Chapter 579

śrīnārāyaṇa uvāca |
śṛṇu lakṣmi kathayāmi ravitīrthasya yatphalam |
pārvatyā prārthitaḥ śaṃbhuḥ samuvāca satīpuraḥ || 1 ||
[Analyze grammar]

ekadā ṛṣayo yājñavalkyādyāḥ śaṃsitavratāḥ |
ādityeśaṃ samāyātā narmadākacchake purā || 2 ||
[Analyze grammar]

praviśya ṛṣayaḥ sarve vane puṣpaphalākule |
vanānte dadṛśuḥ śubhrāṃ striyaṃ raktāmbarānvitām || 3 ||
[Analyze grammar]

raktamālyāṃ suśobhāḍhyāṃ raktacandanacarcitām |
raktābharaṇasaṃvyāptāṃ śaśihastāṃ bhayapradām || 4 ||
[Analyze grammar]

tasyāḥ samīpataḥ kṛṣṇavarṇaṃ vṛddhaṃ ca nirdayam |
mahākāyaṃ pāśahastaṃ piṃgākṣaṃ dīrghajihvikam || 5 ||
[Analyze grammar]

tīkṣṇadṛṃṣṭā'tikruddhaṃ ca vikarālasvarūpiṇam |
ṛṣibhiśca vīkṣitau tau saṃpṛṣṭau pāpakarmiṇau || 6 ||
[Analyze grammar]

kau bhavantau vikṛtau vai tīrthasthau pāparūpiṇau |
tāvūcatustadā viprān jarā'haṃ kālaputrikā || 7 ||
[Analyze grammar]

ahaṃ yamaḥ svayaṃ daṇḍapradātā pāpināṃ sadā |
yūyaṃ dharmacarā viprā dharmaṃ carata nārmade || 8 ||
[Analyze grammar]

kacche tīrthe sampraviśya sukhaṃ tiṣṭhata vaiṣṇavāḥ |
na cāvāṃ tān pīḍayāvo ye tu nārmadasevakāḥ || 9 ||
[Analyze grammar]

narmadānindakānatra hariṣyāmo yamālayam |
te śrutvā vacanaṃ tatra kacche ca nārmade drutam || 10 ||
[Analyze grammar]

bhṛguṇā'dhyasite cakrurvāsaṃ mokṣapradaṃ śubham |
tāvattatra narāścānye pañca dṛṣṭā maharṣibhiḥ || 11 ||
[Analyze grammar]

snānadevārcanairyuktāḥ puruṣāste mahābalāḥ |
tairuktaṃ bhūsurebhyaḥ prasnātaṃ tīrtheṣu vai kṣiteḥ || 12 ||
[Analyze grammar]

na tatpāpaṃ tu no naṣṭaṃ yannaṣṭaṃ tvatra cāplavāt |
ekenā'smatsu ca gurordārāḥ pūrvaṃ pradūṣitāḥ || 13 ||
[Analyze grammar]

dvitīyena suvarṇaṃ vai mitrasya saṃhṛtaṃ purā |
tṛtīyena brahmahatyā kṛtā ghorā bhayaṃkarī || 14 ||
[Analyze grammar]

caturthena kṛtaṃ pāpaṃ surāyā madyapānakam |
pañcamena gavāṃ hatyā kṛtā te ca vayaṃ nvime || 15 ||
[Analyze grammar]

narmadāyāṃ bhṛgukṣetre snātvā śuddhāśca nirmalāḥ |
natvā'nādikṛṣṇanārāyaṇaṃ śrībhārgavīpatim || 16 ||
[Analyze grammar]

kṛtvā pradakṣiṇaṃ bhaktyā tyaktvā prāṇān divaṃgatāḥ |
brāhmaṇaiste tadā dṛṣṭā ravitīrthe vimānagāḥ || 17 ||
[Analyze grammar]

yamena kālaputryā ca na niruddhāśca te tadā |
pratyuta vai namaskārāḥ kṛtā dvābhyāṃ hṛdā muhuḥ || 18 ||
[Analyze grammar]

athā'nyatte pravakṣyāmi tvagastyeśvaratīrthakam |
ānandeśvaratīrthaṃ ca dvitīyaṃ vartate tathā || 19 ||
[Analyze grammar]

līneśvaraṃ tathā tīrthaṃ tṛtīyaṃ cāpi vartate |
ekadā kālabāṣpākhyo dānavo duścaraṃ tapaḥ || 20 ||
[Analyze grammar]

ādau kṛtayuge revājale cacāra tasya tu |
prasannaḥ śaṃkaraḥ sākṣād babhūva ca jagāda ha || 21 ||
[Analyze grammar]

varaṃ brūhi yatheṣṭaṃ te dadāmīti ca vai tataḥ |
dānavaḥ sa parivavre dehi me'tra maheśvara || 22 ||
[Analyze grammar]

hastaṃ śirasi yasyaiva dāsyāmi sa mṛtiṃ vrajet |
śaṃbhuḥ prāha tvadiṣṭaṃ yattattathaiva bhaviṣyati || 23 ||
[Analyze grammar]

itiśrutvā vaco daityaḥ śaṃbhumevā'bhidudruve |
hastaṃ te mūrdhni dāsyāmi na tatsatyaṃ vacastava || 24 ||
[Analyze grammar]

rudraḥ palāyitastena keśavaṃ śaraṇaṃ gataḥ |
nivedya keśavaṃ śaṃbhustatra jale nyalīyata || 25 ||
[Analyze grammar]

bhaktaduḥkhavināśāyā'nādikṛṣṇanarāyaṇaḥ |
strīrūpaṃ tatra dhṛtvaiva daityasammukhamāgataḥ || 26 ||
[Analyze grammar]

kumārīṃ yuvatīṃ ramyāṃ candrojjvalāṃ ca nirjane |
dṛṣṭvā''rebhe parirabdhuṃ dānavo mohavihvalaḥ || 27 ||
[Analyze grammar]

uvāca bhava me patnī tadā pratyāha keśavaḥ |
yadi māṃ manyase bhāryāṃ pratyayaśced bhavenmama || 28 ||
[Analyze grammar]

nṛtyaṃ kuru mayā sārdhaṃ jaye te syāṃ hi kāminī |
tathāstviti dānavaḥ sa nṛtye samyagavartata || 29 ||
[Analyze grammar]

hastāvuddhṛtya śirasi mayūrakalayā tadā |
nṛtyaṃ cakāra bhagavān dānavo'pi tathā'karot || 30 ||
[Analyze grammar]

śanairhastau sammilitau paspṛśatuḥ śiraḥ svakam |
dānavaḥ sa nṛtyamohādbhasmībabhūva tatkṣaṇāt || 31 ||
[Analyze grammar]

śaṃkarastatparijñāya jalād bahirbabhūva ha |
anādiśrīkṛṣṇanārāyaṇaṃ natvā sthiro'bhavat || 32 ||
[Analyze grammar]

tattīrthaṃ narmadāyāṃ vai līneśvaraṃ samucyate |
kṛṣṇanārāyaṇeśaṃ ca tīrthaṃ tad vaiṣṇavaṃ param || 33 ||
[Analyze grammar]

kṛtvā yayau ca bhagavānadṛśyatāṃ haro'pi ca |
snātvā tatra labhenmartyo bhuktiṃ muktiṃ tathonnatim || 34 ||
[Analyze grammar]

dakṣiṇe narmadātīre tīrthaṃ gopālakeśvaram |
kāmadhenustapastatra putrārthaṃ pracakāra ha || 35 ||
[Analyze grammar]

dhyāyamānā parābhaktyā devadevaṃ maheśvaram |
tuṣṭastasyā jagannāthaḥ kapilāyā maheśvaraḥ || 36 ||
[Analyze grammar]

kapilādehamadhyādvai niḥsṛtaḥ śaṃkaraḥ svayam |
tuṣṭo'smīti samuvāca varaṃ vṛṇu yathepsitam || 37 ||
[Analyze grammar]

surabhiḥ prāha putraṃ me dehi divyaguṇairyutam |
tathā'stviti haraḥ prāha dharmaḥ putro babhūva ha || 38 ||
[Analyze grammar]

catuṣpād vṛṣabhātmā vai vṛṣo lokasya rakṣakaḥ |
gopāleśaḥ śaṃkaro'yaṃ surabhyā samudīritaḥ || 39 ||
[Analyze grammar]

tattīrthe kārtike cāpi vaiśākhe pūrṇimātithau |
vṛṣotsargaṃ kārayecca śaṃkarasya pratuṣṭaye || 40 ||
[Analyze grammar]

vṛṣabhe romasaṃkhyā tu sarvāṃgeṣu ca yāvatī |
tāvadvarṣasahasrāṇi śivaloke mahīyate || 41 ||
[Analyze grammar]

tato yāyād brahmalokaṃ mahābhāgavato yadi |
yadvā rājā bhaved bhūmau punarmokṣamavāpnuyāt || 42 ||
[Analyze grammar]

atha tīrthottamaṃ ramyaṃ parāśarābhidhaṃ tathā |
yatra taptaṃ tapaścograṃ parāśareṇa vai purā || 43 ||
[Analyze grammar]

tasya tuṣṭā mahālakṣmīrvaraṃ dadau sutārthakam |
parāśaraḥ sutaṃ lebhe nārāyaṇāṃśamuttamam || 44 ||
[Analyze grammar]

atha tīrthaṃ bhayaghnaṃ vai bhīmeśvaraṃ śubhaṃ tathā |
tadvat tīrthaṃ nāradeśaṃ yatra yogopalabdhaye || 45 ||
[Analyze grammar]

nārado vai tapastepe śaṃbhuṃ nidhāya cāntare |
śaṃbhuḥ sākṣād babhūvā'smai yogasiddhiṃ dadau parām || 46 ||
[Analyze grammar]

hanūmadīśvaraṃ tīrthaṃ tato gacchet sukhāvaham |
rāvaṇaṃ tvajayadrājā sahasrārjunasaṃjñakaḥ || 47 ||
[Analyze grammar]

kārtavīryaṃ vijigāya jāmadagnirmahāprabhuḥ |
jāmadagniṃ jitavośca dāśarathirmahāprabhuḥ || 48 ||
[Analyze grammar]

dāśarathiṃ labdhatī sītā pūrvābhipuṇyataḥ |
sītāṃ nītavatastasya rāvaṇasya vadhaḥ kṛtaḥ || 49 ||
[Analyze grammar]

rāmeṇa tasya bhaktaśca hanūmān vānarottamaḥ |
laṃkādāhottaraṃ hatyādoṣaśāntyarthameva saḥ || 50 ||
[Analyze grammar]

narmadāyāṃ bhṛgukṣetre samāgatya sthiro'bhavat |
hanūmadīśvaraṃ nāma tīrthaṃ tatparamaṃ smṛtam || 51 ||
[Analyze grammar]

camatkāraṃ śṛṇu lakṣmi purā tatrā'bhavatparam |
suparṇo nāma rājarṣirbabhūva vasudhātale || 52 ||
[Analyze grammar]

śatabāhurbabhūvā'sya kumāro vaiṣṇavottamaḥ |
vicaran sa yayau vindhyācalaṃ yadṛcchayā kvacit || 53 ||
[Analyze grammar]

vane dṛṣṭvā kumāro'yaṃ piṃgalaṃ caikalaṃ dvijam |
papraccha tvaṃ kathaṃ cāste bhramase'tra sapustakaḥ || 54 ||
[Analyze grammar]

vipraḥ prāha samāyātaḥ kānyakubjādito vane |
preṣito rājaputryā ca śreṣṭhavarā'bhikāṃkṣayā || 55 ||
[Analyze grammar]

rājā nāmnā śikhaṇḍī yastvaputraścākarottapaḥ |
kanyāṃ sa prāptavān tasyā vivāhaṃ sa samīhate || 56 ||
[Analyze grammar]

kanyā sā pitaraṃ prāha narmadāyāstaṭe purā |
mayūrī cā'bhavaṃ tatra mayūreṇa samanvitā || 57 ||
[Analyze grammar]

tatrāgataḥ kadācittu vyādhastena śarairmuhuḥ |
hatā nipātitā sārdhaṃ svāminā'haṃ mṛtā tadā || 58 ||
[Analyze grammar]

pracchidya mastakaṃ me sa dehaṃ vahnau prapacya ca |
bhakṣayāmāsa cārdhaṃ tu cārdhaṃ cikṣepa vai jale || 59 ||
[Analyze grammar]

narmadāyāstena puṇyabalenā'haṃ tava gṛhe |
jātā'smi rājaputrīti saśikhā dehasundarī || 60 ||
[Analyze grammar]

jātismarā smarāmyetatsthalaṃ puṇyapradaṃ pitaḥ |
tatra preṣaya vipraṃ ca hanūmadīśvare sthale || 61 ||
[Analyze grammar]

piśaṃgapatratriśākhavaṭasyā'dhaḥ piśaṃginī |
śilā vai vartate tatra patrāṇyasthīni me tadā || 62 ||
[Analyze grammar]

kṣiptāni santi pāṣāṇakūṭe jīrṇāni santi ca |
narmadāyā jale tāni nikṣiptavyāni sarvathā || 63 ||
[Analyze grammar]

tena muktirbhavenme vai nārāyaṇaṃ patiṃ prati |
ityājñayā nṛpateśca mārgaṇāya dvijo'pyaham || 64 ||
[Analyze grammar]

samāyāto'smi likhitaṃ vācayāmi sthalaṃ hi tat |
ityuktvā tatsthalaṃ labdhvā prāpyā'sthīni yathātatham || 65 ||
[Analyze grammar]

nicikṣepa jale viprastāvat kanyā mṛtā'bhavat |
śatabāhustu tatraiva smṛtvā nijāṃ mayūratām || 66 ||
[Analyze grammar]

śuśoca tatra vai tīrthe mṛtaḥ so'pi ca tatkṣaṇam |
divyaṃ yānaṃ samāyātaṃ sthitastatra tataḥ sa ca || 67 ||
[Analyze grammar]

yayau mṛtā ca sā yatra rājaputrī ca tatsthalam |
sāpi divyasvarūpā ca devī bhūtvā vimānakam || 68 ||
[Analyze grammar]

samāruroha ca tadā yānaṃ yayau ca narmadām |
tāvad vipraḥ prasasmāra vyādhaṃ svaṃ pūrvajanmani || 69 ||
[Analyze grammar]

jalaṃ pītvā narmadāyā mamāra tatra tīrthake |
divyadehasvarūpaḥ san samāruroha yānakam || 70 ||
[Analyze grammar]

yayuste ca trayaḥ svargaṃ natvā śrīhanumantakam |
narmadāyāḥ pratāpo'yaṃ hanūmattīrthake'bhavat || 71 ||
[Analyze grammar]

svargamokṣaprado lakṣmi pāpatāpapraṇāśanaḥ |
mayūrī ca mayūraśca vyādhaśceti trayaḥ khalu || 72 ||
[Analyze grammar]

revājalaṃ prapītvā ca yayurmuktiṃ tataḥ param |
ityevaṃ kathitaṃ lakṣmi puṇyākhyānaṃ haroditam || 73 ||
[Analyze grammar]

pārvatyā śrūyamāṇaṃ tat paṭhanācchravaṇādapi |
bhuktimuktipradaṃ divyaṃ saṃsārabhramavārakam || 74 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne ādityeśatīrthaṃ līneśvaratīrthaṃ gopāleśvaratīrthaṃ parāśaratīrthaṃ hanumadīśvaratīrthaṃ cetyādisopākhyānatīrthanirūpaṇanāmaikonāśītyadhikapañcaśatatamo'dhyāyaḥ || 579 ||
[Analyze grammar]