Chapter 179

śrīnārāyaṇa uvāca |
śrūyatāṃ ca mahālakṣmi vidhuraḥ śaṃkaraḥ kvacit |
himālaye vicacāra śailapatnīṃ dadarśa saḥ || 1 ||
[Analyze grammar]

sādhusvarūpaḥ saumyaśca prasannatāṃ prakāśayan |
śaṃbhuruvāca mātarme bhikṣāṃ dehyekalāya me || 2 ||
[Analyze grammar]

menā pakvānnamādāya yāvaddadāti śaṃbhave |
śaṃbhuḥ prāha tadā menāṃ bhikṣāṃ dehyekalāya me || 2 ||
[Analyze grammar]

iyaṃ pakvānnabhikṣā tu naikasyaiva kṛte bhavet |
tatrānyeṣāṃ vibhāgo'stita bhikṣāṃ dehyekalāya me || 4 ||
[Analyze grammar]

yatra nānyasya bhāgo'sti vṛṇe bhikṣāṃ tu tādṛśīm |
menā prāha tadā sādhuṃ sādho kimicchasi priyam || 5 ||
[Analyze grammar]

yathecchasi tathā dāsye sphuṭaṃ vada dadāmyaham |
menāṃ śaṃbhustadā prāha dadāmītyucyate yadi || 6 ||
[Analyze grammar]

prāpnomītyeva ca prāptā prāpsyāmyavasarā''game |
mātastadā''gamiṣyāmi bhikṣāṃ dehyekalāya me || 7 ||
[Analyze grammar]

menā tvāścaryamālokya patitā pādayostadā |
uvāca dāsye'vaśyaṃ te yadi yogyā kṛte tava || 8 ||
[Analyze grammar]

śaṃbhuḥ prāha tathāstveva mātaḥ paśya tayā vinā |
vicarāmi mahāraṇye priyayā śivayā vinā || 9 ||
[Analyze grammar]

tava gehe satī dakṣaputrī janma grahīṣyati |
sā matkṛte bhavedbhikṣā śaṃkaro'haṃ samāgataḥ || 10 ||
[Analyze grammar]

menā śrutvā tvatyatīva prasannā'bhūd hṛdantare |
bhojitaḥ pūjitaḥ śaṃbhurjagāma ca yathecchayā || 11 ||
[Analyze grammar]

tata ārabhya menā sā sasmāra bhāviputrikām |
śaṃbhuṃ jāmātaraṃ caiva mumoda hṛdayāmbare || 12 ||
[Analyze grammar]

prāgbhavīyabhaktivaśāt śive bhaktirvyavardhata |
śivāṃ dhyātvā śivāmātā bhaviṣyati samudraje || 13 ||
[Analyze grammar]

lakṣmīruvāca |
menakā sā śivāmātā kā''sīttacchrīhare vada |
hariḥ prāha śṛṇu lakṣmi kathayāmi samāsataḥ || 14 ||
[Analyze grammar]

vedhaḥputrasya dakṣasya kanyāḥ ṣaṣṭiḥ prakīrtitāḥ |
tāsāṃ vivāhamakarot sa varaiḥ kaśyapādibhiḥ || 15 ||
[Analyze grammar]

tāsāṃ madhye svadhānāmnī pitṛbhyo dattavān sutām |
tisro'bhavan sutāstasyāḥ subhagāḥ dharmasaṃbhṛtāḥ || 16 ||
[Analyze grammar]

jyeṣṭhā madhyā kaniṣṭhā ca menā dhanyā kalāvatī |
etāḥ pitṛmānasotthāstisraścā'yonijā hi tāḥ || 17 ||
[Analyze grammar]

avyāhatagatikāstā yoginyaḥ kāmarūpagāḥ |
ekasmin samaye tisro bhaginyastīrthavāñcchayā || 18 ||
[Analyze grammar]

śvetadvīpaṃ viṣṇulokaṃ jagmurdarśanahetave |
divyaṃ vimānamāruhya gatāstāḥ kāmagaṃ śubham || 19 ||
[Analyze grammar]

vimānādavatīryaiva cakrurviṣṇoḥ stutiṃ natim |
tasthustadājñayā śvete susamājo mahānabhūt || 20 ||
[Analyze grammar]

samāje tatra pañcahāyanā brahmasutāstadā |
sanakādyāḥ samājagmuḥ stutvā natvā hariṃ tataḥ || 21 ||
[Analyze grammar]

samāje viṣṇuvacanāt tasthuste sanakādayaḥ |
samājaśca tadottasthau munisvāgatamācaran || 22 ||
[Analyze grammar]

devīsatīyoginīnāṃ samājo'pyutthitastadā |
tisro bhaginyaḥ paścātsthā nottasthurmohato yathā || 23 ||
[Analyze grammar]

tāstisro yoginīnāṃ madhyapṛṣṭhe saṃsthitā yataḥ |
pāścātyā naiva paśyanti paurvāste'pi ca tāṃstathā || 24 ||
[Analyze grammar]

naḥ tisra naiva paśyanti samājāgrasthitā yataḥ |
kimutthāya ca kartavyaṃ matvaivaṃ notthitā yataḥ || 25 ||
[Analyze grammar]

saiṣā māyā''lasyarūpā pramādātmakamohinī |
bhūtvā tadvaśagāstā vai na cakruryogyamarhaṇam || 26 ||
[Analyze grammar]

yadyapi jñāninaḥ santo na krodhavaśagā nanu |
kintu bhāviprabalena preritāḥ krodharaśminā || 27 ||
[Analyze grammar]

tāsāṃ tātkālikīṃ dṛṣṭvā śāntopi yogīśaḥ kṛtim |
sanatkumāro muktātmā śāpaṃ daṇḍakaraṃ dadau || 28 ||
[Analyze grammar]

yūyaṃ tisro bhaginyo vai pitṛkanyā api dhruvam |
śiṣṭācāravihīnāḥ sthā'bhyutthānanativarjitāḥ || 29 ||
[Analyze grammar]

kṣudramānavakṛtyāḍhyāḥ dūrā bhavatu vai divaḥ |
narastriyaḥ saṃbhavatu labhadhvaṃ svakṛteḥ phalam || 30 ||
[Analyze grammar]

tisra ākarṇya sādhvyastāḥ patitvā pādayormuneḥ |
prāhurmune dayāsindho prasanno bhava sarvathā || 31 ||
[Analyze grammar]

tvādṛśānāṃ satāṃ bhāvo hṛdaye'smākamasti vai |
pramādānna natirabhyutthānādisatkriyāḥ kṛtāḥ || 32 ||
[Analyze grammar]

phalaṃ labdhaṃ kṛteḥ svasyāḥ kuruṣvānugrahaṃ mune |
tavaiva vacanād brahman labhema svargatiṃ punaḥ || 33 ||
[Analyze grammar]

kṛpāṃ kṛtvā ṛṣistatra provāca prītamānasaḥ |
śāpoddhāraṃ karomyeva mahatkāryaṃ bhaviṣyati || 34 ||
[Analyze grammar]

tvannimittaṃ ca sukhadaṃ yatrā''śleṣo harerbhavet |
jyeṣṭhā menā hareraṃśabhūtasya himabhūbhṛtaḥ || 35 ||
[Analyze grammar]

patnī bhavatu te kanyā pārvatī saṃbhaviṣyati |
yāṃ śaṃbhave pradāyaiva prāpsyasi sukhamuttamam || 36 ||
[Analyze grammar]

ante śivā'śivā''śīrbhirmuktiṃ kailāsamāpsyasi |
madhyā dhanyā siradhvajajanakasya priyāṃ'ganā || 37 ||
[Analyze grammar]

bhavatu te sutā mahālakṣmīḥ sītā bhaviṣyati |
yāṃ rāmāya pradāyaiva prāpsyasi sukhamuttamam || 38 ||
[Analyze grammar]

ante sītārāmasya kṛpayā vaikuṇṭhamāpsyasi |
kalāvatī kaniṣṭhā ca vṛṣabhānuviśo gṛhe || 39 ||
[Analyze grammar]

patnī bhavatu te kanyā rādhikā saṃbhaviṣyati |
yāṃ kṛṣṇāya pradatvā tvaṃ prāpsyasi sukhamuttamam || 40 ||
[Analyze grammar]

ante ca rādhākṛṣṇakṛpayā golokamāpsyasi |
sukarmiṇāṃ gate duḥkhe prabhaved durlabhaṃ sukham || 41 ||
[Analyze grammar]

yūyaṃ pitṛsutāḥ sarvāḥ sadā svargavilāsikāḥ |
etannimittamālambya mokṣagāḥ saṃbhaviṣyatha || 42 ||
[Analyze grammar]

paścātsanatkumārādyāḥ samājātsvālayaṃ gatāḥ |
menādikāstisra īyuḥ svapitṛbhavanaṃ tataḥ || 43 ||
[Analyze grammar]

athaikadā kurukṣetre snātvā hīndrādayaḥ surāḥ |
āṣāḍhe māsi mārgarkṣe candrakṣayatithirhi sā || 44 ||
[Analyze grammar]

dadurindrādayastasyāṃ piṇḍān pitṛbhya ādarāt |
tilānmadhu supakvānnaṃ miṣṭaṃ haviṣyamityapi || 45 ||
[Analyze grammar]

tataḥ prītāstu pitaro devānāha sutṛptitaḥ |
vṛṇuta kiṃ vitarāmo devāḥ prāhustadā pitṝn || 46 ||
[Analyze grammar]

sarve śṛṇuta no vākyaṃ pitaraḥ prītamānasāḥ |
kartavyaṃ tattathaivā''śu devakāryepsavo yadi || 47 ||
[Analyze grammar]

yūyaṃ smaratha kanyānāṃ śvetadvīpe vṛtaṃ ca yat |
sanatkumāraśāpaṃ taṃ smaratā'thocitaṃ matam || 48 ||
[Analyze grammar]

menā nāma sutā yā vo jyeṣṭhā maṃgalakāriṇī |
tāṃ vivāhya ca suprītyā himākhyena tu bhūbhṛtā || 49 ||
[Analyze grammar]

sarve bhavantu sukhino lābhavantaḥ pade pade |
yuṣmākamamarāṇāṃ ca duḥkhahānirbhaviṣyati || 50 ||
[Analyze grammar]

surāṇāṃ vacanaṃ śrutvā smṛtvā śāpaṃ purā bhavam |
omiti procuḥ pitaro dadurmenāṃ himādraye || 51 ||
[Analyze grammar]

himādriḥ parvato divyo mahātejāḥ samṛddhimān |
dvirūpo vartate loke jaṃgamasthirabhedataḥ || 52 ||
[Analyze grammar]

pūrvāparau toyanidhī suvigāhya sthitaḥ sthiraḥ |
tuṣāravidhiratyugro devarṣisiddhasaṃśritaḥ || 53 ||
[Analyze grammar]

tapaḥ siddhipradaṃ śīghraṃ pāvanaśca mahātmanām |
sa eva divyarūpo hi ramyaḥ sarvāṃgasundaraḥ || 54 ||
[Analyze grammar]

viṣṇvaṃśaśca mahābhaktaḥ śailarājaḥ sumūrtimān |
sa eva svakulasthityai dharmavardhanahetave || 55 ||
[Analyze grammar]

svavivāhaṃ kartumanā pitṛdevahitecchukaḥ |
menāpāṇiṃ ca jagrāha vivāhavidhinā tadā || 56 ||
[Analyze grammar]

samutsavo mahānāsīt tadvivāhe sumaṃgale |
haryādayo'pi te devā ṛṣayo munayo'drayaḥ || 57 ||
[Analyze grammar]

ājagmustatra vaivāhe praśaśaṃsurhimācalam |
utsavaṃ kārayāmāsurdadurdānāni bhūriśaḥ || 58 ||
[Analyze grammar]

mahāmodānvitā devāḥ pitṝndivyānpraśasya ca |
saṃjagmuḥ svasvadhāmāni prāpya satkārapūjanam || 59 ||
[Analyze grammar]

menāṃ tu yuvatīṃ prāpya himavān gṛhadharmataḥ |
prītimānabhavattatra reme kāmād yathecchayā || 60 ||
[Analyze grammar]

atha dakṣasutā kāle satī tu himaparvate |
yadā''sīcchaṃbhunā sārdhaṃ tadaiva tāṃ tu menakā || 61 ||
[Analyze grammar]

mama gehe kṛtāvāsā matsutā vai satī matā |
iti sutāsamāṃ jñātvā siṣeve mātṛvarcasā || 62 ||
[Analyze grammar]

evaṃ nityaṃ dhyāyamānā sevate menakā satīm |
satī ca dakṣayajñe svatanuṃ tyaktvā'smaratprasūm || 62 ||
[Analyze grammar]

tasyāmahaṃ sutā syāmityavadhārya satī hṛdā |
samayaṃ prāpya prītyā sā menakāputrikā'bhavat || 64 ||
[Analyze grammar]

pārvatī sā tapaḥ kṛtvā patiṃ prāpa śivaṃ punaḥ |
menāyāṃ kanyakāstisro jātā rūpaguṇānvitāḥ || 65 ||
[Analyze grammar]

rāgiṇī kuṭilā kālī tisraḥ kanyā yathākramam |
raktāṃgī raktanetrā ca raktāmbaravibhūṣitā || 66 ||
[Analyze grammar]

rāgiṇī nāma saṃjātā jyeṣṭhā menāsutā priye |
śubhāṃgī padmapatrākṣī nīlakuṃcitamūrdhajā || 67 ||
[Analyze grammar]

śvetamālyāmbaradharā kuṭilā nāma madhyamā |
nīlāṃjanacayaprakhyā nīlendīvaralocanā || 68 ||
[Analyze grammar]

rūpeṇā'nupamā kālī jaghanyā menakāsutā |
sunābha iti ca khyātaścaturthatanayo'bhavat || 69 ||
[Analyze grammar]

jātāstāḥ kanyakāstisraḥ ṣaḍabdāt purataḥ priye |
kartuṃ tapaḥ prayātāśca devāstā dadṛśuḥ śubhāḥ || 70 ||
[Analyze grammar]

tato divākaraiḥ sarvairvasubhiśca tapasvinī |
rāgavatī nāma kanyā divaṃ nītā suraistadā || 71 ||
[Analyze grammar]

brahmaṇā sā kṛtā sandhyārāgavatī suvigrahā |
mahiṣāsuranāśāya sandhyāsamayarūpiṇī || 72 ||
[Analyze grammar]

pratīcchukī kṛttikābhāge sadā tiṣṭhate divam |
kuṭilā brahmalokaṃ tu nītā devaiḥ śaśiprabhā || 73 ||
[Analyze grammar]

brahmā prāha mahiṣasya vināśārthamiyaṃ sutā |
śārvaṃ dhārayituṃ tejo na vai śaktā hi dṛśyate || 74 ||
[Analyze grammar]

ataśceyaṃ brahmaloke satye kṛtālayā sadā |
āpomayī plāvayantī nadī tiṣṭhatu madgṛhe || 75 ||
[Analyze grammar]

iti gate kanyake dve jñātvā menā tapasvinīm |
tṛtīyāṃ putrikāṃ menāṃ tapaso'vārayadyataḥ || 76 ||
[Analyze grammar]

u mā tapaḥ kuru putrītyevamumā'bhidhā'bhavat |
ityetatkathitaṃ svalpaṃ kiṃ bhūyaḥ śrotumicchasi || 77 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne menāyai śaṃbhunā satījanmārthasūcanam menā dhanyā kalāvatī tisraḥ pitṛkanyāḥ śvetadvīpaṃ jagmuḥ |
tatra sanatkumāraśāpaḥ kramaśo himagireḥ sīradhvajajanakasya vṛṣabhānuvaiśyasya ca patnyo jātāḥ kramaśastatputryaḥ śivā sītā rādheti menāyāṃ sandhyārāgiṇī kuṭilābrahmanadī kālī ceti putrītrayaṃ sunābhaputraścetinirūpaṇanāmaikonā'śītyadhikaśatatamo'dhyāyaḥ || 179 ||
[Analyze grammar]