Chapter 384

śrīnārāyaṇa uvāca |
śṛṇu lakṣmi kṛṣṇanārāyaṇasakāśatastu yat |
vastrabhūṣādikaṃ divyamarpitaṃ tu vadhūkṛte || 1 ||
[Analyze grammar]

brahmadhāmno vibhūtervai sarvaṃ vastravibhūṣaṇam |
tatsarvaṃ sandadhāreyaṃ bhārgavī divyarūpiṇī || 2 ||
[Analyze grammar]

bhūṣayāṃcakrire lakṣmīḥ śrīḥ sāvitrīramādikāḥ |
pārvatī māṇikī jayā prabhā ca lalitādikāḥ || 3 ||
[Analyze grammar]

khyātyādyā mātaraścāpi tāmalaṃcakrurādarāt |
vibhūṣitā'tyalaṃkṛtā śuśubhe divyatāyutā || 4 ||
[Analyze grammar]

vahniśuddhāṃśukādhānā kabarībhārabhūṣitā |
kastūrībindubhiryuktā snigdhasaccandanārcitā || 5 ||
[Analyze grammar]

sindūrabindunā śaśvadbhālamadhyasthalojjvalā |
taptakāṃcanavarṇābhā koṭicandrasamaprabhā || 6 ||
[Analyze grammar]

candramokṣitasarvāṃgā mālatīmālyaśobhitā |
netrayo rañjitakṛṣṇā pakvabimbauṣṭhasundarī || 7 ||
[Analyze grammar]

nāgaraṃgastanī svarṇavarṇāṃgulikaradvayā |
sūkṣmaromāvalīrājattattatsthalīmanoharā || 8 ||
[Analyze grammar]

lakṣmīsthadivyacihnānāṃ rekhābhirjñātapadmajā |
alaktāñcitapādābjatalā kamalavatkarā || 9 ||
[Analyze grammar]

ānītā maṇḍape vedīsannidhau varamālayā |
ratnahīrakasvarṇādikusumādisuklṛptayā || 10 ||
[Analyze grammar]

karayordhṛtayā strībhiḥ śobhitā varasannidhau |
kṛṣṇanārāyaṇaṃ natvā vahniṃ natvā ca devatāḥ || 11 ||
[Analyze grammar]

sthirīkṛtā savyapārśve jayaśabdo hyabhūttadā |
vādyāni ca vicitrāṇi vādayanti sma tanmahe || 12 ||
[Analyze grammar]

dṛśyamāṇā sasmitā sā kṛṣṇanārāyaṇānanam |
praṇamya svapatiṃ lakṣmīḥ puṣpāñjalimavākirat || 13 ||
[Analyze grammar]

kṛṣṇasya mūrdhani bhāle'kṣatakuṃkumacandrakam |
tilakaṃ cāndanaṃ cakre sugandhajalamārpayat || 14 ||
[Analyze grammar]

varamālāṃ kṛṣṇagale datvā namāma pādayoḥ |
tīrthajalena cāṃguṣṭhaṃ prakṣālya tvapibajjalam || 15 ||
[Analyze grammar]

saptapradakṣiṇāḥ kṛtvā praṇamya svapatiṃ punaḥ |
siṣeca pallavaistīrthajalaṃ candanamiśritam || 16 ||
[Analyze grammar]

atha natvā vāmapārśve niṣasāda satī yadā |
tāṃ siṣeca jagatkāntaḥ kāntāṃ śāntāṃ sasusmitām || 17 ||
[Analyze grammar]

sākṣataṃ candrakaṃ tasyā bhāle kṛtvā svayaṃ prabhuḥ |
mastake ca karau datvā puṣpāṇyavākiraddhariḥ || 18 ||
[Analyze grammar]

tadā purohito bṛhaspatirmālāṃ galasthitām |
nāradasya samakṣaṃ vai vadhūkaṇṭhe'pyadhāpayat || 19 ||
[Analyze grammar]

varamālānvitā lakṣmīḥ śuśubhe meghavaidyutī |
atha mantrāstadā tatra prāvartantarṣimaṇḍalāt || 20 ||
[Analyze grammar]

bhṛgustatra sutāhastaṃ kṛṣṇahaste dadau śubham |
evaṃ bhṛguḥ pradānena vedamantreṇa vai dadau || 21 ||
[Analyze grammar]

bṛhaspateḥ kathanena svastītyāha haristadā |
jagrāha lakṣmīṃ śrīkṛṣṇanārāyaṇaḥ priyāṃ svakām || 22 ||
[Analyze grammar]

atha dānāni ratnānāṃ dravyāṇāṃ ca gavāṃ tathā |
gṛhāṇāṃ bhavanānāṃ ca brahmāṇḍānāmapi prabhuḥ || 23 ||
[Analyze grammar]

bhṛguścāpi dadau tatra dadau nārāyaṇo'pi ca |
bhṛguḥ putryai bhṛgukacchaṃ pattanaṃ pradadau tadā || 24 ||
[Analyze grammar]

bhūmā ca bhṛgave mokṣadānaṃ jyotiḥpravedanam |
trikālā'bādhyavijñānaṃ cārpayat karuṇākaraḥ || 25 ||
[Analyze grammar]

hastyaśvayānavāhānāṃ dānānyapi dadau tadā |
yautakaṃ hastake dravyaṃ vadhvai varāya saṃdaduḥ || 26 ||
[Analyze grammar]

avatārā īśvarāśca munayaḥ pitarastathā |
devāśca mānavā bhaumā pātālasthā yathāyatham || 27 ||
[Analyze grammar]

yeṣāṃ vai yādṛśī smṛddhistadyogyaṃ dānamācarana |
athāgniṃ saṃpradakṣiṇīkṛtya vāracatuṣṭayam || 28 ||
[Analyze grammar]

daṃpatī saṃsthitau vahnisānnidhye ca natau punaḥ |
niṣedatustato homaṃ cakratustau ghṛtādibhiḥ || 29 ||
[Analyze grammar]

aṃgulīyakamevā'syai vadhvai dadau haristadā |
aṃgulyagreṣu dhṛtvā sā bhojyakavalamārpayat || 30 ||
[Analyze grammar]

kṛṣṇāya tasyai kṛṣṇo'pi bhojyakavalamārpayat |
ūrmikayākṣaṇaṃ rantvā nivṛttau tau pramoditau || 31 ||
[Analyze grammar]

svedāktau tu karau lakṣmyāścātha nārāyaṇasya tau |
pulakāṃkitaromāṇau prakoṣṭhayorbabhūvatuḥ || 32 ||
[Analyze grammar]

lagnagranthiyutau tau ca vahniṃ natvā guruṃ tathā |
devatāśca tadā natvā niryātau maṇḍapāt tadā || 33 ||
[Analyze grammar]

khyātyādibhirbhojito tau viśrāntau rahasi kṣaṇam |
atha hastyādibhiḥ pūryāṃ sarvatra bhrāmitau mudā || 34 ||
[Analyze grammar]

pūjitau tau prajābhiśca vanditau pitarau janaiḥ |
lagnagranthiṃ narmadāyāṃ nirgranthiṃ saṃvidhāya ca || 35 ||
[Analyze grammar]

bhārgavījananī khyātirīśanībhiḥ kriyādibhiḥ |
patiputravatībhiśca sādhvībhiḥ sahitā mudā || 36 ||
[Analyze grammar]

āgatya maṃgalaṃ kṛtvā kuṃkumakṣālanādikam |
dampatīṃ veśayāmāsa ratnanirmāṇamandiram || 37 ||
[Analyze grammar]

anekacitrakṛcchobhaṃ hīrahāreṇa bhūṣitam |
muktāmāṇikyaratnaiśca sudīptaṃ darpaṇaistathā || 3 ||
[Analyze grammar]

tatra nārāyaṇaḥ kṛṣṇo dadarśa devayoṣitaḥ |
īśvarayoṣitaścāpi muktāniśca ramādikāḥ || 39 ||
[Analyze grammar]

munipatnīśca yāḥ sarvāḥ pātivratyaparāyaṇāḥ |
ratnasiṃhāsanasthāstā ratnabhūṣaṇabhūṣitāḥ || 40 ||
[Analyze grammar]

tā api śrīkṛṣṇanārāyaṇaṃ dṛṣṭvā ca satparam |
uttasthurvāsayāmāsū ratnasiṃhāsane mudā || 41 ||
[Analyze grammar]

stutiṃ cakrurmunipatnyo narma cakruḥ sakhījanāḥ |
khyātiḥ saṃbhojayāmāsa vareṇa saha kanyakām || 42 ||
[Analyze grammar]

sakarpūraṃ satāmbūlaṃ pradadau vāsitaṃ jalam |
śāradā ca dadau kṛṣṇahaste ślokādipatrikām || 43 ||
[Analyze grammar]

sarvāsāmājñayā devī paṭheti tamuvāca sā |
papāṭha patrikāṃ kṛṣṇanārāyaṇo'tiharṣitaḥ || 44 ||
[Analyze grammar]

lakṣmīḥ sarasvatī durgā sāvitrī rādhikā ramā |
satī menā jayā khyātirmāṇakī pārvatī prabhā || 45 ||
[Analyze grammar]

tulasī pṛthivī vṛndā'rundhatī yamunā'ditiḥ |
gaṃgā sītā śatarūpā devahūtiśca narmadā || 46 ||
[Analyze grammar]

devyaścaitā varavadhvoḥ kurvantu maṃgalaṃ param |
papāṭha ceti śrīkṛṣṇaḥ śuśruvurjahasuśca tāḥ || 47 ||
[Analyze grammar]

navaṃ tu yauvanaṃ kānto navaḥ kāntā navā tathā |
vidagdhāyā vidagdhena saṃgamo'stu navo navaḥ || 48 ||
[Analyze grammar]

prauḍhā rūpavatī puṣṭā yuvā vīryabharo balī |
yoge balābale cā'dya jñāsyāmaḥ kasya vai jayaḥ || 49 ||
[Analyze grammar]

rādhā ramā tathā'nyāśca tava santi suyoṣitaḥ |
bhārgavī kīdṛśī ramyā rahaścāsti vadātra naḥ || 50 ||
[Analyze grammar]

iti kṣaṇaṃ varatuṣṭyai jahasuḥ sarvayoṣitaḥ |
lopāmudrā'nasūyā cā'pyahalyā'rundhatī tathā || 51 ||
[Analyze grammar]

kaṃbharā tā munipatnyo rabhasaṃ cakrurīśvaram |
athamuktānīśvarāṃśca devān sthāvarajaṃgamān || 52 ||
[Analyze grammar]

pūjayāmāsa ca bhṛgurbhojayāmāsa cādarāt |
khādyatāṃ khādyatāṃ miṣṭaṃ dīyatāṃ dīyatāmiti || 53 ||
[Analyze grammar]

śabdo babhūva nagare vādyasaṃgītamaṃgalaiḥ |
atha prabhāte tvaritāḥ sajjā babhūvurīśvarāḥ || 54 ||
[Analyze grammar]

kārayāmāsa yātrāṃ ca nārāyaṇaṃ ca bhārgavīm |
khyātiḥ ruroda putrīṃ svāṃ kṛtvā vakṣasi vai kṣaṇam || 55 ||
[Analyze grammar]

putri vatse vinā tvāṃ vai kathaṃ jīvāmi duḥkhinī |
vada nārāyaṇaṃ śaśvan nivāsārthaṃ bhṛgorgṛhe || 96 ||
[Analyze grammar]

jāyāpatibhyāṃ dattaṃ vai yautakaṃ bhṛgupattanam |
atra dvitīyarūpeṇa nārāyaṇaṃ nivāsaya || 57 ||
[Analyze grammar]

lakṣmīḥ pativratā naivaṃ cakre niyogamacyute |
sajalā netrayorjātā kṛṣṇanārāyaṇastadā || 58 ||
[Analyze grammar]

lakṣmīṃ prāha kathaṃ subhru jātā sajalalocanā |
yathā śvaśrūrvadatyevaṃ karomyeva vasāmyaham || 59 ||
[Analyze grammar]

ityuktvā śrīkṛṣṇanārāyaṇo dvedhā babhūva ha |
bhārgavīsahitastatra bhṛgorgehe'vasat sadā || 60 ||
[Analyze grammar]

dvitīyaṃ dampatīrūpaṃ koṭiyautakasaṃbhṛtam |
asaṃkhyavāhinīsaṃghaiḥ śuklatīrthaṃ yayau tadā || 61 ||
[Analyze grammar]

praviśya bhavanaṃ ramyaṃ kārayāmāsa maṃgalam |
bhūmā nārāyaṇo vādyaṃ vādayāmāsa sundaram || 62 ||
[Analyze grammar]

sarvā devyaśca muktānyastathā'nyā yoṣito hareḥ |
bhārgavīṃ śrīkṛṣṇanārāyaṇaṃ vilokya vai muhuḥ || 63 ||
[Analyze grammar]

gṛhaṃ praveśayāmāsuścakrire maṃgalāni hi |
caturvidhaṃ bhojayitvā trisṛṣṭivāsino janān || 64 ||
[Analyze grammar]

mahīmānān raṃjayitvā parihāraṃ pracakrire |
bhūmā sainyāni cādāya dhāmadhāmanivāsinām || 65 ||
[Analyze grammar]

yayau vaikuṇṭhamevā''dya dampatīsahitastadā |
mahīmānāḥ svakān lokān yayurdhanaprapūritāḥ || 66 ||
[Analyze grammar]

pṛthvījalādayaścakruḥ klṛptavaikuṇṭhanāśanam |
bhṛgorgṛhe mahīmānāḥ bhojitāḥ pūjitāśca te || 67 ||
[Analyze grammar]

yayuḥ satkāramādāya divyaratnādisaṃbhṛtāḥ |
bhṛguklṛptamāsamudraṃ mahīmānanivāsanam || 68 ||
[Analyze grammar]

saṃhṛtaṃ kṣaṇamātreṇa bhṛguṇā siddhibhistadā |
kaṃbharā ca mahālakṣmīḥ kṛṣṇagopāla eva tau || 69 ||
[Analyze grammar]

pitarau putrasānnidhye nivāsaṃ bhṛgupattane |
cakraturbhārgavīkṛṣṇanārāyaṇasya tuṣṭaye || 70 ||
[Analyze grammar]

divyadehau ca pitarau dampatīsavidhe sadā |
yathā khyātibhṛgū pūjyau vartete bhṛgupattane || 71 ||
[Analyze grammar]

bhārgavī śrīkṛṣṇanārāyaṇaṃ prāpya rahaḥ sadā |
sevate vividhaiḥ kāmaiḥ pātivratyaparāyaṇā || 72 ||
[Analyze grammar]

kathaṃ na smarasi lakṣmi tvaṃ jātā bhārgavī tadā |
ahaṃ jātaḥ kṛṣṇanārāyaṇaḥ smarāmi lagnakam || 73 ||
[Analyze grammar]

tvādṛśī me sadā dāsī patnī bhogyā ca kiṃkarī |
sakhī sahyā sahavāsā surakṣikā pativratā || 74 ||
[Analyze grammar]

nā'parā me sukhakartrī śāntā saubhāgyaśālinī |
hṛtsthā rekhātmikā gaurātmikā śrīvatsavigrahā || 75 ||
[Analyze grammar]

ahaṃ tvaṃ ca tvamevā'haṃ na bhedo'sti manāgapi |
iti te kathitaṃ lakṣmi bahubhāgyavatī bhava || 76 ||
[Analyze grammar]

paṭhanācchravaṇāccāsya svargaṃ mokṣaḥ phalaṃ bhavet |
nārīṇāṃ śrīkṛṣṇanārāyaṇaprāptirdhruvā bhavet || 77 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye bhārgavyā maṇḍapānayanaṃ kanyādānavidhirvivāhottaraṃ mahīmānānāṃ varasya ca yātrā kṛtrimavaikuṇṭhādivilayanam jāmāturbhagugṛhe dvitīyarūpeṇa vāsaścetyādinirūpaṇanāmā caturaśītyadhikatriśatatamo'dhyāyaḥ || 384 ||
[Analyze grammar]