Chapter 178

śrīnārāyaṇa uvāca |
śṛṇu lakṣmi pareśo vā maheśo vā janārdanaḥ |
lokarītiśca prakṛtirbādhate tānapi kvacit || 1 ||
[Analyze grammar]

mānā'vamāne devasya bādhete brahmaṇo yadi |
tarhi tatra ca dakṣādeḥ kā kathā kṣudradehinaḥ || 2 ||
[Analyze grammar]

satīdehe pradagdhe ca śaṃkaro mohamāptavān |
kalatraśoko balavān svātmārāmaṃ parātparam || 3 ||
[Analyze grammar]

bādhate jñāninaṃ cāpi yogīndrāṇāṃ gurorgurum |
satīdehasya yadbhasma cāsthipuṣpāṇi yāni ca || 4 ||
[Analyze grammar]

gṛhītvā śaṃkarastāni vilalāpā'śrunetrakaḥ |
uttiṣṭhottiṣṭha subhage sati prāṇeśvari priye || 5 ||
[Analyze grammar]

śaṃkaro'haṃ tava svāmī paśya māṃ nikaṭāgatam |
sarvātmānamatidīnaṃ śavatulyaṃ tvayā vinā || 6 ||
[Analyze grammar]

yaśca śaktiṃ na jānāti jñānahīnaśca nindati |
taṃ tyaktumucitaṃ vijñe kathaṃ māṃ tyajasi priye || 7 ||
[Analyze grammar]

sasmitaṃ sakaṭākṣaṃ ca vadāgatya sudhopamam |
madhurābhāsadṛṣṭyā ca māṃ dagdhaṃ siktamācara || 8 ||
[Analyze grammar]

prāṇādhike samuttiṣṭha rudantaṃ māṃ na paśyasi |
parityajya ca naḥ prāṇān gantuṃ nārhasi sundari || 9 ||
[Analyze grammar]

pativrate samuttiṣṭha kathaṃ māṃ nā'dya sevase |
ityuktvā ca satībhasma dehe śaṃbhuradhārayat || 10 ||
[Analyze grammar]

gaṃgātaṭe rurodoccaiḥ sati sādhvītyudīrya ca |
trinetranetranīraiśca saṃbabhūva saraḥ tanuḥ || 11 ||
[Analyze grammar]

tadvai netrasaro nāma tīrthaṃ jātaṃ tapaḥsthalam |
satyasthimālikāṃ kṛtvā dadhāra kaṇṭhabhūṣaṇam || 12 ||
[Analyze grammar]

nityaṃ tadbhasma bhaktyā ca cakāra gātralepanam |
sati prāṇeśvarītyuktvā punarmūrchāmavāpa saḥ || 13 ||
[Analyze grammar]

tadā devāḥ sapārṣado nārāyaṇaścaturbhujaḥ |
brahmā śeṣaśca dharmaśca surāḥ sarve maharṣayaḥ || 14 ||
[Analyze grammar]

mūrchitaṃ ca samutthāya rudantaṃ śaṃkaraṃ tadā |
ucitaṃ bodhayāmāsurviṣṇuḥ prāha taduttaram || 15 ||
[Analyze grammar]

śaṃbho māyāguṇāḥ sarve hetavaḥ sukhaduḥkhayoḥ |
viṣṇumāyā balavatī guṇayuktaṃ prabādhate || 16 ||
[Analyze grammar]

duḥkhaṃ śoko bhayaṃ śaṃbho guṇātīte bhavennahi |
manvate sukhaduḥkhāni svapnānīva vipaścitaḥ || 17 ||
[Analyze grammar]

jñānaṃ labha mahādeva svastho bhava maheśvara |
cetanāṃ kuru bhadraṃ te satīṃ prāpsyasi niścitam || 18 ||
[Analyze grammar]

sudinaṃ durdinaṃ śaśvad bhavatyeva bhave bhave |
tābhyāṃ harṣaśca śokaśca jāyate prākṛte jane || 19 ||
[Analyze grammar]

śubhena cā'śubhena karmaṇā sudinadurdine |
tatra karma śubhaṃ kāryaṃ sadā sattvasvabhāvajam || 20 ||
[Analyze grammar]

sattvaṃ saṃsargasādhyaṃ ca saṃgaḥ puṇyabalādbhavet |
puṇyaheturmano bodhyaṃ māna'sehaṃ hariḥ sthitaḥ || 21 ||
[Analyze grammar]

mayā ca hariṇā sarvaṃ kāryate śocanaṃ tyaja |
atha caikaṃ parabrahma dvividhaṃ bhavatīcchayā || 22 ||
[Analyze grammar]

nityaṃ ca prākṛtaṃ caiva śarīraṃ dvividhaṃ hi tat |
nityaṃ vināśarahitaṃ naśvaraṃ prākṛtaṃ sadā || 23 ||
[Analyze grammar]

ahaṃ tvaṃ cāpi bhagavānnāvayornityavigrahaḥ |
āvayoraṃśabhūtā ye prākṛtā naṣṭavigrahāḥ || 24 ||
[Analyze grammar]

rudrādayastadaṃśāśca madaṃśā viṣṇurūpiṇaḥ |
mamāpyevaṃ dvidhā rūpaṃ dvibhujaṃ ca caturbhujam || 25 ||
[Analyze grammar]

caturbhujo'haṃ vaikuṇṭhe padmayā pārṣadaiḥ saha |
goloke dvibhujo'haṃ ca gopībhiḥ saha rādhayā || 26 ||
[Analyze grammar]

evaṃ sa bhagavānāste nityaḥ saḥ puruṣottamaḥ |
nityā ca prakṛtistasya hyuttamā pauruṣī matā || 27 ||
[Analyze grammar]

mahāmāyā mahālakṣmīrmaheśvarī ca saiva ha |
sadā tau dvau ca saṃśliṣṭau sarveṣāṃ pitarau śiva || 28 ||
[Analyze grammar]

satīmicchasi cecchaṃbho prakṛteḥstavanaṃ kuru |
śokaṃ tyaja svīyamāyāṃ bhaja smara jagatprasūm || 29 ||
[Analyze grammar]

śokanāśo jāyatāṃ te śivaṃ syācca mamā''śiṣā |
dūraṃ viplavahetuśca yātustrīvirahajvaraḥ || 30 ||
[Analyze grammar]

ityuktvā śroharirmaunamāsasādātha śaṃkaraḥ |
snātvā natvā ca śrīkṛṣṇaṃ baddhapuṭāṃjalistataḥ || 31 ||
[Analyze grammar]

stavanaṃ kartumārebhe brahmaśakteḥ sabhaktikaḥ |
brāhmi brahmasvarūpe tvaṃ māṃ prasīda sanātani || 32 ||
[Analyze grammar]

paramātmasvarūpe ca paramānandarūpiṇi |
oṃ prakṛtyai namo bhadre māṃ prasīda bhavārṇave || 33 ||
[Analyze grammar]

sarvamaṃgalarūpe ca prasīda sarvamaṃgale |
vijaye śivade devi māṃ prasīda jayaprade || 34 ||
[Analyze grammar]

vedavedāṃgarūpe ca vedamātaḥ prasīda me |
śokaghne jñānarūpe ca prasīda bhaktavatsale || 35 ||
[Analyze grammar]

sarvasampatprade māye prasīda jagadambike |
lakṣmīrnārāyaṇakroḍe sraṣṭurvakṣasi bhāratī || 36 ||
[Analyze grammar]

mama kroḍe mahāmāyā vipṇumāye prasīda me |
kālarūpe kāryarūpe prasīda dīnavatsale || 37 ||
[Analyze grammar]

kṛṣṇasya rādhike bhadre prasīda kṛṣṇapūjite |
samastakāminīrūpe kalāṃśena prasīda me || 38 ||
[Analyze grammar]

sarvasampatsvarūpe tvaṃ prasīda sampadāṃ prade |
yaśasvibhiḥ pūjite tvaṃ prasīda yaśasāṃ nidhe || 39 ||
[Analyze grammar]

carācarasvarūpe ca prasīda mama mā ciram |
mama yogaprade devi prasīda siddhayogini || 40 ||
[Analyze grammar]

sarvasiddhisvarūpe ca prasīda siddhidāyini |
adhunā rakṣa māmīśe pradagdhaṃ virahāgninā || 41 ||
[Analyze grammar]

svātmadarśanapuṇyena krīṇīhi parameśvari |
ityuktvā virataḥ śaṃbhurdadarśa gaganasthitām || 42 ||
[Analyze grammar]

taptakāṃcanavarṇābhāṃ ratnābharaṇabhūṣitām |
īṣaddhāsyaprasannāsyāṃ śatabhujāṃ ca tāṃ satīm || 43 ||
[Analyze grammar]

dṛṣṭvā tāṃ virahāsaktaḥ punastuṣṭāva satvaram |
duḥkhaṃ nivedayāmāsa prarudan virahodbhavam || 44 ||
[Analyze grammar]

darśayāmāsā'sthimālāṃ svāṃgasthaṃ bhasma bhūṣaṇam |
kṛtvā bahuparīhāraṃ toṣayāmāsa sundarīm || 45 ||
[Analyze grammar]

babhūva parituṣṭā sā śaṃbhumuvāca bhāvataḥ |
sthiro bhava mahādeva prāṇādhika mama prabho || 46 ||
[Analyze grammar]

bhavānātmā ca yogīśaḥ svāmī janmani janmani |
ahaṃ śailendrakāminyāṃ labdhvā janma maheśvara || 47 ||
[Analyze grammar]

tava patnī bhaviṣyāmi muñca tvaṃ virahajvaram |
ityuktvā śivamāśvāsya cāntardhānaṃ cakāra sā || 48 ||
[Analyze grammar]

svanivāsānsurā jagmuḥ kailāsaṃ ca yayau haraḥ |
nanarta sagaṇastūrṇaṃ santyajya virahajvaram || 49 ||
[Analyze grammar]

etatpaṭhecchṛṇuyācca na viyogajvaro bhavet |
na bhavetkāminībhedastasya janmani janmani || 50 ||
[Analyze grammar]

ityevaṃ śaṃkaraṃ tūktvā menāyāṃ janmakāmukī |
jagāma himavaddeśe'dṛśyarūpā cacāra sā || 51 ||
[Analyze grammar]

kurvāṇā ca tapo divyaṃ śivasya vyacarat sakhī |
śivaṃ śivaṃ bhajamānā samayaṃ taṃ pratīkṣate || 52 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne satīdāhottaraṃ bhasmāsthīni samādāya śaṃkarasya gaṃgātaṭe śokaḥ satīstotraṃ satīdarśanaṃ pārvatī |
janmavacanaṃ cetyādinirūpaṇanāmā'ṣṭasaptatyadhikaśatatamodhyāyaḥ || 178 ||
[Analyze grammar]