Chapter 524

śrīnārāyaṇa uvāca |
ākarṇaya mahālakṣmi lomaśasya kathāṃ śubhām |
prātaḥ samutthito rājā kṛtāhniko guruṃ prati || 1 ||
[Analyze grammar]

jagāma darśanārthaṃ ca dṛṣṭvā kṛṣṇanarāyaṇam |
guruṇā''śīryojitaḥ sa papraccha lomaśam ṛṣim || 2 ||
[Analyze grammar]

bhagavan mokṣadātastvaṃ māyātīto jitendriyaḥ |
vartase ca yathā dhāmni tathaivātra karāgradṛk || 3 ||
[Analyze grammar]

vada me bhagavaddhāmni kālo nāsti tataḥ prabho |
nityaḥ sevāprakārāderniyāmakaḥ kṣaṇātmakaḥ || 4 ||
[Analyze grammar]

dinātmako vyavahāraḥ kathaṃ bhaktairvidhīyate |
iti pṛṣṭo lomaśastu rājānaṃ prāha bhūpate || 5 ||
[Analyze grammar]

kṛṣṇanārāyaṇamūrteḥ kiraṇaiḥ suprabhānvitaiḥ |
prasaradbhirbhinnarūpaiḥ kṣaṇādyāḥ santi sarvadā || 6 ||
[Analyze grammar]

tajjñāstatkiraṇaiḥ prātarmadhyaṃ sāyaṃ vidanti ca |
kṛṣṇanārāyaṇasteṣāṃ sevāṃ gṛhṇāti tatra ca || 7 ||
[Analyze grammar]

mūrtau līnasthitirnidrā dāsyasevā tu jāgratī |
śvetaprakāśanaṃ cāhaḥ sandhyā raktaprakāśanam || 8 ||
[Analyze grammar]

meghaśyāmāvaloke ca mūrtau sthairyaṃ niśeti ca |
goloke'pi tathā kṛṣṇakiraṇairvyavahṛtayaḥ || 9 ||
[Analyze grammar]

vaikuṇṭhe'pi tathā nārāyaṇatejaḥprarītayaḥ |
akṣare tu pare dhāmni parabrahmaprabhādibhiḥ || 10 ||
[Analyze grammar]

ityevaṃ tadgatebhyaśca śrutaṃ muktebhya eva yat |
kathitaṃ te cendradyumna kimanyat praṣṭumicchasi || 11 ||
[Analyze grammar]

indradyumnastato lakṣmi papraccha lomaśam ṛṣim |
kṛṣṇanārāyaṇaścātra kṣetre prākaṭyamicchati || 12 ||
[Analyze grammar]

yadā tadā sa kiṃ mātṛgarbhe tiṣṭhati vā na vā |
bhautikaṃ kiṃ tasya varṣma utā'nyādṛśameva kim || 13 ||
[Analyze grammar]

chindhi me saṃśayaṃ jātaṃ laukikaṃ ca kṛpāṃ kuru |
lomaśaḥ prāha rājarṣe kṛṣṇasya paramātmanaḥ || 14 ||
[Analyze grammar]

nārāyaṇasya sarvasyā'vatārāderyadā yadā |
sṛṣṭau bhavati prākaṭye tadā garbhānusārataḥ || 15 ||
[Analyze grammar]

vāyuṃ garbhasthitaṃ tvājñāpayatyeva hariḥ sadā |
garbhakukṣo tvayā stheyaṃ jalena saha tāvatā || 16 ||
[Analyze grammar]

yathā garbhavatī mātā bahirdṛśyeta vai tathā |
kukṣiṃ procchrayatāṃ prāptāṃ kuru kālena yāvatā || 17 ||
[Analyze grammar]

yatra yatra yādṛśaśca samayaḥ samapekṣyate |
tāvattatra darśayitvā garbhasyā'pyabhivardhanam || 18 ||
[Analyze grammar]

prasavasya samaye ca vāyorjalasya kukṣitaḥ |
bahirniḥsāraṇaṃ tatra darśanīyaṃ ca laukikam || 19 ||
[Analyze grammar]

mayā tatra tadā tatrasthitairanabhilakṣitam |
bālarūpaṃ yathā garbhajanyaṃ dṛśyeta vai tathā || 20 ||
[Analyze grammar]

bhāsamātraṃ karaṇīyaṃ garbhajalābhiyojitam |
māyayā channanetrāṇāmatra nāsti gatirmayi || 21 ||
[Analyze grammar]

divyadṛśaḥ prapaśyanti divyāṃ sūkṣmāṃ mama kṛtim |
sthūladṛśaḥ prapaśyanti garbhājjāto hi bālakaḥ || 22 ||
[Analyze grammar]

evameva hi muktāśca bhavantyayonisaṃbhavāḥ |
mātāpitrorna tajjñānaṃ yato ratipriyau hi tau || 23 ||
[Analyze grammar]

kāmadevasya rītyaiva tayorbhānaṃ mamodbhave |
akāmayostu divyaṃ vai tatkṣaṇānmama darśanam || 24 ||
[Analyze grammar]

tato vāyo na me garbhāgamo na dhātusaṃśrayaḥ |
na ca garbhagṛhe vāso yonerniṣkāsanaṃ na hi || 25 ||
[Analyze grammar]

bālyabhāvo na me tvasti na janmamaraṇe hyubhe |
na hi deho bhautiko me kintu darśaya tattathā || 26 ||
[Analyze grammar]

evamājñāpayati śrīkṛṣṇanārāyaṇaḥ prabhuḥ |
rājaṃstadanusāreṇa vāyudarśayati kṛtim || 27 ||
[Analyze grammar]

bhojanādi tathā tasya nityatṛptasya vai hareḥ |
laukikaṃ naiva bhavati bhaktāḥ kurvanti bhāvataḥ || 28 ||
[Analyze grammar]

yadyadātmana evā'sti priyaṃ bhogyaṃ manoharam |
tasmai samarpya bhoktavyaṃ dharmaścāyaṃ sanātanaḥ || 29 ||
[Analyze grammar]

evaṃ bhaktakṛtā sevā nityatṛptasya tṛptidā |
lakṣmyai purā pradattaṃ ca varadānaṃ tu śārṅgiṇā || 30 ||
[Analyze grammar]

niveditaṃ na vai nyūnaṃ kathaṃ bhavati tatra vai |
hariḥ prāha mayā bhuktaṃ vardheta na kṣayaṃ vrajet || 31 ||
[Analyze grammar]

yathā yathāhaṃ bhuñje tat vardhate ca tathā tathā |
jaḍaṃ cetanatāṃ yāti divyabhāvaṃ prapadyate || 32 ||
[Analyze grammar]

prasannatāṃ samāsādya yāti praphullatā tadā |
navaṃ navaṃ bhavatyeva rasānvitaṃ śubhapradam || 33 ||
[Analyze grammar]

divyadṛśaḥ prapaśyanti paśyanti na bahirdṛśaḥ |
ityetat kathitaṃ rājan naivedyasya pravardhanam || 34 ||
[Analyze grammar]

evaṃ kṛṣṇe pradattānāṃ hrāso nāsti kvacinnṛpa |
pratyuta vardhate sarvaṃ kimanyacchrotumicchasi || 35 ||
[Analyze grammar]

indradyumnastato'pṛcchallomaśaṃ sadguruṃ harim |
kasmāt tvaṃ groṣmakāle'pi madhyaṃ prāpte divākare || 36 ||
[Analyze grammar]

nivāsārthaṃ gṛhaṃ ramyaṃ kimarthaṃ na karoṣi vai |
lomaśastaṃ nṛpaṃ prāha svalpāyuścāsmi sarvathā || 37 ||
[Analyze grammar]

kasyārthaṃ kārya āvāsastvanityaṃ jīvitaṃ yataḥ |
yadi syācchāśvataṃ dīrghaṃ jīvitaṃ gṛhamābhajet || 38 ||
[Analyze grammar]

rājā prāha ca sarveṣāṃ cirāyuḥ śrūyate bhavān |
tenā'hamapi saṃprāpto bhavaddarśanakāmyayā || 39 ||
[Analyze grammar]

lomaśastu tadā prāha śṛṇu rājan vadāmi tat |
kalpe kalpe prasaṃprāpte romaikyaṃ mama naśyati || 40 ||
[Analyze grammar]

abhāve vakṣaso romṇāṃ mama nāśo bhaviṣyati |
trilakṣaṃ ca pañcaṣaṣṭisahasrāṇi gatāni me || 41 ||
[Analyze grammar]

kalpāni tatra vai naṣṭā vedhaso dṛśa me puraḥ |
nābheruparicā''kaṇṭhaṃ romāṇi santi me nṛpa || 42 ||
[Analyze grammar]

ṣaṭtriṃśallakṣapañcāśatsahasrāṇi ca tāni vai |
trilakṣaṃ ca pañcaṣaṣṭisahasrāṇyadhikāni ca || 43 ||
[Analyze grammar]

tāvatkalpānuṣitvaiva brahmāṇḍeṣu tataḥ param |
yāsyāmi paramaṃ lokaṃ kiṃ karomi gṛheṇa vai || 44 ||
[Analyze grammar]

paśya tvaṃ maccharīre'tra jānoradho'ṅgulāyatam |
yāvatkalpaṃ pratispardhi saṃjātaṃ romavarjitam || 45 ||
[Analyze grammar]

jīvitavyaṃ dhruvaṃ nāsti jñāyate romanāśanāt |
na karomi gṛhaṃ tena kāraṇena mahīpate || 46 ||
[Analyze grammar]

rājā prāha ṛṣe pūrvaṃ kiṃ karma vihitaṃ tvayā |
tapo dānaṃ kṛtaṃ kīdṛg yenedṛgjīvitaṃ ciram || 47 ||
[Analyze grammar]

lomaśastu tadā prāha śṛṇu rājan ciraṃ mama |
ahamāsaṃ purā sṛṣṭau śūdro dāridryapīḍitaḥ || 48 ||
[Analyze grammar]

dāsyaṃ kurvan tadā''saṃ saṃgato'haṃ badarīvanam |
kṣutkṣāmaḥ supipāsārto dṛṣṭvā nārāyaṇaṃ naram || 49 ||
[Analyze grammar]

jalaṃ kamalapuṣpāṇi samarpyārcanamācaram |
atha pūjāṃ vinirvartya girermārgaṃ samāśritaḥ || 50 ||
[Analyze grammar]

himena kṣudhayā mṛtyuṃ gato vipragṛhe tataḥ |
jātismaro'bhavaṃ tena maunaṃ rakṣāmi sarvathā || 51 ||
[Analyze grammar]

īśāna iti me nāma pitā cakre praharṣitaḥ |
anyaiḥ sampreryamāṇo'pi naiva jalpāmi kiñcana || 52 ||
[Analyze grammar]

vairāgyaṃ paramaṃ prāpto dṛṣṭvā saṃsārasaṃsthitim |
pitā me'yojayad vācaḥ prakāśārthaṃ tu bheṣajam || 53 ||
[Analyze grammar]

tena me jāyate hāsyaṃ kṛtamantrajanānprati |
aśvapaṭṭasaraḥkṣetre nivasan bhaktibhāvataḥ || 54 ||
[Analyze grammar]

kṛṣṇanārāyaṇaṃ devaṃ pūjayāmi samāhitaḥ |
śiloñcchavṛttimāsādya prāṇavṛttiṃ samācaran || 55 ||
[Analyze grammar]

nāraṃgairbadaraiḥ śākaiścirbhaṭaiḥ phalapatrakaiḥ |
tato me śrīkṛṣṇanārāyaṇaḥ pratyakṣatāṃ gataḥ || 56 ||
[Analyze grammar]

uvāca parituṣṭo'smi varaṃ varaya suvrata |
tato'rthitaṃ mayā kuru jarāmaraṇavarjitam || 57 ||
[Analyze grammar]

kṛṣṇaḥ prāha na vai martye'maratvaṃ kasyacidbhavet |
maryādāṃ kuru tasmātte jīvitasya dadāmi tat || 58 ||
[Analyze grammar]

tataścokto hariḥ kalpe kalpe raumaikapātanam |
bhavenme nābhitaḥ kaṇṭhāvadhiṃ romṇāṃ prapātanam || 59 ||
[Analyze grammar]

tāvadāyurmamaivā'stu vedho'bdānāṃ daśādhikam |
śataṃ yatra vilīyeta tato yāsyāmi dhāma te || 60 ||
[Analyze grammar]

tathā'stviti hariḥ prāha yayau cā'darśanaṃ tataḥ |
tata ārabhya caivātra kuṃkumavāpikā'ntike || 61 ||
[Analyze grammar]

aśvapaṭṭasaraḥkṣetre nivasāmi tathā'vadhim |
kṛṣṇanārāyaṇasevāphalaṃ me cirajīvanam || 62 ||
[Analyze grammar]

pṛthvīnāṃ pralayā dṛṣṭā jīvane'tra sahasraśaḥ |
pralaye yāmi vaikuṇṭhaṃ jalasyopari saṃsthitam || 63 ||
[Analyze grammar]

tejaāvaraṇaprānte punaḥsṛṣṭau bhuvaṃ prati |
āgacchāmi nivasāmi kṛṣṇanārāyaṇāśrame || 64 ||
[Analyze grammar]

patnīvratastathā vipraḥ pativratā ca tatpriyā |
bhavatastau cirajīvau pratikeśā'japātanau || 65 ||
[Analyze grammar]

tathā śrīkambharālakṣmīgopālakṛṣṇabhūsurau |
bhavatastau cirajīvau pratikeśā'japātanau || 66 ||
[Analyze grammar]

kṛṣṇanārāyaṇastasya bālo'kṣarapatiḥ svayam |
pratisṛṣṭi pratikalpaṃ jāyate ca tayorgṛhe || 67 ||
[Analyze grammar]

tameva śrīkṛṣṇanārāyaṇaṃ bhajāmi sarvadā |
teṣāmāyurvilokyaiva mama garvo na vartate || 68 ||
[Analyze grammar]

bhajāmi śrīkṛṣṇanārāyaṇaṃ tvaṃ bhaja taṃ harim |
lokasya haribhaktasya vāñcchitaṃ nāsti durlabham || 69 ||
[Analyze grammar]

ityevaṃ mama vṛttāntaḥ kathitaścendradyumnaka |
tvaṃ jātaḥ kīrtimān loke gacchā'kṣarapadaṃ hareḥ || 70 ||
[Analyze grammar]

indradyumnastataḥ prāha sarveṣāṃ śāpamokṣaṇam |
kacchapolūkagṛdhrarṣibakamārkaṇḍamokṣaṇam || 71 ||
[Analyze grammar]

kadā bhāvi vada vidvan sarvajñastvaṃ hariryathā |
lomaśastu tadā prāha yadā kṛṣṇanarāyaṇam || 72 ||
[Analyze grammar]

bhajiṣyanti ca te sarve mantragrahaṇapūrvakam |
tadā mokṣo'tra vai kṣetre bhaviṣyati na saṃśayaḥ || 73 ||
[Analyze grammar]

indradyumnastu tān sarvān sasmāropakṛto muhuḥ |
jātismarāśca te kāmarūpadharāḥ samāyayuḥ || 74 ||
[Analyze grammar]

natāste lomaśaṃ kṛṣṇanārāyaṇaṃ samārcayan |
pupūjuḥ kambharālakṣmīṃ gopālakṛṣṇamārcayan || 75 ||
[Analyze grammar]

cakāra svāgataṃ tvaśvapaṭṭasarastaṭe ṛṣiḥ |
lomaśaḥ pradadau mantraṃ kṛṣṇanārāyaṇasya vai || 76 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
jepuste saṃsthitāstatra lomaśasyā''śrame'naghe || 77 ||
[Analyze grammar]

aśvapaṭṭasarasyete snātvā kuṃkumavāpikām |
gatvā cakrurjalapānaṃ jepurmantraṃ divāniśam || 78 ||
[Analyze grammar]

teṣāṃ lomaśakṛpayā vāsanā vilayaṃ gatā |
muktāste śrīkṛṣṇanārāyaṇā'nugrahato'bhavan || 79 ||
[Analyze grammar]

kacchaparṣiḥ kacchadeśe nārāyaṇasarovare |
ghūkarṣiḥ śrīhāṭakeśakṣetre nāganadītaṭe || 80 ||
[Analyze grammar]

gṛdhrarṣiḥ śrīraivatādrau dattātreyatapaḥsthale |
bakarṣiḥ śrīsomanāthakṣetre samudrasannidhau || 81 ||
[Analyze grammar]

mārkaṇḍeyastalaśyāmasthale'raṇye vasanti ca |
divyāste cirajīvāśca kāmarūpadharāḥ sadā || 82 ||
[Analyze grammar]

vartiṣyante pratikalpaṃ lokakalyāṇahetave |
raivate kārtike sarve tvāyānti prativatsaram || 83 ||
[Analyze grammar]

pradakṣiṇārthaṃ devānāṃ kṛṣṇanārāyaṇasya ca |
lomaśo'haṃ pragacchāmi divasān pañca tatra vai || 84 ||
[Analyze grammar]

śrīkṛṣṇanārāyaṇaityudāraṃ |
gṛṇanta evā'drimanukramante |
teṣāṃ pṛthivyākramaṇasya puṇyaṃ |
jāyeta saṃvacmi tu lomaśo'ham || 85 ||
[Analyze grammar]

athendradyumnanṛpaterbhajanena hariḥ svayam |
tutoṣa parayā bhaktyā lomaśānugraheṇa ca || 86 ||
[Analyze grammar]

dadau divyāṃ parāṃ dṛṣṭiṃ nirāvaraṇikāṃ hṛdi |
kṛṣṇanārāyaṇaṃ vilokayāmāsa hṛdi prabhum || 87 ||
[Analyze grammar]

lomaśe dakṣiṇāṃ nyasya kṛtvā''tmānaṃ parātmani |
brahmarandhreṇa tu pathā niryātuṃ yāvadicchati || 88 ||
[Analyze grammar]

tāvaddivyākṣarānmuktairjuṣṭaṃ vimānamāgatam |
koṭikoṭyarkasaṃkāśaṃ samāruroha tat nṛpaḥ || 89 ||
[Analyze grammar]

kṛṣṇanārāyaṇaṃ natvā yayau brahmākṣaraṃ padam |
lomaśo vidhivaccakre jaladānādi tatkṛte || 90 ||
[Analyze grammar]

evaṃ te kathitaṃ lakṣmi lomaśātanatodbhavam |
lomaśetiṛṣernāmākhyānaṃ ciraprajīvinaḥ || 91 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne bhagavaddhāmni samayajñānaparicayaḥ janmagrahaṇe divyatā naivedye'bhipūrakatā lomaśasya prāgvṛttāntaḥ |
mārkaṇḍeyādiciraṃjīvānāṃ tataḥ saurāṣṭrādauciravāsaścetyādinirūpaṇanāmā caturviṃśatyadhikapañcaśatatamo'dhyāyaḥ || 524 ||
[Analyze grammar]