Chapter 152

śrīnārāyaṇa uvāca |
tīrthe pālyāṃśca niyamān yamāṃśca vacmi padmaje |
niyamānāṃ yamānāṃ ca pālanaṃ phaladaṃ bhavet || 1 ||
[Analyze grammar]

kāmakrodhavijetā yo lobhamohādivarjitaḥ |
śraddhāluścā''stikaḥ śuddhaḥ sa tīrthaphalabhāgbhavet || 2 ||
[Analyze grammar]

karapādodarajihvāmanaḥśiśnāni yasya hi |
saṃyatāni bhaveyurvai sa tīrthaphalamaśnute || 3 ||
[Analyze grammar]

satyavāk suvrataḥ śāntaḥ sarveṣvātmopamadṛśiḥ |
tapovidyākṛtaśuddhiḥ satīrthaphalamaśnute || 4 ||
[Analyze grammar]

tīrthe hyupoṣaṇaṃ kāryaṃ kṣauraṃ śrāddhaṃ sapiṇḍakam |
bhojanīyāḥ sādhusādhvyo dānaṃ deyaṃ tu bhāvataḥ || 5 ||
[Analyze grammar]

nārīṇāṃ pativatnīnāṃ kṣauraṃ naiva vidhīyate |
parīkṣā bhojanīyānāṃ kartavyā naiva kenacit || 6 ||
[Analyze grammar]

tatratyadevatānāṃ ca kartavyaṃ mukhyamarcanam |
bhūṣāvāsodravyapātraphalanaivedyavastubhiḥ || 7 ||
[Analyze grammar]

aśaktastu namaḥ kuryāt tathā sammārjanādikam |
sādhucaraṇaśuśraṣāṃ sevāṃ prasannatāpradām || 8 ||
[Analyze grammar]

sādhavaḥ sevitā yena tanumānasavastubhiḥ |
mahāpūjāphalaṃ tasya sarvaṃ tīrthaphalaṃ bhavet || 9 ||
[Analyze grammar]

sādhavastoṣitā yena sarvasvārpaṇasādhanaiḥ |
sarvadānaphalaṃ tasya sādhurnārāyaṇo yataḥ || 10 ||
[Analyze grammar]

puṇyatīrtheṣu yatkāryaṃ kriyate sānusaṃgame |
sahasraguṇitaṃ cā'pyanantaphalakaraṃ bhavet || 11 ||
[Analyze grammar]

kṛtaṃ tīrthe svalpamapi tīrthabalādvivardhate |
puṇyaṃ vivardhate nityaṃ pāpaṃ tu līyate sadā || 12 ||
[Analyze grammar]

tīrtha kṛtānāṃ jīvānāṃ pāpaleśo na vidyate |
tārayati janān yasmāt tasmāt tattīrthamucyate || 13 ||
[Analyze grammar]

yadyat karoti sat tīrthe sarvaṃ tatpuṇyadaṃ bhavet |
niyamena ca tīrthe vai sthātavyaṃ tanudhāribhiḥ || 14 ||
[Analyze grammar]

manaḥśuddhiṃ tathā sevāṃ satāṃ kuryāddhi tīrthakṛt |
lubdhasya piśunasyātha krūrasya dābhikasya ca || 15 ||
[Analyze grammar]

malinasya ca caurasya nāstikasya śaṭhasya ca |
nindakasya tathā drogdhurna syāt tīrthaphalaṃ kvacit || 16 ||
[Analyze grammar]

śārīramalasaṃtyāge mano na nirmalaṃ bhavet |
doṣadṛṣṭiparityāge manastu nirmalaṃ bhavet || 17 ||
[Analyze grammar]

rāgadveṣau malarūpau tattyāge nirmalo bhavet |
nārībhiśca narairvāpi tīrthe vīkṣyā tu divyatā || 18 ||
[Analyze grammar]

divyabhāvena svasyā'ntardivyatā vardhate'nvaham |
divyāntaḥkaraṇe dhāryo bhagavān tīrthamaṇḍale || 19 ||
[Analyze grammar]

sa vai saṃtārayed bhaktaṃ nirmalaṃ puṇyabhājanam |
ahiṃsā satyamasteyaṃ brahmacaryamanāgrahaḥ || 20 ||
[Analyze grammar]

śaucaṃ tapaśca santoṣaḥ svādhyāyo bhajanaṃ hareḥ |
japaśca pūjanaṃ devadarśanaṃ śravaṇaṃ natiḥ || 21 ||
[Analyze grammar]

kartavyāni viśeṣeṇa pūrṇaṃ tīrthaphalaṃ bhavet |
krodhastīrthe na kartavyaḥ puṇyaprajvālako hi saḥ || 22 ||
[Analyze grammar]

tīrthe'nyasya na bhoktavyaṃ peyaṃ nānyasya vai kvacit |
pratigrahaśca na grāhyastapastejoharo hi saḥ || 23 ||
[Analyze grammar]

laḍḍukairmauktikaiḥ ramyaiḥ kasārairghṛtapūrakaiḥ |
saṃyāvapāyasā'pūpaiḥ śaṣkulīkhājakādibhiḥ || 24 ||
[Analyze grammar]

parpikāpiṇḍakādyaiśca vyañjanairdvidalādibhiḥ |
dadhidugdhaiśca takraiśca śrīkhaṇḍadaugdhasadrasaiḥ || 25 ||
[Analyze grammar]

ghṛtaśarkarasupakvaiścānyairbhakṣyasulehyakaiḥ |
tarpaṇīyāḥ sādhuviprasādhvyaśca dīnabālakāḥ || 26 ||
[Analyze grammar]

pitarastena tṛptāḥ syustasya puṇyamanantakam |
bhoktavyaṃ bhojanīyāśca tīrthasya phalamicchatā || 27 ||
[Analyze grammar]

vandhyaṃ tīrthaṃ na vai kuryāt yadi saukhyaṃ samīhate |
jaḍatīrthāt cetanaṃ tu tīrthaṃ tīrthottamaṃ matam || 28 ||
[Analyze grammar]

santaḥ sādhvyo yoginaśca yatayo brahmacāriṇaḥ |
te sarve cetanaṃ tīrthaṃ tallābhe sukṛtaṃ mahat || 29 ||
[Analyze grammar]

cāturmāsye viśeṣeṇa tīrthasevā vidhīyate |
taponiyamasatkāle phalaṃ tvanantakaṃ bhavet || 30 ||
[Analyze grammar]

alpāyāsān bahuphalān putralakṣmīpradāyakān |
cāturmāsyavrataśreṣṭhān kurvataḥ phalamakṣayam || 31 ||
[Analyze grammar]

gāṃ spṛṣṭvā brāhmaṇaṃ natvā sampūjya sādhudaivatān |
tapasvinaṃ yatiṃ śāntaṃ śrotriyaṃ brahmacāriṇam || 32 ||
[Analyze grammar]

mātāpitarau bhaginīṃ tatpatiṃ duhituḥ patim |
bhāgineyaṃ ca dauhitraṃ mitrasambandhibāndhavān || 33 ||
[Analyze grammar]

sādhvīḥ satīśca kanyāśca dīnāndhakṛpaṇān janān |
bālān vṛddhānāturāṃśca gāścā'tithīnanāthakān || 34 ||
[Analyze grammar]

bhikṣukān kṣudhitān śrāntān pathikān tīrthavāsinaḥ |
bhojayitvā pātakaiḥ saṃmucyante gṛhamedhinaḥ || 35 ||
[Analyze grammar]

rājā gajāśvanakulasatīvṛṣamahīdharāḥ |
ādarśakṣīravṛkṣānnapradāḥ sādhujanāstathā || 36 ||
[Analyze grammar]

jalasthalātmatīrthāni devamandiramūrtayaḥ |
dṛṣṭamātrāḥ punantyete cāturmāsyavratasthitāḥ || 37 ||
[Analyze grammar]

vedadharmakathāṃ śrutvā dṛṣṭvā muktiparānnarān |
smṛtvā lakṣmīṃ hariṃ śaṃbhuṃ śivāṃ gaṃgāṃ ca svarṇadīm || 38 ||
[Analyze grammar]

kṛtvā jāgaraṇaṃ viṣṇordatvā dānaṃ ca śaktitaḥ |
tāmbūlaṃ kusumaṃ dīpaṃ naivedyaṃ tulasīdalam || 39 ||
[Analyze grammar]

gītaṃ nṛtyaṃ ca vādyaṃ ca vidhāya suramandire |
mahodayamavāpnoti phalaṃ svargyaṃ ca mokṣadam || 40 ||
[Analyze grammar]

indriyāṇāṃ ca manasa aikāgryaṃ tapa uttamam |
tadaikāgryaṃ vāsudeve kāryaṃ dhyānādinā janaiḥ || 41 ||
[Analyze grammar]

ṛṣayo munayaścāturmāsye jaihvaṃ rasaṃ drutam |
jitvā tapaḥ prakurvanti tīrthayātrāphalāptaye || 42 ||
[Analyze grammar]

phalāhāraḥ payaḥpānaṃ caikabhuktamathāpi vā |
śākatyāgo'thavā śākamātrāhārastilādanam || 43 ||
[Analyze grammar]

dadhiprāśo ghṛtatyāgaścaikānnabhojanaṃ tathā |
māṣamudgādimātrasya bhojanaṃ vratameva vā || 44 ||
[Analyze grammar]

bhūśayanaṃ jalasnānaṃ tailābhyaṃgādivarjanam |
bhajanaṃ pūjanaṃ mālājapaḥ śrīharikīrtanam || 45 ||
[Analyze grammar]

kathāyāḥ śravaṇaṃ nityamiṣṭadevasya darśanam |
sādhūnāṃ sevanaṃ tīrthe vrataṃ puṇyapradaṃ bahu || 46 ||
[Analyze grammar]

brāhmaṇaḥ sādhavaścārcyā bhojanīyāśca sadrasaiḥ |
ṣoḍaśopacāravaryairnityaṃ kṛṣṇārhaṇaṃ vratam || 47 ||
[Analyze grammar]

sādhūnāṃ pūjanaṃ nityaṃ yadvā homo vrataṃ param |
ghṛtaikṣavalavaṇādervarjanaṃ ca vrata matam || 48 ||
[Analyze grammar]

nityaṃ bhagavate'rpyaiva peyaṃ khādyaṃ ca tadvratam |
kṛtena karmaṇā yena sādhavo bhagavāṃstathā || 49 ||
[Analyze grammar]

prīyeran tadvrataṃ śreṣṭhaṃ kartavyaṃ mokṣadaṃ yataḥ |
mātāpitrorguroḥ sevā vratānāṃ vratamuttamam || 50 ||
[Analyze grammar]

patyuḥ sevā vrataṃ patnyāḥ patnītoṣaṃ pativratam |
śiṣyavrataṃ guroḥ sevā śiṣyatoṣo gurorvratam || 51 ||
[Analyze grammar]

raivate kārtikavrataṃ kartavyaṃ tu viśeṣataḥ |
vaṭatāle hariharakṣetre ca kapilāśrame || 52 ||
[Analyze grammar]

vrataṃ māsopavāsākhyamathavā cāndrakālikam |
cāndrāyaṇaṃ vrataṃ kārya pūrṇimātastapaḥ śubham || 53 ||
[Analyze grammar]

āśvīnapūrṇimāyāṃ vai kavalā daśa pañca ca |
kārtikakṛṣṇapratipaddine grāsāścaturdaśa || 54 ||
[Analyze grammar]

ekaikasya tithikramāddhrāso vai kavalasya ca |
amāyāmupavāsaḥ syātpratipadyeka eva ca || 55 ||
[Analyze grammar]

grāsadvayaṃ dvitīyāyāmevamāpūrṇimāvadhi |
grāsavṛddhiryathātithivṛddhi kāryaṃ ca tadvratam || 56 ||
[Analyze grammar]

grāsaścaikena yatnena galādho yāti tādṛśaḥ |
na nyūno nā'dhiko vā'pi vratārthe sammataḥ sadā || 57 ||
[Analyze grammar]

yadvā'nyat tīrthakartṝṇāṃ tapovratamudīryate |
udayāstāvadhi divā jalakṛcchraṃ jale sthitiḥ || 58 ||
[Analyze grammar]

daśamyāṃ gomūtraśakṛdghṛtadugdhadadhigrahaḥ |
ekādaśyāmupavāso harikṛcchravrataṃ hi tat || 59 ||
[Analyze grammar]

saptamītaḥ kramādgrāhyaṃ jalaṃ kṣīraṃ dadhighṛtam |
ekādaśyāmupavāsaḥ kṛcchraḥ paitāmahastu saḥ || 60 ||
[Analyze grammar]

ṣaṣṭhītastridinaṃ dugdhapānaṃ tryahamupoṣaṇam |
māhendrakṛcchra ityuktastīrthe kāryo viśeṣataḥ || 61 ||
[Analyze grammar]

tṛtīyātastryahaṃ bhojyaṃ nivārādi tatastryaham |
yavādikaṃ tryahamupoṣaṇaṃ kṛcchraḥ sa vaiṣṇavaḥ || 62 ||
[Analyze grammar]

pañcadinaṃ payaḥpānaṃ pañcāhaṃ dadhibhojanam |
ekādaśyāmupavāso bhāskarakṛcchra ucyate || 63 ||
[Analyze grammar]

pañcamītaḥ kramāt bhājīṃ yavān śākaṃ dadhi kṣīram |
ghṛtaṃ jalamekādaśyām ṛṣikṛcchraḥ sa ucyate || 64 ||
[Analyze grammar]

palāśabilvadarbhābjodumbaraparṇasuśṛtam |
payaḥ peyaṃ pratipadaḥ ṣaṣṭhyā kuryādupoṣaṇam || 65 ||
[Analyze grammar]

tadidaṃ vratamāgneyakṛcchrākhyaṃ samudīritam |
saptamītaḥ payobilvāṃbujamṛṇālabhakṣaṇam || 66 ||
[Analyze grammar]

ekādaśyāmupavāso lakṣmīkṛcchra udīritaḥ |
ekādaśadineṣveva parṇādaḥ parṇakṛcchrakṛt || 67 ||
[Analyze grammar]

tryahaṃ prātastryahaṃ sāyaṃ tryahaṃ bhojyamayācitam |
tryahaṃ copavaset kṛcchraḥ prājāpatya udīritaḥ || 68 ||
[Analyze grammar]

dvādaśāhopavāsaistu pārākakṛcchra ucyate |
phalamātragrahaṇena phalakṛcchraḥ prakīrtyate || 69 ||
[Analyze grammar]

jalamātragrahaṇena jalakṛcchraḥ sa ucyate |
dalamātragrahaṇena dalakṛcchrastathocyate || 70 ||
[Analyze grammar]

puṣpamātragrahaṇena puṣpakṛcchraḥ prakīrtyate |
bījamātragrahaṇena bījakṛcchraḥ sa bhaṇyate || 71 ||
[Analyze grammar]

tilamātragrahaṇena caṇakagrahaṇena ca |
bharjitataṇḍulagrāhe tattatkṛcchraḥ sa ucyate || 72 ||
[Analyze grammar]

pakvakṛcchraścāmakṛcchraḥ saktukṛcchraudanavrate |
kārtike śuklapakṣe te kṛcchrāḥ kāryā vidhānataḥ || 73 ||
[Analyze grammar]

tattadbhagavato bhaktyā sahitā eva sarvathā |
bhuktimuktiphaladāste'nyathā tu svargadā matāḥ || 74 ||
[Analyze grammar]

kṛcchramadhye bhavenmūrchā gokṣīraṃ pāyayettadā |
jalaṃ mūlaṃ phalaṃ dugdhaṃ patraṃ puṣpaṃ ghṛtaṃ dadhi || 75 ||
[Analyze grammar]

takraṃ tailaṃ śarkarādi munyannaṃ śākamabdhijam |
karpūraṃ tvaṅlavaṃgailātiktamarīcamauṣadham || 76 ||
[Analyze grammar]

mukhaśuddhikaradravyamārdrakaṃ kvāthamityapi |
caturviśatitattvānyavrataghnāni bhavanti hi || 77 ||
[Analyze grammar]

athavā'yācitaṃ bhaikṣyamapakvāśanameva vā |
śākatyāgaḥ phalatyāgo rasatyāgo'nnasutyajiḥ || 78 ||
[Analyze grammar]

kṣāratyāgo daugdhavastutyāga aikṣavasutyajiḥ |
vratānyetāni sūktāni bhuktimuktikarāṇi vai || 79 ||
[Analyze grammar]

tīrthe kāryāṇi caitāni varṣāsu kārtike'thavā |
annadānaṃ jaladānaṃ vastradānaṃ sahāyakṛt || 80 ||
[Analyze grammar]

yānadānaṃ bhuvo dānaṃ kanyādānaṃ gavārpaṇam |
svarṇadānaṃ tiladānaṃ dīpadānaṃ gṛhārpaṇam || 81 ||
[Analyze grammar]

evaṃ svāpekṣitaṃ sarvaṃ dātavyaṃ punaricchatā |
ramādāmodarasyāpi pūjanaṃ vratamucyate || 82 ||
[Analyze grammar]

ketakījātyagastīnāṃ kusumairambujairapi |
kamalaistulasīpatrairlakṣeṇa pūjayeddharim || 83 ||
[Analyze grammar]

patre patre ca kusume'śvamedhaphalamāpnuyāt |
dhātrīphalarasāktāṃgo dhātrīphalasubhojanaḥ || 84 ||
[Analyze grammar]

dhātrīphalabhūṣitāṃgo dhātrīchāyāsamāśritaḥ |
dāmodaraṃ samabhyarcya vrajennārāyaṇaṃ padam || 85 ||
[Analyze grammar]

deyaṃ ākāśadīpaśca devālaye niśāmukhe |
pakvānnāni pradeyāni devāya dhanibhiḥ sadā || 86 ||
[Analyze grammar]

gṛhṇīyāt kārtike dīkṣāṃ mahābhāgavatīṃ janaḥ |
hareḥ padārpitāṃ mālāṃ tulasījāṃ gale dharet || 87 ||
[Analyze grammar]

sā vyaktirmucyate nūnaṃ janmasaṃsārabandhanāt |
ekenāpi vratenorje cāturmāsyaphalaṃ labhet || 88 ||
[Analyze grammar]

iti śrīlakṣmīnārāyaṇīyasahitāyāṃ prathame kṛtayugasantāne pālanīyayamaniyamadānakṛcchravratādinirūpaṇanāmā dvipaṃcāśadadhikaśatatamo'dhyāyaḥ || 152 ||
[Analyze grammar]