Chapter 243

śrīlakṣmīruvāca |
hare kṛṣṇa kṛpāsindho jagaduddhārakāraka |
māghaśuklaikādaśīṃ me kathayasva prasādataḥ || 1 ||
[Analyze grammar]

ko vidhiḥ ko'dhidevo'tra vratasya phalamityapi |
kathayasvodyāpanaṃ ca vratino bhuktimuktidam || 2 ||
[Analyze grammar]

śrīnārāyaṇa uvāca |
śṛṇu lakṣmi māghaśukle jayānāmetipuṇyadā |
pāpahantrī mokṣakartrī kāmadātrī sukhapradā || 3 ||
[Analyze grammar]

ekādaśī samākhyātā kartavyā vratinā śubhā |
brahmahatyādihantrī ca piśācatvādināśinī || 4 ||
[Analyze grammar]

sarvasampatkarī rājñāṃ saṃgrāme jayadāyinī |
svarge jayapradā loke vyavahāre jayapradā || 5 ||
[Analyze grammar]

yatra kutrāpi kārye sā kṛtā jayaphalā matā |
tatphalaṃ jayadaṃ proktaṃ triṣu lokeṣu yāyinām || 6 ||
[Analyze grammar]

etasmātkāraṇāllakṣmi kartavyā sā prayatnataḥ |
daśamyāmekabhuktena naktamātreṇa vā svayam || 7 ||
[Analyze grammar]

dehayātrāṃ nirvahaṃśca rātrau bhūśayanaṃ caret |
prātarutthāya ca brāhme muhūrtte śrīhariṃ smaret || 8 ||
[Analyze grammar]

śaucasnānādikaṃ kṛtvā sandhyāvandanamācaret |
gāyatrīṃ ca japitvā'tha hareḥ pūjāṃ samācaret || 9 ||
[Analyze grammar]

nityayā saha saṃpūjyo mādhavastatpatiḥ prabhuḥ |
pañcāmṛtena vai pūrvaṃ snāpayedabhiṣecanaiḥ || 10 ||
[Analyze grammar]

śuddhatīrthajalaiḥ kṛṣṇaṃ snāpayellepayed dravam |
sugandhasārottamatailacandanādi vilepayet || 11 ||
[Analyze grammar]

punaśca snāpayettīrthajalairvastrāṇi dhārayet |
mukuṭaṃ kuṇḍale hārān kaṭakāṃgadasūrmikāḥ || 12 ||
[Analyze grammar]

śṛṅkhalāraśanāratnahīrakādikṛtāni ca |
vibhūṣaṇāni sarvāṇi tathā divyāni dhārayet || 13 ||
[Analyze grammar]

gulālākṣatakuṃkumābīraiḥ saṃpūjayet prabhum |
dhūpadīpaistathā puṣpairbakulasya prapūjayet || 14 ||
[Analyze grammar]

tatkālaprodbhavaiścānyaiḥ kamalai sthalapadmakaiḥ |
śṛṅgārahāraiḥ satpatraistulasīmaṃjarīyutaiḥ || 19 ||
[Analyze grammar]

pūjayecchrīhariṃ cātha candanairgandhivastubhiḥ |
miṣṭānnāni tu naivedye bījapūraphalāni ca || 16 ||
[Analyze grammar]

maṇḍakā laḍḍukā mudgabhavā meśubhamauktikāḥ |
dātavyā haraye dugdhapākaḥ sugandhamiśritāḥ || 17 ||
[Analyze grammar]

dāḍimaṃ navaraṃgaṃ ca nārikelaphalaṃ tathā |
dātavyāni tathā drākṣāphalāni kadalāni ca || 18 ||
[Analyze grammar]

ārārtrikaṃ tathā kāryaṃ pradakṣiṇādikaṃ tataḥ |
puṣpāṃjaliṃ kṣamāṃ prārthya tato vai vratamarthayet || 19 ||
[Analyze grammar]

adyā'haṃ vai jayānāmnyā ekādaśyā vrataṃ śubham |
karomi kṛṣṇa te'tīva prasannatvaprasaktaye || 20 ||
[Analyze grammar]

tad vrataṃ me prasaṃpūrṇaṃ bhavatvatra kṛpāṃ kuru |
iti prārthya tato natvā devadevaṃ ca mādhavam || 21 ||
[Analyze grammar]

śobhitaṃ saptadhānyaiḥ san maṇḍalaṃ kārayed vratī |
madhye svarṇaghaṭaṃ saṃsthāpayet tāmraghaṭaṃ ca vā || 22 ||
[Analyze grammar]

pañcapallavaratnādijalavastrādiśobhite |
tilapātraṃ ghaṭe tatra sthāpayet phalasaṃyutam || 23 ||
[Analyze grammar]

ghaṭaṃ prapūjayettatra tīrthānyāvāhayettathā |
svarṇamūrtiṃ mādhavasya jayayā saha nirmitām || 24 ||
[Analyze grammar]

nityayā ca tathā patnyā sahitāṃ sthāpayettathā |
pūjayeccāvāhanādikrameṇa snāpayettathā || 25 ||
[Analyze grammar]

vibhūṣayettathā puṣpabhojanādi samarpayet |
ṣoḍaśopasuvastvādyairarcayedbahubhāvataḥ || 26 ||
[Analyze grammar]

jalapānaṃ samarpyā'tha nīrājayecca mādhavam |
tāmbūlaṃ cārpayettatrā'parādhāṃśca kṣamāpayet || 27 ||
[Analyze grammar]

vratārthaṃ prārthayet pūrṇaṃ vrataṃ me ca bhavediti |
gośca prapūjanaṃ kuryād godānaṃ cāpi kārayet || 28 ||
[Analyze grammar]

bhūdānaṃ vastradānaṃ ca svarṇadānaṃ ca kārayet |
paścātpūjāṃ samāpyaivaṃ kuryātkāryaṃ svakaṃ dine || 29 ||
[Analyze grammar]

madhyāhne'pi tathā bhakṣyabhojyalehyasucośyakam |
annaṃ caturvidhaṃ dadyāddevāya mādhavāya vai || 30 ||
[Analyze grammar]

sāyaṃ niśi tathā kṛṣṇapūjārthaṃ maṇḍapaṃ śubham |
kārayettu mahāntaṃ ca tatrolleccaṃ prabandhayet || 31 ||
[Analyze grammar]

pūjanaṃ śrīhareḥ kṛtvā nīrājayedvidhānataḥ |
naivedyaṃ ca kṣamā'dānaṃ kṛtvā tato hareḥ puraḥ || 32 ||
[Analyze grammar]

maṇḍape rāsarītyā śrīhareḥ padyāni gāpayet |
kuryājjāgaraṇaṃ rātrau raṃjayetkṛṣṇamatyati || 33 ||
[Analyze grammar]

bhaktairnṛtyaṃ kīrtanaṃ ca savāditraṃ ca jāgaram |
kartavyaṃ ca tataḥ prātaḥ snātvā'rcyo mādhavaḥ prabhuḥ || 34 ||
[Analyze grammar]

dānāni vividhānyeva deyāni ca yathābalam |
sādhūn sādhvīrbrāhmaṇāṃśca bhojayecca niveditam || 35 ||
[Analyze grammar]

tataḥ svayaṃ pāraṇāṃ ca kuryādevaṃ vrataṃ kṛte |
phalaṃ pūrṇaṃ bhavatyeva vijayaḥ sarvathā bhavet || 36 ||
[Analyze grammar]

śṛṇu tvatra vrate pūrvāṃ kathāṃ lakṣmi vadāmi te |
svarge loke mahendre vai śāsati devatāgaṇāḥ || 37 ||
[Analyze grammar]

vasanti sukhinaḥ sarve pīyūṣapānapoṣitāḥ |
apsarobhiśca devībhiḥ parībhiśca samarcitāḥ || 38 ||
[Analyze grammar]

pūjitāḥ sukhitā devā ramante nandane vane |
ramayanti ca devīśca nṛtyanti kīrtayanti ca || 39 ||
[Analyze grammar]

nandanākhye vane divye svargaṃgā yā jalāntike |
udyāne puṣpaśobhāḍhye sugandhyanilasevite || 40 ||
[Analyze grammar]

pravṛttaṃ nartanaṃ cāpsarasāmindrasya tuṣṭaye |
gandharvāstatra gāyanti nṛtyantyapsarasastadā || 41 ||
[Analyze grammar]

vādayanti ca gandharvāstālasyā''pūrikāḥ striyaḥ |
evaṃ tu gāyane nṛtye pravṛtte'tipraharṣataḥ || 42 ||
[Analyze grammar]

darśako'pi mahendraḥ svecchayā raṅge hyupasthitaḥ |
nanartendraḥ saharṣaḥ svapañcāśatkoṭināyakaḥ || 43 ||
[Analyze grammar]

gandharvāḥ sahagāyanti puṣpadantaśca susvaraḥ |
citrasenastathā tasya patnī puṣpavatī tathā || 44 ||
[Analyze grammar]

puṣpadantasya putraśca mālyavānnāmatastathā |
puṣpavatyāḥ svarūpe ca mālyavānmohitastadā || 45 ||
[Analyze grammar]

puṣpavatyā kaṭākṣaiśca mālyavān svavaśe kṛtaḥ |
puṣpavatī mālyavāṃśca nṛtyārthamindratuṣṭaye || 46 ||
[Analyze grammar]

samāgatau ca kāmena parītāṃgau babhūvatuḥ |
cittabhramasamāyuktau kāmabāṇavaśaṃgatau || 47 ||
[Analyze grammar]

gāyataḥ śuddhagānaṃ na baddhadṛṣṭī ca rāgataḥ |
nṛtyatīndrastu vai samyaṅ nṛtyānusāri gāyanam || 48 ||
[Analyze grammar]

tayoḥ kṣatiṃ samagacchattālamānavilopanam |
cintayitvā tu maghavā saṃgataṃ mānasaṃ tayoḥ || 49 ||
[Analyze grammar]

samakālīnavaigaṇyaṃ tāle māne ca gāyane |
kramalopaṃ paraṃ dṛṣṭvā matvā'vajñāṃ tathā''tmanaḥ || 50 ||
[Analyze grammar]

kupitaśca tayostatra śaśāpa ca vadannidam |
dhiṅyuvā patitau mūḍhau manmahattāprabhaṃjakau || 51 ||
[Analyze grammar]

svarge viṣayabāhulye bhujyamāne'pi sarvadā |
tṛptirnāsti na me śreṣṭhyamaryādārakṣaṇe matiḥ || 52 ||
[Analyze grammar]

nṛtyakāle mama dākṣye protsāhe'pi yuvāṃ yataḥ |
vigaṇayya sabhāmadhye nṛtyaṃ vai mohitau kimu || 53 ||
[Analyze grammar]

tasmāt piśācau bhavataṃ dampatīrupadhāriṇau |
na gandharvasthitiyogyau gauravabhaṃgakārakau || 54 ||
[Analyze grammar]

martyalokamanuprāptau bhuṃjānau karmaṇaḥ phalam |
duḥkhaṃ cānubhavantau vai tiṣṭhataṃ tu ciraṃ samāḥ || 55 ||
[Analyze grammar]

evaṃ mahendraśāpāttau himādrau tvatidāruṇe |
piśācatāṃ gatau duḥkhaistaptau śāntiṃ na ceyatuḥ || 56 ||
[Analyze grammar]

gandharvatvaṃ cāpsaratvaṃ vismṛtau ceraturvane |
tuṣāreṇātivegena pīḍyamāno muhurmuhuḥ || 57 ||
[Analyze grammar]

dantagharṣaṃ prakurvāṇau vadataśca parasparam |
piśācaḥ samuvāca svāṃ priyāṃ patnīṃ piśācikām || 58 ||
[Analyze grammar]

aho cālpāparādhasya phalaṃ duḥkhatamaṃ mahat |
narakaṃ dāruṇaṃ cedaṃ piśācarūpakaṃ khalu || 59 ||
[Analyze grammar]

kadā syādantavaccaitat kadā śāntirmiliṣyati |
śaityaṃ cātitamaṃ tvatra pīḍā tenātijāyate || 60 ||
[Analyze grammar]

iti cintāparau tau ca kṣudhāduḥkhātikarṣitau |
pippalākhyadevataroḥ stambe vāsaṃ pracakratuḥ || 61 ||
[Analyze grammar]

himapātena daśamīrātrau caikādaśīdine |
caikādaśyāstathā rātrau himajhaṃjhānilena tau || 62 ||
[Analyze grammar]

vepamānau bhojanārthaṃ nirgatau na svavāsataḥ |
daivayogātsa divaso māghasyaikādaśī jayā || 63 ||
[Analyze grammar]

upoṣitā niśā tābhyāṃ sujāgarayutā kṛtā |
tatrā''stāṃ tāvubhau bhojyajalapānādivarjitau || 64 ||
[Analyze grammar]

kaṣṭena himavātena sarvāhāravivarjitau |
na kṛto jīvaghātaśca na prāptaṃ phalabhakṣaṇam || 65 ||
[Analyze grammar]

na pānaṃ salilasyāpi jātaṃ nendriyaraṃjanam |
na ca nidrāpi saṃjātā na tau saukhyamavindatām || 66 ||
[Analyze grammar]

tayorduḥkhitayoritthaṃ nirjagāma niśīthinī |
prātaḥ sūryodaye prāpte dvādaśyāṃ ca mayā tayoḥ || 67 ||
[Analyze grammar]

pippalavṛkṣarūpeṇa kṛtā bhaktidhṛtā hṛdi |
aśvattho'haṃ hi vṛkṣāṇāṃ bhavāmi mūrtimān yataḥ || 68 ||
[Analyze grammar]

tayorāśrayadātā'haṃ vrataṃ jayātithestayoḥ |
gaṇayan jāgarāḍhyaṃ ca phalaṃ vratasya vai dadau || 69 ||
[Analyze grammar]

tena phalaprabhāveṇa piśācatvaṃ gataṃ tayoḥ |
divyarūpau tu gandharvau pūrvarūpau babhūvatuḥ || 70 ||
[Analyze grammar]

purātanasnehayutau pūrvālaṃkāraśobhitau |
puṣpāvatīmālyavantau vimānavaramāsthitau || 71 ||
[Analyze grammar]

gatau svargaṃ ca devendraṃ praṇāmaṃ cakraturmudā |
tau devau devagandharvau vīkṣyendro vismito'bravīt || 72 ||
[Analyze grammar]

vadataṃ kena puṇyena vinaṣṭā vāṃ piśācatā |
mama śāpāttu muninā kena vai mocitau yuvām || 73 ||
[Analyze grammar]

prā śca tadā tau taṃ daivayogena devarāṭ |
vāsudevaprasādena jayāyāstu vratena ca || 74 ||
[Analyze grammar]

piśācatvaṃ vinaṣṭaṃ nau tava bhaktiprabhāvataḥ |
śrutveti maghavā hṛṣṭaḥ punastāvāha cādarāt || 75 ||
[Analyze grammar]

yuvāṃ hareḥ kṛpāpātravaryau jātau vratāhataḥ |
tasmātpūjyau mama jātau vratapuṇyaprabhāvataḥ || 76 ||
[Analyze grammar]

sadā sudhāṃ tu pibata vacanānme'tiharṣataḥ |
ramethāṃ ca sadā svarge yathāsaukhyaṃ yuvāṃ priyau || 77 ||
[Analyze grammar]

harivrataprakartāro harerbhaktiparāyaṇāḥ |
martyā amartyā ye kecittvasmatpūjyāḥ sadaiva te || 78 ||
[Analyze grammar]

evaṃ lakṣmi ca tau gandharvīgandharvau piśācakau |
punarjātau svarnivāsau jayāyā vratavaibhavāt || 79 ||
[Analyze grammar]

etasmātkāraṇāllakṣmi kartavyaṃ ca jayāvratam |
jayā pāpaharā puṇyapradā svargapradā tathā || 80 ||
[Analyze grammar]

brahmahatyādipāpānāṃ nāśinī mokṣadāyinī |
sarvadānāni dattāni kṛtaṃ yena jayāvratam || 81 ||
[Analyze grammar]

sarve'pi kratavastena kṛtāḥ kṛte jayāvrate |
kṛtāḥ paropakārāśca kṛte śreṣṭhe jayāvrate || 82 ||
[Analyze grammar]

dhanadhānyasutapatnīgṛhagovājisatpatim |
labhate māghaśuklaikādaśījayāvratena vai || 83 ||
[Analyze grammar]

nātra paratra kiñcidvai durlabhaṃ vratino bhavet |
sulabhaṃ syāddhareryogād durlabhaṃ naiva vidyate || 84 ||
[Analyze grammar]

kartavyaṃ sarvathā tasmādvrataṃ jayāsuvāsare |
kalpakoṭiṃ vaset kartā vaikuṇṭhe modate dhruvam || 85 ||
[Analyze grammar]

vratasyāsya kathāyāśca śravaṇātpaṭhanādapi |
agniṣṭomaphalaṃ syādvai bhuktiṃ muktiṃ ca vindati || 86 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne māghaśuklajayaikādaśīvratamāhātmyaṃ mālyavatīmālyavannāmagandharvayoḥ piśācatva |
prāptayoḥ vratena muktirityādinirūpaṇanāmā tricatvāriṃśadadhikadviśatatamo'dhyāyaḥ || 243 ||
[Analyze grammar]