Chapter 456

śrīnārāyaṇa uvāca |
dhyāne sarvaṃ samālocyā'gastiḥ svasya pativratām |
lopāmudrāmuvācedaṃ śṛṇu lakṣmi jagaddhitam || 1 ||
[Analyze grammar]

api paśya varārohe kimetatsamupasthitam |
kva tatkāryaṃ kva ca vayaṃ munimārgā'valambinaḥ || 2 ||
[Analyze grammar]

kāśīkṣetre nivasatāṃ vighnā bhavanti bhāgyataḥ |
kāśīkṣetraṃ na moktavyaṃ sarvathaiva mumukṣubhiḥ || 3 ||
[Analyze grammar]

upasthito'yaṃ kalyāṇi so'ntarāyo mahānmama |
tathāpi devakāryārthaṃ yāsyāmi śrīśivo'vatāt || 4 ||
[Analyze grammar]

ityuccārya śivaṃ natvopaspṛśyā'sijalaṃ śubham |
lopāmudrāsahāyaḥ sa yogena tapasā muniḥ || 5 ||
[Analyze grammar]

vyomamārgeṇa divyena nimeṣārdhena vai divam |
jagāmā'gre dadarśādriṃ vindhyaṃ ruddhāmbaronnatam || 6 ||
[Analyze grammar]

cakampe tvacalastūrṇaṃ dṛṣṭvaivā'grasthitaṃ munim |
tamagastiṃ priyāyuktaṃ vātāpīlvalavairiṇam || 7 ||
[Analyze grammar]

govardhanaṃ kare dhṛtvā'sthāpayad yo yamībhuvi |
tamagnisadṛśaṃ vindhyo bhūtvā kharvataro bhayāt || 8 ||
[Analyze grammar]

ājñāprasādaḥ kriyatāṃ kiṃkaro'smīti cā'bravīt |
agastiḥ prāha vindhya tvaṃ māṃ vijānāsi tattvataḥ || 9 ||
[Analyze grammar]

punarāgamanaṃ cenme tāvat kharvataro bhava |
ityuktvā priyayā sākaṃ dakṣiṇāśāṃ yayau muniḥ || 10 ||
[Analyze grammar]

vindhyaḥ paśyati sotkaṇṭho na śapto yadagastinā |
na mayā sadṛśo dhanya iti matvā tutoṣa ha || 11 ||
[Analyze grammar]

adya śvo vā paraśvo vā'pyāgamiṣyati vai muniḥ |
iti cintāmahābhārairgirirhrasvastathā sthitaḥ || 12 ||
[Analyze grammar]

no'dyāpi munirāyāti nādyāpi giriredhate |
aruṇo'pi ca tatkāle kālajño'śvānakālayat || 13 ||
[Analyze grammar]

jagatsvāsthyamavāpoccaiḥ pūrvavad bhānusañcaraiḥ |
vivardhiṣati yo nīcaḥ parā'sūyā samudvahan || 14 ||
[Analyze grammar]

dūre tadvṛddhivārtā''stāṃ prāgvṛddherapi saṃśayaḥ |
manorathā na siddhāḥ syuḥ siddhā naśyantyapi dhruvam || 15 ||
[Analyze grammar]

avijñāyā'nyasāmarthyaṃ svasāmarthyaṃ pradarśayet |
upahāsasamavāpnoti tathaivā'yamihā'calaḥ || 16 ||
[Analyze grammar]

atha godāvarītīraṃ yayāvagastirīśvaraḥ |
dadarśā'gre mahālakṣmīṃ sahāsyāṃ suciraṃ sthitām || 17 ||
[Analyze grammar]

tāṃ tu stutvā bhagavatīṃ mahālakṣmīṃ haripriyām |
patnīyuktaḥ praṇanāma sāṣṭāṃgaṃ daṇḍavanmuniḥ || 18 ||
[Analyze grammar]

lakṣmī prāha muniṃ lopāmudrāṃ cāpi pativratām |
prasannā'haṃ tvāṃ pravīkṣya vṛṇu yatte hṛdi sthitam || 19 ||
[Analyze grammar]

rājaputri mahābhāge tvamihopaviśā'male |
koladaityavināśārthamahamatra samāgatā || 20 ||
[Analyze grammar]

tvadaṃgalakṣaṇairebhiḥ supavitraiśca te vrataiḥ |
nirvāpayitumicchāmi daityā'straistāpitāṃ tanum || 21 ||
[Analyze grammar]

ityuktvā munipatnīṃ tāṃ samāliṅgya haripriyā |
alaṃcakāra suprītyā bahusaubhāgyamaṇḍanaiḥ || 22 ||
[Analyze grammar]

lopāmudrā'pi tāṃ lakṣmīṃ sevayāmāsa suspṛśaiḥ |
dehasaṃvāhanaṃ cakre tāpaḥ śaśāma ca śriyaḥ || 23 ||
[Analyze grammar]

lopāmudrā śriyāḥ pādau dhṛtvā nanāma sādaram |
vavande stavanaṃ cakre tava lakṣmiḥ tadā satī || 24 ||
[Analyze grammar]

śṛṇu tatstavanaṃ yena stāvakāḥ syurdhanāśrayāḥ |
naikasampatsamāyuktāstvayā prasannayekṣitāḥ || 25 ||
[Analyze grammar]

mātarnamāmi kamale padmā''yatasulocane |
śrīviṣṇuhṛtkamalasthe viśvamātarnamo'stu te || 26 ||
[Analyze grammar]

kṣīrasāgarasatputri padmagarbhābhasundari |
lakṣmi prasīda satataṃ viśvamātarnamo'stu te || 27 ||
[Analyze grammar]

mahendrasadane tvaṃ śrīḥ rukmiṇī kṛṣṇabhāminī |
candre jyotsnā prabhā sūrye viśvamātarnamo'stu te || 28 ||
[Analyze grammar]

smitānane jagaddhātri śaraṇye sukhavarddhini |
jātavedasi dahane viśvamātarnamo'stu te || 29 ||
[Analyze grammar]

brahmaṇi tvaṃ sarjanā'si viṣṇau tvaṃ poṣikā sadā |
śive saṃhārikā śaktirviśvamātarnamo'stu te || 30 ||
[Analyze grammar]

tvayā śūro guṇī vijño dhanyo mānyaḥ kulīnakaḥ |
kalāśīlakalāpāḍhyo viśvamātarnamo'stu te || 31 ||
[Analyze grammar]

tvayā gajasturagaśca straiṇastṛṇaṃ saraḥ sadaḥ |
devo gṛhaṃ kaṇaḥ śreṣṭhā viśvamātarnamo'stu te || 32 ||
[Analyze grammar]

tvayā pakṣī paśuḥ śayyā ratnaṃ pṛthvī naro vadhūḥ |
śreṣṭhāḥ śuddhā mahālakṣmi viśvamātarnamo'stu te || 33 ||
[Analyze grammar]

lakṣmi śri kamale padme rame padmodbhave sati |
abdhije viṣṇupatni tvaṃ prasīda satataṃ priye || 34 ||
[Analyze grammar]

iti stutā prasannā ca śrīruvāca pativratām |
lopāmudre mune jāne vāṃ yat hṛttāpakāraṇam || 35 ||
[Analyze grammar]

sacetanaṃ dunotyeva kāśīviśleṣajo'nalaḥ |
yuvāṃ vārāṇasīṃ prāpya siddhiṃ prāpsyatha īpsitām || 36 ||
[Analyze grammar]

ye paṭhiṣyanti matstotraṃ tāpadāridryanāśakam |
iṣṭasampatpradaṃ teṣāṃ jayasantatikārakam || 37 ||
[Analyze grammar]

mama sānnidhyadaṃ bālagrahādivyādhināśanam |
bhaviṣyati mama sārūpyādipramokṣaṇaṃ tathā || 38 ||
[Analyze grammar]

iti labdhvā dampatī śrīpradāśiṣaḥ praṇamya tām |
yayaturnātidūrasthaṃ śrīśailaṃ kamalāśrayam || 39 ||
[Analyze grammar]

patnīyuktaḥ sa saṃvīkṣya parāṃ mudamavāpa ha |
paropakaraṇaṃ yeṣāṃ jāgarti hṛdaye satām || 40 ||
[Analyze grammar]

naśyanti vipadasteṣāṃ sampadaḥ syuḥ pade pade |
tīrthasnānairna sā śuddhirbahudānairna tatphalam || 41 ||
[Analyze grammar]

tapobhirugraistannā'pyamupakṛtyā yadāpyate |
nopakārātparo dharmo nā'pakārādaghaṃ param || 42 ||
[Analyze grammar]

upakāraphalaṃ lakṣmīdarśanaṃ śailadarśanam |
lopāmudrāmunibhyāṃ śrīveṃkaṭādrirvilokitaḥ || 43 ||
[Analyze grammar]

uvāca vacanaṃ patnīṃ tadā prītamanā muniḥ |
ākarṇaya varārohe tattvaṃ te kathayāmi vai || 44 ||
[Analyze grammar]

muktisthānānyanekāni bhavanti bhūtale sati |
prayāgaṃ tīrtharājaṃ vai kurukṣetraṃ ca naimiṣam || 45 ||
[Analyze grammar]

avantikā haridvāramayodhyā mathurā purī |
dvārikā cāmarāvatī tathā kuṃkumavāpikā || 46 ||
[Analyze grammar]

sarasvatī sindhusaṃgo gaṃgāsāgarasaṃgamaḥ |
kāñcī ca tryambakaṃ cāpi saptagodāvarītaṭam || 47 ||
[Analyze grammar]

kālaṃjaraṃ prabhāsaśca badrikāśramaraivatau |
mahālayastathauṃkārakṣetraṃ ca pauruṣottamam || 48 ||
[Analyze grammar]

gokarṇo bhṛgukacchaśca bhṛgutuṅgaśca puṣkaram |
śrīparvato mānasaṃ ca dhārātīrthaṃ ca bhautikam || 49 ||
[Analyze grammar]

ādhyātmikāni tīrthāni dayāsnehādikānyapi |
etāni muktidānyeva nā'trā'sti saṃśayo manāk || 50 ||
[Analyze grammar]

satyaṃ tīrthaṃ kṣamātīrthaṃ tīrthamindriyanigrahaḥ |
sarvabhūtadayātīrthaṃ tīthamārjavamityapi || 51 ||
[Analyze grammar]

dānaṃ tīrthaṃ damastīrthaṃ santoṣastīrthamucyate |
brahmacaryaṃ paraṃ tīrthaṃ tīrthaṃ ca priyavāditā || 52 ||
[Analyze grammar]

jñānaṃ tīrthaṃ dhṛtistīrthaṃ tapastīrthamudāhṛtam |
sarvatīrthaparaṃ tīrthaṃ śuddhiryā mānasī sadā || 93 ||
[Analyze grammar]

na jalena viśuddhirvai manaḥśuddhi satī sadā |
na śarīramalatyāgācchuddhirdeho na nirmalāḥ || 54 ||
[Analyze grammar]

aihikasukhalabdhyarthaṃ vāñcchā vai mānaso malaḥ |
tatra tatra virāgastu sunairmalyamudāhṛtam || 55 ||
[Analyze grammar]

bhāve tu nirmale jāte kāmādyā api nirmalāḥ |
doṣāśca guṇatāṃ yānti sattvaprakarṣasaṃśrayāt || 56 ||
[Analyze grammar]

nigṛhītendriyagrāmo yatra kvāpi vasejjanaḥ |
tatra tasya kurukṣetraṃ naimiṣaṃ puṣkarāṇi ca || 57 ||
[Analyze grammar]

dhyānapūte jñānajale rāgadveṣamalāpahe |
yaḥ snāti mānase tīrthe sa yāti paramāṃ gatim || 58 ||
[Analyze grammar]

etatte mānasaṃ proktaṃ tīrthaṃ sādhuprasevanam |
bāhya bhaumaṃ jalīyaṃ ca śṛṇu tīrthaṃ kathaṃ hi tat || 59 ||
[Analyze grammar]

śārīrā brahmarandhrādyā bhāgā medhyatamā yathā |
tathā bhūjalabhāgāśca medhyāstīrthāni tāni vai || 60 ||
[Analyze grammar]

svayaṃjātāni puṇyāni kānicid devajāni ca |
kānicitsatpūruṣāṇāṃ nivāsādyaiḥ kṛtāni ca || 61 ||
[Analyze grammar]

pativratānāṃ vāsādyaiścamatkāraiḥ satāmapi |
satīnāṃ cāpyanugrahaiḥ sādhvīnāṃ tapasā tathā || 62 ||
[Analyze grammar]

patnīvratānāṃ kāryādyaistīrthāni saṃbhavanti hi |
ātmatīrthaṃ mahat proktaṃ śrīkṛṣṇo mahato mahān || 63 ||
[Analyze grammar]

śuddhaṃ buddhyātmakaṃ tīrthaṃ nirmalānīndriyāṇyapi |
bhautikāni śarīrāṇi tapobhiḥ pāvanāni ca || 64 ||
[Analyze grammar]

asthi carmādikaṃ cāpyaśuddhaṃ satāṃ tu pāvanam |
tīrthaṃ vai jāyate kṛṣṇatapoyogāt sudivyakam || 65 ||
[Analyze grammar]

kathātmakaṃ sarvaśreṣṭhaṃ tīrthaṃ tīrthottamottamam |
bhāvātmakaṃ mahattīrthaṃ snehatīrthaṃ ca sukṛtam || 66 ||
[Analyze grammar]

vṛddhābhivandanaṃ tīrthaṃ brahmalokapradaṃ matam |
yajñabhūmirmahattīrthaṃ gotīrthaṃ tulasīkṣatiḥ || 67 ||
[Analyze grammar]

ekādaśyādikaṃ tīrthaṃ tārayatyeva bandhanāt |
śraddhātmakaṃ paraṃ tīrthaṃ puṇyadaṃ phaladaṃ tathā || 68 ||
[Analyze grammar]

tasmādbhaumeṣu tīrtheṣu jalīyeṣu tathā priye |
yathā divyatvabuddhirvai tathā kṛtvā tu dehiṣu || 69 ||
[Analyze grammar]

devālayeṣu deveṣu mūrtiṣu pratimāsu ca |
satsu sādhvīṣu satkāryaṃ sukṛtaṃ tvarjayet sadā || 70 ||
[Analyze grammar]

āntareṣu ca bāhyeṣu tīrtheṣu snāti yo janaḥ |
kṛṣṇasaṃghagatau bhakto vindati paramāṃ gatim || 71 ||
[Analyze grammar]

snānaṃ dānaṃ japo homastarpaṇaṃ vapanaṃ kṛtam |
hareḥ satāṃ sevanaṃ ca darśanaṃ tvakṣayaṃ bhavet || 72 ||
[Analyze grammar]

kāśī kāñcī ca māyākhyā tvayodhyā dvāravatyapi |
mathurā'vantikā caitā mokṣadā bhagavadbhuvaḥ || 73 ||
[Analyze grammar]

tathāpi kāśikā sarvadevavāsena yādṛśī |
mānase me rocate'dya na tathā'nyā pativrate || 74 ||
[Analyze grammar]

tārakaṃ jñānamantrādi dadāti śaṃkaraḥ svayam |
nityaṃ bhikṣukarūpeṇa bhramatyeva gṛhaṃ gṛham || 75 ||
[Analyze grammar]

mahāvaiṣṇavarājo'yaṃ vaikuṇṭhaṃ cāmṛtaṃ tathā |
golokaṃ cāpi kailāsaṃ bhaktān preṣayati prabhuḥ || 76 ||
[Analyze grammar]

yamamārgaḥ sadā ruddhaḥ kāśīvāsakṛtāṃ priye |
avimuktaṃ mahākṣetraṃ śivādīnāṃ parātparam || 77 ||
[Analyze grammar]

tadvāsārthaṃ rocaye'haṃ yāvastāṃ kāśikāṃ purīm |
satīnāṃ kāśikāvāsād brahmalokā''ptireva vai || 78 ||
[Analyze grammar]

satīlokātparaṃ lokaṃ vaikuṇṭhaṃ yānti tāḥ striyaḥ |
etacchrutvā muniṃ lopāmudrā papraccha sādaram || 79 ||
[Analyze grammar]

nārīṇāṃ cāpsarasāṃ ca satīnāṃ kvā'sti tatpuram |
vada me jīvaneśā'tra syāṃ ca niḥsaṃśayā yathā || 80 ||
[Analyze grammar]

omityuktvā satīlokamagastiḥ prāha yoṣite |
śṛṇu sādhvi bhūmilokātparo vāyustaraḥ smṛtaḥ || 81 ||
[Analyze grammar]

piśācādinivāsaḥ sa tato guhyakamaṇḍalam |
guhyakānāṃ tu devānāṃ lokaḥ sa smṛddhisaṃbhṛtaḥ || 82 ||
[Analyze grammar]

tato gāndharvalokaśca yatra gandharvacāraṇāḥ |
tato vaidyādharo loko vidyādhrā yatra santi hi || 83 ||
[Analyze grammar]

tato dharmapurī ramyā dhārmikāḥ svargavāsinaḥ |
tataḥ svargaṃ mahatpuṇyabhājāṃ sthānaṃ sadāsukham || 84 ||
[Analyze grammar]

tataścā'psarasāṃ lokaḥ svarge cordhve vyavasthitaḥ |
apsaraso mahāsatyo yajñabhājāṃ priyaṃkarāḥ || 85 ||
[Analyze grammar]

vasanti cāpsaroloke lokapālānusevikāḥ |
yuvatyo rūpalāvaṇyasaubhāgyanidhayaḥ śubhāḥ || 86 ||
[Analyze grammar]

dṛḍhagranthinitambinyo divyālaṃkāraśobhanāḥ |
divyabhogapradā gītinṛtyavādyasupaṇḍitāḥ || 87 ||
[Analyze grammar]

kāmakelikalābhijñā dyūtavidyāviśāradāḥ |
rasajñā bhāvavedinyaścaturāścocitoktiṣu || 88 ||
[Analyze grammar]

nānā''deśaviśeṣajñā nānābhāṣāsukovidā |
saṃketodantanipūṇāḥ svatantrā devatoṣikāḥ || 89 ||
[Analyze grammar]

līlānarmasu sābhijñāḥ supralāpeṣu paṇḍitāḥ |
kṣīrodasya sutāḥ sarvā nārāyaṇena nirmitāḥ || 90 ||
[Analyze grammar]

urvaśī menakā raṃbhā candralekhā tilottamā |
vapuṣmatī kāntimatī līlāvatyupalāvatī || 91 ||
[Analyze grammar]

alambuṣā guṇavatī sthūlakeśī kalāvatī |
kalānidhirguṇanidhiḥ karpūratilakorvarā || 92 ||
[Analyze grammar]

anaṃgalatikā vidyullatā madanamohinī |
cakorākṣī candrakalā maṇiprabhā manoharā || 93 ||
[Analyze grammar]

grāvadrāvā tapodveṣṭrī cārunāsā sukarṇikā |
dārusañjivanī suśrīḥ kratuśulkā śubhānanā || 94 ||
[Analyze grammar]

tapaḥśulkā tīrthaśulkā dānaśulkā himāvatī |
pañcāśvamedhikā vidyā rājasūyārthinī prabhā || 95 ||
[Analyze grammar]

aṣṭāgnihomikā mādhvī vājapeyaśatodbhavā |
acchodā mohinī campā lalitā ca jayā ramā || 96 ||
[Analyze grammar]

vardhinī padminī mañjukeśī hemnī ca mañjulā |
miśrakeśī devikā śāntikā ṣaṣṭisahasrakam || 97 ||
[Analyze grammar]

apsarasāṃ vasatyanyā striyo loke'tra santyapi |
sadā'skhalitalāvaṇyāḥ sadā'skhalitayauvanāḥ || 98 ||
[Analyze grammar]

divyāmbarā divyamālā divyagandhānulepanāḥ |
divyabhogaiḥ susampannāḥ svecchāvidhṛtavigrahāḥ || 99 ||
[Analyze grammar]

kṛtvā māsopavāsāni skhalanti brahmacaryataḥ |
sakṛdeva dvikṛtyo vā triḥkṛtvo daivayogataḥ || 100 ||
[Analyze grammar]

tā imā divyabhoginyo rūpalāvaṇyasampadaḥ |
nivasantyapsaroloke sarvakāmasamanvitāḥ || 101 ||
[Analyze grammar]

kṛtvā vratāni sāṃgāni kāmikāni vidhānataḥ |
bhavanti kāmacāriṇyo devabhogyā ihā''gatāḥ || 102 ||
[Analyze grammar]

pativratadharānāryo balena balinā dhṛtāḥ |
bhartṛbuddhyā ramante ta kadācittā imāḥ priyāḥ || 103 ||
[Analyze grammar]

bhartari proṣite yāstu brahmacaryavratāḥ sadā |
viplavante sakṛd daivāt tā etā vāmalocanāḥ || 104 ||
[Analyze grammar]

svarṇaṃ sugandhaṃ sahasraṃ śayyāṃ bhūṣāśca bhojanam |
bahukautukavastūni samarcya dvijadampatīm || 105 ||
[Analyze grammar]

saṃkrāntau vā vyatīpāte dadyāt yā varavarṇinī |
kāmarūpadharo devaḥ prīyatāmiti vādinī || 106 ||
[Analyze grammar]

ko'dāt kasmā adāt kāmo'dāt kāmāya tvadāttathā |
kāmo dātā kāmaḥ pratigṛhītā kāma te idam || 107 ||
[Analyze grammar]

itimantreṇa saṃdātrī yathāśakti sakāmanā |
sā śreṣṭhā'psarasāṃ madhye vaset kalpamihāṃ'ganā || 108 ||
[Analyze grammar]

kanyārūpadharā kācid vyābhuktā kenacit kvacit |
devarūpeṇa taṃ kālamārabhya brahmacāriṇī || 109 ||
[Analyze grammar]

vṛttaṃ tad dhyāyamānā sā nidhanaṃ yāti kālataḥ |
divyarūpadharā seha jāyate divyabhogabhāk || 110 ||
[Analyze grammar]

ityāvedya striyai kuṃbhajanmā mitrāvaruṇajaḥ |
lopāmudrā'bhidhapatnyai tūṣṇīmāsa mahāmuniḥ || 111 ||
[Analyze grammar]

atha kāśyāṃ śivā durgā devyo brahmavratapriyāḥ |
yayuḥ prātaragastyasyāśramaṃ devīṃ pativratām || 112 ||
[Analyze grammar]

devīpūjyāṃ mahāsādhvīṃ lopāmudrāṃ pravīkṣitum |
adṛṣṭvā tāmanivṛttāṃ riktaṃ cāśramamaṇḍalam || 113 ||
[Analyze grammar]

dhyātvā jñātvā veṃkaṭādrau sthitāṃ draṣṭuṃ drutaṃ yayuḥ |
nemurāśleṣayāmāsuḥ kathāḥ prāhuḥ parasparam || 114 ||
[Analyze grammar]

devībhirarthitā sādhvī tābhiḥ sākaṃ nijāśramam |
agastinā saha sādhvī samājagāma kāśikām || 115 ||
[Analyze grammar]

pativratāṃ mahāsādhvīṃ satīṃ prāpya surastriyaḥ |
kāśīsthā sukhamāpannā durlabhaḥ satsamāgamaḥ || 116 ||
[Analyze grammar]

iti te kathitaṃ lakṣmi vindhyasyā'vardhanaṃ tathā |
agastyasya camatkāro lopāmudrāsatīśatā || 117 ||
[Analyze grammar]

yā kanyā śṛṇuyāccedaṃ paṭhedvā sā pativratā |
satī sādhvī śrīsamānā bhavedeva na saṃśayaḥ || 118 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne |
vindhyācalasya sūryamārgamavaruddhya sthitasyā'gastyena nirodhaḥ kṛtaḥ agastyasya mahālakṣmīdarśanaṃ mahālakṣmīstotraṃ tīrthavividhatā tīrthapraśaṃsā apsarasāṃ lokaḥ apsarobhāvaprāptikāraṇāni kāśīdevibhirlopāmudrāgastyayoḥ kāśīṃ pratyānayanamityādinirūpaṇanāmā ṣaṭpañcāśadadhikacatuśśata |
tamo'dhyāyaḥ || 456 ||
[Analyze grammar]