Chapter 302

| śrīnārāyaṇa uvāca |
athāpi te kathāṃ lakṣmi kathayāmi surañjanīm |
adhimāse hareścānugrahā'nto naiva vidyate || 1 ||
[Analyze grammar]

navamyāṃ tu niśi pṛṣṭaṃ dundubhaye tu śārṅgiṇā |
uddhoṣyate nu sarvatra kiṃ vā kvacitkvacitsthale || 2 ||
[Analyze grammar]

dundubhiḥ prāha sarvatra yāṃ diśāmabhilakṣya tu |
prātaḥkālād ghoṣayāmi sāyaṃkālāvadhiṃ prabho || 3 ||
[Analyze grammar]

bahavaḥ khalu kurvanti dehino vratamatra vai |
kṛpālābhaṃ ca gṛhṇanti bhuktiṃ muktiṃ manāk kṛtāt || 4 ||
[Analyze grammar]

tāvat tatra samāyātā pṛthvī samprārthanāya vai |
bhagavan devadeveśa vaikuṇṭhanātha mādhava || 5 ||
[Analyze grammar]

asaṃkhyaprāṇināṃ mokṣo'dhimāse sāmprataṃ tvayā |
vidhīyate'tikṛpayā tato'haṃ sukhinī bhṛśam || 6 ||
[Analyze grammar]

mamāpi devadevasya vrataṃ kāryaṃ samādarāt |
puruṣottamamāsasya vratināṃ saṃpramokṣaṇam || 7 ||
[Analyze grammar]

svargayogastava yogo dhanadhānyādisampadaḥ |
putrapautrayaśolābhā yadyadiṣṭaṃ bhavecca tat || 8 ||
[Analyze grammar]

kṛpayā dīyataṃ sarve gataṃ vaikuṇṭhatulyatām |
ahaṃ tu dhanyabhāgyā'smi dundubhistava yanmayi || 9 ||
[Analyze grammar]

muktakaṇṭhena sarvebhyo vijñāpayatyudāratām |
adhimāse kṛpā yā ca kṛtā tvayā dayālunā || 10 ||
[Analyze grammar]

mayi saiva kṛpā jātā jīvā yatpuṇyabhāginaḥ |
pāpahīnāḥ pavitrāśca bhaviṣyanti sadā mayi || 11 ||
[Analyze grammar]

pāpabhāreṇa bhagavan kadāpi pīḍitā nahi |
bhaviṣyāmi bhavadbhaktabāhulyātpuṇyaśālinī || 12 ||
[Analyze grammar]

sārdhadvayā'bdādhimāse'pyekā'haṃ ca vrataṃ tava |
kariṣyanti janā ye ye te sarve dhūtapāpakāḥ || 13 ||
[Analyze grammar]

anyoddhārasamarthāśca bhaviṣyanti sadā mayi |
ityahaṃ bahu tuṣṭā'smi bhāvisvāsthyapralābhataḥ || 14 ||
[Analyze grammar]

asajjanānāṃ bhāreṇa bhavāmi pīḍitā prabho |
asantaśca janāḥ kāle prabhaviṣyanti bhāvini || 15 ||
[Analyze grammar]

brāhmaṇā vedahīnāśca vedamātṛvihīnakāḥ |
vaidikaiḥ karmabhirhīnā bhārarūpā mayi prabho || 16 ||
[Analyze grammar]

śaucasantoṣahīnāśca tapobhirvarjitāstathā |
svādhyāyeśapraṇidhānairhīnā bhārātmakā mayi || 17 ||
[Analyze grammar]

ahiṃsāvratahīnāśca piśunāḥ satyavarjitāḥ |
asteyavratahīnāśca vyavāyābhiratāstathā || 18 ||
[Analyze grammar]

tṛṣṇā''vṛtā parasvāpaharā bhārātmakā mayi |
dayāhīnāḥ śīlahīnāḥ parāvanaticintakāḥ || 19 ||
[Analyze grammar]

mithyākalaṃkavaktāro nindakā dveṣiṇastathā |
śraiṣṭhyaunnatyāsahā ye te bhārarūpāḥ sadā mayi || 20 ||
[Analyze grammar]

parātmaduḥkhakartāro guṇe doṣā'bhidhāyakāḥ |
svārthamātraparā viprā bhārarūpā mayi sthitāḥ || 21 ||
[Analyze grammar]

snānasandhyāvihīnāśca devapūjādivañcitāḥ |
ātmaniṣṭhādirahitā jaḍā bhārātmakā mayi || 22 ||
[Analyze grammar]

yajñavighnaprakartāro vaiśvadevavināśakāḥ |
saṃskārabhāvanāhīnā viprā bhārātmakā mayi || 23 ||
[Analyze grammar]

sūtakānatimantāro hetuvādāśca nāstikāḥ |
brahmopāsanayā hīnā viprā bhārātmakā mayi || 24 ||
[Analyze grammar]

bhaktibhāvavihīnāśca śūnyā adhyātmavidyayā |
pitṛtarpaṇaśūnyāśca viprā bhārātmakā mayi || 25 ||
[Analyze grammar]

paropakārahīnāśca dānapuṇyavivarjitāḥ |
jihvāśiśnakṛtā'dharmā viprā bhārātmakā mayi || 26 ||
[Analyze grammar]

parakaṣṭapradātāraḥ parakāryaprabhañjakāḥ |
parāparādhakartāro viprā bhārātmakā mayi || 27 ||
[Analyze grammar]

ayogye bījadātāro hyayogyakṣetrakarṣukāḥ |
chaladharmātighātāśca viprā bhārātmakā mayi || 28 ||
[Analyze grammar]

prasahya bhoginaḥ krūrāḥ parākrandanahetavaḥ |
kūṭacārāḥ kṣveḍaguptā madhuvācaḥ pratārakāḥ || 29 ||
[Analyze grammar]

vārtayā viṣasektāro bhārarūpāḥ sadā mayi |
viśvāsaghātakā ye ca kṛtaghnā bālaghātakāḥ || 30 ||
[Analyze grammar]

ajñapraghātakā ye ca śaraṇāgataghātakāḥ |
kuṭumbaghātakā mātāpitṛnārīpraghātakāḥ || 31 ||
[Analyze grammar]

dharmaghnā mokṣaghātāśca bhārarūpā mayi prabho |
abhakṣyabhakṣakā jātibhraṃśasaṃkarakārakāḥ || 32 ||
[Analyze grammar]

stryapatyanāśakā vṛttidhanaprāṇāpahārakāḥ |
ātatāyikriyāduṣṭā agnidā garadāstathā || 33 ||
[Analyze grammar]

māraṇoccāṭanakṛtyā garbhaghātādikāriṇaḥ |
asthānatāḍane krūrakarmāḍhyā bhārakā mayi || 34 ||
[Analyze grammar]

abrāhmaṇā brāhmaṇatve svakartavyavihīnakāḥ |
parasaukhyavihantāraḥ sadā bhārātmakā mayi || 35 ||
[Analyze grammar]

anudyogāḥ sadālasyā parabhāgyopajīvinaḥ |
dṛptāścaivā'nadhikāre sadā bhārātmakā mayi || 36 ||
[Analyze grammar]

amārgagā mṛdūnāṃ svabalenā'rdanakārakāḥ |
adaṇḍye daṇḍakartāraḥ sadā bhārātmakā mayi || 37 ||
[Analyze grammar]

pālyānāṃ pālakā ye na pūjyānāṃ pūjakāśca na |
mānyānāṃ mānakartāro na ye te bhārakā mayi || 38 ||
[Analyze grammar]

paśūnāṃ duḥkhakartāraścāśritānāmarakṣakāḥ |
dāsānāṃ duḥkhakartāro bhārarūpā sadā mayi || 39 ||
[Analyze grammar]

śiṣyapratārakāḥ śikṣakāśca śiṣyā vivartinaḥ |
bhṛtyapratārakā āḍhyā āḍhyaghnāḥ karmacāriṇaḥ || 40 ||
[Analyze grammar]

śiṣyāśca guravaścāpi svasvakartavyavarjitāḥ |
pratārakāstathā'nyonyaṃ sarve bhārātmakā mayi || 41 ||
[Analyze grammar]

sevakāḥ svāmihantāraḥ svāminaḥ sevakārdanāḥ |
dāsā dāsatvahīnāśca sarve bhārātmakā mayi || 42 ||
[Analyze grammar]

rājā na rakṣako yatra na prajā puṇyakāriṇī |
śaṭhāḥ prajāsu ye rājñi sarve bhārātmakā mayi || 43 ||
[Analyze grammar]

atrātā kṣatriyo'dātā vaiśyaḥ śūdro'pyasevakaḥ |
svasvadharmahanaḥ sarve bhārarūpā mayi prabho || 44 ||
[Analyze grammar]

jananyājñākarī yā na putrī snuṣāpi tādṛśī |
mātā yā hitakartrī na śvaśrūścāpi ca tādṛśī || 45 ||
[Analyze grammar]

dampatyoryatra naikyaṃ ca kalahaśca dvayoḥ sadā |
patisevāghṛṇā patnī patnīduḥkhakaraḥ patiḥ || 46 ||
[Analyze grammar]

putrāḥ pitṛnideśe na pitā putravinindakaḥ |
sevyasevakatāhīnāste sarve bhārakā mayi || 47 ||
[Analyze grammar]

brahmacārī brahmacarye yo na tiṣṭhati rāgataḥ |
gṛhasthastyāgadharmāśca puraskṛtya pravartate || 48 ||
[Analyze grammar]

vānaprastho'pi satṛṣṇaḥ sannyāso nyāsavarjitaḥ |
anyadharmagrahītāraste sarve bhārarūpiṇaḥ || 49 ||
[Analyze grammar]

dadhidugdhaghṛtatailarasasāṃkaryakārakāḥ |
annapatrakaṇaśākapuṣpasāṃkaryakārakāḥ || 50 ||
[Analyze grammar]

khādyapeyasusaṃdhāryabhogyasāṃkaryakārakāḥ |
jīvaghātakarā vaidyāḥ sarve te bhārarūpiṇaḥ || 51 ||
[Analyze grammar]

madyamāṃsāśanā martyāḥ parapiṇḍopajīvinaḥ |
vastrabhūṣādisāṃkaryakarā vai bhārarūpiṇaḥ || 52 ||
[Analyze grammar]

kūṭapaṇyāḥ kūṭamānāḥ kūṭatulāpramāpinaḥ |
kūṭasaṃkhyākarā daivajñā api bhārarūpiṇaḥ || 53 ||
[Analyze grammar]

vyāpārā''deyadeyādo pratāraṇakarāḥ khalāḥ |
prasahya luñcakā martyāḥ sadā bhārātmakā mayi || 54 ||
[Analyze grammar]

akarmaṭhā vyasaninaḥ śanigrahasamā bhuvi |
rāhugrāsasamā ye ca sarpadaṃśasamāstathā || 55 ||
[Analyze grammar]

cipīṭakāsamā ye ca badrīkaṇṭakarūpiṇaḥ |
mīnaśyenasamā ye ca bakamārjārakarmakā || 56 ||
[Analyze grammar]

bahiḥ śuklā hṛtsu raktāścātmani kṛṣṇakajjalāḥ |
martyā devā dānavā vā svargyāḥ pātālavāsinaḥ || 57 ||
[Analyze grammar]

sarve te bhārarūpā vai pāpakarmāṇa eva te |
pīḍayeyuśca māṃ kāle yeṣāṃ māhātmyameva na || 58 ||
[Analyze grammar]

nā'dhimāsavrataṃ yeṣāṃ na yeṣāṃ puruṣottamaḥ |
na bhaktiścāstikabhāvaste syurbhārātmakā bhuvi || 59 ||
[Analyze grammar]

tasmānmayā hare kṛṣṇa kāle kāle ca tādṛśām |
bhāvināṃ bhāranāśāya prārthyate parameśvaraḥ || 60 ||
[Analyze grammar]

kiṃ kartavyaṃ mayā teṣāṃ bhāranāśāya keśava |
yacchreyastatsamabrūhi bhāvimacchreyaicchayā || 61 ||
[Analyze grammar]

ityarthayantyāṃ kṣmāyāṃ tāṃ dundubhiḥ prāha medinīm |
kiṃ tvayā na śrutaṃ pṛthvi mayoddhoṣitamiṣṭadam || 62 ||
[Analyze grammar]

adhimāse vrataṃ kāryaṃ puṇyaṃ vai śāśvataṃ bhavet |
vidhāsyatyavanaṃ te ca bhagavānpuruṣottamaḥ || 63 ||
[Analyze grammar]

idānīṃ śrīhariḥ kṛṣṇanārāyaṇaḥ paraprabhuḥ |
prasannaḥ phaladaścāste daśamyāstvaṃ vrataṃ kuru || 64 ||
[Analyze grammar]

vratānte bhagavān kṛṣṇaḥ svayaṃ dāsyati darśanam |
kariṣyatyavanaṃ te ca sarvakāleṣu bhārataḥ || 65 ||
[Analyze grammar]

idānīṃ yāhi deveśi satyaloke sthitiṃ kuru |
vrataṃ daśamyāstatraivādhimāsasyā'dhivartaya || 66 ||
[Analyze grammar]

vratānte yadi devaste darśana na dadāti cet |
śvaḥ sāyaṃ vai tvayā tvatrā''gantavyaṃ cārthanāya vai || 67 ||
[Analyze grammar]

ityuktā dundubhinaiva natvā devaṃ prabhuṃ tathā |
dundubhiṃ ca namaskṛtya satyalokaṃ samāyayau || 68 ||
[Analyze grammar]

svanivāse pṛthivyā ca daśamyāśca vrataṃ kṛtam |
prātaḥ snātvā hariṃ dhyātvā kṛtvā mūrtiṃ tu kānakīm || 69 ||
[Analyze grammar]

pañcāmṛtairhariṃ prārcya snapayitvā jalaiḥ śubhaiḥ |
sugandhacandanādyaiśca carcayitvā'tibhāvataḥ || 70 ||
[Analyze grammar]

vastraiḥ svarṇairvibhūṣābhiḥ kuṃkumā'kṣatasaddalaiḥ |
tulasīmaṃjarībhiśca kamalairdhūpadīpakaiḥ || 71 ||
[Analyze grammar]

pūjayitvā sunaivedyaṃ miṣṭānnaṃ haraye dadau |
jalaṃ tāmbūlamiṣṭeṣṭaṃ phalaṃ cārghyaṃ dadau tataḥ || 72 ||
[Analyze grammar]

nīrājayitvā kusumāṃjaliṃ namaḥ stutiṃ tathā |
pradakṣiṇaṃ dakṣiṇāṃ cārpayitvā ca tataḥ kṣitiḥ || 73 ||
[Analyze grammar]

vavande paramātmānaṃ vrataṃ vai daśamīkṛtam |
adhimāsasya sampūrṇe sanaktaṃ bhavatānmama || 74 ||
[Analyze grammar]

prātarevaṃ pūjayitvā pupūja praharadvaye |
bhojayitvā yathāpekṣaṃ tvarpayitvā'tha śārṅgiṇe || 75 ||
[Analyze grammar]

sāyamevaṃ ṣoḍaśopasuvastubhiḥ samapūjayat |
ārārtrikaṃ ca naivedyaṃ jalaṃ tāmbūlakaṃ phalam || 76 ||
[Analyze grammar]

dadau kṛṣṇāya kusumāṃjaliṃ satpāyasaṃ dadau |
tataśca pāyayāmāsa vavande karuṇākaram || 77 ||
[Analyze grammar]

sajāgaraṃ nartanaṃ ca gītaṃ cakre'rdharātrikam |
madhyarātrau hariścā''yāt sākṣācchrīpuruṣottamaḥ || 78 ||
[Analyze grammar]

vada pṛthvi kimiṣṭaṃ te vratāt tuṣṭo'smi saṃvṛṇu |
adhimāse vratinastu sarvamiṣṭaṃ karomi vai || 79 ||
[Analyze grammar]

iti me'sti vrataṃ tasmāt sulabhaṃ durlabhaṃ tathā |
yatkiṃcit tat sarvathā'haṃ pūrayiṣye vadā'tra mām || 80 ||
[Analyze grammar]

ityuktā sā mahī tatra provāca parameśvaram |
bhagavan yadi tuṣṭo'si satyavākyakaro'si ca || 81 ||
[Analyze grammar]

sarvaṃ dadāsi cenmahyaṃ sarvo me puruṣottamaḥ |
vinā necchāmi cānyadvai trātāraṃ puruṣottamam || 82 ||
[Analyze grammar]

ahaṃ sadā tu te nātha sevāyāṃ saṃvasāmi vai |
tādṛśaṃ me divyarūpaṃ dehi bhūtrāṇakṛt prabho || 83 ||
[Analyze grammar]

anyacca bhārarūpāṇāṃ vināśāya mahāprabho |
adharmā'guṇanāśāya malloke vihara prabho || 84 ||
[Analyze grammar]

adhimāsaṃ vinā'nyeṣu māseṣu prajayā kṛtam |
pāpaṃ prajvālayituṃ tvaṃ mayi vāsaṃ prarocaya || 85 ||
[Analyze grammar]

yena me sarvadā deva rakṣaṇaṃ syājjanārdana |
āgaccha divyarūpeṇa bhautikena ca vā prabho || 86 ||
[Analyze grammar]

bhautikaṃ yadi te varṣma kvacit sviṣṭaṃ susaṃbhavet |
tadā mātā bhaviṣyāmi pālayiṣyāmi matsutam || 87 ||
[Analyze grammar]

lālayiṣyāmi govinda bhojayiṣyāmi bhāvataḥ |
kariṣyāmi ca te sevāṃ yatheṣṭaṃ dehi cārthitam || 88 ||
[Analyze grammar]

ityuktvā virarāmeyaṃ nanāma puruṣottamam |
kṛṣṇanārāyaṇaḥ śrutvā pṛthivyā hṛdayodbhavam || 89 ||
[Analyze grammar]

divyaṃ rūpaṃ dadau cāsyai vaikuṇṭhe sevanārhaṇam |
divyā satī surūpā ca caturhastā ramāsamā || 90 ||
[Analyze grammar]

bhūtvā vasumatī pṛthvī dīvyati smā'tha mādhavaḥ |
nināya tāṃ vasumatīṃ vaikuṇṭhe salilopari || 91 ||
[Analyze grammar]

tatra tiṣṭhati nityā sā dāsī bhūtvā'tivaiṣṇavī |
atha dvitīyaṃ tadrūpaṃ pṛthivyāvaraṇe stare || 92 ||
[Analyze grammar]

pṛthivyā bhavane nityaṃ vāsārhaṃ vidyate sadā |
sā devī sarvabhūtānāmadhiṣṭhātrī tu bhūrmatā || 93 ||
[Analyze grammar]

nārāyaṇena sā nityaṃ satyalokopari dhruvā |
pṛthivyāvaraṇe sthātumājñaptā tatra vartate || 94 ||
[Analyze grammar]

tṛtīyaṃ kāryarūpaṃ yat pārthivaṃ prastarādikam |
sthalyātmakamidaṃ sarvaṃ brahmāṇḍaṃ brahmaṇā kṛtam || 95 ||
[Analyze grammar]

tatra pṛthvyāṃ yathā'pekṣaṃ bhāraṃ hartuṃ bhuvo nanu |
hariṇā tu samāgantuṃ pratiśrutaṃ tu vai mṛhuḥ || 96 ||
[Analyze grammar]

hariḥ prāha śṛṇu kṣme tvaṃ prathame yugaparyaye |
vyatīte bhārarūpā vai bhaviṣyanti prajā muhuḥ || 97 ||
[Analyze grammar]

prathame'pi yuge devakāryārthaṃ tvayi sāmpratam |
āgamiṣyāmi te bhaktyā varadānena vai muhuḥ || 98 ||
[Analyze grammar]

avatārān grahīṣyāmi rakṣayiṣyāmi mā śucaḥ |
daśamyāmadhimāsasya vratena toṣito'smyaham || 99 ||
[Analyze grammar]

ato yugacatuṣke vai tattatkāryārthameva ha |
avatārān grahīṣyāmi daśa mukhyāṃstato'pi ca || 100 ||
[Analyze grammar]

gauṇānanyāna yathāpekṣaṃ bahūn vai divyavigrahān |
tena tena svarūpeṇa kariṣyāmi tavā'vanam || 101 ||
[Analyze grammar]

saṃhariṣyāmyadevāṃśca nāśayiṣyāmi dānavān |
daityān vipothayiṣyāmi kariṣyāmi sukhaṃ tava || 102 ||
[Analyze grammar]

evaṃ bhāraṃ hariṣyāmi gaccha devi yathāsukham |
ityābhāṣya haristatra kṣaṇādantaradhīyata || 103 ||
[Analyze grammar]

pṛthvī tuṣṭā'bhavaccāpi dadau puṣpāṃjaliṃ punaḥ |
vrataṃ samāpya sā devī tato natvā tu dundubhim || 104 ||
[Analyze grammar]

jagāma svālayaṃ pṛthvyāvaraṇe svīyamandiram |
evaṃ lakṣmi daśamyāḥ sā kṛtvā'dhimāsikaṃ vratam || 105 ||
[Analyze grammar]

nāmnā vasumatī dāsī jātā vaikuṇṭhavāsinī |
yuge yuge dine cāhni mamā'virbhāvavatyapi || 106 ||
[Analyze grammar]

mayā pratijñayā sarvādhilābhagāminī kṛtā |
anyāyai na mayaitādṛk lābho'rpitaḥ kadācana || 107 ||
[Analyze grammar]

yadyad vāñchati yaḥ ko'pi svalpenā'pi vratena me |
tattattasmai pradadāmi nakārastatra nā'sti hi || 108 ||
[Analyze grammar]

yaḥ śroṣyati vasumatīkathāṃ yaśca paṭhiṣyati |
prāpsyati vratapuṇyaṃ sa daśamyā nātra saṃśayaḥ || 109 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye vaikuṇṭhe bhagavantaṃ pṛthivyāḥ prārthanā bhārarūpāṇāṃ paricayaḥ daśamīvratena pṛthivī vasumatī bhūtvā vaikuṇṭhavāsinī jātā svasyāṃ pratiyuge bhagavadavatārāṇāṃ prākaṭyārthaṃ bhagavatpratijñetyādinirūpaṇanāmā dvyadhikatriśatatamo'dhyāyaḥ || 1302 ||
[Analyze grammar]