Chapter 249

śrīlakṣmīruvāca |
bhagavan devadeveśa bhaktānāmabhayaṃkara |
āyuḥpradaṃ vrataṃ samyak śrāvitaṃ bhavatā vibho || 1 ||
[Analyze grammar]

śrutvā varūthaviprasya mahāpātakanāśanam |
prasannaṃ jāyate cetaḥ kṛpāsāgara keśava || 2 ||
[Analyze grammar]

vaiśākhaśuklapakṣe tu kiṃ nāmnyekādaśī matā |
kiṃ phalaṃ ko vidhistatra ko devo vada mādhava || 3 ||
[Analyze grammar]

śrīnārāyaṇa uvāca |
padmaje kathayiṣyāmi lokānāṃ hitakāmyayā |
pavitrāṇāṃ pavitraṃ yadvratānāmuttamaṃ vratam || 4 ||
[Analyze grammar]

vaiśākhasyā'rjune pakṣe nāmato mohinī tu sā |
bhavedekādaśī lakṣmi sarvapātakanāśinī || 5 ||
[Analyze grammar]

pāpajālāni naśyanti moho naśyati tadvratāt |
mahāduḥkhāni naśyanti sukhaṃ bhavati tadvratāt || 6 ||
[Analyze grammar]

yasyāḥ kartavyatābhāvādapi pāpaṃ vinaśyati |
daśamyāmekabhaktena naktenāpi vratārthinā || 7 ||
[Analyze grammar]

vartitavyaṃ tathā rātrau brahmacaryavratena ca |
prātarutthāya kṛṣṇaśca smartavyo vratinā sadā || 8 ||
[Analyze grammar]

snātvā hariḥ supūjyaśca pūjanīyo vratārthinā |
nityavidhyanusāreṇa vratārthaṃ prārthanāṃ kriyāt || 9 ||
[Analyze grammar]

adyāhaṃ devadeveśa kariṣye vratamacyuta |
tavānugrahaleśena saṃpūrṇaṃ tadbhavediti || 10 ||
[Analyze grammar]

evaṃ tu pūjanaṃ nityatayā prāptaṃ samāpya ca |
kārayet sarvatobhadramaṇḍalaṃ taṇḍulādibhiḥ || 11 ||
[Analyze grammar]

tanmadhye sughaṭaḥ sthāpyaḥ suvarṇasyā'tha vā navaḥ |
tāmrajaḥ sajalaḥ pañcaratnayuk pañcapallavaḥ || 12 ||
[Analyze grammar]

vastraveṣṭitakaṇṭhaśca candanākṣatapūjitaḥ |
phalaṃ nyasyennārikelaṃ pārśve tasyāntarā'bbhṛtam || 13 ||
[Analyze grammar]

nyasyenmukhopari ramyāṃ sthālīṃ tilaprapūritām |
tatra nyasyet svarṇarūpyatāmradravyaṃ ca śarkarām || 14 ||
[Analyze grammar]

kārayitvā kanakasya mūrtiṃ tvekādaśīpateḥ |
madhusūdanadevasya mādhavyā saha śobhitām || 15 ||
[Analyze grammar]

mohinyā ca yutāṃ tatra sthālyāṃ vai sthāpayettu tām |
svarganiḥśreṇikāṃ kūpyamayīṃ nyasyetprapūjayet || 16 ||
[Analyze grammar]

svastikaṃ brahmasūtraṃ ca candrakaṃ tilakaṃ tathā |
svarṇaraupyaṃ kārayitvā ghaṭapārśve nidhāpayet || 17 ||
[Analyze grammar]

phalāni vividhānyeva pūgīphalādikāni ca |
elālavaṃgatvaksārajātīphalāni cūrṇakam || 18 ||
[Analyze grammar]

śarkarāṃ gūḍadhānādīn navavastūni dāpayet |
paryaṃkaṃ gendukaṃ guptadorakaṃ pārśvakaṃ tathā || 19 ||
[Analyze grammar]

darpaṇaṃ vyajanaṃ chatraṃ cāmaraṃ yaṣṭikāṃ śubhām |
pāduke keśasaṃskartrīṃ sugandhadravyasaṃyutām || 20 ||
[Analyze grammar]

sajalaṃ mṛdghaṭaṃ navyaṃ pakvānyāmraphalāni ca |
vinyasyet pūjanaṃ kuryād vidhinā vratakārakaḥ || 21 ||
[Analyze grammar]

puṣpeṣu mallikāṃ dadyānnaivedyaṃ pāyasaṃ śubham |
arghyaṃ phalaṃ tu panasaṃ śayyādānaṃ samuttamam || 22 ||
[Analyze grammar]

prathamaṃ tilapātre taṃ madhusūdanamacyutam |
āvāhayet tato dadyādāsanaṃ cottamottamam || 23 ||
[Analyze grammar]

pādaprakṣālanavāri tathā'rcanajalaṃ śubham |
ācamanārthe salilaṃ dadyād devāya bhāvataḥ || 24 ||
[Analyze grammar]

dantadhāvanamārdraṃ ca dadyāccūrṇaṃ sugandhavat |
mukhaprakṣālanaṃ tasya kārayet tīrthavāriṇā || 25 ||
[Analyze grammar]

śaucādikalpayeddhastapādaśuddhiṃ prakalpayet |
paṃcāmṛtaiḥ snāpayecca śuddhodakena tatparam || 26 ||
[Analyze grammar]

vastrairāmārjanaṃ kuryāt suvastrāṇi samarpayet |
dhautraṃ sūkṣma śubhaṃ prāvaraṇaṃ śvetaṃ navaṃ tathā || 27 ||
[Analyze grammar]

arpayeccandanaṃ tailaṃ sugandhaṃ dravyamattaram |
gandhasāraṃ maṇiṃ brahmasūtraṃ ca kajjalādikam || 28 ||
[Analyze grammar]

kuṃkumaṃ tvarpayeccābīraṃ gulālaṃ śubhākṣatān |
puṣpāṇi kundakalikārūpāṇi puṣpamālikāḥ || 29 ||
[Analyze grammar]

vibhūṣaṇāni sarvāṇi śṛṃgāradravyamuttamam |
alaṃkārāṇi ramyāṇi tvarpayeddharaye tadā || 30 ||
[Analyze grammar]

tilakaṃ candrakaṃ bhāle kārayeccandanena vai |
lepayeccābhito varṣmaṇi vratī hṛdayādike || 31 ||
[Analyze grammar]

dhūpaṃ dīpaṃ ca naivedyaṃ dadyānmiṣṭānnamuttamam |
śārkaraṃ dadhisāraṃ śrīkhaṇḍaṃ dadyāttu pūrikāḥ || 32 ||
[Analyze grammar]

śārkaraṃ śītasalilaṃ phalaṃ cāmraṃ ca bīṭikām |
nāgavallīparṇakṛtāṃ dadyāttvanyattu yat kṛtam || 33 ||
[Analyze grammar]

ārārtrikaṃ namaskāraṃ stutiṃ pradakṣiṇaṃ tathā |
daṇḍavacca kṣamāyāñcāṃ phalapūrṇatvayācanām || 34 ||
[Analyze grammar]

puṣpāñjaliṃ dakṣiṇāṃ ca dadyāt paścād visarjayet |
kuryāccāvaśyakaṃ kāryaṃ vratī bhaktyātmakaṃ tadā || 35 ||
[Analyze grammar]

madhyāhne pūjayet kṛṣṇaṃ bhojanaṃ kārayed bahu |
ṣaṭpaṃcāśatprabhogāṃśca dadyādarthānvitastadā || 36 ||
[Analyze grammar]

jalapānaṃ pradadyācca tāmbūlaṃ mukhaśodhakam |
dadyācca taṃ namaskṛtya vratī bhaktyādikaṃ caret || 37 ||
[Analyze grammar]

sāyaṃ cārārtrikaṃ kuryānnaivedyaṃ ca jalārpaṇam |
maṇḍapaṃ kadalīstaṃbhaiḥ kārayed bandhayecca saḥ || 38 ||
[Analyze grammar]

preṃkhāṃ suśobhitāṃ ramyāṃ navapallavatoraṇām |
āndolayeddhariṃ tatra sthāpayitvā svayaṃ vratī || 39 ||
[Analyze grammar]

pūjanaṃ ṣoḍaśavastūttamairnirvartayedvratī |
rātrau bhaktiyutaṃ kālaṃ bhaktaiḥ saha tu yāpayet || 40 ||
[Analyze grammar]

evaṃ jāgaraṇaṃ kuryānmahotsavapuraḥsaram |
nartanaṃ gāyanaṃ gītiṃ tālamānādisaṃyutām || 41 ||
[Analyze grammar]

smaraṇaṃ kīrtanaṃ cāpi kathākhyānāni kārayet |
gāpayet kṛṣṇapadyāni narā nāryaśca sarvathā || 42 ||
[Analyze grammar]

harikīrtanayuktāśca kuryurjāgaraṇaṃ tathā |
prātaḥ smareddhariṃ snātvā punaḥ pūjanamācaret || 43 ||
[Analyze grammar]

vratī dānāni dadyācca gurave'tisubhāvataḥ |
bhojayed brāhmaṇān sādhūn sādhvīrbālāṃca pūjayet || 44 ||
[Analyze grammar]

dīnān kṛpaṇān bālikāśca parādhīnāṃśca bhojayet |
āśritān karmacārāṃśca pramadāśca kuṭumbinaḥ || 45 ||
[Analyze grammar]

pūjyāṃśca bhojayenmiṣṭaṃ mātṛṃśca janakāṃstathā |
vṛddhāṃśca bhojayennamrabhāvanāṃ ca pradarśayet || 46 ||
[Analyze grammar]

tato vratī svayaṃ kuryātpāraṇāṃ tu hariṃ smaran |
śayyādānaṃ gajavājigodānaṃ bhūgṛhārpaṇam || 47 ||
[Analyze grammar]

susatpātre prakuryāttu yānavāhadhanārpaṇam |
evaṃ vratī vrataṃ kurvannāpnoti paramaṃ padam || 48 ||
[Analyze grammar]

śāśvataṃ ca sukhaṃ svarge yatheṣṭaṃ kṛpayā hareḥ |
śṛṇu lakṣmi kathāṃ pūrvabhavāṃ vaiśyasya pāvanīm || 49 ||
[Analyze grammar]

saurāṣṭre tu sarasvatyāḥ prācyā nātividūrake |
uttare tu pradeśe vai bhadrāvatyāstu dakṣiṇe || 50 ||
[Analyze grammar]

bhāṇḍīrākhyanagaryāṃ vai dhṛtisiṃho'bhavannṛpaḥ |
tasya śreṣṭhī dhanapālo hyabhavaddhanaśevadhiḥ || 51 ||
[Analyze grammar]

dhanapālaḥ sadā khyātaḥ puṇyakāryapravartane |
prapākūpamaṭhārāmataḍāgagṛhakārakaḥ || 52 ||
[Analyze grammar]

viṣṇubhaktaḥ sādhusevī paropakṛtisadvrataḥ |
kathāśravaṇasuśraddhaḥ sarvadā bhaktitatparaḥ || 53 ||
[Analyze grammar]

putrāstasyā'bhavan pañca śreṣṭhino dhanaśālinaḥ |
sumanā dyutimāṃścaiva medhāvī sukṛtistathā || 54 ||
[Analyze grammar]

catvāraḥ puṇyapātrāṇi pañcamaścātipāpakṛt |
dhṛṣṭabuddhiriti khyātaḥ parastrīsaṃgasaṃrataḥ || 55 ||
[Analyze grammar]

dyūtādivyasanāsakto vārastrīratikārakaḥ |
devapūjāvihīnaśca pitṛtarpaṇanāstikaḥ || 56 ||
[Analyze grammar]

dvijānāṃ nindako vedanindako nyāyavarjitaḥ |
duṣṭātmā svapiturdravyanāśako madirāpibaḥ || 57 ||
[Analyze grammar]

abhakṣyabhakṣaka pāpī sarvasampatkṣayaṃkaraḥ |
cauryādikarmanirato duṣṭasaṃgo hyakarmakṛt || 58 ||
[Analyze grammar]

pitrā catuṣpathe dṛṣṭo veśyāskandhasthahastakaḥ |
pāpācārarataścaivaṃ vijñāto bandhubhistataḥ || 59 ||
[Analyze grammar]

pitrā niṣkāsito gehād bāndhavaiśca vivāsitaḥ |
dāyabhāgena yatkiṃcillabdhaṃ nirvāhakaṃ dhanam || 60 ||
[Analyze grammar]

sarvaṃ nītaṃ kṣayaṃ tena veśyāsaṃgena nityadā |
ābhūṣaṇāni pātrāṇi vastrāṇyupaskarāṇi ca || 61 ||
[Analyze grammar]

kṣayaṃ nītāni tenaiva gaṇikāsaṃgakāriṇā |
dhanahīnaḥ parityakto gaṇikābhistataḥ sa tu || 62 ||
[Analyze grammar]

cintāturobhavad vastradhanahīnaḥ kṣudhārditaḥ |
kiṃ karomi kva gacchāmi jīvanopāyavarjitaḥ || 63 ||
[Analyze grammar]

tasmāt kāryaṃ taskaratvaṃ cauryaṃ kāryaṃ prasahya ca |
luṇṭhanāpaharaṇe ca kṛtvā jīvāmi nānyathā || 64 ||
[Analyze grammar]

evaṃ balā'paharaṇaṃ karoti vanage pathi |
pitustu nagare rātrau taskaratvaṃ karoti ca || 65 ||
[Analyze grammar]

surāṃ pibati nityaṃ sa māṃsaṃ khādati nityadā |
cauryaṃ nityaṃ karotyeva puṃścalīsaṃgatiṃ gataḥ || 66 ||
[Analyze grammar]

rātrau cauryaṃ suvarṇasya kṛtaṃ tena tu tatkṣaṇe |
rājadūtairdhṛto rātrau kintu svarṇaṃ dhanaṃ tadā || 67 ||
[Analyze grammar]

luṃcārūpaṃ rājadūtebhyo'rpayitvā vibandhanaḥ |
muktiṃ prāpya gato'raṇye punaścauryaṃ cakāra saḥ || 68 ||
[Analyze grammar]

punardhṛto rājadūto punarluṃcāpradānataḥ |
bandhanānmuktimāsādya gato'raṇyaṃ punastathā || 69 ||
[Analyze grammar]

punaścauryaṃ samārebhe dhanāpaharaṇaṃ tathā |
janānāmardanaṃ cakre saṃghānāṃ luṇṭanaṃ tathā || 70 ||
[Analyze grammar]

punaśca nagare caurye kartuṃ rātrau yayau tadā |
manuṣyaiḥ sa durācāro nibaddho raśmibhirdṛḍhaiḥ || 71 ||
[Analyze grammar]

nigaḍairdaṇḍito rājñā kaśāghātaiśca tāḍitaḥ |
kārāgāraṃ yathādaṇḍaṃ kṣapayitvā punarhi saḥ || 72 ||
[Analyze grammar]

nirbandho vanamāsādya bhojanārthaṃ pradhāvati |
siṃhavadghātayatyugro mṛgaśūkaravānarān || 73 ||
[Analyze grammar]

āmiṣāhāranirato vane bhramati sarvathā |
kare dhanuḥ samāgṛhya dhṛtvā pṛṣṭhe niṣaṃgakam || 74 ||
[Analyze grammar]

āraṇyakān paśūn patatriṇo hanti padā caran |
cakravākānkapotāṃśca pārāvatāṃśca tittirān || 75 ||
[Analyze grammar]

kukkuṭān sārasān hanti mayūrānmūṣakānapi |
varāhān gavayāṃścaiva garuḍān hanti haṃsakān || 76 ||
[Analyze grammar]

etānanyān hinastyugro dhṛṣṭabuddhirhi nirdayaḥ |
pūrvapāpaiḥ pāpamārge pravṛttaḥ pāpakarmasu || 77 ||
[Analyze grammar]

duḥkhāviṣṭaḥ sukhaleśarahito'bhūdaharniśam |
evaṃ vṛkṣeṣu śaileṣu durge cāraṇyabhūmiṣu || 78 ||
[Analyze grammar]

anāsano'ṭati daivāt prāptaḥ kuṇḍinanāmakam |
puraṃ hyudyānaśobhāḍhyaṃ nikaṭe vanabhūmikam || 79 ||
[Analyze grammar]

nātidūre vane tatra kauṇḍinyākhyo mahānṛṣiḥ |
svāśrame vartate nityaṃ pānthānāṃ śāntisampradaḥ || 80 ||
[Analyze grammar]

atithīn satkarotyeṣo bhakṣyapānāsanādibhiḥ |
gato'yaṃ tvāśramadvāre muniṃ śrutvā tapodhanam || 81 ||
[Analyze grammar]

vaiśākhe māsi sarasi kṛtasnānaṃ tapodhanam |
āsasāda dhṛṣṭabuddhiḥ svoddhārodayasanmukhaḥ || 82 ||
[Analyze grammar]

pādayoḥ patitaḥ prahvībhāvenaivā''rdramānasaḥ |
tāvadṛṣerārdravastrabindavaḥ patitāstadā || 83 ||
[Analyze grammar]

mastake dhṛṣṭabuddhestu skandhayoḥ karayostathā |
nārāyaṇāya vidmahe vāsudevāya dhīmahi || 84 ||
[Analyze grammar]

vadato munirājasya śabdo'pi śravaṇe gataḥ |
evaṃ mantreṇa ṛṣiṇā salilena tu pāvitaḥ || 85 ||
[Analyze grammar]

caraṇasparśamātreṇa naṣṭapāpo babhūva saḥ |
mumukṣutāṃkurodbhedo jātastatra kṣaṇe'sya ca || 86 ||
[Analyze grammar]

kauṇḍinyasyā'grataḥ sthitvā samuvāca kṛtāṃjaliḥ |
bho bho brahmanmokṣadātardayāṃ kṛtvā mamopari || 87 ||
[Analyze grammar]

yena puṇyaprabhāveṇa muktirbhavati pāpinaḥ |
tādṛśaṃ puṇyakāryaṃ me vrataṃ vā vada mokṣadam || 88 ||
[Analyze grammar]

mahātmanāṃ prasaṃgena mahāpātakino'pi ca |
taranti pāvanā bhūtvā pāvayantyaparānapi || 89 ||
[Analyze grammar]

tasmāccauryasurāpānā''miṣabhakṣaṇamaithunam |
kṛtvā pāpadurācārān patito'smi ca sarvataḥ || 90 ||
[Analyze grammar]

pāvayitvedṛśaṃ māṃ ca mokṣabhājaṃ kuru prabho |
śrutvā prāha tadā kauṇḍinyarṣistaṃ śaraṇāgatam || 91 ||
[Analyze grammar]

vaiśākhasya site pakṣe mohinī nāma viśrutā |
ekādaśī bhavatyeṣā vrataṃ tasyāḥ samācāra || 92 ||
[Analyze grammar]

merutulyāni pāpāni kṣayaṃ yāsyanti tadvratāt |
bahujanmārjitānyāśu naśyanti vratino dhruvam || 93 ||
[Analyze grammar]

iti kauṇḍinyasadvācaṃ śrutvā dhṛṣṭasudhīstadā |
vrataṃ cakāra vidhivat kauṇḍinyāśramasannidhau || 94 ||
[Analyze grammar]

dhautapāpo'bhavacchuddho vāsanā'sya layaṃ gatā |
āyuścāpi gataṃ tvantaṃ karmaleśo na vidyate || 95 ||
[Analyze grammar]

dvādaśyāṃ saḥ phalapatrāhāraḥ san sarasastaṭe |
supto muniṃ smaran kṛṣṇaṃ nārāyaṇaṃ bhajan raṭan || 96 ||
[Analyze grammar]

śarīraṃ bhautikaṃ tyaktvā divyadeho babhūva saḥ |
jagāma vaiṣṇavaṃ lokaṃ garuḍopari saṃsthitaḥ || 97 ||
[Analyze grammar]

evaṃ lakṣmi mohinīsadvrataṃ mokṣapradaṃ śubham |
nātaḥ parataraṃ kiñcit trailokye sacarācare || 98 ||
[Analyze grammar]

yajñāditīrthadānāni kalāṃ nārhanti ṣoḍaśīm |
vratasyā'syā'ghaharturvaiṃ mokṣadāturharerbalāt || 99 ||
[Analyze grammar]

māyāmohaprasaktānāṃ mohinī mohanāśinī |
brahmapūjātiriktānāṃ mohinī mohanapradā || 100 ||
[Analyze grammar]

mohaṃ nāsti yato yasyāṃ mohinī procyate tataḥ |
mohī pāpī yayā dhāmni svarge vā nīyate tu sā || 101 ||
[Analyze grammar]

mohinī kṛṣṇasambandhātprocyate nityasaukhyadā |
koṭiyajñaphalādhikyaphaladātrī vratena sā || 102 ||
[Analyze grammar]

pālanīyā prayatnena svargamokṣaphalapradā |
pūrvajanmakṛtā'nekakarmapāpāpanuttaye || 103 ||
[Analyze grammar]

vaiṣṇavena viśeṣeṇa kartavyā mohaśāntaye |
kṛṣṇanārāyaṇapādāmbujamohābhilabdhaye || 104 ||
[Analyze grammar]

putrapautradhanadārāsmṛddhiyānagṛhādikam |
sakāmo labhate sarvaṃ vratenā'syāḥ kṛtena yat || 105 ||
[Analyze grammar]

labheddhanaṃ dhanahīno hyabuddho buddhimāpnuyāt |
yadyatsaṃkalpayeccāpi saṃprāpnuyāttu tadvratī || 106 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne vaiśākhaśuklamohinyekādaśīvratamāhātmyaṃ dhṛṣṭabuddhināmnaḥ pāpivaiśyasya kauṇḍinyopadeśād vratakaraṇena muktirityādinirūpaṇanāmaikonapañcāśadadhikadviśatatamo'dhyāya || 249 ||
[Analyze grammar]