Chapter 471

śrīnārāyaṇa uvāca |
śṛṇu lakṣmi ca maṇḍukyāḥ kathāmuddhārakāriṇīm |
ānandakānane śaṃbhormandiraṃ tvāsa śobhanam || 1 ||
[Analyze grammar]

ekā bhekī sadā tatra saṃvaste śivasannidhau |
pradakṣiṇaṃ karotīyaṃ nirmālyā'kṣatabhakṣiṇī || 2 ||
[Analyze grammar]

ekadā sā bahiryātā vihārārthaṃ tṛṇādiṣu |
kaścit kākaḥ samālokya maṇḍūkī tāmitastataḥ || 3 ||
[Analyze grammar]

saṃplavamānāmādāya cañcvā kṣetrād bahirgataḥ |
varṣābhvī tena sā kṣiptā kākena kṣetrabāhyataḥ || 4 ||
[Analyze grammar]

mṛtā cañcuprahāreṇa pradakṣiṇādipuṇyataḥ |
puṣpabaṭugṛhe kanyā gāndharvī sā vyajāyata || 5 ||
[Analyze grammar]

śaṃkarasya tu liṃgasya śaivālādi tu bhakṣitam |
tena puṇyaprabhāveṇa śuddhā miṣṭasvarānvitā || 6 ||
[Analyze grammar]

bālyādeva nipūṇā sā saṃvyajāyata gītiṣu |
nāmnā sā mādhavī sādhvī śaṃbhupativratā'bhavat || 7 ||
[Analyze grammar]

śubhāvayavasaṃsthānā śreṣṭhalakṣaṇalakṣitā |
mahābhāgavatī jātismarā bhaktottamā'bhavat || 8 ||
[Analyze grammar]

samyaggītarahasyajñā nitarāṃ madhurasvarā |
gāyatyeva yathākālaṃ ṣaḍjamṛṣabhaṃ vā svaram || 9 ||
[Analyze grammar]

gāndhāraṃ madhyamaṃ pañcamaṃ vā dhaivatamityapi |
kvacinniṣādaṃ sā bālā gāyati pravarocchrayam || 10 ||
[Analyze grammar]

ṣaḍjagrāmairmadhyamagrāmaiśca gāndhāragrāmakaiḥ |
atha tatra ṣaḍjagrāme mūrchanāḥ suyunakti sā || 11 ||
[Analyze grammar]

uttaramandāṃ ca rajanīṃ tṛtīyāmuttarāyatām |
śuddhaṣaḍjāṃ matsaritāmaśvakrāntā'bhirudgate || 12 ||
[Analyze grammar]

evaṃ madhyamagrāmeṣu sauvīrī hāriṇāṃ tathā |
aśvāṃ ca kālopatatāṃ śuddhamadhyamāṃ gīrmayīm || 13 ||
[Analyze grammar]

pauravīṃ cetyatha gāndhāragrāmeṣu tu nandikām |
viśālāṃ sumukhīṃ citrāṃ citravatīṃ sukhāṃ tathā || 14 ||
[Analyze grammar]

ālāpāṃ ca yathāvāhaṃ suyunakti dhiyā satī |
tānāṃstvekonapañcāśat kramā'trūṭyā yunakti ca || 15 ||
[Analyze grammar]

agniṣṭomaṃ tathā'tyagniṣṭomaṃ ca vājapeyakam |
ṣoḍaśīṃ puṇḍarīkaṃ cā'śvamedhaṃ rājasūyakam || 16 ||
[Analyze grammar]

evamādīn darśayitvā karoti śubhagāyanam |
tālānekottaraśataṃ dhruvaṃ sāmyaṃ tathā'parān || 17 ||
[Analyze grammar]

sannipātādikān lāti gāyatyapi tathāvidhān |
ṣaḍrāgān śrīṃ vasantaṃ ca paṃcamaṃ bhairavaṃ tathā || 18 ||
[Analyze grammar]

meghaṃ jaṭularāyaṇaṃ niṣkāsayati yatnataḥ |
pratyekasya ca pañcāpi rāginīḥ pañca sā satī || 19 ||
[Analyze grammar]

ṣaṭtriṃśadrāgarāgiṇīḥ prakāśayati kaṇṭhataḥ |
deśakālavibhedena pañcaṣaṣṭyaparāstathā || 20 ||
[Analyze grammar]

yāvanta eva tālāḥ syū rāgāstāvanta ityapi |
tān sarvān nityadā sādhvī gāyati gītivedinā || 21 ||
[Analyze grammar]

mādhavī madhurālāpā oṃkāraṃ śaṃkaraṃ sadā |
santoṣayati rāgādyairnartanaiḥ pūjanaiḥ stavaiḥ || 22 ||
[Analyze grammar]

prāpyā'pyanarghyatāruṇyamoṃkāraṃ bahvamanyata |
svabhāvacañcalaṃ cetaḥ śaṃbhau sthairyaṃ samāgamat || 23 ||
[Analyze grammar]

na vai tāṃ bādhayāñcakre kṣuttṛṇnidrāśramādikam |
atandritamānasā''sīnnityaṃ śaṃkarasevikā || 24 ||
[Analyze grammar]

nimeṣaṃ vighnarūpaṃ sā mene kālaṃ nirarthakam |
nimeṣāntaritaḥ kālo yo yo vyartho gato mama || 25 ||
[Analyze grammar]

śivā'navekṣaṇāttasya prāyaścittaṃ karoti ca |
iti sañcintayantyeva sevāṃ tatyāja naiva sā || 26 ||
[Analyze grammar]

jalābhilāṣiṇī śaṃbhunāmā'mṛtaṃ pibatyapi |
nānyaddidṛkṣiṇī tasyā akṣiṇī śrutige hyapi || 27 ||
[Analyze grammar]

tasyāḥ karṇau śivaśabdetaraśabdagrahau na vai |
atīva sundarau hastau śivārthaṃ mālikākarau || 28 ||
[Analyze grammar]

nā'nyatra caraṇau tasyāścarataḥ sukhavāñcchayā |
nāmāntaraṃ na gṛhṇāti kvacidanyasya kasyacit || 29 ||
[Analyze grammar]

śivaṃ śaṃbhuṃ haraṃ kṛṣṇaṃ nārāyaṇaṃ satīpatim |
paraṃ patiṃ ca raṭati svāminaṃ praṇavābhidham || 30 ||
[Analyze grammar]

rasanā naiva jānāti tasyā anyada rasāntaram |
sammārjanaṃ raṃgamālāḥ prāsādaṃ paritaḥ sadā || 31 ||
[Analyze grammar]

vidadhāti mādhavī sā pratimāpūjanaṃ mudā |
pātrāṇāṃ śodhanaṃ nityaṃ mandirasya prasevanam || 32 ||
[Analyze grammar]

ye ke'pi ca hare bhaktimantasteṣāṃ samarcikā |
śuśrūṣayati nityaṃ tān pitṛbuddhyā'tibhaktitaḥ || 33 ||
[Analyze grammar]

vaiśākhasya caturdaśyāmekavāraṃ tu mādhavī |
rātrau jāgaraṇaṃ kṛtvā divopavāsasadvratā || 34 ||
[Analyze grammar]

bhaktyā militabhakteṣu prātargateṣu vai tataḥ |
sammārjanādikaṃ kṛtvā śaṃbhumabhyarcya bhāvataḥ || 35 ||
[Analyze grammar]

gāyantī madhuraṃ gītaṃ nṛtyantī nijalīlayā |
dhyāyantī śrīhariṃ kṛṣṇamoṃkāreśvarabimbake || 36 ||
[Analyze grammar]

atīva dravabhāvena paśyatāṃ tu tapasvinām |
anenaiva śarīreṇa pārthivena mahāmatiḥ || 37 ||
[Analyze grammar]

tatraivoṃkāramūtā sā layaṃ yātā rasātmikā |
tatra jyotiṣi sā bālā jyotirmayyapi sā satī || 38 ||
[Analyze grammar]

vaiśākhaśuklapakṣasya caturdaśyā pativratā |
divyabhāvaṃ gatā tatra śaṃbhustasyā vimuktaye || 39 ||
[Analyze grammar]

dadau tasyai kṛṣṇamantraṃ tulasīmālikāṃ gale |
oṃ namaḥ śrīkṛṣṇanārāyaṇāya svāmine namaḥ || 40 ||
[Analyze grammar]

mantraṃ trivāraṃ tilakaṃ vaiṣṇavītvaṃ dadau haraḥ |
caturbhujā satī bhūtvā yayau golokamīśvarī || 41 ||
[Analyze grammar]

matsyodarītaṭe kṣetre goghaṭṭaṃ ca pativratāḥ |
snānti divye kṛṣṇadevālaye kurvanti darśanam || 42 ||
[Analyze grammar]

ghanaśyāmasya ye lokā akṣaraṃ te prayānti vai |
pañcanade tu prāk snātvā tata oṃkārasannidhau || 43 ||
[Analyze grammar]

matsyodarīṃ tataḥ snātvā goghaṭṭe tu tataḥ param |
matsyodaryudyānadakṣe śrīghanaśyāmamandire || 44 ||
[Analyze grammar]

lakṣmīnārāyaṇaṃ kāśīviśveśvaraṃ prapūjya ca |
gaṇeśaṃ hanumantaṃ ca natvā mukto bhavatyapi || 45 ||
[Analyze grammar]

yadāprabhati viśveśo mandarādāgato'bhavat |
kāśyāmānandavanake lakṣmīnārāyaṇo'pyaham || 46 ||
[Analyze grammar]

matsyodarītaṭe saptaśikharāḍhye sumandire |
padmākāre mahāramye kṛṣṇanārāyaṇāhvayaḥ || 47 ||
[Analyze grammar]

yo'haṃ golokadhāmasthaḥ kāmbhareyo'tra bhūtale |
so'haṃ tatra nivasāmi pratimāyāṃ tvayā saha || 48 ||
[Analyze grammar]

mama nāma sadā viprā japanti tatra śāśvatam |
lakṣmīnārāyaṇaṃ kṛṣṇanārāyaṇaṃ tathā priye || 49 ||
[Analyze grammar]

viśveśvaraṃ tathauṃkāraṃ pūjayanti ca paṇḍitāḥ |
yāvannendriyavaikalyaṃ yāvannaivā''yuṣaḥ kṣayaḥ || 50 ||
[Analyze grammar]

yāvatsuyogaḥ puṇyasya mānasasyā'tibhāvanā |
tāvat sevyaḥ prayatnena mokṣado bhagavān hariḥ || 51 ||
[Analyze grammar]

ya ānandavane śaṃbhoḥ śiśriyuḥ śrīniketanam |
acalā śrīrna muñcet tānmahāsaukhyapradāyinī || 52 ||
[Analyze grammar]

imamadhyāyamākarṇya janāḥ śrīśvaramānasāḥ |
vimuktāḥ sarvapāpebhyo'kṣuraṃ padamavāpnuyuḥ || 53 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne maṇḍūkyāḥ śivaprasādādane maraṇottaraṃ gāndharvītvaṃ śivapātivratyena śivālaye gāyantyā mādhavyāstasyā mokṣa ityādinirūpaṇanāmaikasaptatyadhikacatuśśatatamodhyāyaḥ || 471 ||
[Analyze grammar]