Chapter 157

śrīlakṣmīruvāca |
revatīkuṇḍaityuktaṃ kā vā sā revatī hyabhūt |
tajjijñāsāṃ praśāmyaiva tatastīrthāni me vada || 1 ||
[Analyze grammar]

śrīnārāyaṇa uvāca |
śṛṇu lakṣmi tadākhyānaṃ satyayugīyamucyate |
yathā yā revatī jātā yannāmnā kuṇḍatīrthakam || 2 ||
[Analyze grammar]

dakṣasya duhitā yā tu patnī candramaso'sti hi |
sā nakṣatrasvarūpā'sti revatī divi rājate || 3 ||
[Analyze grammar]

sūryāt saṃjñānāsikātaścotpanno raivataḥ sutaḥ |
pañcamaḥ sa manurdevi raivato nāma viśrutaḥ || 4 ||
[Analyze grammar]

yā hyadhyātmatayā śaile raivate jīvavatsthitaḥ |
raivatākhyamanoḥ putraḥ kṛtavākmanurucyate || 5 ||
[Analyze grammar]

kṛtavāco gṛhe putrajanmā'bhūttu yadā tadā |
nakṣatraṃ revatīsaṃjñaṃ janmarkṣaṃ tadabhūt nṛpaḥ || 6 ||
[Analyze grammar]

putrajanmotsavaṃ cakre jātakarmādikāḥ kriyāḥ |
dānāni vividhānyeva dadau viprebhya eva saḥ || 7 ||
[Analyze grammar]

tathānyānsamayaprāptān saṃskārān kṛtavānnṛpaḥ |
putrajanmasamaye vai nṛpasyā'bhūjjvaro mahān || 8 ||
[Analyze grammar]

svapne'pi dadṛśe svasya śakaṭyākarṣaṇakṛtim |
vāmāṃgaṃ prāsphurattasya kākaḥ krośati mastake || 9 ||
[Analyze grammar]

kośātsvarṇamayīmudrāḥ yānti devā tu vṛścikāḥ |
śivā svābhimukhaṃ rauti śvā bhaṣatyabhisammukham || 10 ||
[Analyze grammar]

mukuṭaḥ patito mūrdhnoyaṣṭikā patitā karāt |
kṛtavāk patitaḥ saudhasopānebhyo luṭhan bhuvi || 11 ||
[Analyze grammar]

ityevaṃ cā'śakunāni putre jāte'bhavannatha |
yataḥ prabhṛti jāto'sau tataḥ prabhṛtyasau nṛpaḥ || 12 ||
[Analyze grammar]

dīrgharogaparāmṛṣṭo mātā'bhūtkuṣṭharogiṇī |
jagāma cintāṃ nṛpatiḥ kimetaditi duḥkhitaḥ || 13 ||
[Analyze grammar]

mūrkhaśca mandabhāgyaśca putraḥ piturhi duḥkhada |
amārgago viśeṣeṇa duḥkhādduḥkhaprado bhavet || 14 ||
[Analyze grammar]

aputratā manuṣyāṇāṃ śreyase na kuputratā |
suhṛdāṃ nopakārāya pitṝṇāṃ nopatṛptaye || 15 ||
[Analyze grammar]

mātāpitrorvināśāya kuputro vai dine dine |
antatastu svamevā'tra nāśaṃ yāti kuputrakaḥ || 16 ||
[Analyze grammar]

varaṃ cā'lagnakaraṇaṃ ṛtvanabhigamo varaḥ |
varaṃ nāryāśca vandhyātvaṃ varo garbhasya saṃkṣayaḥ || 17 ||
[Analyze grammar]

varo mṛtaprasavo vā varā bālamṛtistathā |
varaṃ vivāsanaṃ kinnu kuputro na varo mataḥ || 18 ||
[Analyze grammar]

mṛtānāṃ tu bhavecchokaḥ svalpo yāvatsmṛtistadā |
kuputrāṇāṃ tu mūrkhāṇāṃ śokastāpaḥ pade pade || 19 ||
[Analyze grammar]

anirvṛttaṃ nirānandaṃ duḥkhaśokapariplutam |
karoti hṛdyaṃ pitroḥ śatrūṇāṃ tu sadāmudam || 20 ||
[Analyze grammar]

akāle tu jarāṃ putraḥ kuputraḥ kurute pituḥ |
narakāya na svargāya nā''tmane'pi hitāya ca || 21 ||
[Analyze grammar]

suputro hṛdayaṃ vetti mātāpitrordine dine |
dhanyāste tanayā yeṣāṃ marvalokābhisammatāḥ || 22 ||
[Analyze grammar]

paropakāriṇaḥ śāntāḥ sādhukarmaṇyanuvratāḥ |
kuputriṇaśca dhigjanma dhigrājyaṃ saṃpadaśca dhik || 23 ||
[Analyze grammar]

evamatyantaduṣṭasya putrasya caritena saḥ |
vṛddhagargamapṛcchacca kṛtavāg dagdhamānasaḥ || 24 ||
[Analyze grammar]

suvratena purā vedā adhītā vidhinā mayā |
samāpya vidyā vidhivat tato dāraparigrahaḥ || 25 ||
[Analyze grammar]

dharmaḥ samyagdhṛtaḥ sarvo nā'dharme vai manaḥ kṛtam |
putrārthaṃ janitaścāyaṃ kuputraḥ kathamīdṛśaḥ || 26 ||
[Analyze grammar]

so'yaṃ kiṃ nijadoṣeṇa māturdoṣeṇa vā mama |
asmadduḥkhāvaho jāto duḥśīlo duṣṭalubdhakaḥ || 27 ||
[Analyze grammar]

hiṃsako madyapaḥ steno duḥkhadāridryakṛtsadā |
pitroḥ sadā'vamantā ca sevādharmavivarjitaḥ || 28 ||
[Analyze grammar]

asya janmottaraṃ lakṣmīrgṛhādbahirviyāti hi |
asya prātarmukhā''loke'vaśyaṃ kalirbhavatyapi || 29 ||
[Analyze grammar]

bhojanaṃ bhraṣṭatāṃ yāti dinaṃ gacchati durdinam |
mama bhāryā ca kuṣṭhena rugṇā jātā tataḥ tadā || 30 ||
[Analyze grammar]

ahaṃ ca jvararogeṇa rugṇo jāto'smi nityadā |
anye'pi mama poṣyāste hānau vartanta eva tat || 31 ||
[Analyze grammar]

kāryaṃ yacca karomyetat saphalaṃ naiva jāyate |
sāphalye'nyā dviguṇā ca hāniḥ samupatiṣṭhati || 32 ||
[Analyze grammar]

tasmād vicārya viprarṣe bhavet kimatra kāraṇam |
tasya śāntiṃ kārayiṣye yadi saukhyaṃ labhe vada || 33 ||
[Analyze grammar]

gargaḥ provāca revatyāṃ nakṣatre'yaṃ sutastava |
jāto'sti duṣṭasamaye tena duḥkhāyate hyayam || 34 ||
[Analyze grammar]

vyatītaprāyā revatī kālo duṣṭo hi kathyate |
revatyante yasya janma tatsarvaṃ duḥkhadaṃ bhavet || 35 ||
[Analyze grammar]

na putrasya na vai māturna vā te'sti pradūṣaṇam |
paraṃ dauḥśīlyahetutvaṃ revatyante tu yajjaniḥ || 36 ||
[Analyze grammar]

revatyaśvinīmadhyaṃ yadāśleṣāmaghayostathā |
jyeṣṭhāmūlayorapyuktaṃ gaṇḍāntaṃ tad bhayāvaham || 37 ||
[Analyze grammar]

gaṇḍatraye samutpannā naranārīturaṃgamāḥ |
tiṣṭhanti na ciraṃ gehe tiṣṭhanto'pi bhayāvahāḥ || 38 ||
[Analyze grammar]

evamukto'tha gargeṇa cukrodha kṛtavāk tadā |
uvāca mama putrasya revatyante samudbhavaḥ || 39 ||
[Analyze grammar]

revatī kiṃ na jānāti māṃ vipraḥ śāpayiṣyati |
prajvalyamānā gaganāt tasmātpatatu revatī || 40 ||
[Analyze grammar]

tenaivaṃ vyāhṛte vākye vismayā''viṣṭacetasaḥ |
paśyataḥ sarvalokasya revatyantaṃ papāta ha || 41 ||
[Analyze grammar]

īśvarecchāprabhāveṇa kumudādrau samantataḥ |
revatyanto nipatitaḥ khaṇḍaḥ parama ujjvalaḥ || 42 ||
[Analyze grammar]

sa vai khaṇḍa ūrjjayantanāmā śailaḥ prakathyate |
kumude mūrdhni patitaḥ śāntaśca kumude tathā || 43 ||
[Analyze grammar]

bhāsayāmāsa sahasā vanakandaranirjharam |
kumudena samaṃ maitrīṃ kṛtavānūrjayan giriḥ || 44 ||
[Analyze grammar]

ūrjjayan revatīkhaṇḍaḥ kumude hyavasat sadā |
tasmādapi kumudo vai raivatako'bhidhīyate || 45 ||
[Analyze grammar]

ābhūtasaṃplavam yāvat saṃsthitau tau parasparam |
kumudādriśca tatkhaṇḍāt khyāto raivatako'bhavat || 46 ||
[Analyze grammar]

ūrjjayanto vahnivarṇaḥ kumudaścandravarṇakaḥ |
dvayośca miśraṇe gairikāvarṇo raivatācalaḥ || 47 ||
[Analyze grammar]

athāpi revatīkhaṇḍaḥ kumudā''bhyantare'sti vai |
jvālāmukhī kadācitsa bhaviṣyatyeva raivataḥ || 48 ||
[Analyze grammar]

mandaro hyaruṇaścāpi revatīkhaṇḍayogataḥ |
jvālāmukhau kadācidvai layagrāhe bhaviṣyataḥ || 49 ||
[Analyze grammar]

ūrjjayantaśca kumudo mandaraścā'ruṇācalaḥ |
kṛtasmaraśca pañcaite militvā raivatācalaḥ || 50 ||
[Analyze grammar]

vartate sumahān divyaḥ svarṇābho raivatācalaḥ |
sa paścājjanayāmāsa kanyāṃ raivatako giriḥ || 51 ||
[Analyze grammar]

revatīkāntisadṛśīṃ revatīsadṛśānanām |
khaṭvāṃgākhyasuvarṇāṃgadasvasā revatī śubhāḥ || 52 ||
[Analyze grammar]

nāmnā tu kathitā tatra tapasyatā dvijarṣiṇā |
pramucākhyena pitṛvadvartamānena tadgirau || 53 ||
[Analyze grammar]

pitṛvadrevatīnāmā'karot pramucasanmuniḥ |
raivato'pi revatīti nāmnā'juhāva tāṃ sutām || 54 ||
[Analyze grammar]

sā ca tatra kṛtasthānā vartate girikandare |
tejomayaṃ ca tatsthānaṃ sarvatīrthajalāśrayam || 55 ||
[Analyze grammar]

gaṃgājalapravāhaśca yāmunaṃ salilaṃ tathā |
sārasvataṃ ca salilaṃ tatra garteṣu tat trayam || 56 ||
[Analyze grammar]

gartaḥ sa kandarāgrastho revatīkuṇḍa ucyate |
tatra vai kandare bālā vardhitā pramucarṣiṇā || 57 ||
[Analyze grammar]

yauvanaṃ tu tayā prāptaṃ tatra raivatake girau |
tāṃ ca yauvanasampannāṃ dṛṣṭvā saḥ pramuco muniḥ || 58 ||
[Analyze grammar]

ekānte cintayāmāsa ko'syā bhartā bhaviṣyati |
hutvā hutvā sa papraccha guruṃ vahniṃ dvijottamaḥ || 59 ||
[Analyze grammar]

prasādaṃ kuru me brūhi ko'syā bhartā bhaviṣyati |
asyā asti sadṛśo vā varo nāsti ca ko'pi vā || 60 ||
[Analyze grammar]

tadā'gnikuṇḍādutthāya mūrtimān hutabhuk svayam |
prāha śṛṇu ca me vākyaṃ ko'syā bhartā bhaviṣyati || 61 ||
[Analyze grammar]

priyavratānvayotpanno mahābalaparākramaḥ |
putro vikramaśīlasya kālindījaṭharodbhavaḥ || 62 ||
[Analyze grammar]

durdamo nāma bhavitā bhartā hyasyā mahīpatiḥ |
atrāntare samāyāto durdamaḥ sa mahīpatiḥ || 63 ||
[Analyze grammar]

mṛgayāvyājatastatra kandarāṃ tāmapaśyata |
dṛṣṭvā sa durdamaḥ kanyāmuvāca vidhiyogataḥ || 64 ||
[Analyze grammar]

priye pitā'sti te kutra darśanaṃ me bhavenna vā |
tatrā'gniśālāsaṃsthaḥ saḥ śuśrāva tadvaco muniḥ || 65 ||
[Analyze grammar]

priyeityāmantraṇasya kartā ko'yaṃ vicārya ca |
ājagāma bahiryāvad rājānaṃ sa dadarśa ha || 66 ||
[Analyze grammar]

jaharṣa durdamaṃ bhāvijāmātāraṃ vilokya saḥ |
śiṣyaṃ ca gautamaṃ prāhā'smai dehyarghyādikaṃ śubham || 67 ||
[Analyze grammar]

jāmātā'yaṃ daivayogāt syācca jāyā sutā mama |
tamāsanagataṃ vipro gṛhītārghyaṃ mahāmuniḥ || 68 ||
[Analyze grammar]

pramucaḥ prāha rājendra kuśalaṃ te pure kimu |
kośe bale ca mitre ca bhṛtyā'mātyeṣu śaṃ kimu || 69 ||
[Analyze grammar]

svāgataṃ te karomyatra daivayogātpravāsinaḥ |
ātmani kuśalaṃ cāsti yatra sarvaṃ pratiṣṭhitam || 70 ||
[Analyze grammar]

bhāryāste kuśalā rājan brūhi sarvaṃ yathāsthitam |
durdamaḥ prāha pramuca tvatprasādātsadā mama || 71 ||
[Analyze grammar]

rājyaṃ dārāśca kuśalāstvāṃ vilokya viśeṣataḥ |
subhadrā śāntapāpā ca kāverītanayā tathā || 72 ||
[Analyze grammar]

surāmā jānujātā ca kadambā ca varaprajā |
vipāṭhā nandinī cānyā bhāryā me kuśalāḥ sadā || 73 ||
[Analyze grammar]

pramucaḥ prāha durdama priye ityuktavān bhavān |
sā me śiṣyā revatī vai priyetyuktā priyā tava || 74 ||
[Analyze grammar]

tadanyathā na bhavitā yadṛcchāvacanaṃ tava |
gṛhāṇemāṃ śubhāṃ kanyāṃ patnītvena mamājñayā || 75 ||
[Analyze grammar]

ityādivacanaiḥ rājā bhāryāyai pratipāditaḥ |
viprastathodyataḥ kartuṃ vivāhaṃ vidhipūrvakam || 76 ||
[Analyze grammar]

tāvattu revatī prāha kiñcinme śrūyatām ṛṣe |
raivatyarkṣe vivāhaṃ me durdamena karotu vai || 77 ||
[Analyze grammar]

raivatarkṣaṃ vinā lagnaṃ viphalaṃ me bhaviṣyati |
ṛṣiḥ prāha tadā śiṣyāṃ nāstīndū revatīyutaḥ || 78 ||
[Analyze grammar]

anyarkṣaṃ vartate cā''dya tat karomi yathā vada |
kanyā prāha tapoyogāt kurvinduṃ revatīyutam || 79 ||
[Analyze grammar]

evaṃ bhavatu bhadrante pramucaḥ prāha tāṃ sutām |
āropayāmīndumārge revatyarkṣaṃ kṛte yuvām || 80 ||
[Analyze grammar]

tatastapaḥprabhāveṇa raivatyarkṣaṃ mahāmuniḥ |
candrasaṃyojitaṃ cakre vivāhaṃ kṛtavāṃstataḥ || 81 ||
[Analyze grammar]

jāmātāramuvācarṣirudvāhikaṃ dadāmi kim |
duṣprāpamapi dāsyāmi vidyate me mahattapaḥ || 82 ||
[Analyze grammar]

rājā prāha tadā vipraṃ śṛṇu vai durghaṭaṃ vacaḥ |
sūryasya saṃjñā yā patnī vaḍavā''sītsvarūpataḥ || 83 ||
[Analyze grammar]

tadā tasyā aśvarūpasūryayoge nasastadā |
raivato yaḥ samutpanno'dhyātmā'tra kumudācale || 84 ||
[Analyze grammar]

adṛśyo vartate tatra raivatarkṣaṃ samāgatam |
seyaṃ tu revatī kanyā jātā me gṛhiṇī tu sā || 85 ||
[Analyze grammar]

tasyāṃ sa raivataḥ putro madyogādbhavatātpunaḥ |
manoḥ svāyaṃbhuvasyā'hamutpannaḥ santatau mune || 86 ||
[Analyze grammar]

manvantarādhipaṃ putraṃ tvatprasādād vṛṇomyaham |
sa eva janma labdhā vai tato manvantaro bhavet || 87 ||
[Analyze grammar]

pañcamaḥ sa eva manurbhūyāditi vṛṇomyaham |
tathā'stviti ṛṣiḥ prāha bhaviṣyati tathā manuḥ || 88 ||
[Analyze grammar]

revatī revatīkuṇḍe snātvā putraṃ pradāsyati |
manoraṃśaḥ sa vai putro manureva bhaviṣyati || 89 ||
[Analyze grammar]

revatāṃśasamutpanno raivatākhyo bhaviṣyati |
parvatākhyaśca manvākhyo dvedhā sthāsyati sarvadā || 90 ||
[Analyze grammar]

itiprāptavaro rājā saṃsnāto revatījale |
revatyapi tathā snātā yogātputramajījanat || 91 ||
[Analyze grammar]

raivateti kṛtaṃ nāma sa vai manurajāyata |
evaṃ yau revatīkuṇḍe snāsyatastadgṛhe sutaḥ || 92 ||
[Analyze grammar]

bhāgyavān rājyavān vijñaḥ khyātakīrtirbhavennanu |
snāsyanti pramadā yāstā duḥkhadāridryavarjitāḥ || 93 ||
[Analyze grammar]

lapsyante taijasaṃ putraṃ sarvalokanamaskṛtam |
iti te kathitaṃ tīrthaṃ revatīkuṇḍasaṃgatam || 94 ||
[Analyze grammar]

athā''rarādha tapasā revatī vāmanaṃ harim |
dāmodaraḥ prasannaḥ sa revatīṃ pratyuvāca ha || 95 ||
[Analyze grammar]

jāyatāṃ te yathāpūrvaṃ yogastu śaśinā saha |
anyad vṛṇohi tuṣṭo'haṃ varaṃ manasi te sthitam || 96 ||
[Analyze grammar]

revatī prāha me nātha kandarāyā mukhe'tra vai |
kuṇḍe yatra mayā snātaṃ svarṇarekhānadīyute || 97 ||
[Analyze grammar]

tatra snāsyanti ye teṣāṃ naśyantvaghasuparvatāḥ |
svargaṃ yāntu sukhaṃ yāntu putrāṃśca prāpnuvantu te || 98 ||
[Analyze grammar]

kiṃ cānyadvai samudrasya manthanaṃ tu yadā'bhavat |
tadā tu mathyamānādvai pārijātādayo drumā || 99 ||
[Analyze grammar]

samudbhūtāstadā tatra druma āmardako'bhavat |
āmarde sarvadevānāṃ jātā āmardakī smṛtā || 100 ||
[Analyze grammar]

hariṇātvarpitā candramase svargaṃ tu gacchatā |
candramāḥ snehabāhulyād dadau mahyaṃ tadā divi || 101 ||
[Analyze grammar]

raivatīkhaṇḍago vṛkṣo'patat tatkhaṇḍasaṃsthitaḥ |
kṛtavāco yadā śāpāt papāta kumude yadā || 102 ||
[Analyze grammar]

mayā sākaṃ sa vai vṛkṣo raivate'drau samāgataḥ |
divyaḥ sugandhapuṣpāḍhyo lakṣmīvāsamayo'sti saḥ || 103 ||
[Analyze grammar]

asmin vṛkṣe sthitā lakṣmīḥ sevyate surasattamaiḥ |
devairbrahmādibhiḥ sarvairvṛkṣo'sau vaiṣṇavo'rcitaḥ || 104 ||
[Analyze grammar]

asya vṛkṣasya yātrāṃ ye kariṣyanti harerdine |
phālgunaśukle dvādaśyāmekādaśyāṃ tathā priye || 105 ||
[Analyze grammar]

teṣāṃ putrāśca pautrāśca bhaviṣyanti guṇādhikāḥ |
ante viṣṇupure vāso jāyate nātra saṃśayaḥ || 106 ||
[Analyze grammar]

phālgunasya site pakṣe ekādaśyāmupoṣitaḥ |
snātvā hyekādaśī devī pratimāyāṃ girau vane || 107 ||
[Analyze grammar]

pūjyā puṣpaiḥ śubhaiḥ rātrau kāryaṃ jāgaraṇaṃ janaiḥ |
aṣṭādhikaiḥ śataiḥ kāryaṃ phalaistasyāḥ pradakṣiṇam || 108 ||
[Analyze grammar]

kartavyastatphalāhāro ghaṭo deyau jalānvitaḥ |
mukhe śrīphalasaṃyukto dīpaḥ kāryaśca sarpiṣā || 109 ||
[Analyze grammar]

haviṣyānnaṃ tathā deyaṃ tāmbūlaṃ ca phalādikam |
tathā jāgaraṇaṃ kāryaṃ kathāśravaṇatatparaiḥ || 110 ||
[Analyze grammar]

mucyante manujāḥ pāpaiḥ kaṭhinaiḥ kāryasaṃbhavaiḥ |
dehānte te narāḥ sarve pūjyante harimandire || 111 ||
[Analyze grammar]

athāpi revatī devī kṛtavācaṃ samāgatam |
jagāda parayā prītyā jvarakuṣṭhau vinaśyataḥ || 112 ||
[Analyze grammar]

putraste suguṇaścā'stu yāmyahaṃ vai punardivam |
aṃśena revatītīrthe sthāsyāmyākalpamatra ca || 113 ||
[Analyze grammar]

iti proktvā divaṃ yātā saṃgatā śaśinaṃ tathā |
tīrthaṃ tu sarvatā sā'bhūt revatīkuṇḍasaṃjñakam || 114 ||
[Analyze grammar]

atha vai brahmaṇaḥ putro marīcistasya kaśyapaḥ |
tasya putro vivasvāṃśca tasya śaryātirucyate || 115 ||
[Analyze grammar]

tasya tvānartasaṃjño'bhūt yena paścimavāridhau |
tapastaptvā tu golokācchrīkṛṣṇāt khaṇḍa āhṛtaḥ || 116 ||
[Analyze grammar]

so'yaṃ saurāṣṭra ityukto maṇeḥ khaṇḍo'pi cāhṛtaḥ |
sa divyaḥ prathamaścādrirānartasya suputratām || 117 ||
[Analyze grammar]

prāptavānaṃśatastasya raivatākhyā kṛtā tadā |
raivataḥ saḥ svarṇanadyāṃ yātrārthaṃ samupāgataḥ || 118 ||
[Analyze grammar]

kṛtavācā tu putrārthaṃ snāpito revatījale |
raivataḥ prāha viprarṣe tvatsamo me'stu vai sutaḥ || 119 ||
[Analyze grammar]

tathā'stu prāha viprarṣistato yātrāṃ vidhāya ca |
raivataḥ svapiturānartasya purīṃ kuśasthalīm || 120 ||
[Analyze grammar]

ānartanirmitā tatra jagāma tadgṛhe tadā |
viprarṣiḥ kṛtavāk putrarūpeṇāṃ'śena cā'bhavat || 121 ||
[Analyze grammar]

revatyā ca śrutaṃ svarge gururvai nidhanaṃ gataḥ |
ānartasya suputrasya raivatasya suputrakaḥ || 122 ||
[Analyze grammar]

saṃjāto'sti tataḥ snehād revatyapi samāgatā |
revatasya suputrasya kakudmī nāma cā'bhavat || 123 ||
[Analyze grammar]

kakudmino gṛhe kanyā revatī cāṃśato'bhavat |
rūpaguṇavayoyuktāṃ varayogyā vilokya ca || 124 ||
[Analyze grammar]

revatīsadṛśaṃ kāntaṃ yadā naivopalabdhavān |
tadā varaṃ paripraṣṭuṃ satyalokaṃ jagāma ha || 125 ||
[Analyze grammar]

revatyā saha rājāsau kakudmī vedhasaḥ sadaḥ |
jagāma yatra gāndharvagāyanaṃ nṛtyamiśritam || 126 ||
[Analyze grammar]

pravartate devakoṭisaṃjuṣṭasadasi nṛpaḥ |
kṣaṇaṃ sthito'labdhakṣaṇastadante brahmaṇe tu saḥ || 127 ||
[Analyze grammar]

namaskṛtya savinayaṃ svābhiprāyaṃ nyavedayat |
brahman pṛthvyāṃ tu rājāno santi vai bahavaḥ khalu || 128 ||
[Analyze grammar]

suvarṇāṃgadabhūpālo maruttvān rukmabarhiṣaḥ |
ikṣvākuścāpīndrasenastathā'nye cakravartinaḥ || 129 ||
[Analyze grammar]

kasmai deyā mayā kanyā brūhi yat tatkaromyaham |
tacchrutvā tu tadā brahmā prahasya tamuvāca ha || 130 ||
[Analyze grammar]

aho rājan mṛtāste tu kālena tvatsamāyuṣaḥ |
tatputravaṃśavaṃśyānāṃ nāmagotrāṇi santi na || 131 ||
[Analyze grammar]

satyaloke kṣaṇe kāle caturyugaikaviṃśatiḥ |
bhuvo yāti mahākālo naṣṭā ye te hṛdi kṛtāḥ || 132 ||
[Analyze grammar]

parāvṛtyā'rdhakṣaṇataḥ punaryāsyasi tvaṃ yadā |
tadā tu tatrā'ṣṭāviṃśo dvāparaḥ saṃbhaviṣyati || 133 ||
[Analyze grammar]

tadante vartamānāya śeṣāvatārarūpiṇe |
balabhadrāya dātavyaṃ kanyāratnamidaṃ tvayā || 134 ||
[Analyze grammar]

śīghraṃ gatvā kakudmī tattathaiva balayogine |
dāsyati svasutāratnaṃ tapase yāsyati vanam || 135 ||
[Analyze grammar]

revatī sā punastīrthaṃ kariṣyati tu raivate |
patyā saha punarnāśe golokaṃ yāsyati dhruvam || 136 ||
[Analyze grammar]

evaṃ sā revatī pūrvā hareḥ patnī prakīrtitā |
punardakṣasya duhitā sthitā nakṣatrarūpiṇī || 137 ||
[Analyze grammar]

punaśca raivatādreḥ sā putrī kandarasaṃsthitā |
punaḥ kakudminaḥ putrī balapatnī prakīrtitā || 138 ||
[Analyze grammar]

tīrtharūpā sadā tatra raivate sannivatsyati |
ekasyāpi vibhūtestu janmakarmāṇyanekaśaḥ || 139 ||
[Analyze grammar]

caritrāṇi ca divyāni samakāle bhavanti vai |
tāni sarvāṇyahaṃ vedmi kimanyacchrotumicchasi || 140 ||
[Analyze grammar]

evaṃ kalpāntare'pyeṣāṃ prāvirbhāvāstathaiva hi |
bhaviṣyantīti vijñeyaṃ tava prāviḥsvabhāvavat || 141 ||
[Analyze grammar]

itiśrīlakṣmīnārāyaṇīyasaṃhitāyāṃ prathame kṛtayugasantāne revatīnakṣatrakhaṇḍasya pṛthivīpatananimittaṃ raivatācale pañcaparvatātmake revatyā janma candre saṃyojitarevatīnakṣatre durdamena saha vivāhaḥ revatyāṃ punaḥ revatajanma revatīkuṇḍamahimā āmardakavṛkṣamahimā punarānartaputrarevataputrasya kṛtavācākhyakakudmino gṛhe revatījanma brahmasabhāgamanaṃ balabhadreṇa vivāhaścetyādinirūpaṇanāmā saptapaṃcāśadadhikaśatatamo'dhyāyaḥ || 157 ||
[Analyze grammar]