Chapter 383

śrīnārāyaṇa uvāca |
śṛṇu lakṣmi bhṛgoḥ putrī mahālakṣmīrhiṃ kānakī |
campakapuṣpavarṇābhā projjvalā divyavigrahā || 1 ||
[Analyze grammar]

atīva sundarī ramyā ramā rāmāsu pūjitā |
navayauvanasampannā ratnābharaṇabhūṣitā || 2 ||
[Analyze grammar]

taptakāṃcanakāntyāḍhyā tejaḥparidhirājitā |
śuddhasatyasvarūpā sā satyaśīlā pativratā || 3 ||
[Analyze grammar]

śāntā dāntā nitāntā cā'pyanantaguṇaśālinī |
iṃdrāṇī varuṇānī ca candranārī ca rohiṇī || 4 ||
[Analyze grammar]

kuberapatnī sūryastrī svāhā śāntā kalāvatī |
anyā api tvahalyādyāḥ pārvatyādyāśca sūjjvalāḥ || 5 ||
[Analyze grammar]

bhārgavyā bhagukanyāyāḥ kalāṃ nārhanti ṣoḍaśīm |
tāṃ dṛṣṭvā devanāryaśca bhagavadyoṣitastathā || 6 ||
[Analyze grammar]

śaratpūrṇenduśobhāḍhyāṃ śaratkamalalocanām |
vivāhayogyāṃ yuvatīṃ lajjānamrānanāṃ satīm || 7 ||
[Analyze grammar]

mumuhustāḥ śriyaṃ sarvā rūpānurūpavigrahe |
dṛṣṭvā stabdhā bhavanti sma līnāḥ kāṣṭhajaḍā iva || 8 ||
[Analyze grammar]

aho nārāyaṇaḥ sākṣāt patiryayā'bhiniścitaḥ |
tatra kiṃ nāma gauṇaṃ syād guṇe rūpe ca varṣmaṇi || 9 ||
[Analyze grammar]

na kācid bhagavatsṛṣṭāvīdṛśī janitā satī |
nāsti na vā ca divyāṃgī bhāvinī vā kadācana || 10 ||
[Analyze grammar]

iyaṃ nārāyaṇī sākṣātpadmā tvastyeva bhārgavī |
kṛṣṇanārāyaṇayogyā so'pyasyā yogya eva ca || 11 ||
[Analyze grammar]

ityāścaryaṃ paraṃ procurjahṛṣurdadṛśurmuhuḥ |
tṛptāścātmani tāṃ dhyātvā kanyāṃ lakṣmīṃ hi bhārgavīm || 12 ||
[Analyze grammar]

menire ca varaṃ yogyaṃ navayauvanasaṃbhṛtam |
dharmaśīlaṃ satyasandhaṃ nārāyaṇamadhīśvaram || 13 ||
[Analyze grammar]

vedavedāṃgavijñaṃ ca paṇḍitaṃ sundaraṃ śubham |
śāntaṃ dāntaṃ kṣamāśīlaṃ guṇinaṃ cirajīvinam || 14 ||
[Analyze grammar]

brahmakulaprasūtaṃ ca sarvatraiva pratiṣṭhitam |
kṛṣṇanārāyaṇaṃ pūrṇaṃ brahma śrīpuruṣottamam || 15 ||
[Analyze grammar]

nirliptaṃ ca nirīhaṃ ca sākṣiṇaṃ sarvakarmaṇām |
yaṃ na jānanti catvāro vedāḥ santaśca devatāḥ || 16 ||
[Analyze grammar]

siddhendrāśca munīndrāśca devā brahmādayastathā |
dhyāyanti dhyānapūtāśca yogino na vidanti yam || 17 ||
[Analyze grammar]

sarasvatī jaḍībhūtā vedāḥ śāstrāṇi yāni ca |
sahasravaktraḥ śeṣaśca pañcavaktraḥ sadāśivaḥ || 18 ||
[Analyze grammar]

caturmukho jagaddhātā kumāraḥ kārtikastathā |
ṛṣayo munayaścāpi bhaktāḥ paramavaiṣṇavāḥ || 19 ||
[Analyze grammar]

anye'pi yaṃ na jānanti yathā yāvacca yadguṇaḥ |
tamenaṃ varamāsādya bhārgavyāptaṃ janoḥ phalam || 20 ||
[Analyze grammar]

ghṛtakulyāsahasrāṇi madhukulyā'yutāni ca |
dadhikulyāsahasrāṇi dugdhakulyā'yutāni ca || 21 ||
[Analyze grammar]

tailahradā guḍaśailāḥ śarkarārāśayastathā |
miṣṭānnānāṃ parvatāśca piṣṭānāṃ rāśayastathā || 22 ||
[Analyze grammar]

yavagodhūmacūrṇānāṃ pṛthukānāṃ ca parvatāḥ |
vyaṃjanānāṃ rāśayaśca dṛśyanto'kṣayabhūmikāḥ || 23 ||
[Analyze grammar]

aho'smākaṃ mahadbhāgyaṃ yadaitadavalokikam |
sotsāhaṃ samprapaśyāmo vivāhaṃ padmayorimam || 24 ||
[Analyze grammar]

prāsādāḥ svargatulyāścāmṛtanadyo vahanti ca |
yānāni ca vimānāni vaihāyasāni sarvathā || 25 ||
[Analyze grammar]

haṃsagāruḍahastyādivāhanāni ca koṭiśaḥ |
pattanāni bhṛgukacchagirau gireḥ samantataḥ || 26 ||
[Analyze grammar]

nūtanāni kāritāni bhṛguṇā mānasāni vai |
yathā navaṃ hi vaikuṇṭhe nārāyaṇena kāritam || 27 ||
[Analyze grammar]

tathā vai bhṛguṇā vārdhitaṭamāyatamujjvalam |
śatayojanavistāraṃ lakṣayojanasūcchrayam || 28 ||
[Analyze grammar]

divyaṃ bhṛgupuraṃ tatra kārito maṇḍapaḥ śriyaḥ |
samudraśca svayaṃ tatra babhūva satkṛtipradaḥ || 29 ||
[Analyze grammar]

meruścāpi tathā cānye siddhāśca munayo'pare |
kalpasiddhāstathā satyayugādyāḥ satkṛtipradāḥ || 30 ||
[Analyze grammar]

āsan kanyāprapakṣe vai kṛṣṇatulyā hi tāpasāḥ |
tāpasyaśca śriyā tulyā yatra nyūnaṃ na vai manāk || 31 ||
[Analyze grammar]

maṃgalāni trayodaśyāṃ śiṣṭācārāstathā kṛtāḥ |
lokācārāḥ kṛtāścaiva pūjitā bhojitāstathā || 32 ||
[Analyze grammar]

rātrau māṃgalyagītāni nṛtyāni kāritāni ca |
nāryaḥ prātaścaturdaśyāṃ devārcanāni cakrire || 33 ||
[Analyze grammar]

devīnāṃ devatānāṃ ca lokācārakṛtāni vai |
pūjanāni pracakrustā vadhūyuktāḥ striyaḥ śubhāḥ || 34 ||
[Analyze grammar]

caturdaśyāṃ bhojayitvā bhūmā nārāyaṇau niśi |
suveṣaṃ kārayāmāsa kṛṣṇanārāyaṇasya vai || 35 ||
[Analyze grammar]

atīva ramyamatulaṃ triṣu sṛṣṭiṣu durlabham |
sampūjya kārayāmāsa yātrāṃ ca pravaraṃ varam || 36 ||
[Analyze grammar]

kṛṣṇādyāśca tathā nārāyaṇādyā avatārakāḥ |
vairājādyāstathā muktā brahmasṛṣṭiprayoṣitaḥ || 37 ||
[Analyze grammar]

rādhāramāprabhādyāśca brahmā viṣṇurmaheśvaraḥ |
teṣāṃ patnyo gaṇeśāścarṣayo dyuvāsinastathā || 38 ||
[Analyze grammar]

devā devyo yayuḥ sarve bhṛgupattanamaṇḍapam |
tatra koṭyarbudānyāsan svarṇasiṃhāsanāni vai || 39 ||
[Analyze grammar]

sudharmā nirmitā tena samudre svarṇavāluke |
nartakyo lakṣaśastatra gāndharvyo lakṣaśastathā || 40 ||
[Analyze grammar]

kinnaryo gāyikāḥ paryaḥ koṭisaṃkhyā upasthitāḥ |
bhṛguṇā nirmitaṃ sarvaṃ bhagavatāṃ pratuṣṭaye || 41 ||
[Analyze grammar]

na bhūtaṃ na ca yadbhāvi klṛptaṃ siddhikṛtaṃ navam |
vidyādharyo'pi lakṣaṃ cā'psaraso lakṣaśastathā || 42 ||
[Analyze grammar]

mahāpuraṃ bhaguvyāptaṃ divyaṃ tadbhṛgupattanam |
vairājabhavanaṃ yadvat tato'pi tvatibhāsuram || 43 ||
[Analyze grammar]

yasya prākārakalaśe sampratiṣṭhāpito raviḥ |
yadantarbhāgamadhye ca pūrṇacandraḥ sthirīkṛtaḥ || 44 ||
[Analyze grammar]

tejomayā dhruvāstvevaṃ rathyāṃ rathyāṃ prati kṛtāḥ |
prakāśo'kāraṇastatra vartate bhṛgupattane || 45 ||
[Analyze grammar]

tattvāni mūrtimanti ca sevāyāṃ sthāpitāni vai |
cakraḥ praveśanaṃ bhṛgupattanaṃ varayātrikāḥ || 46 ||
[Analyze grammar]

pūrṇimāyāṃ prage sūryadarśane bhṛgusatkṛtāḥ |
etasminnantare cāgre buhaspatirupasthitaḥ || 47 ||
[Analyze grammar]

koṭyarbudarṣisaṃyuktaścājagāma hareḥ puraḥ |
maṃgalaṃ tu phalaṃ datvā candrakaṃ sākṣataṃ tathā || 48 ||
[Analyze grammar]

puṣpamālāṃ gale datvā'vākirat kusumairharim |
lokācāraṃ maṃgalaṃ ca vārikalaśadarśanam || 49 ||
[Analyze grammar]

cakruḥ kanyāśca sādhvyaśca grāmagopurasannidhau |
vedaghoṣāḥ śrāvitāśca munibhirabhivardhanāḥ || 50 ||
[Analyze grammar]

puraṃ praveśayāmāsa bṛhaspatirvadan ṛcaḥ |
devakanyā nāgakanyā rājakanyā ṛṣeḥ sutāḥ || 51 ||
[Analyze grammar]

munikanyā varaṃ draṣṭuṃ sasmitāśca samāyayuḥ |
dadṛśuryoṣitaḥ sarvā nimeṣarahitā'kṣibhiḥ || 52 ||
[Analyze grammar]

prasannaṃ jaladaśyāmaṃ śobhitaṃ pītavāsasā |
candanokṣitasarvāṃgaṃ vanamālādibhūṣitam || 53 ||
[Analyze grammar]

ratnakeyūravalayaratnamālākulojjvalam |
ratnakuṇḍalayugmena gaṇḍasthalavirājitam || 54 ||
[Analyze grammar]

ratnendrasāranirmāṇakvaṇanmañjīrarañjitam |
sasmitaṃ muralīhastaṃ paśyantaṃ ratnadarpaṇam || 55 ||
[Analyze grammar]

pārṣadaiḥ śatasāhasraiḥ sevitaṃ śvetacāmaraiḥ |
navayauvanasampannaṃ śaratkamalalocanam || 56 ||
[Analyze grammar]

śaratpūrṇendutulyāsyaṃ ramārādhādihṛdbharam |
koṭikandarpasaundarya brahmaśeṣeśavanditam || 57 ||
[Analyze grammar]

paramāhlādakaṃ rūpaṃ koṭicandrasamaprabham |
kāmavīryabharaṃ puṣṭaṃ kṛṣṇanārāyaṇaṃ prabhum || 58 ||
[Analyze grammar]

dūrvayā paṭṭasūtraṃ ca ratnendrasāradarpaṇam |
dadhāne katṛkāsādhyaṃ kadalyāḥ sphuramañjarīm || 59 ||
[Analyze grammar]

cūḍāṃ trivikramākārāṃ mālatīmālyabhūṣitām |
puṣpaṃ nārīpradattaṃ ca mukuṭaṃ mastakojjvalam || 60 ||
[Analyze grammar]

dṛṣṭvā varaṃ yuvatyaśca mohaṃ prāpuḥ pareśvaram |
bhārgavījīvanaṃ dhanyaṃ ślāghyamityūcurīpsitam || 61 ||
[Analyze grammar]

jāmātāraṃ sā dadarśa khyātirbhṛgvarṣikāminī |
nimeṣarahitā tuṣṭā prasannavadanekṣaṇā || 62 ||
[Analyze grammar]

bhṛguḥ prasannavadanaḥ samuniḥ sapurohitaḥ |
samāgatya hariṃ kṛṣṇaṃ surān viprānnanāma ha || 63 ||
[Analyze grammar]

dadau viśrāntibhavanaṃ śatayojanavistaram |
bhakṣyapūrṇaṃ pānapūrṇaṃ sevikābhirvilāsitam || 64 ||
[Analyze grammar]

bhūmā cakāra mantraiśca śubhā'dhivāsanaṃ hareḥ |
sampūjya mātṛkāḥ sarvāḥ sākṣācca sarvadevatāḥ || 65 ||
[Analyze grammar]

pradāya vasudhārāṃ ca vṛddhiśrāddhādikaṃ tathā |
sarvān saṃbhojayāmāsa pāyayāmāsa sadrasān || 66 ||
[Analyze grammar]

vādyāni vādayāmāsa kārayāmāsa maṃgalam |
subeṣaṃ kārayāmāsa varasyā'pratimasya ca || 67 ||
[Analyze grammar]

susajjaṃ kārayāmāsa narayānaṃ suśobhanam |
evaṃ munirbhṛguścāpi vivāhārthaṃ sumaṃgalam || 68 ||
[Analyze grammar]

purohitena guruṇā mantrairakārayadvidhim |
ratnāni ca dhanādyāni muktāmāṇikyahīrakam || 69 ||
[Analyze grammar]

bhakṣyāṇi cāmbarādīni dadau dānāni cārthiṇe |
vādyāni vādayāmāsa kārayāmāsa maṃgalam || 70 ||
[Analyze grammar]

suveṣaṃ kārayāmāsa bhārgavyāḥ sumanoharam |
devībhirmunipatnībhirvidhānaṃ ca yathocitam || 71 ||
[Analyze grammar]

tataḥ śubhe kṣaṇe prāpte māhendre paramodaye |
vivāhocitalagne ca lagnādhipatisaṃyute || 72 ||
[Analyze grammar]

sadgrahekṣaṇaśuddhe cā'pyasatāṃ dṛṣṭivarjite |
śubhakṣaṇe śubharkṣe ca viśuddhe candratārayoḥ || 73 ||
[Analyze grammar]

vedhadoṣādirahite śalākādivivarjite |
dampatyoḥ śarmayogye ca pariṇāmasukhaprade || 74 ||
[Analyze grammar]

evaṃbhūte tu samaye bhṛgvarṣiprāgaṇaṃ hariḥ |
ājagāma sureśādyairmuniviprapurohitaiḥ || 75 ||
[Analyze grammar]

īśvarairbhagavadbhiśca dharmabhaktyādibhistathā |
bhūmnā lakṣmyā pārṣadaiśca muktaiśca munibhistathā || 76 ||
[Analyze grammar]

sthāvarairjaṃgamairdivyaiḥ śāstrajñairnartakairnaṭaiḥ |
gāyakairmālyakṛdbhiśca vidyādharībhirapyatha || 77 ||
[Analyze grammar]

apsarobhiḥ kinnarībhiḥ sāṃkhyayoginikādibhiḥ |
sthalaṃ tad dadṛśurdevā devya īśāśca tatstriyaḥ || 78 ||
[Analyze grammar]

svarṇaraṃbhāstaṃbhalakṣaiḥ paṭṭasūtrapariṣkṛtaiḥ |
campakānāṃ candanānāṃ rasālānāṃ ca pallavaiḥ || 79 ||
[Analyze grammar]

mālyairnānāvidhaiścaiva pītaraktasitānvitaiḥ |
parito maṃgalaghaṭaiḥ phalapallavasaṃyutaiḥ || 80 ||
[Analyze grammar]

kastūrīcandanāktaiśca kuṃkumena virājitaiḥ |
parṇairlājāphalapuṣpadūrvābhirupaśobhitaiḥ || 81 ||
[Analyze grammar]

īśvarairmunibhirviprairdevaiḥ pitṛbhirāsthitam |
ratnendrasāranirmāṇavedīyuktaṃ manoharam || 82 ||
[Analyze grammar]

arcitaṃ candanasnigdhaiḥ kastūrīkuṃkumānvitaiḥ |
sugandhiśītamandaiśca vāyubhiḥ surabhīkṛtam || 83 ||
[Analyze grammar]

ratnānāṃ koṭibhiścāpyujjvalaṃ tejasvidīpakaiḥ |
nānāprakāradhūpaiśca gandhadravyaiḥ suvāsitam || 84 ||
[Analyze grammar]

citraiśca śilpināṃ ramyaiḥ paritaḥ śobhanaṃ kṛtam |
gandharvāṇāṃ susaṃgītairnartakānāṃ sunartanaiḥ || 85 ||
[Analyze grammar]

vidyādharīṇāṃ hāvādyairapsarasā sugāyanaiḥ |
susvaritaṃ gabākṣaiśca badhūbhirabhivīkṣitam || 86 ||
[Analyze grammar]

maṃgalena ghaṭenāpi viduṣā supurodhasā |
bhṛguṇā kuśahastena dānena dānavastunā || 87 ||
[Analyze grammar]

dṛṣṭvā suprāṃgaṇe devān bhṛgorbrahmādikeśvarān |
kṛṣṇaṃ nārāyaṇaṃ vairājaṃ ca matsyādikāṃstathā || 88 ||
[Analyze grammar]

sarvān vilokya sahasā bhṛguḥ kuṭumbisaṃyutaḥ |
mūrdhnā vavande devāṃśceśvarān munīn samarhaṇām || 89 ||
[Analyze grammar]

ratnasiṃhāsaneṣveva suramyeṣu pṛthak pṛthak |
kramānniṣādayāmāsa satkṛtya cādareṇa vai || 90 ||
[Analyze grammar]

uvācā'dya janurme vai saphalaṃ jīvitaṃ mama |
babhūva janmakoṭīnāṃ karmamūlanikṛntanam || 91 ||
[Analyze grammar]

avatārī svayaṃ kṛṣṇanārāyaṇo'kṣareśvaraḥ |
dātā yaḥ sampadāṃ mukterbhukteḥ svargasya sarvadā || 92 ||
[Analyze grammar]

svapne yatpādapadmaṃ vai draṣṭuṃ naiva kṣamo'smyaham |
tapasāṃ phaladātā saḥ sraṣṭā'dya prāṃgaṇe mama || 93 ||
[Analyze grammar]

svātmārāmeṣu pūrṇeṣu śubhapraśnamabhīpsitam |
yogīndrairapi siddhendraiḥ surendraiśca munīśvaraiḥ || 94 ||
[Analyze grammar]

dhyānā'dṛṣṭaḥ sa bhagavān śrīhariḥ prāṃgaṇe'dya me |
kālakālaścā'kṣareśo'vatāreśeśvaraḥ prabhuḥ || 95 ||
[Analyze grammar]

mānuṣaṃ rūpamāsthāya narāṇāṃ dṛṣṭigocaraḥ |
matkanyāṃ saphalīkartuṃ tvāṃgaṇe me samāgataḥ || 96 ||
[Analyze grammar]

sarvāntaryāmitā yasya sarvakāmapradaḥ prabhuḥ |
nāstyanto yasya vedeṣu sa hariḥ prāṃgaṇe'dya me || 97 ||
[Analyze grammar]

īśānāmīśvaro yastu sarvāgre yasya pūjanam |
sa kṛṣṇo golokapatirbhāgyādvai prāṃgaṇe'dya me || 98 ||
[Analyze grammar]

yasya lakṣyo hyanantāśca ramādyā yoṣitaḥ priyāḥ |
sa matkanyāgrahaṇārthaṃ nārāyaṇo'ṅgaṇe'dya me || 99 ||
[Analyze grammar]

vairājāścāpi devādyāḥ pitaro mānavāśca ye |
pātālasthā bhāgavatā dhanyo'haṃ prāṃgaṇe'dya me || 100 ||
[Analyze grammar]

apunarāvartanāśca muktāstvakṣaravāsinaḥ |
koṭiśaḥ kṛṣṇapatnyaśca sthāvaraṃ jaṃgamaṃ tathā || 101 ||
[Analyze grammar]

sarvaṃ divyaṃ sattvakulaṃ dhanyo'haṃ prāṃgaṇe'dya me |
brahmaputrāḥ prapautrāśca vaṃśajā ye na lokitāḥ || 102 ||
[Analyze grammar]

te sarve madgṛhe'dyaiva dhanyā kanyā ca me prabho |
aho kalpāntaparyantaṃ tīrthībhūtau mamā''śramaḥ || 103 ||
[Analyze grammar]

yeṣāṃ pādodakaistīrthaṃ viśuddhaṃ tadgṛhaṃ mama |
pṛthivyāṃ yāni tīrthāni tāni sarvāṇi sāgare || 104 ||
[Analyze grammar]

sāgare yāni tīrthāni tāni satāṃ padeṣu vai |
satāṃ pādodakaklinnā yāvat tiṣṭhati medinī || 105 ||
[Analyze grammar]

tāvaddevāśca pitarastṛptā bhavanti vai bhuvi |
nikṛntanaṃ tu vipadāṃ sampadāṃ saṃpradaṃ tathā || 106 ||
[Analyze grammar]

vyādhīnāṃ nāśakaṃ māyārogahārakamauṣadham |
sukhadaṃ śubhadaṃ sāraṃ devarṣicaraṇā'mṛtam || 107 ||
[Analyze grammar]

kṛṣṇanārāyaṇasyā'dya prāpsye'haṃ caraṇāmṛtam |
na revāsadṛśaṃ tīrthaṃ na devaḥ keśavātparaḥ || 108 ||
[Analyze grammar]

sa eva bhagavānadya sākṣāt kṛṣṇo mama gahe |
ityuktvā daṇḍavat kṛtvā tuṣṭāva bhṛguracyutam || 109 ||
[Analyze grammar]

tavā'smyahaṃ me susutā'sti te prabho |
bhavānmamā'styeva madīyakaṃ tava |
sarvaṃ bhavāneva mamā'sti kāraṇaṃ |
paraṃ padaṃ dehi punātu jīvanam || 110 ||
[Analyze grammar]

nanāma pādayoścāpi kṛtvā kṛṣṇakarau svake |
pādyaṃ padmārcite pādapadme bhṛgurmudā dadau || 111 ||
[Analyze grammar]

arghyaṃ ca pradadau dūrvāpuṣpākṣitajalānvitam |
madhuparkaṃ ca surabhiṃ sarvāṃge gandhacandanam || 112 ||
[Analyze grammar]

pārijātādimālāṃ ca jāmātustu gale dadau |
varaṇārthaṃ prakoṣṭhe ca bhūṣāṃ kāmaphalaṃ dadau || 113 ||
[Analyze grammar]

dyotitaratnamukuṭaṃ dadau kṛṣṇasya mastake |
dhūpaṃ ratnapradīpaṃ ca naivedyaṃ sumanoharam || 114 ||
[Analyze grammar]

nānāprakārapuṣpāṇi ratnasiṃhāsanaṃ dadau |
saptatīrthodakaṃ tasmai dadāvācamanīyakam || 115 ||
[Analyze grammar]

tāmbūlaṃ ca varaṃ miṣṭaṃ karpūrādisuvāsitam |
śayyāṃ ratikarīṃ ramyāṃ pānārthaṃ vāsitaṃ jalam || 116 ||
[Analyze grammar]

evaṃ vai varaṇaṃ kṛtvā dadau puṣpāṃjaliṃ mudā |
atha vai maṇḍape vedīsannidhau śrīnarāyaṇam || 117 ||
[Analyze grammar]

ānayāmāsa pūrṇāyāṃ pūrṇe candre'mbaraṃ gate |
lokācāraṃ vidhāpyaiva māṇikyastaṃbhamārcayat || 118 ||
[Analyze grammar]

kalaśaṃ ca gaṇeśaṃ ca vahniṃ natvā guruṃ hariḥ |
niṣasādā''sane ramye paṭṭake kṛtamaṃgalaḥ || 119 ||
[Analyze grammar]

brāhmaṇairvedamantraiśca devairīśaistathā''tmabhiḥ |
āśīrvāde pradattaṃ ca kṛtacandre harau tataḥ || 120 ||
[Analyze grammar]

bhṛguḥ sampūjya putrīśaṃ dehaśuddhimakārayat |
vedaghoṣāḥ svastimantrā gītayo yoṣitāṃ tathā || 121 ||
[Analyze grammar]

vādyaghoṣāstathā tatrā'bhavan vicitrarītayaḥ |
mahotsavastadā jāto bhṛgvānando na nirmamau || 122 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pativratāmāhātmye śuklatīrthād bhṛgupattanaṃ prati varasya varātikājanaiḥ saha yātrā maṃgalādisatkārāḥ bhṛgorharṣavākyāni varasya maṇḍapāgamaścetyādinirūpaṇanāmā tryaśītyadhikatriśatatamo'dhyāyaḥ || 383 ||
[Analyze grammar]