Chapter 348

śrīnārāyaṇa uvāca |
śṛṇu lakṣmi mahāpuṇyaṃ sthalaṃ govardhanātmakam |
mathurāyāḥ paścime tad vartate yojanadvaye || 1 ||
[Analyze grammar]

bhuktimuktipradaṃ kṣetraṃ prakramaṇena dehinām |
hṛdasyatra pāpanāśakaraḥ snānena vai nṛṇām || 2 ||
[Analyze grammar]

aindraṃ pūrve yamatīrthe dakṣiṇe vartate priya |
paścime vāruṇaṃ tīrthaṃ kauberaṃ tūttareṇa vai || 3 ||
[Analyze grammar]

tattattīrthe snānakartā tattalloke mahīyate |
prāṇatyāge mama smartā mama lokaṃ pragacchati || 4 ||
[Analyze grammar]

annakūṭasthalaṃ prāpya tasya kuryātpradakṣiṇam |
sa yāti paramaṃ lokaṃ dhanadhānyādismṛddhimat || 5 ||
[Analyze grammar]

snātvā mānasagaṃgāyāṃ dṛṣṭvā govardhane harim |
annakūṭaṃ parikramya na janurjāyate punaḥ || 6 ||
[Analyze grammar]

somavāre tvamāyāṃ vai gatvāgovardhanasthalam |
pitṝn santarpayed gayāpiṇḍatṛptistadā bhavet || 7 ||
[Analyze grammar]

govardhanaṃ parikramya dṛṣṭvā kṛṣṇanarāyaṇam |
rājasūyā'śvamedhānāṃ puṇyamāpnotyasaṃśayam || 8 ||
[Analyze grammar]

māsi bhādrapade śuklaikādaśyāṃ samupoṣayet |
snātvā mānasagaṃgāyāṃ brāhme sūryasya darśanam || 9 ||
[Analyze grammar]

kṛtvā govardhanaṃ natvā śṛṃge natvā hariṃ sthitam |
avatīrya sopavāsā kuryād gireḥ pradakṣiṇam || 10 ||
[Analyze grammar]

puṇḍarīkaṃ sthalaṃ gacchet kuṇḍe snānaṃ samācaret |
pitṛdevānarcayecca puṇḍarīkaṃ prapūjayet || 11 ||
[Analyze grammar]

evaṃ vidhānakartā sa prayāti bhavanaṃ hareḥ |
tataścāpsarase kuṇḍe snāyāt pitṝṃśca tarpayet || 12 ||
[Analyze grammar]

rājasūyā'śvamedhānāṃ phalaṃ vindettu tena vai |
tataḥ saṃkarṣaṇe tīrthe snāyāt tarpaṇamācaret || 13 ||
[Analyze grammar]

gohatyābrahmahatyādipāpānāṃ vilayo bhavet |
annakūṭasya nikaṭe śakratīrthe tataścaret || 14 ||
[Analyze grammar]

makhabhaṃgo mahendrasya yatra kṛṣṇena vai kṛtaḥ |
indro vavarṣa roṣeṇa sarṭanāśecchayā tadā || 15 ||
[Analyze grammar]

kṛṣṇena ca gavādīnāṃ rakṣayāya dhṛto giriḥ |
tatra ca bhojitā devā devyo gāvo maharṣayaḥ || 16 ||
[Analyze grammar]

gopā gopyaḥ pataṃgādyāḥ kīṭāḥ paśavaḥ pakṣiṇaḥ |
so'nnakūṭa iti nāmnā khyāto'bhavadgiristathā || 17 ||
[Analyze grammar]

tatra bhojanadānena jalārpaṇena vai tathā |
tarpaṇena ca yātrāluḥ śatayajñaphalaṃ labhet || 18 ||
[Analyze grammar]

tataḥ kadambakuṇḍe vai snātavyaṃ brahmalokade |
tato devagiriṃ gacchet snāyāt paśyecca bhāvataḥ || 19 ||
[Analyze grammar]

mahādevaṃ prapaśyecca kuṇḍe pitṝnpratarpayet |
vājapeyaphalaṃ prāpya svarge muktvā hariṃ vrajet || 20 ||
[Analyze grammar]

gaṃgāyāścottaraṃ yāvad devadevasya cakriṇaḥ |
sthale kṛṣṇasya saṃgrāmo'riṣṭāsureṇacā'bhavat || 21 ||
[Analyze grammar]

vṛṣāsuraṃ harirhatvā snātastatra punaḥ punaḥ |
rādhayā tu samāgatya kṛṣṇaḥ saṃsnāpitastadā || 22 ||
[Analyze grammar]

rādhākuṇḍamiti nāmnā khyātaṃ pāpaharaṃ śubham |
tatra snānenāśvamedharājasūyaphalaṃ bhavet || 23 ||
[Analyze grammar]

gonarabrahmahatyāyāḥ pāpaṃ snānena naśyati |
mokṣarājākhyatīrthaṃ ca natvendradhvajamāvrajet || 24 ||
[Analyze grammar]

indradhvajocchraye tīrthe snātvā natvā samāvrajet |
pañcatīrthā'bhidhaṃ kuṇḍaṃ gacched yātrāṃ samāpayet || 25 ||
[Analyze grammar]

yātrāphalaṃ śrīharaye nivedya niśi jāgaram |
govardhane prakartavyaṃ dvādaśyāṃ ca tataḥ prage || 26 ||
[Analyze grammar]

snātvā piṇḍaṃ tu nirvāpya natvā gacched bhajan harim |
ya evaṃ kurute yātrāṃ pitṝn sa tārayatyapi || 27 ||
[Analyze grammar]

pāpāni saṃvinirdhūya parabrahmā'dhigacchati |
aṣāḍhe'pi prakartavyamannakūṭaparikramam || 28 ||
[Analyze grammar]

etattu śṛṇuyād yaśca paṭhecca pāṭhayettathā |
yātrāphalaṃ labhet snānaphalaṃ kṛṣṇaprasannatām || 29 ||
[Analyze grammar]

śṛṇu lakṣmi suśīlākhyo vaiśyo vai dakṣiṇāpathe |
pratiṣṭhānapurāvāso bahuputraḥ samṛddhimān || 30 ||
[Analyze grammar]

udaraṃbhara evā'sau kuṭumbabharaṇe rataḥ |
snānaṃ dānaṃ japaṃ homaṃ devārcāṃ na karoti saḥ || 31 ||
[Analyze grammar]

satāṃ samāgamaścāpi kadāpi tena na kṛtaḥ |
kathāyāḥ śravaṇaṃ dharmakāryaṃ cāpi kṛtaṃ nahi || 32 ||
[Analyze grammar]

devānāṃ brāhmaṇānāṃ ca bhaktistasya na vidyate |
pāpamagnasya tu buddhirdharmadānāya nā'bhavat || 33 ||
[Analyze grammar]

matidātāramābhartsya tiraskaroti sarvathā |
evaṃ vai vartamānasya kālena maraṇaṃ hyabhūt || 34 ||
[Analyze grammar]

nirudakasthale śuṣke pretatvaṃ samupāgataḥ |
marudeśe kṣudhāviṣṭo bhraman tiṣṭhati duḥkhitaḥ || 35 ||
[Analyze grammar]

marau stambe vasati sma preto raudro bhayānakaḥ |
dīrghadaṃṣṭro lambahanurbiḍālāsyo mahodaraḥ || 36 ||
[Analyze grammar]

tatra gatena mārgeṇa krayavikrayakārakaḥ |
nirjagāma vaṇik kaścit taṃ nṛtyannabravīttadā || 37 ||
[Analyze grammar]

bhakṣyaṃ prāptaṃ mayā tvaṃ vai kvā'dhunā yātumicchasi |
māṃsaṃ te bhakṣayiṣyāmi pāsyāmi tava śoṇitam || 38 ||
[Analyze grammar]

pretasya vacanaṃ śrutvā dhairyaṃ kṛtvā''ha taṃ vaṇik |
kuṭumbabharaṇārthāya gacchāmi dhanavāñcchayā || 39 ||
[Analyze grammar]

vṛddhaḥ pitā me bhavane mātā patnī pativratā |
mayi saṃbhakṣite rakṣaḥ kuṭumba me mariṣyati || 40 ||
[Analyze grammar]

punaḥ pāpena yuktatvaṃ pretabhāvānna mokṣyase |
ityākarṇya sa pretastaṃ papraccha kuta āgamaḥ || 41 ||
[Analyze grammar]

vaṇik prāha mathurāyāḥ samāgato'smi te vanam |
govardhanaḥ śailavaro yamunā ca mahānadī || 42 ||
[Analyze grammar]

tayormadhye mathurāyāṃ vasāmi bahuvaṃśataḥ |
dhanaprāptyai pragacchāmi deśāntaraṃ daridrakaḥ || 43 ||
[Analyze grammar]

pretaḥ prāha śṛṇu dīna yadi kāryaṃ kuruṣva me |
samayena hi mokṣyāmi gaccha tvaṃ mathurāṃ prati || 44 ||
[Analyze grammar]

snānaṃ kṛtvā tu vidhivat cātuḥsāmudrike prahau |
piṇḍadānaṃ kuruṣva tvaṃ mama nāmnā prayatnataḥ || 45 ||
[Analyze grammar]

snānasya ca phalaṃ yaccha mama muktirbhaviṣyati |
tava gṛhe dhanaṃ tvasti dāridryaṃ nāsti te vaṇik || 46 ||
[Analyze grammar]

suvarṇabhāro gartastho gṛhe tiṣṭhati sañcitaḥ |
nivartasva susantuṣṭaḥ kuru me mokṣaṇaṃ vaṇik || 47 ||
[Analyze grammar]

vaṇik prāha kathaṃ te'sti jñānaṃ kūpaḥ pramokṣakaḥ |
rakṣaḥ prāha pratiṣṭhāne pure'gastyo mahāmuniḥ || 48 ||
[Analyze grammar]

lakṣmīnārāyaṇasaṃhitāyāḥ kathāmavācayat |
sāyaṃkāle kathāṃ śrotuṃ gato'haṃ viṣṇumandiram || 49 ||
[Analyze grammar]

śruto mayā tataḥ kūpaḥ pretānāṃ mokṣadāyakaḥ |
samudrāḥ kila tiṣṭhanti catvārastatra saṃgatāḥ || 50 ||
[Analyze grammar]

itiśrutā kathā tatra vācakāya janairbahu |
dānaṃ dattaṃ mayā śāṭhyād datto vai tāmraḍhabbukaḥ || 51 ||
[Analyze grammar]

tato me saṃgate kāle nidhanaṃ samapadyata |
yamarājaniyogena pūrvakarmabalena ca || 52 ||
[Analyze grammar]

pretatvaṃ samanuprāpto dānahomavivarjitaḥ |
tadā tīrthaṃ kṛtaṃ naiva pitarastarpitā nahi || 53 ||
[Analyze grammar]

dharmakāryaṃ kṛtaṃ naiva prāpto'haṃ pretatāṃ tataḥ |
ḍhabbukasya prabhāveṇa kathāyāḥ śravaṇena ca || 54 ||
[Analyze grammar]

jñānaṃ tu vidyate'dyāpi gaccha me mokṣaṇaṃ kuru |
vibhvākhyastu vaṇik prāha kathaṃ jīvasi me vada || 55 ||
[Analyze grammar]

rakṣaḥ prāha mayā naijagṛhāṃgaṇe praropitaḥ |
chāyārthaṃ pippalavṛkṣo jalena vardhitastataḥ || 56 ||
[Analyze grammar]

tasya varṣe dvivāraṃ ca bhavantyeva phalāni vai |
jantavastena jīvanti tatpuṇyena mamāpi ca || 57 ||
[Analyze grammar]

tṛptirbhavati me nityā jalānnavihitā yathā |
śrutvā vaṇik samāśvāsya pretaṃ ca mathurāṃ yayau || 58 ||
[Analyze grammar]

dravyaṃ niṣkāsya vai bhūmeḥ pretakāryaṃ cakāra ha |
catuḥsāmudrike kūpe piṇḍadānaṃ cakāra saḥ || 59 ||
[Analyze grammar]

preto'sau tatra cāgatya piṇḍān bhuktvā yayau divam |
vaṇik dravyaṃ tathā prāpya modate sma gṛhe nije || 60 ||
[Analyze grammar]

tīrthe lakṣmi gṛhe'raṇye devasthāne ca catvare |
yatra tatra mṛtāḥ piṇḍadānānmuktiṃ prayānti te || 61 ||
[Analyze grammar]

anyatra kṛtapāpasya tīrthe muktirhi niścitā |
mathurāyāṃ kṛtapāpasyāpi kūpārṇave kṣayaḥ || 62 ||
[Analyze grammar]

mathurāyāṃ kṛtaṃ pāpaṃ tatraiva tu vinaśyati |
eṣā purī mahāpuṇyā yasyāṃ pāpaṃ na vidyate || 63 ||
[Analyze grammar]

kṛtaghnaśca surāpaśca cauro bhagnavratastathā |
mathurāṃ yamunāṃ prāpya mucyate sarvakilbiṣaiḥ || 64 ||
[Analyze grammar]

tiṣṭhed yugasahasraṃ tu pādenaikena yaḥ kvacit |
tato'dhikaṃ bhavetpuṇyaṃ mathurāyāṃ nivāsinaḥ || 65 ||
[Analyze grammar]

mathurāvāsinaḥ sarve divyā devā hi mānavāḥ |
tīrthasnānaratāste'pi devā vai naramūrtayaḥ || 66 ||
[Analyze grammar]

anyatra viprasāhasrapūjanena tu yatphalam |
ekena pūjitenātra māthureṇa phalaṃ bhavet || 67 ||
[Analyze grammar]

anṛg vai māthuro yatra caturvedastathā'paraḥ |
na tu vedaiścaturbhiḥ syānmāthureṇa samaḥ kvacit || 68 ||
[Analyze grammar]

bhavanti sarvatīrthāni puṇyānyāyatanāni ca |
maṃgalāni tu sarvāṇi yatra vai māthuro dvijaḥ || 69 ||
[Analyze grammar]

sarve mokṣāstatra bhūtā bhaviṣyanti ca dehinām |
yatra vai māthuraṃ tīrthaṃ yamunāyā jalaṃ tathā || 70 ||
[Analyze grammar]

mathurāvāsino bodhyāḥ pārṣadā vai caturbhujāḥ |
paṭhanācchravaṇāttvasya caturbāhutvamāpnuyāt || 71 ||
[Analyze grammar]

śṛṇu tvanyat pravakṣyāmi māhātmyamasikuṇḍajam |
puṇyanagaravāstavyo rājā'bhūd vimatiḥ purā || 72 ||
[Analyze grammar]

vimatestu gṛhe tatra tvāgato nāradaḥ kvacit |
tasmai pādyaṃ tathā'rghyaṃ ca dattavān vimatistadā || 73 ||
[Analyze grammar]

pratigṛhya tatastaṃ ca nāradaḥ prāha dharmabhṛt |
ānṛṇyaṃ te pituḥ kartuṃ samartho'si nṛpeśvara || 74 ||
[Analyze grammar]

mama mitraṃ pitā te me samāsīnmānadaḥ sadā |
sumatināmakastasya nidhanottarameva tu || 75 ||
[Analyze grammar]

kṛtaṃ tvayā mahādānaṃ puṇyaṃ cāpyatipuṣkalam |
tīrthayātrā kṛtā naiva tayā''nṛṇyaṃ bhavet pituḥ || 76 ||
[Analyze grammar]

pituranṛṇatāṃ kṛtvā putro'sya dharmabhāg bhavet |
evamuktvā nāradastu yayau vai badarīvanam || 77 ||
[Analyze grammar]

rājāpi ca tato'pyaicchat tīrthayātrāṃ pituḥ kṛte |
tasya buddhiḥ samutpannā gacchāmo mathurāṃ purīm || 78 ||
[Analyze grammar]

iti niścitya rājā'sau tvāgato mathurāṃ purīm |
caturo vārṣikānmāsānmathurāyāṃ vasāmi vai || 79 ||
[Analyze grammar]

sarvatīrthāni cātraiva cāturmāsye vasanti ca |
iti vicārya rājā sa vāsaṃ dīrghaṃ cakāra vai || 80 ||
[Analyze grammar]

sahasramānavairyukto dāsadāsīprasevitaḥ |
bhṛtyāstīrtheṣu sarvatra kurvanti malavarjanam || 81 ||
[Analyze grammar]

dāsā dāsyaḥ śūdravarṇā vratāheṣvapi maithunam |
kurvanti ca tathā snāntyamaryādaṃ tīrthavāriṣu || 82 ||
[Analyze grammar]

prasahya brāhmaṇādīnāṃ nayantyupaskarādikam |
nindanti sādhūn viprāṃśca kathāṃ ca bhartsayanti vai || 83 ||
[Analyze grammar]

mūtratyāgādikaṃ devabhūmau kurvantyarodhinaḥ |
matsyān khādanti tānpāpān rājā daṇḍaṃ karoti na || 84 ||
[Analyze grammar]

tatpāpaṃ duṣṭatārājñaḥ śirasyeva bhavatyapi |
māse gate ca tīrthāni duḥkhādūcuḥ parasparam || 85 ||
[Analyze grammar]

rājā tvasmāt sthalānniṣkāsanīyaḥ sukhahetave |
yuddhaṃ vimatinā sārdhaṃ svayaṃ kartuṃ na śaknumaḥ || 86 ||
[Analyze grammar]

kalpagrāmaṃ vayaṃ gatvā varāhaṃ parameśvaram |
kaṣṭaṃ nivedayāmaḥ sa yogyaṃ samyak kariṣyati || 87 ||
[Analyze grammar]

kalpagrāme gatānyeva prārthayāṃcakrurādarāt |
jaya viṣṇo jaya pṛthvīpate rājapate jaya || 88 ||
[Analyze grammar]

tīrthakaṣṭavināśārthaṃ nārāyaṇa namo'stu te |
śrutyā varāhabhagavān prāha tīrthāni sādaram || 89 ||
[Analyze grammar]

varaṃ vṛṇuta bhadraṃ vo yadvo manasi vartate |
tīrthānyūcurhare kṛṣṇa no'bhayaṃ dātumarhasi || 90 ||
[Analyze grammar]

supāpinā vimatinā kṛtastrāsaḥ sudāruṇaḥ |
taṃ niyacchasva pāpiṣṭhaṃ māṃsādaṃ pāpisevitam || 91 ||
[Analyze grammar]

śrīvarāhastadā prāha haniṣyāmi mahāripum |
evaṃ tīrthaniyogena tvāgato mathurāṃ purīm || 92 ||
[Analyze grammar]

vārāhaḥ svāsinā rājñā yuddhaṃ cakāra dāruṇam |
sūdayāmāsa rājānaṃ varāhaḥ svāsinā tataḥ || 93 ||
[Analyze grammar]

khaḍgaṃ svasya dharāyāṃ ca dhārāgraṃ nihitaṃ bhuvi |
kṣaṇa viśrāntilābhāya niṣasāda bhuvastale || 94 ||
[Analyze grammar]

sā bhūmiḥ pāvanī yatra kuṇḍaṃ devarṣibhiḥ kṛtam |
asikuṇḍaṃ tu tatproktaṃ tīrthaṃ paramapāvanam || 95 ||
[Analyze grammar]

dvādaśyāṃ vā caturdaśyāṃ kuṇḍasnānaṃ hi muktidam |
tadā varāhatīrthe'haṃ tiṣṭhāmi mokṣadānakṛt || 96 ||
[Analyze grammar]

tīrthe tatra pradātavyā mūrtayo me caturvidhāḥ |
ekā varāhasaṃjñā ca nārāyaṇī dvitīyakā || 97 ||
[Analyze grammar]

vāmanasya tṛtīyā ca caturthī rāghavasya ca |
etāsāṃ darśanaṃ pūjā pratiṣṭhā dānamityapi || 98 ||
[Analyze grammar]

kartavyaṃ sarvathā tatra mokṣabhāk sa bhavettataḥ |
etāścatasro yaḥ paśyet snātvā kuṇve'sināmake || 99 ||
[Analyze grammar]

catuḥsāgaraparyantā krāntā tena vasundharā |
māthurāṇāṃ ca tīrthānāṃ phalabhāk sa bhaveddhruvam || 100 ||
[Analyze grammar]

suptotthito'pi dvādaśyāmasikuṇḍāpluto naraḥ |
mūrtīḥ paśyati yastāstu brahmabhūyāya kalpate || 101 ||
[Analyze grammar]

nāsti tatpunarāvṛttirnārāyaṇaprasādataḥ |
paṭhanācchravaṇāttvasya bhuktvā muktiṃ vrajet khalu || 102 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurākṣetramāhātmye govardhanā'nnakūṭatadanyatīrthapradakṣiṇam pretarūpasya suśīlavaiśyasyoddhāraḥ vārāheṇa vimaternāśe'sikuṇḍaṃ vārāhakṣetramāhātmyaṃ cetyādinirūpaṇanāmā'ṣṭacatvāriṃśadadhikatriśatatamo'dhyāyaḥ || 348 ||
[Analyze grammar]