Chapter 151

śrīnārāyaṇa uvāca |
tataḥ sārasvataḥ prāha rājānaṃ bhojapuṃgavam |
miṣṭānnaṃ bhojanaṃ ramyaṃ pānamuccāvacaṃ śubham || 1 ||
[Analyze grammar]

pūjārhāṇi ca pātrāṇi puṣpāṇyupaskarāṇi ca |
vastrāṇi dānayogyāni sugandhicandanāni ca || 2 ||
[Analyze grammar]

kamalāni vicitrāṇi svarṇarūpyādyalaṃkṛtīn |
skandhe nidhāya padbhyāṃ ca yātrāṃ karoti yo janaḥ || 3 ||
[Analyze grammar]

arpayitvā ca haryagre'kṣayapuṇyamavāpnuyāt |
gaṃgodakaṃ madhu ghṛtaṃ kuṃkumā'gurucandanam || 4 ||
[Analyze grammar]

guggulaṃ bilvapatrāṇi dhattūrakusumaṃ tathā |
pādacārī bhajan devaṃ skandhe svayaṃ nidhāya ca || 5 ||
[Analyze grammar]

bhavanāthaṃ tu yo gacched dṛṣṭvā nivedayettathā |
svarṇanadyāṃ tathā snātvā dāmodaraṃ samarcayet || 6 ||
[Analyze grammar]

sarvabandhavinirmuktaḥ sa vai kailāsamāpnuyāt |
gaṇo mukto bhavatyeva yāvadābhūtasamplavam || 7 ||
[Analyze grammar]

kalatramitraputrairvā bhrātṛbhiḥ sujanairjanaiḥ |
suhṛtsambandhibhiścānyairyāti devaṃ smaraṃstu yaḥ || 8 ||
[Analyze grammar]

sa tanmaṇḍalasahitaḥ svargaṃ yātyādivākaram |
devamūrtiṃ śubhāṃ kṛtvā rathasthāṃ supratiṣṭhitām || 9 ||
[Analyze grammar]

candanāgurukarpūrairarcitāṃ kuṃkumena ca |
pūjayan vividhaiḥ puṣpairdhūpadīpādikaistathā || 10 ||
[Analyze grammar]

gītanṛtyaiḥ savāditrairhāsyairlāsyairanekadhā |
dharitrīṃ kāṃcanaṃ gāṃ ca jalānnavasanāni ca || 11 ||
[Analyze grammar]

tṛṇendhane priyāṃ vāṇīṃ yacchan yāti tu raivate |
dāmodare tathā bhaveśvare gatvā'rcayatyatha || 12 ||
[Analyze grammar]

svarṇavatyāṃ taḍāge vā kuṇḍe ca raivatīkṛte |
snāti japati govindaṃ dadātyannāni bhūriśaḥ || 13 ||
[Analyze grammar]

tatra yacchati dānāni sarvasvāni ca yo janaḥ |
devāṃganākaragrāhe gṛhīto nandane vane || 14 ||
[Analyze grammar]

gatvā bhuṃkte śubhān bhogān yāvadācandratārakam |
tīrthe vipravacaḥ kṛtvā snātvā sandhyā'rcanādike || 15 ||
[Analyze grammar]

darbhāṃstilān haviṣyānnaṃ prayu्ñjyācchraddhayā tataḥ |
agastaṃ bhṛṃgarājaṃ ca puṣpaṃ śatadalaṃ śubham || 16 ||
[Analyze grammar]

karpūrāguruśrīkhaṇḍaṃ kuṃkumaṃ tulasīdalam |
tīrthe saṃkalpitaṃ martyaistadanantaṃ prajāyate || 17 ||
[Analyze grammar]

bilvapramāṇapiṇḍāni dadyādvai tīrthabhūmiṣu |
tāmbūlaphalanaivaidyatiladarbhodakaistathā || 18 ||
[Analyze grammar]

māsāntare śuklapakṣe kṣayāhe mātṛpaitṛke |
gajacchāyāṃ trayodaśyāṃ dravye prāpte dvijottame || 19 ||
[Analyze grammar]

gṛhe śrāddhaṃ prakurvīta pitṛṇāmṛṇamuktaye |
gṛhācchataguṇaṃ nadyāṃ yā nadī yāti sāgaram || 20 ||
[Analyze grammar]

tato'nantaguṇaṃ devamandire devasannidhau |
prabhāse puṣkare tīrthe gayāyāṃ piṇḍatārake || 21 ||
[Analyze grammar]

prayāge cātha gomatyāṃ bhāve dāmodare tathā |
narmadāyāṃ tapatyāṃ ca kuryācchrāddhaṃ trivikrame || 22 ||
[Analyze grammar]

svarṇarakṣā''pagāyāśca nārāyaṇahrade tathā |
ojasvatyāṃ ca bhadrāyāṃ tathā śatrujitātaṭe || 23 ||
[Analyze grammar]

vāmanasthalakuṇḍāgre kuryācchrāddhaṃ naro yadi |
sarvapāpavinirmuktāḥ pitaro yānti sadgatim || 24 ||
[Analyze grammar]

santānamuttamaṃ labdhvā bhuktvā bhogānanuttamān |
divyaṃ vimānamāruhya śrāddhakṛdyāti mokṣaṇam || 25 ||
[Analyze grammar]

jātakarmādiyajñeṣu vivāhe gṛhakarmaṇi |
devapratiṣṭhāprārambhe kūpavāpyādikarmaṇi || 26 ||
[Analyze grammar]

tṛpyanti devatāḥ sarvā hṛṣyanti pitaro nṛṇām |
vṛddhiśrāddhe kṛte gehe jāyate sarvamaṃgalam || 27 ||
[Analyze grammar]

kāmaḥ krodhaśca lobhaśca moho madyaṃ madādayaḥ |
māyāmātsaryapaiśunyamaviveko'vicāritā || 28 ||
[Analyze grammar]

ahaṃkāro yadṛcchā ca cāpalyaṃ laulyamityapi |
anyāyasādhanā''yāsaḥ pramādo drohasāhase || 29 ||
[Analyze grammar]

ālasyaṃ dīrghasūtratvaṃ paradāropasevanam |
ete doṣāḥ sadā tyājyāstīrthagāminarādinā || 30 ||
[Analyze grammar]

sa syādvai maṇḍanaṃ bhūmedeśasya nagarasya ca |
śrīmān vidvān kulīnaḥ syāt sa tīrthaphalamaśnute || 31 ||
[Analyze grammar]

snānaṃ sandhyā japo homaḥ svādhyāyaḥ pitṛtarpaṇam |
śrāddhaṃ devasya pūjā ca tyaktadoṣasya jāyate || 32 ||
[Analyze grammar]

utthāyotthāya snātavyaṃ pūjyau hariharau tathā |
satyaṃ vācyaṃ hitaṃ kāryaṃ dānaṃ deyaṃ svaśaktitaḥ || 33 ||
[Analyze grammar]

parāpavādabhīrutvaṃ paradāravivarjanam |
tairthikadoṣā'grāhitvaṃ sevanaṃ ca satāṃ mudā || 34 ||
[Analyze grammar]

pitṛmātṛgurūṇāṃ ca nā'priyaṃ manasā vahet |
auṣadhaṃ śākamarthibhyo dātavyaṃ gṛhamedhinā || 3 || || 6 ||
[Analyze grammar]

ekādaśī pañcadaśī caturdaśyaṣṭamīṣu ca |
amāyāṃ ca vyatīpāte saṃkrānto grahaṇeṣu ca || 36 ||
[Analyze grammar]

vaidhṛtau pitṛmātṝṇāṃ kṣayāhe śubhavāsare |
yugamanvādidivase gṛhe kāryo mahotsavaḥ || 37 ||
[Analyze grammar]

tīrthe vā gamanaṃ kāryaṃ puṇyaṃ śataguṇaṃ bhavet |
indriyāṇāṃ jayaḥ kāryo madyadyūtavivarjanam || 38 ||
[Analyze grammar]

snānaṃ dānaṃ japo homaḥ surapūjā dvijārcanam |
sādhusādhvīprapūjā ca kartavyā'kṣayapuṇyadā || 39 ||
[Analyze grammar]

ekā'pi goḥ pradātavyā vastrālaṃkārabhūṣitā |
dogdhrī savastrā taruṇī savatsā sudvijāya ca || 40 ||
[Analyze grammar]

sādhave'nnasubhojyāni sādhvyai vastrādyalaṃkṛtiḥ |
deyānyannāni vastūni yathā syādvai prasannatā || 41 ||
[Analyze grammar]

saptajanmasu pāpiṣṭha iha janmani cā'dhamaḥ |
ekāṃ dadāti yo dhenuṃ mucyate sarvapātakaiḥ || 42 ||
[Analyze grammar]

yadā'sau nīyate baddho yamamārgeṇa kiṃkaraiḥ |
tadā dhenuḥ samāgatya svaṃ putramiva rakṣati || 43 ||
[Analyze grammar]

vijitya huṃkṛtenaiva tān dūtān dūrataḥ kṛtān |
gaurdātāraṃ samādāya yāti vai harimandiram || 44 ||
[Analyze grammar]

vṛṣo dharma iti proktastīrthe dānaṃ vṛṣasya ca |
kartavyaṃ rakṣayed dharmo dātāraṃ nayate divam || 45 ||
[Analyze grammar]

grāsamātrā'pi bhikṣā sattīrthe deyā gṛhasthitaiḥ |
kuṃbhapatrādisiddhānnachatropānatkamaṇḍalum || 46 ||
[Analyze grammar]

aṃgulīyakavāsāṃsi datvā yāti naro divi |
pānaṃ śrāntatṛṣārtāya kṣudhārtāyā'nnameva ca || 47 ||
[Analyze grammar]

nagnāya vastraṃ saṃdeyaṃ devyo nayanti taṃ divam |
bhojanaṃ satataṃ deyaṃ yathāśaktyā ghṛtaplutam || 48 ||
[Analyze grammar]

śutpīḍā mahatī loke tasyānnaṃ bheṣajaṃ matam |
tena sā śāntimāyāti cānnadānaṃ taduttamam || 49 ||
[Analyze grammar]

annaṃ vastraṃ phalaṃ toyaṃ takra śākaṃ ghṛtaṃ madhu |
patraṃ puṣpaṃ tathopānat kanthā yaṣṭiḥ kamaṇḍaluḥ || 50 ||
[Analyze grammar]

chatraṃ pātraṃ tathā vidyā pustakaṃ ca surārcanam |
kanyākuśopanītāni bījauṣadhigṛhāṇi ca || 51 ||
[Analyze grammar]

ratnaṃ kṣetraṃ yajñapātraṃ yogapaṭṭaṃ ca pāduke |
kṛṣṇājinaṃ buddhidānaṃ dharmadeśakathānakam || 52 ||
[Analyze grammar]

tīrthe gatvā bahu deyaṃ tena śreyo mahadbhavet |
sarvapāpakṣayaṃ kṛtvā dātā yāti hareḥ padam || 53 ||
[Analyze grammar]

aśvamedhādibhiryajñairgayāyāṃ piṇḍadānataḥ |
yatphalaṃ syānnṛṇāṃ tatsyād dṛṣṭe dāmodare bhuvi || 54 ||
[Analyze grammar]

ekādaśyāṃ kṛtasnāno devapūjāparo bhavet |
paṃcāmṛtena saṃsnāpya snātvā tīrthodakena ca || 55 ||
[Analyze grammar]

kuṃkumāguruśrīkhaṇḍakarpūrodakamiśritaiḥ |
pūjayitvā tataḥ puṣpaiḥ śatapatraiḥ sugandhibhiḥ || 56 ||
[Analyze grammar]

mālatīkusumaiḥ śubhrairbahubhistulasīdalaiḥ |
vastraṃ yajñopavītaṃ ca dhūpaṃ caiva pradhūpayet || 57 ||
[Analyze grammar]

dīpaṃ dadyād ghṛtenaiva tailenāpi ghṛtaṃ vinā |
naivedyaṃ vividhaṃ dadyāt phalaṃ tāmbūlamityapi || 58 ||
[Analyze grammar]

prāsādapūjāṃ kuryācca dhvajadānādinā tathā |
gāṃ savatsāṃ tato dadyāt saṃsārārṇavatāriṇīm || 59 ||
[Analyze grammar]

tataḥ pradakṣiṇaṃ kṛtvā gītavāditraniḥsvanaiḥ |
vedapāṭhapurāṇaiśca vyākhyādivyakathānakaiḥ || 60 ||
[Analyze grammar]

devāgre jāgaraṃ kuryād dīpadyotitabhūmiṣu |
saptadhānyamayān sapta parvatān dīpasaṃyutān || 61 ||
[Analyze grammar]

phalatāmbūlapakvānnapūjitān parikalpayet |
vidvadbhiḥ śrotriyaiḥ śāntairbrāhmaṇaiḥ sādhubhistathā || 62 ||
[Analyze grammar]

sādhvībhiśca gṛhasthaiśca śrotavyā vaiṣṇavī kathā |
evaṃ jāgaraṇaṃ kāryaṃ rāgadveṣādivarjitaiḥ || 63 ||
[Analyze grammar]

kṛtvā jāgaraṇaṃ rātrāvudite sūryamaṇḍale |
pūrvāṃ sandhyāṃ kṛtasnānaḥ kṛtvā madhyāhnamācaret || 64 ||
[Analyze grammar]

devān pitṝn manuṣyāṃśca tarpitvā vidhipūrvakam |
kṛtvā snānaṃ pitṝṇāṃ ca dānaṃ dadyāttu śaktitaḥ || 65 ||
[Analyze grammar]

devaṃ dāmodaraṃ puṣpadhūpādinā prapūjya ca |
raivatīkuṇḍasalile snānaṃ kuryāt tataḥ punaḥ || 66 ||
[Analyze grammar]

rādhāderīdarśanaṃ vai kuryācca svarṇadījale |
tata ārohaṇavāpyāṃ pragacchecca hanūmataḥ || 67 ||
[Analyze grammar]

darśanaṃ ca prakuryādvai jalaṃ pibet tataḥ punaḥ |
parvatārohaṇaṃ kuryād yadvā''gacchet puraṃ prati || 68 ||
[Analyze grammar]

trievikramaraṇacchoḍadarśanaṃ saṃvidhāya ca |
vividhāni ca dānāni bhojanādīni sarvathā || 69 ||
[Analyze grammar]

datvā kṛtvā pragacchecca svālayaṃ tīrthakārakaḥ |
iti te tīrthakaraṇaṃ kathitaṃ mokṣadaṃ param || 70 ||
[Analyze grammar]

śrutvaitad bhojarājo'pi jagāma raivatācalam |
dadarśa mukhyatīrthāni maṃgalāni vidhāya ca || 71 ||
[Analyze grammar]

bhavaṃ dāmodaraṃ svarṇarakṣāṃ mṛgānanāsthalīm |
ambāṃ dattātreyarūpaṃ nārāyaṇahradaṃ tathā || 72 ||
[Analyze grammar]

raivatācalamālokya gaṃgāṃ gomukhikāṃ tathā |
trivikramaraṇacchoḍamandiraṃ vāmanasthalīm || 73 ||
[Analyze grammar]

balermakhasthalīṃ bhadrāṃ tathā kuṃkumavāpikām |
ojasvatīṃ somanāthaṃ suvarṇadvārikāṃ tathā || 74 ||
[Analyze grammar]

tīrthānyevaṃ vividhāni kṛtvā datvā mahīṃ ca gāḥ |
suvarṇarajatādīni ratnābhūṣaṇakāni ca || 75 ||
[Analyze grammar]

vastrāṇyannāni viprebhyaḥ sādhusādhvībhya eva ca |
dīnāndhakṛpaṇādibhyo datvā deyāni bhūriśaḥ || 76 ||
[Analyze grammar]

ājagāma skakaṃ rājyaṃ kānyakubjaṃ narādhipaḥ |
svarājñyā saha yātrāyā mahotsavamakārayat || 77 ||
[Analyze grammar]

tāvad bhojasya dṛṣṭirvai divyā'bhūt puṇyayogataḥ |
vaikuṇṭhaṃ cātha kailāsaṃ hariṃ haraṃ sapārṣadam || 78 ||
[Analyze grammar]

dadarśa suvimānaṃ ca divya mokṣakaraṃ tataḥ |
pārṣadaiḥ sthāpitastatra sastrīko divyavigrahaḥ || 79 ||
[Analyze grammar]

yayau vaikuṇṭhamevā'yaṃ mukto bhūtvā harerbalāt |
ityuktaste camatkāro raivatasya priye rame || 80 ||
[Analyze grammar]

itiśrīlakṣmīnārāyaṇīyasaṃhitāyāṃ prathamaṃ kṛtayugasantāne tīrthavidhidānādipradarśananāmaikapaṃcāśadadhika śatatamo'dhyāyaḥ || 151 ||
[Analyze grammar]