Chapter 567

śrīnārāyāṇa uvāca |
śṛṇu lakṣmi ca duḥkhāni vinā bhaktiṃ janasya vai |
tathā sukhāni vakṣyāmi mama yogena sarvathā || 1 ||
[Analyze grammar]

anekacittavibhrānto mamā'haṃkārasaṃvṛtaḥ |
ajitendriya āśāsthastato duḥkhataraṃ nu kim || 2 ||
[Analyze grammar]

asantuṣṭaścātitṛṣṇa udvegakleśakārakaḥ |
vāsanākṛṣṭahṛdayastato duḥkhataraṃ nu kim || 3 ||
[Analyze grammar]

apūtātmā dharmahīno dayādānavivarjitaḥ |
lakṣmībhogavihīnaśca tato duḥkhataraṃ nu kim || 4 ||
[Analyze grammar]

rogo moho jarā glāniḥ saśastraḥ paravañcakaḥ |
paraduḥkhapradātā cet tato duḥkhataraṃ nu kim || 5 ||
[Analyze grammar]

mamā'rcanakriyāhīnaḥ satāṃ sevāvivarjitaḥ |
gṛhe kleśakaraḥ syāccet tato duḥkhataraṃ nu kim || 6 ||
[Analyze grammar]

nāsti devo na vai dharmo paraloko na vidyate |
manyate na punarjanma tato duḥkhataraṃ nu kim || 7 ||
[Analyze grammar]

ucitenopacāreṇa dravye satyapi mānavaḥ |
yo māṃ naiva prapadyeta tato duḥkhataraṃ nu kim || 8 ||
[Analyze grammar]

sarvabhakṣī sarvavastuvikretā nativarjitaḥ |
yo na māṃ pratipadyeta tato duḥkhataraṃ nu kim || 9 ||
[Analyze grammar]

abhyāgataṃ cātithiṃ cā'datvā bhuṃkte nijānapi |
pākabhedaprakartā cet tato duḥkhataraṃ nu kim || 10 ||
[Analyze grammar]

paropatāpyasantuṣṭo mandātmā devadūṣakaḥ |
karmahīno hrāsamūle tato duḥkhataraṃ nu kim || 11 ||
[Analyze grammar]

ātmaśreyo hyanāsādya cā'kṛtvā pāpadāhanam |
mṛtyukālavaśaṃ prāptastato duḥkhataraṃ nu kim || 12 ||
[Analyze grammar]

rājye satyapi yāmyānāṃ haste gatvā prasahya vai |
dūtaduḥkhaṃ samāpnoti tato duḥkhataraṃ nu kim || 13 ||
[Analyze grammar]

hastyaśvarathayānāni sainyāni bhṛtyavargakān |
vihāyā'nyavaśo yāti tato duḥkhataraṃ nu kim || 14 ||
[Analyze grammar]

aśnanti mādakaṃ kecit kecicchālighṛtādikam |
śuṣkānnaṃ kecidaśnanti kecit kandaphalānyapi || 15 ||
[Analyze grammar]

varavastrāvṛtāṃ śayyāṃ sevante samabhūṣitām |
tṛṇeṣu śerate kecit kurvanti nātmasādhanam || 16 ||
[Analyze grammar]

maraṇaṃ sarvasāmānyaṃ naikaṃ tyajati nā'param |
jñātvaivaṃ na bhajante māṃ tato duḥkhataraṃ nu kim || 17 ||
[Analyze grammar]

surūpo dṛśyate kaścit kaścid virūpakubjakaḥ |
saguṇo nirguṇaḥ kaścit sāmyaṃ codarapoṣaṇam || 18 ||
[Analyze grammar]

vidvān mūkastathā kaścinna kaścicchāśvato'tra vai |
jñātvaiva māṃ na bhajate tato duḥkhataraṃ nu kim || 19 ||
[Analyze grammar]

vidyamāne dhane kecit kṛpaṇā bhogavarjitāḥ |
dātā satyapi dāridrye bahuvyayaparāyaṇaḥ || 20 ||
[Analyze grammar]

evaṃ satyapi varṣānte riktaṃ gṛhaṃ dvayorapi |
kiṃ phalaṃ dhaninastasya kiṃ phalaṃ nirdhanasya ca || 21 ||
[Analyze grammar]

dānayajñādirāhitye tato duḥkhataraṃ nu kim |
dvibhāryo bahubhāryo vā tadā sampadyate janaḥ || 22 ||
[Analyze grammar]

yadā caikatrā'santuṣṭaścāparāṃ sa praśaṃsati |
ekā tu durbhagā tatra sadā śāpaparāyaṇā || 23 ||
[Analyze grammar]

bhoge śāpānulepaśca paralokavināśakṛt |
jñātvaivaṃ bhajate māṃ na tato duḥkhataraṃ nu kim || 24 ||
[Analyze grammar]

sadgṛhe dhṛtajanmāno sarvasādhanasaṃbhṛtāḥ |
kurvanti pāpakarmāṇi tato duḥkhataraṃ nu kim || 25 ||
[Analyze grammar]

labdhvā tu mānuṣīṃ saṃjñāṃ sarvajñānasamanvitām |
māmeva na prapadyante tato duḥkhataraṃ nu kim || 26 ||
[Analyze grammar]

kṛtvā tu vipulaṃ karma svārthamātraparāyaṇaḥ |
viparītamatiṃ yāti sa duḥkhāyopajāyate || 27 ||
[Analyze grammar]

duḥkhaṃ svecchāviruddhaṃ syāt sukhaṃ svecchānukūlatā |
ātmanaśca paraṃ duḥkhaṃ nityānandavihīnatā || 28 ||
[Analyze grammar]

mṛtyuttaraṃ ca yallabhyaṃ mānavena hi varṇyate |
karmaṇā śāśvataṃ saukhyaṃ taccennāptaṃ vṛthājanuḥ || 29 ||
[Analyze grammar]

jīvan duḥkhasamāyukto mṛto'pi duḥkhabhāk punaḥ |
tasya vyarthaṃ gataṃ janma tato duḥkhataraṃ nu kim || 30 ||
[Analyze grammar]

māṃ pūjayitvā naivedyaṃ viśiṣṭaṃ parikalpya ca |
śeṣamannaṃ samaśnāti tataḥ saukhyataraṃ nu kim || 31 ||
[Analyze grammar]

trikālaṃ me prepadyante paśyanti pratimāṃ mama |
bhaktiṃ kurvanti me premṇā tataḥ saukhyataraṃ nu kim || 32 ||
[Analyze grammar]

devatātithimartyānāṃ gavāṃ cānnaṃ vibhajya ca |
āśritānāṃ tataḥ paścāt samaśnāti gṛhādhipaḥ || 33 ||
[Analyze grammar]

te nirāśā na gacchanti santuṣṭā yānti dānataḥ |
yasyaivaṃ vartamānasya tataḥ saukhyataraṃ nu kim || 34 ||
[Analyze grammar]

māsi māsyekadivasastvamāvāsyeti yocyate |
pitaro yasya tṛpyanti tataḥ saukhyataraṃ nu kim || 35 ||
[Analyze grammar]

bhojanādau ca sādhubhyaḥ pāyasānnaṃ dadāti yaḥ |
abhinnamukharāgeṇa tataḥ saukhyataraṃ nu kim || 36 ||
[Analyze grammar]

bahvīṣvapi svapatnīṣu yasya buddhirna bhidyate |
samaṃ saukhyaṃ dadātyeva tataḥ saukhyataraṃ nu kim || 37 ||
[Analyze grammar]

ahiṃsanaṃ vrataṃ śuddhāntaro rakṣed ruṣaṃ tyajan |
surūpaṃ bhogyavastvādi dṛṣṭvā dṛṣṭiṃ dadāti na || 38 ||
[Analyze grammar]

śāntātmā kāmanāhīno mohahīnaḥ samantataḥ |
loṣṭhavat paśyati svarṇaṃ tataḥ saukhyataraṃ nu kim || 39 ||
[Analyze grammar]

pūjāyāṃ vartamāne ca yadi prāṇaḥ pragacchati |
devārthaṃ maraṇaṃ syāccet tataḥ saukhyataraṃ nu kim || 40 ||
[Analyze grammar]

kutsitaṃ naiva kuryācca kuryādevātmamokṣaṇam |
lābhā'labdhāvapi tuṣṭastataḥ saukhyataraṃ nu kim || 41 ||
[Analyze grammar]

bhartā vrataṃ sadā strīṇāṃ sākṣānmūrtaṃ pravidyate |
bhartāraṃ samanusṛtya vartate yā pativratā || 42 ||
[Analyze grammar]

patnīvrataṃ tathā patyuḥ sākṣānmūrtiḥ pativratā |
patnīṃ santuṣya ca patirvartate sukhadāyakaḥ || 43 ||
[Analyze grammar]

dampatī premapūrṇau cet tataḥ saukhyataraṃ nu kim |
vibhavāḍhyo jano yaśca vidhāvinayavāṃstathā || 44 ||
[Analyze grammar]

nigṛhītendriyaḥ syāccet tataḥ saukhyataraṃ nu kim |
sahate cā'vamānāni vyasane durmanāḥ sadā || 45 ||
[Analyze grammar]

mama bhaktau cātisaktastataḥ sukhataraṃ nu kim |
jalaṃ milati nirmūlyaṃ bhikṣayā cānnamāpyate || 46 ||
[Analyze grammar]

na cintā dravyarakṣāyāstataḥ sukhataraṃ nu kim |
śarīraṃ rogahīnaṃ ca pācanāgniḥ samujjvalaḥ || 47 ||
[Analyze grammar]

pakvā'pakvaṃ pacatyeva tataḥ sukhataraṃ nu kim |
śītaṃ na bādhate cāti auṣṇyaṃ nābhibhavatyapi || 48 ||
[Analyze grammar]

vṛkṣavāyukṛtāvāsastataḥ sukhataraṃ nu kim |
lokāḥ kuṭumbaṃ sarvatra ādhāraḥ parameśvaraḥ || 49 ||
[Analyze grammar]

cintanaṃ śrīharernityaṃ tataḥ sukhataraṃ nu kim |
gṛhaṃ yasya tu pārakyaṃ guhāprakhyaṃ nirāmayam || 50 ||
[Analyze grammar]

poṣaṇaṃ parabhṛttulyaṃ bhojanaṃ śukavattathā |
bhajanaṃ sahajaṃ yasya tataḥ saukhyataraṃ nu kim || 51 ||
[Analyze grammar]

sakāmo vā hyakāmo vā mamālayanivāsakṛt |
yastu prāṇād viyujyeta tataḥ sukhataraṃ nu kim || 52 ||
[Analyze grammar]

mātaraṃ pitaraṃ bhāryāṃ guruṃ devaṃ ca bālakān |
devatāmiva paśyed yastataḥ saukhyataraṃ nu kim || 53 ||
[Analyze grammar]

śāntirjñānaṃ vicāraścā'nudvegaśca vivekitā |
dhairyaṃ sthairyaṃ nispṛhatvaṃ tataḥ saukhyataraṃ nu kim || 54 ||
[Analyze grammar]

pūjayed devadeveśaṃ kṛṣṇanārāyaṇaṃ harim |
nipated daṇḍavad bhūmau jñānī bhāgavataḥ śuciḥ || 55 ||
[Analyze grammar]

śirasā cāṃjaliṃ kṛtvā prasīdeti vadeddharim |
kṣamāpayeddhariṃ nityaṃ tataḥ saukhyataraṃ nu kim || 56 ||
[Analyze grammar]

abhyañjanaṃ ca me dadyād dadyād vā tailamardanam |
sarvaṃ śarīraṃ cā'bhyajyād ghṛtenāpi ca mastakam || 57 ||
[Analyze grammar]

ājyamānamapi tathā yāvantastailabindavaḥ |
tāvadvarṣasahasrāṇi svargaloke mahīyate || 58 ||
[Analyze grammar]

tataḥ puṇyakṛtāṃllokān sukhān vindati mānavaḥ |
tataḥ paraṃ pumāṃsaṃ māṃ vindatyakṣarasaṃjñake || 59 ||
[Analyze grammar]

udvartanaṃ ca me dadyācchuddhyantyaṃgāni yena me |
pippalikā madhukaśca aśvaparṇaśca karkaṭaḥ || 60 ||
[Analyze grammar]

eteṣāṃ tu śubhaṃ cūrṇaṃ mama gātrasukhāvaham |
evamudvartanaṃ kṛtvā gharṣayitvā śanaiḥ śanaiḥ || 61 ||
[Analyze grammar]

nairmalyaṃ me prakuryācca bhaktaḥ kareṇa sarvathā |
tata āmalakaṃ caiva sugandhacūrṇamuttamam || 62 ||
[Analyze grammar]

tena me sarvagātrāṇi mardayitvā dṛḍhavrataḥ |
yadvā kṣārasnehagandhagūṭikābhiḥ pramārjanam || 63 ||
[Analyze grammar]

snapanaṃ jaladhārābhiḥ kārayenmāṃ sukhāvaham |
paścād gandhaṃ pradadyācca puṣpasārādikaṃ tathā || 64 ||
[Analyze grammar]

karmaṇyānyapi mālyāni puṣpāṃñjaliṃ pradāpayet |
paścād dhūpaṃ ca me dadyāt sugandhadravyamiśritam || 65 ||
[Analyze grammar]

paścād vastraṃ ca me dadyāt kṣaumaṃ śuklaṃ ca pītakam |
paścād bhūṣāṃ mama datvā tvāsanaṃ copakalpayet || 66 ||
[Analyze grammar]

paścādvai bhojanaṃ datvā prasādaṃ saṃgraset tataḥ |
paścājjalaṃ sutāmbūlaṃ dadyānme śayanādikam || 67 ||
[Analyze grammar]

evaṃ bhaktiṃ prakuryānme pādasaṃvāhanaṃ caret |
rañjayenmāṃ kathālāpairhāsayecca hasettathā || 68 ||
[Analyze grammar]

ānandaṃ kārayenmāṃ ca tataḥ saukhyataraṃ nu kim |
bhakto bhaktā ca vā kṛṣṇe sarvasvārpaṇamācaret || 69 ||
[Analyze grammar]

phalaṃ tasya ca goloke kṛṣṇaḥ sarvaṃ dadāti vai |
evaṃ mukteḥ pare lābhe tataḥ saukhyataraṃ nu kim || 70 ||
[Analyze grammar]

rādhāvat sevane kṛṣṇaṃ lakṣmīvacca narāyaṇam |
pārvatīvacchaṃkaraṃ ca prabhāvadbhāskaraṃ prabhum || 71 ||
[Analyze grammar]

māṇikyāvat svāminaṃ cānādikṛṣṇanarāyaṇam |
sevate sarvathā dhāmni tataḥ saukhyataraṃ nu kim || 72 ||
[Analyze grammar]

ya etena vidhānena yakṣyante khalu māṃ priye |
prāpsyanti te parāṃ siddhiṃ mama dhāmagatāṃ dhruvām || 73 ||
[Analyze grammar]

ahameva varārohe sarvabhūtasanātanaḥ |
adhaścordhvaṃṃ ca tiryak ca koṇeṣūpari saṃsthitaḥ || 74 ||
[Analyze grammar]

nare nāryāṃ kumāryāṃ ca vidhavāyāṃ jarāyute |
dehe dehinyapi cāsmi bāle yuni ca garbhage || 75 ||
[Analyze grammar]

evaṃ māṃ yo vijānīyād bhajanmāṃ sarvabhāvanaḥ |
saṃsāre vijayastasya tataḥ saukhyataraṃ nu kim || 76 ||
[Analyze grammar]

yena garbhaṃ na gacchedvai tacchṛṇuṣva samudraje |
kṛtvāpi vipulaṃ karma cātmānaṃ na praśaṃsati || 77 ||
[Analyze grammar]

karoti sarvakarmāṇi śuddhenaivā'ntarātmanā |
aiśvaryayukto bhavati samartho'nugrahādike || 78 ||
[Analyze grammar]

kāryā'kārye vijānāti kṛṣṇadharme viniṣṭhitaḥ |
śītoṣṇavātavarṣādikṣutpipāsāsahastathā || 79 ||
[Analyze grammar]

kṛṣṇadhano nirālasyaḥ satyavāganasūyakaḥ |
brahmacaryaparo nityaṃ svadāraniratastathā || 80 ||
[Analyze grammar]

satyācāro viśuddhātmā nityaṃ ca bhagavatpriyaḥ |
saṃvibhajya viśeṣajñaḥ sādhubhaktasuvatsalaḥ || 81 ||
[Analyze grammar]

priyabhāṣī prabhaktānāṃ mama sevāparāyaṇaḥ |
evaṃ yo me bhavedbhaktaḥ kuyoniṃ nahi gacchati || 82 ||
[Analyze grammar]

nābhilaṣati svargādīn mama lokaṃ sa gacchati |
jīvahiṃsānivṛttaśca sarvabhūtahitakaraḥ || 83 ||
[Analyze grammar]

sarvatra samatāyuktaḥ samaloṣṭhāśmakāñcanaḥ |
bālye sthito'pi vayasi kṣānto dāntaḥ śubhe rataḥ || 84 ||
[Analyze grammar]

pareṇāpakṛte naiva gaṇayatyeva mānase |
mama sevāṃ saṃsmarecca mama satyaṃ ca jalpati || 85 ||
[Analyze grammar]

vyalīkād vinivṛtto yastathyetikṛtaniścayaḥ |
nityaṃ maunaviśeṣasthaḥ parokṣe'pi na cākṣipet || 86 ||
[Analyze grammar]

ṛtukāle striyaṃ gacchedapatyārthī na kāmataḥ |
īdṛśāstu janā bhadrā mama bhaktiparāyaṇāḥ || 87 ||
[Analyze grammar]

garbhavāsaṃ na te yānti yanti vāsaṃ mamāśraye |
ātmanā niścitaṃ kuryāt sākṣiṇaṃ māṃ pradiśya ca || 88 ||
[Analyze grammar]

paravādaṃ na kurvīta śāṭhyadhaurtyaṃ vivarjayet |
na nindeddharmakāryāṇi mama dharmapathe sthitaḥ || 89 ||
[Analyze grammar]

ebhirguṇaiḥ samāyukto mama sevāṃ karoti cet |
māmeva sa samāpnoti tataḥ saukhyatamaṃ nu kim || 90 ||
[Analyze grammar]

punaranyattu vakṣyāmi kamale śṛṇu me priye |
taranti puruṣā yena garbhasaṃsārasāgaram || 91 ||
[Analyze grammar]

jitendriyā jitakrodhā lobhamohavivarjitāḥ |
ātmopakārakā nityaṃ devā'tithigurupriyāḥ || 92 ||
[Analyze grammar]

kapilāpūjakā nityaṃ tīrthayātrākarāstathā |
sādhusādhvīpūjakāśca vṛddhasanmānakārakāḥ || 93 ||
[Analyze grammar]

anāthān pālayed yaśca bhedabhāvaṃ karoti na |
sarveṣāmapi putrāṇāṃ viśeṣaṃ na karoti yaḥ || 94 ||
[Analyze grammar]

saṃkruddhaṃ svaguruṃ dṛṣṭvā yastu tatra prasādayet |
pūjayet kapilāṃ bhaktyā pālayet strīṃ pativratām || 95 ||
[Analyze grammar]

agniṃ nahi kramet padbhyāṃ mehayenna jale kvacit |
gurubhakto bhavennityaṃ jñānavānna ca jalpakaḥ || 96 ||
[Analyze grammar]

evaṃ dharmeṇa saṃyukto yo nu māṃ pratipadyate |
sa ca garbhaṃ na gacchedvai mama lokaṃ sa gacchati || 97 ||
[Analyze grammar]

bhuktvā parasya cānnāni yaścaiva na vikutsati |
bālye vayasyapi ca yo mama nityamanuvrataḥ || 98 ||
[Analyze grammar]

yena kenāpi santuṣṭo mātāpitṛprapūjakaḥ |
dātā bhoktā nyāyataśca svatantro nityasaṃyataḥ || 99 ||
[Analyze grammar]

vikarma nābhikurvīta kaumāravratamāsthitaḥ |
sarvabhūtadayāyuktaḥ sattvena ca samanvitaḥ || 100 ||
[Analyze grammar]

matyā ca nispṛho'tyantaṃ parārtheṣvaspṛhaḥ sadā |
īdṛgbhakto mama śiṣyo mama lokaṃ pragacchati || 101 ||
[Analyze grammar]

imaṃ guhyaṃ varārohe devairapi durāsadam |
tvaṃ me śiṣyā ca dāsī ca bhaktā patnīti kīrtitam || 102 ||
[Analyze grammar]

ityevaṃ śaṃkarastatra pārvatīm ṛkṣaparvate |
mama bhaktiṃ purā prāha tairthabhāve ca nārmade || 103 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne sukhabhāvo duḥkhabhāvaḥ śrīkṛṣṇanārāyaṇapūjā sarvakarmasamarpaṇatādiphalaṃ janmābhāvaścetyādinirūpaṇanāmā saptaṣaṣṭyadhikapañcaśatatamo'dhyāyaḥ || 567 ||
[Analyze grammar]