Chapter 204

śrīnārāyaṇa uvāca |
śaṃbhuḥ prāha ca devarṣiṃ nāradaṃ śṛṇu cāhnikam |
brāhme muhūrte cotthāya guruṃ bhāle vicintayet || 1 ||
[Analyze grammar]

brahmarandhre hariṃ dhyāyeddhṛdaye kṛṣṇamarcayet |
prasannavadanaṃ śāntaṃ projjvalaṃ ca manoharam || 2 ||
[Analyze grammar]

guruṇā dīyate devo mantraḥ pūjā vidhirjapaḥ |
guruṇā pūyate śiṣyastasmāddevātparo guruḥ || 3 ||
[Analyze grammar]

gururbrahmā gururviṣṇurgururdevo maheśvaraḥ |
guruḥ prakṛtirīśādyā guruścandro'nalo raviḥ || 4 ||
[Analyze grammar]

gururvāyuśca varuṇo gururmātā pitā suhṛt |
gurureva paraṃbrahma nāsti pūjyo guroḥ paraḥ || 5 ||
[Analyze grammar]

abhīṣṭadeve ruṣṭe ca samartho rakṣaṇe guruḥ |
na samarthā gurau ruṣṭe rakṣaṇe sarvadevatāḥ || 6 ||
[Analyze grammar]

yasya tuṣṭo guruḥ sākṣājjayastasya pade pade |
yasya ruṣṭo gurustasya vināśaḥ sarvaśo mataḥ || 7 ||
[Analyze grammar]

asaṃpūjya guruṃ devaṃ kevalaṃ yaśca pūjayet |
duritaṃ gurvasevotthaṃ na nāśayati devatā || 8 ||
[Analyze grammar]

devā'pūjanajaṃ pāpaṃ guruḥ śakto vyapohitum |
tasmādabhīṣṭadevācca guruḥ pūjyatamo mataḥ || 9 ||
[Analyze grammar]

guruṃ hariṃ ca kṛṣṇaṃ ca dhyātvā smṛtvā sato janān |
malamūtratyajanāya gacchet tadyogyabhūmikām || 10 ||
[Analyze grammar]

jaladevālayavṛkṣavartmagoṣṭhaśubhasthalam |
gṛhavahnicatuṣkārdrasasyavalmīkakandaram || 11 ||
[Analyze grammar]

udyānadarbhaphaladruśmaśānakrīḍanasthalam |
evamādyasthalaṃ hitvā tyājyaṃ malādikaṃ sadā || 12 ||
[Analyze grammar]

ekāṃ liṃge mṛdaṃ dadyād vāmahaste catuṣṭayam |
ubhayorhastayodvai tu mūtraśaucaṃ prakīrtitam || 13 ||
[Analyze grammar]

maithunānantaraṃ śaucaṃ dviguṇitaṃ samācaret |
ekā liṃge gude tisrastathā vāmakare daśa || 14 ||
[Analyze grammar]

ubhayoḥ sapta dātavyā pādayostrirviśuddhyati |
purīṣaśaucaṃ sarveṣāṃ sāmānya caitadeva hi || 15 ||
[Analyze grammar]

gandhalepakṣayakaraṃ vastunā payasā mṛdā |
kṛtaṃ śaucaṃ hi śaucaṃ tadanyathā'śaucameva vai || 16 ||
[Analyze grammar]

aśuddhāṃ jantusampannāṃ marditāṃ varjayenmṛdam |
kṛtvā śaucaṃ tato vārbhiḥ svasya prakṣālayenmukham || 17 ||
[Analyze grammar]

dantakāṣṭhena dantāṃśca vāriṇā ca pramārjayet |
sakṣīraṃ sakaṇṭakaṃ ca kāṣṭhaṃ dantapraśodhakam || 18 ||
[Analyze grammar]

aṣṭāṃgulottara grāhyaṃ jihvollekhyā'rdhacīrayā |
jalasnānaṃ prakurvīta smṛtvā devaṃ guru harim || 19 ||
[Analyze grammar]

raviṃ viṣṇuṃ haraṃ lakṣmīṃ satīṃ brahmādikānsurān |
nadyāṃ nade taḍāge vā tīrthe vāpyāṃ samudrake || 20 ||
[Analyze grammar]

kṛtvā saṃkalpamevā''dyaṃ mṛdaṃ gātre vilepayet |
aśvakrānte rathakrānte viṣṇukrānte vasundhare || 21 ||
[Analyze grammar]

mṛttike hara me pāpaṃ yanmayā duṣkṛtaṃ kṛtam |
uddhṛtā'si varāheṇa kṛṣṇena śatabāhunā || 2 ||
[Analyze grammar]

āruhya mama gātrāṇi sarvaṃ pāpa pramocaya |
puṇyaṃ dehi mahābhāge snānā'nujñāṃ kuruṣva mām || 23 ||
[Analyze grammar]

gaṃge ca yamune caiva godāvari sarasvati |
sindho narmade kāveri jale'smin sannidhiṃ kuru || 24 ||
[Analyze grammar]

nalinī nandinī sītā mālinī pārvatī prabhā |
viṣṇupādābjasaṃbhūtā gaṃgā māṇakī gaṇḍakī || 25 ||
[Analyze grammar]

padmāvatī bhogavatī svarṇarekhā ca kauśikī |
dakṣā pṛthvī ca śubhagā viśvakāyā śivā'mṛtā || 26 ||
[Analyze grammar]

vidyādharī suprasannā tathā lokaprasādhinī |
kṣemā ca kaṃbharā śāntā śāntidā gomatī satī || 27 ||
[Analyze grammar]

sāvitrī tulasī durgā mahālakṣmīḥ sarasvatī |
kṛṣṇāprāṇādhikā rādhā lopāmudrā ratirditiḥ || 28 ||
[Analyze grammar]

ahalyā cā'ditiḥ saṃjñā svadhā svāhā'pyarundhatī |
śatarūpā devahūtirityādyāḥ saṃsmaretsudhīḥ || 29 ||
[Analyze grammar]

snātvā jalena saṃdhṛtvā yogye dhautre ca vāsasī |
jalena candanenāpi kuryāttu tilakaṃ budhaḥ || 30 ||
[Analyze grammar]

bāhvormūle lalāṭe ca kaṇṭhadeśe ca vakṣasi |
tanmadhye candrakaṃ kuryāt kauṃkumaṃ vartulaṃ śubham || 31 ||
[Analyze grammar]

ācamya cāsane sthitvā tataḥ sandhyāṃ samācaret |
tataḥ pūjāṃ tu devānāṃ kuryācchoḍaśasādhanaiḥ || 32 ||
[Analyze grammar]

śālagrāme maṇau mantre pratimāyāṃ jale sthale |
gopṛṣṭhe ca gurau vipre praśasta tvarcanaṃ hareḥ || 33 ||
[Analyze grammar]

āsanaṃ vasanaṃ pādyamarghyamācamanīyakam |
puṣpaṃ ca candanaṃ dhūpaṃ dīpaṃ naivedyamuttamam || 34 ||
[Analyze grammar]

sugandhatailaṃ bhūṣāśca tāmbūlaṃ ca jalaṃ phalam |
arārtrikādikaṃ deyaṃ ṣoḍaśātmaprapūjanam || 35 ||
[Analyze grammar]

snānaṃ paṃcāmṛtaiścāthā'bhiṣekasnānamapyatha |
vastrāṇi candanādīni puṣpāṇi bhūṣaṇāni ca || 36 ||
[Analyze grammar]

āsanaṃ ca pradīpaśca dhūpo nevedyamityapi |
jalapānaṃ ca tāmbūlaṃ cārārtrikaṃ pradakṣiṇam || 37 ||
[Analyze grammar]

sastotranamanaṃ puṣpāṃjaliścaite'pi ṣoḍaśa |
upacārā hareḥ pūjākārye'rpyā bhāvataḥ sadā || 38 ||
[Analyze grammar]

ādau kṛtvā bhūtaśuddhiṃ prāṇāyāmaṃ tataḥ param |
aṃgapratyaṃgayornyāsaṃ mantranyāsaṃ tataḥ param || 39 ||
[Analyze grammar]

varṇanyāsaṃ tataḥ kṛtvā cārghyapātraṃ vinirdiśet |
trikoṇamaṇḍalaṃ kṛtvā tatra kūrmaṃ prapūjayet || 40 ||
[Analyze grammar]

jalenā''pūrya śaṃkhaṃ ca kūrme saṃsthāpayettathā |
jale tīrthāvāhanaṃ ca kṛtvā vastūni mārjayet || 41 ||
[Analyze grammar]

ghaṇṭāṃ ca pūjayecchaṃkhaṃ pūjayetkalaśaṃ tathā |
śālagrāmaṃ pūjayecca tatau vai pūjayeddharim || 42 ||
[Analyze grammar]

ṣoḍaśopakaraṇaiḥ saṃpūjya devān visarjayet |
devayajñaṃ tathā śrāddhaṃ kuryādvittānusārataḥ || 42 ||
[Analyze grammar]

atithipūjane bhūtayajñaṃ kuryāśca śaktitaḥ |
vṛddhānvandeta sūryādīnnamaskuryācca sarvadā || 44 ||
[Analyze grammar]

poṣyāṃśca bhojayitvā vai gṛhī bhuñjyāttu nityaśaḥ |
haviṣyānnaṃ brāhmaṇānāṃ praśastaṃ gṛhiṇāṃ sadā || 45 ||
[Analyze grammar]

nārāyaṇocchiṣṭamiṣṭamabhakṣyamaniveditam |
nityaṃ naivedyabhojī yaḥ śrīviṣṇoḥ sa hi vaiṣṇavaḥ || 46 ||
[Analyze grammar]

annaṃ jalaṃ phalaṃ puṣpaṃ patraṃ śrīharaye'rpitam |
bhakṣyaṃ peyaṃ tadanyattvapeyaṃ cā'bhakṣyamityatha || 47 ||
[Analyze grammar]

jātiduṣṭaṃ rūpaduṣṭamākṛtiduṣṭameva yat |
guṇaduṣṭaṃ pariṇāmaduṣṭaṃ na bhakṣyameva tat || 48 ||
[Analyze grammar]

vrateṣvannaṃ na vai bhakṣyaṃ na bhakṣyaṃ prāk prapūjanāt |
ahiṃsāsatyamasteye brahmacaryā'parigrahau || 49 ||
[Analyze grammar]

yamā hyete rakṣaṇīyāḥ sukhadā mokṣadā api |
śaucaṃ tuṣṭistapaḥ pāṭhaḥ kṛṣṇapūjā ca mokṣadāḥ || 50 ||
[Analyze grammar]

nindanaṃ naiva kartavyaṃ kvacitkasyāpi kenacit |
parapīḍākaraṃ satyaṃ na vācyaṃ duḥkhadaṃ hi tat || 51 ||
[Analyze grammar]

preraṇālakṣaṇo hyartho dharmo nānartha eva yaḥ |
kṛtaghnatā na kartavyā śāṭhyaṃ kāryaṃ na kutracit || 52 ||
[Analyze grammar]

vyavahāryaṃ yathānyāyaṃ copārjyaṃ dravyamityatha |
dhanadhānyajīvikāścodyamaḥ kāryo yathābalam || 53 ||
[Analyze grammar]

mithyā'bhiśaṃsanīyaṃ na parasvaṃ nāharet kvacit |
divase codyamaḥ kāryaḥ sāyaṃ sandhyājapādikam || 54 ||
[Analyze grammar]

harermandiragamanaṃ stavanaṃ kīrtanādikam |
kṛtvā cāyavyayamantraṃ suptavyaṃ gṛhamedhibhiḥ || 55 ||
[Analyze grammar]

pramadāḥ sarvathā rakṣyāḥ santoṣṭavyāśca vastubhiḥ |
na codvegavatā bhāvyaṃ kleśaḥ kāryo na vai kvacit || 56 ||
[Analyze grammar]

ātmānātmavicārādi kartavyaṃ vai mumukṣubhiḥ |
paramātmā parabrahma sarvadehiṣvavasthitaḥ || 57 ||
[Analyze grammar]

sākṣī ca phaladātā ca vartate dehikarmaṇām |
pañcaprāṇāḥ svayaṃ viṣṇustarpitavyaḥ subhojanaiḥ || 468 ||
[Analyze grammar]

mano brahmā tarpitavyaścānandarañjanādibhiḥ |
indro rudraścendriyāṇāṃ tarpitavyaḥ sadarthakaiḥ || 59 ||
[Analyze grammar]

jñānarūpā tarpitavyā māyā tu śravaṇādibhiḥ |
ātmā sākṣī svayaṃbrahma tṛptavyaṃ yāvadarpaṇaiḥ || 60 ||
[Analyze grammar]

parabrahma harikṛṣṇaścetaneṣu sadā sthitaḥ |
tadadhīnāścetanā vai ātmāno bhinnakarmaṭhāḥ || 61 ||
[Analyze grammar]

karmaphalānvitā jīvā jaḍeṣu vṛttijīvinaḥ |
jaḍāḥ parārthāḥ pareṇa yujyante bhogyatā''ptaye || 62 ||
[Analyze grammar]

cetanāśca sadarthairvai yujyante bhogalabdhaye |
triguṇātmā jaḍā māyā mahattattvaṃ tato hyabhūt || 33 ||
[Analyze grammar]

ahaṃkārastato jātastasmādindriyadevatāḥ |
sūkṣmabhūtāni sūkṣmebhyaḥ sthūlabhūtāni niryayuḥ || 64 ||
[Analyze grammar]

teṣāṃ kalevaraṃ labdhaṃ cetanena svakarmabhiḥ |
jñānena karmaṇā nāśo vairāgyeṇā'vibandhanam || 65 ||
[Analyze grammar]

dharmeṇā'gragateḥ puṇya bhaktyā yānaṃ harergṛhe |
kartāpi naiva mantavyaḥ karoti bhagavān nanu || 66 ||
[Analyze grammar]

ātmā dehī na ca kartā kartā dhartā hariḥ svayam |
baddhā muktā svabhāvena prakṛtirna tu cetanaḥ || 67 ||
[Analyze grammar]

śarīraṃ bhūtasaṃghātairjāyate nātmano janiḥ |
śarīraṃ śīryate bhāvairna tvātmano viśīrṇatā || 68 ||
[Analyze grammar]

sajātīyaṃ sajātīyadehena bhujyate sadā |
śarīraṃ tu śarīreṇa bhujyate bhogavaddhi tat || 69 ||
[Analyze grammar]

sthūlaṃ bhogāśrayaṃ sūkṣmaṃ vividhaṃ rūpamāsthitam |
idaṃ labdhaṃ cānubhūtaṃ sukhyahaṃ ceti cāntare || 70 ||
[Analyze grammar]

ahaṃkārakṛte buddhitattve bhavati nātmani |
anyatra bhavati svasmin jānātyeṣo bhramo nanu || 71 ||
[Analyze grammar]

bhrama ityapi saṃsārastajjanyavāsanānvitaḥ |
bhramā'bhāve gṛhā'bhāvaḥ saṃsārā'bhāva eva vai || 72 ||
[Analyze grammar]

bhramasattve gṛhasattvaṃ gṛhiṇībhāvanā tathā |
kva gṛhaṃ kva gṛhiṇī ca vāsanā sarvamucyate || 73 ||
[Analyze grammar]

tadbhāve kva gṛhaṃ ca gṛhiṇī kva sutādayaḥ |
śarīraṃ cāpi nāstyeva kā kathā tatsuyoginām || 74 ||
[Analyze grammar]

tasmādātmā parabrahmabhakto'sti kiraṇaṃ hareḥ |
māyāguṇaiḥ rahito'sti na kālena sa lipyate || 75 ||
[Analyze grammar]

karmaṇā'pi na lepo'sti svabhāvo nāsti tatra ca |
nirguṇasya cita ānandamūrterbandhanaṃ nu kim || 76 ||
[Analyze grammar]

prabhuḥ karoti sarvaṃ vai mantavyaṃ tvevameva hi |
vapate karṣuko bījaṃ jalaṃ siñcati karṣukaḥ || 77 ||
[Analyze grammar]

rakṣati karṣukaḥ khādyaṃ dadātyapi ca karṣukaḥ |
lunāti dhānyaṃ kṛṣikṛdbhakṣayatyapi karṣukaḥ || 78 ||
[Analyze grammar]

karoti sarvaṃ kṛṣikṛt sasyaṃ naiva karoti saḥ |
mahāṃstu karṣukaḥ kṛṣṇo bījamutpādayatyayam || 79 ||
[Analyze grammar]

bījaṃ tvavati garbhe saḥ dadāti janma mādhavaḥ |
bālye yauvane vārdhakye sa vai rakṣati keśavaḥ || 80 ||
[Analyze grammar]

annaṃ jalaṃ ca vastraṃ ca dadāti kṛṣṇa eva vai |
mṛtyuṃ prerayati kṛṣṇo layaṃ nayati mādhavaḥ || 81 ||
[Analyze grammar]

karoti sarvaṃ sākṣī śrīkṛṣṇo nāhaṃ karomi vai |
evaṃ sarvaṃ samarpyaṃ vai kṛṣṇe nirbandhanāya tat || 82 ||
[Analyze grammar]

upāsanā sadā kṛṣṇe hyārādhanā'pi mādhave |
bhaktiḥ sevā ca yā kācit sarvaṃ vai kamalāpatau || 83 ||
[Analyze grammar]

samarpyaṃ sarvathā tadvai mokṣaṇaṃ cātra jīvataḥ |
sarvatra vyāpakaścāntaryāmī śrīpatirīśvaraḥ || 84 ||
[Analyze grammar]

sarvadivyaguṇairyukto goloke cākṣare pare |
vaikuṇṭhe śvetabhūmau ca badaryāṃ cā'mṛte'mbare || 85 ||
[Analyze grammar]

kṛṣṇo harirnarāvāso nārāyaṇaḥ śriyaḥ patiḥ |
rādhāpatiḥ prabhāsvāmī māṇikyādhipatiḥ sa hi || 86 ||
[Analyze grammar]

lakṣmīpatiḥ kambharāsatpatiḥ śrīharireva saḥ |
sītāpatiḥ satīsvāmī pārvatīpatireva saḥ || 87 ||
[Analyze grammar]

sarvapatiḥ svayaṃ kṛṣṇaḥ śrīkṛṣṇaḥ sākṛtiḥ sadā |
paro vyūho vibhavaścā'ntaryāmi mūrtireva saḥ || 88 ||
[Analyze grammar]

svarūpaśceti ṣaḍrūpo vartate bhagavān hariḥ |
nirākāraśca sākāro bhūmā sumūrtiko'pi san || 89 ||
[Analyze grammar]

adṛśyo'pi sudṛśyo'sti tādṛccakṣuryutaiḥ sa hi |
yogināṃ dhyānaviṣayo bhaktānāṃ premabandhanaḥ || 90 ||
[Analyze grammar]

nārīṇāṃ bhartṛviṣayo dīnānāṃ dīnatātmakaḥ |
dṛśyā'dṛśyo'pi divyena cakṣuṣā dṛśya eva saḥ || 91 ||
[Analyze grammar]

dhyāyante yogino nityaṃ taṃ vai kṛṣṇaṃ parātparam |
paramānandarūpaṃ ca sarvakāraṇakāraṇam || 92 ||
[Analyze grammar]

yathā mṛdā kulālo hi ghaṭaṃ nirmāti tattathā |
parabrahma prakṛtyā ca sṛṣṭiṃ nirmāti sarvathā || 93 ||
[Analyze grammar]

nityaṃ tatparamaṃ brahma nityā vai prakṛtirmatā |
tadbrahmaśaktiḥ prakṛtiḥ śarīraṃ bījarūpiṇī || 94 ||
[Analyze grammar]

prakṛtiśaktimadbrahma tejoyuktaṃ sadāsti vai |
yasya tejaśca tatrāsti sa vai paramapūruṣaḥ || 95 ||
[Analyze grammar]

kāraṇena vinā kāryaṃ kuto vā vartate katham |
tasya tejo mahatkāryaṃ na syādvai puruṣaṃ vinā || 96 ||
[Analyze grammar]

vaiṣṇavāḥ sarvathā tasya saumyaṃ rūpaṃ manoharam |
divyaṃ muktādisaṃsevyaṃ dhyāyante paramātmanaḥ || 97 ||
[Analyze grammar]

navīnanīradaśyāmaṃ kiśoravayasaṃ prabhum |
śaranmadhyāhnamārtaṇḍaprabhodbhāsisulocanam || 98 ||
[Analyze grammar]

śaratpārvaṇapūrṇendukoṭyadhikaprabhānanam |
koṭikandarpalāvaṇyalīlā''nanditamanmatham || 99 ||
[Analyze grammar]

puṣṭaṃ sarvāṃgasaundaryamādhuryapūritā''bharam |
sasmitaṃ mūralīhastaṃ pītāmbaradharaṃ harim || 100 ||
[Analyze grammar]

candanokṣitasarvāṃgaṃ kaustubhena virājitam |
ājānu mālatīmālāvanamālāvirājitam || 101 ||
[Analyze grammar]

tribhaṃgabhaṃgyā tiṣṭhantaṃ maṇiratnādibhūṣitam |
mayūrapicchacūḍaṃ ca hīrakamukuṭojjvalam || 102 ||
[Analyze grammar]

ratnakeyūravalayaratnamañjīrarājitam |
ratnakuṇḍalayugmena gaṇḍasthalasuśobhitam || 103 ||
[Analyze grammar]

muktābhadaśanaṃ pakvabimbauṣṭhaṃ śukanāsikam |
sthirayauvanayuktābhiḥ sasmitābhiśca sādaram || 104 ||
[Analyze grammar]

vīkṣitaṃ gopikābhiśca ramārādhājayādibhiḥ |
bhaktapriyaṃ bhaktanāthaṃ bhaktānugrahakārakam || 105 ||
[Analyze grammar]

rāseśvaraṃ surasikaṃ mahāmuktaiḥ susevitam |
akṣaraṃ paramaṃ brahma bhagavantaṃ sanātanam || 106 ||
[Analyze grammar]

evaṃrūpaṃ hariṃ lakṣmi cātra dhyāyanti vaiṣṇavāḥ |
sa eva bhagavānādigoloke dvibhujaḥ prabhuḥ || 107 ||
[Analyze grammar]

gopaveṣaiśca gopālaiḥ pārṣadaiḥ parisevitaḥ |
paripūrṇatamaḥ śrīmān śrīkṛṣṇo rādhikāpatiḥ || 108 ||
[Analyze grammar]

sarvāntarātmā sarvatra pratyakṣo bhaktabhāvataḥ |
kṛṣiśca sarvavacano nakāraścātmavācakaḥ || 109 ||
[Analyze grammar]

sarvātmā ca parabrahma svayaṃ kṛṣṇaḥ prakīrtitaḥ |
kṛṣiśca sarvavacano nakāraścā''divācakaḥ || 110 ||
[Analyze grammar]

sarvādipuruṣo vyāpī svayaṃ kṛṣṇaḥ prakīrtitaḥ |
kṛṣirbhūvācakaḥ śabdo ṇaśca nirvṛttivācakaḥ || 111 ||
[Analyze grammar]

ānandabhūḥ parabrahma kṛṣṇa ityasti sarvathā |
kṛṣistu vāsanānāśo naśca svālaya prāpaṇam || 112 ||
[Analyze grammar]

śuddhasya muktidastasmāt svayaṃ kṛṣṇaḥ prakīrtitaḥ |
kṛṣiśca karṣaṇaṃ naśca nayanaṃ divyamakṣare || 113 ||
[Analyze grammar]

nītvā dhāmni svayaṃ sākṣād bhavati kṛṣṇa eva saḥ |
sa evāṃśena bhagavān vaikuṇṭhe tu caturbhujaḥ || 114 ||
[Analyze grammar]

caturbhujaiḥ pārṣadaiḥ saṃsevitaḥ kamalāpatiḥ |
sa eva phalayā viṣṇuḥ pātā ramāpatiḥ svayam || 115 ||
[Analyze grammar]

sa eva śvetaloke'bdhikanyāsvāmī caturbhujaḥ |
sa eva kṣīravārdhisthaśeṣaśāyī hariḥ svayam || 116 ||
[Analyze grammar]

sa eva kāraṇaṃ sarvarūpāṇāmakṣare sthitaḥ |
parabrahma śrīharirvai paramātmā parameśvaraḥ || 117 ||
[Analyze grammar]

etatsarvaṃ kathitaṃ te cintanīyaḥ sa hi tvayā |
ityuktvā viramantaṃ nāradaḥ śaṃbhuṃ pratuṣṭuve || 118 ||
[Analyze grammar]

jñānamāsādya mantrādi sarvamāsādya nārada |
praṇamya śaṃkaraṃ divyaṃ yayau nārāyaṇāśramam || 119 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne nāradāya śaṃkareṇā''hnikaṃ nārāyaṇapūjanaṃ tattvajñānaṃ bhakṣyā'bhakṣyaṃ parabrahmādi ca kathitamitinirūpaṇanāmā |
caturadhikadviśatatamo'dhyāyaḥ || 204 ||
[Analyze grammar]