Chapter 239

śrīlakṣmīruvāca |
vande'haṃ devadeveśaṃ sarvajīvasukhapradam |
antaryāmiṇamārādhyaṃ sarvakāmaphalapradam || 1 ||
[Analyze grammar]

pṛcchāmi bhagavan viṣṇo lokānāṃ kṣemakāmyayā |
pāpināṃ pāpanāśāya sakāmānāṃ samṛddhaye || 2 ||
[Analyze grammar]

mārgaśīrṣe site pakṣe kiṃnāmnyekādaśī śubhā |
kiṃ phalaṃ ko vidhistasyāḥ ko devastatpatiḥ prabhuḥ || 3 ||
[Analyze grammar]

vistareṇa yathārthaṃ tat samācakṣva mama prabho |
śrupvaitacchrīhariḥ prāha bhaktānāṃ hitakṛtprabhuḥ || 4 ||
[Analyze grammar]

śṛṇu lakṣmi mārgaśīrṣasitaikādaśikāvratam |
asyāḥ śravaṇamātreṇa vājapeyaphalaṃ bhavet || 5 ||
[Analyze grammar]

daśamyāṃ naktabhojī syād rātrau bhūśayanaṃ caret |
brahmacārī bhavet krodhādikān doṣān parityajet || 6 ||
[Analyze grammar]

ekādaśyāṃ brāhmasaṃjñe muhūrte jāgratiṃ labhet |
smared dāmodaraṃ kṛṣṇaṃ mokṣadāyāḥ patiṃ prabhum || 7 ||
[Analyze grammar]

sarvapāpaharā mokṣapradā mokṣābhidhānikā |
mokṣadā nāmataḥ proktā kṛṣṇena nijavāñcchayā || 8 ||
[Analyze grammar]

dāmodarasvarūpeṇa svīkṛtā raivatācale |
dāmodaro hyataḥ pūjyo bhagavāṃśca tayā saha || 9 ||
[Analyze grammar]

prātaḥ smareddhariṃ dāmodaraṃ sanmokṣadā priyām |
saṃkalpayenmayā kāryaṃ vrataṃ caivādya muktaye || 10 ||
[Analyze grammar]

smṛddhaye vāpi sarvasmai kāmāyeti gṛhī janaḥ |
tataḥ śaucādiśuddhiṃ ca kṛtvā snātvā sutīrthake || 11 ||
[Analyze grammar]

ācamya ca hareḥ pūjāsāmagrīḥ samapādayet |
maṇḍalaṃ sarvatobhadraṃ kārayet saptadhānyakaiḥ || 12 ||
[Analyze grammar]

sauvarṇaṃ vātha tāmrasya ghaṭaṃ madhye nidhāpayet |
paṃcapallavavastrādipañcaratnaphalābbhṛtam || 13 ||
[Analyze grammar]

nyasyetpātraṃ tilājyaṃ ca sthālīṃ vā tatra saddhare |
mūrtiṃ dāmodaramokṣapradayoḥ svarṇanirmitām || 14 ||
[Analyze grammar]

sthāpayetpūjayet ṣoḍaśopacārairvidhānataḥ |
tulasyā mañjarībhiśca dhūpadīpādibhiḥ śubhaiḥ || 15 ||
[Analyze grammar]

mālatīpuṣpamālābhiḥ śriyā saha ca keśavam |
arghyaṃ phalaṃ tu nāriṃgaṃ naivedye modakāstathā || 16 ||
[Analyze grammar]

saptadhānyāni deyāni viśeṣaphalalabdhaye |
yavagodhūmadhānyāni tilāḥ kaṃgūstathaiva ca || 17 ||
[Analyze grammar]

śyāmākaṃ cīnakaṃ ceti saptadhānyāni tāni vai |
deyāni tu yathāśakti dāne śreṣṭhāni sarvathā || 18 ||
[Analyze grammar]

śriyā saha patiṃ vai keśavaṃ ca prārthayettadā |
mayā vratamidaṃ mokṣadāyāḥ kṛtaṃ tvadāptaye || 19 ||
[Analyze grammar]

yathāśakti mayā pūjā kṛtā vai tava keśava |
prasanno bhava deveśa sarvasmṛddhikaro bhava || 20 ||
[Analyze grammar]

mokṣado bhava me svāmin saṃsārārṇavatāraka |
iti saṃstūya naivedyaṃ phalaṃ vāri samarpya ca || 21 ||
[Analyze grammar]

tāmbūlaṃ ca sugandhaṃ ca dadyātpaścānnamaskriyām |
kuryāccārārtrikaṃ caivottārayed vandanaṃ stavam || 22 ||
[Analyze grammar]

pradakṣiṇaṃ daṇḍavacca puṣpāṃjaliṃ samarpayet |
yāni kāni ca pāpāni jñānā'jñānakṛtāni ca || 23 ||
[Analyze grammar]

vilayaṃ yāntu deveśa tava pūjāvratādinā |
ityuccārya punarnatvā visarjanamathācaret || 24 ||
[Analyze grammar]

madhyāhne bhojanaṃ miṣṭaṃ devāya saṃpradāpayet |
sāyaṃ niśāmukhe pūjāṃ ṣoḍaśābhisuvastubhiḥ || 25 ||
[Analyze grammar]

kārayecca tato jāgaraṇaṃ bhaktaiḥ prakārayet |
dvādaśyāṃ ca tathā prātaḥ snātvā sampūjya keśavam || 26 ||
[Analyze grammar]

visarjayecca dānāni vividhāni pradāpayet |
bahudravyādi gurave dadyācca bhojanādikam || 27 ||
[Analyze grammar]

evaṃ vrataprakartā syād bhuktimuktipratāpavān |
pitṝṇāṃ tārakaḥ sa syācchatavaṃśārtiśālinām || 28 ||
[Analyze grammar]

śṛṇu pūrvakathāṃ lakṣmi mokṣadāyāḥ phalārpaṇāt |
adhoyonigatāḥ sarve pitaro muktimāgatāḥ || 29 ||
[Analyze grammar]

campāpūryāṃ bhūpatiśca mahān vaiśvānarābhidhaḥ |
mahāvaiṣṇavatāṃ paścātprāpto'bhūt pitṛtārakaḥ || 30 ||
[Analyze grammar]

prajāḥ putrasamāḥ sarvā rakṣati sma sa bhūpatiḥ |
vaiṣṇavā bahavo viprā vasanti sma ca tatpure || 31 ||
[Analyze grammar]

vedavedāṃgavijñānāḥ satkarmādiparāyaṇāḥ |
smṛddhāśca vibhavairyuktāḥ prajāśca sampadādibhiḥ || 32 ||
[Analyze grammar]

sukhapūrṇāḥ samāsaṃśca rājño vaiśvānarasya vai |
yadyapi puṇyapuñjena tapasā prākkṛtena ca || 33 ||
[Analyze grammar]

rājyaṃ smṛddhaṃ mahallabdhvā sadā rājyamadānvitaḥ |
na karoti vrataṃ dānaṃ nāstikatvena bhūpatiḥ || 34 ||
[Analyze grammar]

na ca śrāddhaṃ karotyeva nānnavāryādidānakam |
na puṇyapradakāryaṃ vā kārayati sma karhicat || 35 ||
[Analyze grammar]

puṇyaṃ na jāyate navyaṃ pitarastena duḥkhitāḥ |
annavārivihīnāste pitṛlokādadhogatāḥ || 36 ||
[Analyze grammar]

svavaṃśajaṃ ca rājānaṃ śrāddhādihīnakarmakam |
dṛṣṭvā'tiduḥkhino jātā uṣṇaśvāsātidurbalāḥ || 37 ||
[Analyze grammar]

niraye patitā rājño nāstikatvādipāpataḥ |
te tu rātrau samāgatya svapne pratyakṣatāṃ gatāḥ || 38 ||
[Analyze grammar]

rudantaśca śvasantaśca rugṇāḥ saṃkṣudhitāstathā |
tṛṣātiśuṣkakaṇṭhāścā'śaktā naṣṭabalāstathā || 39 ||
[Analyze grammar]

tejohīnāstathā śuṣkaśirāḥ kṛṣṇānanāstathā |
krośanto'tidaridrāśca duḥkhino bhikṣukā iva || 40 ||
[Analyze grammar]

parasparaṃ kathayanto duḥkhāni duḥsahāni vai |
aho rājye sthitaścāsmadvaṃśajo'pi sa nāstikaḥ || 41 ||
[Analyze grammar]

na śrāddhaṃ kurute cāyaṃ vaiśvānaropi vāri vā |
dadātyeva na vai kāle pitṛpakṣe manāgapi || 42 ||
[Analyze grammar]

piṇḍānnaiva dadātyeva jalaṃ naiva dadāti ca |
tarpaṇaṃ na karotyeva kārayatyeva naiva ca || 43 ||
[Analyze grammar]

tena duḥkhena santaptā duḥkhinaḥ sarvadā vayam |
adhogatiṃ gatāḥ sarve niraye patitāstathā || 44 ||
[Analyze grammar]

rājāyaṃ nāstiko jātaḥ kiṃ tena kusutena vai |
varaṃ nirvaṃśatā yadvā varaṃ tvāstikaputratā || 45 ||
[Analyze grammar]

varaṃ mokṣagatiścāpi na varā tu kuputratā |
anye naiva pradāsyanti putro naiva dadāti ca || 46 ||
[Analyze grammar]

kathaṃ kasmāt kutaḥ prāpyamannaṃ vāri ca vā manāk |
yadi cāyaṃ jalaṃ piṇḍān dadyāt syāmaḥ sukhānvitāḥ || 47 ||
[Analyze grammar]

ityuktvā'ntarhitāḥ sarve rājā'bhūd vismayānvitaḥ |
kathayāmāsa prātastadvṛttāntaṃ svapnajaṃ dvijān || 48 ||
[Analyze grammar]

mayā svapitaraḥ svapne dṛṣṭā nirayapātitāḥ |
uktavantaśca putra tvaṃ tārayā'smānadhogatān || 49 ||
[Analyze grammar]

evaṃ bruvāṇāḥ saśvāsaṃ rudantaśca vikrandanam |
dṛṣṭā mayā ca tān smṛtvā sukhaṃ me na bhavatyapi || 50 ||
[Analyze grammar]

adya me rājyamṛddhaṃ ca tathā rājñī gajā'śvakam |
na kiñcit sukhadaṃ bhāti rocate me na bhojanam || 51 ||
[Analyze grammar]

śaśvajjvalatyāntaraṃ me putrāghaṃ rocate nahi |
kiṃ karomi hṛdayaṃ me dūyate pitṛjāgninā || 52 ||
[Analyze grammar]

kva gacchāmi samuddhārāyaiva teṣāṃ dvijottamāḥ |
mucyante yena pitarastattapo vratamucyatām || 53 ||
[Analyze grammar]

yogo yajño'thavā'nyo'pi dānajādyutsavo mahān |
yatkiṃcidvā mahatsvalpaṃ samuddhārakamucyatām || 54 ||
[Analyze grammar]

putre yogye samarthe ca jīvati pitarau yadi |
duḥkhino niraye ghore phalaṃ sutasya kiṃ tadā || 55 ||
[Analyze grammar]

teṣāmuddhāra evātra tveṣṭavyo mama sarvathā |
mā saṃkocaṃ prakurvantu dvijāḥ satyaṃ vadāmyaham || 56 ||
[Analyze grammar]

śrutvā rājñaḥ suvacanaṃ dvijā hṛṣṭā bhṛśaṃ tadā |
procustaṃ pitṛkalyāṇaprayatnaṃ brāhmaṇāśritam || 57 ||
[Analyze grammar]

rājannasmatsu madhye'yaṃ samartho hi mahāmuniḥ |
bhūtaṃ bhavyaṃ vijānāti jaigīṣavyo'tiyogavān || 58 ||
[Analyze grammar]

sa ca te sarvamājñāya samādhau divyadṛṣṭimān |
nivedayiṣyati drāk sat pitaro'dhogatāḥ katham || 59 ||
[Analyze grammar]

jaigīṣavyo'bhyarthitaśca pitṝn dhyātvā kṣaṇaṃ tataḥ |
uvāca taṃ nṛpaṃ tatra jaigīṣavyo mahāmuniḥ || 60 ||
[Analyze grammar]

rājanna kevalaṃ cāsti nāstikatvaṃ tu kāraṇam |
kintu te janakasyāsti nāstikatvaṃ ca kāraṇam || 61 ||
[Analyze grammar]

śṛṇu tathyaṃ kathayāmi mā kruddho bhava śaṃ bhaja |
jāne'haṃ tava pitṝṇāṃ sarvaṃ pūrvaṃ viceṣṭitam || 62 ||
[Analyze grammar]

tava pituḥ kathayāmi śṛṇu cāvahito bhava |
rājye tvāsīd yadā so'yaṃ tadā nāstikabhāvataḥ || 63 ||
[Analyze grammar]

vṛttiṃ jahāra devasya yā dattā pūrvajaittava |
śāstradharmaṃ tathā cāsau gaṇayāmāsa naiva ca || 64 ||
[Analyze grammar]

rājyasya madamāsādya puṃścalīṣu pravartate |
grāmāntare gataḥ so'yaṃ puṃścalyā vārayoṣitā || 65 ||
[Analyze grammar]

ṛtukāle'pi te māturnā''yāto nijamandiram |
na dattaṃ tava mātuśca ṛtudānaṃ tu dhārmikam || 66 ||
[Analyze grammar]

evaṃ muhurvartayitvā pāpalipto'bhavad bahu |
śrāddhakāle tathā śrāddhaṃ na kṛtaṃ dharmalopinā || 67 ||
[Analyze grammar]

tena pāpaprabhāveṇa pātayitvā svakān pitṝn |
narake vāsayitvā ca nāstikyabhāvapūritaḥ || 68 ||
[Analyze grammar]

antimam ṛtudānaṃ ca tava māturvidhāya ca |
kālena nidhanaṃ prāptaḥ patito niraye'pi saḥ || 69 ||
[Analyze grammar]

pitṛbhirnijapāpena sahito niraye'patat |
svapatnyartupradānaṃ ca puṃścalīgamanaṃ tathā || 70 ||
[Analyze grammar]

nāstikatvaṃ ca pitṝṇāṃ śrāddhādyakaraṇaṃ tathā |
svargalokānmahāsaukhyāt pitṛpātanahetavaḥ || 71 ||
[Analyze grammar]

ta ime patitāścaivehante tūddharaṇaṃ sutāt |
suto'pi tvaṃ tathotpanno niṣekānnāstikasya vai || 72 ||
[Analyze grammar]

niṣeke yādṛśī vṛttiḥ putre bhavati tādṛśī |
nāstikena samutpanno hyadhārmikeṇa yadbhavān || 73 ||
[Analyze grammar]

atastvaṃ nāstiko jātaḥ śrāddhaṃ naiva karoṣi ca |
devavṛttiharastātaste'bhūt tasya pratikriyā || 74 ||
[Analyze grammar]

prāyaścittaṃ na caivāsti kalpakoṭiśatairapi |
devavṛttirna vai hāryā pūrvairdattā nṛpaiḥ kvacit || 75 ||
[Analyze grammar]

tena pāpena narake duḥkhasyā'nto na jāyate |
devavṛttiharasyā'tra padayoḥ raja ityapi || 76 ||
[Analyze grammar]

syād yasyopari patitaṃ saptakalpāḥ sa nārakī |
ityuktaṃ prāṅ mahendrāya cāṇḍālyā gacchate puraḥ || 77 ||
[Analyze grammar]

ekadā kācidabalā cāṇḍālī tu śmaśānake |
grāmaśūkaravakṣo'sthikṛtacūllyāḥ uparyatha || 78 ||
[Analyze grammar]

nṛmuṇḍaṃ pākapātraṃ ca dhṛtvā tatra śvamāṃsakam |
madirātmajale kṣiptvā randhayati citāgninā || 79 ||
[Analyze grammar]

tāvattatpārśvatastatra mahendro nirgato yadā |
pākapātraṃ tathā śīghraṃ chāditaṃ samupānahā || 80 ||
[Analyze grammar]

viśaṃkya tu tadā hīndrastāṃ papraccha paṭīyasīm |
śuno māṃsaṃ surāpakvaṃ nṛmuṇḍe'tra citāgninā || 81 ||
[Analyze grammar]

sarvaṃ cāśuddhamevaitat carmaṇā chāditaṃ katham |
pratyuvāca tadā sā vai cāṇḍālī śṛṇu devarāṭ || 82 ||
[Analyze grammar]

devadvijagavāṃ vṛttiṃ haranti hārayanti ye |
teṣāṃ pādarajobhītyā carmaṇā chāditaṃ nvidam || 83 ||
[Analyze grammar]

yadi tvaṃ tādṛśo'bhūścenme pāko'śuddhatāṃ vrajet |
na me bhojyaṃ bhavet tadvai vṛttighnā'ghapradūṣitam || 84 ||
[Analyze grammar]

indraḥ prāha kathaṃ yoṣit pātakaṃ cedṛśaṃ mahat |
cāṇḍālī prāha madvākyaṃ nibodha ca yathārthataḥ || 85 ||
[Analyze grammar]

devā vai pitaraḥ proktā mātaro devatāstathā |
devāśca vṛṣṭidātāro devāḥ saṃrakṣakāḥ sadā || 86 ||
[Analyze grammar]

yogakṣemaprakartāro lokānāṃ sarvadevatāḥ |
jīvikāvṛttihā jīvahantā vai procyate khalu || 87 ||
[Analyze grammar]

vinā vṛttiṃ jīvanaṃ na vinā vṛttiṃ mṛto bhavet |
devavṛttiharastasmāt pitṛhā mātṛhā tathā || 88 ||
[Analyze grammar]

devahā dharmahā tadvadātmahā svargahā hi saḥ |
vṛṣṭihā lokahā caiva goghātī brahmaghātakaḥ || 89 ||
[Analyze grammar]

devaghātī vṛṣṭighātī sarvaghātī bhaveddhi saḥ |
tasya pādarajaścāpi mahāpāpakaraṃ malam || 90 ||
[Analyze grammar]

tat śvamāṃse patitaṃ cenna me bhojyaṃ malaṃ hi tat |
tasmānmayā tu pātraṃ taccarmaṇā chāditaṃ hi yat || 91 ||
[Analyze grammar]

yadi tvaṃ devavṛttīnāṃ dātā kartā'si cedyadi |
tadā te padadhūlyā'tra pāvitaṃ palalaṃ bhavet || 92 ||
[Analyze grammar]

na me'styācchādane bhītirgaccha pūjya yathāsukham |
indro'pi svasabhāyāṃ ca surarṣipitṛmānavaiḥ || 93 ||
[Analyze grammar]

śobhitāyāṃ taduktaṃ ca vṛttighnā mā bhavantviti |
vṛttihārasya na cāsti niṣkṛtiḥ kathitā kvacit || 94 ||
[Analyze grammar]

tadārabhya trilokeṣu vṛttidānaṃ praśasyate |
tasmād rājaṃstava pitrūddhārakaṃ karma nāsti vai || 95 ||
[Analyze grammar]

yenoddhāro bhavetteṣāṃ hareḥ sambandhamantarā |
hareścāpi susambandho vratenaivopajāyate || 96 ||
[Analyze grammar]

mokṣadāyā vrataṃ mokṣapradaṃ prabhāvato hare |
agatīnāṃ gatiḥ proktaṃ niṣkṛtirvajrapāpinām || 97 ||
[Analyze grammar]

sarvaṃ ca nirjalaṃ kāryaṃ pitṛbhyo dīyatāṃ phalam |
mokṣadaikādaśījanyavratapuṇyaiḥ pramokṣaṇam || 98 ||
[Analyze grammar]

bhaviṣyatīti tatsarvaṃ gṛhītvā cābhipūjya ca |
satkṛtya sādhūn viprāṃśca gṛhān gantuṃ nyavedayat || 99 ||
[Analyze grammar]

mārgaśīrṣe'tha samprāpte site caikādaśī ca yā |
rājñā copoṣitā pūjā harervidhānataḥ kṛtā || 100 ||
[Analyze grammar]

sarvatobhadrakaṃ kṛtvā saikādaśīhari ca saḥ |
pūjayāmāsa vidhinā dadau dānāni bhūriśaḥ || 101 ||
[Analyze grammar]

jāgaraṇaṃ ca kṛtavān prātaḥsnānādikaṃ tathā |
kṛtvā ca puṇyamevaitad datvā pitṛbhya ityapi || 102 ||
[Analyze grammar]

pāraṇāṃ kṛtavān vaiśvānaro rājā vidhānataḥ |
mokṣadaikādaśīpuṇyadānena pitarastadā || 103 ||
[Analyze grammar]

svapitrā sahitāḥ sarve śīghraṃ vai mokṣamāviśan |
puṇye datte ca pitṝṇāṃ muktau vaimānikāḥ surāḥ || 104 ||
[Analyze grammar]

cakruḥ kusumavṛṣṭiṃ ca procuḥ puṇyā girastathā |
svasti svasti ca putraste vayaṃ devāḥ samāgatāḥ || 105 ||
[Analyze grammar]

ekādaśyāḥ puṇyadānāt pitarastāritāstvayā |
te sarve mokṣamāpannā prāhurvai pitaro'pi te || 106 ||
[Analyze grammar]

vayaṃ mokṣaṃ samāpannāḥ putra te kuśalaṃ bhavet |
sukhī bhava sadā saukhyapradātā bhava dehinām || 107 ||
[Analyze grammar]

śrāddhakartā yajñakartā devānāṃ pūjako bhava |
mātāpitṛprasevādikartā bhava sadā'nagha || 108 ||
[Analyze grammar]

dīrghajīvī cāstikastvaṃ patnīvrataparo bhava |
devavṛttipradātā ca brāhmaṇānāṃ prapūjakaḥ || 109 ||
[Analyze grammar]

satāṃ sevā prakartā ca sādhvīnāṃ vratarakṣakaḥ |
gobhūrakṣākaro nityaṃ smṛddhaḥ syāḥ sarvadā suta || 110 ||
[Analyze grammar]

ityevamāśīrvādaiśca saṃyujya pitaraḥ surāḥ |
praśaṃsanto mokṣadāyā vratapuṇyaprabhāvakam || 111 ||
[Analyze grammar]

gatā yathāmataṃ sthānaṃ bruvantaḥ svasti vai muhuḥ |
rājāpi pāpanāśena mokṣadāyāḥ prabhāvataḥ || 112 ||
[Analyze grammar]

mahābhāgavato jātaḥ sakuṭumbaḥ samāstikaḥ |
yajñayāgakaro nityaṃ viprasādhuprapūjakaḥ || 113 ||
[Analyze grammar]

devapūjākaraścaiva dharmavān doṣavarjitaḥ |
tasyā'bhūcca mahān dhārmirvaiṣṇavo hutabhuk sutaḥ || 114 ||
[Analyze grammar]

rājyaṃ sutāya dattvā saḥ paraṃ mokṣamavāptavān |
hutabhuk cāpi jaṭhare prāṇināṃ devatātmakaḥ || 115 ||
[Analyze grammar]

mahāṃśca vaiṣṇavo bhūtvā vahnirūpeṇa tiṣṭhati |
mokṣadāyā vrataiśvaryaṃ bodhyaṃ taddevabhāvadam || 116 ||
[Analyze grammar]

evaṃ yaḥ kurute lakṣmi mokṣāmekādaśīṃ śubhām |
tasya pāpāni naśyanti mṛto mokṣamavāpnuyāt || 117 ||
[Analyze grammar]

nātaḥ parataraṃ kiñcid vajrapāpavināśakam |
mokṣadaṃ cā'bhavat kiṃcinnārāyaṇaprabhāvavat || 118 ||
[Analyze grammar]

asyā na puṇyasaṃkhyāsti priyaṃ tvetadvrataṃ mama |
cintāmaṇisamā mokṣapradā sā me bahupriyā || 119 ||
[Analyze grammar]

paṭhanācchravaṇāccāpi vratatulyaphalapradā |
putrasmṛddhipradā bhuktimuktidā mama vallabhā || 120 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne mārgaśīrṣaśuklapakṣīyamokṣadaikādaśīvratavidhāne vaiśvānara |
nṛpativṛttāntatatpitruddhārādinirūpaṇanāmaikonacatvāriṃśadadhikadviśatatamo'dhyāyaḥ || 239 ||
[Analyze grammar]