Chapter 525

śrīnārāyaṇa uvāca |
ekadā cāgamannāmnā khyātastvaśvaśirānṛpaḥ |
lomaśasyāśrame kṣetre cāśvapaṭṭasarovare || 1 ||
[Analyze grammar]

kapilastu mahātejā darśanārthaṃ samāyayau |
aśvaśirāḥ kapilaṃ tamṛṣiṃ papraccha saṃśayam || 2 ||
[Analyze grammar]

mokṣaḥ syāt karmaṇā kiṃ vā jñānena nirṇayaṃ vada |
śṛṇu lakṣmi kapilarṣiryamāha nirṇayaṃ śubham || 3 ||
[Analyze grammar]

pravadāmi gṛhasthānāṃ karmiṇāṃ hitakāmyayā |
yatkiṃcit karma vai dehī karoti sādhvasādhu vā || 4 ||
[Analyze grammar]

sarvaṃ nārāyaṇe nyasya kurvannapi na lipyate |
śṛṇu saṃyamano vipra ātreyavaṃśajo'bhavat || 5 ||
[Analyze grammar]

tapasyabhirataḥ prātaḥ snātuṃ bhāgīrathīṃ nadīm |
dharmāraṇye gatastatra hariṇānāṃ gaṇaṃ sthitam || 6 ||
[Analyze grammar]

lubdho niṣṭhurako nāma vyādho dhanuḥsamanvitaḥ |
jighāṃsurāyayau tīre sajyaṃ kṛtvā sasāyakam || 7 ||
[Analyze grammar]

dhanurdṛṣṭvā tu vipraḥ sa vyādhaṃ taṃ mṛgayāratam |
vārayāmāsa mā bhadra jīvaghātamimaṃ kuru || 8 ||
[Analyze grammar]

śrutvā prahasya vyādhastaṃ provāca munisattamam |
nā'haṃ hiṃsāmi vai jīvān nā'haṃ karomi sarvathā || 9 ||
[Analyze grammar]

paramātmā tvayaṃ bhūtaiḥ krīḍati svīyamāyayā |
māyā tasya janiḥ puṣṭirnidhanaṃ ceti vai kramāt || 10 ||
[Analyze grammar]

bhavantyeva hi jīvānāṃ tatra naimittikā vayam |
ahaṃbhāvaḥ sadā brahmanna vidheyo mumukṣubhiḥ || 11 ||
[Analyze grammar]

prāṇayātrāmātrarataṃ karoti cenna lipyate |
ahaṃkārastatra yasya sa sādhutvaṃ na gacchati || 12 ||
[Analyze grammar]

ahaṃkāraṃ parityajya gṛhṇāmyekaṃ mṛgaṃ dvija |
ityākarṇya sa viprendro niṣiṣedha ca lubdhakam || 13 ||
[Analyze grammar]

hiṃsanaṃ sarvathā pāpaṃ mā kurvevaṃ kadācana |
santi phalāni mūlāni patrāṇi ca jalāni ca || 14 ||
[Analyze grammar]

sasyāni śākapatrāṇi nirvāhaṃ taiḥ samācara |
ahiṃsane suyātrā cennirvahet hiṃsi mā vṛthā || 15 ||
[Analyze grammar]

ahaṃkāro na kartavya iti te vāci vartate |
nātmani kintu vai svārthe bhavān mṛgādano yataḥ || 16 ||
[Analyze grammar]

upadeśaṃ prakurvanti sarve'bhimānavarjane |
na tyajanti cābhimānaṃ vāṅmanasoḥ pṛthakpṛthak || 17 ||
[Analyze grammar]

vadanti cānyat prakurvanti cānyat |
pramūṣya cānyān viharanti cānyat |
svārthapravīṇāśca nijārthamāpya |
dūrī bhavantyeva parān vināśya || 18 ||
[Analyze grammar]

vyādhaḥ prāha ṛṣe nāhaṃ kapaṭī svārthasādhakaḥ |
parīkṣāṃ me kuru tvatra pratyakṣaṃ te bhavennanu || 19 ||
[Analyze grammar]

kuru loṣṭhamayaṃ jālaṃ tasyā'dho vahnimāvaha |
atīva tatra śuṣko jvālayatāṃ kāṣṭhasañcayaḥ || 20 ||
[Analyze grammar]

tathākṛte tu vipreṇa pradhmātaścānalo hyati |
gavākṣairnirgatā jvālāḥ sahasrāṇi ca jālake || 21 ||
[Analyze grammar]

lohajālaṃ tadā raktaṃ yadā vahnirivā''babhau |
tadā vyādho yogasiddhiṃ samālambya nijāṃ tanum || 22 ||
[Analyze grammar]

vahnirūpāṃ tu kṛtavān sūryavaddāhasaṃcayām |
vahniryasya purastatra nistejasko babhūva ha || 23 ||
[Analyze grammar]

niṣasāda samutthāya jāle tatra sa lubdhakaḥ |
vahnirvai vahninā naiva dahyate ca yathā tathā || 24 ||
[Analyze grammar]

lubdhako naiva dagdho hi kāṣṭhajanyena vahninā |
saṃyamano brāhmaṇaśca tathā'nye vismayaṃ gatāḥ || 25 ||
[Analyze grammar]

prāhuḥ kastvaṃ vada cāsmān saḥ prāhā'haṃ hutāśanaḥ |
svayaṃ cāsmi na me hiṃsā pacyante mayi dehinaḥ || 26 ||
[Analyze grammar]

ahaṃ buddhiṃ vihāyaiva karomi svasvabhāvavat |
ahaṃkāro mama naṣṭastapasā jñānayojinā || 27 ||
[Analyze grammar]

ahaṃkāre vinaṣṭe ca karmabhirnahi lipyate |
ahaṃkāro mūlamasti stambo mamatvamucyate || 28 ||
[Analyze grammar]

śākhā rāgastathā dveṣo graghro lobhaśca mohanam |
patrāṇi tatra karmāṇi rasaścāsvādanaṃ sadā || 29 ||
[Analyze grammar]

puṣpaṃ pravartanākhyaṃ ca phalaṃ miṣṭaṃ sukhaṃ tathā |
amiṣṭaṃ tu bhaved duḥkhaṃ bhuñjate dehinaḥ sadā || 30 ||
[Analyze grammar]

vahnermūle kṣipa vāri jvālā niryānti yatsthalāt |
ityukto brāhmaṇastatra toyapūrṇaṃ ghaṭaṃ drutam || 31 ||
[Analyze grammar]

cikṣepa sahasā vahniḥ praśaśāma yadā tale |
jvālāḥ sarvā vinaṣṭāśca mūlanāśāt samantataḥ || 32 ||
[Analyze grammar]

lubdhakastvāha taṃ vipraṃ pratyakṣaṃ vai nidarśanam |
mūlanāśe samastasya vṛkṣasya nāśanaṃ bhavet || 33 ||
[Analyze grammar]

abhimānaṃ pramūlaṃ cennaṣṭaṃ karmakṛtāṃ yadi |
pāpenāpi ca puṇyena lipyate na kadācana || 34 ||
[Analyze grammar]

etasmin jvalito vahnirbahuśākhaśca sattama |
mūlanāśe'bhavannaṣṭastathā'haṃ karmavān sadā || 35 ||
[Analyze grammar]

ātmā dehaṃ samāśritya piṇḍadharmaṃ samāśritaḥ |
kṣudhayā tṛṣayā vyāptaḥ khādan piban pravṛttimān || 36 ||
[Analyze grammar]

kurvan sarvaṃ varjayitvā'bhimānaṃ lepakāraṇam |
antarātmani saṃyuktaḥ kurvāṇo nā'vasīdati || 37 ||
[Analyze grammar]

athā''ha lubdhako vipraṃ spṛśa loṣṭhaṃ dvijottama |
loṣṭhaṃ coṣṇaṃ dāhakāri jñātaṃ tyaktaṃ dvijena tu || 38 ||
[Analyze grammar]

tataḥ pasparśa sa vyādhastasya dāho na cā'bhavat |
lubdhakastaṃ tadā prāha saṃskārāścābhimānajāḥ || 39 ||
[Analyze grammar]

yathā loṣṭhe vahnijanyāḥ saṃskārā dāhakā iva |
yāvadbhavanti puruṣāstāvad dahyanti sarvathā || 40 ||
[Analyze grammar]

tathā'bhimānasaṃskārā yāvadbhavanti dehiṣu |
tāvat puṇyena pāpena lipyante nātra saṃśayaḥ || 41 ||
[Analyze grammar]

abhimānaṃ ca saṃskārāstyājyāstapasyayā tathā |
kṛṣṇanārāyaṇabhaktyā yogena dhyānavṛttibhiḥ || 42 ||
[Analyze grammar]

sarvasamarpaṇabhaktyā lipyate nahi karmabhiḥ |
evamukte tu vai vipre vyādhasyopari cāmbarāt || 43 ||
[Analyze grammar]

papāta puṣpavṛṣṭiśca viprasyopari vai manāk |
tato vyādho hariṇaṃ taṃ jaghānaikaṃ tadāpi ca || 44 ||
[Analyze grammar]

vipraḥ prāha mṛgātmā ca kutra yāti pradarśaya |
vyādhaḥ saṃkalpayāmāsa vimānaṃ svargalokajam || 45 ||
[Analyze grammar]

tāvad divyavimānāni kāmagāni mahānti ca |
bahuratnāni mukhyāni dadarśa brāhmaṇottamaḥ || 46 ||
[Analyze grammar]

teṣu niṣṭhurakaṃ lubdhaṃ sarveṣu samavasthitam |
dadarśa brāhmaṇastatra kāmarūpiṇamuttamam || 47 ||
[Analyze grammar]

advaitabhāvanāsiddhaṃ yogādbahuśarīrakam |
mṛgaṃ divyasvarūpaṃ ca devātmakaṃ vilokya ca || 48 ||
[Analyze grammar]

dṛṣṭvā vipro mudā yuktaḥ saṃyamano babhūva ha |
anye cāpyabhavaṃstatra dehā'haṃkāravarjitāḥ || 49 ||
[Analyze grammar]

evaṃ jñātaṃ bhavet karma kurvato'pi svajātikam |
nirbandhaṃ tat pāpapuṇyavilepena vivarjitam || 50 ||
[Analyze grammar]

tādṛśaṃ naiva cātmānaṃ karoti bandhanaṃ kvacit |
yathā nārāyaṇo devo nirlepo vastumātrakam || 51 ||
[Analyze grammar]

kurvan gṛhṇan kārayaṃśca grāhayan lepavarjitaḥ |
pratyuta svapadaṃ prāptaṃ nirguṇaṃ prakaroti tat || 52 ||
[Analyze grammar]

tathā''tmā māyayā hīno na karoti na lipyate |
prāptaṃ bhuktaṃ jaḍaṃ vastu karoti divyameva tat || 53 ||
[Analyze grammar]

nirliptaṃ bandhanahīnaṃ muktisthaṃ tat karoti vai |
jñātvā saṃyamano vipraḥ prayayau nijamāśramam || 54 ||
[Analyze grammar]

kapilaścā'śvaśirasaṃ nṛpaṃ prāha tathā punaḥ |
tasmāt tvamapi rājendra devaṃ nārāyaṇaṃ prabhum || 55 ||
[Analyze grammar]

ātmanyeva svadehe tu paśya tvārādhayanprabhum |
nirlipto bhavitā śīghraṃ yathā vyādho'bhavatpurā || 56 ||
[Analyze grammar]

kapilasya vacaḥ śrutvā sa rājā'śvaśirāḥ śubhaḥ |
mene ca karmiṇāṃ muktiṃ kṛṣṇārpitena karmaṇā || 57 ||
[Analyze grammar]

atha tatrā'gamat tāvajjaigīṣavyo mahāmuniḥ |
pañcāśatkalpakāyuśca lomaśasyā''śrame śubhe || 58 ||
[Analyze grammar]

ṛṣayaste tadā cakruḥ svāgataṃ ca parasparam |
cakruḥ svargādilokānāṃ saṃbhāṣāṃ kṣemakāriṇīm || 59 ||
[Analyze grammar]

aśvaśirā praṇamyaiva kapilaṃ saṃsthiteṣu ca |
sarveṣu ṛṣiṣu madhye saṃpapraccha praṇamya tam || 60 ||
[Analyze grammar]

kathamārādhaye devaṃ hariṃ nārāyaṇaṃ param |
kapilaḥ prāha vai rājan nārāyaṇā hyanantakāḥ || 61 ||
[Analyze grammar]

bhavanti śrīkṛṣṇanārāyaṇopāsanayā'tra vai |
ka eṣaḥ procyate rājaṃstvayā nārāyaṇo guruḥ || 62 ||
[Analyze grammar]

āvāṃ nārāyaṇau dvau tu tvatpratyakṣagatau nṛpa |
aśvaśirāstadākarṇya samuvāca dvijau ca tau || 63 ||
[Analyze grammar]

jaigīṣavyaḥ kapilaśca śrutau mayā purā śubhau |
bhavantau brāhmaṇau siddhau tapasā dagdhakilbiṣau || 64 ||
[Analyze grammar]

kathaṃ nārāyaṇāvāvāmiti me vadatho vacaḥ |
śaṃkhacakragadāpadmadhanuḥsvastikaketubhiḥ || 65 ||
[Analyze grammar]

yuktaḥ pītāmbaro lakṣmīpatirgaruḍavāhanaḥ |
nārāyaṇaḥ parabrahma kastasya sadṛśo bhuvi || 66 ||
[Analyze grammar]

itirājño vacaḥ śrutvā tau viprau siddhayoginau |
jahasatuḥ paśya nārāyaṇaṃ ceti jajalpatuḥ || 67 ||
[Analyze grammar]

evamuktvā sa kapilaḥ svayaṃ viṣṇurbabhūva ha |
jaigīṣavyaśca garuḍastatkṣaṇaṃ samajāyata || 68 ||
[Analyze grammar]

rājā tvāścaryamāpanno dṛṣṭvā sagaruḍaṃ harim |
natvā''ha śāmyatāṃ viprau nemaṃ pṛcchāmi nrāyaṇam || 69 ||
[Analyze grammar]

kintu brahmā yato jāto nābhipaṃkajamadhyagaḥ |
tamenaṃ brahmapitaraṃ nrāyaṇaṃ saṃvadāmyaham || 70 ||
[Analyze grammar]

śrutvā ca kapilastatra padmanābho babhūva ha |
jaigīṣavyo'bhavad brahmā nābhipadmopari sthitaḥ || 71 ||
[Analyze grammar]

brahmaṇastu lalāṭādvai rudro'bhūd raktanetrakaḥ |
rājā tavā vicāryaiva punaḥ prāha ca tau dvijau || 72 ||
[Analyze grammar]

nekṣyo bhavati sarvātmā sarvavyāpī narāyaṇaḥ |
bhavadbhyāṃ darśitā māyā yogibhyāṃ yogasiddhijā || 73 ||
[Analyze grammar]

nārāyaṇastu bhagavān nekṣyaḥ sarvātmakaḥ prabhuḥ |
tatastatra kapilena jaigīṣavyena vai tadā || 74 ||
[Analyze grammar]

sarvātmakāni rūpāṇi darśitāni nijātmanoḥ |
matkuṇā maśakā yūkā bhramarā bhoginaḥ khagāḥ || 75 ||
[Analyze grammar]

aśvā gāvo dvipāḥ siṃhā vyāghrā gomāyavo mṛgāḥ |
anye'pi paśavaḥ kīṭā grāmyā āraṇyakāstathā || 76 ||
[Analyze grammar]

paśavo mānavā vṛkṣā vallikādyāśca sarvaśaḥ |
taddṛṣṭvā bhūtasaṃghātaṃ sa rājā vismayaṃ gataḥ || 77 ||
[Analyze grammar]

viveda jaigīṣavyasya māhātmyaṃ kapilasya ca |
papraccha tāvṛṣī bhaktyā kimidaṃ dvijasattamau || 78 ||
[Analyze grammar]

tau dvijābūcaturbhūpa tvayā pṛṣṭhaṃ ca kiṃ smara |
kathamārādhaye devaṃ hariṃ nārāyaṇaṃ param || 79 ||
[Analyze grammar]

ārādhanāya pratyakṣo harirvai te pradarśitaḥ |
kapilo'haṃ ca pratyakṣo bhavāmyatra narāyaṇaḥ || 80 ||
[Analyze grammar]

bhaja māṃ yadi te śraddhā pratyakṣaṃ prāptameva ha |
sarvajñasya guṇāḥ sarve mayi santi tadaṃśataḥ || 81 ||
[Analyze grammar]

tasmāllabdhā mayā sarve bhaktyā tava pradarśitaḥ |
sa tu nārāyaṇo devaḥ sarvajñaḥ kāmarūpavān || 82 ||
[Analyze grammar]

padmanābhādapi dūraṃ mahāviṣṇoḥ pare'sti ca |
golokāccāpi vaikuṇṭhātpare cākṣaradhāmani || 83 ||
[Analyze grammar]

anādiśrīkṛṣṇanārāyaṇo mukteṣu rājate |
saumyaḥ kvāpi svecchayā'tra prāpyate mānavaiḥ kila || 84 ||
[Analyze grammar]

lomaśo'yaṃ prāptavāṃstaṃ kṛṣṇanarāyaṇaṃ param |
atrā'śvapaṭṭasarasaḥ kṣetre śrīkṛṣṇavallabham || 85 ||
[Analyze grammar]

sarveṣāmavatārāṇāmavatāriṇamacyutam |
āvāṃ tasya darśanārthamāgatau svaḥ śubhāśrame || 86 ||
[Analyze grammar]

sa vai sarvaśarīrasthaḥ paramātmā jagatpatiḥ |
svadehe vartate cāpi dṛśyate nijabhaktitaḥ || 87 ||
[Analyze grammar]

ato'rthaṃ darśitaṃ rūpaṃ śrīkṛṣṇannārāyaṇasya ca |
āvayostava rājendra pratītiḥ syādyathā tava || 88 ||
[Analyze grammar]

evaṃ sarvagato devastava dehe'pi vartate |
sarvaprajāsu bhṛtyeṣu mantriṣvapi sthitaḥ sa hi || 89 ||
[Analyze grammar]

paśavaḥ kīṭasaṃghādyāḥ sarve viṣṇumayā nṛpa |
bhāvanāṃ tu dṛḍhāṃ kuryād yadvai sarvamayo hariḥ || 90 ||
[Analyze grammar]

nānyat tatsadṛśaṃ bhūtaṃ sarvabhūteṣvavasthitaḥ |
tamāntarasthaṃ vai devamitibhāvena sevatām || 91 ||
[Analyze grammar]

eṣa te darśitaścārādhanāmārgo'timokṣadaḥ |
paripūrṇena bhāvenā'rcaya kṛṣṇanarāyaṇam || 92 ||
[Analyze grammar]

pūjopahārairdhūpādyairnaivedyārārtrikādibhiḥ |
dhyānena dāsabhaktyā ca suprāpyaḥ sa pareśvaraḥ || 93 ||
[Analyze grammar]

yo'sau nārāyaṇo devaḥ paramātmā sanātanaḥ |
tattadrūpeṇa bahudhā vartate kāryakṛt prabhuḥ || 94 ||
[Analyze grammar]

matsyaḥ kūrmo varāhaśca narasiṃhaśca vāmanaḥ |
rāmo rāmaśca kṛṣṇaśca buddhaḥ kalkī tathā'pare || 95 ||
[Analyze grammar]

ityetāḥ kathitāstasya mūrtayaḥ kapilādayaḥ |
sādhavaścāpi siddhāśca sādhvyaḥ satyaśca yoginaḥ || 96 ||
[Analyze grammar]

darśanaṃ prāptumicchūnāṃ sopānāni bhavanti vai |
yattasya parama rūpaṃ tanna paśyanti devatāḥ || 97 ||
[Analyze grammar]

asmadādisvarūpeṇa pūrayatyeva bhāvanām |
tasmād vyāptamidaṃ sarvaṃ jagannārāyaṇena hi || 98 ||
[Analyze grammar]

bhaja taṃ ca priye yathābhimate sthitamacyutam |
bṛhaspatiḥ purā raibhyaṃ brahmaputraṃ jagāda ha || 99 ||
[Analyze grammar]

vasusaṃjñaṃ tu rājānaṃ cākṣuṣe tvāntare manoḥ |
raibhya śṛṇu vaso rājan samākarṇaya cādarāt || 100 ||
[Analyze grammar]

yatkiñcit kurute karma puruṣaḥ sādhvasādhu vā |
sarvaṃ nārāyaṇe nyasya kurvannapi na lipyate || 101 ||
[Analyze grammar]

sa ca nārāyaṇaḥ śrīmān sarvaprāṇiṣvavasthitaḥ |
bhaja taṃ śrīkṛṣṇanārāyaṇaṃ cāntaragaṃ prabhum || 102 ||
[Analyze grammar]

tatastau śrīkṛṣṇanārāyaṇaṃ saṃbhejatuḥ sadā |
muktiṃ yātau pare dhāmni dāsyātmikāṃ ca śāśvatīm || 103 ||
[Analyze grammar]

ityetat kathitaṃ sarvaṃ kapilasya vaco'rthadam |
rājā cāśvaśirāḥ putraṃ jyeṣṭhaṃ sthūlaśirāhvayam || 104 ||
[Analyze grammar]

abhiṣicya nije rājye natvā gurūn punaḥ punaḥ |
naimiṣākhyaṃ vanaṃ dūraṃ yayau tatra hariṃ prabhum || 105 ||
[Analyze grammar]

tapasā''rādhayāmāsa pratyakṣo'bhūddhariḥ svayam |
vimānena nijaṃ bhaktaṃ nināyā'kṣaradhāma saḥ || 106 ||
[Analyze grammar]

ityetat kathitaṃ sarvamaśvaśiraḥpramokṣaṇam |
karmaṇā cārpiteneśeśvare jñānānvitena vai || 107 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne kapilena aśvaśirase rājñe jñānadāne saṃyamanadvijaniṣṭhurakavyādhanidarśanena karmaṇā sarvasamarpaṇātmakena mokṣaḥ pradarśitaḥ kapilasya jaigīṣavyasya cā'nekavibhūtirūpatvaṃ cetyādinirūpaṇanāmā pañcaviṃśatyadhikapañcaśatatamo'dhyāyaḥ || 525 ||
[Analyze grammar]