Chapter 301

| śrīnārāyaṇa uvāca |
śrūyatāṃ ca tvayā lakṣmi puruṣottamayoginī |
puruṣottamamāsasya kathā divyā'ghanāśinī || 1 ||
[Analyze grammar]

parabrahmasakāśāttu vāsudevo vyajāyata |
vāsudevāt samabhavad bhūmākhyaḥ puruṣo'graṇīḥ || 2 ||
[Analyze grammar]

bhūmno'bhavad virāḍasya mukhādagnirajāyata |
agnerapatyaṃ lokeṣu hiraṇyaṃ viśrutaṃ triṣu || 3 ||
[Analyze grammar]

sṛṣṭyāraṃbhe na vai kaścidagneḥ satkāramācarat |
atyuṣṇatvād dāhakatvāt kṛṣṇavartmakṛtestathā || 4 ||
[Analyze grammar]

āśrayāpayiturbhasmīkaraṇaprakṛtestathā |
agnimetādṛśaṃ dṛṣṭvā brahmādyā api bāndhavāḥ || 5 ||
[Analyze grammar]

bhayaṃ prāptā na satkāraṃ sahavāsaṃ carantyapi |
bhojane tūtsave pāne dūraṃ kurvanti cā'nalam || 6 ||
[Analyze grammar]

trailokye nā''pa sa kvāpi viśrāntiṃ bhojanādikam |
sarvadigbhyaḥ sarvadehibhyastiraskāramāpya saḥ || 7 ||
[Analyze grammar]

kebhyaścittu sthalebhyaḥ sa prāptavāṃstāḍanādikam |
ato jvālādikaṃ tūṣṇaguṇaṃ jihvā nigūhya ca || 8 ||
[Analyze grammar]

anyairalakṣito vahnirlokālokācalaṃ yayau |
kṣudhitaḥ śikharaṃ lokālokācalasya jagdhavān || 9 ||
[Analyze grammar]

udare pacyamānaṃ tad putrarūpaṃ vyajāyata |
hiraṇyaṃ tattu saṃjātaṃ kāṃcanī bhūmikā tu sā || 10 ||
[Analyze grammar]

lokā'lokācalapārśve prakāśitā vyajāyata |
evaṃ sa parvate pradakṣiṇāṃ kurvan prayāti vai || 11 ||
[Analyze grammar]

bhavati kṣudhito yatra śṛṃgaṃ tatrā'tti pārvatam |
pacamānaṃ tu tatputrarūpeṇa jāyate tataḥ || 12 ||
[Analyze grammar]

evaṃ putrāḥ suvarṇāni samajāyanta sarvataḥ |
sarvatra kāñcanī bhūmirlokālokācalaṃ tvanu || 13 ||
[Analyze grammar]

sañjātā vartulākārā paścāt śṛṃgaṃ mahattamam |
brahmāṇḍasadṛśaṃ bhakṣayitvā pṛthvyāṃ samantare || 14 ||
[Analyze grammar]

madhyadeśe yayau divyānalastatrā'śramat kṣaṇam |
pacyamānaṃ mahacchraṃgaṃ putrarūpaṃ vyajāyata || 15 ||
[Analyze grammar]

suvarṇe tanmahāmerau vyāptaṃ cā'bhūt samantataḥ |
merustasmāt suvarṇasya prakhyātimagamattataḥ || 16 ||
[Analyze grammar]

jaḍaṃ sugandhahīnaṃ ca khanigrāvātmakaṃ guru |
yatra yatra patitaṃ tat tatra tatraiva saṃsthitam || 17 ||
[Analyze grammar]

vahneriva suvarṇasyāpi na mānaṃ kṛtaṃ janaiḥ |
kalpavṛkṣajavastvādyairnirvahanti hi dehinaḥ || 18 ||
[Analyze grammar]

kiṃ suvarṇaṃ ca kau vahnirityevaṃ nā'bhavaddhi dhīḥ |
kiṃ kāyaṃ vai suvarṇasya kiṃ kāryaṃ cā'nalasya vai || 19 ||
[Analyze grammar]

apyevaṃ nā'bhavatprajñā kalpavṛkṣabalāttadā |
suvarṇaṃ cā'nalaścobhau mūlyahīnau śuśūcatuḥ || 20 ||
[Analyze grammar]

athātra khalu nāsmākaṃ brahmāṇḍesti parīkṣakaḥ |
vinā prayojanaṃ naiva mūlyaṃ kasyāpi jāyate || 21 ||
[Analyze grammar]

tṛṇaṃ prāpte'pi samaye koṭisvarṇasamaṃ bhavet |
agnirvai śaityakalahe bahumūlyo'bhijāyate || 22 ||
[Analyze grammar]

tyaktaṃ mayūrapicchaṃ tu goloke kṛṣṇasaṃdhṛtam |
svasyaiva makuṭe tena pūjyatāṃ mūlyatāṃ gatam || 23 ||
[Analyze grammar]

brahmaṇā vidhṛtaṃ gaṃgājalaṃ purā kamaṇḍalau |
visṛṣṭaṃ mūlyavajjātaṃ mahadbhūtaṃ hi mūlyavat || 24 ||
[Analyze grammar]

kaṃkaraḥ khalu kṛṣṇena dhṛto vakṣasi mūlyavāna |
na dhṛtaḥ kardamaḥ kaiścinmūlyaṃ nāpto manāgapi || 25 ||
[Analyze grammar]

tasmādahaṃ mahānagnirmama putraḥ suvarṇakam |
vinā prayojanaṃ yadvā mahadbhiḥ saṃdhṛtiṃ vinā || 26 ||
[Analyze grammar]

mūlyavantau na vai syāva duḥkhaṃ tadvai mahattamam |
guṇināṃ gaṇanāraṃbhe yadyaṃgulirna tiṣṭhati || 27 ||
[Analyze grammar]

varaṃ tasyātra mṛtyurvai prāṇanaṃ kleśadaṃ vṛthā |
vidyā vā rājyasattā vā siddhiraiśvaryameva vā || 28 ||
[Analyze grammar]

khyātirvā dhanitā vāpi bhaktirvā jīvane varam |
tadvihīnena martavyaṃ mariṣyāvastato'dya vai || 29 ||
[Analyze grammar]

iti vicārya vahnistatputro yayaturuccakaiḥ |
merostu śikhare tasmātpātena maraṇārthinau || 30 ||
[Analyze grammar]

tāvat tatra satyaloke ghoṣayan dundubhirhareḥ |
tābhyāṃ śruto'dhike māse śokaṃ kurvantu mā janāḥ || 31 ||
[Analyze grammar]

nārāyaṇaṃ tu saṃsmṛtya navamyāmadya ye janāḥ |
kariṣyanti vrataṃ pūjāṃ teṣāmiṣṭaṃ bhaviṣyati || 32 ||
[Analyze grammar]

ekabhuktena naktena tathaivā'yācitena vā |
phalena payasā tvadya dvikālaṃ tvaikakālikam || 33 ||
[Analyze grammar]

vrataṃ kṛtvā'rcanaṃ kṛtvā kṛṣṇasya śaraṇāgatāḥ |
api cette mānahīnā daridrā niṣprayojanāḥ || 34 ||
[Analyze grammar]

gaṇanāhīnakāścāpi yāsyanti cottamaṃ padam |
ahaṃ vai dundubhirvacmi puruṣottamadeśanām || 35 ||
[Analyze grammar]

duḥkho vā kleśasandṛbdho'titiraskṛta eva vā |
asthāno vā'lpamūlyo vā jaḍo vā tūgra eva vā || 36 ||
[Analyze grammar]

yaḥ kaściccharaṇaṃ prāpyā'dhikamāse vrataṃ caret |
vidhūya tasya duḥkhāni kariṣyāmyavanaṃ sadā || 37 ||
[Analyze grammar]

puruṣottamamāsasya mānakṛnmānya eva me |
puruṣottamamāse vai puṇyakṛtpūtatāṃ vrajet || 38 ||
[Analyze grammar]

mamā'rcanaprakartā'tra sarvā'rcyatāmavāpnuyāt |
yasya vai rakṣitā ko'pi bhavatyeva na vai kvacit || 39 ||
[Analyze grammar]

cet sa rakṣatyadhimāsaṃ tathā māṃ puruṣottamam |
rakṣayiṣye tu tamahaṃ vadāmi puruṣottamaḥ || 40 ||
[Analyze grammar]

pūjayantu ca māṃ bhaktyā bhojayantu supāyasam |
prārthayantu yatheṣṭaṃ ca matto gṛhṇantvabhīṣṭakam || 41 ||
[Analyze grammar]

anugraheṇa dātāsmi tvakṛtasyāpi ceṣṭadaḥ |
alpasya bahudaścāpi gṛhṇantu puruṣottamāt || 42 ||
[Analyze grammar]

adya ye na kariṣyanti vrataṃ vā varaṇaṃ ca vā |
teṣāṃ hāniralābhaśca nānyaḥ kaścidato'dhikaḥ || 43 ||
[Analyze grammar]

tasmādāyāntu gṛhṇantu varān kuvantu pūjanam |
ācarantu malamāse navamyāṃ vratamuttamam || 44 ||
[Analyze grammar]

pradātā'smi samṛddho'smi samudāro'smi sarvathā |
dundubhiḥ pravadāmyatra nārāyaṇāntarātmakaḥ || 45 ||
[Analyze grammar]

nārāyaṇasvarūpo'haṃ puruṣottamadeśanaḥ |
prasannaṃ dāsabhaktaṃ vā karomi puruṣottamam || 46 ||
[Analyze grammar]

patraṃ puṣpaṃ phalaṃ toyaṃ yo mayi sanniyokṣyate |
ahaṃ tasminniyokṣyāmi śreṣṭhaṃ ratnādikaṃ punaḥ || 47 ||
[Analyze grammar]

bhojyaṃ bhakṣyaṃ tathā lehyaṃ coṣyaṃ yo me'rpayiṣyati |
tasmai koṭiguṇitaṃ tadarpayiṣye'pyahaṃ tathā || 48 ||
[Analyze grammar]

yasya draṣṭā''śrayadātā poṣṭā mānayitā'vitā |
ko'pi nāsti tu tasyā'haṃ sarvakartā'vitā'smi vai || 49 ||
[Analyze grammar]

āgacchantu mahābhāgāḥ satkṛtā vā'pyasatkṛtāḥ |
bālā vā bālikā vāpi yuvatyaḥ sadhavā'dhavāḥ || 50 ||
[Analyze grammar]

yuvāno bhāgyavanto vā bhāgyahīnā daridrakāḥ |
vṛddhā palitavalyaṃgāḥ sucittā vā'pyacittakāḥ || 51 ||
[Analyze grammar]

tṛtīyaprakṛtivyāptā nāmasaṃjñāvihīnakāḥ |
sthāvarā jaṃgamāḥ ke'pi jaḍā vā jaḍasannibhāḥ || 52 ||
[Analyze grammar]

tiryañco'pi vivarasthā gartasthāḥ khanikhātajāḥ |
mukhajāḥ pṛṣṭhajāścāpi malajā amalodbhavāḥ || 53 ||
[Analyze grammar]

malamāsaṃ samāśritya toṣayitvā pumuttamam |
pārameṣṭhyapadaṃ yāntu yāntu vā'kṣaradhāma tat || 54 ||
[Analyze grammar]

svarge sukhaṃ paraṃ yāntu yāntu śrīpuruṣottamam |
sutaṃ yāntu patiṃ yāntu patnīṃ yāntu ca padminīm || 55 ||
[Analyze grammar]

gṛhaṃ kīrtiṃ dhanaṃ yāntu yāntu śāśvatapūjanam |
sarvādhikyottamasthānaṃ gṛhṇantvanugrahānmama || 56 ||
[Analyze grammar]

ityudārāṃ ghoṣaṇāṃ saṃśrutvā'gniśca suvarṇakam |
lebhāte sma mahādhairyaṃ śokaṃ tatyajatustataḥ || 57 ||
[Analyze grammar]

meroḥ śṛṃge satyaloke dundubhiṃ śaraṇaṃ gatau |
natvā ca dundubhiṃ tasya pūjāṃ cakraturādarāt || 58 ||
[Analyze grammar]

vahninā tu sutaṃ svarṇaṃ dundubhestasya pādayoḥ |
akārayannatiṃ tāvad dṛṣṭvā rūpottaraṃ sutam || 59 ||
[Analyze grammar]

dundubhinā samuttolya gṛhītvā karayonije |
mastake ca tathā skandhe kṣaṇaṃ suvarṇako dhṛtaḥ || 60 ||
[Analyze grammar]

arpito vahnaye paścād vahniḥ prāha sagadgadaḥ |
nāvayoḥ rakṣitā ko'pi satkartā'pi na vidyate || 61 ||
[Analyze grammar]

mahadduḥkhamanubhūya mṛtyvarthaṃ tvāgatāvubhau |
dundubhe yadi te vākyād vrataṃ kurvo'dya naktakam || 62 ||
[Analyze grammar]

pūjanaṃ ca hareḥ kurvo rakṣitā cedbhaveddhariḥ |
evaṃ saṃvadatornetrādaśravo nyapatan bhuvi || 63 ||
[Analyze grammar]

rajataṃ tatsamutpannaṃ sthale sthalyāṃ samujjvalam |
vīkṣyaivaṃ bhagnahṛdayaṃ dayamānaṃ mahānalam || 64 ||
[Analyze grammar]

saputraṃ dundubhistaṃ cā''śvāsayāmāsa sadgirā |
navamyāṃ adhimāsasya vrataṃ kuruta naktakam || 65 ||
[Analyze grammar]

pūjāṃ kuruta vai kṛṣṇanārāyaṇasya cādya ha |
sauvarṇīṃ pratimāṃ kārayitvā nārāyaṇasya ca || 66 ||
[Analyze grammar]

pañcāmṛtena saṃsnāpya samarcyā'kṣatacandanaiḥ |
vibhūṣya svarṇabhūṣābhirhārairmālābhirityapi || 67 ||
[Analyze grammar]

sadratnairambarairdravyairvibhinnairbhojanaiḥ phalaiḥ |
jalaistāmbūlapānaiśca dhūpadīpapradakṣiṇaiḥ || 68 ||
[Analyze grammar]

toṣayitvā'rthayed devaṃ kṛṣṇaṃ śrīpuruṣottamam |
asatkṛtamanādhāramanādṛtamanāśrayam || 69 ||
[Analyze grammar]

kṣudhitaṃ tṛṣitaṃ dveṣyaṃ dāhakaṃ māṃ samuddhara |
jaḍaṃ nirgandhamatiṃ vai guruṃ prastararūkṣakam || 70 ||
[Analyze grammar]

nirguṇaṃ cetanāhīnaṃ vā'kiñcitkaramityapi |
samuddhara kṛpāsindho gaṇanāṃ prāpaya prabho || 71 ||
[Analyze grammar]

evaṃ stutiṃ prakuryācca śrīphalārghyaṃ samarpayet |
puṣpāṃjaliṃ pradadyācca natvā nāthaṃ visarjayet || 72 ||
[Analyze grammar]

madhyāhne'pi tathā kuryāt kuryānniśīthake tathā |
savādyanartanagītairnīrājayedvisarjayet || 73 ||
[Analyze grammar]

evaṃ kuru kṛśāno tvaṃ hāṭaka tvaṃ tathā kuru |
nārāyaṇaḥ prasannaḥ san yuvāmuddhārayiṣyati || 74 ||
[Analyze grammar]

ityāśrutya mahādundubhyuktaṃ nārāyaṇoditam |
vahniścakāra sauvarṇīṃ mūrtiṃ nārāyaṇasya vai || 75 ||
[Analyze grammar]

lakṣmyā mūrtiṃ cakārā'tha pūjayāmāsatuśca tau |
pitā putraśca vidhivad vrataṃ nakta pracakratuḥ || 76 ||
[Analyze grammar]

rātrau prārthayato yāvat kṛṣṇanārāyaṇaṃ harim |
lakṣmīsamanvitaṃ tāvat prādurbabhūva cāgrataḥ || 77 ||
[Analyze grammar]

tejaḥparidhi saṃvyāptānanaṃ lakṣmīprasevitam |
mandaṃ mandaṃ hasantaṃ taṃ vilokya puruṣottamam || 78 ||
[Analyze grammar]

vahnisvarṇau prārthayataḥ kṛpānātha samuddhara |
ūṣṇasvabhāvayuktasya dāhakasya mama sthalam || 79 ||
[Analyze grammar]

nāsti kutrāpi tannātha dehi me bhojanaṃ tathā |
mūlyaṃ mūrkhasya putrasya suvarṇasya tu nāsti vai || 80 ||
[Analyze grammar]

prastarasya na satkāro dṛśyate tadyaśaḥ kuru |
sarvadā tava sevāṃ ca pradehi bhagavan vibho || 81 ||
[Analyze grammar]

śaraṇe te'smi patito māmuddhara saputrakam |
ityarthito harikṛṣṇo vahniṃ prāha narāyaṇaḥ || 82 ||
[Analyze grammar]

śokaṃ tyaja kṛśāno tvaṃ tuṣṭo'smi tvadvratena vai |
mamā''nanāt samutpannaḥ sadā tvastu mamānanam || 83 ||
[Analyze grammar]

varaṃ dadāmyahaṃ putra yajñādau bhojanaṃ tvayi |
sthāpayiṣyanti ye hoṣyantyanale kuṇḍamadhyage || 84 ||
[Analyze grammar]

agnihotrasya havanaṃ tvayi nyasyanti ye janāḥ |
tvaddvārā tanmayā sarvaṃ jakṣitavyaṃ na cā'nyathā || 85 ||
[Analyze grammar]

vahni vinā janā ye me dāsyanti bhojanādikam |
tadahaṃ na grahīṣyāmi sarvathā'nugrahāt tvayi || 86 ||
[Analyze grammar]

adyadinādahaṃ loke'gnimukho bhagavāniti |
khyātiṃ yāsye janāstena madarthe bhojanādikam || 87 ||
[Analyze grammar]

tvayi kṣepsyanti tatsarvaṃ bhakṣayiṣyāmi tvanmukhāt |
śamīṣvadṛśyarūpeṇa tava vāso viśeṣataḥ || 88 ||
[Analyze grammar]

hīrakādiṣu tadvacca sarvatrā'stu tavā''śrayaḥ |
yathā vastupradahanaṃ na syādvāsastathā tava || 89 ||
[Analyze grammar]

sarvatrā'stu kṛśāno tvaṃ sukhī bhava janādiṣu |
sammānaṃ sarvathā te'stu satkāraḥ sarvathā tava || 90 ||
[Analyze grammar]

kalpavṛkṣalaye kāle cūlyādau pācanāya vai |
prajvālanaṃ tavaivā'stu sarvathaiva gṛhe gṛhe || 91 ||
[Analyze grammar]

cintāmaṇyādi nāśe tu pradīpasya gṛhe gṛhe |
sammānaṃ sarvathā te syād dhairyamāvaha tāvatā || 92 ||
[Analyze grammar]

dvitīyena ca divyena rūpeṇa pārṣadena me |
dhāmni sevāṃ vaha nityaṃ vahne mukto'si me'nagha || 93 ||
[Analyze grammar]

prathame yugaparyāye vyatīte tvanalaṃ vinā |
kāryaṃ kimapi sarveṣāṃ bhaviṣyati na vai tadā || 94 ||
[Analyze grammar]

tava mūlyaṃ ca sammānaṃ satkārādarapūjanam |
parākāṣṭhāgataṃ sarve bhaviṣyati na saṃśayaḥ || 95 ||
[Analyze grammar]

suvarṇo'yaṃ ca te putro mamā'tivallabhaḥ khalu |
adyārabhya mayā svasya mastake dhārya eva ca || 96 ||
[Analyze grammar]

mukuṭo'yaṃ tu me hyastu bhavatāṃ kuṇḍale mama |
mama bhūṣāsvarūpo'stu śṛṃkhalākaṭakormikāḥ || 97 ||
[Analyze grammar]

raśanāhārapātrāṇi svarṇo'stu sarvavastukaḥ |
mayā dhṛtastava putro mastake mukuṭātmakaḥ || 98 ||
[Analyze grammar]

so'tha sarvatra satkāraṃ yāsyati kālanirgame |
samūlyaśca sugūhyaśca saṃrakṣyaśca bhaviṣyati || 99 ||
[Analyze grammar]

kalpavṛkṣādivilaye kalpadruḥ sa bhaviṣyati |
kiñca divyaṃ svarūpaṃ vai suvarṇāya dadāmi ha || 100 ||
[Analyze grammar]

mūlarūpeṇa me dhāmni seviṣyate sa māṃ sadā |
hāṭakākhyaḥ pārṣado me'kṣare dhāmni nivatsyati || 101 ||
[Analyze grammar]

atha kālāntare kāryāvaśyakatve'nalātmakaḥ |
mahātejomayaḥ so'yaṃ hāṭakeśvarasaṃjñakaḥ || 102 ||
[Analyze grammar]

pātāle ca pṛthivyāṃ ca mahādevo bhaviṣyati |
mamā'vatāraḥ sarvatra pūjāṃ prāpsyati madbalāt || 103 ||
[Analyze grammar]

bhaktānāṃ muktidātā ca bhaviṣyati maheśvaraḥ |
sarvabrahmāṇḍasṛṣṭau ca khyātiṃ tvamiva yāsyati || 104 ||
[Analyze grammar]

yathāhaṃ bhagavān vyāptastathā vahniḥ suvarṇakam |
vyāptiṃ yāsyati sṛṣṭau me satkāraṃ ca prayāsyati || 105 ||
[Analyze grammar]

rakṣaṇaṃ cāpi saṃsthānaṃ sarvaṃ bhaviṣyati dhruvam |
ityuktvā ca tayordivye rūpe kṛtvā hariḥ svayam || 106 ||
[Analyze grammar]

nināya svālayaṃ cānye rūpe vastuṣu vāsite |
etadrūpaṃ ca vṛttāntaṃ parijñāya surādayaḥ || 107 ||
[Analyze grammar]

vahnidvārā bhakṣayanti tṛpyanti tatra bhojanāt |
suvarṇasya vibhūṣāśca dhārayanti sthale sthale || 108 ||
[Analyze grammar]

evaṃ vahnistathā svarṇo navamīpūjanaṃ vratam |
kṛtvā muktau praśastau saṃmūlyakau ca babhūvatuḥ || 109 ||
[Analyze grammar]

pāvitryaṃ sarvadā prāptau yatra kvāpi gatau hi tau |
vṛddhiṃ ca sarvadā prāptau tathā sukhaṃ tu śāśvatam || 110 ||
[Analyze grammar]

navamyāstu vratākhyānaṃ paṭhiṣyanti tu ye janāḥ |
śroṣyanti vā narā nāryo yāsyanti bhuktimokṣaṇe || 111 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne puruṣottamamāsamāhātmye virāṭaputrasya vahnestatputrasuvarṇasya ca dāhakatvajaḍatvādidoṣānvitasya kalpavṛkṣāśritajanatābhiranādare kṛte merau maraṇonmukhasya dundubhiśravaṇe'dhimāsanavamīvratapūjanakaraṇena yajñādau sarvamānyatābhagavanmukhatā bhagavadābhūṣaṇarūpatā dhāmaprāptirdivyapārṣadatā cetyādinirūpaṇanāmaikādhikatriśatatamo'dhyāyaḥ || 1301 ||
[Analyze grammar]