Chapter 252

śrīlakṣmīruvāca |
kṛpāsindho sadā''lasyānvitānāṃ bhavapārakṛt |
tāritā vai tvayā nātha nirjalāvratavarṇanāt || 1 ||
[Analyze grammar]

yena muktiṃ tathā bhuktiṃ sarvaikādaśikāphalam |
vratinaḥ prāpnuvantyatra kāraṇaṃ karuṇā tava || 2 ||
[Analyze grammar]

saṃkalpastava jīvānāṃ kathaṃcidvai bhavedyathā |
niḥśreyaḥ paramaṃ yadvā mokṣo vā svargameva vā || 3 ||
[Analyze grammar]

jananīvadrakṣaṇaṃ syād bhavasāgaravāridheḥ |
tathā tvaṃ yatase nātha kṛpā kevalakāraṇam || 4 ||
[Analyze grammar]

vada me'ṣāḍhakṛṣṇaikādaśyā vrataphalaṃ vidhim |
devaṃ pūjāṃ ca māhātmyaṃ kṛpālo dānamityapi || || 9 ||
[Analyze grammar]

śrīnārāyaṇa uvāca |
aṣāḍhakṛṣṇapakṣīyā yoginīsaṃjñikā matā |
kṣemaṃkaryā sahā'trā'rcyo nṛsiṃhākhyo hariḥ prabhuḥ || 6 ||
[Analyze grammar]

bhṛṃgarājo'tra puṣpeṣu tathā'rghye jāmbavaṃ phalam |
naivedye piṇḍakā deyā dāne tu jalagaurmatā || 7 ||
[Analyze grammar]

viśeṣo'yaṃ vidhiḥ proktaḥ kāryaṃ vrataṃ vratottamam |
sarvapāpakṣayakṛcca sarvabhuktipradāyakam || 8 ||
[Analyze grammar]

saṃsārārṇavamagnānāṃ potarūpaṃ sanātanam |
jagattraye sārabhūtaṃ yoginīvratamuttamam || 9 ||
[Analyze grammar]

daśamyāmekabhaktena naktena vratinā khalu |
bhūśāyinā vartitavyaṃ brahmacaryādinā tathā || 10 ||
[Analyze grammar]

ekādaśyāṃ vratī prātarutthāya śrīhariṃ smaret |
dhyātvā snātvā pūjayitvā hariṃ ṣoḍaśavastubhiḥ || 11 ||
[Analyze grammar]

prārthayed bhagavan kṛṣṇa yoginyā vratamuttamam |
karomyadya tu nirvighnaṃ sampūrṇaphaladaṃ bhavet || 12 ||
[Analyze grammar]

kṛpayā tava bhaktānāmabhayaṃkara mādhava |
ityabhyarthya tato dhānyaiḥ kārayet sarvataḥ śubham || 13 ||
[Analyze grammar]

maṇḍalaṃ raṃgacitrādiśobhitaṃ maṇḍalāntare |
madhye saṃsthāpayetsvarṇakalaśaṃ ratnagarbhitam || 14 ||
[Analyze grammar]

phalapallavayuktaṃ ca jalavastrasamanvitam |
candanākṣatasatkuṃkumā'rcitaṃ navadhātujam || 15 ||
[Analyze grammar]

śaṃkhaṃ ca pūjayettatra ghaṇṭāṃ prapūjayettathā |
śālagrāmaṃ pūjayecca gaṇeśaṃ pūjayettathā || 16 ||
[Analyze grammar]

pūjādravyaiḥ pūjayitvā śrīkṛṣṇaṃ narasiṃhakam |
pūjayetparayā bhaktyā svarṇanirmitamūrtikam || 17 ||
[Analyze grammar]

tilasthālyāṃ sthāpayitvā pūjayedakṣatādibhiḥ |
āvāhanādibhiḥ paṃcāmṛtaiḥ sugandhicandanaiḥ || 18 ||
[Analyze grammar]

sadvastraiśca vibhūṣābhiḥ śṛṃgāradravamardanaiḥ |
dhūpadīpasunaivedyaphalatāmbūlavāribhiḥ || 19 ||
[Analyze grammar]

ārārtrikastutipuṣpāṃjalyādibhiḥ samarcayet |
kṣamāparādhaṃ tvabhyarthya svakāryaṃ cet kriyāt tataḥ || 20 ||
[Analyze grammar]

madhyāhnepi sunaivedyaṃ tvāmrarasaśrīkhaṇḍakam |
śītalaṃ madhuraṃ vāri pūrikā dadhi śarkarām || 21 ||
[Analyze grammar]

āranālaṃ ca kūṣmāṇḍakhaṇḍapākaṃpayorasam |
bhojayenmukhavāsaṃ ca pūgīphalaṃ ca vīṭikām || 22 ||
[Analyze grammar]

dadyātsāyaṃ tathā saumyaṃ kārayenmaṇḍapaṃ navam |
tatra dolāṃ bandhayitvā sthāpayitvā hariṃ tataḥ || 23 ||
[Analyze grammar]

āndolayetsamudyāne vihārayeditastataḥ |
śādvale śītale bhāge viśramayejjanārdanam || 24 ||
[Analyze grammar]

pūjayed vividhaiḥ śreṣṭhairvastubhiśca tataḥ param |
nīrājayennarasiṃhaṃ stutiṃ kuryācca saiṃhikīm || 25 ||
[Analyze grammar]

rātrau jāgaraṇaṃ kuryānnṛsiṃhapadagāyanaiḥ |
prātarutsāhapūrvaṃ taṃ dhyātvā snātvā prapūjayet || 26 ||
[Analyze grammar]

vidhivadvastubhiḥ sarvairnivedya miṣṭamiṣṭakam |
jalaṃ dadyāttato bhaktaḥ kuryādvai pāraṇāṃ śubhām || 27 ||
[Analyze grammar]

jaladānaṃ jaladhenuṃ svarṇadhenuṃ ghṛtādikam |
dadhi dugdhaṃ navanītaṃ śarkarāṃ gūḍamityapi || 28 ||
[Analyze grammar]

dadyād dānaṃ supātrāya yānaṃ vāhanamarthakam |
gurave dakṣiṇāṃ dadyād ghaṭaṃ mūrtiṃ harestathā || 29 ||
[Analyze grammar]

miṣṭānnāni tathānyāni dāpayet sadbhya eva ca |
gṛhakṣetrapaśūdyānadāsadānāni kārayet || 30 ||
[Analyze grammar]

evaṃ kṛtvā vrataṃ bhakto yoginyā śraddhayā yutaḥ |
yogilabhyaṃ phalaṃ svargyaṃ kaivalyaṃ cāpi saṃlaset || 31 ||
[Analyze grammar]

śṛṇu lakṣmi kathāṃ ramyāṃ daivīṃ pāpavināśinīm |
alakāyāṃ nagaryāṃ vai kuberaḥ śivabhaktimān || 32 ||
[Analyze grammar]

yadā śaṃbhoḥ prapūjāyāṃ vartate tu tadā sadā |
svānucaro mahāyakṣo hemamālīti nāmataḥ || 33 ||
[Analyze grammar]

samānayati puṣpāṇi pārśvodyānabhavāni vai |
evaṃ nityaṃ śaṃkarasya pūjopakaraṇāni saḥ || 34 ||
[Analyze grammar]

upasthāpayati tatra sadā kuberasannidhau |
sa kintu yauvanodbhedāt kāmapūreṇa saṃbhṛtaḥ || 35 ||
[Analyze grammar]

svapatnyā tu viśālākṣyā saha kāme viśeṣataḥ |
kāmabāṇena cākṛṣṭo vartate divase'pi ca || 36 ||
[Analyze grammar]

kāryaṃ cāpi parityajya kāmanāyāṃ pravartate |
evaṃ cātīva kāmārthī patnyā saha kvacitkvacit || 37 ||
[Analyze grammar]

kusumādīni cānetuṃ gacchatyeva drumādiṣu |
ekadā tu kubereṇa mānasākhyasaraḥ prati || 38 ||
[Analyze grammar]

preṣito hemamālī saḥ kamalānayanāya vai |
so'pi nūtnaṃ saro ramyaṃ dṛśyārhaṃ tvabhimatya ca || 39 ||
[Analyze grammar]

patnyā saha gatastatrā''netuṃ su kamalāni tu |
jalaṃ ca śādvalaṃ sūkṣmavālukācākacakyatām || 40 ||
[Analyze grammar]

ramaṇīyapradeśaṃ ca sugandhikusumādikam |
rājasaṃ vividhaṃ bhāvaṃ vihārakṣobhakārakam || 41 ||
[Analyze grammar]

dṛṣṭvā vikṛtimāyāto visṛjya kusumāni ca |
patnyā saha tadā reme mānase tu sarovare || 42 ||
[Analyze grammar]

patnyā muhurdhṛtaḥ kāme saṃsakto na nivartate |
tṛptāpi tu punaḥ patnī pravṛttā na nivartate || 43 ||
[Analyze grammar]

evaṃ parasparaṃ prāptau kāmabhāvau viśeṣataḥ |
punaḥ punaḥ pravṛttau tau vividaturna mohitau || 44 ||
[Analyze grammar]

kālātikramaṇaṃ jātaṃ pūjāyāśca tathāpi tau |
puṣpāṇyādāya nā''yātau kubero'pi pratīkṣate || 45 ||
[Analyze grammar]

kāmapremarasāsaktau na kuberālayaṃ gatau |
kubero devasadane karoti śivapūjanam || 46 ||
[Analyze grammar]

prātaḥ kālo vyatītaśca madhyāhnasamaye tataḥ |
kuberaḥ pūjanārthaṃ tu puṣpāgamasamīkṣakaḥ || 47 ||
[Analyze grammar]

cintayāmāsa vighnaṃ vai yato nāyāti yakṣakaḥ |
dvitīyo yakṣakastatra preṣito'nveṣaṇāya yat || 48 ||
[Analyze grammar]

sa gatvā ramamāṇaṃ taṃ dadarśa hemamālinam |
hemamālī tu salile ramate kāntayā saha || 49 ||
[Analyze grammar]

preṣyastau prāha puṣpāṇi sa kāṃkṣati kuberarāṭ |
śīghraṃ vai tatra gantavyaṃ madhyāhne pūjanaṃ bhavet || 50 ||
[Analyze grammar]

iti kṛtvā gatau puṣpāṇyādāya rājarājakam |
kuberaṃ tau tato natvā yayācāte kṣamāṃ muhuḥ || 51 ||
[Analyze grammar]

yakṣarāṭ pratyuvācā'tha kālātikramakopitaḥ |
vanitākāmukaṃ jñātvā ramamāṇaṃ nijecchayā || 52 ||
[Analyze grammar]

āḥ pāpa duṣṭa durvṛtta kāmāsaktatayā tvayā |
anādāya tu puṣpāṇi kṛtaṃ vai devahelanam || 53 ||
[Analyze grammar]

kāmabhogo mahān vighnaḥ sa ca doṣo mahānmataḥ |
daṇḍastatra pradātavyo na kartavyā mayā kṛpā || 54 ||
[Analyze grammar]

bhavāṣṭādaśakuṣṭhī tvaṃ viyukto kāntayā tayā |
asmātsthānādapadhvasto gacchasvā'dhama bhūtalam || 55 ||
[Analyze grammar]

ityukte vacane yakṣastasmātsthānātpapāta ha |
mahāduḥkhābhibhūtaśca kuṣṭhaiścitritavigrahaḥ || 56 ||
[Analyze grammar]

galatkuṣṭhaḥ śvetakuṣṭho raktakuṣṭho'bhavattadā |
carmakuṣṭho lalatkuṣṭho durgandhapūyakuṣṭhakaḥ || 57 ||
[Analyze grammar]

evaṃ jātaḥ śarīre sa hemamālī svakarmaṇā |
divā sukhaṃ na labhate na nidrāṃ labhate niśi || 58 ||
[Analyze grammar]

chāyāyāṃ vā nidāghe vā gṛhe kuṃje ca gahvare |
kuṭyāṃ bhūmau latāmadhye labhate na sukhaṃ kvacit || 59 ||
[Analyze grammar]

dāhena pīḍyate cāti kharjanena jvalatyapi |
pātakenābhibhūtopi pūrvakarma smaratyasau || 60 ||
[Analyze grammar]

śivārpitasu puṣpādiphalaprābalyato nanu |
patitasyā'bhibhūtasya smṛtistasya na lupyati || 61 ||
[Analyze grammar]

himālaye mahāraṇye ghorarūpa itastataḥ |
bhramamāṇo yayau devān mārkaḍeyāśramaṃ śubham || 62 ||
[Analyze grammar]

taponidhiṃ muniśreṣṭhaṃ brahmadhyānaparāyaṇam |
yasyā''yurvidyate lakṣmi brahmaṇo dinasaptakam || 63 ||
[Analyze grammar]

vavande caraṇau tasya dūrataḥ kuṣṭhavigrahaḥ |
mārkaṃḍeyo dayāṃ kṛtvā kampitaṃ duṣṭavigraham || 64 ||
[Analyze grammar]

paropakaraṇārthāya samāhūyedamabravīt |
kasmātkuṣṭhābhibhūtastvaṃ kuto nindyatamo hyasi || 65 ||
[Analyze grammar]

śrutvā prāha tadā sopi muniṃ pāpavināśakam |
rājarājasyānucaro hemamālīti nāmataḥ || 66 ||
[Analyze grammar]

udyānātpadmanicayaṃ tvānīya pratyahaṃ mune |
śivapūjanavelāyāṃ kuberāya samārpayam || 67 ||
[Analyze grammar]

ekasmindivase patnyā sahito'haṃ kṛpālunā |
saṃpreṣitaḥ kubereṇa tvānetuṃ kamalāni hi || 68 ||
[Analyze grammar]

atisugandhicitrāṇi mānasākhyasarovaram |
dṛṣṭvā tu nūtanaṃ ramyaṃ bhūtalaṃ sajalaṃ śubham || 69 ||
[Analyze grammar]

kāmasukhaprasaktābhyāṃ kālaścā'vidito gataḥ |
puṣpaṃ vinā śivapūjā prātarjātā tato hyaham || 70 ||
[Analyze grammar]

atikruddhena śapto'smi rājarājena vai mune |
kuṣṭhābhibhūtaḥ saṃjāto viyuktaḥ kāntayā tayā || 71 ||
[Analyze grammar]

bhramamāṇo'tra sānnidhye prāptohaṃ me śubhaṃ kuru |
satāṃ svabhāvataścittaṃ paropakaraṇe kṣamam || 72 ||
[Analyze grammar]

iti madarthaṃ bhagavan kuru saukhyaṃ bhaved yathā |
śrutvā tathyaṃ tadovāca mārkaṇḍeyo mahāmuniḥ || 73 ||
[Analyze grammar]

śṛṇu vratopadeśaṃ te kathayāmi śubhapradam |
āṣāḍhe kṛṣṇapakṣasyaikādaśīvratamācara || 74 ||
[Analyze grammar]

yoginīvratapuṇyena kuṣṭhaṃ yāsyati vai dhruvam |
punaḥ prāpsyasi patnīṃ tvaṃ lapsyase śāśvataṃ sukham || 75 ||
[Analyze grammar]

itivākyamṛṣeḥ śrutvā daṇḍavatpatito bhuvi |
āśīrbhirvardhitastena babhūvā'tīva harṣitaḥ || 76 ||
[Analyze grammar]

yoginyekādaśīṃ cakre vratī tvāśramasannidhau |
mārkaṃḍeyasya kṛṣṇasya pūjanaṃ pracakāra saḥ || 77 ||
[Analyze grammar]

munervacanataḥ samyag vrate cīrṇe'bhavatsukhī |
aṣṭādaśaiva kuṣṭhāni tanau naṣṭāni sarvathā || 78 ||
[Analyze grammar]

gato natvā svakaṃ lokaṃ yakṣo bhūtvā yathāyatham |
labdhvā patnīṃ punastvevā'lakāyāṃ nyavasatsukham || 79 ||
[Analyze grammar]

evaṃ śāpanivṛttirvai yoginīvratato bhavet |
kuṣṭhādiroganāśaśca patnī naṣṭāpi labhyate || 80 ||
[Analyze grammar]

lokaḥ sthānaṃ gṛhaṃ smṛddhirnaṣṭaṃ vai prāpyate punaḥ |
yoginyā vratapuṇyena yogalabhyaṃ lased vratī || 81 ||
[Analyze grammar]

idṛgvidhaṃ mahālakṣmi kathitaṃ yoginīvratam |
nāryā bhūtvā tu yoginyā yoginā tu nareṇa ca || 82 ||
[Analyze grammar]

kartavyaṃ yogaphaladaṃ bhuktimuktipradaṃ vratam |
aṣṭāśītisahasrāṇi sādhūn bhojayate tu yaḥ || 83 ||
[Analyze grammar]

tatsamaṃ phalamāpnoti yoginyā vratavānnaraḥ |
yogābhyāsaphaladātrī yogilokapradāyinī || 84 ||
[Analyze grammar]

kṛṣṇayogānmokṣadātrī hyupoṣyā yoginītithiḥ |
paṭhanāchravaṇāccāsyāḥ sarvapāpaiḥ pramucyate || 85 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne āṣāḍhakṛṣṇayoginyekādaśīvratamāhātmyaṃ hemamāliyakṣasya kuberaśāpena jātakuṣṭhādirogasya vratakaraṇena nāśa ityādinirūpaṇanāmā dvipaṃcāśadadhikadviśatatamo'dhyāyaḥ || 252 ||
[Analyze grammar]