Chapter 566

śrīnārāyaṇa uvāca |
śṛṇu lakṣmi tvayā pṛṣṭaṃ pūjā kāryā kathaṃ kadā |
ityādisarvapraśnānāṃ kathayāmi vidhānakam || 1 ||
[Analyze grammar]

prātarbrāhme muhūrte ca madhyāhne sāyamityapi |
mama pūjā prakartavyā ṣoḍaśopasuvastubhiḥ || 2 ||
[Analyze grammar]

snapanaṃ bhojanaṃ cārārtrikaṃ vibhūṣaṇādikam |
jalapānaṃ tāmbūlakaṃ puṣpāñjalyādikaṃ caret || 3 ||
[Analyze grammar]

śītakāle kambalādi coṣṇodakādi cārpayet |
mṛṣṭāni bhojanādīni balapuṣṭikarāṇi ca || 4 ||
[Analyze grammar]

varṣākāle hyanuṣṇaṃ cā'śitaṃ jalaṃ tathā'mbaram |
madhyapuṣṭikaraṃ bhojyaṃ dātavyaṃ me priye tadā || 5 ||
[Analyze grammar]

ātapasya ca samaye śītaṃ sugandhavajjalam |
sūkṣmavastrādi dātavyaṃ pacyaṃ bhojyaṃ phalādikam || 6 ||
[Analyze grammar]

sthāpanaṃ ca tadā vācyaṃ samāgaccha prabho priya |
svarṇādyāsanamāsādya gṛhāṇa mama pūjanam || 7 ||
[Analyze grammar]

āgaccha bhagavan svāmin nārāyaṇa pate prabho |
pūjāṃ gṛhītvā gantavyaṃ nijā''vāse na cānyathā || 8 ||
[Analyze grammar]

kāṣṭhādicūrṇasampādyaṃ sugandharasamiśritam |
dhūpaṃ gṛhāṇa bhagavan kṛṣṇanārāyaṇa prabho || 9 ||
[Analyze grammar]

ghṛtadīpaṃ saumyaguṇaṃ gṛhāṇa parameśvara |
ghṛtadīpaṃ candanasya dhūpaṃ gṛhṇāmi bhāvataḥ || 10 ||
[Analyze grammar]

tīlatailasya dīpaṃ ca guggulasya ca dhūpanam |
yadvā gṛhṇāmi kāle'pi puṣpasāraṃ sugandhakam || 11 ||
[Analyze grammar]

tīrthajalāni saṃgṛhya kṣālanaṃ pādayormama |
kartavyamṛtvanusāraṃ gṛhṇāmi pādaśodhanam || 12 ||
[Analyze grammar]

snapanaṃ tīrthasalilairdadhnā dugdhena sarpiṣā |
madhunā śarkarayā ca tailena ca pramardanam || 13 ||
[Analyze grammar]

nairmalyāpādakaṃ cūrṇaṃ snigdhaṃ śāntikaraṃ sitam |
dātavyaṃ mañjanaṃ me ca gātre yogye viśeṣataḥ || 14 ||
[Analyze grammar]

candanaṃ puṣpasārādi viṣṇutailādi lepanam |
gṛhṇāmi nityadā bhaktapradattaṃ bhāvataḥ priye || 15 ||
[Analyze grammar]

svarṇasiṃhāsanādyaṃ ca gṛhṇāmi kambalāsanam |
paṭṭikāṃ kāṣṭhasaṃbhūtāṃ cādhyāsya cābhiṣecanam || 16 ||
[Analyze grammar]

gṛhṇāmi bhāvato lakṣmi dattaṃ nareṇa yoṣitā |
paryaṃke genduke ramye mṛdau sāstaraṇe pṛthau || 17 ||
[Analyze grammar]

pārśvakābhyāṃ yute gaṇḍamaśrukābhyāṃ samanvite |
kaśipuśobhite daṃśavārācchadanasañcite || 18 ||
[Analyze grammar]

guptadorakayukte ca svapimi kamale sadā |
yānaṃ haṃsayutaṃ cāśvayutaṃ gajādiśobhitam || 19 ||
[Analyze grammar]

svarṇanirmāṇarūpaṃ ca vyomagāmi mahattamam |
garuḍaṃ vā māṇikīṃ vā rathaṃ divyaṃ vahāmi vā || 20 ||
[Analyze grammar]

kandamūlaphalādīni sugandharasavanti ca |
pakvāni ṛtujātāni gṛhṇāmi bhaktabhāvataḥ || 21 ||
[Analyze grammar]

svarṇapātre premapātre saṃskṛtaṃ cārpitaṃ śubham |
śaratkāle yathā svasya śiśire'pi yathā svakam || 22 ||
[Analyze grammar]

vasante ca yathā svasya grīṣme cāpi yathā svakam |
prāvṛṣyapi ca varṣānte yathā svasyaiva rocate || 23 ||
[Analyze grammar]

bhogyaṃ dhāryaṃ tathā peyaṃ khādyaṃ vastraṃ vibhūṣaṇam |
jalaṃ yānaṃ vāhanādi vāyurdolā vanādikam || 24 ||
[Analyze grammar]

bhavanaṃ svapanaṃ vāri śayanaṃ sevikādikam |
tathā sarvaṃ mama kalpyaṃ tathā deyaṃ na cānyathā || 25 ||
[Analyze grammar]

yathā dehe tathā deve kartavyaṃ cārpaṇaṃ priye |
arcā ṣaḍaṃgulādūrdhvapramāṇā ca śubhā matā || 26 ||
[Analyze grammar]

catuḥṣaṣṭyaṃgulaṃ yāvat tato dīrghā na śasyate |
pratiṣṭhānaṃ mandire ca netravṛttiḥ samā bhavet || 27 ||
[Analyze grammar]

dvāre ūrdhvaṃ caturthāṃśai netrarekhāsamasthalī |
yathā bhavet tathā mūrteḥ pratiṣṭhānaṃ mataṃ mama || 28 ||
[Analyze grammar]

mūrtyadhaḥ svarṇaratnādi sthāpyaṃ siṃhāsanāntare |
garbhe tatra ca saṃsthāpyā pratimā śrīhareḥ priye || 29 ||
[Analyze grammar]

dakṣiṇe tu patiḥ sthāpyo vāme śrīḥ rādhikā śivā |
lakṣmīśca māṇikī haṃsā prabhā pārvatī maṃjulā || 30 ||
[Analyze grammar]

jayā ca lalitā śāntā manasā ca sarasvatī |
durgā gaṃgā ca kamalā sāvitrī virajā tathā || 31 ||
[Analyze grammar]

anyā api yatheṣṭā syād bhaktasya śrīhareḥ priyā |
saṃsthāpyā karṇanimnā vai yathāśobhaṃ tu darśanam || 32 ||
[Analyze grammar]

pūrve'hani bhavennaktaṃ naktaṃ sūryāstapūrvakam |
dvitīye'hani kāryaṃ na prāśanaṃ ca divāniśam || 33 ||
[Analyze grammar]

patrapuṣpaphalānnāderupoṣaṇaṃ ca tatsmṛtam |
ekahāraḥ phalāhāro jalāhāro na bādhakaḥ || 34 ||
[Analyze grammar]

vasante śvetavastrāṇi phālgune kesarāṇi ca |
kausuṃbhāni tathā''ṣāḍhe svarṇavarṇāni cāśvine || 35 ||
[Analyze grammar]

citravarṇānyutsavādau caikavarṇāni nityadā |
svarṇatārādiśobhāḍhyaṃ dhāryate ca mayā priye || 36 ||
[Analyze grammar]

lohatāraṃ vinā vastraṃ sarvaṃ śreyaskaraṃ matam |
raktaṃ sampatkaraṃ vastraṃ pītaṃ lakṣmīpradaṃ matam || 37 ||
[Analyze grammar]

śvetaṃ jñānakaraṃ śaśvaccitraṃ bhogapradaṃ matam |
nīlaṃ niṣiddhamevā'tra dhāryaṃ naiva kadācana || 38 ||
[Analyze grammar]

madhuparko guḍājyasva śarkarājyasya vāpi ca |
śarkarākṣīramiśrasya khaṇḍādadhnostathā mataḥ || 39 ||
[Analyze grammar]

madhumiṣṭādipeyasya miṣṭapeyasya vā mataḥ |
yadgṛhe jāṭhare śāntirbhavet tat madhuparkakam || 40 ||
[Analyze grammar]

āmrarasādau sarpiśca śarkarā cetyapi trayam |
miṣṭaphaleṣu miṣṭaṃ ca miśritaṃ madhuparkakam || 41 ||
[Analyze grammar]

mahyaṃ deyaṃ yathāyogyaṃ śītalaṃ guṇakṛnmama |
madhuparkapradānena svarge cātra vibhūtayaḥ || 42 ||
[Analyze grammar]

dāturbhavanti satataṃ cānnapānādipuṇyadāḥ |
ghṛtakulyā madhukulyā dadhikulyāśca tadgṛhe || 43 ||
[Analyze grammar]

kṣīrakulyāstakrakulyā jalakulyā bhavanti ca |
yatra loke ca tāḥ kulyāstatra yānti madhupradāḥ || 44 ||
[Analyze grammar]

yāvajjāṭharaśāntiḥ syāttāvatpramāṇakaṃ madhu |
deyaṃ tṛptipradaṃ miṣṭaṃ yena lokāḥ sanātanāḥ || 45 ||
[Analyze grammar]

dāturamṛtadāḥ sarve rasadāśca bhavanti vai |
sāttvikānyeva śākāni kūṣmāṇḍādīni sarvathā || 46 ||
[Analyze grammar]

vṛntākāni dugdhavatīgillikādīni yānyapi |
tāndūlādīni patrāṇi sārṣapādidalāni ca || 47 ||
[Analyze grammar]

karkaṭīkāravellāni cirabhaṭṭāni yāni ca |
saumyāni kandamūlāni santi priyāṇi me priye || 48 ||
[Analyze grammar]

śrīkhaṇḍapāyasādīni kvathitāni śubhāni ca |
kvathikā rājikārāddhamāranālāni yānyapi || 49 ||
[Analyze grammar]

garmarīmarcikātiktakaravīrāmrakāṇi ca |
evaṃvidhāni ramyāṇi santi priyāṇi me sadā || 50 ||
[Analyze grammar]

bhuṃkṣva kāmaṃ miṣṭamiṣṭaṃ śanaiḥ pūrṇaṃ praśāntidam |
yathāruci prabho bhuṃkṣva pakvānnādīni keśava || 51 ||
[Analyze grammar]

ityevaṃ bhojayenmāṃ ca vījayetpavanaṃ tadā |
punaḥ premṇā mama pātre bhaktaḥ sampariveṣayet || 52 ||
[Analyze grammar]

evaṃ vai bhojayennityaṃ svarṇāsane nidhāya mām |
svarṇapātre jalaṃ bhṛtvā svarṇasthālyādipātrake || 53 ||
[Analyze grammar]

premṇā sarvaṃ pariveṣayitvā jalaṃ ca pāyayet |
tāmbūlakaṃ śubhaṃ dadyāt kuryācca pādamardanam || 54 ||
[Analyze grammar]

pūjāyāṃ cāparāddhā me yathā na syustathā bhavet |
māmaśuddhaśarīro na spṛśet snānaṃ vinā kvacit || 55 ||
[Analyze grammar]

mūkavannaiva yāyācca mandirasthaṃ ca māṃ prati |
prabodhayenna vai mūko vinā ghaṇṭādivādanam || 56 ||
[Analyze grammar]

akāle cā'niyamena prabodhayenna māṃ kvacit |
śreṣṭhimānuṣarājārthaṃ jāgaraṃ kārayenna mām || 57 ||
[Analyze grammar]

svārthārthaṃ pūjayennaiva pṛṣṭhaṃ naiva pradarśayet |
kṣuvanaṃ vādakaraṇaṃ maryādātyajanaṃ na vā || 58 ||
[Analyze grammar]

aśuddhavastrasahito na yāyānmama mandiram |
aśuddhavastu saṃspṛśya vinā prakṣālya vai karau || 59 ||
[Analyze grammar]

na māṃ spṛśenna māmakīnāni vastūni saṃspṛśet |
kaṇḍūyanaṃ svayaṃ kṛtvā na māṃ spṛśet kadācana || 60 ||
[Analyze grammar]

duṣṭasaṃkalpamevāpi madgṛhe na hi kārayet |
matpūjāyāṃ svayaṃ nā'dyānna peyāśca jalādyapi || 61 ||
[Analyze grammar]

mūkavatpūjayennaiva vinā me raṭaṇaṃ tadā |
manmālyaśiṣṭasāmagrīdūrīkṛtya punaḥ karam || 62 ||
[Analyze grammar]

aprakṣālya spṛśennaiva nūtanāni ca vastūni |
thūtkārā'pānavāyvādi visarjayenna mandire || 63 ||
[Analyze grammar]

mūtrādikaṃ kriyāccedvai snānaṃ kṛtvā spṛśettu mām |
mama pūjāmadhyavartī nānyakāryaparo bhavet || 64 ||
[Analyze grammar]

anyamanā bhavennāpi durgandhibhakṣako na ca |
aśuddhapāno na syācca na ca hiṃsāparo bhavet || 65 ||
[Analyze grammar]

vastrabhūṣādyarpaṇe māṃ prasahya naiva dhārayet |
śītoṣṇādau yathā svasya tathā syānme'nukūlakṛt || 66 ||
[Analyze grammar]

mukhaprakṣālanaṃ tailamardanaṃ candanārpaṇam |
yathāyogyaṃ prakuryācca nā'dhikaṃ duḥkhakṛd yathā || 67 ||
[Analyze grammar]

śaitye vahnerupasthānaṃ nātyutkṛṣṭaṃ kriyānmama |
vastrāṇāṃ dhāraṇe nityaṃ kuryād vinimayaṃ mama || 68 ||
[Analyze grammar]

bhūṣāṇāṃ dhāraṇe cāpi kuryādvai parivartanam |
na gālīṃ pravadennānyanindāṃ grāmyakathāṃ vadet || 69 ||
[Analyze grammar]

na svapenmandiramadhye nagno bhavenna mandire |
niṣīdenna ca māṃ kṛtvā pṛṣṭhe janamukhaṃ prati || 70 ||
[Analyze grammar]

vinā pādau samprakṣālya na gacchenmandirāntare |
ārātrivartikāṃ dīpaṃ spṛṣṭvā vinā jalena ca || 71 ||
[Analyze grammar]

karaprakṣālanaṃ māṃ vai spṛśennaiva ca vastukam |
nānyaṃ praveśayet kaṃcit kāṃcicca mandirāntare || 72 ||
[Analyze grammar]

ucchiṣṭānanahastādi praviśennaiva mandire |
mālāpuṣpādi cottārya vinā cottāraṇakṣaṇam || 73 ||
[Analyze grammar]

dadyānnānyajanāyeti yadyapi syānmahīpatiḥ |
pūrvadinasya cottārya rakṣayecca dadettadā || 74 ||
[Analyze grammar]

haste samarpya vā dadyāt tātkālikaṃ prasādanam |
āvaraṇapaṭaṃ naiva punarmadhye samucchrayet |
na pātayettathā madhye darśakānāṃ hyapasthito || 75 ||
[Analyze grammar]

śaṃkhaṃ jalena bhatvaiva dīpaṃ prajvālya vai śubham |
vastraṃ mārjanayogyaṃ ca dhṛtvā pātre sugandhibhṛt || 76 ||
[Analyze grammar]

ghaṇṭāṃ saṃvādayitvaiva tataścārārtrikaṃ caret |
nagnamūrteḥ samaye me dvāraṃ noddhāṭayet kvacit || 77 ||
[Analyze grammar]

vastrabhūṣādhāraṇādau dvārapidhānamācaret |
dhūlīṃ rajo jantujālaṃ dūrayedvai pratikṣaṇam || 78 ||
[Analyze grammar]

rātrau ca śayanādūrdhvaṃ cā''prātarmadhyakālikam |
mandiroddhāṭanaṃ naiva kuryādāpadamantarā || 79 ||
[Analyze grammar]

madhyāhne'pi tathā naivoddhāṭayet kaṣṭamantarā |
bhojyakāle vaded bhojyakīrtanaṃ vādyasaṃyutam || 80 ||
[Analyze grammar]

asaṃskṛtamaśuddhaṃ cā'sāttvikaṃ cāmbarādikam |
vibhūṣaṇaṃ ca hārādyanirmalaṃ cānnamityapi || 81 ||
[Analyze grammar]

jalaṃ cānyadāyudhādi na dhārayenna cārpayet |
bhāvanāṃ śailaviṣayāṃ dhāturūpāṃ na cācaret || 82 ||
[Analyze grammar]

divyo'haṃ sarvathā varte vyāpakaścāntarātmakaḥ |
sarvajñaḥ sarvasaṃsthaśca paśyāmi mūrtisaṃsthitaḥ || 83 ||
[Analyze grammar]

cittaikāgryaṃ hi pūjāyāṃ rakṣaṇīyaṃ prayatnataḥ |
sarvendriyāṇāṃ vṛttīnāṃ mama mūrtau viśeṣataḥ || 84 ||
[Analyze grammar]

bhaktasya bhojane deyaṃ miṣṭaṃ prāsādikaṃ mama |
yathā mamātisatkārastathā kāryo janasya me || 85 ||
[Analyze grammar]

bhojanīyo viśeṣeṇa tatra bhuñjāmyahaṃ priye |
prāpaṇaṃ godhūmakaṅkuyavādīnāṃ saduttamam || 86 ||
[Analyze grammar]

madarthaṃ śubhapakvānnaṃ nirmāya deyameva ha |
pātraṃ svarṇādidhātūnāṃ nūtanaṃ deyameva me || 87 ||
[Analyze grammar]

matkṛpāpātratāmāptā bhaktā bhāgavatā mama |
prasādāśanayogyāste tulasīmālikāyutāḥ || 88 ||
[Analyze grammar]

mahāmantrayutāścāpi dīkṣitā narayoṣitaḥ |
ātmanivedibhaktāśca naivedyaprāśane'rhakāḥ || 89 ||
[Analyze grammar]

mamaikāntikabhakteṣu vāsināṃ bhaktiyoginām |
mama loke gatiḥ sāmyā caturbāhusvarūpiṇī || 90 ||
[Analyze grammar]

kṛcchrādivratakartāro yadi bhogecchavo janāḥ |
te tu yānti mahatsvargaṃ vairājaṃ lokamityapi || 91 ||
[Analyze grammar]

akṣāralavaṇā ye ca vratino matkriyāparāḥ |
satyalokaṃ prayāntyeva yadi bhogecchavaḥ sadā || 92 ||
[Analyze grammar]

gavāṃ sevāparā bhaktā mahābhāgavatā yadi |
tadā yānti ca golokaṃ śāśvataṃ dhāma me janāḥ || 93 ||
[Analyze grammar]

uñcchavṛttiparā bhaktāḥ paraṃ vaikuṇṭhameva te |
prayānti rāgahīnāśca yātrāmātraparāyaṇāḥ || 94 ||
[Analyze grammar]

bhikṣāhārā gṛhasthāśca madratāḥ sādhavaśca te |
yānti me śāśvataṃ dhāmā'kṣaramamṛtamavyayam || 95 ||
[Analyze grammar]

mama gṛhe'ntike kṣetre cālaye mandire'pi ca |
prāṇairviyujyate yaḥ sa yātyakṣaraṃ padaṃ mama || 96 ||
[Analyze grammar]

agnitāpā mama bhaktāḥ sākāṃkṣā yānti vai divam |
sauralokaṃ tāpasāste prayāntīndrabhuvaṃ tathā || 97 ||
[Analyze grammar]

śākādyāhārakartāro mama bhaktiparāyaṇāḥ |
mama lokaṃ tvamṛtākhyaṃ prayāntyeva na saṃśayaḥ || 98 ||
[Analyze grammar]

dīpadānaparā ye ca tapaḥparā mamāśritāḥ |
patrapuṣpādidātāro yānti me paramaṃ padam || 99 ||
[Analyze grammar]

dharmiṣṭhāśca satāṃ sevāparā yānti hi madgṛham |
jānuyānā mama bhaktā yānti dhāmā'kṣaraṃ param || 100 ||
[Analyze grammar]

uttānaśayanādyāśca yānti divyaṃ paraṃ padam |
sarvatyāgā mama santo matsvarūpā bhavanti vai || 101 ||
[Analyze grammar]

yatra kvāpi dhṛte dehe mayi sandhṛtamānasāḥ |
ātmanā yānti mallokaṃ rādhālakṣmyāśritaṃ padam || 102 ||
[Analyze grammar]

tyāginaḥ sāṃkhyayogāśca caturbhujā hi viṣṇavaḥ |
bhavantyeva na sandeho muktā madrūpadhāriṇaḥ || 103 ||
[Analyze grammar]

oṃ namaḥ śrīkṛṣṇanārāyaṇāyetijapānvitāḥ |
narā nāryo'kṣarādūrdhvaṃ paraṃ dhāma prayānti me || 104 ||
[Analyze grammar]

śastrahatā api nāmaparā me bhaktisaṃyutāḥ |
pārṣadā mama jāyante'kṣare dhāmni hi śāśvatāḥ || 105 ||
[Analyze grammar]

akasmānmaraṇaṃ prāptā yadi maccittavarttinaḥ |
kṣaṇamātraṃ smaranto māṃ prayānti paramāṃ gatim || 106 ||
[Analyze grammar]

atṛptā naravargā vā nāryo vā me'nuvartinaḥ |
prayānti caiśvarān lokān koṭikanyāprasevitān || 107 ||
[Analyze grammar]

mama dīkṣāparā yānti pare dhāmni mahātmatām |
gṛhasthāḥ kāmabhogāḍhyā bhaktāśced yānti vaikṛtam || 108 ||
[Analyze grammar]

māyāyāśca pradhānāyā lokeṣu vigatajvarāḥ |
tyāgino vidhavādyāśca bhaktāḥ kāmābhilāṣiṇaḥ || 109 ||
[Analyze grammar]

jāyante viṣṇurūpāśca ramārūpāśca dhāmani |
koṭikalpāni saukhyāni bhuñjate te vikuṇṭhake || 110 ||
[Analyze grammar]

mayi snehaparā bhaktā narā nāryo'tikāmukāḥ |
mama patnyo bhavantyeva śāśvatīṃ muktimāśritāḥ || 111 ||
[Analyze grammar]

guravo'pi gṛhasthāśca kṛṣṇarūpā bhavanti te |
goloke sarvabhogāśca śāśvatānandamodinaḥ || 112 ||
[Analyze grammar]

ityetat kathitaṃ lakṣmi tava pṛṣṭaṃ mayā'naghe |
paṭhanācchravaṇāccāsya labhedvai śāṃkarīṃ gatim || 113 ||
[Analyze grammar]

brāhmīṃ vā vaiṣṇavīṃ vāpi sthitiṃ labhenna saṃśayaḥ |
kathayiṣye'nyadevā'pi pārvatyā śaṃkarāya yat || 114 ||
[Analyze grammar]

narmadāmūlake ṛkṣe pṛṣṭaṃ yat tacchubhāvaham |
duḥkhaṃ sukhaṃ ca bhaktānāṃ manomātravikalpanam || 115 ||
[Analyze grammar]

mayā dhāmānyasaṃkhyāni golokādīni cā'kṣare |
prānte bhaktāprabhogārthaṃ nirmitāni sukhāni hi || 116 ||
[Analyze grammar]

bhaktabhaktāyugalāni mama bhaktiparāṇi ca |
madicchayaiṣu tiṣṭhanti yāvadbhogavirāmitā || 117 ||
[Analyze grammar]

bhogatṛptisukhānāṃ vai virāme'kṣaradhāmani |
yānti tāni yugalāni matsvarūpaparāṇi hi || 118 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne śrīlakṣmīkṛtānāṃ vividhapraśnānāṃ bhaktikṛjjanagatisamādhānādinirūpaṇanāmā ṣaṭṣaṣṭyadhikapañcaśatatamo'dhyāyaḥ || 566 ||
[Analyze grammar]