Chapter 455

śrīnārāyaṇa uvāca |
agastyasya priyapatnyāḥ pratāpaṃ tvaṃ śṛṇu priye |
pativratottamālopāmudrāyā divyayoṣitaḥ || 1 ||
[Analyze grammar]

kadācinnārado lakṣmi snātvā śrīnarmadāmbhasi |
vindhyaṃ vilokayāñcakre vrajan śrībadarīśvaram || 2 ||
[Analyze grammar]

rasālayaṃ drumavallīstambasasyādiśobhitam |
vardhamānaṃ mahākāśe lokayantaṃ samantataḥ || 3 ||
[Analyze grammar]

dṛṣṭvā kṣaṇaṃ nāradaḥ sa tasthau vyomnyeva kautukāt |
vindhyo'pi sūryasaṃkāśaṃ nabhasi dyotitāmbaram || 4 ||
[Analyze grammar]

nāradaṃ dṛṣṭavān premṇā dūrāt pratyujjagāma tam |
santaṃ dṛṣṭvā kaṭhino'pi dhatte mṛdulatāṃ yataḥ || 5 ||
[Analyze grammar]

natvā muniṃ dadau pādyamarghyaṃ cāsanamarhaṇam |
pādasaṃvāhanaṃ cakre babhāṣe'vanato giriḥ || 6 ||
[Analyze grammar]

adya te pādarajasā naṣṭaṃ rajastamo mama |
dharādharatvaṃ kuliṣu mānyaṃ me syāttavā''gamāt || 7 ||
[Analyze grammar]

śrutvaitannāradaḥ kiñciducchvasya sthitavāṃstataḥ |
vindhyādrirāha munirāḍucchvāsakāraṇaṃ vad || 8 ||
[Analyze grammar]

himādrīn parvatānnāhaṃ gaṇaye bhūdharāniti |
vada kāryaṃ tu te kiñcit kariṣye sevayā yutaḥ || 9 ||
[Analyze grammar]

nāradastaṃ tadā prāha merustvāmavamanyate |
ityuktvā nāradastasmād yayau badarikāśramam || 10 ||
[Analyze grammar]

vindhyādristvāpa mahatīṃ cintāṃ dhigjīvanaṃ mama |
jñātiparājitasyātrodyamavivarjitasya ca || 11 ||
[Analyze grammar]

kathaṃ bhunakti sa divā kathaṃ rātrau svapityaho |
rahaḥ śarma kathaṃ tasya yasya jñātiparābhavaḥ || 12 ||
[Analyze grammar]

yuktamuktaṃ purāvidbhiścintā kṛtyā bhayaṃkarī |
nopāyaiḥ śāmyati ghorā nidrāṃ balaṃ haratyapi || 13 ||
[Analyze grammar]

cintājvaro mahātīvraḥ pratyahaṃ navatāṃ vrajet |
kiṃ karomi kva gacchāmi kathaṃ meruṃ jayāmyaham || 14 ||
[Analyze grammar]

viśveśaṃ śaraṇaṃ yāyāṃ sa me buddhiṃ pradāsyati |
iti vicārya mahati tvambare vardhate giriḥ || 15 ||
[Analyze grammar]

dakṣiṇe sūryamārgaṃ sa niruddhya samavasthitaḥ |
sūryāśvāstvagrato gantuṃ na śekurvai tadā'ruṇaḥ || 16 ||
[Analyze grammar]

prāha sūryaṃ mahāvindhyo niruddhya gaganaṃ sthitaḥ |
spardhate meruṇā prepsustvaddattāṃ tu pradakṣiṇām || 17 ||
[Analyze grammar]

rāhubāhugrahavyagro yaḥ kṣaṇaṃ nā'vatiṣṭhati |
yojanānāṃ sahasre dve dve śate dve ca yojane || 18 ||
[Analyze grammar]

yojanasya nimeṣārdhād yāti so'pi ciraṃ sthitaḥ |
tat sūryasya gatistambhāt stambhitaṃ tannimittakam || 19 ||
[Analyze grammar]

kālamānaṃ tathā kāryaṃ rurudurdudruvuḥ prajāḥ |
tato devādayaḥ sarve brahmāṇaṃ śaraṇaṃ yayuḥ || 20 ||
[Analyze grammar]

namaścakrustuṣṭuvuśca rakṣa rakṣeti cā'bruvan |
vilokya duḥkhitān brahmā pratyuvāca divaukasaḥ || 21 ||
[Analyze grammar]

dāsyāmi sakalān kāmān śṛṇudhvaṃ varamuttamam |
svasthāstiṣṭhata bho yūyaṃ kathaṃ satye samākulāḥ || 22 ||
[Analyze grammar]

ete vedāḥ sarvavidyāḥ satyaṃ dharmastapaḥ kratuḥ |
brahmacaryaṃ bhāratīyaṃ śrutayaḥ smṛtayastathā || 23 ||
[Analyze grammar]

brahmaniṣṭhāstāpasāśca vratinaścopavāsinaḥ |
pātivratyaparā nāryo ye cānye brahmacāriṇaḥ || 24 ||
[Analyze grammar]

mātāpitroḥ sadā bhaktā gobhaktā devasevakāḥ |
patnīvratā atithīnāṃ pūjakā dānasukṛtāḥ || 25 ||
[Analyze grammar]

sarve me satyaloke'tra santi te sukhinaḥ sadā |
vadantu bhavatāṃ ceṣṭaṃ karomi sukhakṛddhruvam || 26 ||
[Analyze grammar]

devāḥ prāhurvindhyaśailaḥ spardhate meruṇā divi |
sūryamārgaṃ niruddhyaiva vardhate tvadgṛhaṃ prati || 27 ||
[Analyze grammar]

sūryādhārāḥ kriyā ruddhāstato layo bhaviṣyati |
sūryamārgamato rodharahitaṃ kuru sarvathā || 28 ||
[Analyze grammar]

śrutvaitad viśvasṛṭ prāhā'gastyanāmā mahāmuniḥ |
kāśīkṣetre tapatyugraṃ yācadhvaṃ taṃ muniṃ surāḥ || 29 ||
[Analyze grammar]

mitrāvaruṇaputraḥ sa lopāmudrāpatiḥ ṛṣiḥ |
vidhāsyati sa vaḥ kāryaṃ vātāpīlvalabhakṣakaḥ || 30 ||
[Analyze grammar]

ityuktāstu surādyāste yayuḥ kāśīmagastyakam |
maṇikarṇyāṃ surāḥ snātvā dadṛśuḥ kāśikāṃ purīm || 31 ||
[Analyze grammar]

vidvajjanapralakṣaiḥ satsādhulakṣairadhiṣṭhitām |
tīrthavāsijanavrātakoṭimaṇḍalacañcalām || 32 ||
[Analyze grammar]

devālayaistrikoṭibhirgṛhasthālayakoṭibhiḥ |
sahasrodyānasatkṣetraiḥ rājasaudhasahasrakaiḥ || 33 ||
[Analyze grammar]

vāranārīpralakṣaiśca devanārīpralakṣakaiḥ |
brahmacārikoṭibhiśca naikadeśīyamānavaiḥ || 34 ||
[Analyze grammar]

tīrthakoṭiśatalakṣairgaṃgādyunadikānadaiḥ |
vimānairvāhanairyānairmahāpustakapattanaiḥ || 35 ||
[Analyze grammar]

dhanvantaryādiśālābhirannasatrasahasrakaiḥ |
suśobhitā bhikṣukaiśca dīnā'nāthaiḥ sahasrakaiḥ || 36 ||
[Analyze grammar]

evaṃ tāṃ nagarīṃ dṛṣṭvā kṛtvā tīrthānyanekaśaḥ |
viśvanāthaṃ cānnapūrṇāṃ lakṣmīnārāyaṇaṃ tathā || 37 ||
[Analyze grammar]

śrībindumādhavaṃ dharmadevaṃ dṛṣṭvā praṇamya te |
sampūjya caraṇau prakṣālayitvā''gṛhya cāmṛtam || 38 ||
[Analyze grammar]

jagmuḥ paropakārārthamagastiryatra tiṣṭhati |
agastīśvaraliṃgaṃ ca kuṇḍaṃ kṛtvā tadagrataḥ || 39 ||
[Analyze grammar]

śatarudrīyasūktena japanmunirvirājate |
tejasā sūryasaṃkāśaṃ dṛṣṭvā siṣmiyire surāḥ || 40 ||
[Analyze grammar]

aho ho sarvatejāṃsi śritvemāṃ brāhmaṇīṃ tanum |
śīlayanti paraṃ dhāma śāntaṃ śāntapadāptaye || 41 ||
[Analyze grammar]

yasyā''śrame'tra dṛśyante hiṃsrā api samantataḥ |
sattvāśritāḥ sarvasattvāstyaktvā vairaṃ nisargajam || 42 ||
[Analyze grammar]

saha sarve nivasanti krūrāḥ śāntāśca rājasāḥ |
paśavaḥ pakṣiṇaḥ sarve mṛgāḥ sarīsṛpāstathā || 43 ||
[Analyze grammar]

ityāśramacarān dṛṣṭvā tiraśco'pi munīniva |
abodhi vibudhaiḥ sarvaḥ prabhāvo'gastibhūmijaḥ || 44 ||
[Analyze grammar]

dharmārthakāmamokṣāstu mūrtā yatra caranti hi |
itipaśyanto gīrvāṇā dadṛśustūṭajaṃ muneḥ || 45 ||
[Analyze grammar]

homadhūpasugandhāḍhyaṃ baṭubhirbahubhirvṛtam |
brahmacaryaratābhiśca brahmā'dhyayanatejasā || 46 ||
[Analyze grammar]

candrābhābhirmunikanyābhiśca saumyamalaṃkṛtam |
sārdravalkalakaupīnairvṛkṣaśākhāvalambibhiḥ || 47 ||
[Analyze grammar]

sūcayat sanmunivāsān sattvaprasādakāritān |
pativratāśiroratnalopāmudrāṃ'ghrimudrayā || 48 ||
[Analyze grammar]

mudritaṃ vīkṣya te nemuḥ parṇaśālā'ṅgaṇaṃ surāḥ |
visarjitasamādhiṃ ca dhṛtakarṇā'kṣimālikam || 49 ||
[Analyze grammar]

adhiṣṭhitabṛsīpṛṣṭhaṃ vedhasā sadṛśaṃ śriyā |
puro'gastyaṃ samālokya devāḥ sarve savāsavāḥ || 50 ||
[Analyze grammar]

prahṛṣṭavadanāḥ procuḥ proccairjaya jayeti ca |
muniḥ sarvānupāveśya papracchāgamakāraṇam || 51 ||
[Analyze grammar]

devagurustamuvāca devāgamanakāraṇam |
dhanyo'si kṛtakṛtyo'si mānyo'si mahatāmapi || 52 ||
[Analyze grammar]

pratyāśramaṃ pratinagaṃ pratyaraṇyaṃ tapodhanaḥ |
kinna santaḥ santyagastye kācidanyaiva te sthitiḥ || 53 ||
[Analyze grammar]

tapolakṣmīstvayīhāsti brāhmaṃ tejastvayi sthiram |
puṇyaśrīśca tvayi śreṣṭhā camatkārāstvayi sthitāḥ || 54 ||
[Analyze grammar]

pativrateyaṃ kalyāṇī lopāmudrā sadharmiṇī |
tavāṃ'gacchāyayā tulyā yatkathā puṇyakāriṇī || 55 ||
[Analyze grammar]

arundhatī ca sāvitrī śāṇḍilī śrīḥ satī tathā |
anasūyā mahālakṣmīḥ śatarūpā ca menakā || 56 ||
[Analyze grammar]

sunītiḥ kamalā svāhā saṃjñā ceti pativratāḥ |
yā yāstāsu yathaiṣā varṇyate śreṣṭhā tathā na tāḥ || 57 ||
[Analyze grammar]

bhuṃkte bhukte tvayi mune tiṣṭhati tvayi tiṣṭhati |
sunidrite tu nidrāti prathamaṃ pratibudhyati || 58 ||
[Analyze grammar]

nā'laṃkṛtaṃ nijātmānaṃ tava darśayati kvacit |
gate bhavati kāryārthaṃ na dhatte maṇḍanāni tu || 59 ||
[Analyze grammar]

tavā''yuṣyavivṛddhyarthaṃ na gṛṇātyabhidhāṃ tava |
kṛṣṇaṃ vinā'nyapunnāma naiva vadati karhicit || 60 ||
[Analyze grammar]

ākruṣṭā daṇḍitā cāpi nā''krośati prasīdati |
idaṃ kuru samājñaptā śīghraṃ karoti tatkṣaṇam || 61 ||
[Analyze grammar]

kariṣyasīti samproktā'vaśyaṃ kānteti vakti ca |
tvayā''hūtā'nyakāryāṇi tyaktvā tvāyāti satvaram || 62 ||
[Analyze grammar]

ājñāpaya kṛpāsindho vakti kṛtaṃ pramanyatām |
na catuṣkasya mārgasyā'ṅganasya dvāri tiṣṭhati || 63 ||
[Analyze grammar]

anāpṛṣṭvā bhavantaṃ sā vastumātraṃ tṛṇaṃ hyapi |
tvayā nānumataṃ kiñcit kasmaicinna dadātyapi || 64 ||
[Analyze grammar]

svayamāharati pūjāsāmagrīrnoditā'pi ca |
jalaṃ darbhān phalapatrapuṣpāṇi cākṣatādikān || 65 ||
[Analyze grammar]

sādhayatyeva samaye vinā''jñāmapi sā satī |
nodvignā bhavati kvāpi nodvejayati cāparān || 66 ||
[Analyze grammar]

yathākālaṃ yathāyogyamupasthāpayatīkṣate |
bhuṃkte bhartuḥ prasādaṃ ca jalamannaṃ phalādikam || 67 ||
[Analyze grammar]

matvā mahāprasādaṃ tat svāmidattaṃ samīhate |
devapitratithipoṣyānāthasatīsataḥ sadā || 68 ||
[Analyze grammar]

dāsagobhikṣukān datvā'śnāti vibhajya naijakam |
saṃyatopaskarā prātardṛṣṭā vyayaparāṅmukhī || 69 ||
[Analyze grammar]

yathāpekṣavyayakartrī yogyaśaśvatparigrahā |
tavā''deśaṃ vinā neyaṃ karotyapoṣaṇaṃ vratam || 70 ||
[Analyze grammar]

vinā''jñāṃ te na yātīyaṃ draṣṭuṃ samājamutsavam |
pradarśanaṃ mallayuddhaṃ nṛtyaṃ nāṭya kalālayam || 71 ||
[Analyze grammar]

tīrthayātrāṃ vivāhaṃ te vinā''jñāṃ draṣṭumeti na |
āsīnaṃ ramamāṇaṃ ca suptaṃ patiṃ sukhena sā || 72 ||
[Analyze grammar]

atyāvaśyakakārye'pi tvāṃ notthāpayati kvacit |
akāmaṃ tvāṃ ca rajasā svārthārthaṃ nāpi sevate || 73 ||
[Analyze grammar]

rājasvalye mukhaṃ naiva darśayati dinatrayam |
śrāvayati svavākyaṃ na pūrvaṃ snānādiśuddhitaḥ || 74 ||
[Analyze grammar]

paśyati turyadivase bharturmukhaṃ raviṃ harim |
dhyāyatīyaṃ kāntarūpaṃ kṛṣṇarūpaṃ pativratā || 75 ||
[Analyze grammar]

nityaṃ saubhāgyacihnāni dhārayatyeva tvadratā |
keśasaṃskārakabarīkarakarṇādibhūṣaṇam || 76 ||
[Analyze grammar]

haridrāṃ kuṃkumacandraṃ sindūraṃ netrakajjalam |
kaṃcukīṃ natthikāṃ tantrīṃ nūpuraṃ baṃgiḍīṃ tathā || 77 ||
[Analyze grammar]

śṛṃkhalāṃ cormikāṃ hāraṃ svarṇairaṇe ca śāṭikām |
viṣṇutailaṃ sugandhaṃ ca dhārayatyeva tvadratā || 78 ||
[Analyze grammar]

na ca saṃgaṃ karotyeṣā nāstikāyāstu yoṣitaḥ |
nā'spṛśyāyā na puṃścalyāḥ pākhaṇḍinyāśca yoṣitaḥ || 79 ||
[Analyze grammar]

nā'śuddhāyāśca kāminyā dharmavarjitayoṣitaḥ |
bhartṛvidveṣiṇīṃ nārīṃ naiṣā saṃbhāṣate satī || 80 ||
[Analyze grammar]

naikākinī bahiryāti vivastrā snāti na kvacit |
niṣīdati sadā nimne na same bhartṛsannidhau || 81 ||
[Analyze grammar]

kaṇḍanyāṃ na ca peṣaṇyāṃ na cūllyāṃ jalakuṃbhake |
gargaryāṃ na kaṭāhādau mūśale na śilātale || 82 ||
[Analyze grammar]

cūrṇayantre na mārjanyāṃ caṭṭanīpeṣake na hi |
na dehalyāṃ puṇyapātre kṛtvā pṛṣṭhaṃ guruṃ patim || 83 ||
[Analyze grammar]

niṣīdati kvacicchāṭīmuttāryā'pi na tvadratā |
stanaṃ jaghanaṃ kaścinna saṃpaśyed vartate tathā || 84 ||
[Analyze grammar]

vinā vyavāyasamayaṃ prāgalbhyaṃ samarakṣati |
bharturyatra yathā tṛptiḥ rucistatra pravartate || 85 ||
[Analyze grammar]

paraṃ dharmaṃ vrataṃ śreṣṭhaṃ devapūjanamuttamam |
pālanaṃ pativākyasya matvollaṃghanameti na || 86 ||
[Analyze grammar]

bālamaśaktamakāmaṃ vyādhitaṃ duravasthakam |
klībaṃ vratasthaṃ vṛddhaṃ vā rugṇaṃ patiṃ pativratā || 87 ||
[Analyze grammar]

susthitaṃ duḥsthitaṃ vāpi vyasanāḍhyaṃ daridrakam |
cauraṃ kāmātisaktaṃ vā sevate sarvadā satī || 88 ||
[Analyze grammar]

tāpasaṃ cāpi niṣkāmaṃ tvāṃ sadā sevate tviyam |
hṛṣṭā sadā tvayi hṛṣṭe viṣaṇṇe śokagarbhitā || 89 ||
[Analyze grammar]

sampatsu caikarūpā te vipatsvapi tava priyā |
gṛhe bhojyasya vastūnāṃ veṣavārasya ca kṣaye || 90 ||
[Analyze grammar]

sampādayati cājñayā nāstīti na bravītyapi |
tīrthecchayā te caraṇāmṛtaṃ pibati nityaśaḥ || 91 ||
[Analyze grammar]

viṣṇornārāyaṇācchaṃbhoradhikaṃ manute patim |
bhartṛcaraṇapūjātmaniyamaṃ tu prarakṣati || 92 ||
[Analyze grammar]

satrapaṃ cāpavāde ca kaṣṭadaṃ kalikārakam |
mṛṣā hasanaṃ cākrośaṃ neyaṃ gṛṇāti vai kvacit || 93 ||
[Analyze grammar]

devaṃ guruṃ vrataṃ tīrthaṃ dharmaṃ jānāti sā patim |
tava chāyāsamā ceyaṃ vartate kiṃkarī tava || 94 ||
[Analyze grammar]

dhanyo'si munivarya tvaṃ dhanyau te pitarau tathā |
asyāstu pitarau dhanyau yataśceyaṃ pativratā || 95 ||
[Analyze grammar]

pativratāyāścaraṇo yatra bhūmau spṛśatyapi |
sā bhūmiḥ sarvadā tīrthaṃ pāvanaṃ tārakaṃ bhavet || 96 ||
[Analyze grammar]

parameśvarabhaktyaiva labhate strī pativratā |
gṛhasthastvaṃ yathārtho'si yasya te'sti pativratā || 97 ||
[Analyze grammar]

pativratāyā dṛṣṭyā'pi pātakī pāvano bhavet |
na gaṃgayā tayā bhedo yā nārī patidevatā || 98 ||
[Analyze grammar]

gaṃgāsnānaphalaṃ tvetad yajjātaṃ tava darśanam |
tava patnyā darśanaṃ ca jātaṃ no bahupuṇyataḥ || 99 ||
[Analyze grammar]

praṇavastvaṃ śrutiśceyaṃ kṣamaiṣā tvaṃ svayaṃ tapaḥ |
satkriyeyaṃ phalaṃ tvaṃ ca dhanyo'si tvaṃ mahāmune || 100 ||
[Analyze grammar]

idaṃ pativrataṃ tejo brahmatejo bhavānparam |
tatrā'pyetattapastejaḥ kimasādhyatamaṃ tava || 101 ||
[Analyze grammar]

tava nā'viditaṃ kiñcittathāpi pravadāmyaham |
yadarthamāgatā devāstanmune'tra niśāmaya || 102 ||
[Analyze grammar]

ayaṃ śatamakhaḥ śrīmānayamagnirjagatprabhuḥ |
dharmarājo varuṇaśca vāyuḥ śrīśaśivādayaḥ || 103 ||
[Analyze grammar]

samabhyarthayitāro'mī tvaṃ yācyaśca jagatkṛte |
vāṅmātrodyamasādhyaṃ tat tava viśvopakārakam || 104 ||
[Analyze grammar]

vindhyādrirvardhate meroḥ spardhayā tvaṃ nivāraya |
sūryamārgamavaruddhyedānīmūrdhvaṃ pragacchati || 105 ||
[Analyze grammar]

ye tu niṣṭhuranaisargā ye ca mārgāvarodhakāḥ |
ye spardhante ca vṛddhyarthaṃ tadvṛddhirhānidā sadā || 106 ||
[Analyze grammar]

śrutvā dhyātvā kṣaṇaṃ tathetyuktvā'gastirmahāmuniḥ |
visṛjya devatāḥ prāha lopāmudrāmidaṃ vacaḥ || 107 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kutayugasantāne vindhyādriṇā vardhamānena sūryamārgā'varodhe devānāmagastimuniṃ prati yānaṃ lopāmudrāyāḥ pātivratyadharmavarṇanaṃ cetinirūpaṇanāmā pañcapañcāśadadhikacatuśśatatamo'dhyāyaḥ || 455 ||
[Analyze grammar]