Chapter 240

śrīlakṣmīruvāca |
pauṣakṛṣṇaikādaśī ca kiṃnāmnī ko vidhistathā |
kiṃ phalaṃ kā ca lakṣmīśca ko devaḥ pūjyate vada || 1 ||
[Analyze grammar]

śrīnārāyaṇa uvāca |
kathayāmi śṛṇu lakṣmi pauṣaikādaśikāvratam |
ekādaśīvratenāhaṃ tuṣṭo bhavāmi sarvathā || 2 ||
[Analyze grammar]

pauṣasya kṛṣṇapakṣīyā saphalā nāmato hi sā |
tasyāṃ nārāyaṇaṃ saṃkarṣaṇākhyaṃ svāminaṃ prabhum || 3 ||
[Analyze grammar]

sunandāpatnikāyuktaṃ pūjayed bhāvanāyutaḥ |
pūjāyāṃ munipuṣpāṇi naivedye guḍalaḍḍukāḥ || 4 ||
[Analyze grammar]

atrā'rghye cāmṛtaphalaṃ svarṇadānaṃ ca śasyate |
prāguktavidhinā kāryā daśamyekādaśī tathā || 5 ||
[Analyze grammar]

dvādaśīpāraṇaṃ caiva kartavyaṃ coktarītitaḥ |
prātarvai sarvatobhadramaṇḍale vratavāsare || 6 ||
[Analyze grammar]

ghaṭaṃ saṃsthāpya ca hariṃ phalaiśca vividhairvratī |
nārīkelaphalaiścaiva kramukairbījapūrakaiḥ || 7 ||
[Analyze grammar]

jambīrairdāḍimaiścaiva tathā dhātrīphalaiḥ śubhaiḥ |
lavaṃgairbadaraiścaiva tathā''mraiśca viśeṣataḥ || 8 ||
[Analyze grammar]

yatra yatphalalabdhiḥ syāt tattatphalaiḥ prapūjayet |
ṣoḍaśopasuvastvādyaiḥ pūjanaṃ mahadācaret || 9 ||
[Analyze grammar]

dīpadānaṃ viśeṣeṇa saphalāyāṃ prakārayet |
dhānyadānaṃ vastradānaṃ svarṇadānaṃ gavārpaṇam || 10 ||
[Analyze grammar]

rātrau jāgaraṇaṃ kuryānmilitairvaiṣṇavaiḥ saha |
yadi nimeṣamātraṃ yaḥ kuryājjāgaraṇaṃ niśi || 11 ||
[Analyze grammar]

yajñādhikaṃ phalaṃ sarvatīrthāplāvanaja phalam |
varṣasahasratapasāṃ phalādhikaphalaṃ bhavet || 12 ||
[Analyze grammar]

śṛṇu lakṣmi kathā māhiṣmatasya nṛpateḥ purā |
satyayuge samajātā saphalāvratasaṃśrayāt || 13 ||
[Analyze grammar]

narmadāyāstaṭe'raṇye parvataprāyabhūtale |
bhārate dakṣiṇe madhye purī māhiṣmatī śubhā || 14 ||
[Analyze grammar]

māhiṣmatasya rājñastadrājyaṃ cābhūnmahattaram |
tasya saumyāḥ pañca putrā hyāsan sarve kumārakāḥ || 15 ||
[Analyze grammar]

dhīmān śrīmān dhṛtimāṃśca kīrtimān śaktimāniti |
teṣāṃ madhye tu dhīmān vai jyeṣṭhaḥ pāparato'bhavat || 16 ||
[Analyze grammar]

yauvanaṃ prāpya madyādi piban māṃsaṃ prabhakṣayan |
veśyāṃ ca gamayan dārāḥ parā atyabhimarṣayan || 17 ||
[Analyze grammar]

cauryaṃ ca pararāṣṭreṣu prasahya kārayan svakaiḥ |
pāpātipāpaduṣṭātinikṛṣṭācāravānabhūt || 18 ||
[Analyze grammar]

dyūtaṃ pānaṃ ca mṛgayā pramadā māṃsamityamūn |
doṣān sa poṣayan dravyaṃ nāśayāmāsa vai pituḥ || 19 ||
[Analyze grammar]

gamitaṃ maṇiratnādi svarṇādi pāpakarmabhiḥ |
bubhukṣitastato jāto malino vedanindakaḥ || 20 ||
[Analyze grammar]

asadbhāvo brāhmaṇānāṃ satāṃ dharmasya nindakaḥ |
vaiṣṇavānāṃ ca devānāṃ viśeṣānnindako'bhavat || 21 ||
[Analyze grammar]

prajāyāṃ sarvathā copadravaṃ piśācavaddhi saḥ |
nityaṃ karotyato rājñā tvāhūto lumbhakābhidhaḥ || 22 ||
[Analyze grammar]

pitrā ca bāndhavaiḥ sarvairlumbhakastyakta eva hi |
niṣkāsitaśca rāṣṭrādvai prajābhistāḍanādibhiḥ || 23 ||
[Analyze grammar]

yatra gacchati lumbho'sau tiraskāraṃ sa vindati |
na ca saukhyamavāpnoti na ko'pi satkaroti tam || 24 ||
[Analyze grammar]

nirdhano gatasattāko veśyayāpi viniṣkṛtaḥ |
paryaṭan vanavṛkṣeṣu kṣudhātṛṣārditaḥ svayam || 25 ||
[Analyze grammar]

duḥkhaṃ tapaḥsvarūpaṃ vai ghoraṃ sehe'tidāruṇam |
paścāttāpaṃ karoti sma muhuḥ svārjitakarmaṇām || 26 ||
[Analyze grammar]

tyakto'haṃ bāndhavaiḥ pitrā prajābhirveśyayā tathā |
rājyānniṣkāsitaścāpi sarvaiścāpi tiraskṛtaḥ || 27 ||
[Analyze grammar]

varaṃ cātra vane vāsaḥ paraṃ vairaṃ na śāmyati |
vairasya yāpanāyaiva vairiṇo'haṃ nihanmi vai || 28 ||
[Analyze grammar]

pituśca nagaraṃ sarvaṃ ghātayiṣyāmi sarvathā |
lopayiṣyāmi saudhāṃśca hariṣyāmi dhanādikam || 29 ||
[Analyze grammar]

śanaiḥ śanairidaṃ kāryaṃ dhanaṃ hartavyamuttamam |
vane gupte pravastavyaṃ syāṃ na hastagato yathā || 30 ||
[Analyze grammar]

iti pāpamatiṃ kṛtvā dāruṇe gahane vane |
jīvaghātarato nityaṃ steyahiṃsādiniṣṭhuraḥ || 31 ||
[Analyze grammar]

vasan rātrau ca nagaraṃ gatvā śastrairjanānbahūn |
ghātayitvā dhanaṃ dhānyaṃ vastraṃ prabhūtamityapi || 32 ||
[Analyze grammar]

nayati sma mahāraṇye khādati hlādate muhuḥ |
sarvaṃ ca nagaraṃ tena muṣitaṃ pāpavṛttinā || 33 ||
[Analyze grammar]

trāso mahān prajāyāṃ ca vartate sma nirantaram |
akasmāddhanaharaṇaṃ prasahya śreṣṭhino janān || 34 ||
[Analyze grammar]

karoti sma kvacid vakrān mārayatyapi jīvataḥ |
ekadā sa gṛhe rājamantriṇaḥ praviveśa ha || 35 ||
[Analyze grammar]

dhanaṃ bahu hṛtaṃ tena tathā khādyaṃ ca khāditam |
pramadāśca tathā bhuktāstathā bālāśca tāḍitā || 36 ||
[Analyze grammar]

gṛhaṃ prajvālitaṃ tasya kṛtaścopadravo mahān |
tāvattatra samāyātaiḥ rājabhaṭairniśācaraiḥ || 37 ||
[Analyze grammar]

gṛhīto nigaḍe baddho raśmibhirhastayordhṛtaḥ |
uvāca tān suto'haṃ vai rājño māhiṣmatasya vai || 38 ||
[Analyze grammar]

mocanīyo'hamevā'tra tvanyathā vaḥ sukhaṃ nahi |
hariṣye bhavatāṃ prāṇān nāśayiṣyāmi śastrakaiḥ || 39 ||
[Analyze grammar]

kariṣye vo nāśameva dhanadārāgṛhārthinām |
rājñaḥ suto na dhartavyaḥ kadācana sukhepsubhiḥ || 40 ||
[Analyze grammar]

dharṣaṇīyo na vai sarpo vipraḥ kṣatriya eva ca |
vināśaphaladāste vai rakṣakāstu natāḥ sadā || 41 ||
[Analyze grammar]

iti śrutvā ca tairmukto gato'raṇye punarhi saḥ |
āmiṣaṃ bhakṣayannityaṃ vārkṣaphalāni bhakṣayan || 42 ||
[Analyze grammar]

prāṇayātrāṃ sa nirvāhayati kandādibhistathā |
cauryeṇāpi svanirvāhaṃ karoti vanavāsavān || 43 ||
[Analyze grammar]

vane tatrā'bhavajjīrṇaṃ viṣṇusthānaṃ vinirjanam |
aśvatthasya ca vṛkṣasyā'dhomūle naṣṭabhittikam || 44 ||
[Analyze grammar]

naṣṭadvāraṃ naṣṭaśālaṃ naṣṭacchāyaṃ nirāśrayam |
tatrā'nena tu bhagnayā mūrterviṣṇorhi vedikā || 45 ||
[Analyze grammar]

āśrayārthaṃ svīkṛtā''sīd viśrāntirlabhyate'tra ca |
aśvattho'pi jīrṇaśākhastambaśca bahuvārṣikaḥ || 46 ||
[Analyze grammar]

devabhāvena vṛkṣo'yaṃ viṣṇuyogāddhi vartate |
tatra vāsāllumbhakasya devisthānapratāpataḥ || 47 ||
[Analyze grammar]

buddhistu sāttvikī jātā vicāraṃ cākaroddhi saḥ |
aho mayā kṛtaṃ pāpaṃ bahu yasya na niṣkṛtiḥ || 48 ||
[Analyze grammar]

athāpi na mayā kāryaṃ hiṃsanaṃ prāṇaghātakam |
kandādyattvā ca nirvāhaṃ kariṣye pippalāśrayaḥ || 49 ||
[Analyze grammar]

viṣṇuścātra vasatyeva mūrtau tu pippale tarau |
kariṣyati mama śreyaḥ pāpaṃ prajvālayiṣyati || 50 ||
[Analyze grammar]

ityevaṃ kṛtabuddhiḥ saḥ śaityakāle'pi bhūtale |
vṛkṣastambāśraye rātriṃ nirgamayati kaṣṭataḥ || 51 ||
[Analyze grammar]

tāvattatra samāyātāścaurāścānye vanāśrayāḥ |
lumbhakasya ca vastrādi prajahruḥ pauṣakṛṣṇake || 52 ||
[Analyze grammar]

pauṣasya kṛṣṇapakṣe tu daśamyāṃ prātareva saḥ |
phalānyāhṛtya bubhuje kathaṃcid divaso gataḥ || 53 ||
[Analyze grammar]

rātrau tvākasmikaṃ śaityaṃ himāḍhyaṃ pravavarṣa ha |
yatrāgnitāpanenāpi rakṣaṇaṃ na yathā bhavet || 54 ||
[Analyze grammar]

tathā śītapravāhasya bhogabhūto'bhavaddhi saḥ |
vastrahīno vivṛttākṣo milanmukho'bhavajjaḍaḥ || 55 ||
[Analyze grammar]

nidrāsukhaṃ vinaṣṭaṃ ca gataprāṇa ivā'bhavat |
miladdaśanajihvā''syo hastapādajaḍatvavān || 56 ||
[Analyze grammar]

śavavat sa tadā jātaḥ śaityena paripīḍitaḥ |
kintu prāṇā gatā naiva gataceṣṭo'bhavaddhi saḥ || 57 ||
[Analyze grammar]

āntare smarati viṣṇuṃ rakṣakaṃ ca muhurmuhuḥ |
prātarjātaṃ saphalāyā ekādaśyāstathāpi saḥ || 58 ||
[Analyze grammar]

bhānūdaye'pi śītārdro na lebhe cetanāṃ tadā |
ravau madhyagate so'yaṃ saṃjñāṃ lebhe hi lumbhakaḥ || 59 ||
[Analyze grammar]

itastato vilokyaiva vyutthito hyabhavattataḥ |
viṣṇuṃ vṛkṣaṃ raviṃ natvā skhalan padbhyāṃ vane gataḥ || 60 ||
[Analyze grammar]

khañjavat saśanairgacchan kṣutkṣāmaḥ śaktihīnakaḥ |
vepamānāṃgakaścāpi satphalānyājahāra saḥ || 61 ||
[Analyze grammar]

viṣṇave cārpaṇīyāni tato grāhyāṇi vai mayā |
ityācintya samāgatya vṛkṣamūle nidhāya ca || 62 ||
[Analyze grammar]

yāvattiṣṭhati vṛkṣādho luṃbhako'tīva nirbalaḥ |
tāvadastaṃgataḥ sūryaḥ kaṣṭaṃ śuśoca vai tadā || 63 ||
[Analyze grammar]

aśrūṇi vinimucyaiva kā bhaviṣyati me daśā |
śaityaṃ ca bādhate samyag bhavet parṇairna rakṣaṇam || 64 ||
[Analyze grammar]

śaityapravārakaṃ puṣṭaṃ valkalādi na vidyate |
na gūhā na ca tārṇaṃ vā kaṭaṃ cāpyatra vidyate || 65 ||
[Analyze grammar]

tathāpi tṛṇapuṃje'trāśrayaṃ kṛtvā svapimyaham |
iti vicintya nikaṭe tṛṇānyādātumutsukaḥ || 66 ||
[Analyze grammar]

phalāni viṣṇumūrteśca samīpe vinidhāya ca |
uccārya ca phalairebhiḥ śrīpatistuṣyatāṃ hariḥ || 67 ||
[Analyze grammar]

tato yāto'tinikaṭe tṛṇā''nayanahetave |
kintu balaprahīṇaḥ saḥ vedikāyāḥ samīpataḥ || 68 ||
[Analyze grammar]

punarmūrcchāmavāpaiva nārāyaṇa iti smaran |
kṣaṇāntare samutthāya tṛṇānyādāya pippale || 69 ||
[Analyze grammar]

stambādhāre svayaṃ yāvadāgatya ca niṣīdati |
tāvanmūrchā punarjātā punaścaitanyamāptavān || 70 ||
[Analyze grammar]

viṣṇuṃ smṛtvā lumbhakaḥ sa nidrāṃ lebhe na śāntidām |
prātaḥ phalāni bhokṣyāṇītyevaṃ niśāṃ nināya saḥ || 71 ||
[Analyze grammar]

evaṃ vivaśataḥ prāptaṃ vratāhaṃ cā'vidannapi |
sopavāsaṃ sajāgaraṃ kṛtavān śītapīḍitaḥ || 72 ||
[Analyze grammar]

tatphalaiḥ pūjanaṃ mene naivedyaṃ cāpi keśavaḥ |
rātrau jāgaraṇaṃ mene viṣṇustasya durātmanaḥ || 73 ||
[Analyze grammar]

saphalāyā vrataṃ mene tapaḥ svāśrayajaṃ tathā |
viṣṇuḥ prasannatāṃ prāpto dayālurdīnavatsalaḥ || 74 ||
[Analyze grammar]

lumbhakasyā'karod bhāgyaṃ puṇyāḍhyaṃ śāśvataṃ śubham |
akasmādvratamevaitatkṛtavān vai sa lumbhakaḥ || 75 ||
[Analyze grammar]

dvādaśyāṃ ca tadā prātaḥ phalānyattvā hareḥ puraḥ |
stutiṃ cakāra devasya saṃsārādrakṣaṇaṃ prati || 76 ||
[Analyze grammar]

sūryasyodayanaṃ yāvat tāvadviṣṇuścaturbhujaḥ |
saṃkarṣaṇasvarūpeṇa prāvirbabhūva tatpuraḥ || 77 ||
[Analyze grammar]

divyāvayavaśobhāḍhyo divyabhūṣaṇabhūṣitaḥ |
divyamandaprasannāsyahāsyalāsādiśobhitaḥ || 78 ||
[Analyze grammar]

dakṣahastena lumbhaṃ taṃ spṛṣṭvā ca mastake'vadat |
rājyaṃ prāpsyasi bhakta tvaṃ saphalāyāḥ prabhāvataḥ || 79 ||
[Analyze grammar]

gaccha svanagaraṃ tatra te pitā nidhanaṃ gataḥ |
anye parasparaṃ putrā viruddhyantyabhiṣecane || 80 ||
[Analyze grammar]

parasparaṃ viruddhāste rājyamukuṭavañcitāḥ |
rājyaṃ ca nāpnuvan mantriprajābhiranadhikṛtāḥ || 81 ||
[Analyze grammar]

tavā''gamaṃ pratīkṣante prajāste bhāgyavardhanāt |
kālo'yaṃ te punaryāto hyekādaśīphalodayāt || 82 ||
[Analyze grammar]

yaiḥ pūrvaṃ tāḍyate tiraskriyate kālavegataḥ |
taireva punariṣyate hyaho kālabalaṃ mahat || 83 ||
[Analyze grammar]

bhāgyahānermahatkaṣṭaṃ sukhaṃ bhāgyodaye punaḥ |
bhāgyodayo vṛtādyaiśca jāyate kāryameva tat || 84 ||
[Analyze grammar]

tasmād gaccha svakaṃ rājyaṃ gṛhāṇa mā ciraṃ kuru |
ityuktvā bhagavān viṣṇustatra tvantarjagāma ha || 85 ||
[Analyze grammar]

lumbhakaḥ pippale viṣṇuṃ natvā tejo hyavāptavān |
divyarūpasvarūpaḥ san bhūtvā svanagarīṃ yayau || 86 ||
[Analyze grammar]

mantriprajāgragaiḥ sammānitaḥ svāgatavardhitaḥ |
divyābharaṇaśobhābhiralaṃkṛto'tha vaiṣṇavaḥ || 87 ||
[Analyze grammar]

bhūtvā rājyābhiṣekaṃ svapitṛparamparāgatam |
prāpto hareḥ prasādena saphalāyā vratena ca || 88 ||
[Analyze grammar]

bhāgyodayena rājā sa lebhe rājyamakaṇṭakam |
śubhaṃ rājyaṃ prajārakṣāpālanādividhānataḥ || 89 ||
[Analyze grammar]

śatavarṣaṃ ca tadrājyaṃ kṛtvā''rādhya hariṃ tathā |
prajāśīrvādamāsādya putraṃ mānajitāhvayam || 90 ||
[Analyze grammar]

rājye'bhiṣicya ca vanaṃ yāto yatrā'bhavatpurā |
viṣṇumārādhya ca tatra nirmāya viṣṇumandiram || 91 ||
[Analyze grammar]

harerarcāṃ pratiṣṭhāpya sevitvā ca tathā'nvaham |
tapasā yogasāmyena kṣapayitvā''ntarāśayān || 92 ||
[Analyze grammar]

gataḥ kṛṣṇasya sānnidhyaṃ vimānena sutejasā |
pārṣadāśca harestatra vimāne taṃ pragṛhya ca || 93 ||
[Analyze grammar]

yayurdhāma harerdivyaṃ yatra gatvā na śocati |
tatra golokasaṃjñe vai dhāmni lumbhakabhūpatiḥ || 94 ||
[Analyze grammar]

śrīkṛṣṇaṃ sevate nityaṃ pārṣadairabhipūjitaḥ |
evaṃ yaḥ kurute loke saphalāvratamuttamam || 95 ||
[Analyze grammar]

iha loke sukhaṃ prāpya mṛto mokṣamavāpnuyāt |
dhanyāste mānavā loke saphalāvratakāriṇaḥ || 96 ||
[Analyze grammar]

teṣāṃ tu saphalaṃ janma saphalaṃ ca dhanādikam |
saphalāyā vrataṃ yaistu kṛtaṃ vai bhāvapūrvakam || 97 ||
[Analyze grammar]

saphalaikādaśī rājyalakṣmīrūpaphalapradā |
muktidā ceti sā kāryā bhuktimuktisamīpsubhiḥ || 98 ||
[Analyze grammar]

paṭhanācchravaṇāccaiva vratasya karaṇāttathā |
rājasūyasya yajñasya phalamāpnoti mānavaḥ || 99 ||
[Analyze grammar]

putrān pautrān dhanaṃ smṛddhiṃ sampadṃ rājyamityapi |
vidyāṃ puṣṭiṃ tathā''rogyaṃ muktiṃ ca labhate vratī || 100 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne pauṣakṛṣṇasaphalaikādaśīvratavidhipāpilumbhakanṛpakumāra |
rājyaprāptyākhyānādinirūpaṇanāmā catvāriṃśadadhikadviśatatamo'dhyāyaḥ || 240 ||
[Analyze grammar]