Chapter 431

śrīnārāyaṇa uvāca |
śṛṇu lakṣmi kathayāmi śreṣṭhaṃ pativratāvṛṣam |
patirnārāyaṇaḥ kṛṣṇastadvrataṃ tat pativratam || 1 ||
[Analyze grammar]

patyarthaṃ vṛtyate yāvad buddhisādhanakarmabhiḥ |
patiryathā praśasyeta tathā patnyā vidhīyate || 2 ||
[Analyze grammar]

aguṇo vā saguṇo vā durguṇo'pi praśaṃsyate |
īśavat sarvathā nāryā gīyate jihvayā dhiyā || 3 ||
[Analyze grammar]

tadvrataṃ prathamaṃ lakṣmi pātivratyottamaṃ matam |
praśaṃsā sarvathā sarvaprāṇināṃ śarkarāsamā || 4 ||
[Analyze grammar]

atimiṣṭā miṣṭatamā sarvatrā'pyanubhūyate |
putrapraśaṃsayā pramodate tatpitarau yathā || 5 ||
[Analyze grammar]

pitṛpraśaṃsayā putrāḥ pramodante'tiharṣitāḥ |
patnīpraśaṃsayā svāmī pramodate'ti cāntare || 6 ||
[Analyze grammar]

śreṣṭhipraśaṃsayā bhṛtyo rājñaḥ praśaṃsayā prajāḥ |
vṛṣapraśaṃsayā vṛṣavāhako'pi pramodate || 7 ||
[Analyze grammar]

śiṣyapraśaṃsayā gururguroḥ praśaṃsayā'nugaḥ |
deśapraśaṃsayā deśī śāstrapraśaṃsayā''stikaḥ || 8 ||
[Analyze grammar]

yatprati yasya sadbhāvastatpraśaṃsā tu bhāvinaḥ |
modapramodasaṃsthānaṃ samutsāhotsavāvahā || 9 ||
[Analyze grammar]

bhavatyeva sadā lakṣmi patikīrtisugarbhitā |
videśasthasya kāntasya vārtā śrutvā pativratā || 10 ||
[Analyze grammar]

putrotsavā'dhikā''nandavatī bhavati tatkṣaṇam |
tadvrataṃ mānasagamyaṃ pātivratyaṃ mudāvaham || 11 ||
[Analyze grammar]

hārdaṃ snehaṃ na cānye vai prajānanti parātmanaḥ |
parātmano guṇā naiva sākṣād bhavanti sarvathā || 12 ||
[Analyze grammar]

svātmamanaḥsaṃyogasya hetostatrā'nupasthiteḥ |
āveśādikriyāyoge paramparābhiyogataḥ || 13 ||
[Analyze grammar]

pratyakṣamiva cānyeṣāmābhāsante na vāstavam |
pātivratyaṃ sadā snigdhaṃ hyakāraṇaṃ sakāraṇam || 14 ||
[Analyze grammar]

svārthaṃ yadvā parārthaṃ vā svārthamevā'nubhūyate |
mama svāmī kathaṃ khyāto bhavedityāgrahaḥ striyāḥ || 15 ||
[Analyze grammar]

pātivratyānvayitvaṃ vai satataṃ bodhyameva hi |
patyuḥ kathāśrave yadvat te'sti pramoda āgrahaḥ || 16 ||
[Analyze grammar]

tadvat kṛṣṇakathābodhe yasyā'styāgraha utkaṭaḥ |
kathāyāḥ śravaṇe vāpi kīrtane ca praśaṃsane || 17 ||
[Analyze grammar]

puṃso bhaktasya nāryāśca bhaktimatyāḥ sadā hareḥ |
sataḥ satyāstato nityaṃ pātivratyaṃ prakāśate || 18 ||
[Analyze grammar]

dāsyaṃ śreṣṭhaṃ pātivratyaṃ śubhaṃ prasannatāpradam |
kathāyāḥ śravaṇaṃ pātivratyaṃ tato'dhikaṃ matam || 19 ||
[Analyze grammar]

kathāyāḥ kīrtanaṃ pātivratyaṃ tato'pi cottamam |
patyuḥ svasvāminaḥ kīrtergānaṃ nityaṃ hi durlabham || 20 ||
[Analyze grammar]

patyuśca śrīkṛṣṇanārāyaṇasyā'bhedabhāvataḥ |
sarvadā guṇagānaṃ tatpātivratyaṃ paraṃ striyāḥ || 21 ||
[Analyze grammar]

hareḥ kathātmakaṃ pātivratyaṃ satpatilokadam |
śroturvakturna sandehaḥ santuṣṭo'haṃ janārdanaḥ || 22 ||
[Analyze grammar]

nayāmi taṃ mahatsvargaṃ satīlokaṃ satīṃ tathā |
niṣkāmānāṃ ca maddhāma matpadaṃ preṣayāmi vai || 23 ||
[Analyze grammar]

matkathābhirhi lokānāṃ hṛdayeṣu nirantaram |
madbhaktirnihitā yena lakṣāṇāṃ koṭidehinām || 24 ||
[Analyze grammar]

mama dāsyaṃ kathādvā'ṅkuritaṃ yena dehiṣu |
mama vrataṃ mama sevā mama pūjā mamā'rhaṇam || 25 ||
[Analyze grammar]

mama jāpo mama bhaktirmama smṛtirmamā''śrayaḥ |
mamecchā mama vijñānaṃ mama dhyānaṃ mamehanam || 26 ||
[Analyze grammar]

mama yogo mama vāñcchā mamārpaṇaṃ mama grahaḥ |
maddhāraṇā mayi nyāso mayi vāso mamārthanā || 27 ||
[Analyze grammar]

mayyabhedo mayi sneho mayi kāmo ratirmayi |
mama sarvasvadānaṃ ca madarthaṃ jīvanaṃ mṛtiḥ || 28 ||
[Analyze grammar]

upārjanaṃ madarthaṃ ca madarthamupakāritā |
paropakārādi dānaṃ vrataṃ puṇyaṃ madarthakam || 29 ||
[Analyze grammar]

matpade gamanaṃ tvante matsevāgrahaṇaṃ sadā |
kathābhiḥ kāritaṃ yena lokānāṃ hṛdayeṣu vai || 30 ||
[Analyze grammar]

tādṛśo me kathāvaktā śāstrajñānapradaśca me |
manmahimnaḥ puṣṭikartā madbhaktipoṣakaśca yaḥ || 31 ||
[Analyze grammar]

tasya lakṣmi pātivratyaṃ mayi koṭiguṇaṃ matam |
śreṣṭhācchreṣṭhatamaṃ pātivratyaṃ vakturhi śāśvatam || 32 ||
[Analyze grammar]

kathāvācanapuṇyasya pāraṃ prāpnomi nā'pyaham |
asaṃkhyajīvajātānāṃ kulānāṃ vaiṣṇavīdhiyā || 33 ||
[Analyze grammar]

uddhārako bhavatyeva kathāyā vācako guruḥ |
matsyarūpo na sandehastvattaḥ śreṣṭhaḥ sa padmaje || 34 ||
[Analyze grammar]

piturdaśaguṇī mātā māturdaśaguṇo guruḥ |
pitā bījapradatvena jananī janmadatvataḥ || 35 ||
[Analyze grammar]

gururmokṣapradatvena śreṣṭhaḥ sarvebhya ucyate |
patiḥ śreṣṭho guruḥ śreṣṭhastayoḥ śreṣṭhataro guruḥ || 36 ||
[Analyze grammar]

pitā patirguruḥ śreṣṭhāsteṣāṃ śreṣṭhatamo guruḥ |
ātmā śreṣṭho hariḥ śreṣṭhastayoḥ śreṣṭhatamo hariḥ || 37 ||
[Analyze grammar]

ātmā harirguruḥ śreṣṭhāsteṣāṃ śreṣṭhatamo guruḥ |
yadāśrayāddhareḥ prāptiryaṃ vinā durlabho hariḥ || 38 ||
[Analyze grammar]

pṛthvīdātā vṛttidātā jīvadātā sadottamāḥ |
teṣāmapekṣayā mokṣadātā jñānad uttamaḥ || 39 ||
[Analyze grammar]

kṛṣṇajñānaṃ pātivratyaṃ tatpradaḥ supatiḥ smṛtaḥ |
kṛṣṇabhaktiḥ svāmidharmastatpradaḥ supatiḥ sadā || 40 ||
[Analyze grammar]

nāmadhāraḥ patistvanyo yathārtho bhaktidaḥ patiḥ |
evaṃ jñātvā hareḥ pātivratyaṃ dhāryaṃ sadā priye || 41 ||
[Analyze grammar]

harerguṇānāṃ gānaṃ ca harermūrteśca cintanam |
hareḥ kathāyā vyākhyānaṃ pātivratyaṃ taduttamam || 42 ||
[Analyze grammar]

yatra kathā tatra bhaktā devāstīrthāni cācyutaḥ |
devyaḥ ṛṣayaḥ pitaro muktirbhaktirvṛṣādayaḥ || 43 ||
[Analyze grammar]

siddhā yatayaḥ satyaśca sādhavo yoginastathā |
yugāḥ śāstrāṇi vedāśca kṣetrāṇi ca vanāni ca || 44 ||
[Analyze grammar]

vyāsāstattvāni muktāśca kathāpātrāṇi yāni ca |
āgatya tāṃ kathāṃ bhāvaplutāḥ śṛṇvanti sarvadā || 45 ||
[Analyze grammar]

kecinmūrtā amūrtāścā'dṛśyā dṛśyāstathā'pare |
pātivratyaparāḥ sarve kathāṃ śṛṇvanti vai hareḥ || 46 ||
[Analyze grammar]

svasvayaśo hareḥ kīrtiṃ bhaktānāṃ ca kathānakam |
śrutvā śrutvā pramodante dadatyāśiṣa eva te || 47 ||
[Analyze grammar]

vācakāya gurave te namaskurvanti vai tathā |
śrotāraḥ śiṣyavargā vai namaskurvanti vācakam || 48 ||
[Analyze grammar]

tasmācchrāvayitā śreṣṭhaḥ sarvebhyo gurubhaktidaḥ |
nārāyaṇasamo bodhyaḥ pātivratyasya bodhakaḥ || 49 ||
[Analyze grammar]

kṛṣṇanārāyaṇaṃ natvā kathāṃ śrutvā hareḥ śubhām |
sarvapāpavinirmukto yāti kṛṣṇapadaṃ param || 50 ||
[Analyze grammar]

purā godāvarītīre sampannaṃ sukathānakam |
lakṣmīnārāyaṇasaṃhitāyāḥ pārāyaṇaṃ hyabhūt || 51 ||
[Analyze grammar]

pāpaghnaṃ pāvanaṃ svargapradaṃ jñānadamokṣadam |
durvāsaso muneḥ śiṣyo yatiḥ satyavratā'bhidhaḥ || 52 ||
[Analyze grammar]

brahmaniṣṭho nirapekṣo bhikṣāmātraprajīvanaḥ |
guhāvāsakarastatrā'parigrahavratānvitaḥ || 53 ||
[Analyze grammar]

tulasīmālikāyuktaḥ kṛṣṇanārāyaṇaṃ japan |
karotisma kathāṃ nityaṃ sāyaṃ pratidinaṃ priye || 54 ||
[Analyze grammar]

dhyātvā smṛtvā smārayitvā kṛṣṇanārāyaṇaṃ patim |
namaḥ kṛtvā kārayitvā kṛṣṇakathāṃ karoti saḥ || 55 ||
[Analyze grammar]

śrotṝṇāmapyabhāve ca vyākhyātṛṇāmanāgame |
satyavratastu satataṃ karoti śrīhareḥ kathām || 56 ||
[Analyze grammar]

nityakarma svakaṃ kṛtvā karotyeva hareḥ kathām |
śrotā cedasti yaḥ kaścit tasmai vyākhyātyaharniśam || 57 ||
[Analyze grammar]

yadi nāsti sthale śrotā rikte'pi kurute kathām |
anyo vyākhyāti kaścidvā hareḥ puṇyāṃ kathāṃ tadā || 58 ||
[Analyze grammar]

svakarmāṇi parityajya śṛṇoti śrīhareḥ kathām |
hareḥ pātivratyaparaḥ kathāyāḥ śravaṇe rataḥ || 59 ||
[Analyze grammar]

tīrthāni devatānāṃ cā'gārāṇyapi vihāya saḥ |
kathāvirodhakānyanyakarmāṇyapi vihāya saḥ || 60 ||
[Analyze grammar]

kathāṃ divyā saṃśṛṇoti sati vaktarisarvadā |
vaktaryasati svayaṃ ca vyākhyāti kṛṣṇasatkathām || 61 ||
[Analyze grammar]

kathāṃ vinā na jānāti pātivratyaṃ paraṃ vṛṣam |
catvare ca gṛhe naije svayaṃ vyākhyāti bhāvataḥ || 62 ||
[Analyze grammar]

āvaśyakāni kāryāṇi kathāto nā'dhikāni vai |
āvaśyakottamaṃ kārya kathārūpaṃ pradhānakam || 63 ||
[Analyze grammar]

kathāyā viratau cānyakāryaprādhānyameva ha |
kathāṃ lakṣmi śyāvatastu karmabandho na vidyate || 64 ||
[Analyze grammar]

jñānadīpaḥ pradīptaḥ syād viratiśca vivardhate |
sattvaśuddhistathā śāntiḥ śṛṇvataḥ saṃpravartate || 65 ||
[Analyze grammar]

harau prītiḥ sadā śṛṇvatā kathāṃ dārḍhyamāpyate |
kṛṣṇe prītyā mahāratyā kṛṣṇohṛdyavarudhyate || 66 ||
[Analyze grammar]

yeṣu kṛṣṇasteṣu cāsya sauhārdaṃ satsu jāyate |
sādhurūpo haristvasya pratyakṣo bhavati dhruvam || 67 ||
[Analyze grammar]

tato divyaḥ svayaṃ kṛṣṇanārāyaṇaḥ śriyaḥ patiḥ |
pātivratyaṃ paraṃ jñātvā divyadarśanado bhavet || 68 ||
[Analyze grammar]

puṃsā nāryā tataḥ kṛṣṇakathā śravyā yathābalam |
kathāṃ vinā na vai jñānaṃ tadvinā śāntireva na || 69 ||
[Analyze grammar]

duḥkhāvartte bhave tvasmin śāntikṛt kṛṣṇakīrtanam |
kathāyāḥ śravaṇaṃ caiva kṛṣṇasya smārakaṃ param || 70 ||
[Analyze grammar]

sattvaśuddhikaraṃ cāpi śuddhyā dhyānaṃ prajāyate |
bahudhā śravaṇaṃ tasya mananaṃ dhyānamuttamam || 71 ||
[Analyze grammar]

kṛṣṇanārāyaṇasvāmipatiprāptikaraṃ matam |
yatra kṛṣṇakathā naiva yatra santi na sādhavaḥ || 72 ||
[Analyze grammar]

gaṃgātaṭamapi tyājyaṃ vinā patiṃ na tat priyam |
yatra vai tulasī nāsti na yatra harimandiram || 73 ||
[Analyze grammar]

yatra hare pātivratyaparo bhakto na vartate |
yatra viṣṇoḥ kathā nāsti grāmaḥ śmaśānasadṛśaḥ || 74 ||
[Analyze grammar]

tatra mṛto jano yāti yamarājatamaḥsthalīm |
iti vicārya munirāṭ satyavrataḥ sa vaiṣṇavaḥ || 75 ||
[Analyze grammar]

brahmavidyāparo viṣṇusmṛtimātraparāyaṇaḥ |
hareḥ kathāparo nityaṃ manute cātmakarma tat || 76 ||
[Analyze grammar]

na kiñcidadhikaṃ jātu manute śravaṇātparam |
kathāyāḥ kathanādvāpi paraṃ dharmo na tasya vai || 77 ||
[Analyze grammar]

nityaṃ sāyaṃ niścite vai samaye vyāsapaṭṭikām |
samāgatya niyamena kathāṃ karoti yatra vai || 78 ||
[Analyze grammar]

ekadā tatra rājñaśca sainyaṃ vai pārśvato gatam |
janāḥ sarve niruddhāśca vyāso'pi ruddha eva ha || 79 ||
[Analyze grammar]

mārge kenāpi naivātra gantavyaṃ sainyamadhyataḥ |
iti mārge niruddhaḥ sa kathārodho'pi tena vai || 80 ||
[Analyze grammar]

devādyā ye śravaṇārthaṃṃ tvāyātāstatsthale ca te |
pratīkṣante sma vaktuścāgamanaṃ taddiśādṛśaḥ || 81 ||
[Analyze grammar]

satyavrato na cāyāto vyatyeti samayastadā |
satyavratasvarūpaṃ ca dhṛtvā kṛṣṇanarāyaṇaḥ || 82 ||
[Analyze grammar]

svayaṃ kathāṃ śrāvayituṃ niṣasādā''sane tadā |
lakṣmīnārāyaṇasaṃhitākathāmakaroddhariḥ || 83 ||
[Analyze grammar]

devāḥ śṛṇvanti bhāvena sainyaṃ krāntaṃ pathastadā |
satyavrataḥ samāyāto dṛṣṭvā vyāsaṃ svarūpiṇam || 84 ||
[Analyze grammar]

mahadāścaryamāpanno vijñāya smarato harim |
nanāmā'nyairyathā dṛśyo na bhaved viṣṇunā kṛtaḥ || 85 ||
[Analyze grammar]

āgatya tvāsane viṣṇormūrtau līno'bhavattadā |
kathā vicchedarahitā yathā tatra pravartate || 86 ||
[Analyze grammar]

viṣṇunā sandhitastatra svasmin satyavrataḥ priyaḥ |
kṛṣṇastvadṛśyatāṃ prāptaḥ kathā tadvatpravartate || 87 ||
[Analyze grammar]

satyavrataḥ samuvāca ślokaṃ viṣṇuvirāmitam |
tāvatsvarasya śravaṇe mādhuryaṃ bhinnatāṃ gatam || 88 ||
[Analyze grammar]

ākarṣaṇaṃ divyatā ca pūrvato'nyavidhāṃ gatā |
devādibhistadā jñātaṃ dhyānibhiryogavṛttibhiḥ || 89 ||
[Analyze grammar]

svayaṃ kṛṣṇaḥ kathāṃ cakre satyavratā'nupasthitau |
aho dhanyā vayaṃ kṛṣṇamukhātkathāśravaṃ gatāḥ || 90 ||
[Analyze grammar]

ityāścaryaṃ gatāḥ sarve śṛṇvanti ca kathāṃ punaḥ |
tāvat tatra samāyātaḥ śiṣyo durvāsaso'paraḥ || 91 ||
[Analyze grammar]

tapovratākhyaḥ karmaṭhaḥ kathā'nādarakṛt sadā |
kathāṃ mṛṣāṃ manyamānaḥ śrotṝn vaktṛṃśca narmakṛt || 92 ||
[Analyze grammar]

prajahāsa kathāṃ śrutvā vitaṇḍāṃ pracakāra ha |
jalpayitvā kathañcicca vyājahāra durāgrahī || 93 ||
[Analyze grammar]

vaktā pratārayatīmānime tu paśavo yathā |
pratāraṇājālabaddhāḥ kathayā mṛṣayā muhuḥ || 94 ||
[Analyze grammar]

ityuktvā prayayau hitvā vācyamānāṃ kathāṃ tadā |
na vyākhyāti svayaṃ kvāpi na śṛṇoti kadāpi ca || 95 ||
[Analyze grammar]

tapaḥ kāryaṃ paraṃ matvā gṛhakāryādikaṃ śubham |
karotyeva sadā tadvai kathānindāṃ karoti vai || 96 ||
[Analyze grammar]

evaṃ tvāyuḥkṣaye prāpte nindāpāpena vai vane |
piśāco'bhūcchamīvṛkṣe nirjale chinnakarṇakaḥ || 97 ||
[Analyze grammar]

nirāhāro mahāduḥkhī śuṣkakaṇṭhauṣṭhatālukaḥ |
svakṛtaṃ cintayānaḥ sa mattonmatta ivā'bhramat || 98 ||
[Analyze grammar]

prāptaṃ jalaṃ vahnitulyaṃ phalapuṣpādikaṃ viṣam |
vāyurvahnisamastvasya jāyate pāpakarmaṇaḥ || 99 ||
[Analyze grammar]

na nirvṛttiṃ na vā tṛptiṃ labhate karmaṭho vane |
sādhuśūnye kathāśūnye'raṇye kṣudhā''kulo rudan || 100 ||
[Analyze grammar]

satyavratena daivādvai dṛṣṭo mārgeṇa gacchatā |
pṛṣṭhaḥ ko''sīdṛśīṃ kasmād daśāṃ prāpto'si me vada || 101 ||
[Analyze grammar]

iti pṛṣṭhaśchinnakarṇastapovrata uvāca tam |
durvāsasaḥ suśiṣyo'haṃ tapovratasunāmadhṛk || 102 ||
[Analyze grammar]

kathānindotthapāpena piśāco'smi suduḥkhitaḥ |
adya te darśanānmokṣo bhaviṣyati mamātra vai || 103 ||
[Analyze grammar]

kṣamasva tvaṃ cāparādhān mama vaitaṇḍikādikān |
ityuktvā sa rudan mokṣaṃ samicchan pṛthivīṃ spṛśan || 104 ||
[Analyze grammar]

papāta pādayoḥ satyavratasyatrāhi māṃ gṛṇan |
satyavrataḥ salilaṃ svakare dhṛtvā hariṃ smaran || 105 ||
[Analyze grammar]

oṃ namaḥ śrīkṛṣṇanārāyaṇāya svāmine namaḥ |
iti mantraṃ dadau karṇe jalaṃ cikṣepa mastake || 106 ||
[Analyze grammar]

datvā pādaṃ tasya pṛṣṭhe pāpaṃ prajvālya śaktitaḥ |
samarpyaikadivasīyakathāyāḥ puṇyamuttamam || 107 ||
[Analyze grammar]

lakṣmīnārāyaṇasaṃhitādhyāyasya kathodbhavam |
jñānaṃ pradāya ca kṛtvā muktaṃ piśācadehataḥ || 108 ||
[Analyze grammar]

divyadehadharaṃ kṛtvā sasmāra śrīhariṃ prabhum |
tāvat kṛṣṇaḥ samāyāto rādhālakṣmīprabhānvitaḥ || 109 ||
[Analyze grammar]

pārvatīmāṇikīnāthaḥ padmāramājayāpatiḥ |
lalitāśrīpatiḥ kṛṣṇanārāyaṇaḥ sapārṣadaḥ || 110 ||
[Analyze grammar]

koṭisūryātisaṃśobhivimānavarasaṃsthitaḥ |
satyavratena bhagavān nato'rcitaḥ stuto muhuḥ || 111 ||
[Analyze grammar]

tapovrataṃ vimāne sve netuṃ samprārthito muhuḥ |
prajahāsa haristatra bhaktecchāpūrakaḥ prabhuḥ || 112 ||
[Analyze grammar]

prāha golokavāsārhaṃ puṇyaṃ vai nāsya vidyate |
satyavratastadā prāha gurumantreṇa dīkṣitaḥ || 113 ||
[Analyze grammar]

vaiṣṇavo'sti mayā tvatra kṛto'yaṃ puṇyavān kṛtaḥ |
lakṣmīnārāyaṇasaṃhitaikādhyāyasya sukṛtam || 114 ||
[Analyze grammar]

dattamasmai mayā kṛṣṇa dadāmi tulasīsrajam |
tava pādajalaṃ cāsmai punardadāmi keśava || 115 ||
[Analyze grammar]

tava prasādaṃ naivedyaṃ dadāmyasmai kṣaṇena ca |
tena puṇyena bhakto'yaṃ tavā'nugrahamātrataḥ || 116 ||
[Analyze grammar]

golokaṃ te yātu dhāma bhaktecchāpūrako bhavān |
ityuktaḥ sa hariḥ satyavrataṃ tathā'stu cāha yat || 117 ||
[Analyze grammar]

tapovrato muniṃ natvā vimānaṃ tvacyutājñayā |
samāruroha prayayau golokaṃ viṣṇunā saha || 118 ||
[Analyze grammar]

durvāsāśca tadā tatrā''jagāma divyadṛṣṭimān |
praśaśaṃsa svakaṃ śiṣyaṃ satyavrataṃ kathākaram || 119 ||
[Analyze grammar]

satīrthyamokṣadaṃ śāntaṃ vaiṣṇavaṃ bhavatārakam |
punaḥ punastadovāca durvāsā hṛṣṭamānasaḥ || 120 ||
[Analyze grammar]

aho hyekena śiṣyeṇa tāritaḥ karmaṭho'paraḥ |
aho hyekena śiṣyeṇa tāritaṃ sakalaṃ jagat || 121 ||
[Analyze grammar]

aho hyekena śiṣyeṇa tārito'haṃ gurustathā |
ayo hyekena śiṣyeṇa śiṣyavānasmi sāmpratam || 122 ||
[Analyze grammar]

satsu daśasahasreṣu śiṣyeṣvapi suśiṣyavān |
satyavratena jāto'smi kṛṣṇakathāprasevinā || 123 ||
[Analyze grammar]

yatra kṛṣṇakathāpūrapravāho vahate sadā |
tatra vāsakṛtāṃ muktirdāsīva karapātragā || 124 ||
[Analyze grammar]

iti te śrāvito lakṣmi kathāpativratāvṛṣaḥ |
śravaṇātpaṭhanāccāsya kṛṣṇadhāmapadaṃ labhet || 125 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne durvāsasaḥ śiṣyasya pātivratyaparāyaṇasya satyavratanāmakasyaikadivasīyakathāpuṇyadānena tapovratasya piśācatvamokṣaṇaṃ dhāmaprāptiśca satyavratasya kathākāle'nupasthitau bhagavān satyavratarūpadhṛk kathāmavācayadityādi |
nirūpaṇanāmaikatriṃśadadhikacatuśśatatamo'dhyāyaḥ || 431 ||
[Analyze grammar]