Chapter 166

śrīnārāyaṇa uvāca |
tato lakṣmi stutiṃ cakrurdevā dhyātvā maheśvarīm |
gaṃgātaṭe ca saṃhatya śrūyatāṃ kathayāmi te || 1 ||
[Analyze grammar]

namo mātre mahāmātre jananyai te muhurnamaḥ |
namo māyai mahāmāyai māyāyai te namonamaḥ || 2 ||
[Analyze grammar]

brahmāṇyai cā'kṣarāṇyai te muktānyai te namonamaḥ |
vāsudevyai ca prakṛtyai pradhānāyai namonamaḥ || 3 ||
[Analyze grammar]

bhūmnai kālyai mahākālyai mahālakṣmyai namonamaḥ |
hiraṇyāyai sugarbhāyai vairājyai te namonamaḥ || 4 ||
[Analyze grammar]

vareṇyai vararūpāyai golokyai te namonamaḥ |
nārāyaṇyai ca kṛṣṇāyai vaikuṇṭhāyai namonamaḥ || 5 ||
[Analyze grammar]

śvetāyai ca badaryai ca mārtaṇḍāyai namonamaḥ |
pāvanyai pavamānāyai cā'vyākṛtyai namonamaḥ || 6 ||
[Analyze grammar]

sāvitryai cāpi gāyatryai raudrāyai te namonamaḥ |
dhātryai gauryai ca vaiṣṇavyai jyotsnāyai te namonamaḥ || 7 ||
[Analyze grammar]

brahmacāripravaryāyai vīryāyai te namonamaḥ |
mahatyai cābhimānāyai cākūtyai tai namonamaḥ || 8 ||
[Analyze grammar]

cittyai vṛttyai pravṛttyai ca pralayāyai namonamaḥ |
svargāyai satyalokāyai lokapāyai namonamaḥ || 9 ||
[Analyze grammar]

ramāyai ca jayāyai ca vijayāyai namonamaḥ |
rādhāyai sarvakāriṇyai lakṣmyai te'stu namonamaḥ || 10 ||
[Analyze grammar]

nairṛtyai sukhasampattyai saumyāyai te namonamaḥ |
vārkṣyai bījasvarūpāyai ratyai devyai namonamaḥ || 11 ||
[Analyze grammar]

yā devī sarvasattveṣu viṣṇumāyā vyavasthitā |
nyāsastasyai natistasyai namastasyai namonamaḥ || 12 ||
[Analyze grammar]

cetanā buddhirūpā yā nidrārūpā ca yā sthitā |
chāyārūpā kṣudhārūpā śaktirūpā ca yā sthitā || 13 ||
[Analyze grammar]

tṛṣṇā kṣāntiḥ dayā proktā tasyai tasyai namonamaḥ |
lajjā śāntistathā śraddhā kāntirvṛttiḥ smṛtistathā || 14 ||
[Analyze grammar]

tuṣṭiḥ puṣṭiśca yā proktā tasyai tubhyaṃ namonamaḥ |
dhātryai caiva vidhātryai te mātre devyai namonamaḥ || 15 ||
[Analyze grammar]

āsurāṇāṃ mahānadya vartate samupadravaḥ |
antaḥ sthitvā pradraṣṭryai te vāraṃvāraṃ namonamaḥ || 16 ||
[Analyze grammar]

ityevaṃ stūyamānā sā pārvatī parameśvarī |
snānasṛtyā''gatā tatra yatra devā stuvanti te || 17 ||
[Analyze grammar]

praṇatā ca tadā devaiḥ prasannā prāha tān surān |
mama dehādviniṣkṛṣya kośarūpāṃ tu sundarīm || 18 ||
[Analyze grammar]

dadāmi devarakṣārthaṃ surā gṛhṇantu māmakīm |
surūpāṃ divyaśobhaḍhyāṃ mūrtiṃ gṛhṇantu māmakīm || 19 ||
[Analyze grammar]

devāstu kauśikīṃ kanyā nītvā vindhyācalīṃ yayuḥ |
kauśikī ca tadā vindhyācalyāṃ devyāṃ vyavasthitā || 20 ||
[Analyze grammar]

devāścāsuranāśārthamudyamaṃ cakrire tadā |
pārvatyāḥ kośarūpā sā kṛṣṇakāntimayī tanuḥ || 21 ||
[Analyze grammar]

kṛṣṇavarṇā'bhavat kālī kālikā nāmataḥ smṛtā |
apa vindhyācale daityā jagmurdevyuktyanusṛtāḥ || 22 ||
[Analyze grammar]

mantraṇāṃ kārayāmāsurdūtaiḥ patnyarthamatra te |
sugrīvaṃ preṣayāmāsurdūtaṃ vindhyācalīṃ prati || 23 ||
[Analyze grammar]

dūtaḥ prāha mahādevi śuṃbhena preṣito'smyaham |
śuṃbhaścāsti mahārājastrailokyeśvara ekarāṭ || 24 ||
[Analyze grammar]

tvayyāraktamanā rājā sa yadāha śṛṇuṣva tat |
mayā tu nirjitā lokāḥ sadikpālāścaturdaśa || 25 ||
[Analyze grammar]

trailokye yāni rājyāni madadhīnīkṛtāni ca |
ratnāni yāni trailokye sāmprataṃ tāni me gṛhe || 26 ||
[Analyze grammar]

airāvatādayaḥ santi dvipāstu mama mandire |
uccaiḥśravādayaścāśvā vartante mama mandire || 27 ||
[Analyze grammar]

kalpadrupārijātāśca sugandhayanti me gṛham |
haṃsayuktavimānāni devagandharvanākinām || 28 ||
[Analyze grammar]

mahāpadmādinidhayo vartante madgṛhe khalu |
ratnākarasya ratnāni chatracāmaramālikāḥ || 29 ||
[Analyze grammar]

syandanāni vicitrāṇi ratnaśreṣṭhāni yāni ca |
vividhāśca rasāḥ śreṣṭhā nityayauvanapuṣṭidāḥ || 30 ||
[Analyze grammar]

evaṃ dāsāśca dāsyaśca kāmabhūṣāśca naikadhā |
sarvaṃ prākāmyavaśagaṃ siddhayaḥ santi me gṛhe || 31 ||
[Analyze grammar]

parvatāḥ saritaḥ saptā'bdhayo'raṇyāni devatāḥ |
prabhūtāni dyumaṇayaḥ santi matsevakā gṛhe || 32 ||
[Analyze grammar]

rājñyaḥ santi yathākāmaṃ sevikāśca sahasraśaḥ |
sarvāstāstava dāsīrvai kariṣye yadi me bhava || 33 ||
[Analyze grammar]

tvaṃ prakhyaṃ sundarīratnaṃ vayaṃ ratnabhujo yataḥ |
māṃ vā mamā'nujaṃ devi bhaja ratnottamā'si yat || 34 ||
[Analyze grammar]

mahārājñīṃ kariṣye tvāṃ matparigrahatāṃ vraja |
nararatnaṃ ca māṃ devi tvayā kasmānna gṛhyate || 35 ||
[Analyze grammar]

ityuktā sā mandahāsyā gabhīrāntā jagād tam |
satyamuktaṃ tu śuṃbhena trailokyavijayena vai || 36 ||
[Analyze grammar]

kintvasmākaṃ ca devīnāṃ kulāgataparamparā |
yuddhe jayati kanyāṃ yastasya sā saṃbhavet priyā || 37 ||
[Analyze grammar]

tadāgacchatu vikhyātastādṛśaḥ śubha eva ha |
niśuṃbho vā raṇabhūmau samāgacchatu māṃ jayet || 38 ||
[Analyze grammar]

kiṃ cireṇātra paṇye vai pāṇiṃ gṛhṇātu tadvidham |
dūtaḥ prāha tato devīṃ mā'valiptā bhavātra vai || 39 ||
[Analyze grammar]

caturdaśabhuvāṃ bhūpā nirjitāstena garviṇā |
sā tvaṃ gaccha mayā sārdhaṃ susvāgatapuraḥsarā || 40 ||
[Analyze grammar]

keśā''karṣaṇajātā'vamānaṃ mā gamanaṃ tava |
devyuvāca yathārthaṃ tvaṃ kathayatyeva gauravam || 41 ||
[Analyze grammar]

kintu devīkuladharmo'nyathābhāvī na karhicit |
tadvai vyācakṣva śuṃbhāya yathāyuktaṃ karotu saḥ || 42 ||
[Analyze grammar]

dūto natvā gataḥ śuṃbhaṃ prāha vistaratastu tat |
śrutvā kruddho mahāgarvaḥ prāha dhūmrākṣamānataḥ || 43 ||
[Analyze grammar]

śīghraṃ sasainyo gaccha tvaṃ keśākarṣaṇapūrvakam |
ānayā'tra ca tāṃ duṣṭāṃ rakṣakān saṃpramāraya || 44 ||
[Analyze grammar]

dhūmrākṣastadvacaḥ śrutvā ṣaṣṭisahasradānavaiḥ |
sahitaḥ sa jagāmāśu vindhyācalanivāsinīm || 45 ||
[Analyze grammar]

prāhā''gaccha ṛjurītyā śubhaṃ patiṃ gṛhāṇa ca |
no ced balānnayāmyeva yathecchasi tathā kuru || 46 ||
[Analyze grammar]

devī prāha tadā daityaṃ vinā raṇaṃ na me paṇaḥ |
balavān balayukto'si yathecchasi tathā kuru || 47 ||
[Analyze grammar]

śrutvaivaṃ so'sahamāno balāddhartuṃ samāgataḥ |
devyā tatraiva hūṃkāravahninā bhasmasātkṛtaḥ || 48 ||
[Analyze grammar]

atha sainyaṃ mahākruddhaṃ devīnāśārthamāgatam |
vavarṣa sāyakaiḥ śastrairastraiḥ śaktiparaśvadhaiḥ || 49 ||
[Analyze grammar]

devīṃ te chādayāmāsurvṛṣṭyā śaravipūlayā |
devyājñayā tadā siṃho garjanāṃ pracakāra ha || 50 ||
[Analyze grammar]

garjanāphenabindubhyaḥ siṃhāścānye sahasraśaḥ |
utpannāḥ kesarasaṭāḥ nakhadaṃṣṭrāyudhāstadā || 51 ||
[Analyze grammar]

sabalā yauvanopetā vyomoḍḍayanaśaktayaḥ |
nipeturdhūmranetrasya sainye ṣaṣṭisahasrake || 52 ||
[Analyze grammar]

kāṃścitkaraprahāraiśca kāṃściddaṃṣṭrābhirityatha |
lāṃgulaiśca nakhaiḥ kāṃścidākramairjaghnurāsurān || 53 ||
[Analyze grammar]

keṣāṃcitpāṭayāmāsurudarāṇi śirāṃsi ca |
rudhiraṃ ca papusteṣāṃ jagdhurāntrāṇi bhūriśaḥ || 54 ||
[Analyze grammar]

sainyaṃ tairnāśitaṃ sarvaṃ raktā bhūmirvyarājata |
śrutvā cukopa śuṃbhaḥ saḥ kopaprasphuritā'dharaḥ || 55 ||
[Analyze grammar]

prāha caṇḍaṃ tathā muṇḍaṃ gacchataṃ śīghrameva yat |
keśeṣvākṛṣya baddhvā ca sā samānīyatāṃ mṛgī || 56 ||
[Analyze grammar]

yadi vaḥ saṃśayaḥ prāṇe hanyatāṃ sā mṛḍamṛgī |
hanyantāṃ kesariṇaśca sūcanāṃ kurutaṃ ca mām || 57 ||
[Analyze grammar]

daityāścaṇḍādayastvevamājñaptāḥ samudāyudhāḥ |
caturaṃgabalopetā yayurvindhyācalīṃ prati || 58 ||
[Analyze grammar]

dūrātprāhuśca taṃ devi samāgaccha tvarāṃ kuru |
ehyehi śubhabhartāraṃ śuṃbhamicchasva kauśiki || 59 ||
[Analyze grammar]

na ced balāddhi neṣyāmaḥ keśākarṣaṇavihvalām |
tāvatkopaṃ cakārograṃ kauśikī tānarīnprati || 60 ||
[Analyze grammar]

triśikhāṃ bhrukuṭīṃ cakre caṇḍamuṇḍau vilokya ca |
atikrodhaplutā jātā karālavadanā tadā || 61 ||
[Analyze grammar]

kṛṣṇakālanivāsādhibhrukuṭyā krodhamiśrayā |
mahākālī samudbhūtā yoginī śastradhāriṇī || 62 ||
[Analyze grammar]

karavāladhṛtahastā khaṭvāṃgakaraśobhanā |
asipāśāṃkuśagadāghaṇṭāmudgarabhūṣitā || 63 ||
[Analyze grammar]

siṃhacarmaparidhānā muṇḍamālāvibhūṣitā |
sphāranetrā lalajjihvā bahirdaṃṣṭrā guhāmukhā || 64 ||
[Analyze grammar]

saśastrā sā mahākālī nijaghāna surāriṇaḥ |
kāṃścit khaḍgena ciccheda khaṭvāṃgenā'parāsurān || 65 ||
[Analyze grammar]

nyaṣūdayadraṇe'śvāṃśca gajān rathagadānavān |
parvataprāyarūpaṃ sā dadhārātha raṇāgatān || 66 ||
[Analyze grammar]

uṣṭrāṃśca kuṃjarān sāśvarathān pattīṃśca kauśikī |
mahākālī svavadane kṣiptvā carvayate balam || 67 ||
[Analyze grammar]

kāṃścijjagrāha muṇḍeṣu kāṃścitkaṭyāṃ ca pādayoḥ |
prāṇāt viyojayāmāsa sainyayoddhṝn samantataḥ || 68 ||
[Analyze grammar]

ruruḥ sainyātpradudrāva vindhyācalaguhāṃ prati |
anududrāva taṃ kālī dharṣaṇārthaṃ mahāsuram || 69 ||
[Analyze grammar]

devī mūrdhnyājaghānāti khaṭvāṃgena mahābalāt |
mastakaṃ kūrcitaṃ tasya mṛtiṃ jagāma tatkṣaṇāt || 70 ||
[Analyze grammar]

kālī rurośarīrasya kośamutkṛtya mūrdhajān |
nijān babandha sā devī śuśubhe cāti kiṃśukā || 71 ||
[Analyze grammar]

ekāṃ jaṭā pṛthakkṛtyotpāṭya kālyakṣipadbhuvi |
sā tadā kanyakā jātā kṛṣṇā śuklā'rdhavarṣmaṇā || 72 ||
[Analyze grammar]

kālī prāha ca tāṃ kanyāṃ caṇḍamuṇḍāvihā''naya |
svayaṃ tau mārayiṣyāmi sā'bhyadravata tāvubhau || 73 ||
[Analyze grammar]

caṇḍamuṇḍāvapi bhayāt dudruvatuśca dakṣiṇām |
caṇḍamārī samāruhya rāsabhaṃ bahuveginam || 74 ||
[Analyze grammar]

yato gatau tu tau daityau tatraivānuyayau ruṣā |
mārge dadarśa mahiṣaṃ pauṃḍrābhidhaṃ yamasya sā || 75 ||
[Analyze grammar]

tasyotpāṭya viṣāṇaṃ tu dānavānanvagājjavāt |
caṇḍamuṇḍau tadā bhūmiṃ tyaktvā gaganamāśritau || 76 ||
[Analyze grammar]

karkoṭakastadā nāgo gacchan devīdṛśiṃ gataḥ |
garutmāṃśca tathā dṛṣṭaḥ picchānyādāya tasya sā || 77 ||
[Analyze grammar]

karkoṭakaṃ tathā nītvā vegenā'bhyapatacca tau |
dharṣitau mardito baddhau karkoṭakātmarajjubhiḥ || 78 ||
[Analyze grammar]

ānītau sannidhau kālyāstasyai nyavedayacca tau |
caṇḍamuṇḍau tadā devyā viśiraskau kṛtāvubhau || 79 ||
[Analyze grammar]

rurucarmaguṇe tatrā'surāṇāṃ mastakāni tu |
tārkṣyapatrāṇi citrāṇi grathitāni hi kṛṣṇayā || 80 ||
[Analyze grammar]

kṛtvā srajamanopamyāṃ caṇḍikāyai nyavedayat |
rurucarmakṛtāṃ cātha ghargharīṃ tāṃ nyavedayat || 81 ||
[Analyze grammar]

anyāṃ srajaṃ ca tārkṣyasya patrāṇāṃ viracayya ca |
kālī dadhe svaśirasi dhammile'tha tutoṣa ca || 82 ||
[Analyze grammar]

dānavānāṃ ca rudhiraṃ papau cā''tṛpti puṣkalam |
caṇḍamuṇḍau mṛtau devyā śekharau śirasaḥ kṛtau || 83 ||
[Analyze grammar]

śekharau caṇḍamuṇḍāderyasmācchirasi saṃdhṛtau |
tasmāttadgaṇayogātsā cāmuṇḍākhyā'bhavat tataḥ || 84 ||
[Analyze grammar]

cāmuṇḍā ca tathā kālī kauśikī caiti tāstadā |
tisro militvā daityānāṃ cakrurnikandanaṃ bahu || 85 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne kailāse devakṛtapārvatīstutiḥ pārvatīdehotpannā kauśikī vindhyācalīṃ gatā tatra śuṃbhapreṣitasugrīvadūtāgamanam dhūmrākṣanāśaḥ kālīprādurbhāvaḥ caṇḍamuṇḍādināśanimittakacāmuṇḍākhyetyādikathananāmā ṣaṭṣaṣṭyadhikaśatatamo'dhyāyaḥ || 166 ||
[Analyze grammar]