Chapter 250

śrīlakṣmīruvāca |
loke ca prāṇināṃ rītirnaisargikī tu keśava |
bhakṣye pāne tathā''nande'laṃkāre viṣaye priye || 1 ||
[Analyze grammar]

mānavāstu tathā martye vidhiṃ vismṛtya mānavam |
yānti te pāśave mārge dehendriyā'sutarpaṇāḥ || 2 ||
[Analyze grammar]

teṣāṃ muktikaraṃ saumyaṃ vrataṃ nārāyaṇa prabho |
ekādaśyā vratādanyannāsti drāṅ mokṣadaṃ khalu || 3 ||
[Analyze grammar]

śrutvaitanmānasaṃ me'tiprasannaṃ bhavati prabho |
śrotumicchāmi māhātmyaṃ vidhiṃ prapūjanaṃ vratam || 4 ||
[Analyze grammar]

jyeṣṭhakṛṣṇaikādaśikātithestad vad keśava |
kiṃ nāmnyekādaśī ko'syā devaḥ pūjyaśca kiṃ phalam || 5 ||
[Analyze grammar]

nārāyaṇa uvāca |
ekādaśī tvaparākhyā mahāpātakanāśinī |
jyeṣṭhakṛṣṇadalīyā vai putrapautrapradāyinī || 6 ||
[Analyze grammar]

asyā adhipatirdevo hariḥ svayamadhokṣajaḥ |
patnyā trayyākhyayā yuktaḥ pūjanīyo vidhānataḥ || 7 ||
[Analyze grammar]

ketakairarcanīyo'sau tathā'nyaiḥ kusumaiḥ śubhaiḥ |
arghye bahuphalaṃ deyaṃ dugdhaudanādi bhojane || 8 ||
[Analyze grammar]

śārkaraṃ tu jalaṃ śītaṃ pānārthaṃ deyamuttamam |
savatsāyāśca gordānaṃ gurave'tra prakīrtitam || 9 ||
[Analyze grammar]

daśamyāmekabhuktena naktena nirvahed vratī |
rātrau bhūśayanaṃ kuryād rakṣayed brahmacāritām || 10 ||
[Analyze grammar]

ekādaśyāṃ samutthāya brāhmakāle hariṃ smaret |
svarṇakeśaṃ padmanetraṃ tilapuṣpasunāsikam || 11 ||
[Analyze grammar]

sakuṇḍalaṃ samukuṭaṃ keyūrakaṭakānvitam |
raktādharaṃ sucibukaṃ vartulānanaśobhitam || 12 ||
[Analyze grammar]

hasantaṃ kundakalikāpaṃktibhāsuradantakam |
prodbhinnayauvanopetaṃ tejomaṇḍalamaṇḍitam || 13 ||
[Analyze grammar]

hāraratnābharaṇādibhūṣitaṃ sevitaṃ janaiḥ |
rūpānurūpāvayavaṃ prasannamukhapaṃkajam || 14 ||
[Analyze grammar]

ceto harantaṃ bhaktasya kaṭākṣaśarakāriṇam |
divyānandabharaṃ kṛṣṇaṃ koṭikandarpasundaram || 15 ||
[Analyze grammar]

dhyāyedevaṃ hariṃ kṛṣṇaṃ paramātmānamīśvaram |
tataḥ snātvā pūjayecca vidhinā svāminaṃ prabhum || 16 ||
[Analyze grammar]

āvāhanādiṣoḍaśavidhānaiḥ pūjayetprabhum |
puṣpāṃjalipraparyantaṃ naityakaṃ pūjanaṃ vratī || 17 ||
[Analyze grammar]

vidhāya prārthayedante vratavighnapraśāntaye |
aparāyā vrataṃ tvadya kariṣye parameśvara || 18 ||
[Analyze grammar]

avighnaṃ tatprapūrṇaṃ me bhavatviti tato vratī |
maṇḍalaṃ sarvatobhadraṃ kārayedakṣatādibhiḥ || 19 ||
[Analyze grammar]

ghaṭaṃ saṃsthāpya sauvarṇaṃ sajalaṃ tāmramityatha |
pañcaratnādisaṃyuktaṃ vastrapallavaśobhitam || 20 ||
[Analyze grammar]

pūjayettaṃ ca tīrthāni jale tvāvāhayet tataḥ |
mūrtiṃ trayyā sahā'dhokṣajasya kundananirmitām || 21 ||
[Analyze grammar]

ghaṭamūrdhni tilapātre prasaṃsthāpya prapūjayet |
āvāhanātsamārabhya yathā visarjanāvadhim || 22 ||
[Analyze grammar]

snānālaṃkārasaugandhyanaivedyajalavīṭikām |
ārārtrikastutipuṣpāṃjalikṣāntisamarthanām || 23 ||
[Analyze grammar]

nirvartayitvā dānāni vividhāni tu dāpayet |
madhyāhne'pi tathā kuryāt pūjanaṃ homamityapi || 24 ||
[Analyze grammar]

trayyā'dhokṣajanāmnā vai hyaṣṭottaraśataṃ vratī |
naivedyaṃ miṣṭamarpayya tāmbūlādi samarpayet || 25 ||
[Analyze grammar]

sāyaṃ tu maṇḍapaṃ ramyaṃ haritaṃ kadalīkṛtam |
navapallavapuṣpāḍhyaphalayuktoraṇānvitam || 26 ||
[Analyze grammar]

savitānaṃ suraṃgālicitraśobhācamatkṛtam |
kārayet tatra dolāyāmāndālayettu mādhavam || 27 ||
[Analyze grammar]

jalaphuvvārasaṃsiktaśītalodyānamadhyagam |
siṃhāsanasthitaṃ cādhokṣajaṃ viñjyāt tato vratī || 28 ||
[Analyze grammar]

kṛtvaivaṃ tu mahāpūjāṃ harerniśi prakārayet |
ārārtrikādikaṃ cātha naivedyaṃ dadhiśarkaram || 29 ||
[Analyze grammar]

āmramiṣṭarasāḍhyaṃ ca pūrikādiyutaṃ śubham |
arpayet naktabhojyaṃ ca tāmbūlādi samarpayet || 30 ||
[Analyze grammar]

kalpayecchayanārthaṃ ca paryaṃkaṃ preṃkhayānvitam |
nimbavṛkṣapraśākhāyāṃ vyomni baddhaṃ sudolakam || 31 ||
[Analyze grammar]

komalaṃ gendukādyaṃ cāstaraṇaṃ cāpi kalpayet |
bhagavantaṃ ghṛtadīpaprakāśe tatra dolayet || 32 ||
[Analyze grammar]

nṛtyaṃ gītaṃ kīrtanaṃ ca smaraṇaṃ bhajanaṃ tathā |
kuryurjāgaraṇaṃ bhaktā militvā harisannidhau || 33 ||
[Analyze grammar]

ekādaśyāḥ kathāṃ tatra śṛṇuyācca paṭhecca vā |
līlādīni harestatra śrāvayed vadanādinā || 34 ||
[Analyze grammar]

akhaṇḍanāmabhajanaṃ saśabdaṃ niśi kārayet |
bhaktebhyo miṣṭasalilaṃ tathā phalādi cārpayet || 35 ||
[Analyze grammar]

payo dadyātkaṇṭhaśāntyai dadyāttvanyadapekṣitam |
sādhūnāṃ ca satīnāṃ ca sādhvīnāṃ yogināṃ tathā || 36 ||
[Analyze grammar]

sevanaṃ pādasaṃvāhaṃ kuryācchramāpanodanam |
evaṃ jāgaraṇaṃ kuryānnindāṃ kutsāṃ vivarjayet || 37 ||
[Analyze grammar]

divyāṃ dṛṣṭiṃ prakuryāccā'dhokṣajaṃ cintayeddhṛdi |
śubhaṃ sarvaṃ caredekādaśījāgaraṇavratī || 38 ||
[Analyze grammar]

ālasyapṛṣṭhabhaṃgādi nāśayed rāsakarmaṇā |
kūrdanaṃ gāyanaṃ nṛtyaṃ hāsyaṃ kuryātpunaḥ punaḥ || 39 ||
[Analyze grammar]

nidrā''lasyavināśārthaṃ dhāvanaṃ sapradakṣiṇam |
kuryācca khelanaṃ bhakto bhakteṣu samavartiṣu || 40 ||
[Analyze grammar]

kṛṣṇalīlāṃ rāsalīlāṃ dānilīlāṃ prakhelayet |
gopīlīlāṃ rādhayā saṃvihāraṃ ca vane'ṭanam || 41 ||
[Analyze grammar]

padmayā saha lagnaṃ ca bhārgavyā ramayā saha |
nārāyaṇasya lagnaṃ ca protsavātmakamācaret || 42 ||
[Analyze grammar]

rātrau mahotsavaṃ kuryāt kṛṣṇasya gopikākṛtam |
pārvatyā prabhayā māṇikyā lakṣmyā sākameva vā || 43 ||
[Analyze grammar]

vaivāhikotsavaṃ kuryād brahmaṇaḥ paramātmanaḥ |
pragāyejjanmapadyāni śaktyutpattyutsavāṃstathā || 44 ||
[Analyze grammar]

kīrtayejjāgaraṇe ca prātaḥ snātvā prapūjayet |
ṣoḍaśakopacārādyaiḥ pūjayeccāpyadhokṣajam || 45 ||
[Analyze grammar]

trayīṃ tvekādaśīṃ cāpi guruṃ prapūjayettataḥ |
gurostu mastake kṛṣṇamastaka vartate sadā || 46 ||
[Analyze grammar]

gurornetre kṛṣṇanetraṃ gurvāsye tvānanaṃ hareḥ |
guroḥ karṇe kṛṣṇakarṇaḥ harerjihvā gurormukhe || 47 ||
[Analyze grammar]

guroḥ kaṇṭhe hareḥ kaṇṭho gurvoṣṭhe mādhavādharaḥ |
gurorvakṣasi kṛṣṇoro hyudaraikyaṃ harerguroḥ || 48 ||
[Analyze grammar]

gurorhaste harerhasto guroḥ kaṭyāṃ hareḥ kaṭiḥ |
guroḥ pṛṣṭhe hareḥ pṛṣṭhaṃ hṛdayaikyaṃ harerguroḥ || 49 ||
[Analyze grammar]

gurorbuddhau harerbuddhirgurorvāci harestu vāk |
gurorgupte harerguptaṃ guroḥ sakthnorharerurū || 50 ||
[Analyze grammar]

gurostvakṣu harestvag vai gurordehe harerbalam |
gurorjānvorharerjānū nakhaikyaṃ ca gurorhareḥ || 51 ||
[Analyze grammar]

guroḥ pāde kṛṣṇapādo nakhaikyaṃ ca gurorhareḥ |
gurau kṛṣṇaḥ svayaṃ tvāste nānyaḥ kṛṣṇo guroḥ paraḥ || 52 ||
[Analyze grammar]

guruḥ kṛṣṇaḥ kṛṣṇo gurustasmai śrīgurave namaḥ |
iti dhyātvā guruṃ samyak pūjayet kṛṣṇabhāvataḥ || 53 ||
[Analyze grammar]

arpayeccāpi gurviṣṭaṃ gurau tuṣṭe sa toṣitaḥ |
gurostu sevane kṛṣṇasevāpuṇyaṃ bhaveddhruvam || 54 ||
[Analyze grammar]

bodhyaṃ gurvarpaṇaṃ kṛṣṇārpaṇaṃ nāstyatra saṃśayaḥ |
ahaṃ lakṣmi praśiṣyāṇāṃ gururūpo bhavāmi hi || 55 ||
[Analyze grammar]

gurau sthitvā divyasevāṃ gṛhṇāmi bhattasatkṛtām |
yena kena prakāreṇa dānenā'bhyarcanena vā || 56 ||
[Analyze grammar]

namanenārpaṇenāpi sevanena stavena ca |
pādasaṃvāhanenāpi priyavastvarpaṇena vā || 57 ||
[Analyze grammar]

gṛhādikaṃ samarpyāpi toṣaṇīyo guruḥ sadā |
tasmādekādaśīvastudānaṃ śrīgurave'rpayet || 58 ||
[Analyze grammar]

patiṃ patnīṃ sutaṃ putrīṃ kuṭumbaṃ sarvamityapi |
tārayeddhi gurustuṣṭastasmātkṛṣṇātmako guruḥ || 59 ||
[Analyze grammar]

evaṃ jñātvā dvādaśyāṃ vai dānaṃ tu gurave'rpayet |
pāraṇāṃ kārayed viprān sādhūn sādhvīśca bhojayet || 60 ||
[Analyze grammar]

bālān kanyā bhojayecca dadyād dānāni bhūriśaḥ |
evaṃ vratī bhuvi svarge vairājake'pi vā || 61 ||
[Analyze grammar]

aiśvare'vyākṛte cāpi śāśvataṃ sukhamāpnuyāt |
loke prasiddhatāṃ yāti tvaparāṃ yastu sevate || 62 ||
[Analyze grammar]

brahmahatyāgotrahatyābhrūṇahatyākarastathā |
strīhatyāmitrahatyādipāpakṛnmucyate vratāt || 63 ||
[Analyze grammar]

parāpavādanirataḥ parastrīratikastathā |
aparāvratalābhena vipāpmā jāyate janaḥ || 64 ||
[Analyze grammar]

kūṭasākṣī kūṭamātā kūṭakapaṭakārakaḥ |
kūṭavāk piśunaścaite mucyante pāpato drutam || 65 ||
[Analyze grammar]

kūṭavedaḥ kūṭaśāstraḥ kūṭajyotirgaṇastathā |
kūṭāyurvedako vaidyo mucyate'syā vratena vai || 66 ||
[Analyze grammar]

brāhmaṇā brahmapatitāḥ kṣatriyā rakṣaṇāccyutāḥ |
vaiśyāḥ parāṅmukhā dānānmucyante'syā vratena te || 67 ||
[Analyze grammar]

dharmabahiṣkṛtāḥ śūdrāḥ śiṣyā gurvādinindakāḥ |
putro mātāpitṛhāpi mucyante'syā vratena vai || 68 ||
[Analyze grammar]

makarasthe ravau māghe prayāge yatphalaṃ nṛṇām |
kāśyāṃ ca prāpyate puṇyaṃ śivarātryā vratena yat || 69 ||
[Analyze grammar]

gayāpiṇḍena puṇyaṃ yat pitṝṇāṃ tṛptidaṃ matam |
siṃhasthite bṛhaspatau godāvaryāṃ ca yatphalam || 70 ||
[Analyze grammar]

kedāradarśanātpuṇyaṃ badarītīrthajaṃ phalam |
kurukṣetre ravigrāhe sarvatīrthaprasevanāt || 71 ||
[Analyze grammar]

gajāśvahemadānena yajñaṃ kṛtvā sadakṣiṇam |
yatphalaṃ tatphalaprāptiraparāvratasevanāt || 72 ||
[Analyze grammar]

aghavṛkṣakuṭhārīyaṃ doṣāraṇyadavānalaḥ |
pāpā'ndhakārataraṇirduritamṛgasiṃhikā || 73 ||
[Analyze grammar]

muktidā bhuktidā yāvadiṣṭadā hyaparā matā |
asyā vratena yatpuṇyaṃ paraṃ yasmānna śiṣyate || 74 ||
[Analyze grammar]

aparā kṛṣṇayogātsā sārthakā vratakāriṇām |
anyāsāṃ tu vratairatra khaṇḍapuṇyaṃ hi labhyate || 75 ||
[Analyze grammar]

aparāyā vratenātra sārvabhaumaphalaṃ bhavet |
nāsti yadvratinaścātrā'labhyaṃ kiñcid bhavediti || 76 ||
[Analyze grammar]

śrotā ca pāṭhako lakṣmi gosahasraphalaṃ labhet |
vratī pāpāni nirdhūya viṣṇuloke mahīyate || 77 ||
[Analyze grammar]

parāścānyā yadagre vai svalpā bhavanti tejasā |
aparā sā yataḥ proktā nāsti yasyāḥ paraṃ param || 78 ||
[Analyze grammar]

aparāṃ samupoṣyaiva pūjayitvā tvadhokṣajam |
trayīpatnyā sahitaṃ ca vajralepātpramucyate || 79 ||
[Analyze grammar]

niṣkṛtiśūnyapāpānāṃ niṣkṛtiriyamucyate |
agatikasya jīvasya gatirevā'parāvratam || 80 ||
[Analyze grammar]

śṛṇu lakṣmi samākhyānaṃ śalabhāyāḥ kṛte yuge |
yatinyāḥ saṃbabhūvāścaryānvitaṃ mokṣadaṃ śubham || 81 ||
[Analyze grammar]

śalabhānāmayatinī dīkṣāṃ bhāgavatīṃ gatā |
sādhvī nārāyaṇaṃ devaṃ bhajatyeva divāniśam || 82 ||
[Analyze grammar]

araṇye parvate sā cā'rbudākhye puṣkarāntike |
vicaratyaniśaṃ tvekākinī yogabalāttu sā || 82 ||
[Analyze grammar]

ābālyātsā sanakasyā'bhavacchiṣyātiyoginī |
lakṣavarṣe gate kāle yauvane'tibale gate || 84 ||
[Analyze grammar]

vane vanapaśusiṃhasiṃhikāmaithunakriyām |
vīkṣya cānyāraṇyavāsikāmayogān punaḥ punaḥ || 85 ||
[Analyze grammar]

kāmadevasya saukhye'syā manovṛttirajāyata |
vānaraṃ raktavarṇaṃ vai vanyaṃ sā svāśramasthitam || 86 ||
[Analyze grammar]

dhṛtvā taṃ ramayāmāsa nityadā kāmabhāvataḥ |
vānarasya tu yogena garbho jāto vyavardhata || 87 ||
[Analyze grammar]

paśoryogena sāṃkaryaṃ pātakaṃ muktināśanam |
śrutvā vaśiṣṭhaśiṣyātsā vedaśrutābhidhāttadā || 88 ||
[Analyze grammar]

paścāttāpaṃ para prāptā sanakasyāśramaṃ gatā |
śiṣyāyāstvantarvatnītvaṃ dṛṣṭvā''ha sanakastu tām || 89 ||
[Analyze grammar]

kimidaṃ vai sute jātaṃ brahmacaryaṃ vilopitam |
tathāpi gurave sarvaṃ hyakāpaṭyena varṇitam || 90 ||
[Analyze grammar]

saṃkarīkaraṇasyāsya pātitvasyā'pyaghasya tu |
yena nāśo bhavecchuddhiryathā jāyeta tadvada || 91 ||
[Analyze grammar]

ityabhyarthya sagarbhā sā ruroda khinnamānasā |
garbhapāte'tipāpitvaṃ bhrūṇahatyādipātakam || 92 ||
[Analyze grammar]

kathaṃ me mama garbhasya nairdoṣyaṃ saṃbhavediti |
vicā vidadhānāṃ tāṃ sanakaḥ prāha saṃśṛṇu || 93 ||
[Analyze grammar]

jyeṣṭhakṛṣṇā'paraikādaśyā vrataṃ nirjalaṃ kuru |
pātakaṃ te vinaṣṭaṃ syātprārabdhaṃ pūrṇatāṃ vrajet || 94 ||
[Analyze grammar]

muktiścāpi sulabhā syātprasavāt prāg vrataṃ kuru |
iti śrutvā guruṃ natvā gatvā svāśramamarbude || 99 ||
[Analyze grammar]

cakāra vidhivatsarvam aparāyā vrataṃ śubham |
tena śuddhiṃ gatā tasyāḥ pātityaṃ vilayaṃ gatam || 96 ||
[Analyze grammar]

āyuśca sāntamabhavat sthiravṛttyā tvadhokṣaje |
ātmānaṃ yojayitvā ca brahmarandhreṇa sā tataḥ || 97 ||
[Analyze grammar]

brahmalokaṃ gatā nītvā garbhādhānasthacetanam |
dehaṃ tyaktvā parāṃ muktimaparāvratato gatā || 98 ||
[Analyze grammar]

aparāyā vrataṃ tvevaṃ pāpasāṃkaryanāśanam |
kartavyaṃ sarvathā lakṣmi sadā nāryā'pi śuddhaye || 99 ||
[Analyze grammar]

yatinā brahmaniṣṭhena yoginā nyāsinā'pi ca |
saṃkarīkaraṇā'ghasya śāntaye kāryameva tat || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne jyeṣṭhakṛṣṇā'paraikādaśīvratamāhātmyaṃ saṃkarīkaraṇādipātakanāśakaitadvratakaraṇena vānarayogāt garbhavatyāḥ śalabhāyatinyā nirdoṣatā muktiścetyādinirūpaṇanāmā paṃcāśadadhikadviśatatamo'dhyāyaḥ || 250 ||
[Analyze grammar]