Chapter 244

śrīlakṣmīruvāca |
bhaktavallabha bhakteśa ramāvallabha matpate |
mama sarvasva gopāla lakṣmīpāla dayānidhe || 1 ||
[Analyze grammar]

dharmapāla sadācārapravartaka surārcita |
phālgunasya kṛṣṇapakṣe kā'bhidhā kathayasva sā || 2 ||
[Analyze grammar]

ekādaśyāstathā devaḥ kaḥ pūjyaḥ kīdṛśaṃ vratam |
kiṃ deyaṃ ca viśeṣeṇa tatsarvaṃ vada me hare || 3 ||
[Analyze grammar]

śrīnārāyaṇa uvāca |
phālgunasyā'site pakṣe vijayā nāma nāmataḥ |
ekādaśī matā sarvapāpakṣayakarī priye || 4 ||
[Analyze grammar]

pradyumno vratibhistatra pūjanīyo dhiyā saha |
pūjāyāṃ tulasī deyā phalaṃ jambīramarhaṇe || 5 ||
[Analyze grammar]

naivedye tu pradeyaṃ ca sohālikādi bhojanam |
dāne tūpānahau mukhyau yathāśraddhaṃ dhanādikam || 6 ||
[Analyze grammar]

ādarāccotsavaḥ kāryo viṣṇubhaktasamarhaṇam |
bhaktaiḥ śraddhāsamāyuktaistathā śrīśaparāyaṇaiḥ || 7 ||
[Analyze grammar]

kartavyaṃ ca prayatnenopoṣaṇaṃ vijayapradam |
yathā śuklā tathā kṛṣṇā hyupoṣyā dhyeyasiddhaye || 8 ||
[Analyze grammar]

asakṛjjaladugdhādipānānmithunasevanāt |
krodhanādaśrupātācca klośādikaraṇāttathā || 9 ||
[Analyze grammar]

cauryādidoṣaleśācca nopavāsaphalaṃ bhavet |
dānaṃ cātmavicāraśca dhyāna homo japo'rhaṇam || 10 ||
[Analyze grammar]

kartavyāni prayatnena vratinā phalakāṃkṣiṇā |
tajjapastatkathā śravyā hyekādaśyāṃ jayo bhavet || 11 ||
[Analyze grammar]

upavāsavirodhī cedannadarśanasaṃspṛśaḥ |
tyājyaḥ sa sarvathā sparśo hyupavāsadine priye || 12 ||
[Analyze grammar]

upavāsā'samarthastu kuryāt phalakṛtaṃ vratam |
mūlaṃ phalaṃ payastoyamupabhogyaṃ bhavecchubhe || 13 ||
[Analyze grammar]

aśaktasya tathā naktaṃ haviṣyānnamanodanam |
phalatilāśanaṃ cājyakṣīrāmbupānamityapi || 14 ||
[Analyze grammar]

gandhatāmbūlabhogāṃśca varjayed vratasiddhaye |
jāgaraṃ viṣṇupūjāṃ ca vinā tvardhaphalaṃ vratam || 15 ||
[Analyze grammar]

jāgaraṃ pūjanaṃ pūrṇaphaladaṃ vratino bhavet |
śṛṇu lakṣmi pravakṣyāmi vṛttāntaṃ vijayapradam || 16 ||
[Analyze grammar]

satyayugottare kāle jamadagnirmahāmuniḥ |
kauśikyāḥ sarito'raṇye hyavasaddhārmiko hi saḥ || 17 ||
[Analyze grammar]

snānasandhyādisatkarmaparaścāntaḥśuciḥ sadā |
dayādākṣiṇyamaunādikṣāntyādiguṇaśobhitaḥ || 18 ||
[Analyze grammar]

yajñayāgādinipuṇo devasevāparāyaṇaḥ |
yatkuṭyāṃ mūrtimānagnirjamatyarpitabhojanam || 19 ||
[Analyze grammar]

jamadagniḥ sa vai khyāto narmadātaṭamāvasan |
vrataṃ cāndrāyaṇaṃ kurvannārādhayati mādhavam || 20 ||
[Analyze grammar]

reṇukā tasya patnyāsīt sāpi dharmapativratā |
patidharmaparā sādhvī patiṃ saṃsevate'nvaham || 21 ||
[Analyze grammar]

yadṛcchālābhasantuṣṭau gate kālepi śāntigau |
brahma cārādhayatastau nāpatyaṃ prāpaturhi tau || 22 ||
[Analyze grammar]

ekadā reṇukā snātvā hareḥ pūjanapūrvikām |
patyuḥ pūjāṃ karoti sma tadā cintāṃ jagāma sā || 23 ||
[Analyze grammar]

patiḥ putrasvarūpeṇa jāyate iti vai śrutiḥ |
patirme darśanīyo'sti tathā putro'pi me bhavet || 24 ||
[Analyze grammar]

patirme navasṛṣṭeśca sarjane poṣaṇe'pi ca |
sṛṣṭeḥ saṃharaṇe cāpi samartho'sti tridevavat || 25 ||
[Analyze grammar]

devā yenā''kāritāścā''yānti yasya makhe'nvaham |
pūrayantīcchayā sarvaṃ tathā putro'pi me bhavet || 26 ||
[Analyze grammar]

kalpadrumāḥ kāmagāvo vasanti yasya mānase |
satpatirdevatulyo me bhavetputraḥ samīśitā || 27 ||
[Analyze grammar]

svargatulyāni saudhāni vaikuṇṭhasya samṛddhayaḥ |
golokasya rasā yasya saṃkalpe nivasanti hi || 28 ||
[Analyze grammar]

brahmatulyā pratiṣṭhā ca śaṃbhutulyā virāgatā |
śeṣasamāḥ siddhayaśca yatsaṃkalpe vasanti ca || 29 ||
[Analyze grammar]

muktiḥ karatale yasya lakṣmīścāśīrvaco'mṛte |
bhogāśca satyakāmādyā vasanti yasya sannidhau || 30 ||
[Analyze grammar]

vedā vidyāḥ kalā dākṣyaṃ yanmūrtau pravasanti ca |
brahmacaryādayaḥ sarve dharmāḥ santi ca yaddhṛdi || 31 ||
[Analyze grammar]

tasyarṣerjamadagneśca sutastatsadṛśo bhavet |
devā āśīḥpradānānme prayuñjantu sutāptaye || 32 ||
[Analyze grammar]

iti cintayamānaiva pūjayitvā svakaṃ patim |
dakṣapādāṃguṣṭhavāri hyapibad viṣṇumānasā || 33 ||
[Analyze grammar]

tāvattatrā'bhavadvāṇī vyomagā'timanoharā |
prasanno'smi ca te devi sadā te patisevayā || 34 ||
[Analyze grammar]

viṣṇurasti svāmirūpe sevāṃ gṛhṇan vasan sadā |
dadāmi te vaco devi reṇuke tava garbhajaḥ || 35 ||
[Analyze grammar]

bhavāmi tava putro'haṃ prabhuste patisadṛśaḥ |
nānyo'sti te patiprakhyaḥ patirūpo'smyahaṃ striyāḥ || 36 ||
[Analyze grammar]

tasmātpatyau kalpavṛkṣatulye kāmān dadāmi vai |
pativratābhyaḥ samyagvai vratasthābhyaḥ sutāṃstathā || 37 ||
[Analyze grammar]

śṛṇu mātarvrataṃ tatra kartavyaṃ ca tvayā yataḥ |
phaladaṃ putradaṃ loke khyātikṛnmokṣasādhanam || 38 ||
[Analyze grammar]

ekādaśyā vijayāyā vrataṃ saṃkalpapūrakam |
putraprāptau vijayaste bhaviṣyati yuge yuge || 39 ||
[Analyze grammar]

ityuktvā virarāmeyaṃ vāṇī ca reṇukāpi vai |
vrataṃ cakāra phālgunakṛṣṇaikādaśikātitheḥ || 40 ||
[Analyze grammar]

dānāni ca dadau viṣṇutuṣṭaye vividhāni hi |
prāpa putraṃ harestasya prasādācca vratāttathā || 41 ||
[Analyze grammar]

paraśurāmasaṃjño'sau viṣṇoraṃśo mahāprabhuḥ |
janmottaraṃ caturbāhuṃ rūpaṃ svaṃ dhṛtavān hariḥ || 42 ||
[Analyze grammar]

mātre svadarśanaṃ divyaṃ dadau śrīkamalāpatiḥ |
evaṃ kṛtvā vijayāṃ sā reṇukā sutavatyabhūt || 43 ||
[Analyze grammar]

śṛṇu priye tataścāyaṃ bālo viṣṇurdvijo'rbhakaḥ |
jamadagnisutaścāyaṃ munidharmaparo'bhavat || 44 ||
[Analyze grammar]

vipradharmānpālayaṃśca mānayan ṛṣidevatāḥ |
pūjayan śrīpatiṃ nityaṃ yajñopavītamāptavān || 45 ||
[Analyze grammar]

pitrā tu śikṣito vedānadhyagacchatsahāṃgakaiḥ |
vidyayā tejasā cānyo divākara ivābhavat || 46 ||
[Analyze grammar]

bālyādevābhavaccāpi pitranyūnaparākramaḥ |
trilokamārgāvyāhatagatikaḥ kamalāpatiḥ || 47 ||
[Analyze grammar]

viprakumāro brahmiṣṭho brahmacaryaparāyaṇaḥ |
yasya saṃdarśanānmuktiṃ yānti vai mānavā bhuvi || 48 ||
[Analyze grammar]

yasya saṃsevanād devā devatvaṃ svargasampadaḥ |
avāpuścānyajīvāśca lokapālakatāṃ parām || 49 ||
[Analyze grammar]

so'yaṃ bhikṣukakuṭyāṃ vai vartate'raṇyabhūmiṣu |
līlā nārāyaṇasyaiva dīnānāṃ mokṣakāriṇī || 50 ||
[Analyze grammar]

athaikadā śṛṇu lakṣmi jātaṃ kṣatraṃ samuddhatam |
gaṇayatyeva naiva svapūjyānāraṇyakāndvijān || 11 ||
[Analyze grammar]

māhiṣmatyā bhūpatiśca sahasrārjunanāmakaḥ |
candravaṃśī kṛtavīryātmajo bāhuparākramaḥ || 52 ||
[Analyze grammar]

nārāyaṇāvatāraṃ saḥ dattātreyaṃ tapasvinam |
prasannīkṛtya sevābhiryudhi bāhusahasrakam || 53 ||
[Analyze grammar]

tathā yogaprabhāvasya siddhiṃ lebhe śrīdattataḥ |
yadṛcchayā sa mṛgayāṃ vicaran gahane vane || 54 ||
[Analyze grammar]

mahatā svasya sainyena sahito'raṇyabhūmiṣu |
paryaṭannāśramaṃ cāyājjamadagnermahāmuneḥ || 55 ||
[Analyze grammar]

tasmai rājñe tu ṛṣiṇā pūjāsatkāramānanam |
sasainyāmātyavāhāya dattaṃ yogabalād bahu || 56 ||
[Analyze grammar]

kāmadhenoḥ prasādena svargādadhikavaibhavān |
prakaṭīkṛtya tatraiva tadānīṃ saḥ tamārcayat || 57 ||
[Analyze grammar]

rājā''lokya gatāścātivismayaṃ munivaibhavam |
svaiśvaryātiśayitaṃ cā'dṛṣṭaṃ caivā'śrutaṃ kvacit || 58 ||
[Analyze grammar]

sarvavibhūtisaudhādisamutpattiparākramām |
kāmadhenuṃ sa tu jñātvā hyupājahāra tāṃ balāt || 59 ||
[Analyze grammar]

krandantīṃ vatsasahitāṃ ninye svanagaraṃ hi saḥ |
tadānīṃ paraśurāmo gato'bhūttu gṛhādbahiḥ || 60 ||
[Analyze grammar]

āgataḥ san gṛhe dṛṣṭavān krandantīṃ svamātaram |
tataḥ śrutvā tu nṛpaterdaurātmyaṃ krodhamāpa saḥ || 61 ||
[Analyze grammar]

mātre prāha tu kiṃ kāryaṃ mayā putreṇa me vada |
vijayo me bhaveccaiva yathā tanniṣkrayo bhavet || 62 ||
[Analyze grammar]

tathā darśaya me mātaḥ kiṃ karomi vadā'dhunā |
śikṣaye'smyapradhṛṣyo'haṃ kṣatramutpathagāminam || 63 ||
[Analyze grammar]

tathā me śādhi me mātaḥ putro'haṃ sevakastava |
mātroktaṃ putra te samyag vijayo'stu tathā kuru || 64 ||
[Analyze grammar]

anapatyā ca pūrvaṃ yad vrataṃ putrecchayā hyaham |
vijayaikādaśītitheḥ tadā kṛtavatī hariḥ || 65 ||
[Analyze grammar]

prasanno'bhūcca matkukṣau tvadrūpo janma cāptavān |
tvaṃ vai hariḥ svayaṃ cāsi paśya haste dhanuḥ śubham || 66 ||
[Analyze grammar]

paraśuṃ ca patākāṃ ca rekhārūpān vilokaya |
kuru ca tvaṃ vijayaikādaśītithervrataṃ śubham || 67 ||
[Analyze grammar]

vijayaste sadā bhaviṣyati kṣatriyayodhane |
kṣatriyāṇāṃ śikṣaṇāya vrataṃ kuru suputraka || 68 ||
[Analyze grammar]

tato daṇḍapradānāya yāhi te vijayo'stu vai |
ityuktaḥ paraśurāmaścakāra vijayātitheḥ || 69 ||
[Analyze grammar]

vrataṃ phālgunakṛṣṇe tu nirjalaṃ mātṛvākyataḥ |
daśamyāṃ naktabhojī ca rātrau bhūśayanastathā || 70 ||
[Analyze grammar]

prātaḥ snānottaraṃ devaṃ pradyamnaṃ dhīyutaṃ tathā |
vijayāsahitaṃ kṛṣṇaṃ pupūja bhāvabhaktitaḥ || 71 ||
[Analyze grammar]

kṛtvā tu sarvatobhadramaṇḍale tatra sadghaṭam |
ratnapallavavastrādijalagandhādisaṃyutam || 72 ||
[Analyze grammar]

saṃsthāpya ca tatastasyopari tilabhṛtāṃ śubhām |
sthālīṃ sannyasya mūrtiṃ sthāpayitvā svarṇanirmitām || 73 ||
[Analyze grammar]

prādyumnīṃ dhīsthitapārśvāṃ pupūja bahuvastubhiḥ |
pañcāmṛtajalaiḥ snāpayitvā datvopavītakam || 74 ||
[Analyze grammar]

vastrabhūṣādyalaṃkārairbhūṣayitvā samarcya ca |
candanādisugandhaiścā'kṣatādyaiśca supuṣpakaiḥ || 75 ||
[Analyze grammar]

phalādibhiśca saṃpūjya tulasīmañjarīdalaiḥ |
dhūpadīpādidānaiśca pradakṣiṇāstavādibhiḥ || 76 ||
[Analyze grammar]

ārārtrikaistathā kṣamāparādhanaiḥ pupūja saḥ |
madhyāhnepi tathā saṃpūjyā''rpayadbhojana jalam || 77 ||
[Analyze grammar]

sāyaṃ ṣoḍaśabhiḥ śreṣṭhairupacāraiḥ pupūja saḥ |
vedaghoṣaiḥ kathākhyānairjāgaraṇaṃ cakāra saḥ || 78 ||
[Analyze grammar]

yāvad brāhmamuhūrtaṃ ca jātaṃ tāvatsvayaṃ punaḥ |
snātvā cakāra devasya pūjanaṃ praṇayānvitaḥ || 79 ||
[Analyze grammar]

cakāra prārthanāṃ deva vijayāyā vratena me |
viprasyā'natiśaktasya svabhāvamṛdulasya ca || 80 ||
[Analyze grammar]

krūrakāpathagenaiva kṣatreṇa saha yodhane |
vijayo bhavatāt kṛṣṇa hyakṣato'dhṛṣya eva ca || 81 ||
[Analyze grammar]

śikṣituṃ kāpathasthaṃ vai kṣatraṃ kālo'yamāgataḥ |
mama miṣeṇa bhagavān kuru tvaṃ vijayaṃ svayam || 82 ||
[Analyze grammar]

yāvadabhyarthayatyevaṃ tadā viṣṇuścaturbhujaḥ |
prādurbhūya tamuvāca vijayaste'stu sarvathā || 83 ||
[Analyze grammar]

vijayāyā vratenā'haṃ prasanno'smi dvijottama |
mama rūpo'si viprendra nārāyaṇāṃśa eva ha || 84 ||
[Analyze grammar]

vijayaikādaśikāyāḥ phalena vijayastava |
bhavatād bhūmipālānāṃ śikṣaṇaṃ tvannimittakam || 85 ||
[Analyze grammar]

śāstṛṇāṃ kṣitipānāṃ cetkupaye vai gatirbhavet |
tadā teṣāṃ praśāstāro brāhmaṇāstu mayā kṛtāḥ || 86 ||
[Analyze grammar]

kṣatriyāṇāṃ balaṃ dharmād viprāṇāṃ brahmajaṃ balam |
adhārmikāṇāṃ kṣatrāṇāṃ śāsanaṃ viprasātkṛtam || 87 ||
[Analyze grammar]

tasmād viprendra yuddhyasva śādhi kṣatraṃ vigarvagam |
vijayāyā vratenātra bhūloke vijayastava || 88 ||
[Analyze grammar]

māṃ vihāyā'stu trailokye vijayaste'bhito diśi |
ityuktvā bhagavān viṣṇustatra cādṛśyatāṃ gataḥ || 89 ||
[Analyze grammar]

parśurāmo'pi paraśuṃ tīkṣṇadhāraṃ dhanustathā |
bāṇān khaṅgaṃ carmaśaktiṃ cakraṃ cādāya caikalaḥ || 90 ||
[Analyze grammar]

yayau yatra kārtavīryo māhiṣmatyāḥ patirnṛpaḥ |
sahasrārjunanāmā'sau sahasrakaraśobhitaḥ || 91 ||
[Analyze grammar]

virājate svabhavane tatra tvākṣipya bhūpatim |
rāmaḥ prāha mahāduṣṭa kāmadhenuprahāraka || 92 ||
[Analyze grammar]

prāṇaglahārthaṃ nirgaccha kurvāsvādaṃ svakarmaṇaḥ |
prāṇāndehi raṇaṃ dehi kāmadhenuṃ pradehi me || 93 ||
[Analyze grammar]

yadvā parājayaṃ dehi rāmavākyaṃ hi śāśvatam |
śrutvaivaṃ krodhamāpanno yuyodhātibalo'rjunaḥ || 94 ||
[Analyze grammar]

kintu bāhusahasraṃ vai chinnamasya pramūlataḥ |
tīkṣṇayā divyayā yuddhe rāmaparaśudhārāyā || 95 ||
[Analyze grammar]

bahvyo'kṣauhiṇya evāsya vidāritā dvijena vai |
nāśitāstasya putrāścā'rjuno'pi māritastadā || 96 ||
[Analyze grammar]

kāmadhenuṃ punaḥ prāpya tato divaṃ yayau svayam |
kṣatriyāṇāṃ vināśāya pṛthivyāṃ vicacāra ha || 97 ||
[Analyze grammar]

ekaviṃśatikṛtvaḥ saḥ kṣatriyā'ntakaro'bhavat |
vijayaikādaśīvratabalena vijayī bhuvi || 98 ||
[Analyze grammar]

samabhūdvipravaryo'sau rāmo rājīvalocanaḥ |
prāptā dhenurjitaṃ kṣatraṃ hyarjuno nihato raṇe || 99 ||
[Analyze grammar]

iha loke jayaḥ prāpto rāmeṇa vijayāvratāt |
viṣṇoḥ sudarśanacakrāvatāro'rjuna āsa ha || 100 ||
[Analyze grammar]

tathāpi nihataḥ parśurāmeṇa kāpathavrataḥ |
paṭhanācchravaṇāścāpi vājapeyaphalaṃ bhavet || 101 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne phālgunakṛṣṇavijayaikādaśīvratamāhātmye sahasrārjunanāśārthaṃ tapasā parśurāmavijayaścaityādinirūpaṇanāmā catuścatvāriṃśadadhikadviśatatamo'dhyāyaḥ || 244 ||
[Analyze grammar]