Chapter 163

śrīlakṣmīruvāca |
kadā kathaṃ mahiṣākhyo hyasuraḥ samapadyata |
devīkṛtavināśaṃ ca śrotumicchāmi me vada || 1 ||
[Analyze grammar]

śrīnārāyaṇa uvāca |
śṛṇu ko'yaṃ mahiṣo'bhūt kathamāsuratāṃ gataḥ |
vināśaśca kayā rītyā kṛto devyā nibodha me || 2 ||
[Analyze grammar]

purā daityau mahāraudrau jagatkṣobhakarāvubhau |
raṃbhaścāpi karaṃbhaśca putrārthaṃ tepatustapaḥ || 3 ||
[Analyze grammar]

bahūnvarṣagaṇānekaḥ karaṃbhaḥ salile sthitaḥ |
grāho bhūtvā mahendrastaṃ jale jaghāna daṃṣṭrayā || 4 ||
[Analyze grammar]

naṣṭe bhrātari raṃbho'bhūdatikrodhapariplutaḥ |
vahnau svaśīrṣaṃ saṃchidya hotumaicchanmahā'suraḥ || 5 ||
[Analyze grammar]

khaḍgamādāya yāvadvai chettumudyukta eva saḥ |
tāvanniṣiddho vai vahnirnaiva mā sāhasaṃ kuru || 6 ||
[Analyze grammar]

mā mriyasva yatheṣṭaṃ te dadāmi vada mā ciram |
raṃbha prāha bhavet putrastrailokyavijayī mama || 7 ||
[Analyze grammar]

sarvadevairajeyaḥ syāttathā tvattejasā'dhikaḥ |
kāmarūpī kṛtā'strajño mahābalaparākramaḥ || 8 ||
[Analyze grammar]

vahniḥ provāca taṃ bāḍhaṃ yatheṣṭaṃ te bhaviṣyati |
yasyāṃ cittaṃ ca te lagnaṃ tayā mṛtyurbhaviṣyati || 9 ||
[Analyze grammar]

ityevamukto raṃbha sa yayau mālavaṭābhidham |
yakṣaṃ draṣṭuṃ tadā mālavaṭasya paśumaṇḍale || 10 ||
[Analyze grammar]

gajāśca mahiṣāścā'śvā gāvo'jā avayastathā |
vartante bahavastatra mahiṣyāmakaronmanaḥ || 11 ||
[Analyze grammar]

sā samāgācca daityendraṃ kāmayantī trihāyanā |
sa cāpi mahiṣo bhūtvā maithunaṃ tvācarad balī || 12 ||
[Analyze grammar]

sagarbhāṃ tāṃ mahiṣīṃ sa gṛhītvā svagṛhaṃ gataḥ |
pātāle dānavaistatra parityakto vikarmakṛt || 13 ||
[Analyze grammar]

punaḥ sa mahiṣīṃ nītvā yakṣaṃ mālavaṭā'bhidham |
samājagāma vāsāya suṣuve mahiṣī sutam || 14 ||
[Analyze grammar]

śubhraṃ tu mahiṣaṃ kāmarūpiṇaṃ sumahābalam |
putramāsādya raṃbhaḥ sa mumude vai muhurmuhuḥ || 15 ||
[Analyze grammar]

athā'nyo mahiṣaḥ kaścinmahiṣīmṛtusaṃsthitām |
tāmeva kāmayāmāsa sā ca raṃbhaṃ jagāda tat || 16 ||
[Analyze grammar]

tadā raṃbhamahiṣayoryuddhaṃ paramadāruṇam |
abhūttadā tu tīkṣṇābhyāṃ śṛṃgābhyāṃ hṛdi tāḍitaḥ || 17 ||
[Analyze grammar]

nirbhinnahṛdayo raṃbhaḥ papāta ca mamāra ca |
mahiṣī ca tato yakṣaśaraṇaṃ saṃjagāma ha || 18 ||
[Analyze grammar]

yakṣaiśca rakṣitā sā ca nivārya mahiṣāntaram |
mṛtaṃ ca taṃ tadā raṃbhaṃ yakṣā mālavaṭādayaḥ || 19 ||
[Analyze grammar]

citāmāropayāmāsuḥ sā'pyāruroha tatra ha |
tato'gnimadhyāduttasthau puruṣo raudrabhīṣaṇaḥ || 20 ||
[Analyze grammar]

khaḍgapāṇistadā yakṣān vyadrāvayacca tatsthalāt |
mahiṣān ghātayāmāsa putraṃ pupoṣa bhāvataḥ || 21 ||
[Analyze grammar]

so'yaṃ raṃbhasya putro'bhūd raktabījaśca nāmataḥ |
mahābalo hyavadhyaśca kāmarūpadharaḥ sadā || 22 ||
[Analyze grammar]

yuvā sa yuyudhe devaistathānyairlokapālakaiḥ |
dikpālā lokapālāśca grahāstena jitā yudhi || 23 ||
[Analyze grammar]

tadā'jaṃ śaṃkaraṃ nītvā devā jagmurjanārdanam |
nyavedayan mahiṣasya raktabījasya ceṣṭitam || 24 ||
[Analyze grammar]

prabho'śvisūryacandrāṇāṃ jalavāyvagnivedhasām |
kuberendrādidevānāṃ rājyānyāskanditāni vai || 25 ||
[Analyze grammar]

nākānnirākṛtā devā vayaṃ pṛthvyāṃ vasāmahe |
yadi viṣṇuśca vā śaṃbhurno cedrakṣāṃ kariṣyase || 26 ||
[Analyze grammar]

tena saṃkālyamānāśca vrajāmo hi rasātalam |
śrutvaivaṃ bhagavāṃstatra kopaṃ suduḥsaham || 27 ||
[Analyze grammar]

tāvatprabhostadā''syādvai śaṃbhośca brahmaṇastathā |
indrādīnāṃ ca devānāṃ mahattejo viniḥsṛtam || 28 ||
[Analyze grammar]

yā madhukaiṭabhau devī mārayitvendriyeṣu vai |
sarveṣāṃ balarūpā''sīt tejastadeva niḥsṛtam || 29 ||
[Analyze grammar]

tatsarvaṃ tu śailatulyaṃ saṃhataṃ duḥsahaṃ param |
kātyāyanamaharṣeścā''śrame tattejasā'nvitam || 30 ||
[Analyze grammar]

tasmājjātā viśālākṣī kātyāyanī maheśvarī |
śaṃbhutejo'bhavadvaktraṃ vahnitejastrinetrakam || 31 ||
[Analyze grammar]

yāmyatejo'bhavankeśā harestejo'bhavan bhujāḥ |
aṣṭādaśaprasaṃkhyātā bāhavaḥ saṃprajajñire || 32 ||
[Analyze grammar]

saumye yugmaṃ stanayorvakṣaścaindreṇa tejasā |
ūrū jaṃghe nitambau ca madhyaṃ candrasya tejasā || 33 ||
[Analyze grammar]

brahmatejo'bhavatpādyugalaṃ komalā'ruṇam |
sūryasya tejasā'ṅgulyo dantāḥ prajeśatejasā || 34 ||
[Analyze grammar]

yakṣatejo'bhavannāsā śravaṇau vāyutejasā |
sādhyatejo'bhavad bhrūśca kāmabāṇāsanā nu kim || 35 ||
[Analyze grammar]

evaṃ tejāṃsi devānāṃ tatra saṃbhūya sundarī |
nāmnā kātyāyanī jātā mahiṣakṣayahetave || 36 ||
[Analyze grammar]

dadau triśūlaṃ śaṃbhuśca hariścakraṃ dadau tadā |
śaṃkhaṃ dadau jaleśaśca dadau śaktiṃ hutāśanaḥ || 37 ||
[Analyze grammar]

vāyuścāpaṃ ca tūrṇaṃ cā'kṣayyabāṇān gabhastimān |
vajraṃ ghaṇṭāṃ dadau cendro yamo daṇḍaṃ dadau tathā || 38 ||
[Analyze grammar]

gadāṃ kuberaḥ pradadau brahmā'dāttu kamaṇḍalum |
akṣamālāṃ dadau tasyai kālo'siṃ carma saṃdadau || 39 ||
[Analyze grammar]

somo hāraṃ cāmare ca mālāmabdhiḥ samujjvalām |
himālayo mṛgendraṃ ca vāhanaṃ pradadau śriyai || 40 ||
[Analyze grammar]

viśvakarmā kuṭhāraṃ cā'rdhacandraṃ kuṇḍale tathā |
cūḍāmaṇiṃ dadau citraratho'dāt pānapātrakam || 41 ||
[Analyze grammar]

śeṣo bhujaṃgahāraṃ cartavo'mlānasumasrajam |
dadurdevāścāyudhāni śṛṃgārāṇi ca sarvaśaḥ || 42 ||
[Analyze grammar]

devī tadā'tituṣṭā'bhūdaṭṭahāsaṃ cakāra vai |
sarvadevairāśiṣā vardhitā'gāt vindhyaparvatam || 43 ||
[Analyze grammar]

uccaśṛṃgekṛtā''vāsā tiṣṭhate hṛdayaṃgamā |
mahiṣāsuradūtau tāṃ caṇḍamuṇḍāvapaśyatām || 44 ||
[Analyze grammar]

ūcaturmahiṣaṃ gatvā kanyāṃ sarvāṃgasundarīm |
svastho bhavān kathaṃ śete kanyāṃ bhajatu cāgatām || 45 ||
[Analyze grammar]

kīdṛśī mukhacandrābhā keśā jīmūtasannibhāḥ |
tryagnayastrīṇi netrāṇi kaṃbuḥ kaṇṭhasthito'sti kim || 46 ||
[Analyze grammar]

suvṛttau ca stanau nimnacūcukau kuṃbhasadṛśau |
aṣṭādaśabhujāstasyāḥ pīnāḥ śastrānvitāḥ śubhāḥ || 47 ||
[Analyze grammar]

udaraṃ trivalīvyāptaṃ madhyaṃ romavinākṛtam |
saundaryabhājane jaṃghe sakthinī svarṇaśobhane || 48 ||
[Analyze grammar]

karapādatale ramye sthalapadmanibhe śubhe |
netre kamalapatrābhe sarvā saundaryabhājanā || 49 ||
[Analyze grammar]

patnītvena gṛhāṇa tvaṃ kanyāṃ tāṃ surasundarīm |
tāṃ vinā śobhate naiva tavā'yaṃ divyavigrahaḥ || 50 ||
[Analyze grammar]

tāṃ vinā te mṛṣā rājyamindrarājyamapi prabho |
gatvā vindhyācale paśya kuruṣvābhimataṃ kṣamam || 51 ||
[Analyze grammar]

śubhāśubhe kṛte puṃsāṃ paścāt vrajata eva hi |
madarthe mama bhāgyāttatkanyāratnamupasthitam || 52 ||
[Analyze grammar]

vicāryetthaṃ ca muṇḍaṃ ca namaraṃ bāṣkalaṃ tathā |
caṇḍaṃ viśālanetraṃ ca kapilaṃ vikṣuraṃ tathā || 53 ||
[Analyze grammar]

ugrāyudhaṃ raktabījaṃ tvādideśa sa daityarāṭ |
vindhyācalaṃ pragacchantu sajjībhūtā mahāsurāḥ || 54 ||
[Analyze grammar]

tata āgamya te vindhye śibiraṃ viniveśya ca |
tadā tasthurmayaputro dundubhiḥ prāha ceśvarīm || 55 ||
[Analyze grammar]

kumāri raṃbhaputrasyā dūto'smi mahiṣasya vai |
śṛṇu matsvāmināthasya yatheṣṭaṃ ca tataḥ kuru || 56 ||
[Analyze grammar]

dundubhiḥ prāha kanye tvaṃ māṃ vai varaya sarvathā |
amarā mama bhṛtyāśca vartante vijitā mayā || 57 ||
[Analyze grammar]

ābrahmabhuvanā lokā lokapālā vaśīkṛtāḥ |
ahamindro'smi rudro'smi sūryo'smi rajanīkaraḥ || 58 ||
[Analyze grammar]

lokeśo'smi mahārājo māṃ bhajasva jagatpatim |
strīratnamāgryaṃ bhavatī madarhaṃ hi bhajasva mām || 59 ||
[Analyze grammar]

devī prāha tadā śrutvā dūtasya vacanaṃ prati |
kule me vartate dharmaḥ śulkākhya iti niścitaḥ || 60 ||
[Analyze grammar]

taṃ ceddadyānmahiṣo me bhajāmyadya patiṃ tu tam |
dundubhiḥ prāha śulkaṃ tat kīdṛśaṃ tvaṃ nivedaya || 61 ||
[Analyze grammar]

tvadarthe mastakaṃ dadyānmama svāmī tataḥ kimu |
devyāha ca tadā śulkaṃ kanyāṃ yo jeṣyati mṛdhe || 62 ||
[Analyze grammar]

tasyāḥ patiḥ sa eva syāditi tasmai nivedaya |
śrutvā dundubhirāgatya kathayāmāsa tadyathā || 63 ||
[Analyze grammar]

mahiṣo'pi mahātejāḥ sarvadaityapuraḥsaraḥ |
śrutvā'bhyāgācca vindhyādrimāvṛtya samupasthitaḥ || 64 ||
[Analyze grammar]

tatra senāpatirdaityo cikṣuro nāma nāmataḥ |
senāgragāmī namaraścaturaṃgabalānvitaḥ || 65 ||
[Analyze grammar]

anye daityā dānavāśca svasvasainyasamanvitāḥ |
ājagmustatra yuddhārthaṃ mahiṣāsurayojitāḥ || 66 ||
[Analyze grammar]

atha devyā sahāyārthaṃ sūryacandrādayastataḥ |
brahmaviṣṇumaheśendrajaleśādyāstadā''gatāḥ || 67 ||
[Analyze grammar]

devānāmatha daityānāṃ sainyāni tu parasparam |
vindhyācale tadogrāṇi hyāsan bhayaṃkarāṇi hi || 68 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne raṃbhāsuraputramahiṣāsurotpattyāditadvināśikākātyāyanyutpattyādinirūpaṇanāmā triṣaṣṭhyadhika |
śatatamo'dhyāyaḥ || 163 ||
[Analyze grammar]