Chapter 359

śrīnārāyaṇa uvāca |
śṛṇu lakṣmi nāciketā dṛṣṭavān yamayātanāḥ |
jagād brāhmaṇān sarvān yathādṛṣṭā vadāmi te || 1 ||
[Analyze grammar]

nāciketā dvijānprāha rājā pretapurādhipaḥ |
sabhāmadhye mayā dṛṣṭo bahukāryavicakṣaṇaḥ || 2 ||
[Analyze grammar]

me tvekamṛṣabhaṃ yamaḥ satkārārthaṃ dadau tathā |
āsanaṃ pādyamarghyaṃ ca pūjāṃ me vidhinā dadau || 3 ||
[Analyze grammar]

nyaṣādayat kāṃcanasyāsane māṃ puṣpaśobhite |
pūrvaṃ raudramukhaḥ kintu tadā saumyānano'bhavat || 4 ||
[Analyze grammar]

lohite tasya netre'pi jajñāte padmasadṛśe |
evaṃ dṛṣṭvā mayā tatra viśvastaṃ bhāvanānvite || 5 ||
[Analyze grammar]

atha stutiḥ kṛtā tasya suśāntahṛdayena vai |
tvaṃ vai karmaphaladātā pitṝṇāṃ paramo mahān || 6 ||
[Analyze grammar]

śrāddhe dhātā vidhātā ca dharmarāja namo'stu te |
kālakāla karmavettṛn pretanātha namostu te || 7 ||
[Analyze grammar]

daṇḍapāṇe pāśahasta dharmamūrte namo'stu te |
sūryavarṇaṃ kṛṣṇavarṇaṃ havyakavyād te namaḥ || 8 ||
[Analyze grammar]

surūpa krūrarūpā'pi nyāyamūrte ca te namaḥ |
na tvāṃ cālayituṃ śaktāstāpasā ṛṣayo'pi vā || 9 ||
[Analyze grammar]

itistotraṃ śubhaṃ śrutvā yamarāja uvāca mām |
parituṣṭo'smi bhadraṃ te brūhi kiṃ karavāṇi te || 10 ||
[Analyze grammar]

ahaṃ tadā'vadad tasmai deśaṃ te darśaya prabho |
pāpānāṃ ca śubhānāṃ ca draṣṭumicchāmi yātanāḥ || 11 ||
[Analyze grammar]

citraguptaṃ pradhānaṃ te draṣṭumicchāmi darśaya |
yamarājaḥ samāhūya dūtaṃ māṃ cāpyapreṣayat || 12 ||
[Analyze grammar]

citraguptaṃ prati prītyā māṃ dṛṣṭvā citraguptakaḥ |
pratyutthāya cakārātisvāgataṃ vai kṛtāṃjaliḥ || 13 ||
[Analyze grammar]

uvācainaṃ darśayantu bhṛtyāḥ pretanivāsanam |
asya rakṣā ca guptiśca bhavadbhiḥ kriyatāmiti || 14 ||
[Analyze grammar]

sandiṣṭā māṃ tvaramāṇā dūtā ninyuḥ phalālayam |
dvārābhyāśe mayā dṛṣṭaṃ śṛṇutaitadbhayāvaham || 15 ||
[Analyze grammar]

yamadūtā bandhayanti nirdahanti ca dehinaḥ |
pāṭayanti prahāraiśca tāḍayanti punaḥ punaḥ || 16 ||
[Analyze grammar]

veṇuyaṣṭiprahāraiśca praharanti ca pāpinaḥ |
bhagnā bhinnāḥ chinnagātrā bhagnapṛṣṭhaśirodharāḥ || 17 ||
[Analyze grammar]

rudanti karuṇaṃ ghoraṃ trātāraṃ nāpnuvanti te |
kecinnarake pacyante dahyante cograpāvake || 18 ||
[Analyze grammar]

tailapāke vipacyante kṣāre klidyanta eva ca |
kecid yantre prapīḍyante śoṇitaṃ sravate tataḥ || 19 ||
[Analyze grammar]

vaitaraṇī nadī tatra vahati dustarā'ghinām |
āropyante mahāśūle badhyante pādayostathā || 20 ||
[Analyze grammar]

prakṣipyante vaitaraṇīnadyāṃ daśanti daṃṣṭriṇaḥ |
adha ūrdhvaṃ jalāvarttabhramitā ūrmiduḥkhitāḥ || 21 ||
[Analyze grammar]

vilokyante sahasrāṇi śuṣyanti tvapare'nile |
mañjantaśca vamantaśca mūrchayantaśca dehinaḥ || 22 ||
[Analyze grammar]

dṛśyante bahavastatra trātāraṃ nāpnuvanti te |
athā'nye bahubhirdūtairāropya kūṭaśālmalim || 23 ||
[Analyze grammar]

asiśaktiprahāraiśca tāḍyante lohakaṇṭakaiḥ |
kūṣmāṇḍā yātudhānāśca kāṃścit saṃcūrṇya yānti ca || 24 ||
[Analyze grammar]

rākṣasā māṃsabhoktāraḥ khādanti ghnanti cāparān |
cūṣayitvā'parān kecid visṛjanti kṣitau tathā || 25 ||
[Analyze grammar]

tato jīvena saṃyuktāścūṣitā api vai punaḥ |
yathāpūrvāḥ prajāyante cūṣayanti ca tānpunaḥ || 26 ||
[Analyze grammar]

pāpāste pāhi muñceti vadantyapi yamānugāḥ |
pāpapratiphalārthaṃ vai sūdayanti punaḥ punaḥ || 27 ||
[Analyze grammar]

pāṣāṇavarṣaiḥ kecittu pāṃśuvarṣaistathā'pare |
mṛdyante vidrutāḥ praviśanti bile jvalanti ca || 28 ||
[Analyze grammar]

dūtairhatā mahāgnau te pacyante vaṃśatāḍitāḥ |
jalaṃ pradīyatāṃ ceti bruvate naḥ prasīdatha || 29 ||
[Analyze grammar]

taptaṃ jalaṃ dīyate ca pibanti hṛdaye tadā |
dahyanti cāntaraistāpaiḥ krośanti ca bhayaṃkaram || 30 ||
[Analyze grammar]

atha puṇyavatāṃ bhūmirdṛṣṭā yatra mayā muhuḥ |
sukhino'pi prāṇino vai dṛṣṭā modabharāstathā || 31 ||
[Analyze grammar]

yeṣāmagre'nnamiṣṭānnabhakṣyāṇāṃ santi rāśayaḥ |
dadhikṣīrarasāścāpi kṛsarānnaṃ ca pāyasam || 32 ||
[Analyze grammar]

phalānāṃ rāśayaścāpi peyānāṃ kalaśā hradāḥ |
bhojyacośyasulehyāni bahūni santi sannidhau || 33 ||
[Analyze grammar]

dravyāṇi tailapūgādicarvaṇāni vibhānti ca |
tapo'rjitāni divyāni tiṣṭhanti sukṛtātmanām || 34 ||
[Analyze grammar]

mālyāni dhūpagandhāśca vastrabhūṣāparicchadāḥ |
manoharāstathā kāntā kāntimatyo ramanti ca || 35 ||
[Analyze grammar]

pramadāḥ sarvavibhūṣā yuvatyo bhojanāni vai |
kāntān svarṇāsane pariveṣayanti vilokitāḥ || 36 ||
[Analyze grammar]

gṛhītakuṃbhamaṇikāḥ pātrahastāstathā'parāḥ |
sumanaḥpādyahastāśca bhojayanti sahasraśaḥ || 37 ||
[Analyze grammar]

nūpuraśṛṃkhalāśobhikiṃkiṇījālasusvanāḥ |
sannidhāya subhogyāni tiṣṭhanti ca manoharāḥ || 38 ||
[Analyze grammar]

sevante cātiviśrāntān yūno rūpaguṇākarān |
brūvate miṣṭamadhurasvaraṃ kāle ca yoṣitaḥ || 39 ||
[Analyze grammar]

athopadeśakartāro dūtāścāpyavalokitāḥ |
nighnantaśca hasantaśca krūrā niṣṭhuravādinaḥ || 40 ||
[Analyze grammar]

bho bhoḥ kṛtaghnā lubdhāśca sarvadānavivarjitāḥ |
parāpavādaniratāḥ parātmaduḥkhadā janāḥ || 41 ||
[Analyze grammar]

sulabhāni na dattāni vibhave sati laukike |
pānīyamatha kāṣṭhāni miṣṭānnaṃ sukhamāgatam || 42 ||
[Analyze grammar]

tena vadhyā bhavanto vai jātā yamakarairiha |
karmaṇāṃ tu kṣayaṃ kṛtvā vimuktā yāntu vai bhuvam || 43 ||
[Analyze grammar]

punaḥ pāpaṃ na kartavyaṃ daridrakulajanmibhiḥ |
puṇyaṃ samyak prakartavyaṃ puṇyāḥ svargaṃ hi bhuñjate || 44 ||
[Analyze grammar]

tataḥ satyaratā bhūtvā dayāvantaḥ sudhārmikāḥ |
gacchantu paramaṃ sthānaṃ pṛthivyāṃ vā mahatkule || 45 ||
[Analyze grammar]

kṛṣṇā''rādhanayā bhaktyā bhaviṣyati parāgatiḥ |
yadvā sundaranārīṇāṃ smṛddhaṃ svargamavāpsyatha || 46 ||
[Analyze grammar]

iti spaṣṭaṃ mayā tatrā''karṇitaṃ sūpadeśanam |
athā'pyagre nītavanto bhṛtyā māṃ bhūmikāntaram || 47 ||
[Analyze grammar]

ardanaṃ tāḍanaṃ yatra mardanaṃ chedanaṃ tathā |
cūrṇanaṃ bhedanaṃ yatra dāhanaṃ kaccarādivat || 48 ||
[Analyze grammar]

jīvānāṃ vai mayā dṛṣṭaṃ pāpināṃ trāsadāyakam |
notsahe varṇanaṃ kartuṃ dayārdrahṛdayaṃ yataḥ || 49 ||
[Analyze grammar]

tathāpyāgrahayuktatvād ṛṣayaḥ pravadāmyaham |
yatra kṣititalaṃ sarvamāyasaiḥ kaṇṭakaiścitam || 50 ||
[Analyze grammar]

viṣamaṃ viṣasaṃlagnaṃ vahnivyāptaṃ tamomayam |
athātra chinnapādāśca chinnapāṇiśirodharāḥ || 51 ||
[Analyze grammar]

pāpācārā vapuṣmantaḥ pātyante yamabhṛtyakaiḥ |
striyaḥ kṛtyāsvarūpāśca pratīkṣante vyavāyinaḥ || 52 ||
[Analyze grammar]

āgatān vahnisaṃtapte nikṣipanti śilātale |
kliśyanti bahavo duṣṭāstrātāraṃ nāpnuvanti te || 53 ||
[Analyze grammar]

athā'nye tu śvabhirghorairāpādatalamastakam |
bhakṣyamāṇā mayā dṛṣṭāḥ prakrośanto muhurmuhuḥ || 54 ||
[Analyze grammar]

athā'nye ca mayā dṛṣṭā mahādaṃṣṭrāḥ kṛśodarāḥ |
kṣudhitāstṛṣitāḥ sūcīmukhā pīḍyanta eva te || 55 ||
[Analyze grammar]

annāni bhojyavastūni milanti naiva vāryapi |
ayaḥsāramayī nārī vahnitaptā hi kṛtyakā || 56 ||
[Analyze grammar]

āliṃgati naraṃ tatra dhāvante tvanudhāvati |
vadatyahaṃ te bhaginī hyahaṃ bhāryā sutasya te || 57 ||
[Analyze grammar]

mātṛsvasā pitṛsvasā mātulānī ca te hyayam |
gurubhāryā sutā te'smi pūrvaṃ prasahya dharṣitā || 58 ||
[Analyze grammar]

puṃstvaṃ pāpaphalaṃ pāpa mokṣyase nahi duṣkṛtāt |
jvālayiṣye haniṣye'haṃ kathaṃ dhāvasi dūrataḥ || 59 ||
[Analyze grammar]

śrāvayanti bodhayanti cābhidravanti pāpinām |
anupīḍya durātmānaṃ dharṣayanti sudāruṇam || 60 ||
[Analyze grammar]

kiṃ krandasi duṣkarmin tvāṃ pariṣvakto ratiṃ kuru |
yatra kvāpi dhāvasi tvāṃ na tyakṣye pāradārikam || 61 ||
[Analyze grammar]

etat kutuhalaṃ dṛṣṭaṃ yuvatyastādṛśānnarān |
lohayaṣṭiprahārādyaistāḍayanti punaḥ punaḥ || 62 ||
[Analyze grammar]

athā'nye duḥkhino dṛṣṭāstāḍitā daṇḍamudgaraiḥ |
vyāghrasiṃhaśṛgālādyaiḥ rākṣasairgardabhaiḥ śvabhiḥ || 63 ||
[Analyze grammar]

bhakṣyanta śvāpadaiḥ kākairgṛdhraiśca kṛkalāsakaiḥ |
athānye ca mayā dṛṣṭā vidāritā vibheditāḥ || 64 ||
[Analyze grammar]

asitālavane dūtairjvālāvane pradāhitāḥ |
chinnā dagdhā hanyamānā vidhṛṣṭāśca nadanti te || 65 ||
[Analyze grammar]

tān vayāṃsyāyasaistuṇḍairdaṃṣṭrābhiḥ śvādayastathā |
kravyādā hiṃsakā vyāghrāḥ khādanti ruṣitāstadā || 66 ||
[Analyze grammar]

ṛkṣadvīpe mayā dṛṣṭā yamaṛkṣairvipāṭitāḥ |
kecinmudgarabhagnāṃgāḥ śūlalagnāstathā pare || 67 ||
[Analyze grammar]

anye kṣiptā mayā dṛṣṭā vāpīhradanadīṣu te |
rudhirasya taḍāgeṣu kūpapuṣkariṇīṣu ca || 68 ||
[Analyze grammar]

pūtimāṃsakṛmikīṭā'medhyeṣu ca sarassu ca |
jighrantaḥ pāpino gandhaṃ majjantaścāvalokitāḥ || 69 ||
[Analyze grammar]

asthipāṣāṇarudhiravarṣābhiścūrṇitāstathā |
dhāvantaśca plavantaśca hā hatāḥ sma prabhāṣiṇaḥ || 70 ||
[Analyze grammar]

krandantaḥ karuṇastatra ruddhā viddhāḥ śrutā mayā |
sthūlasthāṇuprabaddhāśca kecidudbandhane dhṛtāḥ || 71 ||
[Analyze grammar]

śilābhirarditāścānye śastraiśca śakalīkṛtāḥ |
mayā vai duḥkhino dṛṣṭāḥ krandanaṃ dāruṇaṃ śrutam || 72 ||
[Analyze grammar]

darśitāśca tato dūtairaṣṭau narakā dāruṇāḥ |
taptaṃ cāpi mahātaptaṃ mahārauravarauravau || 73 ||
[Analyze grammar]

saptatālaḥ kālasūtraṃ tāmisro'ndhatāmisrakaḥ |
prathame prathamaṃ duḥkhaṃ dvitīyaṃ dviguṇaṃ tvakam || 74 ||
[Analyze grammar]

tṛtīye triguṇaṃ kaṣṭaṃ caturthe tu caturguṇam |
pañcame pañcaguṇakaṃ ṣaṣṭhe ṣaḍguṇakaṣṭakam || 75 ||
[Analyze grammar]

saptame saptaguṇakamaṣṭame'ṣṭaguṇaṃ tvakam |
duḥkhitānāṃ tatra duḥkhaṃ duḥkhād duḥkhataraṃ tataḥ || 76 ||
[Analyze grammar]

duḥkhamevā'tra na sukhaṃ duḥkhairduḥkhaṃ vivṛdhyate |
upāyastatra naivāsti yena svalpaṃ sukhaṃ bhavet || 77 ||
[Analyze grammar]

śabde sparśe rase rūpe gandhe śārīramānasaiḥ |
duḥkhāntagāmibhirduḥkhaiḥ pīḍyante pāpakāriṇaḥ || 78 ||
[Analyze grammar]

āyasaiḥ kaṇṭakaistīkṣṇaistaptaistaptā''vṛtā sthalī |
antarīkṣaṃ khagānīkairagnijihvaiḥ samāvṛtam || 79 ||
[Analyze grammar]

bubhukṣā'ti pipāsā'ti uṣṇamatyuṣṇamityapi |
śītaṃ cāpyatiśītaṃ ca vāyurjvālā'timiśritaḥ || 80 ||
[Analyze grammar]

pātukāmo jalaṃ dūtairnīyate sara uṣṇakam |
prekṣate dhāvati pātuṃ pibatyantaḥ pradahyati || 81 ||
[Analyze grammar]

tasya pakvāni māṃsāni rākṣasā matsyakādayaḥ |
avadhṛtya samutpāṭya khādanti ca hasanti ca || 82 ||
[Analyze grammar]

atha kṣārodake taiśca kṣipyate vai mahāhrade |
kṣārahūtā bhakṣayanti samāṃso jāyate punaḥ || 83 ||
[Analyze grammar]

karīṣagarte santapte kuṃbhīpāke bhayaṃkare |
peśīṃ peśīṃ supakvāṃ ca samutpāṭya tu dehinaḥ || 84 ||
[Analyze grammar]

khādanti yamagāḥ piṣṭvā daśanaiḥ svādavedinaḥ |
iti dṛṣṭā mayā pāpāḥ krośanto'dūravartinaḥ || 85 ||
[Analyze grammar]

atha śṛṃgāṭakasthalyāṃ dṛṣṭāḥ sutaptavāluke |
sthale dahyante chidyante vidhyante kaṇṭakaiśca ye || 86 ||
[Analyze grammar]

bhidyante cāpi pātyante pīḍyante yamadūtakaiḥ |
kṛṣyante ca viśasyante hyutkocyante ca pāpinaḥ || 87 ||
[Analyze grammar]

śyāmāḥ śabalāḥ śvapadāḥ khādanti sarpavṛścikāḥ |
athānyaśca mayā dṛṣṭo narakaḥ kūṭaśālmaliḥ || 88 ||
[Analyze grammar]

kṛṣyante pāpinastatra yāvadasthyavaśeṣitāḥ |
kuṭyante prāṇinastatra dūtaiścūrṇyanta ugrakaiḥ || 89 ||
[Analyze grammar]

chinnaṃgāḥ sarvagātreṣu vindanti duḥkhamulbaṇam |
athānyā ca mayā dṛṣṭā nadī kardamavālukā || 90 ||
[Analyze grammar]

agnijvālāpravāhā ca vahneyavyālanakrakā |
āgneyajhaṣasaṃvyāptā hyuttāryante tu tāṃ marāḥ || 91 ||
[Analyze grammar]

tathā sarid vaitaraṇī dṛṣṭā lavaṇakardamā |
carmamāṃsā'sthipaṃkā ca samajjālālalohitā || 92 ||
[Analyze grammar]

vajradaṃṣṭrā karkaṭakā vajrajihvāśca jantavaḥ |
mahāviṣāśca makarā jhaṣāścāpyasthibhedanāḥ || 93 ||
[Analyze grammar]

yatra pāpān bhakṣayanti gilanti cotkiranti ca |
punarvai māṃsalāḥ prāgvad bhavantyeva ca pāpinaḥ || 94 ||
[Analyze grammar]

athāgre bhūtale śūnyāgāraṃ dṛṣṭaṃ sagahvaram |
mūṣakā vajradantāśca saviṣā bhakṣayanti tān || 95 ||
[Analyze grammar]

mūṣakairjagdhagātrāśca hyasthimātrāvaśeṣitāḥ |
punarvai vāyunā spṛṣṭā bhavanti māṃsalāstu te || 96 ||
[Analyze grammar]

athāgre rukṣakavanaṃ dṛṣṭaṃ raudrapatatriyuk |
māṃsādaiḥ pakṣibhiryatra vṛkṣārūḍho'pi bhakṣyate || 97 ||
[Analyze grammar]

nirmāṃso nistvagasthī ca niḥśirājālakastathā |
nirakṣiśrāvaṇaḥ pāpaḥ kriyate tīkṣṇacañcubhiḥ || 98 ||
[Analyze grammar]

athāgre tu mayā dṛṣṭo vaṭavṛkṣo mahāruṇaḥ |
vajrakāṣṭho hyapradāhyo dolāsahasrasaṃyutaḥ || 99 ||
[Analyze grammar]

yadadho yamacullī vai daśayojanavistṛtā |
triyojanasugambhīrā nityaṃ prajvālitā hi sā || 100 ||
[Analyze grammar]

pretānāṃ tu sahasrāṇi prayutānyarbudāni ca |
prakṣipyante'tra satataṃ rākṣasairyamakikaraiḥ || 101 ||
[Analyze grammar]

vaṭaśākhāvaddharajjvā pāpinaṃ tvantarālake |
adhaḥśirasaṃ ta badhvā bharjayanti tvadanti ca || 102 ||
[Analyze grammar]

cullyāṃ kṣipanti kaścicca bharjitānapyadanti ca |
yamabhṛtyāstathā pretā āsvādayanti harṣitāḥ || 103 ||
[Analyze grammar]

cullīkukṣeḥ śakunikā'bhidhā nadī tu veginī |
vasāmedovahā yāti tatra kṣipanti pāpinaḥ || 104 ||
[Analyze grammar]

tatrā'tha dṛṣṭamatyugraṃ yātanāsaptakaṃ tataḥ |
ekaikaṃ dustaraṃ ghoraṃ bhuṃkte pāpī yathākramāt || 105 ||
[Analyze grammar]

daśa tatra mahāśūlāḥ kuṃbhīpākāstrayodaśa |
vahnitapteṣu śūleṣu protāḥ pacyanta eva te || 106 ||
[Analyze grammar]

śuṣkodapāne sadhūmre hyadhaḥśīrṣo'valambate |
taptatailakaṭāhe ca jvālyate pacyate tathā || 107 ||
[Analyze grammar]

karīṣagarte nikṣiptaḥ pacyate medavahninā |
evaṃ dṛṣṭā mayā jīvāḥ pacyamānāḥ pradāhitāḥ || 108 ||
[Analyze grammar]

atho yamanadī dṛṣṭā taptatrapupravāhikā |
tatra nimajjya jīvā vai pacyante pāpakāriṇaḥ || 109 ||
[Analyze grammar]

atha śītajalā dṛṣṭā dīrghikā śītakānanā |
yatra śītajalaṃ pītvā kṣaṇaṃ viśrāntirāpyate || 110 ||
[Analyze grammar]

bhakṣyaṃ bhojyaṃ yamasvasā yamī dadāti tatra vai |
tataḥ śūlatraho nāma pāṣāṇaḥ śatayojanaḥ || 111 ||
[Analyze grammar]

parvato hi mayā dṛṣṭo jīmūtastatra varṣati |
jīvāstatra nimajjanti tvagre gacchanti vai tataḥ || 112 ||
[Analyze grammar]

tataḥ śṛṃgārakavana dṛṣṭaṃ sadaṃśamakṣikam |
dṛṣṭaḥ pāpī ca vā spṛṣṭaḥ kṛmirūpo hi jāyate || 113 ||
[Analyze grammar]

athānyā bhūmikā dṛṣṭā yatra paśyati bāndhavān |
mātaraṃ pitaraṃ putrān dārāṃstathā priyān janān || 114 ||
[Analyze grammar]

teṣāmagre vadhyamānaḥ krandate trāsadaṃ tadā |
laguḍairmudgarairdaṇḍairjānubhirveṇubhistathā || 115 ||
[Analyze grammar]

muṣṭibhiśca yaṣṭibhiśca kaśābhiḥ śṛṃkhalādibhiḥ |
athānyā bhūmikā dṛṣṭā pretasthāvaratāpradā || 116 ||
[Analyze grammar]

tatra yāto vrajed pretaḥ sthāvaraṃ bhāvameva yat |
ṣaṣṭivarṣasahasrāṇi paśubhāve tu vindati || 117 ||
[Analyze grammar]

svedajo jāyate paścāt tataḥ pakṣī prajāyate |
goyonau tu tato gatvā punarbhavati mānavaḥ || 118 ||
[Analyze grammar]

yādṛk saṃsāracakraṃ vai tadbhāve tvasti rekhitam |
tathā tā yātanā bhuktvā viprādiṣu prajāyate || 119 ||
[Analyze grammar]

ityantaṃ vai mayā dṛṣṭaṃ yamadūtaiḥ pradarśitam |
śrāntā matsahitā dūtā yayuste citraguptakam || 120 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne yāmyacakre nāciketaḥkṛtayamarājastutiḥ vividhanarakāvalokanāya yamarājā''jñā duḥkhadanirayayātanāvalokanam yātanāvarṇanam nāciketasā sahitānāṃ dūtānāṃ citraguptaṃ pratyāgamanamityādinirūpaṇanāmaikonaṣaṣṭyadhikatriśatatamo'dhyāyaḥ || 359 ||
[Analyze grammar]