Chapter 155

śrīnārāyaṇa uvāca |
śṛṇu lakṣmi mahālakṣmīḥ paravaikuṇṭhavāsinī |
yathā nārāyaṇenaiva sahā''jagāma raivate || 1 ||
[Analyze grammar]

baliryadā hariṇā vai baddhastadā'tra raivate |
maṇḍape tu baleḥ patnī sasmāra parameśvarīm || 2 ||
[Analyze grammar]

mahālakṣmīṃ tadā stotrairbalerbandhanivṛttaye |
mahāvaikuṇṭhadhāmastho prahvībhāvena hṛdgatām || 3 ||
[Analyze grammar]

sandhyāvalī prāñjalistāṃ natvā hṛdi jagāda ca |
namo mātre mahālakṣmyai trāhi bhaktaṃ ca me patim || 4 ||
[Analyze grammar]

namaḥ prakṛtisaṃjñāyai mūlāyai te namonamaḥ |
saṃhartryai brahmamātre te kukṣisṛṣṭyai namonamaḥ || 5 ||
[Analyze grammar]

vāmanā vāpi dīrghāśca nārāyaṇāstu te mukhe |
mahākālādayaścāpi santi grāsāśca te namaḥ || 6 ||
[Analyze grammar]

saṃkarṣaṇāstathā rudrā yamāścaiva tavā''nane |
daṃṣṭraikacarvaṇāḥ sarve mahāmātre namonamaḥ || 7 ||
[Analyze grammar]

vāsudevastathā bhūmā nārāyaṇāśca pūruṣāḥ |
tvatpallatātāḍitāste mahāśaktyai namonamaḥ || 8 ||
[Analyze grammar]

tvatto lakṣmīḥ samutpannā mahāviṣṇustvadaṃkajaḥ |
brahmāṇḍāni ca te romṇi rakṣa lakṣmyai namonamaḥ || 9 ||
[Analyze grammar]

mahāgnayastu te gupte tvatsvede vāḍavā'nalāḥ |
bhagavantaśca te garbhe caṇḍalakṣmyai namo'vatu || 10 ||
[Analyze grammar]

jṛmbhe te pralayāḥ santi caṇḍe kālaḥ prakampate |
cūrṇāyante mahāṇḍāni pṛṣṭhamnīḍe namo'stu te || 11 ||
[Analyze grammar]

rakṣa rakṣa mahāmāye patiṃ me parameśvari |
caṇḍī taṇḍī mahāmuṇḍī ghamaṇḍī ḍiṇḍikādikāḥ || 12 ||
[Analyze grammar]

kālīkarālīprajvālīlihālīraktilādikāḥ |
śaktayaste raktaleśaḥ pāhi kāntaṃ drutaṃ kuru || 13 ||
[Analyze grammar]

pāhi śīghraṃ cānyathā tvāṃ galaṃ nikṛtya pūjaye |
yadyahaṃ vidhavā syāṃ cet pūrvaṃ tvaṃ vidhavā bhava || 14 ||
[Analyze grammar]

yadyahaṃ rājyaśūnyāṃ syāṃ tvaṃ vaikuṇṭhaṃ vinā bhava |
yadyavamānito rājā syātpatiste'pyamānitaḥ || 15 ||
[Analyze grammar]

madyajñe ced bhavet vighnaṃ tava yajñe tathā'stu vai |
vadatyevaṃ caṇḍavegā dravṛṇvantyapi sabhāsadaḥ || 16 ||
[Analyze grammar]

mā metyevaṃ tadā devā nivārayanti tāṃ striyam |
tāvat tatrāgatā patnī mahālakṣmīrmahāprabhoḥ || 17 ||
[Analyze grammar]

sāntvayitvā ca tāṃ rājñīṃ patitā kharvapādayoḥ |
mā maivaṃ deva cātyantaṃ mā bhaktasya hara prabho || 18 ||
[Analyze grammar]

vāmanaśca tadā prāha nainaṃ vai mārayāmyaham |
rājyabhraṣṭaṃ ca naivā'haṃ karomyenaṃ susevakam || 19 ||
[Analyze grammar]

sandhyāvalī sadevā'stu susaubhāgyavatī priye |
daityo'yaṃ daityarājyaṃ vai karotu sutale priye || 20 ||
[Analyze grammar]

vaikuṇṭhaṃ yadyahaṃ tyakṣye nivatsye tadbalergṛhe |
tvayā saha mahālakṣmi rājñī sevāṃ karotu me || 21 ||
[Analyze grammar]

devarājyaṃ tu devebhyo daityarājyaṃ tu tadbalau |
dattvā nidhāya gantavyaṃ sandhyāvalyāḥ śubhaṃ bhavet || 22 ||
[Analyze grammar]

tadā tu daityavaryaiḥ sā mahālakṣmīḥ prapūjitā |
devaiśca pūjitā mātā sarvasaubhāgyarakṣikā || 23 ||
[Analyze grammar]

vāmanena samaṃ sā'pi raivate'bhyarthitā ca taiḥ |
sadoṣitā mahālakṣmīḥ sarvasaubhāgyahetave || 24 ||
[Analyze grammar]

raivatātpaścime tatrocchrāye nitya vyavasthitā |
mahāmāyā mahālakṣmīḥ prāṇarakṣaṇakāriṇī || 25 ||
[Analyze grammar]

vanditā pūjitā puṣpakuṃkumākṣatacandanaiḥ |
sindūraśrīphalavastraśāṭītailasugandhibhiḥ || 26 ||
[Analyze grammar]

tathā saubhāgyadravyaiśca bhojanairvividhaiḥ śubhaiḥ |
ābharaṇakaṭakormiśṛṃravalātroṭikādibhiḥ || 27 ||
[Analyze grammar]

peyairnānāvidhaiścaiva kaṃcukīśāṭikādibhiḥ |
maṃgalasūtrakarṇādibhūṣaṇādibhirādarāt || 28 ||
[Analyze grammar]

prasannā sā mahālakṣmīrdīpotsavadine sadā |
asaubhāgyamamāṃgalyamanarthaṃ ceti hasti sā || 29 ||
[Analyze grammar]

dadāti kuśalaṃ rājyaṃ kāntaṃ putraṃ dhanaṃ tathā |
pūjanārthaṃ mahālakṣmyā mūrtiḥ kāryā caturbhujā || 30 ||
[Analyze grammar]

pauraṭī susvarūpā ca ramyā ṣoḍaśahāyanā |
padmāmṛtaghaṭakarā pūjāpātrakarā tathā || 31 ||
[Analyze grammar]

abhayadānahastā ca dakṣayorvāmayoḥ kramāt |
ṣoḍaśopaparicāravastubhiḥ pūjayet tu tām || 32 ||
[Analyze grammar]

naivedyaṃ phalatāmbūlaṃ dattvā nīrājayet tataḥ |
bhojanāni vividhāni dātavyāni ca dakṣiṇāḥ || 33 ||
[Analyze grammar]

dānāni ratnahīrakamaṇisvarṇamayāni ca |
vastrāṇāṃ ca dukūlānāṃ kambalānāṃ gavāṃ tathā || 34 ||
[Analyze grammar]

tasyā'kṣayaṃ bhavetpuṇyaṃ mahālakṣmīpratāpataḥ |
ante vaikuṇṭhavāsaḥ syād bhuktvā bhogānanekaśaḥ || 35 ||
[Analyze grammar]

kanyakā dvādaśavarṣapūrvā lakṣmīsvarūpikāḥ |
pūjanīyā yathālakṣmīrvastrānnadhanadāpanaiḥ || 36 ||
[Analyze grammar]

bhojanīyāstathā bhūṣālaṃkāradravyaśobhitāḥ |
vividhairmiṣṭapakvānnapāyasānnādisadrasaiḥ || 37 ||
[Analyze grammar]

bhojanīyāstathā sādhvyo viraktāḥ sāṃkhyayogagāḥ |
pūjanīyāśca dātavya vividhaṃ dānamiṣṭakṛt || 38 ||
[Analyze grammar]

sati vai vibhave tatra sāpatyasadhavāḥ striyaḥ |
vidhavāścāpi dīnāśca śaraṇyāśca nirāśritāḥ || 39 ||
[Analyze grammar]

bhojanīyāḥ pūjanīyā dāpanīyāśca dakṣiṇāḥ |
sammānanīyāḥ satataṃ yattṛptau śrīśca tṛpyati || 40 ||
[Analyze grammar]

mahālakṣmyāṃ prasannāyāṃ sarvā smṛddhirvivardhate |
nyūnaṃ kiñcidbhavennaiva yadyattvapekṣate milet || 41 ||
[Analyze grammar]

alakṣmīṃ drāvayatyeṣā gṛhāt sarvāṃ prapūjitā |
śṛṇu lakṣmi kathāṃ te'tra samudramathane tu yā || 42 ||
[Analyze grammar]

jātā tāṃ kathayāmyadya prasaṃgātsukhadāyinīm |
durvāsasā pradattāṃ tu pārijātasumālikām || 43 ||
[Analyze grammar]

indraścikṣepa kariṇo mūrdhni gajena pattale |
kaccaritāṃ tu tāṃ dṛṣṭvā śaśāpa dyupatiṃ ṛṣiḥ || 44 ||
[Analyze grammar]

mālā'vamānakartuste lakṣmīrnaṣṭā bhavatviti |
antardadhe kṣaṇāllakṣmīḥ petuḥ ratnāni vāridhau || 45 ||
[Analyze grammar]

taduddhārāya dugdhā'bdhirmathito devadānavaiḥ |
mandarādristadā pṛṣṭhe kūrmātmahariṇā dhṛtaḥ || 46 ||
[Analyze grammar]

manthanādudabhūt pramavai kālakūṭaṃ mahāviṣam |
tatsarvaṃ pītavānīśo mamanthuḥ punareva tam || 47 ||
[Analyze grammar]

tasmin pramathyamāne tu mayā devaiśca padmaje |
jyeṣṭhā devī samutpannā raktasragvāsasā''vṛtā || 48 ||
[Analyze grammar]

alakṣmīḥ sā bhaginī te jyeṣṭhā dehe'pyasundarī |
kirātīsadṛśī rūpe dhīvarīsadṛśī mukhe || 49 ||
[Analyze grammar]

kṛkalāsasamā karṇe nālikābhā tathā nasi |
mahiṣīsadṛśī netre rākṣasīva tu mastake || 50 ||
[Analyze grammar]

khagrāsasadṛśī bhāle maṣītulyā tu gaṇḍayoḥ |
śūlāgrasadṛśī dante uṣṭrīnibhā tu coṣṭhayoḥ || 51 ||
[Analyze grammar]

hastinīsadṛśī kaṇṭhe gardabhīsadṛśī svare |
varburadrunibhā hastaṃ valmīkābhā stanadvaye || 52 ||
[Analyze grammar]

kusūlatulyā'pyudare śilātulyā tu pṛṣṭhake |
tailiyantrasamā kaṭyāṃ kharjūradrunibhā pade || 53 ||
[Analyze grammar]

jalaukābhā cāṃgulīṣu kṛrmapṛṣṭhanibhā nakhe |
dardurībhā tu jihvāyāṃ svabhāve tu śunīsamā || 54 ||
[Analyze grammar]

daridrābhā prasāde ca hāsye kaṃgālasadṛśī |
carmakārīnibhā vastre caṇḍālābhā nivāsane || 55 ||
[Analyze grammar]

riktajalanikhātābhā jambhaṇe mroḍane khaniḥ |
bhāṇḍīnibhā sahavāse vivāhe kṣārabhūnibhā || 56 ||
[Analyze grammar]

saṃvāde raṇabhūsāmyā vaimanasye samṛddhibhā |
dṛṣṭvaināṃ tatrasustatra devadānavamānavāḥ || 57 ||
[Analyze grammar]

vicāraṃ cakrire keyaṃ sarvā'maṃgalabhūṣaṇā |
kālarātrirmahāmāriḥ kiṃvā pralayakṣut tviyam || 58 ||
[Analyze grammar]

haste mālāṃ śaṃkhalānāṃ gṛhītvā patimicchati |
gacchatītastatastāvatpatiṃ mṛgayituṃ yadā || 59 ||
[Analyze grammar]

dṛṣṭvā surā'surāḥ sarve dūraṃ dhāvanti necchukāḥ |
neyaṃ neto yāhi mā māmanyaṃ gacchetivādinaḥ || 60 ||
[Analyze grammar]

yadā kaiścit svīkṛtā na varamālā nirīhayā |
nirāśā prāha me vāso dīyatāṃ kvāpi yatra nu || 61 ||
[Analyze grammar]

utpannā'haṃ nirarthā'haṃ kiṃ kartavyaṃ mayeti ca |
tāmabruvaṃstadā devīṃ surā'suragaṇā drutam || 62 ||
[Analyze grammar]

yeṣāṃ gṛhāntare nityaṃ kalahaḥ saṃpravartate |
tatte sthānaṃ prayacchāmo vasa tatrā'śubhānvitā || 63 ||
[Analyze grammar]

yasya gehe'bhicārārthaṃ kapālā'sthiprapūjanam |
paruṣaṃ bhāṣaṇaṃ yatra mantratantrābhimāraṇam || 64 ||
[Analyze grammar]

anṛtaṃ sāhasaṃ dyūtaṃ pānaṃ ca mṛgayā madaḥ |
mātāpitrorasevā ca guroścaivā'vamānanam || 65 ||
[Analyze grammar]

strībālānāṃ ca niḥśvāsāḥ kleśaḥ kuṭumbibāndhave |
vyabhicāraśca yatrāsti paṃktibhedo'sti yatra ca || 66 ||
[Analyze grammar]

teṣāṃ veśmani santiṣṭha duḥkhadāridryadāyinī |
gavādisvavaśaprāṇiniḥśvāsā yatra santi vai || 67 ||
[Analyze grammar]

āśritānāṃ pālanaṃ ca yatra nītyā na jāyate |
śvaśrūśvaśurayoścaiva patipatnyośca putrayoḥ || 68 ||
[Analyze grammar]

putrapitrośca bhrātrośca mātṛputryoḥ parasparam |
svasroryatra vaimanasyaṃ tatra saṃtiṣṭha hānide || 69 ||
[Analyze grammar]

kuṭumbijanavargeṣu cauryeṇa vyayaśīlatā |
svasvasvattvapravṛttiśca gṛhe yatra kuṭumbini || 70 ||
[Analyze grammar]

svagṛhamapi pārakyaṃ svajano manute tu yat |
ālasyaṃ kāryakaraṇe cānyādhārā ca jīvikā || 71 ||
[Analyze grammar]

vṛddhānāṃ vacanaṃ yatra mānyaṃ bhavati naiva ca |
snānaṃ devasya pūjādi japo yatra na vidyate || 72 ||
[Analyze grammar]

utsavā mānuṣā daivā vārṣikā yatra santi na |
lobho'dharmavyayo yatra tatra tiṣṭha sukhī bhava || 73 ||
[Analyze grammar]

prāṇināṃ hiṃsanaṃ yatra satāṃ yatra ca nindanam |
dharmadrohaśca nāstikyaṃ vasa tatra kalipriye || 74 ||
[Analyze grammar]

yatra nā'tithisatkāro yatra śuddhirna vidyate |
mālinyaṃ vartate yatra tathā yatra nirudyamaḥ || 75 ||
[Analyze grammar]

yatra kṣaṇe kṣaṇe krodho yatra viṣayatṛṣṇikā |
yatra jaihvyaṃ tathaupasthyaṃ vyasanaṃ sīmavarjitam || 76 ||
[Analyze grammar]

dāsadāsīkarmacāripīḍanaṃ nyāyato bahiḥ |
paśupakṣigomahiṣīgajāśvādiprapīḍanam || 77 ||
[Analyze grammar]

gṛhajaneṣvaviśvāsastatra vāso vidhīyatām |
yatra śrāddhaṃ na bhavati na ca piṇḍapradānakam || 78 ||
[Analyze grammar]

svāhāsvadhāvaṣaṭkārakriyā yatra na vidyate |
bhūtayajño brahmayajño devayajño na yatra vai || 79 ||
[Analyze grammar]

dārā'patyagṛhasvāmyamātyabhṛtyeṣu cā'nṛtam |
lucābhakṣyaṃ bhavedyatra yatra drohaḥ parasya ca || 80 ||
[Analyze grammar]

rakṣyasyā'rakṣaṇaṃ yatra poṣyasyā'poṣaṇaṃ tathā |
daṇḍyasyā'daṇḍanaṃ yatra tatra vāso vidhīyatām || 81 ||
[Analyze grammar]

devadvijagavāṃ vṛttihārakāṇāṃ gṛhe sadā |
anāthakṛpaṇā'ndhānāṃ duḥkhakṛto gṛhe vasa || 82 ||
[Analyze grammar]

sādhusādhvīyatiyogiviraktadrohakṛdgṛhe |
dānadharmaniṣedhasya kartṝṇāṃ ca gṛhe vasa || 83 ||
[Analyze grammar]

dehacauryamanaścauryahṛccauryasya gṛhe vasa |
anyāyopārjayituśca kṛṭatulādharasya ca || 84 ||
[Analyze grammar]

kṛṭasākṣyakṛto gehe sadā vāso vidhīyatām |
viduṣāmavamānayiturgṛhe vasa sarvadā || 85 ||
[Analyze grammar]

caturdaśasu lokeṣu yatrā'nyāyo'vivekitā |
pūjyapūjāvyatikramastatra vāso vidhīyatām || 86 ||
[Analyze grammar]

paṇye kapaṭasammiśre vyāpāre kapaṭānvite |
ācāre kapaṭā''diṣṭe sadā vāso vidhīyatām || 87 ||
[Analyze grammar]

yatra rājā dharmapakṣī prajā sāhasabhakṣiṇī |
rāṣṭraṃ hṛdayabhakṣi syāt tatra vāsaḥ sadā tava || 88 ||
[Analyze grammar]

yatra kanyāvikrayasya jīryate hyudare dhanam |
nārīvikrayavṛttiśca tatra vāsaḥ sadā tava || 89 ||
[Analyze grammar]

śīlavrataṃ na yatrāsti hṛdayaṃ naiva nirmalam |
padakramo'pi kāpaṭyāt śāṭhye vāsaḥ sadā tava || 90 ||
[Analyze grammar]

rāgadveṣaprayukto vai divaso yasya gacchati |
adharmasya ca yatrāsti vaṃśastatra sadā vasa || 91 ||
[Analyze grammar]

kṛtaghnasya vañcakasya pāśakasyā''tatāyinaḥ |
agnidasya garadasya hanturanyāyatastathā || 92 ||
[Analyze grammar]

vidharmasthasya sadane dhruvavāso vidhīyatām |
paraguptaprakāśakagṛhe vāsaḥ duṣṭagṛhe tathā || 93 ||
[Analyze grammar]

annavastrabhuvāṃ dānā'karturgṛhe sadā vasa |
piśūnasya bhedakasya kleśakṛto gṛhe vasa || 94 ||
[Analyze grammar]

rājye rāṣṭre tathā'raṇye vāṭikāsu vaneṣu ca |
udyāne ca kṛṣikṣetre parvate ca sthale jale || 95 ||
[Analyze grammar]

vṛkṣe sasye tathā bīje ratne svarṇe rase raṇe |
saṃgrāme cotsave daive mānuṣe vā sthale jale || 96 ||
[Analyze grammar]

tīrthe bhojye vyavahāre kraye ca vikraye tathā |
vidyāyāṃ ca kalāyāṃ ca śilpe ṛtau ca varṣaṇe || 97 ||
[Analyze grammar]

yatrā'dhipaḥ śaṭho dhūrtaḥ kitavaścaura ulbaṇaḥ |
duṣṭo'nyāyī mahāpāpī tatra tatra sadā vasa || 98 ||
[Analyze grammar]

kiṃ bahunā tvaduktena yatra hiṃsā'nṛte tathā |
steyavyavāyagṛdhnāścā'śuddhistṛṣṇā vinindanam || 99 ||
[Analyze grammar]

tatra vāsaḥ sadā te'stu lakṣmyā vāso na yatra ca |
ityuktvā tāṃ daduḥ devā uddālakāya carṣaye || 100 ||
[Analyze grammar]

visarjayāmāsa patyā sahā'lakṣmīṃ tataḥ punaḥ |
te sarve manthanaṃ cakruḥ kṣīrābdheḥ susamāhitāḥ || 101 ||
[Analyze grammar]

tataśca vāruṇī devī samutpannā śubhānanā |
ananto nāgarājo'tha tāṃ jagrāha sulocanām || 102 ||
[Analyze grammar]

tataśca gāruḍī devī samutpannā sulakṣaṇā |
vainateyasya bhāryā'bhūt sarvalakṣaṇaśobhitā || 103 ||
[Analyze grammar]

tato'psarogaṇā divyā gandharvāśca mahaujasaḥ |
jajñire rūpasampannā madhugāyanatatparāḥ || 104 ||
[Analyze grammar]

airāvatastato jajñe tathaivoccaiḥ śravāhayaḥ |
dhanvantariḥ pārijātaḥ surabhiḥ sarvakāmadhuk || 105 ||
[Analyze grammar]

etān sarvān sahasrākṣo jagrāha sarvamānitaḥ |
tataḥ prabhātasamaye dvādaśyāmudite ravau || 106 ||
[Analyze grammar]

utpannā śrīrmahālakṣmīrmathyamāne mahodadhau |
tataścandrastato jātā tulasī yā haripriyā || 107 ||
[Analyze grammar]

tulasyā saha mā lakṣmīrvarayāmāsa keśavam |
tataḥ provāca bhagavān sarvāścaiva mahāmunīn || 108 ||
[Analyze grammar]

ekādaśī mahāpuṇyā sarvopadravanāśinī |
tasmāttu sarvadā puṇyā dvādaśī mama vallabhā || 109 ||
[Analyze grammar]

adyaprabhṛti ye lokā ekādaśīmupoṣya ca |
dvādaśyāmudite bhānau śraddhayā parayā yutāḥ || 110 ||
[Analyze grammar]

ye pūjayanti māṃ bhaktyā tulasyā ca śriyā saha |
sarve te bandhanirmuktāḥ prāpnuvanti padaṃ mama || 111 ||
[Analyze grammar]

nārcayanti ca ye vai māṃ dvādaśyāṃ puruṣottamam |
tānpāpānviṣayairbaddhvā mama māyā duratyayā || 112 ||
[Analyze grammar]

kṣipatyajasraṃ saṃsāre nāstikānmatparāṅmukhān |
samudrātsā yadā lakṣmīrdvādaśyāṃ samajāyata || 112 ||
[Analyze grammar]

tadāprabhṛti ṛṣayo devā brahmapurogamāḥ |
siddhā ye mānuṣāścaiva yogino munisattamāḥ || 114 ||
[Analyze grammar]

viṣṇorājñāṃ puraskṛtya bhaktyā paramayā yutāḥ |
ekādaśyāmupoṣyātha bhaktyā caiva janārdanam || 115 ||
[Analyze grammar]

dvādaśyāmarcayāmāsurlakṣmīnārāyaṇaṃ tu mām |
dvādaśīvāsaraste'sti mamāpi vāsaro hi saḥ || 116 ||
[Analyze grammar]

harivāsara ityukto lakṣmīvāsara ityapi |
dampatyostu sadaivaikyāt kimanyachrotumicchasi || 117 ||
[Analyze grammar]

iti śrīlakṣmīnārāyaṇīyasaṃhitāyāṃ prathame kṛtayugasantāne raivatācale mahālakṣmyāgamanaṃ tasyāḥ pūjanadānādi samudramathane |
'lakṣmyā utpattistatsvarūpaṃ tannivāsasthānāni tato lakṣmītulasīprādurbhāve dvādaśīmahimetyādinirūpaṇanāmā paṃcapaṃcāśadadhikaśatatamo'dhyāyaḥ || 155 ||
[Analyze grammar]