Chapter 286

śrīnārāyaṇa uvāca |
śṛṇu lakṣmi tato dharmarājaḥ prāha pitāmaham |
aho kīdṛśamāścaryaṃ yadi rājā pramokṣadaḥ || 1 ||
[Analyze grammar]

devāḥ sarve tadā vyarthāḥ śāsanaṃ ca nirarthakam |
rukmāṃgadāddharau tatra bhedo na syānmanāgapi || 2 ||
[Analyze grammar]

yamapuryā devapuryā brahmapuryā niyāmakaḥ |
rukmāṃgado bhaved bhaumo harireva bhaveddhi saḥ || 3 ||
[Analyze grammar]

tamekaṃ bhojayitvā tu prapūjya harivāsare |
kṛtakṛtyo bhaviṣyāmi gṛhāṇa tvatparaṃ vidhe || 4 ||
[Analyze grammar]

yadi nāmādyaprabhṛti yairnaraiḥ saṃsmṛto hariḥ |
upoṣitaḥ stuto vāpi te bāhyā mama śāsanāt || 5 ||
[Analyze grammar]

nedṛśaṃ karmacāritvaṃ dvisattākaṃ prarocate |
anyaṃ niyuṅkṣva sahate bhagnasattākatāṃ tu yaḥ || 6 ||
[Analyze grammar]

iti kṛtvāṃ paṭaṃ tyaktvā sthito maunaṃ yamādhipaḥ |
brahmā tadā sabhāyāṃ vai paṭagrāhaṃ vyacintayat || 7 ||
[Analyze grammar]

prakāśaṃ kṛtavāṃstatra samutthāya punaḥ punaḥ |
paṭṭaṃ gahṇantu ye kecid yamarājyaṃ dadāmyaham || 8 ||
[Analyze grammar]

rukmāṃgadanṛpājñā tu nollaṃghyeti paṇānvitam |
yamāsanaṃ pragṛhṇantu paṭaṃ riktaṃ dadāmyaham || 9 ||
[Analyze grammar]

śrutvāpi na yadā kaścit svīyaśāsanamāpnavān |
paraśāsanakaiṃkarye sthātuṃ paravaśe pade || 10 ||
[Analyze grammar]

iyeṣa tu tadā prāha nāradastaṃ pitāmaham |
mānavādhīnamaiśvaryapadaṃ ko gṛhṇīyātsuraḥ || 11 ||
[Analyze grammar]

tasmādatrānyapanthānaṃ vicāraya pitāmaha |
yena vai yamamārgo vā pratiruddho na vai bhavet || 12 ||
[Analyze grammar]

svargamārgo'pi saṃruddho na bhavet tattathā kuru |
śratvaivaṃ nāradīyaṃ vai vacanaṃ bahugarbhitam || 13 ||
[Analyze grammar]

vaivasvatasya kāryārthaṃ tatsanmānacikīrṣayā |
cintayāmāsa viśvasṛṭ mokṣe vighnakaraṃ tu yat || 14 ||
[Analyze grammar]

svasmādutpādayāmāsa pramadāṃ lokamohinīm |
sarvayoṣidvarā devī manasā nirmitā babhau || 15 ||
[Analyze grammar]

iyaṃ brāhmī divyarūpā divyābharaṇabhūṣitā |
prodbhinnayauvanā dṛṣṭā sarvaiścakitamānasaiḥ || 16 ||
[Analyze grammar]

mohitāstu tadā sarve saṃsatsthā brahmasṛṣṭijāḥ |
moho mokṣapratiroddhā mohinī mokṣanāśinī || 17 ||
[Analyze grammar]

samyag jātaṃ kautukaṃ tat prāhemān paśyato hyajaḥ |
sarāgeṇeha manasā sarāgeṇeha cakṣuṣā || 18 ||
[Analyze grammar]

cintayedvikṣayedvāpi jananīṃ vā sutāmapi |
vadhūṃ vā bhrātṛjāyāṃ vā gurubhāryāṃ nṛpastriyam || 19 ||
[Analyze grammar]

sa yāti narakaṃ ghoraṃ saṃcintya śvapacīmapi |
dṛṣṭvā tu pramadāmetāṃ yaḥ kṣobhaṃ vrajate janaḥ || 20 ||
[Analyze grammar]

tasya janmakṛtaṃ puṇyaṃ vṛthā bhavati putrakāḥ |
prasaṃge daśasāhasra puṇyamāyāti saṃkṣayam || 21 ||
[Analyze grammar]

pāpena tu tadā prāṇī tiryagyonimavāpnuyāt |
tasmānna cintayetpaśyed vadet strīṃ manasā'ghinā || 22 ||
[Analyze grammar]

strīrna vicintayetpaśyed vadet puṃ manasā'ghinā |
sābhilāṣeṇa manasā tatkṣaṇātpatate janaḥ || 23 ||
[Analyze grammar]

evamābhāṣya bahudhā viriñcirjñānacakṣuṣā |
vilokya mohinīṃ sārthāṃ kṣaṇaṃ vyacintayattataḥ || 24 ||
[Analyze grammar]

yatheyaṃ manasā klṛptā mānasonmādakāriṇī |
tathaiva jātā bandhāya yamastoṣaṃ prayāsyati || 25 ||
[Analyze grammar]

yamamārgo'nayā samyag bhaviṣyati suvāhitaḥ |
svargaṃ vā narakaṃ vāpi riktaṃ kvacinna patsyate || 26 ||
[Analyze grammar]

tāvadāha praṇamyainaṃ mohinī caturānanam |
paśya mūrchānvitaṃ brahman sabhyaṃ sthāvaracetanam || 27 ||
[Analyze grammar]

mohitaṃ mama rūpeṇa nimagnaṃ bandhasāgare |
sa nāstyadyātra yaḥ kopi dṛśyate mama darśanāt || 28 ||
[Analyze grammar]

svalpaṃ vā bahulaṃ vā'pi na kṣobhaṃ saṃgato mayi |
sāhaṃ sṛṣṭā tvayā brahman kasyacit kṣobhaṇāya tu || 29 ||
[Analyze grammar]

tamādiśa vidhe śīghraṃ kṣobhayiṣye kṣaṇāddhi tam |
māṃ dṛṣṭvā ca bhuvi kṣmābhṛjjaḍopi drāg vimuhyati || 30 ||
[Analyze grammar]

kiṃ punaścetano jīvo mohapātraṃ vinirmitaḥ |
ityuktvā virarāmeyaṃ brahmovāca tu tāṃ mudā || 31 ||
[Analyze grammar]

satyametad viśālākṣi tava rūpaṃ vimohakam |
ime sabhāsadāḥ sarve jaḍā iva tu darśanāt || 32 ||
[Analyze grammar]

vidyante tattathaivā'si vijayo'stu sadā tava |
yannimittā mayā sṛṣṭā tatprasādhaya mohini || 33 ||
[Analyze grammar]

surāṣṭrake mahīdeśe rājā rukmāṃgadosti vai |
yasya sandhyāvalī patnī tava rūpopamāsti hi || 34 ||
[Analyze grammar]

yasyāṃ dharmāṃgadaḥ putro jāto'sti guṇato'dhikaḥ |
yo na vākyādvicalati sarvadā''jñākaraḥ sudhīḥ || 35 ||
[Analyze grammar]

tasya rukmāṃgadasyaiva samīpaṃ yāhi mohini |
raivatākhye mahāśaile sa rājā tvāgamiṣyati || 36 ||
[Analyze grammar]

mohitastava gītena saṃgaṃ yāsyati sa tvayā |
tatra devi tvayā vācyaṃ kṛtvā taṃ vivaśaṃ tvati || 37 ||
[Analyze grammar]

ahaṃ bhāryā bhaviṣyāmi paṇo rakṣyo yadi tvayā |
kathayiṣye tvahaṃ kāle tatkartavyaṃ tvayā dhruvam || 38 ||
[Analyze grammar]

iti śrutvā mohitaḥ sa tathaiva pratipatsyate |
tadā taddakṣiṇo hastastvayā grāhyaḥ svake kare || 39 ||
[Analyze grammar]

śapathairvacane bandhanīyaḥ samayapālane |
tataḥ suratakārye saḥ toṣaṇīyo'timugdhavat || 40 ||
[Analyze grammar]

gāḍhe snehe sthire jāte māseṣvapagateṣvatha |
surate tava cārvaṃgi yadā mugdho hi lakṣyate || 41 ||
[Analyze grammar]

prahasya nṛpateḥ smārayitavyaṃ svaṃ paṇaṃ vacaḥ |
yastvayā śapatho rājan kṛto madvākyapālane || 42 ||
[Analyze grammar]

tatpālaya mahārāja manye'haṃ samayo'stviti |
evamukte tvayā rājā mugdho vai satyagauravāt || 43 ||
[Analyze grammar]

vadiṣyati pālayāmi brūhi kiṃ te dadāmyaham |
evamukte tu vacane tvayā vācyastadā nṛpaḥ || 44 ||
[Analyze grammar]

surate tūpavāsastu mato nairbalyakārakaḥ |
rateryoge mahān vighno hyupavāsaḥ kṣudhākaraḥ || 45 ||
[Analyze grammar]

nopavāsastvayā kāryo jātu vai harivāsare |
suratasraṃsakārī me hyupavāso'sti vighnakṛt || 46 ||
[Analyze grammar]

sumugdhāṃ yauvanopetāṃ sevamānāṃ na sevate |
parvākṣepī durācāro nirdayo yāti rauravam || 47 ||
[Analyze grammar]

trirātraṃ tvāṃ vinā rājan sthātuṃ śaktā kathaṃ nvaham |
nāhaṃ divasamapyekaṃ sthātuṃ śaktā tvayā vinā || 48 ||
[Analyze grammar]

upoṣaṇaṃ tava rājan mahāpāpāya jāyate |
yatrāhaṃ kāmadāhena prajvalāmi tvayā vinā || 49 ||
[Analyze grammar]

yadi cet taruṇī rakṣyā deyaṃ ratisukhaṃ sadā |
yadyaśakto raterdāne na rakṣyā taruṇī tadā || 50 ||
[Analyze grammar]

kāmadāhaviniḥśvāsastaruṇīhṛdayodbhavaḥ |
vratināmapi puṇyāni prajvālayati mūlataḥ || 51 ||
[Analyze grammar]

tasmād rājanpravārdhakye kartavyā harivāsarāḥ |
tāruṇye tu mamā'tīte kariṣye harivāsarān || 52 ||
[Analyze grammar]

evaṃ sambodhyamānopi yadā bhūbhṛdvacastava |
na kariṣyati cārvaṃgi tadā vācyaṃ paraṃ vacaḥ || 53 ||
[Analyze grammar]

yadi na tyajase rājannupavāsaṃ harerdine |
svahastena śiraśchitvā svaputrasya varā'sinā || 54 ||
[Analyze grammar]

dharmāṃgadasya rājendra mamotsaṃge kṣipa svayam |
yadyetanmatpriyaṃ rājanna karoṣi vacaḥ kṣateḥ || 55 ||
[Analyze grammar]

dharmakṣīṇo bhavān gantā hyacirānnarake dhruvam |
śrutvaitadvacanaṃ devi na haniṣyati putrakam || 56 ||
[Analyze grammar]

devānumatimādāya bhokṣyate harivāsare |
tadvā prajāḥ prabhokṣyante tadīyā harivāsare || 57 ||
[Analyze grammar]

yāmyamārgo janaistarhi saṃpravṛtto bhaviṣyati |
nārakāṇāṃ bhālapaṃktipramāṇaṃ ca bhaviṣyati || 58 ||
[Analyze grammar]

yadā na bhokṣyate kiṃcid bhaktatvāddharivāsare |
haniṣyati tadā putraṃ rājyābhiṣiktameva tam || 59 ||
[Analyze grammar]

tadā prayāsyati kṣmābhṛt strījītatvapradūṣaṇam |
mūrdhābhiṣiktaghātitvaṃ punnāmanarakārtitām || 60 ||
[Analyze grammar]

pitṝṇāṃ pātayitṛtvaṃ svātmaghātitvamityapi |
ebhirdoṣairacirāt sa nidhanaṃ prāpsyate nṛpa || 61 ||
[Analyze grammar]

yamamārge svayaṃ gatvā pūrayiṣyati rauravam |
yadvā vratabalācchīghraṃ harerdhāmni prayāsyati || 62 ||
[Analyze grammar]

śāsanaṃ pratiruddhaṃ syājjanā atsyanti vai vrate |
bhaviṣyati yamamārgaḥ samuddhāṭita eva ha || 63 ||
[Analyze grammar]

gaccha śīghraṃ pratīkṣasva rukmāṃgadaṃ tu raivate |
kṛtakāryā samāgaccha viddhāṃ dāsye tithiṃ gṛham || 64 ||
[Analyze grammar]

mohinī tvevamuktā sā praṇamyā'jaṃ sabhāsadān |
vīkṣyamāṇā'marairmārge pratasthe raivatācalam || 65 ||
[Analyze grammar]

tṛtīyena muhūrtena saṃprāptā girimastakam |
raivato mandarādryātmā saurāṣṭre rājate'calaḥ || 66 ||
[Analyze grammar]

ratnānāṃ mandiraṃ hyeṣo bahudhātusamanvitaḥ |
krīḍābhūmiḥ surāṇāṃ ca tapobhūryastapasvinām || 67 ||
[Analyze grammar]

kṛṣṇanārāyaṇasyā'yaṃ vihārodyānasannibhaḥ |
svarṇarakṣā nadī yatra vahate kāṃcanaprabhā || 68 ||
[Analyze grammar]

bhaveśvaraṃ mahāliṃgaṃ vartate vāmanopi vai |
dāmodarasvarūpeṇa gahvarāraṇyabhūmiṣu || 69 ||
[Analyze grammar]

mṛgīkuṇḍataṭe bālā gatvā pītvā jalaṃ śubham |
bhuktvā sītāphalaṃ svādu cakre saṃgītamuttamam || 70 ||
[Analyze grammar]

mūrchanātālasahitaṃ gāndhāradhvanisaṃyutam |
klamahānikaraṃ miṣṭaṃ sarvasattvavimohanam || 71 ||
[Analyze grammar]

ciñcādrumaghaṭāchannaḥ śratvā bhaveśvaraḥ śivaḥ |
tadā bhoktumanāḥ kāmāturaścāti vyajāyata || 72 ||
[Analyze grammar]

cacāla mandirātsvasmād yatra gāyati mohinī |
svarṇarekhā sthirā jātā vanaṃ stabdhaṃ tadā'bhavat || 73 ||
[Analyze grammar]

dāmodaro'pi cāyāto vanarājisvarabhramāt |
vanadevā raivatādriḥ svarā''kṛṣṭāḥ samāyayuḥ || 74 ||
[Analyze grammar]

mohinī gītikāmagnā pratīkṣati nṛpāgamam |
rukmāṃgado'pi vairāgyādaraṇyaṃ gantumicchati || 75 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne yamarājasya sattāpaṭṭatyāgamiṣeṇa pitāmahena saṃvādo mohinīstrīsamutpādanaṃ śikṣayitvā raivatādrau rukmāṃgadanṛpaṃ prati mohinīpreṣaṇaṃ mohinīsaṃgītamityādinirūpaṇanāmā ṣaḍaśītyadhikadviśatatamo'dhyāyaḥ || 286 ||
[Analyze grammar]