Chapter 454

śrīnārāyaṇa uvāca |
śṛṇu priye mahālakṣmi pātivratyaṃ janātigam |
dharmādharmau svāmivaco mukhyaṃ nānyaditi dhruvam || 1 ||
[Analyze grammar]

patyurvacasi cenmāndyaṃ satī kuryāt sudhānibham |
svāmivākyaṃ bhavet hiṃsraṃ kuryāt puṇyanibhaṃ satī || 2 ||
[Analyze grammar]

kāntokte ced bhavet stainyaṃ nyāyyaṃ matvā''caret satī |
bhartrājñaptaṃ vyavāyaṃ ca dharmaṃ matvā''caret satī || 3 ||
[Analyze grammar]

patireva parabrahma kṛṣṇanārāyaṇaḥ svayam |
śubhaṃ samādiśed yadvā'śubhaṃ satī samācaret || 4 ||
[Analyze grammar]

satī tasya vacovaśyā pātivratyaphalaṃ labhet |
patiścedaśubhaṃ samādiśet sa phalabhāg bhavet || 5 ||
[Analyze grammar]

nā'trā'śubhe vaco'dhīne kārye tadbhāginī satī |
pratyutā'śubhakāryaṃ sā sāmarthyāt śubhadaṃ caret || 6 ||
[Analyze grammar]

aniṣṭaṃ duḥkhadaṃ sā tu sukhadaṃ parivartayet |
satyāḥ saṃkalpamātreṇa mṛtyuḥ kālo yamo bhayam || 7 ||
[Analyze grammar]

adharmaḥ kleśadāḥ sarve sukhadāḥ saṃbhavanti vai |
pātivratyaṃ paro dharmaḥ pātivratyaṃ paraṃ balam || 8 ||
[Analyze grammar]

pātivratyavṛṣāgre tu pāpaṃ puṇyapradaṃ bhavet |
duḥkhaṃ sukhasvarūpaṃ syāt patikṛṣṇapratoṣaṇāt || 9 ||
[Analyze grammar]

atrārthe tu purā vṛttaṃ kathayāmi śṛṇu priye |
pativākyaṃ samādṛtya vyavāyasthasvayoṣitaḥ || 10 ||
[Analyze grammar]

sarvaṃ puṇyātmakaṃ jātaṃ devatoṣakaraṃ yathā |
dakṣiṇāpathamadhye vai grāme bāṣkalanāmake || 11 ||
[Analyze grammar]

prajā asaṃskṛtā āsan jñānavairāgyavarjitāḥ |
narā nāryaḥ kṛṣikāryā āraṇyakaprajīvanāḥ || 12 ||
[Analyze grammar]

tatraiko viduro nāma dharmācāravivarjitaḥ |
dvija āsīt kṛṣigoptā śūdrādimitratāṃgataḥ || 13 ||
[Analyze grammar]

kṛṣikārye karmacāriṇībhiḥ pravartate'niśam |
paranārīprasaṃgādidoṣaṃ jānāti naiva saḥ || 14 ||
[Analyze grammar]

śūdrayā saha kāryādau kāmena saṃgataḥ kvacit |
viduraṃ kṛpaṇā sā ca yācate bhojanaṃ dhanam || 15 ||
[Analyze grammar]

viduraḥ kṛpayā''viṣṭaḥ kāmabhāvanayā tathā |
nirvāhārthaṃ tu śūdrāyai dadātyeva kvacitkvacit || 16 ||
[Analyze grammar]

sadāro'pi satīṃ bhāryāṃ bandulāṃ nātimanyate |
gṛhasthitaṃ dhanaṃ cānnaṃ śūdrāyai pradadāti saḥ || 17 ||
[Analyze grammar]

bandulā sahate sarvaṃ patyarthaṃ navayauvanā |
dhanaṃ cānnaṃ kṣayaṃ prāptaṃ śūdrāyai svāminā'rpitam || 18 ||
[Analyze grammar]

vidurastu satīṃ patnīṃ yācate dehi me dhanam |
annaṃ dehyambaraṃ dehi śūdryartha dehi me priye || 19 ||
[Analyze grammar]

ityuktā sā satī prāha gṛhe yadyaddhi vidyate |
tatsarvaṃ nīyatāṃ nātha tvadadhīnaṃ gṛhaṃ sadā || 20 ||
[Analyze grammar]

tvayi nāthe prasanne ca sarvaṃ me sukhadaṃ bhavet |
madagre tu dhanaṃ nāsti yadāttha tatkaromyaham || 21 ||
[Analyze grammar]

vidurastāṃ satīmāha gacchā'nyasevanaṃ kuru |
narān dhaninaḥ saṃsevya dhanamānaya dehi me || 22 ||
[Analyze grammar]

satī tvājñākarī patyau viśvastā ceśvare yathā |
kaiṃkarya kasyacit kṛtvā dāsyaṃ patītvameva vā || 23 ||
[Analyze grammar]

dhanamānayati patyājñayā tasmai dadāti ca |
patireva paro dharmaḥ pativākyaṃ sukhāvaham || 24 ||
[Analyze grammar]

itimatvā parapuṃsāṃ kāmasevāparā'bhavat |
evaṃ tayostu dampatyordurācārapravṛttayoḥ || 25 ||
[Analyze grammar]

grāme kaścit kathākāro brāhmaṇo daivayogataḥ |
samāyayau saṃhitāyāḥ kathāṃ cakāra dharmataḥ || 26 ||
[Analyze grammar]

grāmīṇā śuśruvuḥ sarve prācīnāṃ dharmasaṃhitām |
kumārgaṃ saṃparityajya dharmamārgaṃ samāśritāḥ || 27 ||
[Analyze grammar]

jagṛhurvaiṣṇavaṃ mantraṃ pūjayāmāsuracyutam |
brāhmaṇaṃ tvarcayāmāsurvihāyā'satkriyāṃ janāḥ || 28 ||
[Analyze grammar]

paścāttāpaṃ svakṛtyānāṃ cakruste sasmarurharim |
vidureṇa parityaktaḥ śūdrāsaṃgastataḥ param || 29 ||
[Analyze grammar]

atīva dhārmiko jātaścaikabhuktaṃ karoti ca |
snānaṃ sandhyāṃ japaṃ pūjāṃ naivedyaṃ devadarśanam || 30 ||
[Analyze grammar]

kṛtvā bhuṃkte sadā tvevaṃ patnī cāpi tathā'karot |
evaṃ vai vartamānasya vidurasyā''yuṣaḥ kṣaye || 31 ||
[Analyze grammar]

āyātā yamadūtāstaṃ netuṃ yamapuraṃ tadā |
cukrośa dṛṣṭvā tāndūtān kṛṣṇanārāyaṇeti saḥ || 32 ||
[Analyze grammar]

patnī prāha ca taṃ śrutvā kathamākrośanaṃ priya |
sa cāha tāṃ yamadūtā netuṃ māṃ vai samāgatāḥ || 33 ||
[Analyze grammar]

patnī jalaṃ kare kṛtvā samuvāca satī tadā |
yadi patyuḥ priyā bhāryā patyuḥ priyakarī sadā || 34 ||
[Analyze grammar]

patyājñāyāṃ vartamānā patikṛṣṇaparāyaṇā |
tena satyena dūtāste dūraṃ yāntu yamālayam || 35 ||
[Analyze grammar]

ityuktvā tajjalaṃ patyuḥ pārśve cikṣepa tāvatā |
dūrātpalāyitā dūtā avaplutya sthalāttataḥ || 36 ||
[Analyze grammar]

patiḥ svasthastadā jāto vṛttāntamāha tattathā |
patnī prāha punaḥ kāntaṃ svāmisevākṛtaṃ phalam || 37 ||
[Analyze grammar]

tubhyaṃ dadāmi me kānta sadgatirastu tena te |
tāvadvai vaiṣṇavā viṣṇoḥ pārṣadāstvāyayurmudā || 38 ||
[Analyze grammar]

patnyā dṛṣṭā pātivratyadharmaphalena tatkṣaṇam |
pūjitā vanditāścāpi patiṃ ninyuḥ paraṃ padam || 39 ||
[Analyze grammar]

bandulā tu patiṃ kṛtvā kroḍe ruroda vai kṣaṇam |
atha saṃcintayāmāsa yadyahaṃ kāntarañjinī || 40 ||
[Analyze grammar]

tadā kāntena sākaṃ me prāṇāḥ prayāntu tatkṣaṇam |
tāvanmūrchāṃ gatvā sādhvī prāṇāṃstyaktvā tu tatkṣaṇam || 41 ||
[Analyze grammar]

svāminā divyadehena saha yātā surūpiṇī |
divyadehā vimānasthā viṣṇupārṣadasatkṛtā || 42 ||
[Analyze grammar]

tattejaśca vimānaṃ ca dṛṣṭaṃ śrotṛbhirujjvalam |
brāhmaṇaḥ sa tu sadbhaktaistayorvai cordhvadaihikam || 43 ||
[Analyze grammar]

kārayāmāsa vidhinā bhojayāmāsa vaiṣṇavān |
dadau kṛṣṇopadeśaṃ ca dharmaṃ patnīvrataṃ dadau || 44 ||
[Analyze grammar]

pātivratyaṃ tathā dharmaṃ dadau prajāḥ svayaṃ dvijaḥ |
sarve'pi vaiṣṇavāstvāsan narā nāryaḥ samantataḥ || 45 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
iti mantraṃ tu te labdhvā bhejire kṛṣṇamacyutam || 46 ||
[Analyze grammar]

kathāṃ śuśukarīśasya cakruśca bhajanaṃ sadā |
kathāyā vācako vipraḥ svapne svadarśanaṃ dadau || 47 ||
[Analyze grammar]

narebhyo vanitābhyaśca nārāyaṇaścaturbhujaḥ |
hārakeyūramukuṭapītāmbarasudarśanaiḥ || 48 ||
[Analyze grammar]

sahitaḥ sevito lakṣmyā'dṛśyata vai manoharaḥ |
kathānte pūjitaḥ sarvaiḥ svīkṛtya pūjanaṃ tataḥ || 49 ||
[Analyze grammar]

upādideśa tān sarvān bhaktānugrahavigrahaḥ |
pātivratyaṃ paraṃ dharmaṃ bandulāyā vilokya tu || 50 ||
[Analyze grammar]

ahaṃ nārāyaṇastasyāḥ kalyāṇārthaṃ dvijātmakaḥ |
samāyātaḥ kathākāraścoddhṛtā yūyamityapi || 51 ||
[Analyze grammar]

kathāṃ śrutvā vaiṣṇavāśca jātāstatsevanaṃ mama |
pūjayadhvaṃ ca māṃ nityaṃ śṛṇudhvaṃ ca kathāṃ hareḥ || 52 ||
[Analyze grammar]

naraiḥ patnīvrataṃ pālyaṃ nārībhiśca pativratam |
ubhābhyāṃ śrīkṛṣṇanārāyaṇavrataṃ ca tārakam || 53 ||
[Analyze grammar]

satkathāśravaṇaṃ nityaṃ kartavyaṃ mokṣadaṃ param |
kṛṣṇasya kathayā ceto viśuddhiṃ paramāṃ vrajet || 54 ||
[Analyze grammar]

kathayā siddhyati dhyānaṃ dhyānāt kaivalyamuttamam |
sarveṣāṃ śreyasāṃ bījaṃ satkathāśravaṇaṃ matam || 55 ||
[Analyze grammar]

kāmaḥ krodhaśca lobhaśca madamānādayaḥ pare |
adharmasya sutā yānti dūraṃ kathāśravāddhareḥ || 56 ||
[Analyze grammar]

gurutalpaḥ surāpānaṃ tathā'kāmāprasaṃgakaḥ |
kāmasya tanayāstvete yānti dūraṃ kathāśravāt || 57 ||
[Analyze grammar]

pitṛvadho mātṛvadho brahmahatyā ca nāśanam |
krodhasya tanayāścaite dūraṃ yānti kathāśravāt || 28 ||
[Analyze grammar]

devasvaharaṇaṃ viprasvahāraḥ svarṇamoṣaṇam |
lobhasya tanayāstvete dūraṃ yānti kathāśravāt || 29 ||
[Analyze grammar]

aśraddhā cāpi durmedhā avidyāyāḥ sute hyubhe |
kṛṣṇanārāyaṇakathāśravād dūraṃ pragacchataḥ || 60 ||
[Analyze grammar]

kathā saṃsṛtibaddhānāṃ sadyo muktipradā śubhā |
strīṇāṃ pāṃsulapādānāṃ dāsānāṃ dāsayoṣitām || 61 ||
[Analyze grammar]

ajñānatimirāndhānāṃ dīparūpā hareḥ kathā |
bhavarogābhibhūtānāṃ susevyaṃ paramauṣadham || 62 ||
[Analyze grammar]

mahāpātakaśailānāṃ kathā vajranibhā matā |
bharjanaṃ karmabījānāṃ sādhanaṃ sarvasampadām || 63 ||
[Analyze grammar]

śṛṇvatāṃ śrīharergāthāṃ tathā kīrtayatāṃ satām |
teṣāṃ pādarajāṃsyaiva tīrthāni munayo jaguḥ || 64 ||
[Analyze grammar]

muhūrtamapi śṛṇuyādaśakto'pi dine dine |
ghaṭikāṃ vā tadardhaṃ vā kṣaṇaṃ vā pāvanīṃ kathām || 65 ||
[Analyze grammar]

sthūlakāryaprasaktānāṃ sthūlabuddhimatāṃ kathā |
kalpavṛkṣasamo nānyaḥ panthāḥ kathetaraḥ sukhaḥ || 66 ||
[Analyze grammar]

pibannevā'mṛtaṃ yatnādekaḥ syādajarāmaraḥ |
pītaṃ kathāmṛtaṃ kuryāt kulamevā'jarāmaram || 67 ||
[Analyze grammar]

kathāvaktā hariḥ sākṣād gurūṇāṃ yāvatāṃ guruḥ |
mokṣadaḥ puṇyado jñānapradīpaḥ paro guruḥ || 68 ||
[Analyze grammar]

ye kathāṃ tatpravaktāraṃ praśaṃsanti janā api |
aśṛṇvanto'pi te yānti śāśvataṃ paramaṃ padam || 69 ||
[Analyze grammar]

kathāśravaṇasāhāyyaṃ ye kurvanti janā bhuvi |
kalpakoṭiśataṃ sāgraṃ tiṣṭhanti brahmaṇaḥ padam || 70 ||
[Analyze grammar]

satkathābodhalābhena smaraṇaṃ me harerbhavet |
sadāsmaraṇayogena vāsanānāṃ kṣayo bhavet || 71 ||
[Analyze grammar]

tathā satī virāgaḥ syād rāgābhāve paraṃ sukham |
tṛṣṇākṣayasukhaṃ tvātmānandodbhave sahāyakṛt || 72 ||
[Analyze grammar]

rāge naṣṭe pratidvandvī dveṣo'pi naśyati dhruvam |
rāgadveṣau yasya naṣṭau doṣau tasya pravartanam || 73 ||
[Analyze grammar]

śubhā'śubhaṃ na vai janmamṛtyupradaṃ prajāyate |
pravṛtterapyabhāvena bhogābhāvo bhavet sadā || 74 ||
[Analyze grammar]

nityānandaṃ cidānandaṃ sadānandaṃ nijātmakam |
bhuṃkte bhaktirase magnaḥ śrīkṛṣṇātmakabhāvataḥ || 75 ||
[Analyze grammar]

nityatṛpto mama mūrtau nityamagno madātmani |
brahmānandamayo dhāmni mamo'śrute'kṛtaṃ sukham || 76 ||
[Analyze grammar]

evaṃ kathāśruteḥ puṇyaṃ phalaṃ mokṣapradaṃ bhavet |
ahaṃ tuṣṭo bhavāmyeva yatra me'sti kathāmṛtam || 77 ||
[Analyze grammar]

vajralepādipāpāni kathātmamatprayogataḥ |
madārādhanavijñānāt bhasmībhavanti sarvaśaḥ || 78 ||
[Analyze grammar]

satyā patiguṇāḥ śravyā eṣa dharmaḥ sanātanaḥ |
patiścāhaṃ parabrahma matkathāṃ śṛṇuyācchubhām || 79 ||
[Analyze grammar]

dānaṃ yajñaṃ tathā tīrthaṃ dravyaṃ vyayaiḥ samutsavam |
kartumaśaktabhaktena kathā śravyā mama dhruvam || 80 ||
[Analyze grammar]

kīrtanaṃ me svāminaśca nityaṃ kāryaṃ prage niśi |
pūjā kāryā madarthe ca grasitanyaṃ niveditam || 81 ||
[Analyze grammar]

patraṃ puṣpaṃ jalaṃ khādyaṃ sarvaṃ prāsādikaṃ graset |
tena sattvapraśuddhiḥ syātsmṛtirdevasya śāśvatī || 82 ||
[Analyze grammar]

kṛṣṇanārāyaṇasmṛtyā dhruvo mokṣo'pyavāpyate |
smṛtau tu sarvathā hetuḥ śrīkṛṣṇayaśasāṃ śravaḥ || 83 ||
[Analyze grammar]

kṣitedanijapuṇyena svargaprāptirna vai dhruvā |
kathāśravaṇabhaktyā tu śāśvataॆ dhāma gamyate || 84 ||
[Analyze grammar]

svarṇakoṭisahasrāṇāṃ dānāccāpyadhikā kathā |
rājasūyasahasrebhyaścottamā śrīhareḥ kathā || 85 ||
[Analyze grammar]

vratebhyo niyamebhyaśca japebhyaḥ śreyasī kathā |
yatra me mama sādhūnāṃ bhaktānāṃ yogayoṣitām || 86 ||
[Analyze grammar]

sādhvīnāṃ ca satīnāṃ ca camatkārā nirūpitāḥ |
caritrāṇi sudivyāni dyumanti varṇitāni ca || 87 ||
[Analyze grammar]

tāni sarvāṇi dātṝṇi sampadāṃ mokṣaṇasya ca |
bhavatāṃ mokṣaṇārthāya satyāḥ sadbhāvasevayā || 88 ||
[Analyze grammar]

yuṣmākaṃ tāraṇārthaṃ vai viprarūpo bhavāmyaham |
athā'haṃ yāmi vaikuṇṭhaṃ bhavantaḥ sādhusevanam || 89 ||
[Analyze grammar]

kathāyāḥ śravaṇaṃ nityaṃ kurvantu dhyānameva me |
bhuktiṃ muktiṃ mama sevāṃ yūyaṃ sarve gamiṣyatha || 90 ||
[Analyze grammar]

ityuktvā vācako vipro vimānena sutejasā |
yayau nārāyaṇo bhūtvā vaikuṇṭhaṃ bhaktasevitaḥ || 91 ||
[Analyze grammar]

ityevaṃ kathitaṃ lakṣmi kāntājñāpālane phalam |
śravaṇātpaṭhanāccāsya bhuktirmuktirbhaved dhruvam || 92 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pātivratyaparāyā bandulāyā vidurākhyaviprasya svasvāminaḥ ājñāpālane vyavāyasyā'doṣatve bhagavatkathāprāptilābhena bhagavaddhāmaprāptirityādinirūpaṇanāmā catuḥpañcāśadadhikacatuśśatatamo'dhyāyaḥ || 454 ||
[Analyze grammar]