Chapter 303

| śrīnārāyaṇa uvāca |
adhimāsaikādaśikākathāṃ divyāṃ haripradām |
śṛṇu lakṣmi samāraṃbhe sṛṣṭerjātā tapomayīm || 1 ||
[Analyze grammar]

brahmaṇo vakṣaso jāto dharmadevaḥ samūrtikaḥ |
mūrtirdevī tirobhūtā sadā''ste dharmavarṣmaṇi || 2 ||
[Analyze grammar]

sā ca dharme samutpanne sahaivotpadyate'pi sā |
lokarītyā tu saṃjajñe dakṣaputrīsvarūpiṇī || 3 ||
[Analyze grammar]

punardharmasya sā patnī lokarītyā tu jāyate |
yadā sā'bhūd dharmadeve hyadṛśyā cāvivāhitā || 4 ||
[Analyze grammar]

tadā lakṣmi kumārī sā brahmacaryasamanvitā |
sevate sarvadā bhaktyā svāminaṃ brahmacāriṇam || 5 ||
[Analyze grammar]

satyaloke sthitā vedhogṛhe dharmasahāyinī |
brahmā jānāti vai sarvaṃ nānye jānanti tāṃ sthitām || 6 ||
[Analyze grammar]

bālā bālasvarūpādvai samārabhyaiva nityaśaḥ |
snānaṃ pūjāṃ japaṃ homaṃ dhyānaṃ svāmiprasevanam || 7 ||
[Analyze grammar]

karotyeva ca vṛddhebhyo namanaṃ vandanaṃ tathā |
dayāśāntiprasantoṣā''rjavopakārakādayaḥ || 8 ||
[Analyze grammar]

satyātimārdavakṛcchraguṇā mūrtau vasanti hi |
siddhadehā tu sā mūrtistapassu vartate'ti vai || 9 ||
[Analyze grammar]

vṛṣṭau tiṣṭhati varṣāsu śaitye śītajalādiṣu |
ātape pañcavahnisthā nirāhārā vrateṣu ca || 10 ||
[Analyze grammar]

ārdrāmbarānvitā nityaṃ svarṇadīto gṛhaṃ svakam |
samāgatya patiṃ natvā karoti kṛṣṇapūjanam || 11 ||
[Analyze grammar]

patiṃ jalādibhiḥ pūrvaṃ snapayitvā samarcya ca |
dadāti bhojanaṃ cāsmai jalaṃ khādyaṃ phalādikam || 12 ||
[Analyze grammar]

svayaṃ tu tulasīpatraiḥ kamalaiḥ pārijātakaiḥ |
patiṃ nityaṃ pūjayati divyajñānātibhaktitaḥ || 13 ||
[Analyze grammar]

evaṃ prātaḥ sadā snānaṃ devapūjāṃ dhavā'rcanam |
patisevā bhojanādi kārayitvā vidhāya ca || 14 ||
[Analyze grammar]

patyurdehe vilīnā sā mūrtirbhavati sarvadā |
evaṃ nityānuvṛttyā sā premapātrottamottamā || 15 ||
[Analyze grammar]

dharmadevasya vai jātā sukhadā'pi kumārikā |
dharmadevo'pyanuvṛttisevābhaktyā'titoṣaṇam || 16 ||
[Analyze grammar]

pratyahaṃ samavāpnoti dadātyasyai śubhāśiṣaḥ |
patisevāparā nityaṃ sukhini mūrtike bhava || 17 ||
[Analyze grammar]

lokarītyā''ptadehena vivāhya sevikā bhava |
tataḥ saubhāgyasatputrasmṛddhyādisaṃbhṛtā bhava || 18 ||
[Analyze grammar]

nityabhaktiphalarūpaḥ sādhyaste keśavo bhavet |
hariḥ kṛṣṇaḥ parabrahma śrīpatiḥ puruṣottamaḥ || 19 ||
[Analyze grammar]

ityāśīrvādabhūmiḥ sā mahāpuṇyādhivāsanī |
adhimāsaikādaśikāprātarutthāya nityavat || 20 ||
[Analyze grammar]

snātuṃ sā svarṇadī yātā tatra śuśrāva dundubhim |
adyā'styekādaśī devyaḥ puruṣottamamāsagā || 21 ||
[Analyze grammar]

asyā vratena santuṣṭaḥ kṛṣṇanārāyaṇaḥ prabhuḥ |
yatheṣṭaṃ dāsyate saukhyamaihikaṃ pāralaukikam || 22 ||
[Analyze grammar]

yad dadāmyadhimāsasya dineṣvanyeṣu vai vratān |
tataḥ koṭiguṇaṃ dāsye phalamekādaśīvrate || 23 ||
[Analyze grammar]

ekādaśīnāmanyāsāṃ vratena yatphalaṃ bhavet |
tato'rbudaguṇaṃ puṇyaṃ dāsye hyasyā vratena vai || 24 ||
[Analyze grammar]

ahaṃ brahmeśvaraścādhimāsasyāsmyadhidaivataḥ |
tatrāpyekādaśīnātho'smyahaṃ śrīpuruṣottamaḥ || 25 ||
[Analyze grammar]

māso'pi puṇyaśca dinaṃ ca puṇyaṃ devo'smi puṇyaśca vrataṃ kṛpāloḥ |
mamā''jñayā ye'nucaranti bhaktyā tebhyo yatheṣṭaṃ vitarāmi sarvam || 26 ||
[Analyze grammar]

yathā yathā syānmanasīṣaṇātrayam vratasya kartuśca tathātathā'nvaham |
parārdhatulyaṃ tu dadāmi tatphalaṃ lakṣmīṃ ca māṃ cāpi ca dhāma māmakam || 27 ||
[Analyze grammar]

siṃhāsanaṃ me'pi dadāmi tasmai dadāmi siddhīśca camatkṛtiṃ ca |
aiśvaryasarvasvamathāpi bhūtiṃ sakaustubhaṃ me mukuṭaṃ ca bhūṣā || 28 ||
[Analyze grammar]

yathā'dhimāse kṛpayā pravarṣaye janārthitaṃ pūrayituṃ ca varṣitum |
tathā na kutrāpi tu naijavāñcchayā pravarṣayiṣye'dhikamāsamantarā || 29 ||
[Analyze grammar]

vrataṃ prakurvantu narāḥ striyaśca bālāśca vṛddhāśca sutoṣaṇāya |
phalaṃ pradāsye mama śāśvataṃ vai padaṃ sudivyaṃ tu parātparaṃ yat || 30 ||
[Analyze grammar]

golokaṃ cāpi vaikuṇṭhaṃ dhāmā'vyākṛtameva vā |
śvetadvīpaṃ ca vā sauryaṃ tvanye bhaumaṃ tathā'param || 31 ||
[Analyze grammar]

yadyadicched vrataṃ kṛtvā pradāsyāmi kṛpāvaśaḥ |
alpāyāse phalānantyaṃ gṛhṇantu vratīno mama || 32 ||
[Analyze grammar]

nātra yajñāḥ pṛthak kāryā nātra tapyaṃ tapaḥ pṛthak |
tīrthaṃ nātra pṛthak kāryaṃ hyekāhasya phale hi tat || 33 ||
[Analyze grammar]

payovrataṃ ca putreṣṭiyajanaṃ neṣyate pṛthak |
ekādaśyā vratenātra dāsyāmi putramityapi || 34 ||
[Analyze grammar]

jyotiṣṭomena yajanaṃ pṛthak sādhyaṃ na veṣyate |
svargaṃ dadāmi tasmai ya ekādaśyā vrataṃ caret || 35 ||
[Analyze grammar]

na tasya rājasūyena sādhyaṃ kimapi śiṣyate |
ekādaśīvratenā'tra sārvabhaumaṃ dadāmyaham || 36 ||
[Analyze grammar]

agnihotreṇa kiṃ tasya dāsye vairājakaṃ padam |
ekādaśyāṃ tu me yenārpitaṃ phalajalādikam || 37 ||
[Analyze grammar]

śrāddhairvividhakalpaiśca vividhairdevapūjanaiḥ |
yā tṛptistviṣyate tāṃ vai dāsye caikādaśīvrate || 38 ||
[Analyze grammar]

yāṃ muktiṃ yāṃ ca sampattiṃ yāṃ siddhiṃ yogamaiśvaram |
yadyad vāñcchati yat kṛtvā tad dāsye'tra dine vrate || 39 ||
[Analyze grammar]

yāvajjīvaṃ phalāhārairyat supuṇyaṃ samarjyate |
tatpuṇyaṃ yāntu vai caikādaśīvratena me janāḥ || 40 ||
[Analyze grammar]

ekabhuktaṃ kṛtaṃ yenā''jīvanaṃ tatphalaṃ tvaham |
dadāmyadhikamāsaikādaśīvratena meṃ'jasā || 41 ||
[Analyze grammar]

mastake jvaladaṅgārāṅgiṣṭhikāṃ madhyarātrike |
kāle udūhya yā nārī hyekārdravastrasaṃvṛtā || 42 ||
[Analyze grammar]

anupānaccaraṇābhyāmasahāyā'pyaraṇyake |
gatvā kālīṃ prapūjyaiva pratyahaṃ vārṣikaṃ vratam || 43 ||
[Analyze grammar]

ekabhuktaṃ māṣamātrādanaṃ kuryādakhaṇḍitam |
varṣāyāṃ śītakāle cātapakāle'pi sarvadā || 44 ||
[Analyze grammar]

gatvā''pūjya punarāyād gṛhaṃ svaṃ madhyarātrike |
tato randhitamāṣānnaṃ gṛhṇīyācca jalaṃ sadā || 45 ||
[Analyze grammar]

evaṃ kaṣṭataraṃ putraprāptyarthaṃ yanmahadvratam |
tadvai pṛthaṅ na kartavyamekādaśyā vrate kṛte || 46 ||
[Analyze grammar]

mahākālīvrataṃ tad yad vārṣikaṃ pratirātrikam |
yad dadāti phalaṃ putrātmakaṃ tattu vinaśvaram || 47 ||
[Analyze grammar]

ekādaśīvrataṃ tvetatputrasvargapramuktidam |
ekena divasenaiva tadvratādhikapuṇyadam || 48 ||
[Analyze grammar]

sahasravarṣaparyantaṃ vāyvāhāraṃ vrataṃ tu yat |
pṛthak tannāsti kartavyaṃ hyekādaśyā vrate kṛte || 49 ||
[Analyze grammar]

sahasrakanyakādānaṃ yatra kanyā vibhūṣitāḥ |
pratyekaṃ svarṇasāhasramudrāśca dakṣiṇāstathā || 50 ||
[Analyze grammar]

pratikanyaṃ tu dāsīnāṃ śataṃ svarṇavibhūṣitam |
pratidāsi ca hastīnāṃ śataṃ tvambālikāyutam || 51 ||
[Analyze grammar]

pratihasti turagāṇāṃ śataṃ svarṇavibhūṣitam |
pratyaśvaṃ govṛṣabhāṇāṃ śataṃ dvandvaṃ rathānvitam || 52 ||
[Analyze grammar]

rathaṃ rathaṃ prati dogdhrīgavā cāpi śataṃ śatam |
gāṃ gāṃ prati hyajānāṃ ca śataṃ śataṃ dadettu yaḥ || 53 ||
[Analyze grammar]

ajāṃ ajāṃ prati vṛttiṃ kṣetraṃ gṛhaṃ dadecca yaḥ |
tasya dātuḥ kurukṣetre phalaṃ sūryagrahe tu yat || 54 ||
[Analyze grammar]

tasmāllakṣaguṇaṃ puṇyaṃ dadāmyekādaśīvrate |
ahaṃ nārāyaṇaścāsmi śāśvataḥ puṇyaśevadhiḥ || 55 ||
[Analyze grammar]

nā'nto'sti mayi puṇyānāṃ gṛhṇantu vṛṣṭivajjanāḥ |
saṃkalpo me puṇyabhūmirbhaktirme mokṣabhūmikā || 56 ||
[Analyze grammar]

saṃkalpasya ca bhakteścā'kṣayavārdhirahaṃ hariḥ |
dadāmyeva dadāmyeva riktatābhayavarjitaḥ || 57 ||
[Analyze grammar]

puruṣottamamāsasyaikādaśyāṃ vratakāriṇe |
sarvaṃ dadāmi conmattatyāgivat kamalāmapi || 58 ||
[Analyze grammar]

ahaṃ svayaṃ tu māṃ samarpaye kimuta cāparam |
vṛṇutā'to yatheṣṭaṃ vai vadāmi dundubhirhareḥ || 59 ||
[Analyze grammar]

etallābhaṃ na cedīyurnedṛśaḥ śāsyate punaḥ |
iti śrutvā dundubhiṃ tu puruṣottamaghoṣaṇām || 60 ||
[Analyze grammar]

cintayāmāsa mūrtiḥ sā janma lagnaṃ sutaṃ harim |
dundubhīśaṃ samapṛcchannatvā namrā vidhiṃ vrate || 61 ||
[Analyze grammar]

dundubhistu tadā prāha mūrtiṃ tvekādaśīvidhim |
snātvā brāhme muhūrte ca dhyātvā śrīpuruṣottamam || 62 ||
[Analyze grammar]

sarvopacārairanyūnaiḥ pūjayetparameśvaram |
mūrtiṃ tu pauraṭīṃ lakṣmīnārāyaṇasya śobhitām || 63 ||
[Analyze grammar]

satpātre pañcapātre vai nidhāya sopacārikām |
tato vratī jalapātraṃ sthāpayejjalasaddhaṭam || 64 ||
[Analyze grammar]

pañcāmṛtādi sannyasya pūjāṃ mūrtau samācaret |
prathamaṃ dehaśuddhyarthaṃ tryācamanāni kalpayet || 65 ||
[Analyze grammar]

tataḥ pūrve mukhaṃ kṛtvā niṣadya ca śubhāsane |
mūrtāvāvāhayet kṛṣṇanārāyaṇaṃ samantrakam || 66 ||
[Analyze grammar]

ghaṇṭāṃ pravādayedāvāhanakāle śubhasvarām |
āsanaṃ paṭṭikāṃ sthālīṃ svarṇāṃ dadyāttu śārṅgiṇe || 67 ||
[Analyze grammar]

pādaprakṣālanārthāya pādyaṃ dadyājjalaṃ śubham |
tatastīrthajalaṃ dadyādarghyaṃ pūjānimittakam || 68 ||
[Analyze grammar]

tatastīrthajalamācamanārthaṃ ca dadecchubham |
punaścā'tha praśuddhyarthaṃ dadyād darbhajalaṃ śubham || 69 ||
[Analyze grammar]

tato dantapraśuddhyarthaṃ dadyādvai dantadhāvanam |
jihvollekhanakāryārthaṃ dadyāt svarṇaśalākikām || 70 ||
[Analyze grammar]

tataḥ śuddhaṃ jalaṃ dadyād gaṇḍūṣārthe tataḥ punaḥ |
mukhaprakṣālanārthāya jalaṃ dadyātpunarnavam || 71 ||
[Analyze grammar]

atha śaucaṃ prakalpyaiva dadyājjalaghaṭaṃ tathā |
mṛdaṃ vāpi pradadyācca karādiśuddhihetave || 72 ||
[Analyze grammar]

jalaṃ śuddhaṃ tathā dadyāddhastaprakṣālanāya vai |
tataḥ śuddhaṃ jalaṃ dadyānmukhādikṣālanāya ca || 73 ||
[Analyze grammar]

svarṇāsanaṃ śubhaṃ dadyāt snānārthaṃ paṭṭikātmakam |
tailena tu sugandhena mardayetparameśvaram || 74 ||
[Analyze grammar]

āmalakaistilacūrṇaistathā saṃmardayeddharim |
tata uṣṇodakenāpi snāpayetpuruṣottamam || 75 ||
[Analyze grammar]

tato dugdhena dadhnā ca ghṛtena madhunā tathā |
snāpayeccharkarā vārbhiḥ samṛdya puruṣottamam || 76 ||
[Analyze grammar]

tataḥ śuddhajalairuṣṇaiḥ snāpayetparameśvaram |
tato nairmalyakāriṇyā proṣṇodakena miśrayā || 77 ||
[Analyze grammar]

hariṃ gūṭikayā''mṛdya snāpayedabhiṣecanam |
kastūrikācandanādipuṣpasārādi lepayet || 78 ||
[Analyze grammar]

vastreṇa mārjayet kṛṣṇaṃ dhautrāmbarāṇi dhārayet |
keśaprasādhanaṃ tailaṃ datvā kuryācca dantakaiḥ || 79 ||
[Analyze grammar]

lalāṭe tilakaṃ candraṃ kuryāccandanakuṃkumaiḥ |
netrayoḥ kajjalaṃ dadyādoṣṭhayoḥ raṃgarañjanam || 80 ||
[Analyze grammar]

hastapādatalādīni rañjayed raṃgasudravaiḥ |
svarṇakirīṭasadratnamālikākuṇḍalādikam || 81 ||
[Analyze grammar]

maṇimauktikahārādi raśanākaṃkaṇādikam |
ūrmikāśṛṃkhalāsatkiṃkiṇīnupūrakādikam || 82 ||
[Analyze grammar]

ābhūṣaṇāni sarvāṇi yathāsthānaṃ pradhārayet |
pādayoḥ pāduke dadyāddhastayoryaṣṭimālike || 83 ||
[Analyze grammar]

kaṇṭhe satpuṣpahārāṃśca tulasīpatramālikām |
puṣpāṇāṃ śekharān gucchānarpayetparamādarāt || 84 ||
[Analyze grammar]

pavitraṃ tvarpayed yajñopavītaṃ yogapaṭṭakam |
tulasīmaṇimālāṃ ca dadyānmaṃgalasūtrakam || 85 ||
[Analyze grammar]

kaustubhaṃ ca maṇiṃ dadyāt tathā rakṣāṃ prakoṣṭhake |
naktakaṃ hastake dadyāt prokṣayed gandhasārakam || 86 ||
[Analyze grammar]

rājādhirājasadveṣaṃ śṛṃgāraṃ kārayetparam |
chatraṃ ca cāmare dadyād vyajanaṃ vāyudaṃ tathā || 87 ||
[Analyze grammar]

darpaṇaṃ mukhalokārthaṃ dadyāt paryaṃkamityapi |
gendukaṃ pracchadapaṭīṃ kaśipuṃ guptadorakam || 88 ||
[Analyze grammar]

kapolakaśipuṃ dadyāt daṃśamaśakarodhinīm |
dhūpaṃ sugandhaṃ kṛtvā ca dīpaṃ prajvālayettathā || 89 ||
[Analyze grammar]

śvetacūrṇaṃ raktacūrṇaṃ kuṃkumaṃ cākṣatān dadet |
naivedyaṃ laḍḍukān miṣṭaṃ vividhānnaṃ supāyasam || 90 ||
[Analyze grammar]

śākāni cāranālāni dadhi dugdhaṃ saśarkaram |
sūpaudanādikaṃ dadyāt kvathikāṃ caṭanīṃ tathā || 91 ||
[Analyze grammar]

bhakṣyaṃ bhojyaṃ lehyacośye peyaṃ dadyājjalaṃ tathā |
culukaṃ kārayettāmbūlakaṃ cūrṇaṃ samarpayet || 92 ||
[Analyze grammar]

elālavaṃgadhānātvagvarīyaḥ pūgikāphalam |
dadyācca phalamāmrasya jambūpanasakādalam || 93 ||
[Analyze grammar]

drākṣāśrīphaladāḍīma navaraṃgādikaṃ dadet |
śuṣkaphalānyapi dadyād badāmakājukhārikāḥ || 94 ||
[Analyze grammar]

evaṃ samarpaṇaṃ kṛtvā hariṃ santarpya bhāvataḥ |
kadalīstambhavaśādikṛte vastrādiśobhite || 95 ||
[Analyze grammar]

aśokā''mradalapuṣpaphalatoraṇarājite |
maṇḍape madhyadeśe vai saptadhānyaiḥ kṛte śubhe || 96 ||
[Analyze grammar]

sarvatobhadrake tatra maṇḍale madhyavartini |
suvarṇasya ghaṭe tāmre tīrthavāriprapūrite || 97 ||
[Analyze grammar]

maṇimauktikasauvarṇarūpyatāmrādikānvite |
vastreṇa veṣṭite cāmrāśokādipallavānvite || 98 ||
[Analyze grammar]

suśobhite'kṣatacandanāktakuṃkumapūjite |
tatra ghaṭe sthāpitā yā sthālī tāmrā ca kānakī || 99 ||
[Analyze grammar]

khārikāmraphalaiḥ pūgīśrīphalaiḥ śarkarātilaiḥ |
pūritāyāṃ tu tasyāṃ vai sthāpayet puruṣottamam || 100 ||
[Analyze grammar]

nīrājayennavavāraṃ ghṛtāktapañcavartibhiḥ |
vastraṃ ca bhrāmayet paścācchaṃkhodakena vartayet || 101 ||
[Analyze grammar]

dhūpaṃ saṃbhrāmayeccāpi stutiṃ kuryād yatheṣṭadām |
namecca daṇḍavat kuryāt pañcavāraṃ pradakṣiṇam || 102 ||
[Analyze grammar]

kṣamāṃ yāceta cārghyaṃ vai saphalaṃ punararpayet |
puṣpāṃjaliṃ sākṣataṃ vai dadyācchrīharaye tataḥ || 103 ||
[Analyze grammar]

dakṣiṇāṃ kānakīṃ mudrāṃ rājataṃ cāpyupāyanam |
iṣṭaṃ vastu pradadyācca haraye tvabhivāñcchitam || 104 ||
[Analyze grammar]

āndolayrecca dolāyāṃ paryaṃke śayanaṃ dadet |
pādasaṃvāhanaṃ kuryād daded yānaṃ savāhanam || 105 ||
[Analyze grammar]

nṛtyaṃ kuryāt tathā gītaṃ vāditraṃ vādayet tathā |
caraṇāmṛtadānaṃ ca bhaktebhyastatra vartayet || 106 ||
[Analyze grammar]

athāpi jalapānaṃ ca kārayetpunarādarāt |
tāmbūlakaṃ punardadyādelālavaṃgakādikam || 107 ||
[Analyze grammar]

milet saṃśliṣya bāhubhyāṃ samāpīḍya hariṃ mudā |
prasthāpayet tato devaṃ dūraṃ gatvā visarjayet || 108 ||
[Analyze grammar]

āgantavyamiti brūyānnatvā tvāyātpunargṛham |
ityaṣṭottaraśatakopacāraiḥ parameśvaram || 109 ||
[Analyze grammar]

pūjayedbahubhaktyaikādaśyāṃ prātarvratī janaḥ |
yadi sampadadhikā syāddhomayajñādi kārayet || 110 ||
[Analyze grammar]

dvādaśyāṃ bhojayedviprān satīḥ sādhvī sato janān |
tataḥ svaḥ pāraṇāṃ kuryāt saṃbhojyāśritavargakān || 111 ||
[Analyze grammar]

dadyācchreṣṭhāni dānāni bhajeta śrīhariṃ mudā |
evaṃ madhyāhnake kuryāt sāyaṃ kuryāttathaiva ha || 112 ||
[Analyze grammar]

rātrau jāgaraṇaṃ kuryānnṛtyagītapuraḥsaram |
kīrtanaṃ śrīhareḥ kuryānnirundhyādindriyāṇi ca || 113 ||
[Analyze grammar]

evaṃ tvadhikamāsasyaikādaśīvratamatra yaḥ |
kuryāt tena kṛtaṃ sarvaṃ kartavyaṃ nāvaśiṣyate || 114 ||
[Analyze grammar]

adhimāsaścātipuṇyaḥ puṇyāḥ tvekādaśī tithiḥ |
taddevaḥ pāvanaścāhaṃ kiṃ tasmādatiricyate || 115 ||
[Analyze grammar]

adhimāso mama śālā vasāmi puruṣottamaḥ |
ekādaśī madutpannā kiṃ tasmādatiricyate || 116 ||
[Analyze grammar]

etat trikaṃ mahāpuṇyaṃ sarvebhyaḥ śreṣṭhatāṃ gatam |
tatrāpi matkṛpā prāptā kimasmādatiricyate || 117 ||
[Analyze grammar]

tasmādaṣṭottaraśatavastubhirmāṃ prapūjya ca |
gṛhṇantu bhavapāraṃ vā gṛhṇantu bhavasāmyatām || 118 ||
[Analyze grammar]

mūrte tvaṃ cādya divase tathāvidhi kuru vratam |
yena te dāsyate kṛṣṇo dundubhyātmā yathepsitam || 119 ||
[Analyze grammar]

mūrtiḥ prāha tadā hyenaṃ dundubhiṃ vinayena vai |
na madagre'sti sāmagryaḥ pracchannā'haṃ vasāmi ca || 120 ||
[Analyze grammar]

kathaṃkāraṃ tvaduktaṃ vai pūjanaṃ tu mayā bhavet |
icchāmyahaṃ śubhaṃ janma vivāhaṃ ca sutaṃ harim || 121 ||
[Analyze grammar]

durlabhaṃ tadvinā pūjā tādṛśī syānna cepsitam |
ityuktvā bhagnahṛdayā sāśrukaṇṭhā babhūva sā || 122 ||
[Analyze grammar]

ekādaśyā vrataṃ kāryamiti saṃkalpya śocati |
smṛtvā nārāyaṇaṃ kṛṣṇaṃ bālā tvaśrūṇi muñcati || 123 ||
[Analyze grammar]

tāvat kṛpānidhistatra harirnārāyaṇaḥ svayam |
kṛpāṃ kṛtvā dundubheragrataḥ suprakaṭo'bhavat || 124 ||
[Analyze grammar]

pramārjyā'śrūṇi kanyāyāḥ prāha mātarnamāmyaham |
śokaṃ mā kuru pūjyāsi yatheṣṭaṃ pradadāmyaham || 125 ||
[Analyze grammar]

bhāvenāsmi sadā tuṣṭo nā'bhāve tu kadācana |
tava bhāvena santuṣṭo dadāmi vṛṇu tadvaram || 126 ||
[Analyze grammar]

arcyate bhāvahīnena sahasravastubhiryadi |
na santuṣṭo bhavāmyatra bhāvahīne'rthasādhake || 127 ||
[Analyze grammar]

patrapuṣpajalaiścāpi bhāvabhaktyā madarcanam |
mama santoṣakṛt tatsyād bhāvasya kṣudhito'smyaham || 128 ||
[Analyze grammar]

aṣṭottaraśatasaṃkhyopacārairapi hārdikaiḥ |
mātaḥ sampūjaya tvaṃ māṃ dhyānamātreṇa cāntare || 129 ||
[Analyze grammar]

mānasaṃ pūjanaṃ te'haṃ svīkariṣye'tibhāvataḥ |
phalaṃ yatheṣṭaṃ te dāsye hyadyatanavratasya vai || 130 ||
[Analyze grammar]

ityuktvā śrīkṛṣṇanārāyaṇaḥ śrīpuruṣottamaḥ |
nanāma pādayormūrtermātṛbhāvena putravat || 131 ||
[Analyze grammar]

mātā śokaṃ vihāyaiva prasannā'bhūt hṛdantare |
provāca śanakaiḥ kṛṣṇaṃ janma cecchāmi laukikam || 132 ||
[Analyze grammar]

dharmeṇa patinā sākaṃ lagnamicchāmi vaidikam |
aṃke lālayituṃ putraṃ sutaṃ cecchāmyalaukikam || 133 ||
[Analyze grammar]

alaukikastvamevāsi vaktuṃ notsahate manaḥ |
niveditaṃ hṛdayyaṃ me yathecchasi tathā kuru || 134 ||
[Analyze grammar]

ityādiṣṭo hariḥ svābhilaṣitaṃ priyamuttamam |
mūrtermukhātsamākarṇya jaharṣa bhāvijanmadhṛk || 135 ||
[Analyze grammar]

uvācā'tiprasannaḥ san sarvaṃ mātarbhaviṣyati |
iṣṭaṃ sarvaṃ kariṣye'haṃ dadāmi vacanaṃ tu te || 136 ||
[Analyze grammar]

gaccha dakṣagṛhaṃ mūrte dharmamāpṛcchya satpatim |
bhava putrī tu dakṣasya sa te dharmāya dāsyati || 137 ||
[Analyze grammar]

ahaṃ bālasvarūpeṇa saha bhrātrā tvadaṃkake |
grahīṣyāmi janu mātaḥ śvo yāhi tvaṃ vratottaram || 138 ||
[Analyze grammar]

mānasī tvaṃ hi dakṣasya putrī vai bhāvinī tataḥ |
dharmo vivāhya mātastvāṃ himaśaile nivatsyati || 139 ||
[Analyze grammar]

ahaṃ te mānasastatra caturātmā sutaḥ svayam |
naro nārāyaṇaśceti hariḥ kṛṣṇaśca te gṛhe || 140 ||
[Analyze grammar]

ramiṣye sukhado brahmavrataṃ saṃdhārayan sadā |
lokakalyāṇasaṃkalpaṃ pūrayastava sannidhau || 141 ||
[Analyze grammar]

ityuktvā ca punarnatvā tiro'bhūtpuruṣottamaḥ |
mūrtiścāpi vrataṃ kṛtvā'rcanaṃ tatra ca mānasam || 142 ||
[Analyze grammar]

dvādaśyāṃ pāraṇaṃ kṛtvā prātaḥ kṛtvā'rcanaṃ hṛdi |
dharmadevasya saṃgṛhya śubhājñāṃ dakṣasadgraham || 143 ||
[Analyze grammar]

yayau jajñe ca saṃkalpādasiknyāṃ mānasī sutā |
śraddhāmaitryādikāścānyā dvādaśāpi prajajñire || 144 ||
[Analyze grammar]

trayodaśāpi dakṣeṇa dattā dharmāya putrikāḥ |
mūrterjātā naro nārāyaṇaḥ kṛṣṇo haristathā || 145 ||
[Analyze grammar]

lokānāṃ rakṣaṇārthāya kurvantastapa uttamam |
iti te kathitaṃ lakṣmi māse vai puruṣottame || 146 ||
[Analyze grammar]

vratasaṃkalpamātreṇa pūrṇaṃ vrataphalaṃ bhavet |
kiṃ punaḥ sāṃgavidhinā kartuḥ phale'vaśiṣyate || 147 ||
[Analyze grammar]

tasmādekādaśītulyaṃ vrataṃ nānyad bhaviṣyati |
śāśvatā'kṣayasatpuṇyapradaṃ mokṣapradaṃ tathā || 148 ||
[Analyze grammar]

yathālabdhopacāraistu prātaḥ saṃkalpya pūjanam |
vrataṃ cāpi kariṣyanti teṣāṃ gṛheṣvahaṃ sadā || 149 ||
[Analyze grammar]

vatsyāmyeva na sandehastadbhaktyā vaśyatāṃ gataḥ |
sukhayiṣye suto bhūtvā vratinau dampatī kulam || 150 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye dharmadevasya bhāvyaṃganayā mūrtyādhimāsaikādaśyāmaṣṭottaraśatamānasopacārairnārāyaṇapūjana vrate kṛte sati mūrterdakṣagṛhe janma dharmeṇa saha vivāhastato himālaye naro nārāyaṇaḥ kṛṣṇo hariścetiputracatuṣṭayaphalalābhaścetyādinirūpaṇanāmā tryadhikatriśatatamo'dhyāyaḥ || 1303 ||
[Analyze grammar]