Chapter 287

śrīnārāyaṇa uvāca |
tasminnavasare tveva lakṣmi rukmāṃgado nṛpaḥ |
bhogāṃstu mānuṣān bhuktvā hariṃ sampūjya keśavam || 1 ||
[Analyze grammar]

kṛtvā śūnyaṃ yamapathaṃ jitvā vaivasvataṃ yamam |
vaikuṇṭhasya tu panthānaṃ kṛtvā pūrṇaṃ tu mānavaiḥ || 2 ||
[Analyze grammar]

dharmāgadaṃ samāhūya dātuṃ rājyamabhāṣata |
etāṃ vasumatīṃ putra saptasāgaramekhalām || 3 ||
[Analyze grammar]

pālaya tvaṃ rājyadhuraṃ gṛhāṇa ca madarpitām |
putre yogye suniṣpanne dhuraṃ yo na samarpayet || 4 ||
[Analyze grammar]

kleśavāhī sa janako dharmakīrtipravicyutaḥ |
putraśaktyaprasaṃpoṣṭā nonnatiṃ yāti vṛddhakaḥ || 5 ||
[Analyze grammar]

kāryakṣamaḥ sutaścāpi bhāraṃ nodvahate tu yaḥ |
svakartavyacyutaḥ so'pi duḥkhī bhavati vṛddhakaḥ || 6 ||
[Analyze grammar]

pitā yena na tuṣyet sa putro yātyeva rauravam |
pitā yena tu santuṣṭaḥ sutaḥ saḥ svargabhājanam || 7 ||
[Analyze grammar]

kṛtaṃ rājyaṃ prajāścānunītā viṣṇuparāyaṇāḥ |
athā''sādya vinirvṛttiṃ gamiṣye'raṇyamekalaḥ || 8 ||
[Analyze grammar]

girīn vanāni saritaḥ sarāṃsi vividhāni ca |
taptukāmo lokayiṣye bhāraṃ tvayi niveśya vai || 9 ||
[Analyze grammar]

śrūtvā dharmāṃgadaḥ prāha pitā prokto janārdanaḥ |
piturvākye mahat svargaṃ mokṣaścājñākare pituḥ || 10 ||
[Analyze grammar]

na hi putrasyā'nyadharmaḥ pitrājñākaraṇaṃ vinā |
pitṛvākyamakurvāṇaḥ sudharmiṣṭho'pyadho vrajet || 11 ||
[Analyze grammar]

tasmāt kariṣye vacanaṃ bhavatsantoṣahetave |
gurvīṃ rājyadhuraṃ tāta tvadīyāmuddharāmyaham || 12 ||
[Analyze grammar]

śrutvaivaṃ putravākyaṃ sa rājā tuṣṭo babhūva ha |
prāha sandhyāvalīṃ patnīṃ sthitāṃ lakṣmīmivā'parām || 13 ||
[Analyze grammar]

śṛṇu patnī tvahaṃ dhanyastvaṃ ca dhanyā sutena vai |
karṇābhyāṃ śrūyate mokṣaḥ sa prāptaḥ satsutena vai || 14 ||
[Analyze grammar]

putre vinayasampanne vṛttaśauryasamanvite |
pratāpini praṇiṣpanne piturmokṣo gṛhe dhruvaḥ || 15 ||
[Analyze grammar]

śatānandapradaḥ putrastārayatyeva bījadam |
jananīṃ tārayeccātrā''vābhyāṃ prāptastathā sutaḥ || 16 ||
[Analyze grammar]

rājyabhāraṃ nyasya putre tvāṃ cāpi nyasya rakṣaṇe |
gamiṣye'raṇyavāsārthaṃ saṃsmṛtya prākparamparām || 17 ||
[Analyze grammar]

kālaśeṣaṃ kṣapayiṣye pravāsye'nte harergṛham |
sukhinī bhava putreṇa jñānenā''tmaviniṣṭhayā || 18 ||
[Analyze grammar]

mā viyoge kuru duḥkhaṃ patyājñāṃ pārameśvarīm |
matvā strītvād gṛhe tiṣṭha kalyāṇaṃ te bhaviṣyati || 19 ||
[Analyze grammar]

śrutvā sandhyāvalī prāha satyamuktaṃ tvayā nṛpa |
bhogād vairāgyamāpannaḥ sevasva munisajjanān || 20 ||
[Analyze grammar]

prasannā'smi tavā''jñāyāṃ pātivratyaṃ tavā''dare |
sarvathā'stu tava toṣo manmokṣe vai sahāyakṛt || 21 ||
[Analyze grammar]

prajāścāpi samāpṛcchya kṣiptvā dhuraṃ svaputrake |
dhurāmādṛtya bhūṣālo datvā svaṃ dakṣiṇa karam || 22 ||
[Analyze grammar]

hayamāruhya rājā sa yayau raivatakānanam |
patnīvratā'bhidhaviprā''śramaṃ tvaśvasaro'ntikam || 23 ||
[Analyze grammar]

praviveśātiramyaṃ satkadalīkhaṇḍamaṇḍitam |
aśokabakulopetaṃ punnāgasaralāvṛtam || 24 ||
[Analyze grammar]

āmrarāyaṇajāmbvādikṣīrikākarmadānvitam |
kapitthapippalīkharjūranārikelaketakaiḥ || 25 ||
[Analyze grammar]

śrīvṛkṣatālapanasaiścandanaiḥ sālacampakaiḥ |
kramukairdāḍimairvaṃśairdhātrīnimbaiśca śobhitam || 26 ||
[Analyze grammar]

stambavallītṛṇairvyāptaṃ sasyadhānyāḍhyabhūtalam |
samprapaśyan muniṃ rājā dadarśa hutabhukprabham || 27 ||
[Analyze grammar]

patnīvratākhyavipraṃ saḥ praṇanāma tu sādaram |
muninā''tithyasatkāraiḥ pūjitaḥ prāha bhūpatiḥ || 28 ||
[Analyze grammar]

adya me pātaka kṣīṇaṃ prāptaṃ satkarmaṇāṃ phalam |
dṛṣṭaṃ tava padāmbhojaṃ tvāyatiḥ śreyasā'nvitā || 29 ||
[Analyze grammar]

patnīvratastataḥ prāha rājan janma phalīkṛtaḥ |
tvādṛśenātipuṇyenāśramo me vīkṣito'dhunā || 30 ||
[Analyze grammar]

yamamārgaṃ vinirjitya riktaṃ kṛtvā ca nārakam |
prāpito yena vai loko vaikuṇṭhapadamavyayam || 31 ||
[Analyze grammar]

so'smākaṃ draṣṭukāmānāṃ cakṣuṣorviṣayaṃ gataḥ |
śvaco'pi mahīpāla viṣṇubhakto dvijādhikaḥ || 32 ||
[Analyze grammar]

tvaṃ tu bhāgavataśreṣṭhaḥ prapūnāsi mahītalam |
sukhamāsvā''śrame ramye vada vedyaṃ mayā'sti yat || 33 ||
[Analyze grammar]

jalapānaṃ kuru kṣmeśa phalaṃ bhuṃkṣvā''śramocitam |
sarvaṃ te kuśalaṃ nvasti sukhyāśrame vasan bhava || 34 ||
[Analyze grammar]

rājā satkāramādāya tvuvāca munisattamam |
kṛpayā te ṛṣe sarvaṃ kuśalaṃ modate mama || 35 ||
[Analyze grammar]

putraścā''jñākaraḥ samrāṭ sevako vijayī kṣiteḥ |
khyāto mamādhiko jātaḥ saptadvīpaprapālane || 36 ||
[Analyze grammar]

ekāhnā pṛthivīṃ sarvāmatītya bahuvistarām |
punarāyāti śarvaryāṃ matpādābhyaṃgakāraṇāt || 37 ||
[Analyze grammar]

tathā'yaṃ me śubho dehaḥ sarvarogavivarjitaḥ |
aprameyaṃ mama sukhaṃ vaśagā ca priyā gṛhe || 38 ||
[Analyze grammar]

yā vilokayate dṛṣṭyā māṃ sadā manmathā'dhikam |
yatra yatra padaṃ devī vidadhāti sulakṣaṇā || 39 ||
[Analyze grammar]

tatra tatra nidhānāni prakāśayati medinī |
yasyāstvaṃgaṃ jarāhīnaṃ vartate navayauvanam || 40 ||
[Analyze grammar]

vinā'gninā'pi sā vipra sādhayatyeva ṣaḍrasam |
annaṃ pacati yatsvalpaṃ tasmin bhuñjanti koṭayaḥ || 41 ||
[Analyze grammar]

vājino vāraṇāścāpi dhanadhānyamanantakam |
vartate ca janaḥ sarvo mamā''jñayā harervrate || 42 ||
[Analyze grammar]

ityetat kuśalaṃ sarvaṃ kena puṇyena me'sti vai |
vada vicārya me puṇyaṃ kṛtaṃ tvatra paratra vā || 43 ||
[Analyze grammar]

śrutvaitad brāhmaṇaḥ patnīvrataḥ prāgjanmasaṃcitam |
cintayitvā nṛpaṃ prāha śūdro'bhūtvaṃ purā janau || 44 ||
[Analyze grammar]

duṣṭayā bhāryayā sākaṃ dāridryeṇa suduḥkhitaḥ |
kadācid dvijasaṃsargāt tīrthayātrāṃ gato bhavān || 45 ||
[Analyze grammar]

mathurāyāṃ tu viśrāntighaṭṭe yāmunake hrade |
snātvā vārāhanilaye kathāṃ śuśrāva puṇyadām || 46 ||
[Analyze grammar]

aśūnyaśayanavrataviṣayāṃ haritoṣaṇīm |
caturbhiḥ pāraṇairyasya vratasya pūrṇatā bhavet || 47 ||
[Analyze grammar]

tatkṛtaṃ bhavatā rājan tvatpatnyā ca vrataṃ gṛhe |
śrāvaṇasya tu māsasya dvitīyāyāṃ mahīpate || 48 ||
[Analyze grammar]

grāhyametad vrataṃ puṇyaṃ janmamṛtyujarāharam |
rājyadaṃ putradārādipradaṃ sampatkaraṃ śubham || 49 ||
[Analyze grammar]

ekabhuktaṃ prakartavyaṃ māsaikyaṃ vratinā tathā |
nityaṃ viṣṇuḥ pūjanīyo lakṣmībhartā prage niśi || 50 ||
[Analyze grammar]

phalaiḥ puṣpaistathā dhūpaiścāruraktānulepanaiḥ |
śayyādānairvastradānaistathā brahmiṣṭhabhojanaiḥ || 51 ||
[Analyze grammar]

yadvā māse tu saptāhaṃ pratyupoṣaṇamācaret |
saptāhānte pāraṇaṃ vai kuryāt sādhvadanottaram || 52 ||
[Analyze grammar]

evaṃ tu pāraṇācatuṣṭayaṃ māse vidhāpayet |
aśaktaścet pratyahaṃ tu dugdhena vartayed vratī || 53 ||
[Analyze grammar]

śayane śubhaparyaṃke lakṣmīṃ dadyāttu viṣṇave |
śayanaṃ tu vinā lakṣmīṃ śūnyaṃ viṣṇorbhavedataḥ || 54 ||
[Analyze grammar]

salakṣmīkaṃ tu śayanamaśūnyaśayanaṃ bhavet |
yathā rājñyāśca rājñaśca sevakā nityamācaret || 55 ||
[Analyze grammar]

kaiṃkaryaṃ vividhaṃ sarvaṃ dadyātsarvaṃ śrīviṣṇave |
tadā sarvaṃ tamāpnoti vratī janmāntare dhruvam || 56 ||
[Analyze grammar]

tattvayā prāgjanau sarvaṃ kṛtaṃ sodyāpanaṃ yataḥ |
prāptaṃ tvatra mahad rājyaṃ puṣṭyā dānaphalaṃ hi tat || 57 ||
[Analyze grammar]

lakṣmīdānaṃ viṣṇave tu śayane dattavān bhavān |
rājñī prāptā tvayā tasya phalena devatā yathā || 58 ||
[Analyze grammar]

yānavāhanasaudhādi dānārthaṃ kalpitaṃ tvayā |
na tu dattaṃ tathāpyatra prāptaṃ saṃkalpajaṃ phalam || 59 ||
[Analyze grammar]

putraḥ prāptastvayā rājan viṣṇulakṣmīprasādataḥ |
piturvacanakārī vai manovākkāyaśaktitaḥ || 60 ||
[Analyze grammar]

jāyate'syā'hanyahani snānaṃ bhāgīrathībhavam |
tasmāt pūrvaṃ kṛtaṃ dattaṃ paścājjanmani labhyate || 61 ||
[Analyze grammar]

iti te kathitaṃ vṛttaṃ kimanyat karavāṇi te |
śrutvā prāha tadā rājā raivate bhavadarśanam || 62 ||
[Analyze grammar]

kartumicchāmi viprendra yadyājñā bhavato bhavet |
ṛṣiḥ svastyastu te rājan gaccheti prāha cāśiṣā || 63 ||
[Analyze grammar]

rājā turaṃgamāruhya natvā śīghragatiryayau |
raivatādrau bhavanāthaṃ śaṃkaraṃ yatra mohinī || 64 ||
[Analyze grammar]

pratīkṣate tu rājānaṃ gānaṃ miṣṭaṃ karoti sā |
susvaraṃ tanmahārājo lakṣyīkṛtya yayau puraḥ || 65 ||
[Analyze grammar]

mṛgīkuṇḍe sthitāṃ taptasuvarṇābhāṃ tu kāminīm |
ūnaṣoḍaśavarṣīyāṃ vahnijāmiva rūpiṇīm || 66 ||
[Analyze grammar]

dṛṣṭvaiva mohamāpanno viddhaḥ kāmaśareṇa ca |
kāmajvarābhibhūtaḥ saḥ sasarpā'syāḥ samīpakam || 67 ||
[Analyze grammar]

jñātvā ceyaṃ ca taṃ kṣmāpaṃ kaṭākṣāni mumoca ha |
netragaṇḍabhujāvakṣaḥkuṃbhā'dharanitambakān || 68 ||
[Analyze grammar]

pradhunvānā sumugdheva jagāma nṛpateḥ puraḥ |
rukmāṃgadaṃ kāmataptaṃ prāhottiṣṭha vaśe tava || 69 ||
[Analyze grammar]

vartāmi ca karomyeva yadā diśa vane'tra mām |
yadivātrchā surate'sti bhuṃkṣva māṃ ratidāsikām || 70 ||
[Analyze grammar]

rājā prāha tadā nārīṃ tapase yadyapi tvaham |
samāgato'smyaraṇyeṣu tvāṃ tathāpi vilokya vai || 71 ||
[Analyze grammar]

jāto'smi kāmanāyuktaḥ pūrṇacandranibhānane |
yādṛśaṃ tvaṃ dhārayase rūpaṃ sarvavimohanam || 72 ||
[Analyze grammar]

nedṛśaṃ vai mayā dṛṣṭaṃ tvadyāpi brahmaṇaḥ kṛtau |
kuru prasādaṃ rambhoru baddhacetasi vai mayi || 73 ||
[Analyze grammar]

āgacchāṃ'kaṃ mamā'mūlyaṃ svīyatvenā'pyalaṃkuru |
ātmānamapi dāsyāmi kiṃ punardhanaratnakam || 74 ||
[Analyze grammar]

rājyaṃ veṣṭatamaṃ datvā nivasiṣye tvayā'tra vai |
nṛpaṃ sā mohitaṃ cāti vijñāyā'vasaraṃ tathā || 75 ||
[Analyze grammar]

samuvāca smitaṃ kṛtvā brahmoktaṃ suvicintya ca |
na rājyaṃ dhanaratnādi varaye vasudhādhipa || 76 ||
[Analyze grammar]

yadvadiṣyāmyahaṃ kāle tatkāryamaviśaṃkayā |
bhajiṣyāmi na sandehaḥ kuruṣva samayaṃ mama || 77 ||
[Analyze grammar]

śapathaṃ kuru rājendrā'vaśyaṃ kurve itīraya |
tadā bhogaṃ pradāsye'haṃ nā'sādhyaṃ te bhaveddhi tat || 78 ||
[Analyze grammar]

rājā prāha tadā kāmarūpayauvanamohitaḥ |
yena santuṣyase devi samayaṃ te karomyaham || 79 ||
[Analyze grammar]

śapathaṃ coccaran vacmi kariṣye vacanaṃ tava |
mohinyapi ca taṃ prāha dīyatāṃ dakṣiṇaḥ karaḥ || 80 ||
[Analyze grammar]

dharmakarapradānena pratyayo vacane tava |
bhavenme'tha na vaktā'syanṛtaṃ kāle vinirṇayaḥ || 81 ||
[Analyze grammar]

dṛḍho jātaḥ paṇo nau vai mārgo'yaṃ dharmasākṣikaḥ |
rājā prāha ca tāṃ nārīṃ kimebhiḥ pratyayairdṛḍhaiḥ || 82 ||
[Analyze grammar]

janmaprabhṛti vāmoru nānṛtaṃ bhāṣitaṃ mayā |
datto hyeṣa mayā hasto dakṣiṇaḥ puṇyadānakṛt || 83 ||
[Analyze grammar]

yanmayā sukṛtaṃ kiñcit kṛtamājanma sundari |
tatsarvaṃ tava vāmoru yadi kuryānna te vacaḥ || 84 ||
[Analyze grammar]

antare hyeṣa datto me dharmo bhāryā bhavā'ṅgane |
rukmāṃgado mahārājaḥ kathayāmi vanāntare || 85 ||
[Analyze grammar]

pratyuttarapradānena prasādaṃ kartumarhasi |
nṛpeṇaivaṃ samādiṣṭā mohinyāhottaraṃ vacaḥ || 86 ||
[Analyze grammar]

ahaṃ brahmabhavā rājan tvadarthaṃ samupāgatā |
śrutvā kīrtiṃ smaropetā raivataṃ kanakācalam || 87 ||
[Analyze grammar]

sampūjayantī deveśaṃ gītadānena śaṃkaram |
yena tuṣṭena devena hyupakāraḥ kṛto mayi || 88 ||
[Analyze grammar]

yadbhavānacireṇaiva prāpto'sīpsitasundaraḥ |
abhiprīto'si me rājannabhiprītā hyahaṃ tava || 89 ||
[Analyze grammar]

mā śaṃkāṃ kuru rājendra kumārīṃ viddhyakalmaṣām |
udvahasva mahīpāla gṛhyoktavidhinā'tra mām || 90 ||
[Analyze grammar]

āśrutya rājñā tatraiva vidhinā sā vivāhitā |
bhavena viṣṇunā dāmodareṇa sa vivāhitaḥ || 91 ||
[Analyze grammar]

vanyamūlaphalānyattvā dampatīdharmamāśritau |
remāte vividhairbhāvairnavayauvanagarbhitaiḥ || 92 ||
[Analyze grammar]

mohinī taṃ kāmabhāvaiḥ ramayatyatyaharniśam |
satyalokāttathā svargād bhogyānādāya cottamān || 93 ||
[Analyze grammar]

sevate taṃ patiṃ bhuṃkte bhogānamaradurlabhān |
rukmagrāmo navastatra racito divyanākibhiḥ || 94 ||
[Analyze grammar]

divyadāsīdāsabhṛtyaiḥ suramyasaudhapaṃktibhiḥ |
yānavāhanakodyānaiḥ kāmadhenugajādibhiḥ || 95 ||
[Analyze grammar]

tatra bhojyādanapeyopadhāryāmbarabhūṣaṇaiḥ |
rājasairdravavastvādyairna nyūnatvamabhūttadā || 96 ||
[Analyze grammar]

kāmabhoge ratayośca tayorvai varṣaviṃśatiḥ |
samayaḥ samatīto'bhūt tṛpto rājā'pyabhūttayā || 97 ||
[Analyze grammar]

aho rūpaṃ madarthaṃ vai brahmaṇā nirmitaṃ śubham |
hastihastasannikāśe jaṃghe kāṃcanasannibhe || 98 ||
[Analyze grammar]

dantapaṃktiścandrapaṃktirgūḍhe gulphe tu mohake |
netre paṃkajavistāre stanau kāṃcanakuṃbhakau || 99 ||
[Analyze grammar]

kaṭirmṛgendrakaṭivat svalpaṃ madhyaṃ susaurabham |
kṛtā'rtho'haṃ khalvanayā deyaṃ yāciṣyate tu yat || 100 ||
[Analyze grammar]

durlabhaṃ cāpi dāsyāmi tvadeyamapi sarvathā |
yāciṣyate jīvitaṃ me dāsyāmyeva na saṃśayaḥ || 101 ||
[Analyze grammar]

evaṃ suratamūḍhasya rājño rukmāṃgadasya tu |
catvāri paṃcavarṣāṇāṃ vyatītāni nimeṣavat || 102 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne rukmāṃgadaḥ putre rājyaṃ vinyasya vanaṃ jagāma tatrāśvapaṭṭasarastīravāsipatnīvratarṣikathitasya rukmāṃgadapūrvajanmādeḥ śravaṇam tato raivatācale mohinyāḥ samāgamaḥ samayaśapathaścetyādinirūpaṇanāmā saptāśītyadhikadviśatatamo'dhyāyaḥ || 287 ||
[Analyze grammar]