Chapter 578

śrīnārāyaṇa uvāca |
śṛṇu lakṣmi kathāṃ tvanyāṃ tīrthānāṃ pāpanāśinīm |
śaṃkaroktāmṛkṣakādrau pārvatyai te vadāmyaham || 1 ||
[Analyze grammar]

gāyamānasya me kṣetre mandire mama sannidhau |
puṇyaṃ vādayamānasya nṛtyato jāgratastathā || 2 ||
[Analyze grammar]

godāturannadātuśca jaladātuśca yatphalam |
mārjayiturlepayiturgandhapuṣpapradāyituḥ || 3 ||
[Analyze grammar]

dhūpadīpasunaivedyapradātuścāpi yatphalam |
japayajñādikartuśca yatphalaṃ caihikaṃ tathā || 4 ||
[Analyze grammar]

pāralaukikamevāpi jāyate tad vadāmi te |
śṛṇu pūrvaṃ khañjarīṭaḥ pakṣī gaṃgātaṭe'bhavat || 5 ||
[Analyze grammar]

kīṭān bahūn prabhuktvā sa hyajīrṇātiprapīḍitaḥ |
gaṃgāyāṃ patitastatra jale mṛtyumupāgataḥ || 6 ||
[Analyze grammar]

tena puṇyena vaiśyasya koṭyadhisvāmino gṛhe |
dhanaratnamahāsmṛddhe'jāyata pravibhaktimān || 7 ||
[Analyze grammar]

mānaṃ karoti satataṃ devāgre mandire mama |
ekakīrtanajaṃ puṇyaṃ saptajanmāghanāśanam || 8 ||
[Analyze grammar]

iti matvā karotyeṣo gāyanaṃ kṛṣṇasannidhau |
dvādaśābde gate varṣe pitarau prāha harṣataḥ || 9 ||
[Analyze grammar]

matpriyaṃ yadi kartavyameko me dīyatāṃ varaḥ |
na cāhaṃ vāraṇīyo vai pitrā mātrā kathaṃcana || 10 ||
[Analyze grammar]

satyaṃ vrataṃ samāsthāya tīrthayātrā mayeṣyate |
śrutvā taṃ pitarau tuṣṭāvūcaturvada cepsitam || 11 ||
[Analyze grammar]

gāvastriṃśatsahasrāṇi sarvā vai śubhadohanāḥ |
yadyatra rocate dānaṃ dehi tvamavicāritam || 12 ||
[Analyze grammar]

lakṣakoṭyātmakaṃ dravyaṃ dāne pradīyatāṃ dhanam |
dhanadhānyāni ratnāni dehi putra hyavāritaḥ || 13 ||
[Analyze grammar]

kanyā vai ramaṇīyāḥ su samudvaha vidhānataḥ |
yajñairyaṣṭaṃ samicchā te yaja devaṃ janārdanam || 14 ||
[Analyze grammar]

yāvadbhojanatṛptān vā sādhūnicchasi tarpitum |
sarvaṃ nijecchayā putra kartumarhasi sāmpratam || 15 ||
[Analyze grammar]

naya sārdhaṃ tvayā putra tīrthayātrākṛte'pi ca |
śubhaṃ vai cintitaṃ putra tīrthaṃ nārāyaṇāśramam || 16 ||
[Analyze grammar]

adya mātṛstanau dhanyau tvayā putreṇa sārthakau |
āyānti ca punaryānti gatā gacchanti cāpare || 17 ||
[Analyze grammar]

dṛśyate ca kṣaṇe naṣṭo punarbhavati naśyati |
tasmādbhaktirharestīrthaṃ kartavyaṃ vai suputrakaiḥ || 18 ||
[Analyze grammar]

mātāpitṛsahasrāṇi putradāraśatāni ca |
janmajanmani vartante kasya te kasya vā vayam || 19 ||
[Analyze grammar]

tasmāt putra tvayā cādya śubhakāryeṇa tāritāḥ |
pitaraḥ pitaraścāpi vayaṃ dhanyāḥ suputrataḥ || 20 ||
[Analyze grammar]

kintu vada viśeṣaṃ ced guptaṃ rahasyamasti cet |
vairāgyaṃ vā gṛhaudāsīnatā te vartate kimu || 21 ||
[Analyze grammar]

guptaṃ cennaiva goptavyaṃ pitarau prati putraka |
iti śrutvā dvayorvākyaṃ natvā prāha śubhaṃ sutaḥ || 22 ||
[Analyze grammar]

tatrā'haṃ kathayiṣyāmi tīrthe śrīharisannidhau |
bāḍhamityeva taṃ putraṃ dampatī procatustadā || 23 ||
[Analyze grammar]

gamane kṛtasaṃkalpā yayuḥ saukaravaṃ prati |
yattu kiṃcidgṛhe cāsti kṛtaṃ nārāyaṇaṃ prati || 24 ||
[Analyze grammar]

vaiśākhadvādaśikāyāṃ tīrthakṣetramupāgatāḥ |
snātāḥ santṛpya viṣṇuṃ vai dadurdānāni bhūriśaḥ || 25 ||
[Analyze grammar]

ṣaṇmāsā vigatāsteṣāṃ kṛṣṇalagnahṛdāṃ tataḥ |
kaumude kārtike śukle hyekādaśyāṃ vratānvitāḥ || 26 ||
[Analyze grammar]

dvādaśyāṃ ca sutaḥ pṛṣṭhaḥ pitṛbhyāṃ smārakaṃ prati |
putrastaccaraṇau spṛṣṭvā pitarau samabhāṣata || 27 ||
[Analyze grammar]

khañjarīṭo hyahamāsaṃ pakṣī cātra sthale purā |
ajīrṇena mṛtastvatra tena puṇyena vāṃ sutaḥ || 28 ||
[Analyze grammar]

jāto'smi bhaktimān jātismaraścā'tha namāmi vām |
prakāśe gopanīyasya mamā''yuryāti pūrṇatām || 29 ||
[Analyze grammar]

gamiṣye bhagavaddhāma gāyamānasya me phalam |
ityuktvā ca jalaṃ pītvā natvā ca pitṛpādayoḥ || 30 ||
[Analyze grammar]

oṃ namaḥ śrīkṛṣṇanārāyaṇāya svāmine svāhā |
ityevaṃ gāyamānaḥ sa bhūtvā divyavapurdharaḥ || 31 ||
[Analyze grammar]

caturbāhuḥ pārṣadaiśca vimāne sandhṛtaśca saḥ |
mukto bhūtvā yayau dhāmā'kṣaraṃ prakṛtipāragam || 32 ||
[Analyze grammar]

tato mātā pitā cānye dṛṣṭvā''ścaryamanuttamam |
te'pi bhaktiṃ parāṃ cakruścānye ye ca samāgatāḥ || 33 ||
[Analyze grammar]

svalpenaiva ca kālena mama muktimupāgatāḥ |
sarve hi yoginastatra dhāmni cotpalagandhinaḥ || 34 ||
[Analyze grammar]

modante tu yathābhāvaṃ prasādāt kṣetrajānmama |
evaṃ vai gāyamānasya muktirbhavati me'nadhe || 35 ||
[Analyze grammar]

śṛṇu tattvena me dehi limpamānasya yatphalam |
mṛttikāyuggomayena mama veśmopalepayet || 36 ||
[Analyze grammar]

nyastāni tatra yāvanti padāni tu vilimpatā |
tāvadvarṣasahasrāṇi divyāni divi modate || 37 ||
[Analyze grammar]

sakāmaśced bhaved rājā divyavarṣasahasrakam |
bhaktau vyavasthitaḥ paścānmama dhāmā'bhigacchati || 38 ||
[Analyze grammar]

samīpe vā yadi dūre gatvā nayati gomayam |
yāvanti tatpadānyasya tāvadvarṣasahasrakam || 39 ||
[Analyze grammar]

gomayānāṃ ca netā sa svargaloke mahīyate |
tataśca rājā bhavati padavarṣasahasrakam || 40 ||
[Analyze grammar]

mama bhaktiṃ sadā kṛtvā tvante maddhāma yāti hi |
upalepane snāne vā salilaṃ yo dadāti saḥ || 41 ||
[Analyze grammar]

yāvanto bindavastatra pānīyasya bhavanti hi |
tāvadvarṣasahasrāṇi svargaloke mahīyate || 42 ||
[Analyze grammar]

tāvadvarṣasahasrāṇi rājā bhūtvā tataḥ param |
māṃ prasādya guṇairbhakto mama dhāmābhigacchati || 43 ||
[Analyze grammar]

sammārjanaṃ mandirasya karoti strī naro'pi vā |
yāvantaḥ pāṃsavo bhūmeruḍḍīyante tu mārjitāḥ || 44 ||
[Analyze grammar]

tāvadvarṣaśatānyāśu svargaloke mahīyate |
tāvadvarṣaśatānyatra rājā bhūtvā tataḥ param || 45 ||
[Analyze grammar]

mama bhaktyā mama dhāma prayāti matsvarūpavān |
gāyanaṃ ye prakurvanti mama sevāparāyaṇāḥ || 46 ||
[Analyze grammar]

pratyakṣaraṃ tu varṣāṇāṃ sahasraṃ divi modate |
sarvasevāguṇayukto nityadā mama pūjakaḥ || 47 ||
[Analyze grammar]

tato bhūmau bhaved rājā vaiṣṇavo vaiṣṇavaiḥ saha |
gāyanmama yaśo nityaṃ bhaktyā paramayā yutaḥ || 48 ||
[Analyze grammar]

matprasādādāyuṣo'nte mama dhāmā'bhigacchati |
cāṇḍālo hyabhavat kaścid vane manmūrtisannidhau || 49 ||
[Analyze grammar]

gāyati sma sadā gītiṃ dūramāgatya caikadā |
dhṛtaḥ sa rakṣasā tūrṇaṃ khādituṃ tu tadā hi saḥ || 50 ||
[Analyze grammar]

uvāca rākṣasaṃ gītyuttaraṃ māṃ khāda nirbharam |
idānīṃ tu kṣaṇaṃ muñca vratapuṇyaṃ karomyaham || 51 ||
[Analyze grammar]

viṣṇorvai toṣaṇārthaṃ ca mayā gītiḥ pragīyate |
jāgaraṃ caryate rātrau prātarbhukṣvā''gataṃ ca mām || 52 ||
[Analyze grammar]

asnātānāṃ gatiṃ yāsye yadyahaṃ nāgame punaḥ |
brahmaghnānāṃ surāpānāṃ stenānāṃ piśitāśinām || 53 ||
[Analyze grammar]

vyavāyināṃ gatiṃ yāsye yadyahaṃ nāgame punaḥ |
śrutvaivaṃ rakṣasā mukto gītiṃ ca jāgaraṃ tathā || 54 ||
[Analyze grammar]

caṇḍālaḥ pracakārā'tha prātarharistu bhūsuraḥ |
bhūtvā samāyayau prāha mā gaccha rākṣasaṃ prati || 55 ||
[Analyze grammar]

jivitārthāya satyasya tyajane dūṣaṇaṃ na vai |
śrutvā taṃ śvapacaḥ prāha satyaṃ me niścitaṃ vratam || 56 ||
[Analyze grammar]

satyamūlaṃ jagatsarvaṃ hyātmā satye pratiṣṭhitaḥ |
nā'haṃ mithyā cariṣyāmi gaccha vipra namo'stu te || 57 ||
[Analyze grammar]

evamuktvā śvapākastu gato yatra sa rākṣasaḥ |
prāha śīghraṃ khāda māṃ ca mokṣo te me bhaved drutam || 58 ||
[Analyze grammar]

rakṣaḥ prāha prasanno'smi satyādhāraṃ ca pālitam |
brahma satyadhṛtiḥ proktaṃ tvayā tadrakṣitaṃ yataḥ || 59 ||
[Analyze grammar]

necchāmi bhakṣituṃ tvāṃ ca dehi me gītijaṃ phalam |
yena mokṣaṃ pragacchāmi tvayā sākaṃ subhaktiman || 60 ||
[Analyze grammar]

caṇḍālena tadā dattaṃ rakṣase gītikāphalam |
rakṣo dehaṃ parityajya yayau vaikuṇṭhamuttamam || 61 ||
[Analyze grammar]

caṇḍālo'pi harerbhakto yayau yānena dhāma ca |
tatra caturbhujo bhūtvā siṣeve parameśvaram || 62 ||
[Analyze grammar]

evaṃ vai gītikāpuṇyaṃ svargamokṣādidāyakam |
pāpaghnaṃ divyatāsampādakaṃ kīrtanameva me || 63 ||
[Analyze grammar]

vādyavādayituḥ puṇyaṃ vadāmi yaddhi jāyate |
pratisvaraṃ śatavarṣaṃ svarge loke mahīyate || 64 ||
[Analyze grammar]

paścāt saṃjāyate rājā daśavarṣasahasrakam |
tato yāti mama bhakto mama dhāma parātparam || 65 ||
[Analyze grammar]

nṛtyato matsannidhau ca lakṣmīsthānaṃ hi niścitam |
narasyāpi yoṣito'pi yatheṣṭaṃ pradadāmyaham || 66 ||
[Analyze grammar]

dhāmni me nartako mukto bhavatyeva caturbhujaḥ |
nṛtyaṃ vai śāśvatānandaṃ dadāmyasmai hi dhāmani || 67 ||
[Analyze grammar]

jāgrato mama mūrteśca sannidhau divyamuttamam |
sārvajñyaṃ cāparokṣyaṃ ca dadāmi ca yathā mama || 68 ||
[Analyze grammar]

godātre mama golokaṃ dadāmi muktimaṇḍalam |
annadātre'mṛtaṃ svargaṃ dadāmyakṣatabhojanam || 69 ||
[Analyze grammar]

jaladātre'mṛtalokaṃ dadāmyakṣatatṛptidam |
gandhapuṣpapradātre ca dadāmi divyavarṣma yat || 70 ||
[Analyze grammar]

śāśvataṃ cā'pūrakaṃ ca tattvānāṃ sukhalabdhaye |
lakṣaiśvarībhiḥ ramate īśvaro bhogapūritaḥ || 71 ||
[Analyze grammar]

dhūpadasya ca saugandhyaṃ manmūrteriva jāyate |
dīpadasya sadā divyaṃ cakṣurbhavati sūryavat || 72 ||
[Analyze grammar]

ante svargādikaṃ bhuktvā mukto maddhāma yāti ca |
naivedyasya phalaṃ tasmai vaikuṇṭhaṃ pradadāmyaham || 73 ||
[Analyze grammar]

brahmarājyaṃ sadā bhuṃkte sadā naivedyado mama |
japayajñādikartre ca sārvabhaumasthalaṃ mahat || 74 ||
[Analyze grammar]

pradadāmi pṛthivyāṃ vai tataḥ svargaṃ tataḥ param |
vairājaṃ padamevāpi tato mokṣaṃ dadāmi ca || 75 ||
[Analyze grammar]

sakāmānāṃ kāmapūrān lokān yacchāmi sarvathā |
akāmānāṃ mama dhāma prayacchāmi ca śāśvatam || 76 ||
[Analyze grammar]

narāṇāṃ yoṣitāṃ vāpi yatheṣṭaṃ pradadāmi vai |
devatvaṃ vāpi devītvaṃ svargādau vitarāmyaham || 77 ||
[Analyze grammar]

īśatvaṃ ceśvarītvaṃ vā vairājādau dadāmi ca |
muktānītvaṃ ca muktatvaṃ yatheṣṭaṃ prakaromyaham || 78 ||
[Analyze grammar]

brāhmītvaṃ brahmatāṃ cāpi dadāmi tadabhīpsitam |
kṛṣṇatvaṃ cāpi kṛṣṇātvaṃ dadāmi ca tadīpsitam || 79 ||
[Analyze grammar]

nārāyaṇītvaṃ ca yadvā nārāyaṇatvamityapi |
avatāratvamevā'pyavatāriṇītvamityapi || 80 ||
[Analyze grammar]

yathābhakti yathādāsyaṃ yathāpuṇyaṃ dadāmyaham |
parameśvaratā me'sti sā tu nānyasya kasyacit || 81 ||
[Analyze grammar]

so'haṃ cānādiśrīkṛṣṇanārāyaṇo'smi cākṣarāt |
dhāmnaḥ pare mama dhāmni vartāmi puruṣottamaḥ || 82 ||
[Analyze grammar]

ityetat kathitaṃ lakṣmi tava jijñāsitaṃ mayā |
śaṃbhunā kathitaṃ pūrvaṃ satyai tīrtheṣu tiṣṭhatā || 83 ||
[Analyze grammar]

paṭhanācchravaṇāccāsya bhuktirmuktirbhavettathā |
mama dāsyaṃ durlabhaṃ bhaktānāṃ dadāmi śāśvatam || 84 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne gāyamānasya khañjarīṭasya muktiḥ vādayamānasya nṛtyato jāgrato godāturannadāturjaladātuḥ sammārjayiturlepayiturgandhapuṣpādidāturdhūpadīpasunaivedyadāturjapayajñādikartuśca phalaprāptyādinirūpaṇanāmā'ṣṭasaptatyadhikapañcaśatatamo'dhyāyaḥ || 578 ||
[Analyze grammar]