Chapter 347

śrīnārāyaṇa uvāca |
athānyatte pravakṣyāmi mahālakṣmi śṛṇuṣva tat |
mathurāyā uttarasthe cakratīrthe'bhavattu yat || 1 ||
[Analyze grammar]

jambūdvīpe mahāgṛhodayapattanavāsakṛt |
brāhmaṇaḥ svasya kanyāṃ ca putraṃ cādāya vedavit || 2 ||
[Analyze grammar]

śālagrāmaṃ mahākṣetraṃ yayau yātrārthameva saḥ |
nivāsamakarot tatra snāyī tīrthasurārcakaḥ || 3 ||
[Analyze grammar]

devatānāṃ darśane'sya siddhaḥ kaścid dṛśeḥ pathi |
samāyātaḥ kalāpākhyagrāmavāsī narākṛtiḥ || 4 ||
[Analyze grammar]

siddho nityaṃ darśanārthaṃ samāyāti viyāti ca |
viprasya parṇaśālāyāṃ viśrāntiṃ labhate'pi ca || 5 ||
[Analyze grammar]

varṇayati sma kalāpagrāmasyātivibhūtikāḥ |
śrutvā viprasya gamane jātā buddhistato dvijaḥ || 6 ||
[Analyze grammar]

prāha siddhaṃ mama mitraṃ bhavānadya hi vartate |
kalāpaṃ māṃ naya mitra te paśyāmi vibhūtikāḥ || 7 ||
[Analyze grammar]

siddhaḥ prāha tu viprendra tatra te na gatirbhavet |
śarīraṃ śītavātaistu nāśaṃ yāsyati te dvija || 8 ||
[Analyze grammar]

tathāpi brāhmaṇaḥ prāha tava yogena māṃ naya |
evamabhyarthitaḥ siddhaḥ kanyāṃ putraṃ ca mitrakam || 9 ||
[Analyze grammar]

kare saṃgṛhyotpapāta vyomni yogabalena vai |
kalāpe svāśrame nyastaṃ siddhena brāhmaṇatrayam || 10 ||
[Analyze grammar]

tatra kālena yātena vipro rugṇo'bhavattadā |
mṛtyuyogyaṃ pitaraṃ ca ninye gaṃgātaṭaṃ sutaḥ || 11 ||
[Analyze grammar]

sutā cāpi svapitaraṃ sevate pathyavastubhiḥ |
ekadā parṇaśālāyāṃ pitrarthe pākamācarat || 12 ||
[Analyze grammar]

tadā kaścid brāhmaṇo'pi bhikṣārthaṃ gṛhamāgataḥ |
pṛṣṭo'sau bhadrayā tayā kva bhavāṃstvamihāgataḥ || 13 ||
[Analyze grammar]

sa prāha kānyakubjasya vipro'haṃ siddhatāṃ gataḥ |
vicarāmi mahātīrthe kalāpe'tra sukhī sadā || 14 ||
[Analyze grammar]

kanyayā''veditaḥ pitre bhrātre sa siddhadehavān |
pitrā dattā vicāryaiva kanyā siddhadvijāya sā || 15 ||
[Analyze grammar]

siddho'pyayaṃ hi jāmātā vasati śvaśuragṛhe |
kālena kṣaṇatāṃ prāptaṃ śvaśuraṃ paryapṛcchata || 16 ||
[Analyze grammar]

kathaṃ rogaḥ kadā tvasya vināśo'pi bhaviṣyati |
yathā rogavināśaḥ syāttathā karomi sevanam || 17 ||
[Analyze grammar]

jāmātṛvacanaṃ śrutvā śvaśuraḥ śāntimāvrajat |
prāha jāmātaraṃ bhavān siddhyā jānāti ced vada || 18 ||
[Analyze grammar]

jāmātā siddhimān dhyātvā śvaśuraṃ prāha bho dvija |
kalāpe'tra nivasatā śūdrānnaṃ bhakṣitaṃ tvayā || 19 ||
[Analyze grammar]

ajānatā'rpitaṃ tena bhakṣitaṃ cā'pyajānatā |
tena doṣeṇa rogo'yaṃ vartate varṣmaṇi dvija || 20 ||
[Analyze grammar]

pādayorvidyate cānnaṃ jānvorūrdhve na vidyate |
śūdrānnena vihīnasya vipra mṛtyurbhaviṣyati || 21 ||
[Analyze grammar]

jāmātṛvacanaṃ śrutvā''tmānaṃ vipro'tyagarhayat |
duḥkhena pīḍitaḥ kṣīṇo martumaicchad dvijottamaḥ || 22 ||
[Analyze grammar]

atha prabhāte jāmātā sutā putraśca te trayaḥ |
kāryārtha tu yayurgehād bahistāvat kṣaṇāntare || 23 ||
[Analyze grammar]

nirjanāvasaraṃ labdhvā maraṇaṃ pravicārya ca |
gaṃgātīrāt samuttiṣṭhan diśaḥ sarvā vilokayan || 24 ||
[Analyze grammar]

sannidhāvupalāṃ dṛṣṭvā gṛhītvā parṇakṛdgṛhe |
cūrṇayāmāsa tau pādau pīḍayā duḥkhito dvijaḥ || 25 ||
[Analyze grammar]

tataḥ prāṇān parityajya gato'sau svargamuttamam |
jāmātā ca sutā putraḥ kāryaṃ kṛtvā''yayurgṛham || 26 ||
[Analyze grammar]

tāvanmṛtaṃ tu taṃ vṛddhaṃ dṛṣṭvā ruruduratyati |
sarpaśṛṃgihatānāṃ ca daṃṣṭriprāṇihatasya ca || 27 ||
[Analyze grammar]

ātmaghātakṛtasyāpi nāsti saṃskārayogyatā |
kathamasya bhaved dāho vicāryeti punaśca te || 28 ||
[Analyze grammar]

prāyaścittaṃ vidhīyīta na dadyāccodakakriyām |
iti vidhiṃ samāśritya cakrurdāhādikaṃ tataḥ || 29 ||
[Analyze grammar]

prāyaścittaṃ tathā cakruryayurgrāmaṃ kalāpakam |
tatrasthaṃ mṛtaviprasya mitraṃ siddhaṃ praṇamya te || 30 ||
[Analyze grammar]

maraṇādikamāṃvedya kṣaṇaṃ cakruḥ praśocanam |
kalāpasthaśca siddho'yaṃ prāha jāmātaraṃ dvijam || 31 ||
[Analyze grammar]

brahmahatyā tu te jātā prāyaścittaṃ tataḥ kuru |
vṛddhasiddhavacaḥ bhūtvā jāmātā vākyamabravīt || 32 ||
[Analyze grammar]

na mayā brāhmaṇavadhaḥ kadācidapi vai kṛtaḥ |
kena doṣeṇa me pūjya brahmahatyā phalaṃ vada || 33 ||
[Analyze grammar]

jāmāturvacanaṃ śrutvā vṛddhasiddhastamabravīt |
tvayā tatpādayoḥ śūdrasyānnaṃ cāstīti darśitam || 34 ||
[Analyze grammar]

tadannasya kṣaye mṛtyurityapi darśitaṃ tathā |
vipreṇa tena ca tadvaccūrṇitau caraṇau svakau || 35 ||
[Analyze grammar]

mṛtyuḥ kṛtastatastatra doṣabhāk tvaṃ tathā'bhavaḥ |
iti tvayā vadhopāyo nirdiṣṭaśca dvijottama || 36 ||
[Analyze grammar]

tena doṣeṇa viprarṣe brahmahatyāphalaṃ tava |
āsannaśayanāccaiva bhojanāt kathanāttathā || 37 ||
[Analyze grammar]

pāpaṃ saṃkramate vyaktau sahasaṃcaraṇāttathā |
tataḥ śuddhiḥ prakartavyā mā'stu vāso mama gṛhe || 38 ||
[Analyze grammar]

kalpagrāmaṃ parityajya mathurāṃ yāhi bhūsura |
nānyatra tava śuddhiḥ syādityavehi prayāhi ca || 39 ||
[Analyze grammar]

śrutvā vṛddhasya tadvākyaṃ mathurāṃ te trayo yayuḥ |
patnī ca śālakastena jāmātrā siddhavidyayā || 40 ||
[Analyze grammar]

utpatatā vyomamārge tvānītau mathurāṃ prati |
brāhmaṇebhyo bahiḥsthāne vasatiṃ cakrurādarāt || 41 ||
[Analyze grammar]

mathurāyāṃ tadā rājñaḥ satre vai kuśikasya ca |
viprāṇāṃ dve sahasre tu bhuñjete medhyamanvaham || 42 ||
[Analyze grammar]

brahmayajñakṛtocchiṣṭaṃ bhuṃjate te trayastataḥ |
cakratīrthaṃ samāsādya snānaṃ ca kurvate sadā || 43 ||
[Analyze grammar]

patnī yajñaprasādaṃ svapatiṃ bhikṣā''gataṃ niśi |
bhojayitvā prabhuṃkte ca varṣārdhaṃ vigataṃ tathā || 44 ||
[Analyze grammar]

tato bhikṣārthamāyātaṃ siddhaṃ papracchurādarāt |
viprā yajñaprakartāraḥ kutra santiṣṭhase dvija || 45 ||
[Analyze grammar]

bhojanaṃ kuruṣe kutra sthitvā vad yathātatham |
siddhaśca kathayāmāsa vṛttāntaṃ svātmano hitam || 46 ||
[Analyze grammar]

bhikṣāṃ tvatra gṛhītvā'haṃ bhāryayā śālakena ca |
sahitaścakratīrthe'tra samāplāvya vibhajya ca || 47 ||
[Analyze grammar]

bhojanaṃ vai karomyatra brahmahatyānivṛttaye |
tacchrutvā brāhmaṇāḥ sarve ūcuḥ śuddho'si vai dvija || 48 ||
[Analyze grammar]

cakratīrthaprabhāveṇa pāpānmukto'si sarvathā |
viprāṇāṃ vacanāccaiva punaḥ śuddho'si vai dvija || 49 ||
[Analyze grammar]

iti viprakṛtāṃ śuddhiṃ cakratīrthakṛtāṃ tathā |
prāyaścittakṛtāṃ cāpi prasādasyā'śanāttathā || 50 ||
[Analyze grammar]

prāpya siddhaḥ pramumoda sabhāryāśālakastathā |
cakratīrthaṃ samāgatya bhikṣāṃ bhoktuṃ vyavasthitaḥ || 51 ||
[Analyze grammar]

patnī hṛṣṭena manasā bhartāraṃ vākyamabravīt |
bhojanaṃ kuru viprendra hatyāṃ lakṣyāmi te gatām || 52 ||
[Analyze grammar]

cakratīrthaprabhāveṇa hatyā naṣṭā dvijottama |
tasmādatra mathurāyāṃ nityaṃ sthātavyameva ha || 53 ||
[Analyze grammar]

te vyavasya trayastatra mathurāyāṃ sadā sthitāḥ |
kalāpaṃ saṃparityajya mathurā bhuktimuktidā || 54 ||
[Analyze grammar]

bhadreśvaraṃ tu tattīrthaṃ siddhasevitamityatha |
kalāpāddhi śataguṇaṃ cakratīrthaṃ hi puṇyadam || 55 ||
[Analyze grammar]

ahorātropavāsena brahmahatyā vinaśyati |
kiṃ tasya tu kalāpena vārāgāsyā'thavāpi kim || 56 ||
[Analyze grammar]

mathurā yadi saṃlabdhā cakratīrthaṃ ca sevitam |
api kīṭaḥ pataṃgo vā jāyate sa caturbhujaḥ || 57 ||
[Analyze grammar]

kāladharmaṃ samāpannāstrayaste brāhmaṇāḥ priye |
prāpurme divyagolokaṃ caturbhujā hi śāśvatāḥ || 58 ||
[Analyze grammar]

śṛṇu cānyat pravakṣyāmi balaṃ vaikuṇṭhatīrthajam |
mithilāvāsino lokāstīrthārthaṃ mathurāṃ gatāḥ || 59 ||
[Analyze grammar]

vaikuṇṭhatīrthamāsādya sthitāsteṣāṃ tu bhūsuraḥ |
kaścidāsīd brahmahatyāpāpena tvatipīḍitaḥ || 60 ||
[Analyze grammar]

rudhirasya tu vai dhārā sravantī tasya hastataḥ |
pratyakṣā dṛśyate bahutīrthasnāne'pi no gatā || 61 ||
[Analyze grammar]

kintu vaikuṇṭhatīrthasya snānena vilayaṃ gatā |
vismayo nātra kartavyo vaikuṇṭhasya phalaṃ hi tat || 62 ||
[Analyze grammar]

atra snātā pāpaśūnyo vaikuṇṭhaṃ pratigacchati |
punaranyat pravakṣyāmi lakṣmi gandharvakuṇḍajam || 63 ||
[Analyze grammar]

māhātmyaṃ snānakartā'smin gandharvaiḥ saha modate |
māthuraṃ maṇḍalaṃ padmaṃ yojanānāṃ tu viṃśatiḥ || 64 ||
[Analyze grammar]

karṇikāyāmahaṃ kṛṣṇo mṛtānāṃ muktidaḥ sadā |
paścime'haṃ harirgovardhanadhārī vasāmi ca || 65 ||
[Analyze grammar]

govindaścottare pūrve viśrāntau devaviśramaḥ |
dakṣiṇe'haṃ varāho'smi mahākāyo'tikeśavān || 66 ||
[Analyze grammar]

kṛte yuge nṛpatinā māndhātrā toṣito'smyaham |
mayā tuṣṭena hi tasmai pratimā mama cārpitā || 67 ||
[Analyze grammar]

kapilena bhagavatā taijasī divyarūpiṇī |
manasā nirmitā ramyā vārāhī pratimā śubhā || 68 ||
[Analyze grammar]

indro'pi dhyāyati nityaṃ kapilāt prāpya saukarīm |
mūrtiṃ svabhavane samarcayati sma samādarāt || 69 ||
[Analyze grammar]

rāvaṇo'pi gataḥ śakraṃ vijetuṃ svargamityapi |
śakraṃ jitvā praviṣṭastadbhavane tatra saukaram || 70 ||
[Analyze grammar]

rūpaṃ divyaṃ rāvaṇaṃ vai babandha bahuraśmibhiḥ |
rāvaṇaśca stutiṃ cakre trātumarhasi mādhava || 71 ||
[Analyze grammar]

mama tvaṃ bhaktiyuktasya prasādaṃ kuru sarvathā |
tadā prasanno bhagavān mumoca rāvaṇaṃ hariḥ || 72 ||
[Analyze grammar]

rāvaṇo'pi tadā mūrtiṃ laṃkāṃ netumiyeṣa yat |
tāmuddhartumaśakanna tadātivismayaṃ gataḥ || 73 ||
[Analyze grammar]

neme tatpādayoḥ prāha laṃkāṃ netuṃ mamā''śayaḥ |
vārāhaḥ prāha rakṣastvamavaiṣṇavo'si tena vai || 74 ||
[Analyze grammar]

nā''gamiṣye tato bhūyā vaiṣṇavaścennayasva mām |
rāvaṇo vaiṣṇavo bhūtvā nītavānnagarīṃ tu tām || 75 ||
[Analyze grammar]

rāmeṇa rāvaṇo nāśaṃ gamitaḥ pratimā tu sā |
ānītā svanagarīṃ ca pūjitā bahuvatsarān || 76 ||
[Analyze grammar]

tena śeṣasvarūpaḥ svabhrātā rakṣovināśane |
yojitaḥ sa mathurāyāṃ samāgatya tu rākṣasān || 77 ||
[Analyze grammar]

nāśayāmāsa ca tatra vārāhīṃ pratimāṃ hi tām |
ānayāmāsa rakṣārthaṃ sthāpayāmāsa vai vidheḥ || 78 ||
[Analyze grammar]

dhanyeyaṃ māthurī pṛthvī dhanyā lokāśca tadgatāḥ |
yaiḥ sadā snāpito dṛṣṭaḥ spṛṣṭo dhyāto'nucarcitaḥ || 79 ||
[Analyze grammar]

pūjitaśca varāho'yaṃ mokṣaṃ dāsyati sarvathā |
varāhasannidhau piṇḍadānānmuktāstu pūrvajāḥ || 80 ||
[Analyze grammar]

bhavatyeva gayāśrāddhaphalaṃ puṣkarajaṃ phalam |
śvetaṃ vārāhamālokya viśrāntiṃ lokayettathā || 81 ||
[Analyze grammar]

govindaṃ ca samālokya govardhanadharaṃ tataḥ |
vilokayediti lakṣmi kathito mahimā ca te || 82 ||
[Analyze grammar]

ya idṃ śṛṇuyāccāpi paṭhedvā pāṭhayettathā |
tasya varṇitapuṇyānāṃ prāptiḥ syānmokṣaṇaṃ bhavet || 83 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mathurākṣetramāhātmye cakratīrthe kalāpagrāmavāstavyaviprasya brahmahatyāpātakanāśākhyānaṃ muktiśca |
vaikuṇṭhatīrthe mithilāyā viprasya brahmahatyāpātakanāśākhyānaṃ kapilabhagavatā manasotpāditavārāhasya paramparayā mathurāyāṃ pratiṣṭhānamityādinirūpaṇanāmā saptacatvāriṃśadadhikatriśatatamo'dhyāyaḥ || 347 ||
[Analyze grammar]