||
[Analyze grammar]

vyāghrāsuro hataśceti śrutvā niścikyurīśvaram |
sādhāraṇā janā bālaṃ devāścakruḥ prapūjanam || 90 ||
[Analyze grammar]

śrutvā ca kanyakāḥ sarvā rurudurvighnamulbaṇam |
rakṣaṇaṃ ca balaṃ śrutvā jahṛṣuścāgatāḥ puraḥ || 91 ||
[Analyze grammar]

darśanaṃ ca samācakruḥ kāntasyā'tīva bhāvataḥ |
śubhāśiṣaḥ pradaduśca menire navamāgatam || 92 ||
[Analyze grammar]

pitā vighnasya śāntyarthaṃ homaṃ japaṃ cakāra ha |
sādhvādīṃstarpayāmāsa bhojyānnapānasaddhanaiḥ || 93 ||
[Analyze grammar]

vastrabhūṣādidānāni kanyakābhyo dadau satī |
gobhyo dadau ca ghāsāni miṣṭānnānyapi bhūriśaḥ || 94 ||
[Analyze grammar]

pipīlikādisūkṣmebhyaḥ piṣṭakaṇādikaṃ dadau |
evaṃ śāntiṃ kārayitvā ramayāmāsa mādhavam || 95 ||
[Analyze grammar]

mātā pitā tathā cānyavargaḥ kumārikāgaṇaḥ |
ityetat kathitaṃ rādhe bālakṛṣṇaparākramam || 96 ||
[Analyze grammar]

paṭhanācchravaṇāccāpi mokṣadaṃ svargadaṃ param |
putradaṃ dhanadaṃ smṛddhipradaṃ rogavināśakam || 97 ||
[Analyze grammar]

śokavighnaharaṃ ramyaṃ rakṣākarasukhāvaham |
nārīṇāṃ śokaharaṇaṃ śubhaṃ saubhāgyavardhanam || 98 ||
[Analyze grammar]

avaidhavyakaraṃ kṛṣṇacaritraṃ pāvanottamam |
śrotavyaṃ satataṃ caitadaiśvaryārthibhirādarāt || 99 ||
[Analyze grammar]

ṣaṇmāsābhyantare śroturupatiṣṭhanti siddhayaḥ |
aṇimādyā divyaguṇā divyāḥ samṛddhayastathā || 100 ||
[Analyze grammar]

iti śrīlakṣmīnārāyaṇīyasaṃhitāyāṃ dvitīye tretāsantāne parameśvarasya nāmakaraṇasaṃskāravidhiḥ sāṇā'surasya vyāghrarūpadharasya hariṃ hantumicchataścakreṇa vināśanaṃ śāntikaraṇaṃ cetyādinirūpaṇanāmā ṣaṣṭho'dhyāyaḥ || 6 ||
[Analyze grammar]