Chapter 171

śrīnārāyaṇa uvāca |
atha vairājapuruṣāt nābhau padme'bhavat tvajaḥ |
viṣṇuśca hṛdayājjātastadā vai viṣṇupadmajau || 1 ||
[Analyze grammar]

mahāmahaṃ mahāṃścāhamitiśraiṣṭhyavivādinau |
tayormadhye mahattejaḥkiraṇaṃ samabhūttadā || 2 ||
[Analyze grammar]

tatra devastṛtīyo vai śaṃbhuḥ prādurbabhūva ha |
golokātpreṣitaścāsyā'ṇḍasya devādhivṛttaye || 3 ||
[Analyze grammar]

śrīkṛṣṇena svayaṃ cātra preṣitaḥ śaṃkaro mudā |
vaiṣṇavo bhaktavaryaśca samutpanno harīcchayā || 4 ||
[Analyze grammar]

harestadaiva kiraṇaṃ mūrterverājanetrayoḥ |
samāgatya babhūvātisthiraṃ tasya prabhāvataḥ || 5 ||
[Analyze grammar]

lalāṭātsa samutpannaḥ kiraṇāḍhyo maheśvaraḥ |
kiraṇaṃ divyabāṇaṃ vaiṃ brahmaṇaścihnameva tat || 6 ||
[Analyze grammar]

maheśastatra vairājātmajo jātaḥ sutāmasaḥ |
śivā ca tasya dehe vai vāmabhāge'prakāśitā || 7 ||
[Analyze grammar]

kṛṣṇājñayā samāyātā śivo vetti na tāṃ tadā |
śivo jānāti caikaṃ svaṃ devaṃ tatra śivāṃ vinā || 8 ||
[Analyze grammar]

kintvadṛśyā śivā śaṃbhorvāme śaktisvarūpiṇī |
āsīd yā kṛṣṇanetrasthā saivā''sīcchivanetrayoḥ || 9 ||
[Analyze grammar]

brahmaṇā preritā rātriḥ sā saṃbabhūva dākṣiṇī |
satītināma saṃcakre tasyā dakṣastadājñayā || 10 ||
[Analyze grammar]

atha tāṃ ca sutāṃ mātā susaṃskṛtya yathocitam |
śiśupānena vidhinā tasyai stanyādikaṃ dadau || 11 ||
[Analyze grammar]

pālitā sā'tha vīriṇyā'siknyā dakṣeṇa vavṛdhe |
tasyāṃ susadguṇāḥ sarve viviśuḥ śaiśave'pi vai || 12 ||
[Analyze grammar]

sakhīmadhyagatā krīḍācaraṇe'pi svabhāvataḥ |
lilekha śaṃbhudevasya pratimāṃ vai kvacitkvacit || 13 ||
[Analyze grammar]

bālyociteṣu gīteṣu jagau rudraṃ haraṃ muhuḥ |
hare tvevaṃ bhaktimatī sasmāra smaranāśakam || 14 ||
[Analyze grammar]

tasyāṃ pitroḥ sukaruṇā vavṛdhe'tīva nityadā |
bālā'pi guṇavṛddhā sā toṣayāmāsa janmadau || 15 ||
[Analyze grammar]

ekadā nārado brahmā jagmaturdakṣamandiram |
dṛṣṭā tābhyāṃ dakṣapārśve tvāsīnā sā satī śubhā || 16 ||
[Analyze grammar]

pitrā namaskṛtau cobhau satyā cāpi namaskṛtau |
praṇāmānte satīṃ vīkṣya dakṣadattaśubhāsane || 17 ||
[Analyze grammar]

sthitāvātithyavidhinā satkṛtāvūcaturmudā |
brahmā prāha muniṃ paśya nāradevaṃ maheśvarī || 18 ||
[Analyze grammar]

kasya bhāryā suyogyā syād rekhāḥ paśyā'tha māṃ vada |
nāradastatra deveśīṃ natvā prāha sukanyake || 19 ||
[Analyze grammar]

ehi paśyāmi te hastarekhāḥ kā bhavasīti yat |
vihasya kanyayā hastatale sandarśite tadā || 20 ||
[Analyze grammar]

dhanurmīnastathā ketuḥ svastikaśca triśūlakam |
pradīpaḥ kamalaṃ bāṇoṃ'kuśaḥ śaṃkhaśca cakrakam || 21 ||
[Analyze grammar]

paraśuḥ sāyakaḥ śaktiḥ ṣaḍvāme ṣaṭ ca dakṣiṇe |
kramāddhaste nāradena dṛṣṭānyetāni rekhayā || 022 ||
[Analyze grammar]

lalāṭe'kṣi tṛtīyaṃ ca kalā candrasya vakragā |
hṛdye śivamūrtiśca svarṇarekhāmayī śubhā || 23 ||
[Analyze grammar]

nābherūrdhvaṃ carmacihnamadhaśca karavālakam |
dhanurbāṇena yuktaṃ ca padoḥ siṃho vṛṣastathā || 24 ||
[Analyze grammar]

śikharaṃ vallikā nāgadalaṃ siṃhāsanaṃ tathā |
ūrdhve rekhe sarpaphaṇā dṛṣṭānyetāni rekhayā || 25 ||
[Analyze grammar]

kathitaṃ brahmaṇe cāpi dakṣāya nāradena tu |
neyaṃ vai mānavī putrī nāpi daivī na cā'parā || 26 ||
[Analyze grammar]

jaganmātā gurūṇāṃ ca gurvī parā tu vaiṣṇavī |
kṛṣṇāṃganā ca vā nārāyaṇavāmā pareśvarī || 27 ||
[Analyze grammar]

brahmāṃganā ca vā viṣṇoraṃganā parameśvarī |
śivāṃganā bhavedyadvā nānyā syājjagadaṃbikā || 28 ||
[Analyze grammar]

manye'syā hṛdi śarvo'sti netracandrau lalāṭake |
kare triśūlarekhā'sti caraṇe vṛṣabho hariḥ || 29 ||
[Analyze grammar]

ataḥ śivasya ratnaṃ syānnānyasya kasyacid dhruvam |
salajjā'dhomukhī śrutvā bhūtvā vihasya satvaram || 30 ||
[Analyze grammar]

gṛhāntare jagāmātha mātre nyavedayacca tat |
asiknyā ca gṛhāttatra bahirāgatya tau tadā || 31 ||
[Analyze grammar]

namaskṛtau jalabhojyaphalādyaiśca prapūjitau |
dakṣeṇa vanditau vṛddhau satī tāvadgṛhātpunaḥ || 32 ||
[Analyze grammar]

bhargacitraṃ svalikhitaṃ nītvā bahirupāgatā |
sahāsā darśitavatī omityarthaṃ maharṣaye || 33 ||
[Analyze grammar]

nanāma nāradaṃ sā ca brahmāṇaṃ praṇanāma sā |
brahmā prāha tadānīṃ mastake datvā karāṃjalim || 34 ||
[Analyze grammar]

yastvāṃ kāmayate yaṃ tvaṃ tathā kāmayase sati |
tamāpnuhi patiṃ devaṃ sarvajñaṃ jagadī śvaram || 35 ||
[Analyze grammar]

yo nānyāṃ jagṛhe nāpi gṛhṇāti na grahīṣyati |
jāyāṃ sa te patirbhūyādananyasadṛśaḥ śubhe || 36 ||
[Analyze grammar]

ityuktvā suciraṃ tāṃ vai sthitvā dakṣālaye punaḥ |
visṛṣṭau tena saṃyātau svasthānaṃ tau samudraje || 37 ||
[Analyze grammar]

dakṣo'bhavat tadā prīto manyamānaḥ svadhanyatām |
satī ca vardhamānā''pa kiṃcidyauvanabhāvanām || 38 ||
[Analyze grammar]

dakṣaśca cintayāmāsa satīyogyaṃ varaṃ śivam |
bālyaṃ vyatītaṃ putryā me kaumāryaṃ vigataṃ tathā || 39 ||
[Analyze grammar]

prodbhinnāntarvayoyuktāmudvāhā'rhasukanyakām |
tapobhiḥ svarṇarūpāḍhyāṃ dāsye bhargāya sarvathā || 40 ||
[Analyze grammar]

satī svayaṃ tathā bhargaṃ prāptumaicchat hṛdantare |
pituśca nirṇayaṃ jñātvā mātaraṃ prāha sā satī || 41 ||
[Analyze grammar]

śaṃkarasya kṛte mātastapovratādi darśaya |
tavā'jñayā vrataṃ kurve śivasantoṣaṇāya vai || 42 ||
[Analyze grammar]

māturājñāṃ tu sā labdhvā śivaṃ prāptuṃ dṛḍhavratā |
gṛhe tvārādhayāmāsa vrataiśca vividhaiḥ satī || 43 ||
[Analyze grammar]

īṣaśuklā'ṣṭamīnandātithāvānarca śaṃkaram |
guḍaudanaiḥ salavaṇaiḥ ṣoḍaśādyupacārakaiḥ || 44 ||
[Analyze grammar]

kārtikasya caturdaśyāmapūpaiḥ pāyasairapi |
ṣoḍaśādyupacāraiśca pupūja śaṃkaraṃ satī || 45 ||
[Analyze grammar]

mārgaśīrṣe'sitāṣṭamyāṃ satilaiḥ sa yavaudane |
ṣoḍaśādyupacāraiśca pupūja śaṃkaraṃ satī || 46 ||
[Analyze grammar]

pauṣe tu śuklasaptamyāṃ kṛtvā jāgaraṇaṃ niśi |
prātaḥ sā kṛśarānnena pupūja śaṃkaraṃ satī || 47 ||
[Analyze grammar]

māghe tu pūrṇamāsyāṃ sā kṛtvā jāgaraṇaṃ niśi |
ārdravastrā nadītīre'karocchaṃkarapūjanam || 48 ||
[Analyze grammar]

phālgune śivarātryāṃ ca vrataṃ jāgaraṇaṃ niśi |
śailūṣaiḥ ṣoḍaśārthaiśca sā''narca taṃ divāniśam || 49 ||
[Analyze grammar]

caitre śuklacaturdaśyāṃ palāśairdamanaiḥ śivam |
ṣoḍaśādyupacāraiśca divā rātrāvapūjayat || 50 ||
[Analyze grammar]

rādhaśuklatṛtīyāyāṃ tilāhārayavaudanaiḥ |
navaiśca ṣoḍaśāthaiṃścā'pūjayacchaṃkaraṃ satī || 51 ||
[Analyze grammar]

jyeṣṭhasya pūrṇimārātrau nirāhārā ca śaṃkaram |
vasanairbṛhatīpuṣpairapūjayadvrate satī || 2 ||
[Analyze grammar]

āṣāḍhasya caturdaśyāṃ śuklāyāṃ kṛṣṇa vāsasā |
bṛhatīkusumaiḥ śaṃbhumapūjayadvrate satī || 53 ||
[Analyze grammar]

śrāvaṇasya sitāṣṭamyāṃ caturdaśyāṃ ca sā śivam |
yajñopavītairvāsobhiḥ pavitrairapyapūjayat || 54 ||
[Analyze grammar]

bhādre kṛṣṇatrayodaśyāṃ bahupuṣpaphalaiḥ satī |
pūjayitvā caturdaśyāṃ cakāra jalabhojanam || 55 ||
[Analyze grammar]

nānāvidhapatrapuṣpaphalaistatkālajaiḥ satī |
cakre suniyatā''hārā'dhikamāse śivavratam || 56 ||
[Analyze grammar]

nityaṃ ca sarvamāseṣu śivapūjāparāyaṇā |
dṛḍhavratā'bhavadadevaṃ nānyat sasmāra taṃ vinā || 57 ||
[Analyze grammar]

itthaṃ nandāvrataṃ kṛtsnaṃ samāpya tāpasī satī |
dadhyau śivaṃ vyavasthāsu yoginīva kṛtādarā || 58 ||
[Analyze grammar]

kṛśākṛśāṃgī tapasā tejomūrtiḥ surūpiṇī |
jātā śivamayī saumyā śivāṃ'kā'rhaṇatāṃ gatā || 59 ||
[Analyze grammar]

janmajayantyāṃ satyāśca dvādaśābde mahotsave |
dakṣeṇā''kāritā devā manavo'nye maharṣayaḥ || 60 ||
[Analyze grammar]

tadā tu sarvato devā munayaścākhilāḥ priye |
ahaṃ brahmā ca dikpālā lokapālāḥ surādayaḥ || 61 ||
[Analyze grammar]

āśīrvādān pradātuṃ ca jagmurdakṣagṛhe tadā |
satkṛtāśca mahatyāṃ vai sabhāyāṃ sarvadevatāḥ || 62 ||
[Analyze grammar]

āśīrvādān daduḥ satyai praṇanāma satī ca tān |
pūrvaṃ dṛṣṭā satī puṣṭā tapasā'rdhāpi nāsti yat || 63 ||
[Analyze grammar]

dṛṣṭvā satītapastādṛk jñātvā śivārthameva tat |
prasannāḥ sarvadevādyāścakrurdevyai natiṃ muhuḥ || 64 ||
[Analyze grammar]

prāhuḥ sati tapaścātikaṣṭapradaṃ tu mā kuru |
avaśyaṃ te patiḥ śarvo mahādevo bhaviṣyati || 65 ||
[Analyze grammar]

āśīrvādānprayujyaivaṃ gṛhītvā'rhaṇamityatha |
praśaśaṃsustapastasyāḥ siddhāvasthāṃ gatāṃ satīm || 66 ||
[Analyze grammar]

dakṣoktiṃ ca satīcchāṃ ca samprāpya munayaḥ surāḥ |
pūjāṃ prāpya satīṃ natvā jagmuḥ kailāsabhūbhṛtam || 67 ||
[Analyze grammar]

sāvitrīhito brahmā lakṣmīnārāyaṇastathā |
ramayā sahito viṣṇurdevībhiḥ sahitāḥ surāḥ || 68 ||
[Analyze grammar]

saptarṣayaḥ svapatnībhiḥ sahitā manavastathā |
jagmuḥ kailāsaśikharaṃ yatra devo maheśvaraḥ || 69 ||
[Analyze grammar]

gatvā śaṃbhuṃ praṇamyaiva dṛṣṭvā śāntaṃ ca yoginam |
tuṣṭuvurvividhaiḥ stotrairbaddhāṃjalipuṭā mudā || 70 ||
[Analyze grammar]

namo'kṣarasvarūpāya kṛṣṇanetrātmane namaḥ |
namaḥ sadāśivākhyāya tejaḥpūjāya te namaḥ || 71 ||
[Analyze grammar]

vairājaputrarūpāya brahmacaryāya te namaḥ |
namo brahmasvarūpāya sadā śāntāya te namaḥ || 72 ||
[Analyze grammar]

nirguṇāya guṇāḍhyāya vaiṣṇavāya namonamaḥ |
avyaktarātridehāya nirvikārāya te namaḥ || 73 ||
[Analyze grammar]

maheśāya pareśāya śivā'dhipataye namaḥ |
kvacicchāntikṛte kādācitkasaṃhāriṇe namaḥ || 74 ||
[Analyze grammar]

namaḥ śeṣāya saṃkarṣaṇasvarūpāya te namaḥ |
namo vairāgyavāsāya satīrāgāya te namaḥ || 75 ||
[Analyze grammar]

na yasya devā ṛṣayaḥ siddhāḥ sādhvyaśca sādhavaḥ |
viduḥ padaṃ svarūpaṃ ca tasmai śivāya te namaḥ || 76 ||
[Analyze grammar]

padaṃ didṛkṣavo yasya yatante yoginaḥ sadā |
tasmai namaḥ pareśāya yogasthāya namonamaḥ || 77 ||
[Analyze grammar]

anantasiddhiyuktāya girāṃ dūrāya te namaḥ |
nama ātmaprakāśāya nirvāṇasthāya te namaḥ || 78 ||
[Analyze grammar]

jñānine te namaścāstu niṣkriyāyā''tmavedine |
tapasā drāk prasannāya sarvadātre ca te namaḥ || 79 ||
[Analyze grammar]

trinetrāya sacandrāya sarvādhyakṣāya te namaḥ |
śaraṇāyātaprārthyārthalābhadāya ca te namaḥ || 80 ||
[Analyze grammar]

aiśvaryāṇāṃ pradātre te mokṣadāya ca te namaḥ |
bhakteṣṭapūrakāyā'mnāyodadhaye ca te namaḥ || 81 ||
[Analyze grammar]

svaprakāśāya nityāya pratyakdraṣṭre ca te namaḥ |
sakāmā vātha niṣkāmā bhaktāste śaraṇāgatāḥ || 82 ||
[Analyze grammar]

aprāpya siddhiṃ yasmānna nivartante ca te namaḥ |
kācitkanyā tvadarthaṃ vai karoti tapa utkaṭam || 83 ||
[Analyze grammar]

tvaṃ kathaṃ cā'karuṇo'si prasanno bhava te namaḥ |
lokakāryapravāhārthaṃ vicāraṃ kuru śaṃkara || 84 ||
[Analyze grammar]

adhyātmayogagamya tvāṃ praṇamāmaḥ stumo vayam |
na tvaṃ devo'suro martyo na tiryaṅn dvijaḥ paśuḥ || 85 ||
[Analyze grammar]

na strī na ṣaṃḍho na pumān yo'si so'si ca te namaḥ |
viśvalayakṛte viśvadhāriṇe praṇatā vayam || 86 ||
[Analyze grammar]

sāṃkhyā jñānena paśyanti samādhau yoginaśca yam |
bhaktāḥ kṛpayā paśyanti trayīmayaṃ ca te namaḥ || 87 ||
[Analyze grammar]

namo bhaktoddhārakartre namaste gūḍhavarcase |
namaḥ pratyakṣadevāya cā'parokṣānubhūtaye || 88 ||
[Analyze grammar]

kālarātrivilāsāya dakṣaputryārthitāya ca |
pravṛttāya namastubhyaṃ nivṛttāya ca te namaḥ || 89 ||
[Analyze grammar]

bhaktecchāpūraka svāmin pūrayecchāṃ ca vedhasaḥ |
tūṣṇīmāsannitistutvā śrutvā śaṃbhurjahāsa vai || 90 ||
[Analyze grammar]

dṛṣṭvā devamunīṃścānyān sastrīkāṃśca yathocitam |
svāgataṃ cātitheyaṃ ca kṛtvā papraccha kāraṇam || 91 ||
[Analyze grammar]

he viṣṇo he vidhe devā he munipravararṣayaḥ |
nijāgamanahetuṃ vai kathayadhvaṃ yathārthataḥ || 92 ||
[Analyze grammar]

sastrīkā āgatāḥ sarve kiṃ kāryaṃ vidyate mama |
iti pṛṣṭāstadā brahmā viṣṇunā parinoditaḥ || 93 ||
[Analyze grammar]

prāha śaṃbhuṃ miṣṭavāṇyā deva te'viditaṃ nahi |
tathāpi lokadharmatvātkathanīyaṃ śṛṇu prabho || 94 ||
[Analyze grammar]

viśeṣataḥ sahārthārthā vayaṃ suranarādayaḥ |
asurā vahudhā sṛṣṭau jāyante ca muhurmuhuḥ || 95 ||
[Analyze grammar]

tatra kecinmama vadhyā harervadhyāśca kecana |
atikrūrāstava vadhyā devīvadhyāstathā'pare || 96 ||
[Analyze grammar]

anye tvadvīryaputrasya vadhyāścāpi bhavanti vai |
anāśayitvā tānduṣṭān jagatsvāsthyaṃ na nirbhayam || 97 ||
[Analyze grammar]

tvayi rāgadveṣaśūnye yogamārge sthite sati |
dayāmātrasvabhāve te naṣṭā na syuḥ kadācana || 98 ||
[Analyze grammar]

tapaḥ prakurvatāṃ teṣāṃ varaiḥ puṣṭiryadi dhruvā |
tadā tu sātviko sṛṣṭiḥ kathaṃ susthā bhaviṣyati || 99 ||
[Analyze grammar]

ataśca bhavitā yuktamayukteṣūcchriteṣu vai |
sṛṣṭisthityantakarpāṇi kāryāṇyasmābhireva ha || 100 ||
[Analyze grammar]

vayaṃ tvekasvarūpā hi bhinnāḥ kāryasya bhedataḥ |
kāryabhedo na siddhaśced rūpabhedo'prayojanaḥ || 101 ||
[Analyze grammar]

ahaṃ viṣṇuśca sastrīkau sujātau kāryahetutaḥ |
tathā tvamapi sastrīko bhava viśvahitāya vai || 102 ||
[Analyze grammar]

parigṛhṇīṣva bhāryārthe rāmāmekāṃ suśobhanām |
striyaṃ vivāhya lokasya kuru kāryaṃ mahattamam || 103 ||
[Analyze grammar]

yathā padmālayā viṣṇoḥ sāvitrī ca yathā mama |
tathā sahacarīṃ śaṃbho kāntāṃ gṛhṇīṣva kāminīm || 104 ||
[Analyze grammar]

śaṃbhurvihasya brahmāṇaṃ viṣṇuṃ ca prāha tāttvikam |
he brahman he hare me stho yuvāṃ priyatarau sadā || 105 ||
[Analyze grammar]

yuvayordarśanādadyā''nando me jāyate'dhikaḥ |
bhavadbhyāṃ tu madarthaṃ yanniścitaṃ vyāvahārikam || 106 ||
[Analyze grammar]

yuktameva bhavet kintu me hṛdi rocate nahi |
tapasvino viraktasya yogamārgā'tigasya ca || 107 ||
[Analyze grammar]

jñāninaḥ kāmaśūnyasya svātmārāmasya sarvathā |
nivṛttasyā''tmadraṣṭuśca kāminyā kiṃ prayojanam || 108 ||
[Analyze grammar]

ātmano yogalagnasya mamā''nandaḥ sadā'sti vai |
nānyasaṃsargasaṃprāptā''nandaśeṣī bhavāmyaham || 109 ||
[Analyze grammar]

vivāho bandhanaṃ raudraṃ dvayoreva parasparam |
yoginastatkimarthaṃ vai nirāśasya balānnayet || 110 ||
[Analyze grammar]

tasmātpatnyā rucirme no satyaṃ vaḥ pravadāmyaham |
viṣṇuḥ prāha tadā śrutvā śaṃbhuṃ śrīkṛṣṇadarśitam || 111 ||
[Analyze grammar]

goloke yatpratijñātaṃ sṛṣṭau kāryaṃ yadā bhavet |
yadāvaśyakatā te syāttadā dāsye vibhāvarīm || 112 ||
[Analyze grammar]

kāle gṛhītvā prakṛtiṃ śṛṃgāraṃ ca kariṣyasi |
kāle gṛhī tathā kāle tapasvī bhava vāṃcchayā || 113 ||
[Analyze grammar]

vidhuro maṃgalāyā'tra kalpyate nahi kutracit |
vidhurasya sastrīkeṣu vāso'pi bhayado bhavet || 114 ||
[Analyze grammar]

samo bhūtvā sameṣveva mānyo bhavati nā'samaḥ |
sameṣu viṣamo naśyet naśyeyurviṣamātsamāḥ || 115 ||
[Analyze grammar]

sṛṣṭiśāsanakartṝṇāṃ gṛhasthānāṃ samānatā |
sadā cāpekṣyate tasmāt sapatnīko bhavā'dhunā || 116 ||
[Analyze grammar]

nahi vai vidhuro bhrātā strīṣu viśvāsabhūmikaḥ |
nahi yajñādipaitryādikārye yogyo vinā strīyam || 117 ||
[Analyze grammar]

amaṃgalaḥ sadā nārīśūnyo bhavati karmaṭhaḥ |
akarmaṭhastathā nārīyuktaścā'maṃgalo bhavet || 118 ||
[Analyze grammar]

sūṣṭikāryādhikṛtastvaṃ śaṃbho mā'maṃgalo vasa |
sadā sumaṃgalo bhūtvā tiṣṭhā'smatsu vicārya ca || 119 ||
[Analyze grammar]

saṃsmṛtya kṛṣṇavacanaṃ sadāro bhava śaṃkara |
śrutvaivaṃ vacanaṃ viṣṇoḥ smṛtvā kṛṣṇoktimityatha || 120 ||
[Analyze grammar]

nityasiddhaśivāprāptiṃ dharmaṃ vicārya śaṃkaraḥ |
prāha viṣṇo kariṣyāmi bhavaduktaṃ sadā hitam || 121 ||
[Analyze grammar]

matvā vaco gariṣṭhaṃ vo niyogaṃ śrīharestathā |
kariṣyāmi vivāhaṃ vai kṛṣṇavaśyo'smyahaṃ sadā || 122 ||
[Analyze grammar]

parantu yādṛśīṃ kāntāṃ grahīṣyāmi śṛṇuśva tām |
yā me tejo grahītuṃ dhārayituṃ sudṛḍhā bhavet || 123 ||
[Analyze grammar]

ahaṃ yogī yathā jñānī sāpi matsadṛśī bhavet |
raṇe yoge ca vijñāne guṇaiśvarye ratau samā || 124 ||
[Analyze grammar]

evaṃ na cedvinodvāhaṃ sthātavyaṃ sukhataḥ sadā |
tasmājjāyāṃ prādiśa tvaṃ matsamā vartate yadi || 125 ||
[Analyze grammar]

tatrāpyekaḥ paṇo me syāt tayā bhāvyaṃ tathā mayi |
aviśvāso madukte cet mayā tyaktā bhaviṣyati || 126 ||
[Analyze grammar]

iti śaṃbhorvacaḥ śrutvā viṣṇurbrahmā vihasya tam |
prāhaturyādṛśī preṣṭhā te'styasmābhiḥ sumārgitā || 127 ||
[Analyze grammar]

goloke kṛṣṇahṛdayāt yā śivā netrayoḥ sthitā |
vairājanetrayoḥ sthitvā devendriyeṣu taijasī || 128 ||
[Analyze grammar]

sthitā yā śeṣaśāyiśrīharerindriyama ṇḍale |
rātrirvibhāvarī śaṃbho yā śivā vāmagā ca te || 129 ||
[Analyze grammar]

apṛthaksiddhasambaddhā sā satī dakṣaputrikā |
tvādṛśī sā bhaved bhāryā'dhikatejobalānvitā || 130 ||
[Analyze grammar]

sā tapasyati deveśa tvadarthaṃ hi dṛḍhavratā |
tvāṃ patiṃ prāptukāmā sā dakṣagehe'sti kanyakā || 131 ||
[Analyze grammar]

dātuṃ gaccha varaṃ tasyai kṛpāṃ kuru maheśvara |
tāṃ vivāhaya suprītyā varaṃ dattvā yatheṣṭadam || 132 ||
[Analyze grammar]

atrāgatānāṃ devānāṃ saṃkalpaṃ paripūraya |
maṃgalaṃ paramaṃ bhūyāt paśyāmaśca tadutsavam || 133 ||
[Analyze grammar]

śrutvā tu śaṃkaraḥ prāha omiti svīkṛtaṃ mayā |
yāmi tapaḥphalaṃ dātuṃ bhavanto yāntu bho surāḥ || 134 ||
[Analyze grammar]

punarvo darśanaṃ bhāvyaṃ vivāhotsavakarmaṇi |
ityājñaptāḥ satkṛtāśca brahmaviṣṇusurādayaḥ || 135 ||
[Analyze grammar]

datvā''śīrvādavacanaṃ saphalo'stu manorathaḥ |
jagmuḥ svaṃ svaṃ niketaṃ te sastrīkāścātiharṣitāḥ || 136 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne śaṃbhorvairājalalāṭādutpattiḥ śivāyā dakṣagṛhe prākaṭyottaraṃ brahmanāradāgamaḥ nāradakathitacihnarekhābhiḥ śivapatnī |
tvaniścayena satyā vārṣikatapovratakaraṇam dvādaśe vārṣikasatījanmajayantyā utsave brahmaviṣṇusurāṇāṃ sastrīkānāmāgamanaṃ satītapaḥ prekṣya brahmādīnāṃ kailāsagamanaṃ satīpāṇigrahaṇavaradānārthaṃ śaṃkarāyopadeśa ityādinirūpaṇanāmaikasaptatyadhikaśatatamo'dhyāyaḥ || 171 ||
[Analyze grammar]