Chapter 568

śrīnārāyaṇa uvāca |
śṛṇu lakṣmi mama bhaktiparāṇāṃ cottamāṃ matim |
yadyapi syānmama tīrthe dhūlīdhūsaratā yadi || 1 ||
[Analyze grammar]

tathāpyahaṃ mahārājyaṃ pradadāmi mṛtasya vai |
pūrvaṃ kokābhidhe tīrthe vārāhāvatarāśraye || 2 ||
[Analyze grammar]

kaścillubdho vihiṃsan vai cāyayau kokamaṇḍale |
tatra dṛṣṭvā jale matsyaṃ baḍiśenā''jahāra saḥ || 3 ||
[Analyze grammar]

tasya hastāttu balavān matsyastūrṇaṃ vinirgataḥ |
atha śyenaśca taṃ vīkṣya padbhyāṃ jagrāha satvaram || 4 ||
[Analyze grammar]

uḍḍīno'pi mahābhāraṃ voḍhuṃ nirbala eva saḥ |
tataḥ padbhyāṃ viyuktaḥ san matsyaḥ kokāmukhe'patat || 5 ||
[Analyze grammar]

mamāra rajasā spṛṣṭo rājaputro'bhavacchuciḥ |
atha kālena tasyaiva mṛgavyādhasya cāṃganā || 6 ||
[Analyze grammar]

gṛhītvā mūrdhni māṃsāni padbhyāṃ prayāti tatra vai |
ekā cillī māṃsakṣubdhā māṃsaṃ hartuṃ samāyayau || 7 ||
[Analyze grammar]

vyādhapatnyā tāḍitā sā śareṇa patitā mṛtā |
jātā candrapure rājñaḥ kanyā tīrtharajaḥśrayāt || 8 ||
[Analyze grammar]

yuvatyapi naraṃ śreṣṭhaṃ jugupsati na cecchati |
saumyaṃ surūpaṃ puruṣaṃ sarvānapi jugupsati || 9 ||
[Analyze grammar]

atha kāle gate tayoḥ sambandho'bhūdvivāhataḥ |
tathā ca dampatī nityaṃ dharmaṃ pālayataḥ sthitau || 10 ||
[Analyze grammar]

madhyāhne jāyate patyuḥ śirorugatipīḍinī |
vaidyauṣadhaiḥ sahasraiḥ sā pīḍā naiva nyavartata || 11 ||
[Analyze grammar]

kadācid dayitā naijaṃ bhartāramidamabravīt |
kā nviyaṃ vedanā svāmin cikitsābhirna gacchati || 12 ||
[Analyze grammar]

punaḥ punaḥ pṛcchyamānaḥ priyāmuvāca vai patiḥ |
muñcatvaṃ mānuṣaṃ bhāvaṃ tāṃ jātiṃ smara paurvikīm || 13 ||
[Analyze grammar]

yadi jñātuṃ tavecchā'sti gṛhāṇā''jñāṃ tu vṛddhayoḥ |
mātāpitrormama gantuṃ tīrthaṃ kokāmukhaṃ prati || 14 ||
[Analyze grammar]

tatra gatvā kathayiṣye mā mohaṃ kuru bhāmini |
tataḥ prasādayāmāsa śvaśrūśvaśurakau vadhūḥ || 15 ||
[Analyze grammar]

prāha kokāmukhe gantumicchāvastīrthayogataḥ |
kāryagauravabhāvena na niṣiddhau kathaṃcana || 16 ||
[Analyze grammar]

adya yāvat kimapi vāṃ yācitaṃ na mayā kvacit |
purastād yuvayostanme yācitaṃ dātumarhataḥ || 17 ||
[Analyze grammar]

śirovedanayā yuktaḥ sadā tava suto hyayam |
madhyāhne mṛtakalpo vai jāyate cātipīḍitaḥ || 18 ||
[Analyze grammar]

kokāmukhaṃ vinā kaṣṭaṃ na nivṛttaṃ bhaviṣyati |
tvaritaṃ gantumicchāvo viṣṇostatparamaṃ padam || 19 ||
[Analyze grammar]

iti snuṣāvacaḥ śrutvā rājā prāha śubhaṃ vacaḥ |
gṛhāṇa putra ratnāni dāsān dāsīḥ rathādikān || 20 ||
[Analyze grammar]

dānārhāṇi ca vastūni dhanāni vipulāni ca |
kuru tīrthaṃ sukhātputra putri rakṣa patiṃ tava || 21 ||
[Analyze grammar]

anujajñe śako rājā dampatī vaṇijādibhiḥ |
yayatustatra gatvā ca kokāmukhaṃ hariṃ tathā || 22 ||
[Analyze grammar]

devān dṛṣṭvā jale snātvā dānāni dadatustataḥ |
rajanī saṃvyatītā ca prātaḥ snātau tu dampatī || 23 ||
[Analyze grammar]

praṇamya śirasā viṣṇuṃ patiḥ patnīṃ mṛdantare |
asthīni darśayāmāsa mīnasya pūrvajanmanaḥ || 24 ||
[Analyze grammar]

etāni mama cāsthīni pūrvadehodbhavāni hi |
ahaṃ purābhavaṃ matsyaḥ kokeṣu vicaran jale || 25 ||
[Analyze grammar]

vyādhena nigṛhīto'haṃ baḍiśena jalecaraḥ |
taddhastānnirgatastatra balena patito bhuvi || 26 ||
[Analyze grammar]

śyenenāmiṣalubdhena nakhairviddho'bhavaṃstadā |
nītaṃ ākāśamārgeṇa tasmācca patito'tra vai || 27 ||
[Analyze grammar]

tena cātiprahāreṇa jātā śirasi vedanā |
ahameva vijānāmi smarāmi vedanāṃ hyati || 28 ||
[Analyze grammar]

tena duḥkhaṃ na me śāntaṃ madhyāhne jāyate hyati |
śrutvaivaṃ tasya bhāryā'pi prāha pūrvabhavaṃ svakam || 29 ||
[Analyze grammar]

ahaṃ pūrvabhavaṃ ca cillī kṣuttṛḍyutā drume |
samāsīnā tadā bhakṣyaṃ vicinvānā tadantare || 30 ||
[Analyze grammar]

atha kaścinmṛgavyādhaḥ priyayā saha taddrume |
hatvā mṛgān samāyāto māṃsān rarakṣa bhūtale || 31 ||
[Analyze grammar]

tāvanmayā māṃsapiṇḍo viddho vajrasamairnakhaiḥ |
vyādho dadarśa māṃ tatra jaghāna ca śareṇa mām || 32 ||
[Analyze grammar]

apātayacca bhūmau māṃ patitā'haṃ mṛtiṃ gatā |
etatkṣetraprabhāveṇa jātā'smi tvatpriyā nṛpī || 33 ||
[Analyze grammar]

etāni yasya cāsthīni śeṣāṇi ca mamāpi ca |
galitānyalpaśeṣāṇi smarāmi sarvameva tat || 34 ||
[Analyze grammar]

atha cātra prakartavyaṃ dharmakāryaṃ pramokṣadam |
itiniścitya tau tatra viṣṇuloke sukhāvaham || 35 ||
[Analyze grammar]

cakraturbhajanādyaṃ ca dravyaratnādidānakam |
dadatuḥ paramaprītau pātrebhyaḥ svāni śeṣataḥ || 36 ||
[Analyze grammar]

tatra sthitvā varārohe mama sevāvyavasthitau |
tasmāt sthānād vapustyaktvā śvetadvīpamupāgatau || 37 ||
[Analyze grammar]

śuklāmbaradharau divyabhūṣaṇaiśca vibhūṣitau |
divyarūpadharau bhaktau mama bhāgavatau sadā || 38 ||
[Analyze grammar]

dīptimantau surūpau ca svarṇavacchubhadarśanau |
caturbhujau yathā lakṣmīviṣṇū sāmarthyaśobhitau || 39 ||
[Analyze grammar]

tayoryo'bhūtparijanaścamatkāraṃ pravīkṣya saḥ |
mama sevāparaścā'bhūt mama karmavyavasthitaḥ || 40 ||
[Analyze grammar]

mānuṣaṃ bhāvamutsṛjya mama lokamupāgataḥ |
sarvaśo dyutimāṃstatra matsānnidhyamupāgataḥ || 41 ||
[Analyze grammar]

mama bhaktāḥ striyo lakṣmi tvatsvarūpo bhavanti vai |
tejasā dīptimatyaśca śuddhasattvavibhūṣitāḥ || 42 ||
[Analyze grammar]

navayauvanapūrāśca sarvāścotpalagandhikāḥ |
cārucampakavarṇābhā muktāḥ sarvāḥ priyavratāḥ || 43 ||
[Analyze grammar]

prasādānmama suśroṇi nityayauvanapūritāḥ |
nityānandabhṛtāḥ sarvāḥ sarvasiddhisamanvitāḥ || 44 ||
[Analyze grammar]

eṣa dharmaśca kīrtiśca śaktiścāpi mahadyaśaḥ |
karmaṇāṃ paramaṃ karma tapasāṃ ca mahattapaḥ || 45 ||
[Analyze grammar]

kathānāṃ paramaṃ cāpi kṛtīnāṃ paramā kṛtiḥ |
vṛṣāṇāṃ paramo dharmo yanmamāśrayaṇaṃ param || 46 ||
[Analyze grammar]

mama dharmaṃ samāśritya rajo dhṛtvā ca mastake |
prasādaprāśanaṃ kṛtvā mama loke mahīyate || 47 ||
[Analyze grammar]

mama pādajalaṃ pītvā snātvā mattīrthavāriṣu |
mama sādhoranuvṛttiṃ pālayitvā muhurmuhuḥ || 48 ||
[Analyze grammar]

satāṃ sevāṃ sadā kṛtvā kṛtvā bhāgavatārcanam |
śrutvā ca saṃhitāṃ lakṣmīnārāyaṇīyasaṃjñitām || 49 ||
[Analyze grammar]

janā yānti parāṃ muktiṃ cillīmatsyau yathā purā |
etanmaraṇakāle'pi smṛtvā mucyeta bandhanāt || 50 ||
[Analyze grammar]

viśeṣeṇāpi te lakṣmi kathayāmi śubhakṣaṇam |
kumudaṃ mārgaśīrṣaṃ ca vaiśākhaṃ śrāvaṇaṃ tathā || 51 ||
[Analyze grammar]

mamātimodapātrāṇi māsāścaite mamārcane |
kārtike dvādaśīkāle navānnairnavapuṣpakaiḥ || 52 ||
[Analyze grammar]

pūjayennavavārbhiśca sa me lokāya kalpate |
gate meghāgame kāle prasannaśaradāśraye || 53 ||
[Analyze grammar]

ambare vimale jāte vimale śaśimaṇḍale |
nātiśīte na cātyuṣṇe kāle haṃsavirāviṇi || 54 ||
[Analyze grammar]

kumudotpalakalhārapadmasaurabhanirbhare |
kumudasya tu māsasya bhavedyā dvādaśī śubhā || 55 ||
[Analyze grammar]

tasyāṃ māmarcayed yastu vrataṃ kuryāttathā mama |
prabodhinīṃ pālayecca sa yāti paramāṃ gatim || 56 ||
[Analyze grammar]

śiśire'pi mārgaśīrṣe dvādaśyāṃ kusumairnavaiḥ |
mamārcanaṃ prakuryād yaḥ sa yāti paramāṃ gatim || 57 ||
[Analyze grammar]

māsaṃ mārgaśiraṃ yadvad vaiśākhaṃ cāpi me priyam |
tatra puṣpādibhiścā'hamarcanīyo vrate dine || 58 ||
[Analyze grammar]

navavarṣasahasrāṇi navavarṣaśatāni ca |
tiṣṭhate mama loke sa yo dadāti ca me'rcanam || 59 ||
[Analyze grammar]

ekekagandhapatrasya dānametanmahatphalam |
kaumudasya tu māsasya mārgaśīrṣasya vai tathā || 60 ||
[Analyze grammar]

vaiśākhasya tu māsasya dvādaśyāṃ dhavale dale |
ekabhaktiparo bhūtvā vanamālāṃ vibhūṣitām || 61 ||
[Analyze grammar]

puṣpāṇāṃ ca vibhūṣāśca gandhapuṣpāṇi yo nyaset |
varṣāṇi dvādaśaiveha tena pūjā kṛtā bhavet || 62 ||
[Analyze grammar]

śālapuṣpaṃ sugandhi kaumudyāṃ candanamarpayet |
utpalaṃ candanaṃ cāpi dadyānmārgaśire śubham || 63 ||
[Analyze grammar]

vaiśākhyāṃ sthalakamalaṃ jalaṃ śītaṃ saśarkaram |
ikṣurasaṃ pradadyānme śāntidaṃ puṣṭidaṃ tathā || 64 ||
[Analyze grammar]

prāpnoti pradadānastu mama bhaktiparāyaṇaḥ |
divyaṃ varṣasahasraṃ vai vaikuṇṭhaṃ ca tataḥ param || 65 ||
[Analyze grammar]

paraṃ padaṃ sa me yāti puṇyasyā'nto na vidyate |
na janmamaraṇe tasya na glānirna kṣudhā tṛṣā || 66 ||
[Analyze grammar]

evaṃvidhaṃ paraṃ lokaṃ prāpnuyānmama pūjakaḥ |
phālgunasya tu māsasya śukladvādaśikātithau || 67 ||
[Analyze grammar]

ramyavāsantikaiḥ puṣpaiḥ pūjayenmāṃ subhāvataḥ |
śvetaṃ pāṇḍurakaṃ cāpi sugandhaṃ śobhanaṃ bahu || 68 ||
[Analyze grammar]

na sa gacchati saṃsāraṃ mama lokaṃ sa gacchati |
vaiśākhyāṃ śālapuṣpāṇi śubhāni taruṇāni ca || 69 ||
[Analyze grammar]

datvā mahyaṃ ca bhaktebhyo jano mokṣāya kalpyate |
prapūjya śrībhāgavatān sthāpayitvā'grataśca mām || 70 ||
[Analyze grammar]

pūjayet parayā prītyā naro nārī subhāvataḥ |
sastuvantyṛṣayo mantrairbhaktāḥ stavaiḥ striyo hṛdā || 71 ||
[Analyze grammar]

gandharvā'psaraścāpi gītanṛtyaiḥ savādanaiḥ |
stuvanti devalokāśca purāṇaṃ puruṣottamam || 72 ||
[Analyze grammar]

siddhā vidyādharā yakṣāḥ piśācoragarākṣasāḥ |
stuvanti devaṃ sarveṣāṃ māṃ śrīkṛṣṇanarāyaṇam || 73 ||
[Analyze grammar]

ādityā vasavo rudrā aśvinau ca marudgaṇāḥ |
stuvanti devadeveśaṃ yugānāṃ saṃkṣaye'pi ca || 74 ||
[Analyze grammar]

pṛthvī vāyuśca viśve ca tejaḥ sūryādayo grahāḥ |
samanvitāḥ stuvantyenaṃ śrīkṛṣṇaṃ puruṣottamam || 75 ||
[Analyze grammar]

svayaṃ brahmā ca somaśca śakraścāgniścidambaram |
stuvanti śrīkṛṣṇanārāyaṇaṃ lokamaheśvaram || 76 ||
[Analyze grammar]

nāradaḥ parvatāścāpyasitaśca devalo muniḥ |
pulahaśca pulastyaśca bhṛguścāṃgira ityapi || 77 ||
[Analyze grammar]

ete cānye ca bahavo mitrāvasuparāvasū |
stuvanti māṃ rameśaṃ vai yogināṃ paramaṃ gurum || 78 ||
[Analyze grammar]

satyalokanivāsāścāṣṭāvaraṇadhṛtāśrayāḥ |
vairājā īśvarāścāpi māṃ bhajante hiṃ mādhavi || 79 ||
[Analyze grammar]

pitarastvaryamādyāśca yāmyāḥ śravaṇasaṃjñakāḥ |
saṃvatsarāśca kālākhyā māṃ stuvanti tu nityaśaḥ || 80 ||
[Analyze grammar]

ṛṣayo munayaḥ sarve dikpālā lokapālakāḥ |
nidhayaḥ kṛttikāḥ kāṣṭhā anaṃgo manavastathā || 81 ||
[Analyze grammar]

kalāśca tithayaḥ sarvāstattvānyapi stuvanti mām |
nakṣatrāṇi surāḥ sarve guṇā varṇā bhajanti mām || 82 ||
[Analyze grammar]

bhogāśca bhoginaḥ sarve yoginyaścāpsarogaṇāḥ |
tīrthāni ca nadā nadyo nāḍikāḥ khanikāstathā || 83 ||
[Analyze grammar]

vālakhilyāḥ piśācādyā bhūtāḥ pretāḥ stuvanti mām |
kūṣmāṇḍāścaṇḍikāḥ sarvā vetālāśca vināyakāḥ || 84 ||
[Analyze grammar]

ḍākinyaścāpi śākinyastathā kṛtyā bhajanti mām |
jarāyūjā aṇḍajāśca svedajāḥ pārthivāṃkurāḥ || 85 ||
[Analyze grammar]

mānavā jalajāścāpi sthalajā dehinaśca mām |
stuvanti duḥkhyavasthāyāmāśramasthā nirantaram || 86 ||
[Analyze grammar]

gṛhadevā grāmadevā vanāraṇyādidevatāḥ |
vanāni parvatādyāśca taḍāgāni sravāṇi ca || 87 ||
[Analyze grammar]

akhātāni ca khātāni cābdhayo'pi stuvanti mām |
ālayā grāmasaṃsthānāścetanā vai bhajanti mām || 88 ||
[Analyze grammar]

yamalokakṛtāvāsāḥ karmiṇastu muhurmuhuḥ |
māṃ smaranti kṛpānāthaṃ samuddhārāya duḥkhataḥ || 89 ||
[Analyze grammar]

ārtāḥ stuvanti māṃ śaśvajjijñāsavaḥ kvacit kvacit |
arthārthī yāvadarthasya lābho bhavati tāvatā || 90 ||
[Analyze grammar]

majjñā nityaṃ smarantyeva stuvanti ca bhajanti ca |
sūtāśca māgadhāścāpi bandinaścāraṇādayaḥ || 91 ||
[Analyze grammar]

stāvakāḥ kathakāḥ sarve paṇḍāvanto bhajanti mām |
nyāyadāḥ śāsakāścāpi caurāścāpaharāstathā || 92 ||
[Analyze grammar]

tāmasāḥ sāttvikā yadvā rājasāśca stuvanti mām |
bhāṭṭā gāndharvakuśalāḥ kinnarāḥ kiṃpumarthakāḥ || 93 ||
[Analyze grammar]

sādhyāḥ sādhvyastathā satyo brahmacāriṇya ityapi |
ābhicāriṇya evāpi māṃ stuvanti bhajanti mām || 94 ||
[Analyze grammar]

nāgāḥ sarpā uragāśca sarīsṛpā mṛgādayaḥ |
dharme nije vartamānāḥ sarve bhajanti māṃ khalu || 95 ||
[Analyze grammar]

yathābhāvaṃ dadāmyebhyaḥ phalaṃ karmānusāri vai |
muktā bhajanti satataṃ hṛdi vāsaṃ pradāya me || 96 ||
[Analyze grammar]

tebhyo dadāmi hṛdayaṃ bhaktebhyo mama te yathā |
evaṃ lakṣmi sadā sarve jīvāḥ protā mayi dhruvam || 97 ||
[Analyze grammar]

māṃ vinā naiva tiṣṭhanti kampante naiva māṃ vinā |
prakāśaṃ naivāpnuvanti māṃ vinā hṛdayasthitam || 98 ||
[Analyze grammar]

anādiśrīkṛṣṇanārāyaṇaścāhaṃ pareśvaraḥ |
kāmbhareyo mahārājaḥ saṃrāje sarvadehiṣu || 99 ||
[Analyze grammar]

mama bhāsā prabhāsante sarveṣāṃ hṛdayāni vai |
mama śaktyā prakurvantīndriyāṇi grahaṇāni ca || 100 ||
[Analyze grammar]

mamānvayena saṃsāro yāti viyāti vartate |
mamopasthānahetvaitat sarvamānandabhūmikam || 101 ||
[Analyze grammar]

ato lakṣmi sadā sevyo nārāyaṇaḥ parātparaḥ |
sarvartujanyasaddravyairmānasairbhavanaistathā || 102 ||
[Analyze grammar]

teṣāmuddharaṇārthāya jāgrato na svapimyapi |
na me nidrā hi bhaktārthaṃ naudāsīnyaṃ madāśrite || 103 ||
[Analyze grammar]

na cālasyaṃ svāvanārthe na mūrtiḥ premaśūnyake |
iti jñātvā ye bhajanti stuvanti ca smaranti mām || 104 ||
[Analyze grammar]

ta eva mokṣabhāgā vai narā nāryaḥ priye'bdhije |
pāṭhakāḥ śrāvakāścāpi śrotāro mananārthinaḥ || 105 ||
[Analyze grammar]

sarve bhāvabharāḥ syuścet prayānti paramaṃ padam |
sarvayajñaphalaṃ teṣāṃ mama vākye'nuvartinām || 106 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne viṣṇostīrtharajomāhātmyaṃ śvetadvīpamuktāḥ kārtikamārgaśīrṣavaiśākhādidvādaśīṣu kṛtabhagavatpūjāphalaṃ sarvabhūtaprāṇimātrakṛtastutyādibhirbhagavatprāptirityādinirūpaṇanāmā'ṣṭaṣaṣṭyadhikapañcaśatatamo'dhyāyaḥ || 568 ||
[Analyze grammar]